القصة ما دستور

في مقالاتي الأخيرة طلبت من السادة القراء الكرام أن يقوموا بتركيب فهامة (حجم عائلي) حتى تعينهم على فهم ما أشرت إليه في المقالات المذكورة والتى إحتوت على تصريحات بعض المسئولين والعبدلله ينصحهم بان (يخلوها مركبَّة) وهم يقومون بقراءة هذا المقال
الموضوع وما فيهو أنو العبدلله إكتشف مؤخراً بان الدستور الذى ظل يحكم من خلاله هو دستور (غير إسلامي) وان هنالك دستور (إسلامي) قامت (جبهة الدستور الإسلامي) بتسليم وثيقته النهائية للحكومة !
تصور عزيزي القارئ : بعد 23 سنة (ثانوية عامة) كما يقول (عادل إمام) في مسرحيته تلك (نطلع محكومين) بدستور (غير إسلامي) وأى كلام؟
بالطبع فإن هنالك عشرات الأسئلة التى تدور في الاذهان بعد سماع هذا الخبر (العجيب وغريب) ولكن دعونا نسأل سؤال خارج نطاق تلك الاسئلةالتي من شاكلة (طيب إنتو كنتوا وين) ! هذا السؤال هو ببساطة (يعني المشكلة مشكلة دستور؟) أياً كانت تسميته ونوعيته؟ بالطبع (القصة ما دستور) القصة قصة نهج وسلوك وأخلاق أرسي قواعدها (القرآن الكريم) وعلمنا لها (بيان بالعمل) سيد البشر نبينا الكريم الذى قال ( إنّي تَارِكٌ فِيكُمْ مَا إِنْ تَمسّكْتُمْ بِهِ لَنْ تَضِلّوا بَعْدِي) !
هل تمسكنا بقول الله جل وعلا في سورة المائدة (وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِنَ اللَّهِ وَاللَّهُ عَزِيزٌ حَكِيمٌ.) أم تمسكنا(ياربي) بحديث الرسول عن المرأة المخزومية حين قال (وايم الله ! لو أن فاطمة بنت محمد سرقت لقطعت يدها ؟) بالطبع لا (وكمان كلا) إذ لم تعرف البلاد إستباحة للمال العام مثل ما نشهده اليوم والدليل ليس (آآآلولو) بل تقارير النائب العام (والشركات الرايحة) و(مرافق الدولة) التى ترفض (أيوه ترفض) المراجعة ، وليس هنالك أمر يدعو إلى الرثاء المحزن أن تطال هذه السرقات وهذا (البلع) مرافق دينية (كالحج والعمرة والأوقاف) ! فهل القصة قصة دستور؟
هل تمسكنا (يا ربي) بسيرة السلف الصالح أمثال سيدنا عمر رضي الله عنه الذى (نهى) عن إشتغال ابن المسئول (بالبيزنس والتجارة) – خليك من المسئول ذاااااتو ! وذلك في قصة إبل ابنه (عبدالله) المعروفة؟ هل تمسكنا بما أشار به (الخليفة العادل) منعاً لإستخدام النفوذ وبعداً عن الشبهات؟ بالطبع لا (وكمان كلا) فمسئولونا يتباهون على وسائط الإعلام بما يمتلكون من شركات تعمل في سوق الله أكبر .. طيب هل القصة قصة دستور؟
هل تمسكنا (يا ربي) بزهد نبينا صلى الله عليه وسلم الذي كان أزهد الناس في الدنيا ، وأقلهم رغبة فيها؟ هل تأسى مسؤولونا بحياة نبيهم الكريم ؟ بالطبع لا (وكمان كلا) فلينظر كل مسئول إلي أثاث مكتبه وإلى مأكله ومشربه وملبسة ودابته (البرادو) في بلد لا يجد فيه الآلاف من تلاميذه الصغار وجبة إفطار تقيهم آلام الجوع ! هل تمسكنا بزهد النبي الكريم ؟ بالطبع لا (وكمان كلا) طيب هل القصة قصة دستور؟
هل تمسكنا (يا ربي) بقول الله جل وعلا في في سورة النساء {مَنْ يَشْفَعْ شَفَاعَةً حَسَنَةً يَكُنْ لَهُ نَصِيبٌ مِنْهَا وَمَنْ يَشْفَعْ شَفَاعَةً سَيِّئَةً يَكُنْ لَهُ كِفْلٌ مِنْهَا وَكَانَ اللَّهُ عَلَى كُلِّ شَيْءٍ مُقِيتًا} وقد إنتشرت الشفاعة (السيئة) إلا وهي الواسطة اللعينة والمحسوبية المقيتة و(التمكين) لجماعة دون أخرى ! ؟ بالطبع لا (وكمان كلا) طيب هل القصة قصة دستور؟

إني والله لأشفق وأرثي تماماً لمن يعتقدون بأن القصة قصة دستور ؟ هسه علاقة الدستور بي خط هيثرو شنو مثلاً ؟ القصة يا جماعة ما دستور القصة قصة ضمير .. ضمييييييير!!

كسرة :
أنزعوا الفهامات من رؤوسكم يرحمكم الله !

كسرة ثابتة :
أخبار خط هيثرو شنو؟

About these ads

17 responses

  1. الليل ولى لن يعود وجا دورك يا صباح
    وسفينة الانقاذ سارت لاتبالى بالرياح
    —————————
    امريكا روسيا قد دنى عذابها
    على ان لاقيتها ضرابها
    و …………………..
    طلعتو عينا ياخى خلاص اتخارجو كفاية لعب بالشعب واستهتار
    الجبهه الاسلامية او جبهة الميثاق او الكيزان وكلو بطيخ
    كفاهم كفاهم كفاهم
    game overrrrrrrrrrrrrrrrrrrr

  2. سلام ياقبيلة،،،،
    لأول مرة في التاريخ يا أستاذ جبرا تطعن الفيل زاتو، وده الكلام المليان يا شيخنا!!!!!

  3. السلام عليكم ،البرف و الاخوان ، حسب علمى اكل مال الدوله ليس بسرقه ولكنه خيانه لامانة المسلمين ، وبعدين خليهم ياكلوا و يفرفشوا القبر جاى ثم بعده الساعه و الساعه ادهى و امر ، حرم البياكلو ده كلو فتافيت يتحاسب عليها الواحدحساب عسير ، سؤال عسير : سوق المواسير سير سير يا سمير …………….. عجبى

  4. حاج أحمد السلاوى | رد

    دستور .. يا أولاد ماما …

  5. احترنا في البلد المسكونة دي
    حسبنا الله ونعم الوكيل
    ما في حاجة دخلتنا في كل هذه المشاكل غير الجماعات التي تعزف على وتر العاطفة الدينية ، يعنى يسرقونا عيني عينك وفي وضح النهار باسم الدين وكلوا بالقانون يعنى هذا الدستور الحالي ليس اسلامي ؟؟؟؟ يعنى كل شوية تطلع جماعة وعاوزة تطيق الدين حسب مفهومها ؟؟؟؟ ارحمونا شوية وخلونا نمارس حياتنا الدينية بالفهم البسيط نصلي نصوم نذكي نحج نتعامل بصدق لا نكذب لا نسرق لا نفسد نكون قدوة لغير المسلمين لا ناكل حقوق الغير نشهد بالحق دائماً نكون مثال للاخلاق .. ……………………………………….. آآآآآآآآآآآآآآآآآآآآآآآآآآآآآآآآآه . أستغفر الله العظيم من كل ذنب عظيم

  6. ود الخلا .. سلام .. جاتك طاوية حبالا .. لاكين
    الدستور بيحكم الحاكم قبل المحكوم ولا شنو ؟
    وبرضو الالتزام بيبدأ من فوق لتحت …
    كوكو .. سلام .. سوق المواسير امره عسير لأنو
    نتيجة التحقيقات ح تخلق حركة متمردة جديدة
    والجماعة ما ناقصين حركات وكبر لو اتمرد وهو
    والي باقي ليك بعديين في المفاوضات حيقبل
    بنائب رئيس ؟؟؟؟
    حاج السلاوي .. سلام .. ماشين علي الجانبين
    شيخ بدوي يحيينا.. بدوي ده مش ياهو بدوي
    الرفاعي !!؟ طيب ما يجيبوا لينا دستور من
    بره !! وقول ليهم يتوصوا في البينسون
    والهناي داك .. واللول اللول يا لولية
    بسحروك يا حكومة الحرامية ..
    طلبات طلبات داير بيت في المنشييييييييا ..

  7. الدساتير كتيرة يا بروف .. ما تستعجل ساي لا نو:

    في دستور أولاد ماما زي ما قال ود السلاوي
    وفي دستور الباب البمسك كتف باب الشارع
    وفي دستور بمعنى إذن (Permission)بالتركي
    وفي دستور جامد زي الدستور المصري
    وفي دستور مرن زي دستور الولايات المتحدة

    فماتستعجل أحسن ننتظر لحدي ما نعرف هم قاصدين ياتو فيهم الما كان إسلامي خلال خلافتهم الراشدة ….
    .
    .
    ياربي إنهم يتحدثون بإسم الإسلام …. أرنا فيهم دلائل قدرتك حتى لا يشوهو صورة هذا الدين الحق .. لا تغادر منهم أحدا

  8. لقد اصبحت السرقة علنا نهارا جهارا من اهم الشهادات المطلوبة لتقلد المناصب الرفيعة في الدولة التي اصبحت خالية من محاسبة النفس ، وما المعروف الا القليل وماخفي اعظم
    والله المستعان

  9. حاج أحمد السلاوى | رد

    هو يعنى نحنا كنا الزمن الفات دا كوووووووولو ( كمين وعشرين سنة ) ماشين من غير إحم ..ولا دستور ؟ كيف الكلام دا ؟والدستور الإسلامى دا أى زول مسلم عارفو زى جوع بطنو ..وما داير ليهو وثيقة …ما دام إنت مسلم معناها إنك إرتضيت بالله رباً وبالإسلام ديناً وبمحمد ( عليه الصلاة والسلام )رسولاً ونبياً ..وتتبع ما جاء فى القرآن والسنة ..اها تانى فى حاجة جديدة .. ؟
    بس عندى سؤال سغيرووووونى كدا ( زى كل مرة ).. ياربى لامن يطبقوا دستورهم الإسلامى الجديد دا جماعة ساهور ديل حيمشوا وين ؟ والقناة دى حتظل موجودة ..ولا حيشفروها ؟
    وبمناسبة التشفير أقول ليكم النكتة ( أكيد عدد كبير منكم سمعها ..بس نعيدها لمن فاتهم الإستماع… ) ونقول والعهدة على الراوى راجل عندو أربعة حريم شايقية ورباطابية ودنقلاوية وجعلية( هيئة امم ) وتشاء الإرادة الإلهية إنو الراجل يمرض مرض شديد وعلاجه مكلف .. الرباطابية إقترحت على الأخريات المشاركة فى علاج الراجل .. كووووولهن رفضن المساهمة .. قامت دقت صدرها وقالت : طيبيييب.. وكتين ابيتن تشاركن فى علاجه أنا بتكفل بالعلاج .. لاكين بعد داك بشفرو …
    وخلونا النشوف خرتا شنو ..مع الدساتير بكافة أنواعها ..

    ود الخلا ..قلت لى المرة دى طعن الفيل زاااااتو ..؟؟؟؟؟؟؟

  10. والاستغراب في شنو اصبر لي شويه كده وح يعملو كليه اسمها كليه السرقه والعلوم الاجراميه في كل الجامعات ههههههههههههههههههههههههههههههه تعيش كتير تشوف كتير

  11. اخي ود الخلاء سلامات
    لو عارفنك من زمان مستنى طعن الفيل كنا طعناهو ونحرناهو وسلخناهو وغسلنا الكمونيه من الزفاره
    وبقت بييييضا وريحته زكيه
    اتارينا كنا فاهمنك غلط لك العتبه حتى ترضى

  12. يعفوا ويرضوا !!!

  13. ياخوى ياسين شمباتى ااااااااااي يعفوا ويرضوا نحن كنا قايلنو قاصدنا نحن كل مره راجعوا نفسكم راجعوا نفسكم اتاريهو قصده نطعن الفيل طوااااااالى بدل الف والدوران والكتابه بالتوريه وكده

  14. اها يا جماعة الخير وزي ما قلنا من اول الشارع الشارع الشارع
    اها هسع ود الخلا ذاتو قنع من خيرا فيها وكشف ورقوا ….ماتييلا خافين من شنو
    كسرة
    الردود نستنا الموضوع ذاتو والله الشارع دا الا نمرقو ليكم

  15. الاخ العزيز ود الخلا
    بعد التحيه
    تطعن الفيل
    تضرب الفيل
    تركب الفيل
    ……… الفيل

    الفيل جلدو تخين ما فارقا معاه
    طعن الصباح

  16. بت وراق…سلام….
    ديل الاسياد اليعفوا ويرضوا !!! دستووووووركم..

    ود الفريق…سلام…
    هههههههههههههههههههااى,,الفيل دا بتعب من النقط بتاعتكم دى ! وى وى وى

    1. كان بتعب يبقى كويس
      يكون ظهر ليو أخيرا جهاز إحساس
      يمكن يكون بي فايده
      المشكله انو ما بتعب ولا بحس جلدو تخين ……..

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,762 other followers

%d bloggers like this: