تعريف

كاتب بصحيفة الراى العام وحكايات أبو ناجي (7سنوات) ونشوى (4 سنوات)

محاضر (نظم معلومات) وتحديداً (تحليل وتصميم نظم المعلومات) يعنى systems analysis and design بعدد من الجامعات السودانية وساكن (اب روف – أم درمان ( قبل الكتابة بصحيفة الرأى العام كان يكتب فى صحيفة (السودانى 2005-2007) وقبلها كان يكتب فى صحيفة (الخرطوم) 1996-2006 مقالاً أسبوعياً بعنوان (مساحة حرة) وذلك ايام صدورها فى (القاهرة) وبعد أن عاودت الصدور من الداخل كان يكتب مقالاً أسبوعياً بعنوان (شبابيك) كل يوم (إثنين)

لا أعتبر نفسي سوى (مواطن) معطوب القلب واهن الجسد يمسك بقلم BIC ليكتب هذه (النصوص) كمنشور (مشفر) حصرياً (للقارئ) حتى إذا ما فك شفرته إعترته حالة من الضحك المؤلم لما آل إليه حال (الوطن) ، وأنا أتهم نفسى بمساعدة (السلطة) بتنفيس (ضغط) الشعب ومنعة من الإنفجار !! لذلك أطالب بدخولى (القصر) مستشاراً لشئون (التنفيس) أغلب قصص السيناريوهات ومواضيعها بتجى من معايشة المجتمع الحقيقية والحمدلله نحن منو وبنعايش دقائق الحياة بتاعتو وتفاصيلها الدقيقة وطبعن (لاحظ النون) إنصهار (الكاتب) داخل مجتمعو بيعطيهو زخيرة كبيرة من (الموضوعات) والأفكار التى يستطيع من خلالها مناقشة وإبراز قضايا المجتمع بصورة واقعية وحقيقية مقالاتى : مقالاتى جميعها أكتبها على الكيبورد مباشرة ولا أستخدم (الورقه والقلم) ولا تستغرق كتابتها وقتاً طويلاً إذا كانت (الفكرة) موجوده و(شيطان الكنابة) حاضر أما فى حالت (لاحظ حالت دى بالتاء المفتوحة) كونو إنو (مافيش فكرة) والشيطان (غياب) – أعنى أن معينات الكتابة غير متوفرة- فبتبقى القصة طويلة والزول بيحس بإنو عادى جدا وما بقدر يكتب ليهو جملة مفيده !!! أغلب قصص السيناريوهات ومواضيعها بتجى من معايشة المجتمع الحقيقية والحمدلله نحن منو وبنعايش دقائق الحياة بتاعتو وتفاصيلها الدقيقة وطبعن (لاحظ النون) إنصهار (الكاتب) داخل مجتمعو بيعطيهو زخيرة كبيرة من (الموضوعات) والأفكار التى يستطيع من خلالها مناقشة وإبراز قضايا المجتمع بصورة واقعية وحقيقية. ( السيناريو) فكرتو دائما بتجى متأخرة يعنى ما قبل يوم (التلاتاء) ، كتابة السيناريو ذاتا ما بتآخد معاى وكت كتير لكن المشكلة كما قلت دائما فى الفكرة والتى غالبا ما تأتى نتاج لملاحظة أو (حادثة) أو (خبر) أو خلافه والكتابة (الساخرة) بالطبع هى نتاج (للمتناقضات) و (المفارقات) والضغوط فهى تتناسب عكسياً مع مساحة (الحرية المتاحة) بمعنى أنه كلما قلت مساحة (الحرية) زادت مساحة (السخرية!!) أما طقوس (الكتابة( فليست لى طقوس معينة أنا أكتب فى الساعات الأولى للصباح (على الكيبورد مباشرة!!) مع سيجارة (برنجى) وفنجان (قهوة) – بدون سكر- كتابة النصوص الدرامية الدراما السودانية متأخرة بعض الشئ وتعانى من مجموعة أزمات منها أنها مطلوب منها أن تعكس واقع خيالى غير موجود ، معقول بس أكتب ليا نص درامى تكون فيهو (هند) داخل المطبخ مع (هنادى) والإتنين لابسين تياب وأكمام طويلة ورابطين راســــهم ( ديل قاعدين يطبخو ولا فى مؤتمر صحفى) !! وتلاقى (هند وهنادى) نفسهم – فى الواقع – واقفات فى (محطة المواصلات) – خليك من بيت العرس داك كلامو براهو – لابسات (إسكيرت وبلوزة) ده كلام واقعيا ما بحصل وعشان (الفن) هو (إنعكـاس) للواقع لذلك فأنا لا أود أن أشارك فى إى عمليات تزييف (شوزوفرينية)!!! تحليل نظم !! العلاقة بين دراسة تحليل وتصميم نظم المعلومات وبين (كتابة السيناريوهات) علاقة وطيده للحد البعيد فالسيناريوهات من الناحية (البنيوية) تشابه إلى حد كبير (النظام الكبير) الذى تندرج تحته عدداً من الأنظمة الفرعية Sub- Systems والتى هى التداعيات المختلفة التى تتعرض لها (السيناريوهات) فى ظل (الحبكة الرئيسية !! أكيد (تحليل وتصميم النظم) هو الأصل فبفضله كان (المنطق) و(التسلسل) و(البداية) و(النهاية) التى تجدها فى (السيناريوهات)! القراءة بقرأ لمنو ؟؟ … القراية بقت مشكلة وبعدين أنحنا نشترى شنو وإلأ شنو وإلا شنو وإلا (شنو) ؟ – لا حظ شنو الأخيرة دى؟- يعنى نقرأ وإلا نشترى (جمرة) وإلا ناكل وإلا نشرب وإلا نتعالج وإلا نعلم الأولاد وإلأ نشحن الموبايلات وإلا نعمل شنو تطير عيشتنا !!

عموما البركة فى أخوانا (المتغربين) الدولة ما مريحاهم وأنحنا كمان ما مرحينهم مرة مرة بنطلب منهم يرسلو لينا (كتب)

أما عن الناس القاعد أقرأ ليهم فهم كتار أهمهم من (الخواجات) واحد إسمو (توم شارب) وقد لفت نظرى إليه الأخ العزيز (أبو الجعافر) وواحد تانى إسمو (جوزيف هيلر) وبرضو فى الكاتب التركى الساخر (عزيز ينسين( أما أخوانا العرب فهنالك الأستاذ محمود السعدنى وعلى سالم ومحمد عفيفى وجيل قادم بقوة فى مجال الكتابة الساخرة مثل عمر طاهر وبلال فضل وآخرين

كسرة :

لا أعتبر نفسي سوى (مواطن) معطوب القلب واهن الجسد يمسك بقلم PIC ليكتب هذه (النصوص) كمنشور (مشفر) حصرياً (للقارئ) حتى إذا ما فك شفرته إعترته حالة من الضحك المؤلم لما آل إليه حال (الوطن(!

كسرة تانية:

أنا أتهم نفسى بمساعدة (السلطة) بتنفيس (ضغط) الشعب ومنعة من الإنفجار !! لذلك أطالب بدخولى (القصر) مستشاراً لشئون (التنفيس


55 تعليق

  1. System Analysis and design teacher???This subject is fairly the most tiring subject on my college but as a student i don’t find any reason to study such a subject,and what’s more that our teacher uses a translated to Arabic book which make things worse,not to mention that no one can bear with the boring contents of his topics.and it’s very usual to find even the girls who ought to be concerned about the studying sleeping like they r on their homes,so u can easily imagine what the others who don’t care like me do during the lecture.if any one have some encouragements statements please write them down,i really need them! ,

  2. الاخ يحي
    يوما ما ستدخل الي عالم الواقع العملي بعد ان تكمل دراستك انشاء الله
    تحليل وتصميم نظم المعلومات ما حيفارقك ولا يوم
    الماده دي بقدر ما شكلها ثقيلة ، لو فهمتها بتحكي عن شنو تاني ما بتجيك عوجة تب، وبعدين دي داخلة في كل شي ، ما كمبيوتر بس.

    استاذنا الفاتح جبرا :
    ربنا يوفقك ويعينك ، التعليم ده ما بيقدر عليهو اي زول
    ونحنا بعد ما اشتغلنا حتي قلنا : آآ .. بالله استاذ فلان البراي داك طلع كلامو صح .

    1. استاذ فلان البراي داك الطلع كلامو صح ده أوع أكون أنا يا أنس ؟

      1. لا ما إنت .. داك سمين شوية
        . أكتر حاجة كانت بتعجبني في المادة دي إنو الجماعة البيحفظو ما قدرو عليها🙂 . نحنا بس نظبط الموجة مع الأستاذ في المحاضرة ونفهمو، وبعدين نجيب درجات عالية في الإمتحان من غير سهر وقديد عيون .

      2. التركيز فى المحاضرة 90% من النجاح !

  3. حتي عندما نقرأ سيرتك الذاتية بتمتعنا ربنا يخليلك لينا يا استاذ

    1. الحبيب بلدو
      ياخى ألف شكر .. وربنا يقدرنا أن نكتب المفيد … تحياتى ومرحب بيك يا مراحب

  4. استاذي: الفاتح جبرا
    حتى تعرف انني صرت مدمن لكتاباتك العجيبة … خلى بالك كتاباتك دي قاعدة تولد فيني نوع من (الانفجار) الايجابي… بمعنى … (انفجار الامل بوجود ناس صادقين في هذا البلد الذي كله غش … حتى صرت انن سوداني (صيني))… وبمعنى اخر … (انفجار التغيير …. تغيير كل شئ … ربما لا استطيع تغيير حكومة او وزارة … او حتى تغيير قوانين في هذه المرحلة … لكن يمكن ان يحصل تغيير في جوهر الانسان السوداني بانو لازم يتغير بغض النظر عن الاحباطات الموجودة وعدم الامكانيات)… وانما تغيير داخلي … صدق … امانة … شفافية …
    تعرف يا استاذ لي زميل عجيب … كنا مرة نتناقش في سلوك السودانيين … مثلا تجدك تقف امام الفرن فيأتي احدهم جاء بعدك ويقف امامك بكل برود ويأخذ حاجته ويذهب وانت تنظر اليه في استغراب كيف يفعل هذا وانا امامه … في حين اذا سافرت خارج الوطن لابد ان تلتزم بعادات هي في نظري من اجمل العادات في حياة البشر … احترام الغير في كل شئ حتى ولو في صف الفرن … فقام رد علي بالقول الاتي:(( قال انت اذا مشيت بسلوك ناس برا في السودان يقولوا عليك عوير وما عندك شغلة وحقك بيروح … واذا مشيت برا وما التزمت باالوقوف في الصف مثلا … برضوا يقولو عليك عوير وما عند ذوق … طيب نحن نمشي بس؟
    لك كل تحياتي يا استاذي …

    1. العزيز … م ب س
      أشكرك على هذه الكلمات الطيبات وربنا يقدرنا نكون قدر المسئولية ونكتب المفيد ..فعلا نحن فى حوجة لتغيير كثير من سلوكنا لنرتقى .. تحياااتى

  5. الحبيب أبو ناجي
    الحلوين في كل مكان
    سلام ومودة وإحترام
    وكل عام وأنتم بألف خير
    مبروك الصفحة الجديدة با أستاذ الفاتح والله يكثر من القمردين

    1. حبيبنا مخير
      الله يبارك فيك .. وكل سنة وإنتا طيب

  6. سلام حبيبنا ابوناجى..
    وبركة بالعودة والطلة الحلوة..

  7. حمدلله على السلامةيا عمنا

    تحياتنا يا حبايب

    1. الله يسلمك يا ولدنا .. يلا خلينا نشوفك بى جاى طوااالى

  8. أن ننضم لقافلة المدونيين على الوورد بريس فهذا شرفٌ للمدونين السودانيين والذين يعانون من ضآلة المنتج التدوبني مقارنة بإخوانهم في الدول العربية، بل أكثر هو إضافة حقيقية للتدوين العربي الذي مازال يخطو خطواته الأولى في عالم الإعلام الجديد، دمت بخير

  9. العزيز عزت
    سلااام
    الله يبارك فيك .. بكرة دى نعمل نفاج بإذن الله لتسهيل التنقل وكده

  10. لم اجد طريق مقالات الاقريبا وصدقا اسفت على عدم مواكبتي لكتاباتك من الاول وعزرا استاذ الفاتح فالذنب ذني
    وارجو لك التوفيق يا مستشار شؤون التنفيس يالاعبة مهاهم

  11. الاستاذ الجليل/ الفاتح يوسف جبرا
    تحية تقدير واحترام
    شفاك الله من الملاريا
    كم كنت اتمنى ان اجد كتاباتك حول الموضوع الذى اثار الساحة السياسية والفنية والثقافية
    موضوع جلد الفتاة السودانية بسياط العنج من قبل العنج
    نتمنى ان نجد موضوع انشاء الله قبل ما تقوم من ملارياتك دى ,
    وانا من انصار دق الحديد ساخن ,
    والموضوع الاخر برضو الذى تمنيت ان اجد فيه قلمك (حنعمل شنو يعنى )حقة وزير المالية,,,,,,,,
    اى وزير المالية الماعارف يعمل شنو
    لك الشكر والتقدير ثانياً شفاك الله
    يوسف الناعم البزعى

  12. حمدلله على السلامةيا عمنا

    تحياتنا لك

  13. استاذ الفاتح على فكرة انا فى دولة الجوار جنوب السودان ,دا بعد الانفصال طبعا

  14. عندما نقراء كتابتك نتفائل لان الواقع الذي نعيش فيها يقول لنا اننا السبب في فصل الجنوب وغلاء الاسعار وكل مشكلة تحصل والجماعه ما عندهم اي سبب ويجيب ان يموت الشعب وتحيا الحكومة

  15. يا استاذ جبرة
    ارجو ان تكون بخير
    حقيقة انا متابع كتاباتك منذ الصحف فى كل رحلاتك من جريدة لجريدة (عذبتنا معاك ) المهم حتى وصلنا الفيس وبرضو وراك واليوم فى المدونة
    ربنا يحفظك ويزيدك بقدر تنفيسك للمعاناة اليومية
    اشكرك

  16. استاذ الفااتح تحياتى لك وانت تمتعنا بهذه السيناريوهات والتى تحكى عن حالنا بالضبط فقط فى اسلوب عملى
    فالف شكر لك ومزيدا من الابداع
    بالمناسبة لقد اقتنيت جميع أصداراتك التى خرجت فى المكتبات
    وهى خير صديق ومتنفس لى عند ما تضيق بى الحال

  17. يا استاز الفاتح بعد التحية و كل سنة و انت طيب.. انشاء الله السنة الجاية كدا على امنياتك بس بعد كتابتك المشفرة دي معنى كدا امنياتنا مشتركة..

    كتاباتك في غاية الروعة .. و فعلا تنفيس للمواطن زي ما اتفضلت و ووصفتها..اتمنى تكون دايما طلتك بهية علينا بي كتاباتك المدهشة و الممبكية المضحكة..
    اخوك او ابنك محمد الدسيس

  18. محمد الدسيس بتاع حنتوب ؟

  19. أعمل حسابك يا خوي لأنو إذا قامت ثورة في السودان وكانت فاشلة حيجوج في أبروف وساعتة إنت اللى حتحتاج تنفيس ، وربنا يبعد عنك البلاوى ويحفظك ….
    متزعلش مني أنا بهزر معاك وربنا يخليك لينا يا عم جبرا يا عسل بالمناسبة أنا بقرليك من زمان قوى وعملت الإيميل ده مخصوص علشان أشارك معال في التواصل .

  20. يا مودم فؤادي
    ويا شاشة عيوني
    ويا انترنت هوانا
    ربنا يحفظك من كل حاسد

  21. المحترم الأستاذ الفاتح … متعك الله بالعافية وطول العمر… ونشكرك شكراً لا حدود له على المقالات الرائعة التي تعتبر المتنفس لنا في بلاد الاغتراب … كما نشكر صحيفة الرأي العام أولاً لاحتضان قلم مثل قلمك وقلم الدكتور كمال حنفي ونشكرها ثانياً لأنها ملتزمة بتنزيل عددها اليومي على الموقع في وقت مبكر. حفظك الله ورعاك

  22. الف تحية وتقدير حبيبنا فاروق ، متعك الله بالصحة والعافية

    مواضيع شيقة وجديرة بالتداول ، حيث يتم نقل الكثير للمواقع الاليكترونية ، وأسمح لى فى هذه السانحة للإستئذان بنقل بعض ما يرد لاحقا لمنتديات أبناء جزيرة بدين ، والسموحة فيما تم نقله سابقا ، مع ذكرنا الكاتب وأحيانا بالصورة الشخصية ..
    وطالما ورد ذكر ابوالجعافر ، إبن بدين ، فسنجد منك السموحه ..

  23. نزار عبد الماجد | رد

    الأستاذ الفاتح جبرا
    السلام عليكم ورحمة الله وبركاته ،،
    أجد في إتهامك لنفسك بالتنفيس عن المواطن أصدق وأكرر أصدق تعبير في كل التعريف ،، فشخص يكتب بهذا الأسلوب الساخر من شأنه أن يميت القلب ويثبط الهمم إذ معقول إنو كلامك ده ما بقراه مسئول ( لاحظ بقراه دي )؟؟ دي تبقى مصيبة عدم متابعة .. وإذا بقراه وما بيتغل بيهو تبقى كوم مصايب (خلي بالك من مصايب) .. يا سيد الفاتح عليك الله خلي بالك من طلبتك وخلينا نشوف لينا زول يدق النوبة (النوبة بتاعت المديح ) عشان ما تودرنا …

    1. موش عليك الله يا نزار ؟

      يعني مثلا موضوع خط هيثرو دا ،ممكن يجي زول تاني يتكلم فيهو ؟ ما خلاص جبرا ماسكو لينا
      ولمن تحصل ليك حاجة والغبينة تكتلك تجي تلقي جبرا بيقول في حاجاتو دي تقوم تقول لي روحك : انا مصيبتي هينة ومافي تاعي اعترض او اشتكي ، ماياهو دا جبرا بيشتكي نيابة عننا ،

      يعني بدل ما نتكلم ونشجب ونعترض ونظاهر نقعد نقرا بس .

  24. بتحلل صاح
    بعد معرفة واللمام تام بماحولنا من اخبار………………………
    تاتي النتاج اكلها…..

  25. اخونا الفاتح فتح الله لك باب الخير وللشعب المسكين

    يأخي قرأت قبل فترة ان امام التأصيل ذهب للعلاج في المانيا وقبله وبعده ذهاب اعداد من المستشارين والمساعدين والوزراء والدستورين و النائب الثاني وغيره من الدستورين كلهم يذهبون للعلاج في المانياوأخيرا والي كردفان السابق ووزير الثورة الحيوانية ذاهبا لالمانيا للعلاج وانا السبعيني وخبرة مايقارب الخمسين سنة في خدمة السودان رفض التأمين علاجي بحجة انتهاء صلاحية البطاقة وحولت للجنة الشعبية للتجديد وحتي الان لم تجدد ،انا بسأل هل هاؤلاء عندهم تأمين طبي في ألمانيا والمعروف ان المانيا اغلي تكلفة في العلاج والأعاشة وتكلفة علاج دستوري واحد قد تعالج الالأف في السودان اللهم اكرم الشعب المسكين المبتلي بهذه العصابة وحقق له دعوة الحبوبات (اللهم من القوة الي الهوة)

  26. احدهم علق علي ذهاب الدستورين لالمانيا للعلاج وقال جايز يكون خط هيثرو بدلوهو بخط هامبورج او فرانكفورت

  27. بعد ان يعتصرنا الالم ناتي احيانا الي مدونتك نص الليل او في الساعات الاولي من الصباح بحثا عن اجابه…

  28. تنتهي بصرخه النور الجيلاني الاستفاهميه الجنونيه : ليه؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

  29. استاذ الفاتح جبرا متعك الله بالصحة والعافية وادامك زخرا” لهذا الوطن الذي يحتاج الى ضمير صاحي وقلم لا يخاف الريح

    مواطن سوداني

  30. قلت لصديقتي يوما اتمني ان اشاهد اعمال دراميه حقيقه لايتصنع بها الممثل السوداني كما هو حال مذيع ضحل الثقافه وانما اشرقت له اضواء الكاميرات لميزة لا اري جلهاااااااااا .
    فأجابتي بلهجتها المحببه الي هو انتي مايوميا بتشاهدي مسلسلات من غير انتاج ولا دبلجه ولا مؤثرات من تصبح لمن تغيب ف بيتنا وبيتكم والشارع والمواصلات والشقل وحتي لمن تزوري اختك في شغلها الفي المعسسه ديك هوي ماتسعليها ليه الطريق اتلقي
    فقلت فعلا هو لي كل السودان بشاهد دراما تركيه …..اكيد بهرب
    انا لا اتحدث عن عدم وجود اعمال دراميه او دراميين انا اتحدث عن تلك الادوار التي نقوم بها مغلوب علينا

  31. أها يا أستاذ: خط هيثرو وانفتح ليهو نفاج…
    حتعمل مع محكمة النفايات شن؟ (وفرنا الواو لحين انقضاء الشهر الأول)

  32. الأستاذ الفاتح، بعد التحية أتمنى عليك ان تستمر فى الكتابه عن خط هيثرو إلى نهاية الشوط ! لأن اللى ما يتسموش ما بينفع معاهم إلا مثل هذه الطرق حتى تنكشف حالات التلوث فى الذمم التى أصابت معظم المسئولين و القائمين على الأمور فى السودان! سير و نتمنى لك الحفظ و التوفيق من الله.

  33. اخي البروف الفاتح جبرا انا والله بعد كل الحيص بيص دي ما عندي الا كتمت كتمت كتمت

  34. سلام استاذ الفاتح وباعتذر انى ماسمعته بيك قبل كده لكن حديث صحباتى عنك وتعليقتهم عن كتاباتك واراءك الجميله المعبرع عن همومنا لفتت انتباهى وكما توقعت قلته اكيد حاتكون من امدرمان لك التحيه والاجلال ولكل اهلى بلدى

  35. سلام قولا من رب رحيم
    ايها الانسان الجميل الذي تعيش معاناه الشعب السوداني وتخفف عنه بكتاباتك الجميله واراءك المعبره وانا معجبه جدا بها واتمني لك المذيد والمذيد وبالله التوفيق

  36. سلام قولا من رب رحيم
    ايها الانسان الجميل الذي تعيش معاناه الشعب السوداني وتخفف عنه بكتاباتك الجميله واراءك المعبره وانا معجبه جدا بها واتمني لك المذيد والمذيد وبالله التوفيق

  37. هند محمد سليمان علي | رد

    ربنا يديك الصحة و العافية عشان بتفشنا شديد و بتتكلم بي لسان حال كل المواطنين معطوبي القلب
    أضم صوتي لي صوتك و أقول عليكم الله ارحمووووووووووووووووووووونا يا ناس

  38. الاستاذ الفاتح تحية واحتراما لك ولقلمك البك العجيب
    كنت ولا ازال معجبا بكتاباتك الجميلة والمعبرة بصدق عن الانسان السوداني البسيط.واعترف انني مللت لفترة وتوقفت عن القراءة وذلك لانو المواضيع والقضايا المطروحة ومدى تجاوب المسئولين افرزت حالة نفسية سيئة ممكن تكون احباط وممكن تكون احساس بان كتابتكم دايما عن الاشياء السيئة في المجتمع وامنا الحكومة (كما يحلو لكم)جعلتني مرشح للاندفاع بقوة نحو الاكتئاب الا اني اتمنى ان تلقي الضوء على بعض الاشياء الايجابية سواء من جهة المجتمع المدني او شرائح الشعب بمختلف انتماءاته ومستوياته الاجتماعية والثقافية او حتى السيدة الحكومة ان كان لها خير قد عمل .فالمواطن السوداني مأزوم من حالة النخب السياسية الحاكمة والمعارضة وهو محبط .كما اتمنى ان تتخيل لنا سياسيون جدد هدفهم وسلوكهم مختلف عما تعودنا عليه وتتخيل لنا كيف نقلونا من حالة الافتقار والبؤس الى عوالم اخرى وان تشخص الازمة وتضع عناوين للحلول في جهد فكري نابع عن صفاتنا وعاداتنا السودانية السمحة .اتمنى ان القاك من خلال كتاباتك الجميلة وان التقي بك صوت وصورة في مكان واحد نتناقش فيه حول هموم الوطن الجميل المعتدى عليه .وتحياتي لكل اهل السودان عبر موقعكم المحترم ولكل متابعيكم ..واتمنى ان اعود للسودان فاجده جنة الله في الارض …ومتعكم الله بالصحة والعافية ..
    والسلام

  39. التهمة لابساك لابساك ونحن نطالب بترقيتها لوزارة التنفيس استاذي الفاتح ابو ناجي كثر الله من امثالك في البرمان لتحدث بصوت الشعب ولغته الصريحة والواضحة لا تتوقف عن الكتابة عند استلام الوظيفة
    رجاء هل لي بشرف لقاك انا مغترب وجاي اجازة

  40. دقيقة شوية… محلل نظم
    والله مامصدق,,, لأنو انا برضو محلل نظم,, يعني بعد كده افتخر انو واحد مننا كاتب زيك
    لكن جد الا اسألك ,,, انا متأكد انو دراستك اثرت في كتاباتك,, لأنو تخصصنا بيعتمد على تحديد مواطن الضعف والكمال في النظام
    صح ولا

  41. الاستاذالحبيب متع الله بالصحة والعافية وادامك الله طابعا للبسمه علي وجوه الغلابة
    استاذنا الغالي اظنك سمعتة بمعانات الاخوة المغتربين بميناء سواكن في الايام دي وكم وصل سعر كرت صعود الباخرة من 21 جنية الي 1200 جنية وتلقاهو عند ستات الشاي الحبشيات وعلي عينك ياتاجر ويقولو ليك ماسكنها ناس الامن والمعتمد والله ياستاذ شي يفقع المرارة ويقد الفشفاش وعليه نرجو منك ان تولي الموضوع اهتمامك ولو عمود واحد خصوصا انو الموضوع دا بتكرر سنويا وحدث عن سواكن وما ادراكما سواكن حبيبنا والله حالنا يغني عن السؤال ونحنا في انتظار تنفيسك عنا ولو بكلمة
    ولك التحية والاحترام

    1. حبيبنا لك التحية ولسة منتظرين ردك علي موضوعنا حتي لو بكلمتين

  42. في انتظار ردك كماتة الصبر كلو
    لك التحية حبيبنا الغالي جبرا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: