الدوحة بالنص

فى بهو فندق (شيراتون) بالعاصمة القطرية (الدوحة) كان الجميع فى حركة وانشغال.. العمائم والجلابيب الناصعة البيضاء والمراكيب (النمر) والملافح المزركشة والعصى الأبنوسية وفي الجانب الآخر اللبسات السفاري والبدل (الفل سووت) وربطات العنق (الزاهية).. يبدو أن هنالك جلسة مفاوضات على وشك البدء :
– معليش بس أنا ماشي أجيب الأولاد من المدارس وأرجع أحضر الجلسة دي لأنو الوكت إتأخر.
– وهم قاعدين يقروا وين؟
– والله الكبير بيقرأ في (الدوحة العالمية) والصغير في مدارس (المجلس القطري الأفريقي).
– والله تعرف يا (مولانا) أنا مسألة المدارس دي عامله ليا مشكلة.. أنا هسع مما جينا المفاوضات دي ولدو ليا ولدين وبت ما عارف أقريهم وين!
ذهب المفاوض رقم (1) لإحضار اطفالة من المدارس على أمل اللحاق بجلسة المفاوضات رقم 1452 بينما جلس المفاوض رقم (2) في بهو الفندق الفاخر مع بقية المفاوضين فى انتظار بدء الجلسة يرتشف من كوب عصير البرتقال الذي أمامه على صوت الموسيقى الكلاسيكية الهادئة الذي قطعها عليه صوت المفاوض رقم (3) وهو يقترب منه رافعا يديه:
– الفاتحة..
وبعد أن شال المفاوض رقم (2) الفاتحة مع المفاوض رقم (3) سأله في استغراب:
– المات منو؟
– أنت ما عندك خبر يا أخي المفاوض رقم (41) مات
– يا أخي ما معقول؟
– ومات وين؟
– مات في مستشفى (الدوحة التعليمي)
– أيوه صحيح هو ليهو سنتين راقد بتعالج هناك أصلو عيان مما كنا في (مفاوضات نيفاشا) ؟
– وجلسة الليلة دي ملغية؟
– أكيد ح تتلغى؟
حاول المفاوض رقم (2) الاتصال بالمفاوض رقم (1) الذي ذهب لاحضار أطفالة في المدارس ليخبره بوفاة المفاوض رقم (4) وإلغاء جلسة المفاوضات لكنه لم يستطع الاتصال به نسبه لأن شبكة (قطر تل) كانت مشغولة فاضطر لقيادة عربته حتى فندق هيلتون حيث يقيم.
– حاولت اتصل ليك بالموبايل لكن ما قدرت.
– الحاصل شنو؟
– يا أخي البركة فيك المفاوض رقم (41) مات.
– الله ياخ.. والله فقد كبير للمفاوضات.
– والفراش وين؟
– والله كلمنا ناس الفندق يعملوا لينا (صيوان) في الحديقة الخلفية ويقوموا بى كل الخدمات وبعدين يضيفوا لينا (القروش) فى الفاتورة!
بدأت ارتال المعزين تفد إلى (صيوان العزاء) بعد أن تم دفن المرحوم في مقابر ( شرفي بن خليفة) وقد تم نصب صيوانين؛ صيوان للرجال وآخر للنساء زوجات وبنات وأحفاد وحفيدات المفاوضين. اللواتى صدر قرار منذ السنة (الخامسة للمفاوضات) بمرافقة أزواجهن (خوفاً من الفتنة) !
في صيوان النساء كانت النساء فى (الصيوان) تبدو عليهن آثار (الروقة) و(الترطيب) وكيف لا و(الرجال) فى (المفاوضات) وهن فى (المكيفات) آخر راحات… الحنن ما حنن.. الدهب ما دهب… التياب ما تياب… الموبايلات ما موبايلات.
– عليكي الله يا (فوزية) ثوبك السمح ده اشتريتي من وين؟
– والله اشتريتو من سوق (حمد قشرة) فيهو حاجت حلوة بشكل تجنن.. عارفة الثوب ده اسمو شنو؟
– عليكى الله اسمو شنو عشان أمشي أسال عنو؟
– ده اسمو (تقرير المصير) !
– مسؤولة من الخير يا فوزية.. بيتكم الفى (المنشية) تم والا لسه؟
– والله تم من زمان ليهو كم سنة مما كنا بنفاوض فى (حركة فهود الجنينة) لكن نعمل شنو كلما نقول انتهينا من المفاوضات ونمشى نسكن فيهو يطلعوا لينا ناس جداد عاوزين يفاوضوهم!!
بينما كان هذا الحوار يدور في (صيوان الرجال) :
– والله رطوبة مكيفات الفنادق دي عملت ليا روماتيزم.. عاوز أشوف ليا طريقة ايجار (فيلا) جوه المدينة.
– أنت أحسن .. والله أنا أكل الفنادق الناشف دا عمل ليا (بواسير) واشتقنا (للملاح)
– أخبار قطع الأراضي في السودان كيف؟
– والله قالوا أسعارا طارت في السماء .. غايتو أنا رسلت ليهم القروش يشتروا واحدة عشان سنين اغتراب (مفاوضاتنا) دي ما تروح ساكت.
– بالمناسبة تفتكر ح نخلص من مفاوضات (حركة نسور بابنوسة) دى متين؟؟
– والله غايتو لو مافى (ضغوط) وتدخلات خارجية أكان سنتين أكان تلاتة.
– وهسع باقى ليك دى آخر (حركة) نتفاوض معاها؟؟
– (فى اندهاش) آخر حركة ده شنو؟؟ إنت ما أدوك جدول (الحركات) العاوزة مفاوضات؟؟ (ثم مواصلاً):
– امسك عندك بعد مفاوضات حركة (نسور بابنوسة ) دى تنتهى طوالى تبدأ مفاوضاتنا مع حركة (نمور الضعين) وبعد داك طوالى ح يبدأ التفاوض الإطارى لبحث مشكلة حركة (أسود سواكن) و..
-(مقاطعاً) والله أنا ما شايل هم (المفاوضات) الكتيرة دى؟؟
– طيب شايل هم شنو؟؟
– شايل هم دراسة ومستقبل الأولاد ديل هسه واحدين درسوا الروضة في (نيفاشا) والاساس فى (أبوجا) والثانوى هسه هنا في (الدوحة) وما معروف الجامعة يقروها وين؟؟
بينما كان المفاوضان (19) و(45) يدردشان بدت حركة غير عادية داخل (الصيوان).
عدد من المفاوضين خرجوا فى عجلة وأداروا ماكينات عرباتهم.. البعض الآخر كان يتحدث فى حالة من الحزن والانفعال…
(المفاوض 19): الجماعة ديل مالهم؟ الحاصل شنو؟
(المفاوض 45) :في حركة ما عادية ..الظاهر في حاجه حاصلة
وبينما هما كذلك إذ بالمفاوض (33) الذى جاء من خارج الصيوان يقترب منهما حيث قاما بسؤاله فى وقت واحد:
– الحاصل شنو؟؟؟
– والله يا جماعة قالوا المفاوض (27) وأسرتو كانوا سايقين العربية ماشين يودوا (قولة خير) لى ناس المفاوض (41) قامت العربية انقلبت بيهم فى شارع (الدوحة بالنص) !

كسرة :
لو حكاية المفاوضات دى إستمرت بالشكل(الطوااالي) ده ح نلاقى السودان (الفضل) أوضة وبرنده !

About these ads

33 responses

  1. بروف جبرا صباح الخير
    والله انت متفائل لدرجة وبالك طويل طولة امد المفاوضات دي !
    يا اخي والله لو استمر بالشكل ده لو صفي على برندة يرقص فيه المفتت ده يكون محظوظ.
    اخشى ما اخشاه انه الجماعة ديل بعدين يدوروا على لاهاي عشان يتموا الرقيص هناك ما يلقوه , يا اخي اقول ليك الناس بتخطو خطوة بحسنة وجماعتنا ديل كل خطوة بخطوها بينقص مترين من البلد ! احسب لي الكم وعشرين سنة كم مساحة نقصت ولو بقوا كدة حتصفى على كم ؟ ولا برندتك التحلم بيها دي يا بروف ما تفضل.
    يا اخي عجل كمل سبيلك ده وسخراته قبل ما تلتفت ما تلقى سنتمتر تجر فيه قلم في السودان اعني ما بقي من السودان.

  2. السلام عليكم ، البرف و الاخوان ، دخلت نمله واخذت حبه و خرجت ثم دخلت نمله و اخذت حبه وخرجت ثم دخلت نمله و اخذت حبه وخرجت ثم دخلت نمله و اخذت حبه و خرجت ، وبعدين الحصل شنو ؟ لا بد من اكمال النمل اولا ، و دخلت نمله و اخذت حبه و خرجت ثم دخلت نمله و اخذت حبه و خرجت سؤال خبيث : البرف بيسال عن خط هيثرو و نحن بنسال عن الخطوط ؟ ………………عجبى

  3. بدأت مفاوضات السلام في العاصمة القطرية الدوحة في يناير (كانون الثاني ) العام 2009 ، بين الحكومة السودانية وحركة العدل والمساواة ، ورفضت الحركات المسلحة الاخرى وابرزها حركة تحرير السودان بزعامة عبد الواحد محمد احمد النور ومجموعة الحركات والفصائل الاخرى التي انشقت عن الحركة وعن العدل والمساواة ، وافلحت الوساطة المشتركة من الامم المتحدة والاتحاد الافريقي ( والرجالة الأمريكية ) بهرش الطرفين برئاسة جبريل باسولي والرعاية القطرية بتوقيع الطرفين اتفاق حسن النوايا في فبراير (شباط) العام الماضي ، غير ان الطرفين سرعان ما تراجعا الى المربع الاول ( توقف الهرشة الامريكية ) بسبب اتهامات متبادلة بينهما في تنفيذ ما تم الاتفاق عليه والقصة لسة جارة ومن ثم اعلنت الحكومة ما يشبه بتعليق التفاوض مع العدل والمساواة واتهمتها بانها غير راغبة في التفاوض وتضع العراقيل ، فيما اتهمت الاخيرة الخرطوم بانها تقوم بحشود عسكرية لشن هجوم على دارفور .

  4. مهند عبد الله - العريس | رد

    يلللا يا ود الخلا ، خووووووووووووووووووووش
    الكلام دخل الحوش
    أرمي أنا راجيك من قبيل

  5. سلام
    جبرا بمناسبة البرنده ..
    سألت احزابنا الفشنكة قفلتو البرنده
    قالو ليا نوم بس واخد ليكا غمده
    ورقدتا ونعستا وسرحتا
    وانا في نومي بتقلب حرامي الحكم تلّب
    لكن يا جماعة كان جينا للحق حركات دارفور دي زاتا حيرتنا وما عرفناها دايرة شنو , وليه ما يتوحدوا ويقعدوا مع الحكومة دي بربطة المعلم ويحددوا طلباتهم . كان ساهلة كان صعبة عشان الشعب الفضل يقدر يحكم .
    والله نحنا خجلنا من الشحدة والقعاد في بيوت الناس باسم المفاوضات .
    أهن شفتو هسع امبارح في تلاتة من الناس الوقعوا اول امبارح خرخروا وقالوا ما دايرين !!!
    وهو زاتو كان ما باب رزق الحكومة دي ليه بتخلي الفيل وتطعن في ضلو وقالوا في الامثال البت كان عايش ابوها اخوها فقد الشورة .

    عازة زمان متقنعة دايما
    يوم ما شافت اولاد جيلا
    هسع ماشة وناسيه هدوما
    او متلفحة بي منديلا

  6. العزيز جبرا
    الاخوة الاعزاء
    تحية واشواق شديدة
    يا جماعة وبصراحة وبدون ثقالة ما فى زول بعرف ليهو زول يدخلنى فى البرنامج بتاع المفاوضات دى لانو انا تعبان شديد والله
    وبعدين انا والله زول مفاوض كويس جدا جدا
    انا فى انتظار واسطة من القمردينة
    ولا العنوان غلط

  7. البروف الرائع….سلام..
    والله من جوة الحزن طلعت ضحكة..
    حال مائل وريس جائل وامور متلخبطة على الآخر…
    لعن الله الظلم واعوانه..

  8. سلامات ..
    انا عندي إقتراح .. نفوض ابكرون الموجود اصلآ في الدوحه بترأؤس وفد القمردينه و التفاوض بإسمنا .. بس ياعمك بعدين ماتشتت و تسيبنا و تنوم بالكعكه كلها براك ..

    جاهزين ؟؟؟

  9. الأحباء الأعزاء … ولا أروع من تعليقات ..

  10. يا اخوانا خلوهم
    أهو قرشين حلوين
    يعني نحنا لقينا شطر (ثدي) المفاوضات دا، وأبينا نرضع!!!!

  11. دا كلو كوم …… و لمن المفوض رقم 5648 يحرد و يزعل و يكسر كراسي الفندق كوم تاني ….
    الهندي الجرسون لي كومار زميله: هادا سوداني نفر اليوم ممكن مسكل(مشكلة) انت سوي سيم سيم (زي)اكشي كومار فيلم ,,,,, امبريقي كجكج نهي زندقي( الليلة يا نحن يا هم)….

  12. سهيل..
    موافق,,لكن يرسل لى ارافق البعثة الطبية ! آيييييييي

  13. جبرا والسمار ,
    سلامات .
    والله المفاوضات دى زاتا بقت ضمن مشاكل تدهور الاقتصاد السودانى المافضل فيهو شى .
    أسى فاتورة تكاليف المتفاوضين ديل بدفعوها من ياتو بترول . غايتو أنا بقترح إنو زول منطقتو مافيها بترول مايتفاوضو معاهو والخوه فى محلها …

  14. ابو مازن عليك الله لو لقيت زول يتوسط ليك ما تنسانا وكلمنا بردو بس ياربي ودالخلا رأيو شنو في قصة المعارضة دي ؟!! من ناحية شرعية ؟ …………

  15. لكن المرة دى بالغت عديل كده…دى الوجه الآخر ..ما أقبحه !

  16. اطماع واوهام وسعى وراء القروش والسلطة
    اما امنا الحكومة آخر انبطاح كل واحد شال كلاش ادوهو منصب
    بالله العالم كلو فيهو مستشارين للريس زى ما عندنا فى السودان

  17. وصلنا لهذا الزمن الطويل من المفاوضات. لأن الحكومة لم تفهم الطبيعة الإجتماعية لاهل دارفور, وذهبت في إتجاه ترضية الكل رغم ان الكل ينشطر لعدة شطائر هي ليست فكرية,ولا ذات مدلول سياسي..لكن ذات مدلول قبلي, وحتى في القبلي تنشطر لبيوت ,والبيوت تنشطر لأسر..هذه هي قضية المفاوضات..ولازال شخصي الضعيف مقتنع بإن قضية دارفور,قضية إجتماعية,وحتى ابناءها الموجودين في السلطة جزء من القضية,وبالتحديد قضية التنمية..

  18. يا محمد عمر والله إنتا زول عسل شديد !!!

  19. سلام ياقبيلة،،
    بالله يا جبرا هو محمد عمر ده عسولي كده ونحن ماعارفين، ويعني الباقين ديل بيكونوا الرحيق ولا شنو؟؟؟؟
    سألتني يا محمد عمر من رأي، بس حبيت أقول ليك في الأول أنا لست (بمفتي) ولا أفقه كثيرا” في مثل هذه التعاملات المربوكة، ولا أدري رأي الشرع في البيسوا فيهو الناس ده شنو، لكن رأي الشخصي ومن وجهة نظر خاصة جدا” جدا” يعني بينك وبينك كدا وكلام سر في أضانك قرّب النقولو ليك، وزي ما قال ليك أشرف أبو آية ان هادي الافعال أطماع وأوهام وسعي وراء السلطة والقروش، وكلامي دا ح (يغضب ناس تانين) بعتبروا ان الناس هم ملائكة او أطهار، لا نزكي علي الله أحد ولا نجرم أحد ولكن الجواب يكفيك عنوانو وانت عايش في البلد وشايف وعارف براك الحاصل ده من شنو والواعي ما بوصوا ، وهو أن الحكومة والمعارضة أي كانت المعارضة مسلحة أم مصلحة هم عبارة عن (سماسرة)، نعم زي ما بقول ليك سماسرة، زي سماسرة السوق والعقارات البتعرفهم ديك، وأقول ليك كيف همن يتعاملوا معانا أو بنا، أنت لمن تمشي سوق العربات أو العقارات الواحد البتعرفو ده مش بتجد ألف واحد يتلقفك ويبيع لك الأماني، ويزين لك الموضوع ويرفع ليك سقف البيع في السما وحقيقة الشيئ المباع لا يساوي عُشره، في حين أنك لو أردت أن تبيع لهم يبخسونك حاجتك ويرموها ليك في الواطة، والسماسرة يلعبون بك ون- تو، وفي النهاية تمرق أنت المواطن ملوص، كذلك ما يفعله هؤلاء الساسة حكومة ومعارضة يسمسرون فينا ودي ما بتخارج معاي ، والوزارة ديك بتخسر معانا ، ونحن دفعنا فيها الشيئ الفلاني، ونحن لأننا بقنابير نشجع فيهم ، لا كدا ما صاح ، لا داك مفروض يتنازل شوية، لا ده لأنو ناضل من أجل المهمشين مفروض يكون شنو ما عارف وهكذا يا صديقي….
    ألم أقل لكم بأن الناس قد تاهت وفكت الدرب ونسوا الله فأنساهم أنفسهم، ولا سبيل للأصلاح الا بالعودة (للجذور) والأنابة لرب العباد رضي الناس أم أبو!!!
    ربنا أغفر لنا ذنوبنا وأسرافنا في أمرنا وثبت أقدامنا وأنصرنا علي القوم الكافرين

  20. يا جنوبي والله حرام عليك .. شلت حال عازة شديد انت بصح شفتها وللى بتونسنا ساي عشان لو القتو ده صح نحن فعلاً لازم نقوم بثورة ( جامدة جدي ) زي ما بقول ( الكبير أوي ) بس البيعرس عازة تاني منو ؟ بعد الفضيحة دي ……

  21. اخي جبرا والاخوه الاعزاء
    البلد دي عاملين ليها عمل والعمل دى مكتوب في عظام كل الشعب الفضل (ماشايفنن كملنا من لحم الدنيا) والعمل دى مدفون فى مقاير خارج البلاد عشان كده لازم نكون مجموعه من القمردينه ونبحث عن ابكرونا قوي عشان نلف دول العالم ونبحث عن العمل ونمرقه عشان المفاوضين ديل يقدروا يرجعوا البلد دى تانى من غير جرجره والا الحكايه ح تطول وكل يوم يطلع متمرد جديد
    كسره
    نبدا من الدوحه لكن ما بلنص

  22. الاخوة الاعزاء
    كنت بتمنى واحد يدق سدرو ويتوسط لى يدخلنى المفاوضات دى
    لكن صاحب القمردينة وسمارها ما اشتغلوا بى خالص
    اظن العنوان غلط
    عشان كدة ح امشى شارع المطاروهاك با تهليل وتكبير وانشاء الله ستسمعوا بالمفاوض رقم (66) (ابو مازن)
    وانشاء الله ما ح انساكم

  23. ابو مازن ياخوي ما عندك اي مشكله ح تكون ضمن الوفد( البطلع العمل )طبعا دى ح تكون مدته طوييييييله قول لى كيف
    كل ما انتهينا من دوله نمشى دوله تانى ونقول لسه ما وجدنا العمل وبى كده احسن من المفاوضات نلف العالم كله موش تقول لى الدوحه بس وشوف انته داير نبدا بى ياتو بلد ونحنه نبدا بيها طواااااالى

  24. محمد عمر : سلام … عازة العريانة دي قالها الشاعر عثمان احمد سعيد وكلنا شفناها … لكن انت كان لليلة ما شفت عازة عريانة تبقي مشكلة دي …تعرف ثورتك الداير تطلعا دي زكرتني النكتة بتاعت الواحد الجا لقي مرتو ( ……) قال ليها بقيتي تعملي كده والله انا خايفك بكرة تشربي سجاير .
    سهيل وشمباتي : صحي الناس دي كلها اتصلبتت مالو كان اتصلبتو انتو بس غيرو اساميكم دي .. وبرضو وكت جات سيرة الصلبطة قالو في نيفاشا واحد من ناس عيون كديس الجايين يحلوا مشكلتنا سأل الجمبو منو في ديل العرب وياتم الزنوج .
    ابو مازن : سلام .. ياخوي اسمك في المفاوضات مجرّب وكان دخلناك الشغلة بتطوّل وبدل حدود 56 بنبقي في حدود 2005 .
    بت وراق : سلام .. بدل تتعبينا وتلففينا الدنيا ما تمشي لاهلك ( الوراريق ) وكان بقي في عضم نملة بمرقو لينا . هم ناسنا الودونا الدوحة ديل ما ياهم ناس العمل زااااتو.

  25. اخى جنوبي ما انته ما عارف الشقله نحن دايرين لينا ترطيبه وكده ونزور ليتا بلاد كلها فل اوتمتيك لانفكر الليله الفطور بى شنو ولا الغدا نسوى شنو طبعا اصلو عشاء ما فى يعني ياخوي دايرين نرتااااااااااااح من الجري والشلهته

  26. ها الجنوبى دا . ما انا داير اخش المفاوضات عشان اسمى دا وعشان المفاوضات تطول ؟. وبرضو ما بنساكم حتى ولو بصالح الدعوات
    كسرة:
    مع الاعتذار لصيغة المخاطبة

  27. هههههههههههههههههههههاااى,,
    اجيب ليكم بيرة !؟؟

  28. شنباتى .. بيرة شنو يا ولدى ؟..والدنيا قبايل حج وتوبة ومغفرة ..
    تالله إنك لفى ضلالك القديم …!!!

  29. حاج السلاوى اظنو د/ شمباتى قاصد بيره بدون زززز جربتوا ، على خفيف ، والعجب لما تسخن …………. عجبى

  30. مفاوضات مرتقبة بين بروف جبرا و و…………………برعاية دولية كاملة ونصف
    من المنتظر ان تنطلق اولى مفاوضات المجموعات الموجوعة والممغوسة من كتابات جبرة الساخرة و والبروف ويضم وفد المجموعة الاولى النطيحة والمتردية وما اكل السبع والمتمكنة من اموال السدود والجبابات والنفايات , وقال عضو هذه المجموعة ان الوفد اتى بجيوب وشنط مليئة ومفتوحة وكمان بالسيخ ,وهي اي المجموعة مستعدة لدفع كل ما بقي من ايرادات البترول فقط ان (ينكعم) السيد جبرا عن شطحاته هذه*** يا اخونا للذين هم خارج الاطار الدلالي لكلمة (ينكعم , او ينطم ) وكلاهما بمعنى واحد في قاموس اهل نجد الضاربين في البداوة ويعني اسكت بقوة يشوبه التجهم وتبحلق في العيون يسحبه نظرة ممعنة دالة على الانتقام..انتهى كلامي رحمنا الله.
    هذا وقد صرحت الوساطة انها سمحت لكل عضو مفاوض ان يصطحب معه فقط زوجة واثنين من الابناء او زوجتين وفي هذه الحالة يلتزما بالا ينجبا (الزوجين )اي طفل قبل انتهاء الجولات الخمسين الاولى من المفاوضات.
    واضافت الوساطة انها تفضل ان يكون المفاوض عاذبا وعاطلا عن العمل حتى لا ترهق الوساطات بانقطاع المفاوضات بسبب متابعة البعض لاعمال البزنس التي يديرونها او الوظائف التي يشغلونها في اروربا وامريكا واحيانا السودان.
    هذا ولم يتسنى لنا الاتصال بالبروف جبرا للتعليق وما اذا كان سيتجيب للشنط الممنتفخة والمفتوحة او ان يستمر ويقابل السيخ بصدر عار كصدور اهل حمص او بني وليد.

  31. سلاوى..
    اخير ليييك تسكت قبل اجيب سيرة (الخلطة) اياها ! امممممممم..

    كوكو..
    هههههههههههههههاااى,لا انا فاصد البيرة الصاااااقطة اللى العلماء قالوا ما فوكها حاجة ! وى

  32. والله يا بروف السودان زهج من فشل الساسة من اليمين الي اليسار ومن الشمال الي الجنوب الجديد والقديم وعملتنا القديمة والجديدة اتسهكت ونحنا زاتنا اتسهكنا والله يستر

  33. تحياتى لاستاذنا جبرة ولكل الاخوة على التعليقات البديعة ودايراشاركم بالنص بتاع عازة كاملا رايكم شنو

    جننتونا
    كل زول عامل عزة حبيبتو
    وياهو براهو البيغنيله
    ياهو العارف ليك اوجاعا
    وحافظ كل اوزان ترتيله
    بس ما عرفنا
    عزة منى البيغنو ليها
    قادين راسنا بكل وسيله
    دى عازه البحتت بي كرعينا
    تراب السوق ودروب الليل
    ام عازه التانيه
    الكانت هانيه
    وكانت اسمها عازة خليل
    ياخ جننتونا
    لو بتغنو لعازه السمحة
    البت القمحة
    ست الناس المافى مثيله
    عازه الكانت لمن تعشق
    تعشق راجل عندو خسيله
    وكان الريد لما يفيض بيها
    كانت تغزلو فى منديله
    طيره و ورده وحرف صِغَيِّر
    يمكن بعض الشوق يهديله
    عازه دى تاهت
    ما لقيناها
    جينا نكوس لي عازه بديله
    جينا نفتش لي اماتا
    امها قالت عزه حليله
    قلنا هى ماتت ؟؟؟
    لا ما ماتت
    بس دى طباعه بقت ماهيله
    عازه الكان متقنعه دايما
    ما شافو الناس الناس فى جيله
    هسع ماشه وناسيه هدومه
    او متلفحه بي منديله
    والصبيان الكانو بحرسو
    آخر الليل يبقوله دليله
    زي ما شايف انت بعينك
    الصبيان دايرين توصيله
    وعازه الكانت صوتا مخبــَّـى
    زي داساهو وبيهو بخيله
    هسع شاقى الصوت الحته
    كان فى الرادي وكان فى ليله
    قلنا دى ما عازه الغناله
    عمى سرور وامين برهان
    ولا المدَّالَه كرومه الحانو
    وشدا بي شوقا وليد بطران
    اللمحوها صلاح واصحابو
    بقت اللمحة من الالحان

    يمكن ديل قاصدين العازه
    الغناله حبيبا خليل
    الاتمردغ فيها تجانى
    ومجد فيها السحر النيل
    عازه الحارب ود حبوبه
    شان فى ترابه لَمَحْلو دخيل
    خليفة المهدى اتمدد فيها
    دلق الركوه قصاد السيل
    ناس اتسجنت
    ناس اتشنقت
    وناس فى المدفع ماتو عديل
    وينو شفيعا
    وين قرشيها
    وين الكتبو كفاح الجيل
    وين تاريخا المن ترهاقا
    هل دا حقيقة ام تضليل
    وهل الناس الهسى بغنو
    بعرفو عازه بتعنى شنو
    ولا بغنو عشان مايقبضو
    وما هماهم عازه منو
    غايتو بقول بصراحه شديده
    فتشو عازه الدايره غناكم
    عازه اللتنا دى ماهاماكم
    عازه اللتنا تراب ممتدى
    حلفا ونمولى بارا تلودى
    جنينه وشندى
    طوكر دامر
    سنجه مناقل ود الهندى
    عازة اللتنا النيل والمطرة
    والجمّام الرملو مِنَدِّى
    عازه اللتنا دى حاجه براها
    دوم ونخيل لالوب وتبلدى

    الاثنين 9اغسطس 2010

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,782 other followers

%d bloggers like this: