أدوهو الأقطان

قام البرلمان بتشكيل لجنة من وزارتي العدل والشباب والرياضة والبرلمان نفسه والمراجع العام لتقصي الحقائق حول (مهزلة) ما يسمي بالمدينة الرياضية والتى قام البعض ببيع معظم مساحتها كقطع سكنية وإستثمارية وذلك بمبلغ 378.832.500 مليون دولار!!
وهذه اللجنة التى تم تكوينها يا سادتي مهمتها أن تتقصي الحقائق (وتعرف لينا القروش دى مشت وين) وكالعادة فإن هذه اللجنة مثلها مثل لجان تقصي أخرى (تعلمونها) سوف تقوم برفع تقريرها قبل قيام الساعة (بشوية) !
ما دفعنى لكتابة المقال هو أنه والأمر هكذا (وما عارفين القروش دي مشت وين) إذا بالسيد وزير الدفاع (أطال الله بقاءه) يقترح أن يتم أصدار قرار من مجلس الوزراء يقضي باستقطاع مرتب يوم من العاملين بأجهزة الدولة لصالح تشييد المدينة (المنهوبة) !
العبد لله شخصياً يؤيد إقتراح السيد الوزير بل ويزيد عليه بأن يتم تعميم هذا النهج الذي يقضى باستقطاع يوم من مرتبات العاملين بالدولة كلما قامت الحكومة بتبديد أموال (المسلمين) ثم إستعصى عليها إستعادتها كأموال هذه المدينة التى تبلغ (380 مليون دولار) بس .
وبما أن حكاية إستقطاع يوم دى ح تنتشر مع إنتشار وكثرة الأموال التى (ودعناها الله والرسول) فلا تتفاجا عزيزى المواطن إذا ذهبت لإستلام (مرتبك) الشهري ودار بينك وبين الصراف ما ياتي وأنت تنظر للمرتب الهذيل الذى أعطاك له :
– ده شنو الأديتنى ليهو ده ؟
– دى ماهيتك بتاعت الشهر ده !
– ومالا (حسيانة) كده وشوية؟
– عشان الإستقطاعات !!
– (في غضب): إستقطاعات شنو؟
– إنتا بس برِّد نفسك الحار ده شوية وأهدأ وأنا أقول ليك
– كويس يلا ورينا الكلام ده كيف؟
– أيوااا أقول ليك (يمسك بعدة أوراق أمامه) إنتا مش عارف إنو في تقاوى فاسدة دخلت البلد والمزارعين الموسم الزراعي بتاعهم ضرب وكانت عليهم مديونات عند البنوك وقاموا سجنوهم؟
– وأنا مالي ومال الشغلانية دى؟
– مالك كيف إنتا يا زول ما مسلم وللا شنو؟ مش المزارعين ديل أخوانك في الإسلام والإسلام حض على المؤازرة والتعاضد !
– وما برضو حض على ردع الناس الفاسدين
– يا أستاذ قصة الردع دى هسه خليها أنا بتكلم ليك عن التكافل !
– تكافل شنو يازول أنا ذاااتي عاوز اليكفلنى !! (في عصبية) أدونا باقي ماهيتنا بلاش إستهبال
– يازول إتكلم كويس ده ما إستهبال ده قرار جاي من فوق (يسلمه القرار) أقرأ هنا .. ده مش ده قرار بإستقطاع مرتب يوم لدعم المزارعين المتأثرين بالتقاوى الفاسدة ؟
– كان كده الله يكون في عوننا !
– طيب أجيك للإستقطاع التاني ، طبعن إنتا عارف إنو المطارات واجهات الأمم ؟
– ياخي واجهات وللا برندات خش لينا في الموضوع طوااالي ..
– (مقاطعا) : ياخى الحكومة عاوزة تطوركم وبتعمل ليكم في مطار جديد !
– ما قالو في صناديق قاعدة تمولو
– أيووا كويس إنك عارف قصة الصناديق دي .. عشان عاوز أقول ليك إنو قروش التمويل بتاعت الصناديق دى الحكومة إحتاجت ليها في حتة تانية وقامت شالتا !
– وأوعا تكون عايزة ترجعا مني !!
– أيوااا عليك نور .. (يسلمه القرار) أقرأ هنا ده مش قرار بإستقطاع مرتب يوم لإنشاء المطار الجديد؟
– طيب والإستقطاع البعدو !
– طبعن أكيد تكون سمعتا بالتلاته مواطنين الماتو عشان أكسجين في المستشفي مافي ؟
– أيوه سمعتا بيها !
– أها مش الحكومة مفروض تدفع الدية لأهلهم؟
– وأوعا أكون أنا الح أدفعا ! ياخ أنا الكتلتهم ؟
– ياخى ما تنفعل المسالة أصلو مشاركة وتضامن وكده .. (يسلمه القرار) أها أقرأ هنا ده مش قرار بإستقطاع مرتب يوم لدفع دية الناس الماتت بسبب عدم وجود الأكسجين !
– طيب واليوم أقصد والإستقطاع البعدو !
– طبعن إنتا عارف المواطنين الإنضربوا في سوق المواسير !
– (يضحك متألماً) : والله حكاية ! وأنا دخلي شنو في القصة دى ؟ما ينضربو كان إنضربو أنا مالي !
– كيفن دخلك شنو؟ مش إنتا مواطن والمواطن لازم يساعد أخوهو المواطن؟
– طيب ما يساعدوهم الناس بتاعين (الكسر) الغشوهم وشالو قروشهم ديل !
– ياخى حكاية إنو الحكومة ترجع القروش من المتهمين دى قصة طويييييلة ؟ عشان كده خد أقرا (يسلمه القرار) .. ده قرار عملتو الحكومة بإستقطاع مرتب يوم من أجل ضحايا سوق المواسير؟
– (في تهكم) : والإستقطاع البعدو ؟
– الإستقطاع البعدو ده عشان طريق إكمال طريق الإنقاذ الغربي !
– ده مش بتاع (خلوووها مستورة)!
– ياهو ذاااتو
– ده مش كونو ليهو لجنة ليها سنين عشان يعرفو القروش مشت وين !
– ياخى دي قصة طويييييلة وكل اللجان والبرلمان ما عرفو الشال القروش منو؟
– طيب وأنا مالي ؟
– مالك كيف؟ ده (طريق قاري) ومشروع وطنى وإنتا لازم تساعد فيهو .. خد أقرا (يسلمه القرار) .. ده مش قرار بإستقطاع مرتب يوم من أجل إكمال طريق الإنقاذ الغربي ؟
– (ينظر إليه في شفقة) : أها أقرأ ليك باقي الإستقطاعات وللا خلاس آمنتا ؟
– يابوى لا تقرأ ليا وللا أقرأ ليك (في غضب وهو ينصرف) شيلو الباقي ده أنا ما عاوزو
– يا أستاذ تعال هنا شيل باقي مرتبك
-(وهو يبتعد) : يا زول قلتا ليك ما عاوزو .. شيلوهو أدوهو (الأقطان) !

كسرة :
يوم واحد إستقطاع ما مشكلة يعنى الماهية بدل ما تخلص يوم (خمسة) في الشهر ح تخلص يوم (أربعة) !

كسرة (ثابتة) :
أخبار الخط شنو؟

About these ads

22 responses

  1. يا استاذ الخط ح يطول شكلو
    خلينا في القال عهد سياسات التطهير والتمكين في الخدمة المدنية انتهي
    وخلونا النشوف آخرتا

  2. اخي جبرا والاخوه الاعزاء
    وين دعم ترعتى كنانه والرهد سنين خصموها مننا خبره شنو
    الخط الخط الخط دا ح يجننك ويسموك الفاتح خط

  3. ده كلو عرفنا، يا ربي قروش الزكاة بتاعة القناة (الهوائية) دي حا تندفع برضو من الماهية؟؟؟

  4. السلام عليكم ، البرف والاخوان ، كيف خططتوا ، اريت حالكم مواسير ، و امسيتوا منادير ، تانى انا شايف بتاع التكسى التعاونى ظهر و اللعب فى سيد شباب العملات زى ما قال اخونا اريتكم بى حاله ، تخيلوا واحد يتنازل من مية مليون جنيه ، و الله دى كان قعت ساكت الا تكفيك لى جنى جناك ، سؤال مليونى : الناس دى ما يدونا معاهم عضه ؟ ………… عجبى

  5. جبرا والسمار .
    سلامات .
    والله ياجبرا فى واحد منكوب جدا وإنت نسيتو وبيحتاج مننا لى مرتب يوم من جميع الموظفين الغلابة عشان يساعدوة الوزير الاتسرقت منو الدولارات واليوروهات من بيتو وقال أمانات . موش بالله محتاج لى كشف.؟
    الله لييييييييينا…

  6. الاخ جبرا
    عليكم الله استقطاع يوم لدعم زواج الشباب و الشابات البايرين و حل مشكلة العنوسة
    و لكم جزيل الشكر

  7. إخوانا الاعزا جميعا لكم التحايا
    الموضوع في اوله ذكرني موضوع كنانة والرهد زي ماقال بت وراق يظهر هو مغترب خصمو مننا هنا خصم لترعة كنانة وبعد الحفر خخمو مننا حق الدفن يا إخوانا نحن يتحفز في الترعة دي تلاتة سنين ودفناها في سنتين الله يرحمها .
    زكرن موضوع الخصم ده خصمو من واحد خمسمائة ريال لنصرة فلسطين قام صاحبنا أتبرع بالباقي لإسرائيل قال عشان نخلص مرة واحدة …
    نحن مرتب يوم ولا كان شهر يخلصنا ؟؟؟؟؟؟؟

  8. والله بي طريقتكم دي ح يجي يوم الموظف يمشي يدفع للصراف الفرق !!!
    وزير الدفاع ده بذكرني مجلة اطفال زماااان الصورة حقت ( ابحث عن فضولي ) بالله في اي بكان تلقاه . هسع هو الحشرو شنو ؟ ولآ يا ربي يكونوا ضموا الشباب والرياضة للدفاع !!
    بالله الزول ده انا شايل همو ليل نهار يا ربي ح يسوي شنو مع سلفاكير القاعد يجمع في فلذات اكباده وكمان الجنوب بقي دولة مستقلة وممكن اصدقاه ناس اسرائيل يجو بالدرب عدييييل ويحاربو معاهو .. وهو قاعد يقترح لينا في الزي ده … الراجل ده اهبل ولآ شنو !!؟ أجي ..والله ما فضل إلا ينظم لينا بطولة سباق حمير …

  9. انت عارف يا استاذنا موضوع الخط دا زكرني زمان عندنا في توتي في واحد من ظرفا المدينة عندنا (ظرفا الجزيرة ) المهم جا يبيع لي زول قطعة ارض وكان ارضو بلعه البحر جاب المشتري علي الطبيعة وقال لي الواطة دي تبدا من هنا ليييييييييييييييييييييييي وقام شال لي حجر ورما في البحر قال لي شفت الحجر دا وقع وين بس دي نهاية الواطة المشتري قال لي انت يا حاج بايع لي ملاحة ههههه

  10. الاخوان .سلامات .
    أمبارح سلفاكير قال .(ونحن بنقفل فى آبار البترول لقينا الآبار الحقيقية أكتر من المسجلة فى الورق أتارى حكومة الشمال دى كانت مستكرتانا فى البترول دة فى السنين الفاتت دى كولها .)
    ومن هذا الاتهام أنا بقترح إنو من هسى يخصمو مننا مرتب يوم لأرجاع بترول فرق الآبار المنهوب قبل ما أوكامبو يجى يتهمنا بالسرقة ويفضحنا على الملاء الدولى…

  11. محمد عبد الرحمن بابكر .. سلام
    انت من توتي ؟ ياخي نحنا زمااان كنا بنجي قاطعين عوم من الموردة ونجي جناينكم نسرق ( القشطة ) عليك النبي تعفي لي وكلم ناس توتي يعفوا لينا … عمك بقي باقي عمر … لكن امانة قشطتكم ما كانت سمحة .. يوما ديك لقيت واحد شايلا جمب كبريكم اشتريت منه لكن ما عجبتني زي زمان …ولآ حق الحرام سمح ما عارف !! بالله اتاري انا وطني قدييييييييم وانا ماعارف …..

  12. يا حبايب .. تحياتي ،، وحتى القمردينة نقصت ..
    إقتراحي في هذا شأن الإستقطاع إن تستقطعو راتب الشهر كلو .. ويورونا قائمة بالجهات المشت ليها الأيام .. ونمشي مقابل كل يوم (نفطر ونتغذى ونتعشى) مع المسئول التم الإستقطاع لصالحه … والمسئول البمرض عندو الزول الجاي ماكل عندو ملزم يعالجو … والفاتورة التجي في يوم المسئول عليه دفعها … والمرتو تتوجع في يكون المسئول مسئول من فاتورة الولادة .. وهكذا .. وبكدا نكون خلينا ليهم الكورة في ملعبهم .. وإلا تاني ما يفكروا يستقطعوا مننا .. !!!
    لصقة:
    اللهم أرنا فيهم دلائل قدرتك … لا تغادر منهم أحداً .. من شارك ومن بارك .. لا تغادر منهم أحداً

  13. والله المصريين مشوا لوراء 20 سنة ونحن اتقدمنا 30 سنة لقدام .. بس فى النصب والاحتيال.. يعنى بعد ما تعبوا قام ادونا الراية

  14. الناس فى شنو والوزير فى شنو

    الناس روحه طلعة

    وتقول لى المدينة الرياضية

  15. حاج أحمد السلاوى | رد

    جنوبى .. دا مش الوزير القال عن غزوة خليل ابراهيم .. قال كنا متابعنهم مما طلعوا من تشاد ودخلوا حدود السودان.. لاكين لسوء الحظ الفرنسيين كاانوا بيساعدوهم بالستالايت وغيروا مسارهم ..
    عمرك شفتا ليك وزير دفاع بيقول كلام زى دا ؟؟
    خلونا فى المهم ..وعاوزين نعرف الخط راح وين مهما كلف الأمر ..وعاوزين نعرف منو الشطّف القرد ؟
    سمعتا تحت تحت قالوا فى رقصة اسمها رقصة النبق .. الرسول أكان فى زول عارفة يقول لينا عليها ..عشان نكون عارفين بس ..وما نبقا زى الأطرش فى الزفة..

    1. ياااهو زاااتو المعتمد علي الحظ ده … هو يتابع خليل كيفن هو فاضي من متابعة عمر ؟ وقال برضو نحنا خليناهم يدخلوا ام درمان عشان نكشف حقيقتم للناس !!!! وبالله ولاااا إستقال !!! ما علينا سيب الخلق للخالق …
      هو خليل زاتو تقول جايب بتاعين ترمس الاذاعة من شركة الكهربه ما عارفنها !! هسع لو كان ذاع بيانو الناس دي كان تكون جارية لي يوم الليلة …..
      رقصة النبق دي ياها ( الحت ) حق زمااان والناس تكورك حتيهو حتي .. حتي .. وكمان بمناسبة القرد الشطفوهو ده في رقصة اسمها القرد وتعال شوف اسامي الاغاني بقت شنو / ولّع لي النحرقو / حريقة تحرق الحب ده / بتسلي بيكي / طاعني دايما بي ورا / رافع القزاز / الدنيا نت وايميل / انا بكرهك / وكمان الفنانين بقوا داك يا المشاط والجل والكريمات والسلاسل ويمكن تلقي الفنان مع العروس في كوافير وااحد .
      العطبراوي لو كان حي كان قال ( كُنا من نفر عمرو الارض …. ) .
      ناس دارفور قالوا ( بلدك كِن دخل فوقا البوت شيل إيالك فوت ) …
      يا ود توتي : يعني ما عافي لينا ؟

  16. وتفتكرو الاستقطاعات دي ماعاوزه وزاره ووزيردوله ووزير اتحادي وامانات وصناديق وجهاز استثماري للاستقطاعات وهيكل كامل يدير التبرعات دي وشويه شويه الحكومه تقلبها يوميات للموظفيين ,,,والمدينه “الكانت” الرياضيه لسه حتكون هيكل
    .
    زي زولنا القال خطه اسعافيه لمده ثلاث سنوات ,,والله ثلاث سنين الا تحكم ليك شوارع فاضيه والشعب الفضل يشتغلو حلاقين وبتاعين شاورمه في اثيوبيا ويطاردوهم شرطه الاجانب الحبشيه لانو ماعندهم اقامات
    .
    فضحتونا وشرطو عينا استاد زي الناس ماعندنا تعالو شوفو غينيا وغانا ومصر وتونس ,, دول عندها استادات مانقدر نحلم بيها

    حل اخير ,, حقو يكلمو ناس النفيدي يكملوها ليهم ويخلصوها استقطاعات زي المينا البري وكده والمطارالجديد يدوهو اسامه داوؤد بجضمو تمام ..والبلد تاكل بس زبادي كابو ويمنع الفول

    حل اخير اخيير ,, الكيزان يعمل فريق كوره علي اعلي مستوي ود نافع وودالمتعافي وووباقي اولاد ميكي يشترو دروقبا وكاكا ويشيلو المدينه الرياضيه ويتموها وعافناليهم مش تموهها ..

  17. تحياتي لاستاذنا جبره وللاخوان
    والله الستقطاعات دي بعد شويه حيعملو ليها وزاره ونفس الحكايه ساقية جحا بتشيل من بحر وبتكب في بحر يعني مافي حل ولا مفر واتذكرته طرفة بالنسبة للاستقطاعات من اجل المزارعين والتقاوي الفاسدة عندنا واحد من اهلنا عندو مزرعة وشاء القدر انو التقاوي تكون من نصيبو والمهم زرعو بطيخ ولمن مانجحت الزراعة قامو مشو للفقراء وقالو ليهم معمول ليهم عمل فيها لانو اصحاب الارض الباعوها عايزنها وارجعو للمشتري قروشو.
    بس الظاهر يابروف انو العمل معمول لاراضي السودان كلها ولارايك شنو.

  18. سلامات للاخوه الاعزاء والاخ البروف

    ماتنسي يابروف قضية المناصير قالوا تتحملها الولايه يعني حيجيبوا ليهم من وين سجمكم ياناس نهر النيل قطوعات تقيله الله يعينا

  19. والله آلمتنى واحسست بطعم المرارة فى حلقى..
    هو اصلا وزيرالدفاع دا الدخلو شنو فى الاقتصاديات والمالية !!؟
    طبعا لا انسى يوم ان استقطعوا راتب يوم من كل الكار الصحى بولاية الجزيرة دعما للحوادث وبنوك الدم !
    لا حاوادث اتبنت لا بنوك اتطورت !
    الله يقطع دابرهم وادبارهم واحد واحد..
    تف يا حكومة تف..

  20. الناس دي ما تشوف ليها شغلة .. وتخلي التنظير ده والتصريحات الخاوية .
    وبعدين ليه مسؤلينا دايما بيحلو اي مشكلة يا بي زيادة ضريبة او بي فرض ضريبة جديدة .
    ما في اي تعب او ابتكار او تفكير في حلول فعالة .

    الله غالب .

  21. يا عمي الجنوبي حرم وطلق عافين ليك واسي لو داير برسل ليك بس عليك الله ساعدنا في تفتيش الخط الرايح من الاستاذ دا جمبي عمتي قالت لي انت يا ولدي الخط الرايح منكم دا اصلو خط عراوي حكيتو شنو ههههههه تحياتي لي الجميع

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,793 other followers

%d مدونون معجبون بهذه: