تفصيل وخياطة

أشياء كثيرة تثير إندهاش وإستغراب العبدلله ولكن أكثر ما يدهشة هو تركيز معظم رجال الدين لدينا في هذا العهد الرشيد على مسالة (راجل ومرا) .. الختان والنكاح والتعدد والواقي والزي الفاضح وما شابه ذلك؟ وترك الحديث عن جسام الأمور التي تمر بها البلاد من فقر وحروب وفساد (مفتشر) وقد برع في ذلك أيما براعة ذلك النائب البرلماني المثير حقاً للجدل (دفع الله حيب الرسول) والذي كانت أغلب بل كل مداخلاته البرلمانية لا تخرج عن دائرة (نساء وولادة) وقد كان آخر تصريح له في هذا الشأن (قبل أيام) هو الدعوة للزواج بأربعة حتي نتحصل (بعد كمين سنة) على جيل محارب نستطيع به غزو أمريكا ذات نفسها ! ولولا أن العضو المحترم تخصص (صنف نساء) لإتهمناه بتعاطي صنفاً آخر فما من أحد غاقل بالغ رشيد يمكن أن يقوده (التفكير ما حاجة تاني) إلى مثل هذه الحلول (المهببة) !
كتبت كثيرا عن الدور الذي من المفترض أن يقوم به رجال وعلماء الدين لدينا في هذه الفترة المفصلية في تاريخ امتنا وهو توجيه وإسداء النصح إلى المسؤلين وتبصيرهم بما يجب أن يقوموا به للخروج من هذا (النفق المظلم) بعد أن ضرب الفساد معظم مرافق الدولة وأصبحت له (كسرات ثابتة) على أعمدة الصحف تمد لسانها مستهزئة في وجه كل من يدعي بان من بيدهم مقاليد الأمور يحكمون بين الناس بالعدل ويخافون يوماً عبوساً قمطريراً .
إننا الآن أحوج ما نكون لدور العلماء الفاعل في توجيه المسؤولين وإسداء النصح لهم من أجل تصحيح الأخطاء ضماناً لإستقرار بلادنا حتي لا نصل إلى ما وصل إليه بعض أخواننا العرب من تفلت وإنفراط أمنى ولكن للأسف الشديد فإننا لا نرى لهم دوراً ملموساً في هذا الشان بل نجد أن جلهم ينشط في ما يخص (الغريزة) وما يتصل بها من (مظاهر) كاللبس الفاضح والختان الفرعوني و(الواقي الذكري) وما إلى ذلك من (عظائم الأمور!) التي تواجه مجتمعنا الذي بدأ في التحلل والتميع والتخثربسبب حالة الإفقار التي يعيشها المواطنون جراء الكنكشة في المناصب و(اللبع) والتعتيم وعدم المحاسبة حتى صارت حياة المواطنين جحيماً لا يطاق .
مناسبة هذا المقال ما صرح به أحد العلماء مؤخراً (شيخ الكاروري) فكما أن (شيخ دفع الله ) قد تخصص (نساء وولادة) فيبدو ان (شيخ الكاروري) في طريقه لنيل إجازته في تخصص آخر هو (تفصيل وخياطة) فللرجل فيما يبدو إهتمامات بالملابس و(المقاسات) التي يرتديها الشباب فقد صرح مؤخراً محرضاً الشباب بعدم شراء ملابسهم من أسواق سعد قشرة (تحديداً) بحجة أن تلك الأسواق يباع فيها الزي الفاضح (الذي هو أكبر همنا) !
بالطبع لابد أن يقف الشخص مستغرشاً (مستغرب+مندهش) أمام هذا التصريح (العجيب) فكيف بالشيخ يخص سوقاً بعينه دون الأسواق الأخري؟ ألا توجد هذه الملابس في كل أسواق السودان ام هي حكراً على (سعد قشرة)؟ وأليس (فضاحة الزي) لها علاقة مباشرة مع التكوين الجسماني لمن يرتديه بمعني أن (عباية مثلاً) ممكن أن تكون فضفاضة عندما ترديها فتاة (مسلوعة) بينما تكون (ملتصقة) ومظهرة للمفاتن عندما ترتديها أخرى (مكلبظة) ! أها نمنع العبايات يا مولانا؟ ثم يا أخي إن كانت مسألة الأزياء دي (هي المشكلة) فكان يجب عليك (يا شيخنا) أن تخاطب الجهات المختصة (الجمارك) بإنشاء إدارة لفحص (الأزياء) وعدم الإفساح عن أي (زي) غير مطابق للمواصفات وإعادته إلى (بلاد الكفر) التي إنتجته والتي يحاسب فيها المسؤول لو أكل ليهو (جنيه واحد) !!
كسرة :
بمناسبة (مكلبظة) دي أقترح على الجهات المسؤولة أصدار (قانون مقاسات) يحدد للمواطنين والمواطنات مقاس ما يرتدونه حتى يتناسب والإحتشام ..يعني مثلاً وزنك 60 كيلو مقاس 40 وإنتا طالع .. برضو الحشمة حلوة .. والضرب على الميت حرام .. وللا شنو؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)+(و)+(و)+(و)

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟

About these ads

23 responses

  1. برنجيييييييييييييييييييية برائحة الخُمرة والدلكة ودفع الله

    1. طالما دي ريحتا دفع الله بلا تجيب سيرتو بجيك !
      والله زكرتنا ايام شهر العسل لمن يولوعوها ويمدوها
      ليك بتبقي ريحتا كدي …. وي

      1. ههههههههههه,,
        عاد الليلة الزيك منو يا مندهش ؟؟؟
        عينى باااااردة

    2. بختك الليلة _ قدلة يا مولاي حافي حالق — وناس ال (xxxl) يعملوا شنو

  2. غايتو جنس شتارة عليهم

  3. نسيت نكهة البصل يا شيخنا

  4. واحد من البلد ديييك | رد

    نظرية شيخنا دفع الله الجديدة … الدفاع بالنكاح !!!

  5. والله حيرتونا

  6. يعني نفهم من كلامه ده انو الواحد لو داير يلبس
    حاجه ما كويسه ممكن يلبس بس يشترط انها ما تكون من
    سوق سعد قشرة ؟
    يعني ما نركب عربات شان في ناس بتمارس الرذيلة جوه
    العربية ؟
    وما نفرش المساجد بي السجاد الايراني عشان
    ايران شيعه والصين ملحده ؟
    ومانشتري البلح من سوق المحاصيل شان في ناس
    بيشتروهو ويعملوا هناي ! أحححح
    الشيخ ده ما سأل نفسه سوق سعد قشرة ده
    فيهو كم دكان ؟ وكم بيت مفتوح من وراء
    السوق ده ؟ وكم تاجر منهم كافل يتيم ؟
    وكم تاجر بيدفع زكاة ؟ وبيطعم مسكين 1
    هم الشيوخ ديل اصلهم ما عندهم سن معاش ؟
    كووولهم بعد يكبروا قعد يفلّتوا ,,

    1. والله كلامك مية المية بقوا يفلتوا

  7. اها بنات ونساء المسؤلين كيف؟ نرسل معاهم بوليس من النظام العام لما يكونوا ماشين اوروبا يتسوقوا ؟

  8. لمتيين حروب——-فساد——-نزاعات أصابنا اليأس

  9. يا جماعة المعيشة بقت صعبة والناس ديل لازم يفتوا في أي شئ علشان يكونوا شغالين ويأخذوا مخصصاتهم ، علشان كده شغالين نغمة نسوان وسعد قشرة …..
    ما ممكن يقولوا فقر وحروب ودفاع بالنظر
    لانو عيشهم حيتقطع
    وفي النهاية
    هي لله هي لله ولا لدنيا قد عملنا

  10. جبرا والسمار
    سلامات
    بصراحة ياجماعه أنا شيخ الكارورى دة مابرضا فيهو أى كلام لأنة من العلماء القلائل المواكبين لنهضة العصر وكمان عندو آراء ومقترحات عقلانية وتستند على الحقائق .
    لكن مافى مانع قبلو على دفع الله حسب الرسول دة .

    1. يا حنين ___ اي عالم الذي يكست عن الحق ____ كدي راجع نفسك
      انت ناسي سبب البلاوي الاحنا فيها دي كووووووووووووولها من عينة الكاروري ودفع الله —- ياخي دول علماء سلطان وكفي

    2. حنين .. سلام
      رأيك شنو في مقترحو العقلاني القال فيهو انو الدناقلة
      ديل قاعدين في دول الخليج وامريكا واروبا واراضيهم
      بدل قاعدة كده مفروض يدوها للمصريين !
      هو ياحنين الزول ده ليه ما قال يدوها للسودانيين
      الدايرين يزرعوا وما لاقين ارض ؟
      بالعكس يا حنين دفع الله ما مؤاخذ الكلام العقلاني ده !

  11. فتاوي عشان تحاول تفهمها يجيك وجع راس
    اها مثلا وزاره الحج فيها قضيه فساد ويعني الواحد علي حسب هذه الفتاوي علي وزن سعد قشره والكلبظه ما عارف يعمل شنو،
    اها علي وزن فتوي النكاح وسعد قشره والبرنجيه المكبرته يكون غسيل الأموال يا ناس حرااااام واللبعي حراااااام وعشان كدا الناس تعبانه بالرغم من خير بلادنا الكثير،
    ااال ايه ااال بترول ودهب اااال

  12. يا ايتها الشعوب المسلمة اذا لم تعرفوا حتى الان ان داء الامة هم علماء السلطان فهذا والله البلاء (فتاوي تلهي الامة -تحريم ما احل الله -تحليل ما حرم الله-طبعا حسب الطلب الله يستهئز بهم ويمدهم في ضغيانهم يعمهون) والله المستعان

  13. هو يا جماعة الخير لو الشيوخ اتكلمو في افساد الحاكم و الحكومة يركب لاندكروزر 2013 من وين ويسكن في عمارة من كم طابق من وين و رصيدو بالشي الفلاني من وين ما يا هو من الفساد يبقى ياكل منو و ينبزو الا رحم الله محمد سيد حاج

  14. طبعا لازم يكون في زي العينة دي بعد كل يومين تلاتة يطلعو ليكم بفتوي وبنظرية جديدة يشغلون بها الشعب السوداني الذي انهكه الفقر والفساد والمرض والحروب وووووووووووووو اخخخخخخخخخخخخخخخخ ….في ذمتكم هسع زي كلام دفع الله ده في زول في الدنيا دي عايش الوضع السوداني الان يقدر يفكر بمثل هذا التفكير اللهم الا يكون به من الجن مس او مخبول او شنو ذاتو
    اهو يشغلونا يومين تلاته لغاية ما ننسي الحصل في ابكرشولة الي ان تفاجانا اسرئيل بضربة جويه ونظل نحتفظ بحق الرد لان المرة دي الطيارات جات بالنهار لكن الجو كان فيهو كتاحة شديدة حرمتنا من استخدام نظرية الدفاع بالنظر
    يا رب ارحنا منهم
    آآآآمييييييييييييييييييييييييييييييييييين

  15. اطمئن ياستاذ جبرة الشعب الفضل حيبقى كلو ((مسلوع )) مافى (( كلبظة )) تانى طالما الجماعة قاعدين

أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

Join 1,770 other followers

%d bloggers like this: