عندما دخلت إلى منزل جارى (عوض) أشار لى إبنه الصغير بأن والده فى الصالون ، دخلت إلى الصالون لأفاجأ بجارى عوض (معلق فى الحيطة) يقوم بتغيير إحدى اللمبات وما أن رآنى حتى قال لى فى حنق وغضب:
– يا استاذ بالله ده إسمو كلام؟
– (مندهشاً) : مالك يا عوض فى شنو؟
– ياخى على بالحرام دى اللمبة الخامسة فى ظرف أسبوع ! والله يا استاذ بقينا ندفع للمبات أكتر مما بندفع (للجمرة)
– كدى أنزل هسه ما تطقك لينا كهرباء كمان
– والله لو طقتنا ذااتو تكون ريحتنا من الحياة المقرفة دى .. البلد كووولها أى حاجة تمسكا مصنوعة فى الصين وما تقعد ليها يومين !
كما قال جارى (عوض) فقد غزت المنتجات الصينية (الرديئة) الأسواق فى الآونة الأخيرة بصورة لم يسبق لها مثيل إبتداء من الإبرة والخيط مروراً بكافة الأجهزة المختلفة كهربائية وإلكترونية وكذلك الأحذية والألعاب ومستحضرات التجميل والعطورات والأكسسورات، وحتى الملابس الأطفالية والنسائية وحتى الرجالية من (عراريق) وجلاليب وسراويل و(طواقى) هذا خلاف (العربات) والتى لم تجد لها سوقاً رائجة بعد أن قامت (حفرنا) الله يخليها بكشفها (من قولت تيت) !
لقد أصبح شيئاً عادياً إنك تقوم من النوم تعاين للساعة فى الحيطة تلقاها (صنع فى الصين) تقوم من السرير الصينى وتلبس سفنجتك اللبنية الصينية تمشى الحمام تتسوك تمسك (الفرشة ) تلاقيها (صنعت فى الصين) وإنتا بتضغط فى المعجون تشاهد مكتوب عليه (صنع فى الصين) ، تتوضا وتخت (السجادة) عشان تصلى أول ما تسجد تعاين قدامك تلاقى فى طرف السجادة عبارة (صنع فى الصين) ، تمشى المطبخ تعمل ليك كباية شاى ، تخت (البراد الصينى) فوق البوتوجاز الصينى وبعد ما الشاى يفور تقوم تكبو فى الكباية الصينية وتديهو سوطة بالمعلقة التى كتب فى طرفها عبارة (صنع فى الصين) !
تقوم بإرتداء البنطلون الصينى ثم القميص الذى كتب على ياقته (صنع فى الصين) ثم أخيراً الحذاء الذى انتجته أردأ مصانع الصين ثم تضع الموبايل الصينى وتخرج إلى المنزل متجهاً إلى العمل حيث تستقل (بصات الوالى) الصينية .
قامت الصين بتقليد كل الصناعات الأوروبية مستخدمة فى ذلك اردأ المواد وقد قامت بطرح منتجاتها في الاسواق العربية باسعار قد تقل عن النصف لمثيلتها الاوروبية (الأصلية) , ونسبة للأحوال الإقتصادية المتردية فى البلاد العربية (للمواطن وليس المسئول) فقد وجدت لها سوقاً لأنها ببساطة بضائع (قدر ظروفك) يفرح المواطن لإقتنائها لان دخله لا يمكنة من شراء الأصلى منها غير أنه سرعان ما يكتشف أنه وقع ضحية (الغش الصينى) !
وعلى الرغم من أن العالم كله من حولنا قد حارب الغش وأن معظم البلدان المحترمة قد منعت دخول المنتجات الصينية إلى أراضيها إلا بعد مطابقتها للمواصفات والمقاييس العالمية, لكن (حكومتنا) تقوم بتشجيع هذه السلع والبضائع الصينية غير المطابقة ونجد أن مؤسسات الدولة تدعم هذه التجارة مغمضة (عيونها) عن هذه السلع المغشوشة لدرجة الركاكة ، وقد تم تسهيل وفتح القنوات التجارية بيننا وبين الصين لدرجة إنو أصبح عادى تسال عن (عوضية الدلالية) يقولو ليك ختفت كراعا و(مشت بكين) !
سكوت المسئولين عن إيقاف هذا الغزو الصينى عن طريق هذه البضائع (الفالصو) بل وتحفيز (تجار الغفلة) للسفر إلى الصين لإستيراد هذه البضائع (المضروبة) يعنى بأن الدولة مبسوطة لما يحدث ، والدولة ليها حق هى ما تكون مبسوطة (كيفن) وهى تتقاضى (كم فى المية كده) ضريبة مبيعات على السلعه او الجهاز الإكتروني الصيني (المضروب) والذى لا يعمل لأكثر من يومين من (تاريخ الانتاج) فيقوم (المواطن) المغلوب على أمره بإعادة الكره وشراء نفس الجهاز ليدفع مرة أخرى (الضريبة الكم فى الميه كده) تاااانى .. وبذلك يتم إفقار (الشعب) لتربح (الصين) ومعاها (الحكومة) !!
ان من أوجب واجبات الحكومة توعية المواطن بمكامن النصب والاحتيال ولكن أن تقوم (هى ذاااتا) بجلب المحتالين اليه وتسهيل وصول (تجار الذمم الخربة) لمصاتع الغش (الصينية) ليقوموا بإغراق السوق بهذه السلع الفاسده دون (حسيب أو رقيب) .. هذا والله أمر غريب ومريب !
ان الواجب يقتضى على الحكومة تشجيع المواطنين على شراء السلع الصالحة للاستعمال وتقليل الضرائب المفروضة عليها حتى تكون أسعارها فى متناول الجميع كما أن الواجب عليها منع ادخال (هذه السلع المغشوشة) التي تنال من أموال ميزانية المواطن (الأساااسن ما ناقصة) !
كسرة :
حقو الحكومة تلحقنا (بى خروف صينى) إن شاء الله بدون (نغمات) نلحق بيهو الضحية الكبست علينا دى !
الفاتح جبرا 
والله الخوف الولد يطلع من بطن امه تلقاه كاتبين عليهMade In China.
والصيني كانو قاعد في بلدو ونحن الوافدين
محل ما تقبل تلاقي الصيني
ونحن الملطشين
السلام عليكم ، البروف و الاخوان ، الحمد لله على السلامه ، الرجعنا زى اول ، البضاعه المضروبه ما مشكله ، يعنى لو ناس المنطقه الصناعيه دقوا صدرهم و شوية اقتحام للتكنلوجيا مع بعض التجويد كنا عملنا احسن من المنتج الصينى ، لكن المشكله اولادنا البمشو يعملو تدريب هناك ، كان اطباء ولا مهندسين ، وديل مابعرفو لا انجليزى ولا عربى ، اها النتيجه واضحه ، ويجونا راجعين دكاتره و مهندسين مضروبين عجبى
كلو كوووووم والجوالات الصينية كوم
This is really nice Ustaz Alfateh
الأحباء الاعزاء
شكراً ليكم على المرور .. لكن بالله عليكم الله قصة السلع الصينية الرديئة دى مش مبالغة !
يا سيد ساخر هل تعتقد الن اللوم على الصين فيما يحدث؟ لا و الله ففي الصين من البضائع ما تنافس به كبريات الصناعات العالمية و لكن اللوم كل اللوم على تجار الغفلة و الحكومات الغافلة بمزاجها لمصلحة ذوي الذمم الخربانة و بصراحة ما عندكم اي حل عشان الحكومة زاااتا ما عندها ذمة و قد شاهدت بام عيني و ابوها كمان من كبار ما يسمى زورا و بهتانا رجال الدولة في الصين و بصحبته عدد من الهمباتة المشهورين جدا في كل مجالات النهب و هم يتعاقدون مع احد المصانع لانتاج معدات لاحد المشاريع المسماه بالقومية كان ذلك في عام 1998 و لسة المشروع اياهو لم يبلغ مرحلة الحبو و السيد الكبير من وزير لي والي لما عارف شنو و بطانتو من الهمباتة مسيطرين على السوق بعد ده تفتكر في حل غير الحل؟
واحد صحى من الينج فى مستشفى الصداقه بعد عمليه بسيطه لقى حوله 20 صينى. . قالهم دى عمليه ولا كبرى..
انتو ما عارفين المشكلة وين, المشكلة في الاربعة البقروا فى الموضوع ده الان في الصين (لاحظ ال flag counter) يعني بعد شوية خانلقي الفاتح جبرا صيني ،،،،،،،،،،،،،،،
كلام مؤلم والله يا استاذ
لاكين (كيفن) تبقى السودان كان مافيها جنس دا
الله يرفع عننا البلاء
كلام مؤلم جدا يا استاذ
لاكين (كيفن) يبقى السودان كان ما بقى فيهو جنس دا
الله غالب
السلام عليكم
أتنفق مع الأخ حمدالنيل في أن اللوم ليس على الصين فقد رأيت بأم عيني منتجات صينية من أوروبا وأمريكا تختلف تماما عن المنتجات الصينية التي نستوردها …… وقد أخبرني أحد الأخوة التجار ممن يتعاملون مع الصين أن المصانع هناك تصنع لك أي شيء حسب طلبك وحسب المواصفات التي تحددها أنت وكل شيء وله سعر…. وناس المواصفات عندنا لست أدري ما هو دورهم ولكنني أعلم أن شاشات الكومبيوتر الصينية – مثل التي أتطلع إليها الآن- لا يمكن لها أن تدخل أوروبا لأنها غير مطابقة لمواصفات TUV وهي مواصفات إشعاع يحددها معهد سويدي ويعتبر أي جهاز يصدر مستو أعلى منها ضارا بالصحة… فمتى يدرك من بيدهم الأمر من ناس المواصفات وغيرهم أن المسألة ليست مسألة جودة ورداءة فقط وإنما هي أرواح ناس وموت وحياة…
مانحن سويناها في نفسنا من زمان سفرة الاكل المدورة سميناها صينية ثاني عاوزين شنو
الأدهي والأمر كمان في دكاترة صينيين ضاربين ، وللأسف مسموح ليهم بممارسة المهنة في السودان وما تجربة هؤلاء النصابين في دنقلا ببعيدة وتحت سمع ونظر المسئولين
هسه يا عمر أبشر لو عندى آآكولة فى نص ضهرى أقولا للدكتور الصينى ده كيف؟
احتمال يا استاذ بعد شوية يكون في فكي صيني وعندو ماكينة صنع بخرات صينية والبخرة يكون مكتوب عليها Made in china
وما بعيد المحاية تكون من النهر الاصفر (هوانج هو) لكن الغريبة في منتجات صينية بتجي عن طريق بلدان اخري جيدة جدا وكثير من الشركات الكبري تنتج منتجاتها في الصين لرخص الايدي العاملة فشركات كبيرة مثل hp dell apple تنتج كل منتجاتها في الصين وهي منتجات تتسم بالجودة العالية مع انها مصنوعة في الصين ..!!!
بالله يا سلطان العشاق النهر الأصفر إسمو (هوانج هو) ؟ دى معلومة جديدة لنج
الحل لفزوره “صنع في الصين” هو ان يقلص جبرا تشخيصاته الذكيه من 7 الي 6مرات في الاسبوع ومره واحده في الاسبوع يخصصها للوصفات الذكيه ، ولاستدراجه لهذه المنهجيه نذكر أن السودان بلغ الطيش 154 في سلم التنميه البشريه حسب تقرير الامم المتحده مؤخرا، وعليه مطلوب من الفاتح أولا :روشته كيف نحصل علي سجل أفضل خبراء السودان (إنجازاتهم وتلفوناتهم وإيميلاتهم )وثانيا : كيف نتخلص من لوبي “الخاميين” “للنهضه الزراعيه” لتصبح “نهضه صناعيه زراعيه ” لتحقيق ” صنع في السودان” وبين ظهرانينا ملايين الخريجين الزراعيين والمزارعين “لوبييهم ” “من لوبي” أقوي من اللوبي المعروف للكافه وثالثا: كيف نحصل علي 3مليون متبرع لغرس 3مليون غابه بريبايوتك (صمغ كلبن الام) ومليون تبلديه في السودان لمكافحه الفقر وأمراض العصر والاحتباس الحراري ، كسره :عفوا للتبرع www,bfft.org
الدكتور الكبير الأخ العزيز عصام صديق لك منى ألف تحية
السودان سوف يبلغ الطيش فى أى شئ (لو ده لسه ما حصل
) ما لم يشارك فى إتخاذ القرار فيه علماء من مختلف تنوعات الطيف السياسى …
علماء اكثر من القاعدين في وزارة الزراعة ياخ دة الغفير عندة دكتوراة يا جبرة . اما المواصفات دة المعمل القديم باعوة بكم جنية ورجعو اشتروة بكم مليون مدير المواصفات مع كم طلاق من الرئيس قامو خلوه . قال مدير موصافات الامارات المتحدة غايتو جنس كذب المشكلة السياسة بقت Made In China
سمع أضانى دى البشير يشكر فى الصين فى الدخله والمرقه وقال أحسن ناس وأظنو ده الوخذ بالابر الصينيه عشان يحركنا شويه من السباته الباركين فيها لينا واحد وعشرين سنه دى حسو ياخى
يا عزالدين ياخى عاوز تدخلنا فى السياسة ماااالك ؟
انا ادرس فى ماليزيا منذ 3 سنوات كل البضائع هنا تقريبا صينيه و لكن ااكد لكم ان من هذه البضائع ما لا يقل جودة عن الاورلابيه فمن الصينى من نمره واحد و الى نمره ما لا نهايه فالفرق بيننا وبين ماليزيا و بالرغم من ان ثلث الصين هنا فلى ماليزيا هو الفحص و الدقه فى دخول المنتج و الشركه المصنعه له فماليزيا لاتعرف الا بعض الشركات الصينيه من مئاتها ………… فمتى نكون مثل هذا البلد
بالضبط كده يا سيد .. هنا القصة عايرة وأدوها كم ألف سوط
الحق على المواطن – طالما أن مصطلح “المواطن المغلوب على أمره” شماعة نتوسدها ضعفا ، وأن منافذنا البحرية من الكثرة التي تمتنع معها الرقابة فضلا عن المطارات ، مع العلم أنه تناهى لمسامعي قبل أشهر أن دائرة المواصفات والمقاييس حظرت إستيراد ألعاب “على ذمة بعض تجار العاب الجملة” إذا المواطن يجب عليه أخذ حقه بالعكاز وان لم يستطع فلينتظر سيدنا عيسى أو ينتظر حقه في الآخرة والخوف يطلع محقوق؟
يا نور .. البلد كوووولها بضائع وسلع مضروبة ومغشوشة .. السلع دى بتدخل عبر الموانى والمطارات وبيشيلو عليها جمارك لكن ما خصاهم كويسة وللا ما كويسة .. يعنى القصة إيرادات والمواطن إن شاء الله زيتو يطلع
بسم الله الرحمن الرحيم
عزيزئ البروف الفاتح .لك كل الشكر على الكتابه الهادفه (وياليت الكل يدرك ماتلمح له )
فقط تنقصنا من الصين( جريده باللغه الصينيه اصدار الخرطوم )
اتقوا الله فى الحكم وحاسبوا انفسكم قبل ان تحاسبوا .
المجتمع يحمل الصالح والطالح ويجب ان نحزر من البضائع الفالصو (وارد الصين او غيرها )
الغش هنا عندنا موجود مثلا (اعادة التعبئه للبضائع الفاسده )
الله يكون فى العون .
الأرباب سلام
ياخوى الأرباب المشكلة الواقعين نحنا فيها إنو مافيش زول بيراقب اى حاجة .. لا السلع لا المأكولات لا المبانى لا أى حاجة الدولة يا الأرباب يا خوى بس تشيل منك لكن تديك !! ده كلام ب عيييييييييييييييييييييييد !ّ
YANSOR DEENAK YA GABRA, This issue hurted me long time ago, realy it is samefull for Sudanese governers that what doing on Sudanese people.
God Speed Gabra.
ينصر دينك يا ود العاقب عشان ح تكون معانا بى جاى فى القمردينة … مرحب بيك ألف مليون مرحب
استاذنا , اخوتي وأخواتي
زي ماذكرتكم بأن كثير من الشركات العالمية صارت تصنع منتجاتها في الصين , فكثير من كبريات الماركات تجدها تصنع منتجاتها في الصين وكثيراً ما تجت مكتوب على المنتج صنع في الصين للجهة الفلانية … وهذا ليس عيب الصين ولا الصينيين وإنما العيب عيبنا أين المواصفات والمقاييس وأين حماية المستهلك ؟
حكي لي والدي ( في الزمن الزمين يا أستاذ الفاتح ) أنه في يوم حصلت مشكلة في الكهرباء ( زادت قوتها حتى قبل الجمرة ) فكان وأن خربت عدد من الثلاجات ( برضو ثلاجات زمان ليست التي صنعت لتلائم كهرباء وجو السودان ) فقام المتضررين بمقاضاة الهيئة ( زمن الهيئة وكده ) ولم تأخذ القضية سوى أيام حتى عوضتهم الهيئة عن خسائرهم … هل من تعليق ؟
يا مأمون ياخوى .. الكلام ده إلا يكون فى حتة تانية لكن فى السودان البنعرفو ده مما نال إستقلالو أتحدى أى زول كسب ليهو قضية ضد جهه حكومية … يا مامون دى إسمها الحكوووووومة والناس أهالى .. هسه ناس الكهربا ءعندهم قضية إستحقاقات الإعفاءآت تعرف القضية حكمت فيها المحكمة العليا لصالح تعويض العاملين بالهيئة ولكن لم ولن يتم التنفيذ ؟ ياخى خليها ع الله بس يا مامون !
دا شئ بديع يا استاذ الفاتح حقا انك مبدع
الله يخليك يا دكتور ده كلو من ظرفك .. ألف مليون شكر ليك
البروف والحبان،، حمدلله بالسلامة ،، بس شايف القمردينة لونها غامق شويتين لا بيسمح بانو خط الكتابة يكون ابيض ولا اسود،، ارجو كاقتراح بسيط تنسيق لون الخلفية ولون خط الكتابة حتى يكون مريح للعين ولا ياربي المدونة زاتها تكون made in china!!
كما قال الأخ هاشم حسين المصانع الصينية تصنع حسب المواصفات والطلب ولكل سعره،، زي ما قالو واحد اشترى ليهو جزمة ايطالية (لا مؤاخذة) ومشى بيها الصين لي مصنع احذية وقال ليهم انا عايز جزم زي دي،، قالو ليهو شكل بس بي 15 يوان،، شكل وجودة ما بطالة 25 يوان،، شكل وجودة 100% بي 35 يوان، وبعد داك يكتبو ليك فيها made in italy وانت تشتريها بي اكتر من 100 دولار،،،
ليس بامكاننا لوم الصين، فهي سياسة تجارية تبيح كل السلع بنسب جودة متفاوتة لتكون في متناول الجميع بغض النظر عن عمر المنتج الافتراضي، ولكن في بلد كأمازونيا لها هيئة مواصفات ومقاييس ومنظمات جودة يجب ان يكون هناك حد ادنى من الجودة لكل منتج ومراقبة السلع والواردات وان لا يكون هم الحيكومة فقط اخذ الضرائب والجمارك على السلعة
ودمتم
سابنتود سلااام … الصين متلومة لأنها تمارس الغش التجارى وناسنا ديل متلومين لانهم بيمارسو النوم النهارى
السلام عليكم استاذنا انا افتكر انو العيب ليس من الصينين بس من اجهزة الرقابة الفي البلد دي وثانيا افتكر انو الصينين عباقرة لانو بصنعوا المنتج علي حسب جيبك بدليل عندهم منتجات بتنافس المنتجات الاوربية
يا معتصم يا خوى هم الصينيين غلتانين البصنعو حاجات زى دى لكن أكيد الغلط الأكبر فى ناسنا هنا العاملين مصهينيين ديل؟
السلام عليكم
حقيقةً ما خلييت للجماعه حاجه يا أستاذ .
نحنا والله محتاجين لي كتابتك دي شديد في البلد دي و الله إكون في العون
شكرا يا هريدى وربنا يقدرنا نكتب المفيد … تحياتى
اولا يجب توعية المواطن ،،، نعم الرخيس بي رخستو يضوقك مغستو
سعر الحذاء الصيني عشرة جنية
سعر الحذا الايطالي 100 جنيه
عمر الحذاء الصني شهر
عمر الحذاء الايطالي 24 شهر
المعادلة : 24 حذاء صيني = 240 جنية
الوفر : 140 جنيه كل سنتين
بس ال 100 جنيه ما تتوفر
سعر التلفزيون الصيني = 500 جنة
سعر التلفزيون الياباني 1000جنيه
عمر التلفزيون الصنيي والضمان ………لا يوج
عمر التلفزيون الياباني والضمان سنتين
والمعادلات كثيرة لو ان المواطن حسبها صاح حا تبور البضائع الصينية الرديئة
وحا ننعم بالبضائع الممتازة حتى ولو كانت صينية ولا صحن
كلامك عين الحقيقة يا دكين لكن المسألة فيها إستغلال لحاجة المواطن وعدم مقدرته المادية .. يعنى إنتهاز فرص وكده
اوووو يا عمنا – والله حمدلله على السلامة ودى شكلها بركات العيد علينا
تجدنا انشاء الله معاك دئما بالتعليق والمشاركة
جبرا حمد الله علي سلامة القمر دينا بس اللون ما قمر ديني
نحن في انتظار الزوجات الصينيات مثني وثلاث ودفع رباعي كماااااان
يعني ناس نهي وفطومة وسعاد حقهن رااااح تاني ناس يانجا وتسيكيانجا
والله يا ناس محل ما تمشو تلقوني … بضاعة صينية بس … عرق بطيخ … مطرة وهلم جرا … هي القمردينة هينة .
البروف الحبيب…سلامات..
وحمدالله على عودة القمردينة وربنا يديم المحبة ويديك الصحة والعافية..وتحياتى لكل الاخوة المتداخلين قديما وحديثا..
الحبان من جديد،،
سمعت لي مثل انجليزي وانا شغال بيهو لي فترة
I am not rich to buy cheap
ودا بيثبت الكلام القالو دكين
البروف الفاتح وبقية صفوة الأخيار ..
عشان ما كوووولنا نبقا واقفين صف واحد ضد المنتج الصينى عاوز أقول إنو الناس ديل – الصينيين – ناس عمليين جداً وياريت نحنا نبقا زيهم وننتج الحاجات الما كويسة وبنقول عليها رديئة المصنعية . الشى التانى الناس ديل عندهم عبقرية شديدة بيصنعوا ليك الحاجة قدر قروشك ..دا الشى العرفناهو هنا فى دول الخليج .. التجار كلهم بقوا طيران على الصين ويطلبوا البضاعة بمواصفات معينة واجماعة ما بيقصروا بيصنعوا ليهم حسب الطلب الخليجيين يشيلوا عينات ويمشوا بيها الصين ويقولوا ليهم يا جماعة نحنا عاوزين تصنعوا لينا زى دا ..الصينيين ما عندهم أى مشكلة ممكن يصنع ليك أى حاجة ويالسعر بتاعك كمان ..عشان كدا ما حقو نلومهم ابداً .. حقو نلوم أنفسنا وأخواننا التجار البيستوردوا الحاجات الرديئة الصنع من الصين .ونلوم ناس وزارة التجارة وناس هيئة المقاييس والمواصفات البيسمحوا بحاجات رديئة الصنع تدخل السوق المحلى .. والمثل عندنا الرخيص برخصتو .. يضوقك مغصتو ..والغالى بغلاته يضوقك حلاته .
أذكر إنى مرة مشيت أشترى حاجة فقلت للبائع ( باكستانى الجنسية ) يا خ دى صينى .. فرد على وقال .. يا عم الدنيا كووولها بقا صينى ..قلت ليهو فعلن معاك حق دنيا كلها بقا صينى نحنا زاااتنا قربنا نقع نتكسر .
وأختم واقول ..المشكلة فينا نحنا الما عارفين لحد حسه نصنع إبرة ..وقاعدين للفصاحة والفاقاق .
لك الود والاحترام يااستاذنا الفاتح جبرا…..
نحنا ناس مغلوب علي امرنا , فالصين لها بضائع ممتازة وعاية الجودة ولكن المشكلة في تجارنا والموردين لهذه البضاعة (المستعملة) فالجهاز الذي يذهب لامريكا وينافس بضائعها فرق كبييييير بينو وبين الذي يذهب الي السودان مع أنو الجهازين مكتوب عليهما(made in china) فمن يهن نفسه استهان به غيره او سهل الهوان عليه فالحل في المواصفات والمقاييس (ليس المقياس الصيني)
الصين ذااااتا يا أخوى ود الجاك لو بتحترم روحا حقو ما تصنع ليها حاجات زى دى وإلا شنو؟
انا شايف الجماعة كووووولهم بلومو الامزوني الفضل و في الحقيقة ختو اللوم علي لانو الواحد عارف انو made in china اخرتها كوم تراب و بعدين الحل هو عندنا و هو يعني مقاطعة ماهو صيني نوهائي فسيبحث تاجرنا الهمام المستورد اللملام عن مصدر اكثر جودة و لكنه معقول شوية يعني يديني بدل شهر 3 شهور و بدل جزمة كل اسبوع جزمة كل شهر و بدل ولعة لكل لمبة ولعتين تلاتة…
زمان لغفونا اولاد بمبة و كانت منتجاتهم اكثر جودة من China خلونا نجرب حاجة تانية زمان كان في شبط صندل تشيكي بقعد معاك المرحلة الدراسية من اولها لاخرها و ممكن تديه لاخوك بعد تنتهي من المرحلة يبدا بيهو المرحلة الجديدة او رجعوا لينا شركة باتا 99.99 مالها عيبوها لي….
نيام سلااااام .. قلتا ليا الشبط جنسو شنو؟ غايتو الكلام ده نحنا ما حاضرنو ..!!
اولا احب اهنيك يا استاذي على القمردينة الظريفه دي وعودا حميدا ولي الشرف اكون من مرتادي هذا الموقع
وتانيا ياجماعة الصينيين ديل بيفرتقو الحاجة حته حته وبيعرفوها مكونه من شنو بالضبط وبيقلدوها لكن الغلط من الناس البتجيهم عشان يقلدوا ليهم هم غير كده عندهم المنتجات درجه اولى وتانية وتالته والبتجينا هنا في السودان دي شختك بختك شكلها او بالاصح درجة 300 كده
لانها ابو الرخاء لكن عندهم علاجات هناك مبالغه بالمناسبه اعشابهم دي زاتها مبالغة بالمناسبه والابر الصينية دي كمان عالم تاني بس انحنا هنا الحاجات البتجينا دي هناك بيشتروها ابو الرخاء
وهاكم القصة دي عن براعتهم في التقليد
قالو نزلو في بورتسودان جاهم بتاع السراير سألوهو عن الواحد زلكم استقل الوضع اداهم سعر خيالي في النهاية قالو لي اعمل اتنين وتعال بكره عمل اتنين تاني يوم جا لقاهم كلهم عملو سرايرهم براهم ديل الناس العمليين طبعا مازي الكسالى الكميات ديل
للجماعه البيسجرو وخاصة البرنجي والبنسون انتو مالاحظتو الايام الفاتت طعم الاتنين ديل كان كيف ماقالو في واحد نزل معاش وبحقووقو مشى الصين شايل معاهو صندوق برنجي وبنسون جا راجع بتلات كونتينرات مليانة من كل صنف وفكاها ف السوق ضرب السوق وده السبب في زياده السعر وهبوطو
كسره:
السجاير نفس الشئ بس زبطه الراس مستحيل تكون نفس الشئ
كسره تانية:
هل تعلم بأن البرنجي مصنف في كندا ضمن ال
(drugs)نعم ضمن المخدرات
أعتقد بأنو كلامك ده صاح يا عابر سبيل لأنو حتى شكل الصندوق بتاع البنسون إتغير .. كل شئ بقى جائز .. الله يكون فى العون غايتو
أولاً أود أن أشيد بالأستاذ الكبير الفاتح جبرا، وأحيي كتاباته البناءة للغاية
ثانياً أود – إن سمح لي المقام – بالإشارة إلي أن الصين لم تتوقف عند هذا الحد
بل قاموا بتصنيع بيض الدجاج، وبيضة الدجاج الصينية الدجاجة بريئة منها براءة الذئب من دم يوسف
حيث يقومون بتحضير مكونات الصفار ومكونات البياض ويقومون بصبّ كل منهما في قالب خاص به، ومن ثم تتم عملية دهان الطبقتين بالكالسيوم لتصبح بيضة صينية صالحة للأكل على حسب وجهة نظر الصينيين
لقراءة المزيد يمكن زيارة الرابط التالي:
http://www.bdr130.net/vb/t405737.html
وملاحظة صور البيض الصيني من خلال الرابط:
http://www.google.com/images?hl=en&q=%D8%A7%D9%84%D8%A8%D9%8A%D8%B6+%D8%A7%D9%84%D8%B5%D9%8A%D9%86%D9%8A&um=1&ie=UTF-8&source=univ&ei=xWTdTP7YEs6HhQfQ0LT7DA&sa=X&oi=image_result_group&ct=title&resnum=2&ved=0CDEQsAQwAQ&biw=1024&bih=578
الإبن العزيز اياد
مرحب بيك فى القمردينة ألف مرحب .. قصة البيض دى والله زول سبقهم عليها مافى؟ الناس دى بتبالغ؟
شكر لك الفاتح جبرا .. على الجهد الخارق في محاربة هذا الزحف الصيني
وبعدين ياخي الصين دي ما يحصروها لينا بس فى البترول دا .. الله يستر كمان ما يكون هو التاني معدلين فيهو؟
قبل سنتي كنت في شانقهاي لحضور معرض الاطارات .. وسالت احد العرضين في شركه مغموره انو ليه ياخي بتجيبو لينا بضاعتكم المهببه دي ؟؟؟
تعرف قال لى شنو ؟
احنا منصنع ليك حسب طلبك وبس .. ومنقلد ليك حسب طلبك
ابقى المساله يا استاذ جبر .. مننا احنا ابان دقانيس ديل
السلام عليكم…
وكل سنة وانت طيبين…والسودان موحد…وفي منعة وتقدم.
يا استاذ : وكما جاء بالذكر بعض الاخوان المشكلة ما في البضائع “Made in China” الصينية “ده اذا كانت صينية بحق؟؟؟ “,المشكلة تجارنا ونحن المواطينين ايضا “لنا الباع الطويلة”,واين دور هيئة المواصفات والمقاييس؟؟؟؟؟!
شكرا على الموضوع احب اضيف انو شرائك للمنتجات الصينية شختك بختك مشترى ماكينة حلاقة صينية مشتريها من دبى صار ليها 17 سنه ما جاها شئ وتلفزيون ال سى دى صينى كل يوم اوديهو التصليح وليوهو 3 شهور مع الضمان يعنى ويستلموه ويجلس مهاهم 20 يوم واجيبو تانى