إيجابيات

 كثير من القراء الذين هم من حزب النظر إلى (الجزء الملآن من الكوب) ينتقدون كتاباتى ويقولون انها تميل إلى التحدث عن السلبيات (وحدها) وهذه حقيقة أعترف بها واعتقد أن من أولى مهام أى كاتب تسليط الضوء علي أوجه السلبيات والقصور وذلك  من أجل لفت نظر المسئولين لمحاولة إصلاحها ،  ولكن حتى لا يغضب هؤلاء القراء من كتاباتى (السلبية) فها أنا اليوم أكتب لهم عن بعض الإيجابيات :

 من إيجابيات الحفر والمطبات التى على الشوارع أنها تنعش سوق الميكانيكية والحدادين والسمكرجية وبتاعين الإسبيرات وبالتالى يمكننا أن نقول بان هذه الحفر (فاتحة ليها بيوت) .

  • من إيجابيات المياه الراكدة أنك لا تستطيع أن تعبرها (وإنت ما شايف تحت فى شنو ) دون أن تدعو ربك أن ينجيك من الحفر ما ظهر منها وما بطن ويقطعك الشارع بالسلامة فتنال بذلك أجر الدعاء إلى الله والتوسل إليه .
  • من إيجابيات غلاء الدواء إتجاه المواطنين للأدوية البلدية والأعشاب والتى ثبت علمياً أنها لا تحتوى سميات أو كيماويات بتلك النسبة التى تحتويها الأدوية (المضروبة) التى توجد على رفوف الصيدليات !
  • من إيجابيات التعكير الذى يصاحب مياه الشرب ونسبة (الطمى) العالية التى تحتويبها  أنها أصبحت أكل و(شراب)  فى آن واحد مما يقلل من إلإحساس بالجوع لدى المواطنين
  • من إيجابيات قرار إلغاء العمل بقانون المرور الجديد ذو الغرامات (الفلكية) أن إصحاب المركبات أصبحوا يدفعون الغرامة (الثلاثينية) فى أريحية
  • من إيجابيات كثرة أذاعات الأف أم أن المستمع يصبح محتاراً فى أيهم يختار فيقوم بإطفاء المذياع
  • من إيجابيات (الجبايات والرسوم) التى تؤخذ من المغترب عند حضوره فى الإجازات أن معظم المغتربين تركوا النزول فى إجازات مما يوفر لهم بعض  (القريشات)
  • من إيجابيات قرار قفل محلات الشيشة أن رواد هذه المحلات أصبحوا يتصلو على أصحابها لتجهيزها لهم فى منازلهم وبهذا تستفيد شركات الإتصالات .
  • من إيجابيات تصريحات وزير المالية الأخيرة بشان التقشف واللجؤ للكسرة أن كثيرا من المسئولين قد عرفوا بأن (الكسرة) أغلى من (الرغيف) !

 من إيجابيات كثرة المتسولين فى الشوارع الذين يزحفون على الأرض تهدئة السايقين للسرعة مما يقلل من وقوع الحوادث خاصة عند الإشارات

  • من إيجابيات إنقطاع الكهرباء الحفاظ على الصحة العقليّة للمشاهدين الذين يتابعون ما تعرضه هذه الفضائيات من برامج تصيب المشاهد بشلل القولون الرعاش
  • من إيجابيات إستخراج البترول أن بلادنا أصبحت من (الدول البترولية) .. وبس
  • من إيجابيات الاخطاء الطبية إنو الطبيب لو (أنثى) فممكن تنسى ليها غويشة غويشتين فى بطن المريض !
  • من إيجابيات زحمة الشوارغ وبطء الحركة أن الباعة المتجولون أمام إشارات المرور ممكن أن يفاصلوا معاك فى السعر فتشترى (الحاجه) بى خمسة جنيهات بعد أن عرضها لك البائع بميتين !
  • من إيجابيات سفلتة الطرق العشوائية أن العطاء يمكن أن يرسى لأحدى شركات (الزبادى) ولذلك فالطريق لا يمكث سوى أيام و(يتلحس) !
  • من إيجابيات تأخير مواعيد الإقلاع  لشركات طيراننا أن المسافر لا يمكن ابدا أن تفوتو الطيارة !
  • من إيجابيات وضع امنية مليونية لدى المستوصفات الخاصة قبل دخول المريض انها تساعد على الترابط الإجتماعى وكل واحد لازم يخت فى الكشف بتاع (الأمنية) !
  • من إيجابيات وجود كتاب واحد لكل أربعة تلاميذ أنها ترسخ فى نفس النشء روح التعاون والمشاركة
  • من إيجابيات الصناعة الصينية انك تستطيع شراء فستان لطفلتك فيهو 12 سسته و22 زرارة بى خمسة جنيهات (لاحظ كمان عليهو جمارك وجاى بالطيارة) !!
  • من إيجابيات صغر حجم الرغيف أنك تستطيع عمل (البوش) دون الحاجة إلى تقطيعه
  • من إيجابيات ثورة التعليم العالى أن كثير من ستات الشاى وكماسرة الحافلات يحملون درجة البكالريوس
  • من إيجابيات علو قيمة ترخيص المركبات دفع غير المرخصين للغرامات التى تغذى خزينة الدولة وتعود للمواطن فى شكل خدمات (الخدمات دى ما فيها شك) !
  • من إيجابيات قرار منع التظليل أن المواطن يمكنه بسهوله معرفة أن هذه العربة يمتلكها مسئول

 كسرة :

  • صرح  مدير احدى الجامعات بأن إحدى إيجابيات فرض الزى الموحد للطالبات أنه سوف يقوم بتقليل حالات الزواج العرفى بين الطلاب .. (أقطع دراعى لو بس اعرف العلاقة شنو) !!
Advertisements

45 تعليق

  1. نبدأ من الكسرة بفتح الكاف يا جبرا :
    المسعول الجامعي قصدو ان لبس بنات الجامعات اليوم مفصفص زي رخ الشطرنج بظهر التقاسيم (الهركولية الفنقية الدرمية ) للفتاة مما يجعل الزميل الماقادر يصل ( لبفرلي هلز) يشوف ليه زواج عرفي ولا مسباري لسبر اغوار رخ الشطرنج ….عشان كده عايز يلبسهم (فزاعات) موحدة تخوف الطير ما يرك في قناديل ام هاشم …..في حد فاهم حاجه …؟ ولا انا

    1. أنا ذاااتى يا أبكرون قلتا كده !!!

  2. ابكرون فسرتها بي طريقة وشلولخ في الابطحين … اما البروف فالجماعة حيقولو خليهو يركز في سلبياتنا ارحم لينا من ايجابياتنا .

  3. صباح الخير
    من ايجابيات غلاء الخرفان راحة النسوان من نظافة الكمونية …… هههههههه

    1. شنو يا سماسم الزوغان؟ يعنى ما عاوزين الشية؟

  4. أنا قريت كل كلمه، إني أفهم حاجه . كله إيجابيات إيجابيات .

  5. السلام عليكم ، البرف و الاخوان ، خبر صغير , واحد وزير سرقو من بيته 15000 ( خمسة عشر الف دولار ) و 11000 ( احد عشر الف جنيه ) فى خبته واحده ، و دى من ايجابيات دخول النمل وطلوع روحنا …. عجبى

    1. دى بسيطة يا حسن .. إنتا عارف إنو عندنا سفير فى إحدى الدول الأفريقية نشلوهو من جيبو عشرين ألف دولار بنات حفرة !! الراجل كان ماشى يتسوق وكده !!

  6. هريدي مرحبتين انت من الصعيد ؟ يعني ممكن نقول ( الهرايده وصلوا ؟ ) ……………..

  7. هههه أبكرون ياخ انتا من زمن الهرايده وصلوا ههههه
    نعم من أصول صعيديه بس عايشين في السودان
    و بيني و بينك الهرايده وصلوا و أي حاجه كمان 😉

  8. حاج أحمد السلاوى | رد

    البروف الفاتح ..وبقية صفوة الأخيار ..
    غايتو يا الفاتح إيجابيتك دى أخير منها السلبيات بتاعتك ..
    أنا متأكد لو أى حد من المسئولين قرا أيجابياتك دى ( دا طبعن إحتمال واحد فى المليون للقراية .. إستعارة بس ) حيتصل عليك ويقول ليك خليك فى السلبيات وبلاش إيجابيات ..
    ياخ جننتهم جن عدييييييييييل كدا .

    1. والله يا حاج أنا ما بزعل ليا زول العاوز سلبيات نكتب ليهو وكمان العاوز إيجابيات نكتب ليهو .. كان قصرتا قول ليا قصرتا !!

      1. حاج أحمد السلاوى

        عدّاك العيب .. يا ابو ناجى ..وما بتقصر تب .. يقصر الملح .
        وكل زول بتديهو حقو.. بس ولاة أمورنا ديل بيحبو يمدحوهم حتى بما لم يفعلوه..
        بالمناسبة .. خروف الضحية سعره وصل كم ؟
        كوكو .. ابكرونا .. معجبة .. بن البرد والأمير مخير ..وودالمدنى ..وود الزبير .. ما احلى الرجوع للقمردينة..والله ليكم وحشة شديدة ..ربنا يجمعنا بيكم فى ساعة خير مع عمنا أبو ناجى .

      2. يا استاذ ماوريتنا ايجابيات انفصال الجنوب شنو

      3. مش وزير المالية ورانا ليها يا أحمد ؟

    2. كل الايجابيات دى حاصلة

    1. يا هلا بكابتن الفريق (ب) .. القمردينة نورت

  9. سلااااااااااااااام ياستاذ وربنا يديك من ايجابيات حكوماتنا لو في الاحلام

  10. بشار أحمد بشار(إبن برد) | رد

    رأيتها جالسة على شط نهر النيل قبالة حي أبي روف العريق وهي تدندن بكلمات وصوت رخيم يشنف الآذان وشعرها الذهبي مسدل حتى أحمصي قدميها واسترقت السمع وتبينت كلماتها التي تقول :
    إزيكم …. كيفنكم
    أنا لي زمان ما شفتكم
    مشتاق كتير
    كتير كتير
    لي حيكم
    يا ناس حرام
    حرام حرام
    ردوا علي
    أنا ما غريب
    أنا منكم
    يا فرحتي
    بعودتي
    أجد الهنا
    في قربكم
    في بعدكم
    لقيت عذاب
    عذاب عذاب
    يا ريت قراب
    كنتوا تشوفوا حبكم
    فسألتها من تكون ؟؟ فقالت لي إسمي “القمردينة” وكنت في انتظار أبنائي وبناتي وأبيهم وهاهم قد عادوا وما أجمل لم الشمل بعد فراق.

  11. هههههههههه مبالغة
    نسيت خروف الضحية غلوه لانه هدوا الخرفان لطاقشتان نوع من التكافل ورصد الاموال قصدى الحسنات
    صدور الاستفتاء حيقلل من عدد السكان الحيهربوا بره البلد لكى ينعم القاعدين بالضرب قصدى الخيرات
    عاين للسلع المغشوشه شوف تاريخ انتاجها والله توعية تفقع المراره معناها المواصفات والمقاييس ماشايفه شغلها بعد المبانى الضخمة وناطحات السحاب
    من الايجابيات مصلحة المواطن يربط حزام العربيه وكمان ربط الاحزمه على البطون لمن ننشنق
    غايتو حزامهم ده بكرفس الهدوم –من الايجابيات فى الراديو بوروك اسعار اللحمة والخضار عشان ما تاخد مشوار للسوق لو عندك سخينة سويها لانه كيلو اللخمة ب 20 و16 جنيه
    كسرة :
    دى الايجابيات السلبيه المعكوسة بنصب المواطن على مقصلة القلع والجبابات وهات وادفع

  12. مرحب بيك استاذ بشار وسنكل وابكرون وسماسم والكل
    التقول كنا مسافرين ورجعنا واتلم الشمل مرة اخرى

    1. بشار أحمد بشار(إبن برد) | رد

      الإبنة معجبة تحياتي
      مرحبا بعودتك بعد طول غياب، وإثراء النقاش يحتاج الى ركن ركين مثلك فأهلا والعود أحمد.

  13. احدي الايجابيات : شارع الكورنيش المزمع تشييده بامدرمان بين جسر الحتانة والفتيحاب ، لتوسعة (الضيق) في منطقة شاطئ ود اللدر/ ابوروف / بيت المال ، كبوا مئآت اكوام تراب الردمية لتوسعة الشارع قبل الفيضان الفات ياسابيع ، جا النيل فاض و(لحسها كلها) فالايجابيه هنا انو حيطلع تصديق تاني بملايين اخري كيتن في قلة ادب النيل ده لانه مفروض ما يفيض ولانه صرح لبقية الانيال والانهار وقال : ( ليه يلحسوا براهم ؟ ) …..!
    معجبة : الف مبروك الترفيع الي 10 نجوم …اخر مره انا رفعتك من 7 الي 9 نجوم كنت لواء اسه بقيتي فرق ركن (ركين) زي ما قال بن برد….

  14. ما احلى الرجوع اليه …… عجبى

  15. الحبان مشتاقين وصباح القمردين
    وسلام وأشواق وبركات
    عودة سنا الروح ومدامها هههههه ووالله ليها وحشة القمردينة وإن شاء الله ترجع أيامنا الجميلة
    خالد مدني لمن ترجع للأرشيف زي البتقرأ لناس تانين، وكولو يوم إن شاء الله أمس ده جنس حال ده والله بنتغير وصحيح الناس بتتغير بس إن شاء الله تغييرات إيجابية في النقاع التحت الزير السالم ولا أدنى علاقة لها بربع الكوز ولا نصو مليان ولا فاضي ولا طرفو نعسان ذاتو ………..

  16. الأحباء الأعزاء
    البوستات إنلخبطن عليا فبالله لو نسيت ما رحبتا بى بى زول ما يزعل دحين الأيام دى اللخبتة حاصلة .. تحيااااتى

  17. البروف الدانقوست الاحبة قدامي المحاربين و الاحبة الجدد مبروك عليكم عودة البتاعة…جات راجعة قوية…
    بالله شوف دخاخينها نكتت كم زول
    ……………………….
    شوف بشار دا كم امما
    و شوف نجمة بي نجما
    شوف الدانقا بي وسما
    جابت ناس كتار قمما
    ستات وشاح و عمما
    بس سمعوا باسما
    بين ضاحك و مبتسما
    ……………………………….
    والله لو انا في السلطة اقول ليك بس احكي سلبيات خلينا الننوم… الاجابيات دي خليها للتفلزيون لانك ساهرت بينا…

  18. الأخ الفاتح مبدع الأمازون . . .
    مره تانيه متشكرين ليك من هنا وللصباح ، شوف اللون دا بالله ، الدانقا لون . . وطعم . . ورائحه عطره طيبه. نرحب بيك يا معجبه وشوق شديد والحمد لله الصدفه جابتك لينا راجعه ، لتعطري النقاش وتثريه ، لا زلنا نذكر مساهماتك التي عطرت سماء الدانقا زماناً ، ودي طبعاً من إيجابيات كتابة جبرا السلبيه ، والعاجبانا سلبيتا. نرحب بالكل بدون فرز من الجدادى والقدامى.
    إزيكم كلكم بشار ، أبكرون ، بقا ريتش ، مخير ، نيام ، ود الزبير ، سماسم ، حاج السلاوي ، اب أحمد ، سترايكر . . . ولو قعدت أعد لي بكره ما بخلص ، عشان كدا عذراً لمن لم يرد إسمو وكلكم في البال.
    شكرا جبرا.

  19. اهلا بيك سنكل وبي جاي فاقدين افليقا واسترايكر … بيشاوي … والغبشة ياربي لسه ضهبانين؟؟؟؟

  20. البروف العزيز والاحبة الكرام ليكم وحشة بلون القمردينة وكل سنة وانتم بخير
    والله مشتاقين … نحن كنا فاقدين القمردينة وناس القمردينا
    وما الحب الا للحبيب الاول
    ونرجع ليكم تاني …

    1. أهلا ولدنا عبدوش .. وكل سنة والجميع بخير

  21. الف مرحب بالقمردينة والسادة الدانقوست — محادثة تلفونية من الصد يق العتيق سلولو وانا على بداية التعسيلة استعدادا للنوم اخبرنى بعودة القمردينة فوجدت نفسى اكابس وافتتش فى اللابتوب قاعد وين باقى لى زمن ماعارف هل النت برة الشبكة ولا بشاوى بر ة الشبكة — ودى برضو من ايجابيات الحكومة انو الواحد بدون اللجوء لى حسن كابوس ممكن ببساطة يكون برة الشبكة – ودى حلوة لانها بدون رسوم ولا دمغة ولا نظام عام —————
    التحية لك عزيزى الفاتح —

    1. يا هلا يا بشاوى … حقيقى الناس فقدت طلتك البهية .. سلامى

  22. معجبة .. أنا زى الفطيتك لكن العتب على الزهايمر وطبعن إن أنسى لا أنسى زيارتكم الكريمة وأنا ماشى اعمل الصمامات والدنيا مطر شديد …. تحياااااااااااااااااااااااااااااااااااتى

  23. البروف الرائع والاحبه الحلوين :
    ما اروع اللمه ما اروع اللمه .. والله لولا اننى كنت خارج العاصمه فى مامورية لجنوبنا الحبيب لكنت اول المتداخلين .
    مبروك لينا كلنا عودة القمر
    اها من الايجابيات انو القمردينه رجعت ودى اهم حاجه ايجابية ولا شنو يا جماعه ؟؟؟

    1. ولدنا الغالى أفلايقا
      كل سنة وإنت طيب .. حقو تشوفوا لينا رحلة فى الإجازة الطويلة دى وللا شنو؟

  24. جبرا وسمار زمان المتجددين .
    سلامات وكل سنة وأنتو طيبين .
    والله ليكم وحشه .

  25. الحمدلله .. رجعنا و زادت افراحنا بعودة القمردينه

    1. الحمدلله .. كل سنة وإنت طيب يا عريس !

  26. سلاااااااااااااااااام والله الف مبروك
    بالصدفة اليوم عرفتا ومن قبيل كلما انتهي من مقال والقى روحي واصلتا للتاني
    مبرول مرة تانية ومبروك اللمة وانشاء نتواصل معاكم على طول
    ويا استاذ الايجابيات حلوة والسلبيات احلى انشاء تتفهم ويتم التغيير لكن للاحسن انشاء الله
    وسلم يراعك

    1. العزبزة سمسمة .. سلااام
      شكراً على الإطلالة البهية والله يبارك فيك .. يلا خلينا نشوف مشاركاتك

  27. الحبيب جبرا..سلامات..
    حمدالله بسلامة القمردينة وربنا يجعلها قدم السعد على البلد..دى كيف دى!؟؟؟؟
    والله اللمة سمحة واسمح منها التعليقات والمجادعات والهبيش والنقريش..وانحنا جينا و…….
    اما عن الايجابيات فاريتو كان يحوق فيهم بعد دا !!ونفسى بالجد افهم ىتصريح الوزير بتاع الزواج العرفى دا !!! عالم غريبة..وعجيبة !!

  28. يابروف البقولو مابتكتب الا السلبيات ديل اكيد لابسمعو اذاعات سودانية ولا بشاهدو قنوات وطنية والا كان قالو كفانا كذب وقول لينا الحقايق …. وسعادة السيد الوزير يكون قاصد انو الطالبات لمن يلبسن زى موحد مابتفرز منو المتزوجة ومنو اللسه بتدور على عريس وكالعادة نحن المابتشاف بالعين ممكن ننكرو حطب … يكون فى حد قال ليهو الناس برسلو بناتم الجامعات عشان يعرسن ؟؟؟؟

  29. سلام يا الاخوه الاعزاء
    افليقا جنوب السودان دخلتو عن طريق فيزا ولا باقامة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: