إمتحان حســــــــــــاب

مدارس الإنقاذ (الجمهورية الثانية)
قسم الأساس
إمتحان الفترة الأولى
مادة الحساب

أجب مستعيناً بالله تعالى على جميع الأسئلة التالية مع تبيين خطوات الحل بوضوح :

السؤال الأول:

حمدان يعمل موظفاً يإحدى المصالح الحكومية مرتبه يبلغ 500 ألف جنيه (بالقديم) وهو يعول أسرة مكونة من أربعة ابناء بالإضافة إلى أمهم ويسكن فى بيت إيجار فى منزل صغير بحى شعبى بأطراف المدينة بأجرة شهرية تبلغ 250 ألف جنيه (بالقديم) أحسب كم يتبقى من مرتب حمدان الشهرى بعد خصم قيمة الإيجار

السؤال الثاني:

إذا كان حمدان يركب يوميا مواصلتين كيما يذهب لمكان عملة وكانت هاتان المواصلتان قيمة تذكرة الأولى 350 جنيه (بالقديم) والثانية 500 جنيه (بالقديم) قم بحساب مجموع المبلغ الذى يدفعه حمدان للمواصلات شهريا ذهاباً وعودة ؟! مع مراعاة تقريب الناتج لأقرب عدد صحيح جبراً للخواطر.

السؤال الثالث :

كم يتبقى من راتب حمدان بعد خصم إيجار المنزل وتكلفة المواصلات الشهرية؟!

السؤال الرابع :

إذا علمت أن منزل حمدان لا يحتوى على (أى جهاز كهربائى) وعلى الرغم من ذلك فإن قيمة ما يدفعه شهريا للجمرة الخبيثه (الكهرباء) هو 95 ألف جنيه (بالقديم) كما أن قيمة فاتورة المياة الشهريه هى 13 ألف جنيه (بالقديم) وأن قيمة رسوم (النفايات) الشهريه هى 7 ألف جنيه (بالقديم) فكم يتبقى من راتب (حمدان) بعد خصم قيمة الكهرباء والمياة والنفايات؟!

السؤال الخامس :
يذهب أبناء حمدان الأربعه إلى مدارسهم (كدارى) غير ان كل فرد منهم يأخذ مصروفاً مقدارة 500 جنيه (بالقديم) يكفى لشراء عدد واحد (سندوتش) فول (غير مصلح) : أحسب قيمة ما يدفعه حمدان شهرياً مصروفاً لأبنائه مع الإنتباه لعدم حساب الجمع والعطلات الرسمية ثم أخصم المبلغ مما تبقى له من مرتبه .

ملحوظة :
تم إعفاء أبناء (حمدان) من (الرسوم الدراسية الإجبارية) بعد ما قام بإستخراج (شهادة فقر ومسغبة) من اللجنة الشعبية .

السؤال السادس :
لحسن حظ حمدان فجميع أفراد أسرته (نباتيون) لا ياكلون اللحوم بانواعها ولا (الأجبان) ولا يشربون (الألبان) ويحبون الفول (بالزيت) فقط (حباً جما) لدرجه أنهم يتناولونه فى الثلاث وجبات فى شكل سندوتش (عيشه واحده) فى كل وجبه فإذا كانت تكلفة السندوتش الواحد 450 جنية (بالقديم) أحسب قيمة سندوتشات (الوجبات) الشهرية ثم أخصم المبلغ مما تبقى له من مرتبه (إن كان هنالك بقيه)
تنبيه :
حتى لا تخطئ فتفقد درجات السؤال قم بخصم وجبات فطور (الأولاد) – ما عدا الجمع والعطلات الرسمية – مع إضافة مبلغ (ألف جنيه يوميا) بالقديم هى قيمة فطور حمدان بالمصلحة

السؤال السابع :
لدى جميع أفراد أسرة حمدان ( لحسن الحظ و لسوءه فى أن واحد!!) مرض وراثى باللثه يمنعهم من إستعمال أى نوع من (معجون الأسنان) لذلك فهم يستخدمون (المسواك) فإذا كان كل فرد منهم يستهلك مسواكا واحدا فى الأسبوع وكانت قيمة (كل 3 مساويك) تساوى 1000 جنيه (بالقديم) أحسب إجمالى قيمة المساويك المستهلكة شهرياً ثم أخصم المبلغ مما تبقى من مرتب حمدان (إن كانت هنالك بقية)

السؤال الثامن :
لا يقوم أفراد أسرة حمدان (بكى ملابسهم) بل يكتفون بغسلها فقط ويستخدمون (صابون الغسيل) لغسيل الملابس و(الإستحمام معاً) بواقع (لوح صابون) لكل فرد أسبوعياً فإذا كان كل 5 ألواح صابون 2250 جنيه بالقديم أحسب إجمالى قيمة (الصابون) المستهلك شهرياً ثم أخصم المبلغ مما تبقى من مرتب حمدان (إن كانت هنالك بقية)

السؤال التاسع :
لا يتناول افراد اسرة حمدان (الشاى) بل يكتف كل فرد منهم بعدد 2 ملعقة سكر صغيرة فقط فى اليوم (مذابه فى الماء) فإذا كانت معلقة السكر الصغيرة الواحدة تحتوى على 5 جرامات من السكر أحسب كم جراماً من السكر تستهلكة أسرة حمدان شهرياً ثم أخصم القيمة الإجمالية مما تبقى من مرتب حمدان (إن كانت هنالك بقية) علماً بان سعر رطل السكر هو 1000 جنيه بالقديم وأن الرطل يساوى 454.5 جرام

السؤال العاشر:
إذا كان منزل حمدان يتكون من غرفتين ومطبخ ودورة مياه فكم شخصاً ينام في كل غرفة علماً بأنه لا يمكن لأحد أن ينام في فى الحوش نسبه لجحافل جيوش البعوض وعدم وجود ميزانية للعلاج ؟!

السؤال الأخير:

هل تستطيع أن تحسب المتبقي من راتب حمدان للشهر بعد القادم بعد سداد الديون المستحقة لهذا الشهر والشهر الذى يليه إذا أمد الله فى عمره ولم يمت بفقر الدم أوتطاله كشوفات (الإستغناء عن الوظيفه) والشنو ما بعرفو داك !! علماً بأن هذا الإختبار قد خلا من أشياء أساسية كثيرة كالعلاج والدواء و(الكساء) و(المواجبات) و(الحياة نفسها) !!! !!

سؤال اختياري (خمس درجات إضافية) :

أ- هل لديك أى إقتراح يقلل من منصرفات حمدان بحذف بعض البنود (البذخية) !!
ب- هل من نصيحة توجهها لحمدان ؟؟!!

كسرة :
هذا الإمتحان تم وضعه قبل سنوات (أيام الجمهورية الأولى) نعيده اليوم وقد تضاعفت أسعار السلع بينما مرتب حمدان في (بكانو) لم تطرأ عليه أى زيادات !!

About these ads

30 responses

  1. في شبهة فساد هنا ،،، يعني لو رجعت للسؤال السادس حتلقي انو حمدان واسرته بيتناولوا ثلاث وجبات في اليوم ،،، والوجبات دي فول وفيه زيت خليت بالك ،،، يعني ما موية فول ؟! عليه لا يخلو الامر من حاجتين : يا اما حمدان ده حرامي او مبذر !

  2. السلام عليكم ، البرف و الاخوان ، مافى امل لى حمدان الا صاقعه تريحو من ام قدود لكن رغم ذلك عليه انتظار الخريف لتتنزل عليه تلك الرحمه ، و الى ذلك الحين احسن يشوف ليه جامع مدنكل و يبدا فى التسول ، سؤال عكر : هو فعلا اول ايام الحكايه صعبه ، لكن بعد كده القصه حتبقى حلوه ، و حيبدا يجدع الفكه بعيد و يقول خمسميه بس ؟؟؟ ………….. عجبى

  3. اما حمدان حرامى
    او ساحر
    او عندو بركات
    والغالب الثالثه او التانيه لانو مافى شئ فضل يسرقو التماسيح خمت السمك كلو
    بمناسبه الاسراف يامنعم رايك شنو فى الجلابيه الابسها عمك جبرة واولادو ,,, جاب القماش دا كلو من وين
    دايرين جواب ياجبرة ؟؟؟؟؟؟؟
    كسرة : والله بالجد حسبتها صعبه صعبه صعبه والله كريم برضو على الشعب
    لا يغير الله مابقوم حتى يغيروا ما بأنفسهم صاح يا ود الخلا

  4. انو حمدان دا يقوم يضيف صفر لل(500) ويحذف صفر من باقي الارقام –طبعا انا مشترك جديد وما مذاكر كويس بالاضافة لسيجارة كانت مرة شديد

  5. حاج أحمد السلاوى | رد

    راسب … راسب … راسب ..فى الإمتحان أبو أسئلة تعسفية دا لأنى ما قدرت أجاوب أى سؤال .. حتى الإختيارية منها ..يعنى أنصح المسكين حمدان وأقول ليهو شنو ؟ هو فضل كلام تانى الزول عشان يقولوا .؟. ما الباشمهندس الكهربائى قال كل الكلام ولخص الموضوع كوووولو فى ندوة الجامعة الشهيرة ( شفتوها ..ولا لسه ) ..
    والحق كله على الشعب السودانى اللى كان لازم يتق الله ويتجنب المعاصى والموبقات ويرضى بما قسمه الله من حكام أوفياء أنجزوا كل ما وعدوا به قبال 22 سنة والدليل إنهم رجعوا وتحالفوا مع الناس الإنقلبوا عليهم ..وإن شاء الله بعد 100 سنة ضوئية كل شى حيتصلح ويبقا عال العال ..
    البروف .. الكتاب الأسود بتاع مهارات الإبداع والشنو ما بعرفو داك … طلع أسود ..,لا أبيض ؟

  6. الاخوان الأعزاء لكم التحية
    زمان كان في واحد اسمو الحاوي أكيد ياكوكو انت بتكون خشيت الحاوي….
    واحد قال لابيه با أبوي أنا عاوز اخش الحاوي قال ليه أنا الحاوي زانو … بصرف ماهيه كم ….؟؟
    وبصرف عليكم بيكم. ..
    فتكبد حمدان ده حاوي ،،،.. 

  7. الأحباء الأعزاء سلاااام
    أخونا السلاوى باص ثرو ولدنا الدكتور شمباتى
    ما قدرتا أتصل عليكم وأشكركم عشان موبايلي إتسرق والأرقام راحت .. الكتاب وصل .. تحياتي وشكرى الجزيل

    كسرة :
    ده الموبايل الثالث يتسرق في الكم شهر الأخيره .. مشيت إشتريت واحد 3310 بتلتين جنيه عشان الحرامى لو لقاهو واقع ما يدنقر يشيلو !!

  8. وروروووووووووووووك…
    فى حياتى ما سقطت فى الحساب !
    الله يجازى الكان السبب !
    اهئ اهئ اهئ…

  9. الحبيب جبرا..سلام وشوق ومحبة…\
    كفارة وبرة الجات على كدة ! كان ممكن تكون العربية ! وى…
    لكن انسرق كييييفن !؟؟ يا انت محمل او ملياااان قروش ! اممممممممممم

  10. الاخ منعم..سلام..
    اشد على يدك,,فلنبكى سويا على (حمدان الغلبان) وعلى وطن كان اسمه السودان…

  11. ما عندها غير حل واحد التوكل علي الله
    ونعم بالله

  12. المطلوب معرفة عندنا كم حمدان في الاول لانو لو حمدان واحد فقط السؤال سهل الاجابة عليه

  13. حاج أحمد السلاوى | رد

    شنباتى .. وكمان برا خجلة بتسال ابو ناجى الموبايل إتسرق كيف ؟.إنت نسيت موبايلك الكان عاجب البنوت وإتسرق منك عينك .. عينك . وقمنا عملنا ليك كشف ( مش كشف حال .. أقصد زى كشف العريس ) ..

  14. سلام ياقبيلة،،،
    لازال مرتب حمدان في بكانو بينما تضاعفت أسعار السلع مرات ومرات!!!!!
    الأجابة ذكرها أبو آية أشرف ولكنه حدد الأجابة الخطأ، فحمدان ياصديقي لا هو بساحر ولا هو بصاحب بركات، فماذا يكون يا تري؟؟؟؟
    أنت ياجبرا براك تتحدث الليل والنهار عن الأختلاسات ونهب المال العام وأنتشار الرشوة وفساد الذمم والاخلاق، فمن هو صاحب هذه الأبداعات والفنون في سرقة المال المصون؟؟
    حمدان ليعيش ويحافظ علي ما تبقي له من كرامة وأسرة بيتعاطي الرشوة بس وبيسرق قدر البقدر عليهو أو بيقع تحت أيدينو، وغيرو بيسرق ويخون الأمانة التي كُلف بها لأنه جاء من بيئة أقل ما توصف بها أنها أنجبته، فماذا تتوقعون منه غير ذلك، ففاقد الشيئ لا يعطيه!!!
    حمدان مبسوط وتعود علي اكل مال غيره ومديره يعلم ذلك وهو أكثر أنبساطا” منه لأن حمدان يسهل له نهب المال العام ويساعده علي ذلك، ووزيرهم اكثر فرحا” وأنبساطا” طالما ان مرؤوسيه يغضون الطرف ويصمون آذانهم ويستغشون ثيابهم، فمن اين يأتي التغيير؟؟؟
    يُقال أطلب الخير من بطون شبعت ثم جاعت فالخير فيها باق، ولا تطلب الخير من بطون جاعت ثم شبعت فالشح فيها باق…..
    فعلا” يا صديقي أبو آية لن يُغير الله ما بقوم حتي يُغيروا ما بأنفسهم،،،،،
    والجواب يكفيك عنوانو أو هكذا قالوا!!!

  15. دا انا غلبااااااان | رد

    دا انا حمداااااااااااااااااااااااااان

  16. يا جبرا بتبالغ انت ما عارف انو الامتحان دا صعب شوية
    في اولاد صغار سجلوهم في مدرسة الجمهورية الثانية دي راعي ليهم اديهم حاجة يباصو بها
    مثلا بسكويتة دائرية الشكل قطرها 3 بوصة كيف يمكن غمسها في كباية شاي او اوفلتين باللبن قطرها 2.5 بوصة
    كسرة:
    علي ال….. انت ما عرفت الافلتين دا شنو لكن الاولاد ديل بعرفو ما تخاف

  17. يا ود الخال اقصد الخلا
    والله كلامك في محلو بس العمل شنو ؟؟؟؟
    أكيد العمل عمل ربنا الفراج ذو القوة المتين .
    تحياتي و وين يا إخوانا اللبناني المظلل اقصد جنوبي تحياتي لكم جميعا ً ً ً

  18. وفقا للمعطيات اعلاه الزول ده طلع مديون -153,960 جنيه بالقديم .. يعني نهاية السنه بيكون مطالب ب -1,847,520 وده طبعا من غير العلاج والملابس والاشياء الكمالية دي .. طيب اذا الاولاد نفسهم في كنتاكي او اي باد او اي فون والمرة محتاجة توب جديد اخبار السخانه شنو عايزين تلاجة ومكيف.. وشاشة ال سي دي وماكيرويف.. .. الولد قال عايز عجلة البنت محتاجة كمبيوتر .. يا جبره انت بتهظر ولا شنو يعني كيف راتب 500 الف بالقديم.. الا يكون الناس دي عايشه في العصر الحجري غير كده بيقى الكلام ده ضربا من الخيال…

  19. هوووووووى يا سلاوى,,ما تعمل لى سمعة ساى…
    كشف شنو السويتوهو!؟؟
    كتر خير نيام العمل لى قصيدة آنذاك !

    1. هسع حمدان ده بكون عارف انو في حاجة اسمها سياسة حكومة وانو بيترتب عليها الضيق الهو فيهو ده ‏؟ ولآ بكون فاكر انو ده قدره ومستسلم للوضع ‏؟ غايتو لو عارف ح يتعب ‏..جبرا ‏
..‏ إستايل ‏
القمردينه ‏
الجديد ‏
ده ‏
مريح ‏
في ‏
مشاركات ‏
الموبايل..شكرا

  20. لقيت الحل
    جلس الطالب (نجيب) يفرك قلمه لبرهة ثم أجري بعض المعادلات وسلمها للأستاذ الذي صاح منبهرا _ صاح يانجيب – ونجيب هو ابن (المخزنجي – عكاشة) وكان والده مصاب بنفس (داء حمدان) بداية أيام الجمهورية الأولي- وبدأ يراقيب أمين المخزن وهو يزداد في الوزن ويلبس أنظف حتي ان فطوره تحول من (بوش) الي (دايركت دليفري) من أرقي الكافتيريات…(عكاشة) كان يصرف 500 الف (بالقديم 200 دولار ) وهسع = 100 دولار- عكاشة أعمل فكره (وركب الموجة) فقد علم ان امين المخزن بعد شراءه لعدة قطع سكنية في الرياض والطائف – طار عديل (للشارقة) وعمل ليهوا (شقة) وأصبح كثير الغياب… عكاشة (أفتي نفسه) من أفقر مني .. من أفضل مني .. طيب لو أنا ما أخدت حاجة وأصلها حتتلهف _ وبعد سماعه ببشارة الجمهورية الثانية وتقرير المراجع العام – (وموضوع الحكومة العريضة) علم أنه (دقت ساعة العمل… الي الأمام) اكتسح كل شيء = ببساطة كتب التلميذ نجيب عمل تحليل للأسماء (حمدان من حمد – فصبر فصار فقران) أما والدي (عكاشة من عكش … فصار غنيان) – وعليه نصح حمدان بمواكبة (التعديلات الدستورية) – ولوفرضنا ان حمدان كان يعمل في (مكتب العمل) وليس هناك شيء يمكن (عكشه) – يمكنه (تحريض كام عامل – حسب اللوائح – باغضاب رب العمل – حتي يفصلهم تعسفيا – فيستلمون مستحقاتهم بالزيادة وعملوا (أبو القاسم) مع حمدان الذي فسر لهم البنود الخفية في لائحة العمل … يعني أي شيء في البلد دي – تعصروا بيطلع فكة .

  21. يا ناس عندي سوعال (ديكي: يعني قبل ما تكمّل السؤال يجيك سؤال تاني) تبع الامتحان: من يوم كتب البروف الامتحان قبل سنوات وحمدان عايش…. لو ما مات جوع ما مات كمد ليه؟ وديونو بقت كم؟
    والنعمان بن المنذر أطلق اسم ( عبيد العصا ) على بني تميم ليه؟ ولو لقانا نحنا كان يسمينا شنو؟

  22. يبقى إشتغل رقاصة ويتكل على الله

  23. انا بقول لى حمدان لو ماقادر على معيشة الخرطوم والوسط قدم استقالتك وامشى ديوان الذكاة يدوك حق الرجوع لى بلدك
    دا الحل والاقتراح لى حمدان مافى غيرو

  24. و حمدان اخبارو شنو هسة؟؟

  25. بسم ان تقبلو بي لأول مره .
    نقس الأسئله لكن بطريقة حساب المثلثات :
    ٍ1 – الوزير قال مرتبو 11000 بس في الشهر ونائب الرئس مرتبو 6 او 8000 المطلوب اثبات ان نائب الرئيس وظيفته اعلي من الوزير .
    س2 – الوزير قال بدو تذاكر 20000 جنيه كل سنتين المطلوب تحديد الوجه والبلد التي قيمة تذاكرها 20000 جنيه

  26. تبقي للاخ حمدان مبلغ 30 جنية بعد هذا البزخ كلو و بختو و المفروض يكون اسمو حمدان الشبعان
    و علي فكرة هناك وسيلة لتوفير نفقات المواصلات يقوم يشتري ليهو عربية سكند هاند و يدفع بالتقسيط
    و او بدل هو يذهب للعمل نخلي الشغل يجي لحد عندو

  27. انا بقول لى حمدان لو ماقادر على معيشة الخرطوم والوسط قدم استقالتك وامشى ديوان الذكاة يدوك حق الرجوع لى بلدك
    دا الحل والاقتراح لى حمدان مافى غيرو

  28. السوال الاول……..500 مرتب حمدان – الايجار 250 = 250 جنيه المبلغ التبقي السوال الثاني مجموع المبلغ الذى يدفعه حمدان للمواصلات شهريا ذهاباً وعودة ؟51 جنيه السوال الثالث كم يتبقى من راتب حمدان بعد خصم إيجار المنزل وتكلفة المواصلات الشهرية؟! 199 جنيه السوال الرابع قيمة الكهرباء والمياة والنفايات؟!115 جنيه السوال الخامس ما يدفعه حمدان شهرياً مصروفاً لأبنائه 60 جنيه السوال السادس الثلاث وجبات فى شكل سندوتش243 جنيه السوال السابع قيمة المساويك المستهلكة شهرياً 4 جنيه شهري السوال الثامن قيمة (الصابون) المستهلك 9 جنيه شهري السوال التاسع السكر تستهلكة أسرة حمدان شهرياً 146 جنيه شهري السؤال العاشر الله المستعان السؤال الأخيرالمتبقي من راتب حمدان للشهر بعد القادم بعد سداد الديون المستحقة لهذا الشهر حمدان مديون 218 شهري علما بان اسرة حمدان تعيش تحت خط الفقر ..وهزا حال حمدان واسماعيل وحسن العم احمد والخال اراهيم و…………………………………..الخ هزا حال كل مواطن سوداني لا من كان ……………… الهم لك الحمد مل السموات والارض ………………

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,754 other followers

%d bloggers like this: