ضغط كهربائي

أكاد أجزم بأن المواطن السوداني أكثر المواطنين فى العالم تهذيباً وإنصياعاً لأى قرار تصدره أى جهة مسئولة

(ومرات ما مسئولة) حتى وإن كان ذلك القرار يتنافى وأبسط أساسيات (القانون) و(المنطق) والأمثلة على ذلك كثيرة خاصة فى مسائل (التعاقد) بين المواطن وبعض الجهات الخدمية والأمثلة على ذلك كثيرة لا تحصى ولا تعد .

عندما فكرت فى إقتناء (خط) هاتف جوال ذهبت إلى مبانى (الشركة الفلانية) التى إستقبلنى فيها مندوب المبيعات بإبتسامة عريضة طالباً منى الجلوس فى ذلك الكرسى الوثير ثم أخذ يعدد لى مزايا أن يكون لدى (خط هاتف) مع تلك الشركة وأن أهم ميزة لا تتميز بها أى شركة أخرى هى أن سقف (الفاتورة) يصل 500 جنيه ، أى أن بإمكانى التحدث حتى ما قيمته 500 جنيه دون أن يتم إيقاف الخدمة عن رقمى ، وبالفعل قمت بدفع الرسوم المقررة وما هى إلا بضع أشهر حتى تم إيقاف الخدمة عن هاتفى فذهبت لنفس الموظف متسائلاً عن السبب فى قطع الخدمة بينما لم أتجاوز السقف المسموح به فكانت إجابة الموظف لدهشتى هى بأن الشركة قامت بإلغاء تلك الميزة ووضعت بدلاً عنها معادلة جديدة (لقطع الخدمة) عن المشترك !!

بالطبع فإن تغيير تلك الميزة التى رغبتنى تلك الشركة للإنضمام إلى مشتركيها يعد إخلالاً بالعقد (الشفاهى) الذى بينى وبينها ولكن ولأننى مواطن سودانى (ما بيخلى حقو) ولثقتى فى أننى قد تعرضت لنوع من أنواع (النصب) والإستدراج وإيمانى بأن هذه قضية واضحة فقد قمت بالتظلم إلى الله سبحانة وتعالى مختصراً الطريق فمن غير الله يستطيع أن ينصف مواطناً بسيطاً من شركة إتصالات تعج بجيوش من المستشارين مما يجعل (قضيتى) تنظر امام المحاكم المختصة عام 6210 ب ف (بعد الإنفصال) على أقل تقدير !

ماذا سوف تكون ردة فعلك عزيزى القارئ إن إنتابك (صداع) حاد فذهبت إلى أقرب صيدلية وطلبت من (البائع) أن يعطيك (شريط بنادول) فأجابك :

–         والله يا أستاذ لو عاوز بنادول لازم تشترى معاهو (علبة بف باف) !

بالطبع سوف تصيبك الدهشة وسوف تسأل نفسك قبل أن تسأل البائع ( ما دخل البف باف بالبنادول) ؟ ولأنك مواطن سودانى مهذب وتموت فى الإنصياع لكل ما يفرض عليك فسوف تترك الصيدلية دون الدخول مع البائع فى أى (نقاشات) وتقرر العودة إلى المنزل لتناول كباية شاى (صاموطى) لإزالة الصداع عوضاً عن البنادول أبو(بف باف )

ولكن تكتشف أن البيت يخلو من (السكر) فتلبس هدومك وتتجه نحو (أدم سيد الدكان) :

–         بالله يا آدم أدينا نص رطل سكر

–         والله يا أستاذ لو عاوز نص رطل سكر لازم تشترى معاهو (كيس صابون البقرتين) !

هنا تحس بأن (راسك عاوز يطير) وأنت تواجه هذه الأشياء غير المنطقية .. فما علاقة السكر بصابون البقرتين وما علاقة البف باف بالبنادول ، نعم لا توجد أى علاقة ولكن (التاجر) فى الحالتين عندو رأى فهو ربما يعانى من بوار هذه السلع ويود تسليكها وكأنى بك أيها القارئ الكريم تسألنى : وأنا كمواطن دخلى شنو؟ دى مشكلتو ومفروض يحلها براهو فأقول لك أيها المواطن السودانى الفضل إنتا لازم تحل لأى زول مشكلتو حتى لو كانت غير قانونية وغير منطقية فها هى (الحكومة ذاااتا) ممثلة فى (هيئة المياة) التى تود (تسليك أمورا) من توفير لمرتبات جيوش المتحصلين الإداريين والمحاسبين وخلافه وتوفير المجهود الذى تبذله فى قطع (الخدمة) فها هى الهيئة تقرر أن (تخت راسا) مع (ناس الكهرباء) فقاما بربط دفع قيمة المياة مع إمدادك بالكهرباء (ولحدت هنا ده كلام كويس وقانونى ومنطقى وبيوفر قروش ) لكن الكلام الما قانونى ويتنافى تماما والمنطق هو إنو لو ما دفعتا (الموية) ح يقطعو عنك (الكهرباء) !!

 كسرة :

توقعوا قريباً  العوائد والضرائب والنفايات  مع (الكهرباء) … يا دوبك فهمنا ليه بيقولو عليهو (ضغط كهربائى) !!

Advertisements

23 تعليق

  1. السلام عليكم ، البرف و الاخوان ، واحده مره خاشه فى الشارع دقشت عربيتى فى الرفرف الوراء ، نزلت عشان اشوف الحيله الحصل ليها شنو ؟ طبعن اتلمو من وين و من وين ، وياحاج سلامه ويا خال دى بسيطه ، مافيها حاجه ، بتاع ركشه القافل الشارع ده منو ، بتاع عربيه تانيه يازول اطلع من هنا ، واحد بى كرعينو ده زول بليد الوداهو جنب المره دى شنو ؟ و انا بفتش فى بتاع المرور لقيت ليك المره شردت والناس متلمين فى العربيه وحتى بعضهم قاعد من فوق ليها ، قلت احسن اشرد انا كمان مايجى بتاع المرور ابقى انا القافل الشارع …. عجبى

  2. كوكو سلام وكل سنة وإنتا طيب .. أحسن حاجه عملتها إنك كبيت الزوغة .. كان ح تكون مشكلتك مشكلة

  3. لا يا استاذ جبرا الشعب السودانى بجامل اكثر مما يجب و فينا ضعاف النفوس يستغل هذه المجاملات لمصلحته الخاصة 0 و الشعب السودانى بجهل القانون و الدستور لذا تجد حقه مهدور على طول نحن بالجد نجامل كثير جدا و بعفوية شديدة عشان كده المفتح باكل حقنا طوااااالى و نحن نسكت و هو يتمادى و هكذا
    و لو اشتكينا ( ميتة و خراب ديار ) اظن حصل لك مع بتاع الدفار رقم ( …….)

    1. بالضبط يا دقاش ده الحاصل … مفروض المواطن يصحصح شوية !

  4. في ضغض أعلى من كدا دي جلطة عديل كدا….. بارك الله فيك يابروف وجزاك خيرا

    1. مرحب بيك أنس .. وشكرا ليك كتير

  5. عندما تذهب الى الطبيب لمرض محدد يضاف اليك فى اللسته امراض اخرى لزوم الزياده
    عندما تسلم مليون ميل مربع وتستلم منها 500 ميل مربع هل لك الحق فى ان تسال اين ذهبت الخمسميه ربما ذهبت ادراج الرياح وهذا نوع من الضغط التعجبى المستمر فى وجود الفاعل والمفعول الذى وقع عليه الانفصال
    من العاديات انت تشترى الدواء والباقى يصرف لك فى شكل حبوب مهداه عشان قروشك الراحت

    الاخ كوكو مثل حكايتك وانا اقود العربه واذا باحدهم يلوح لى بالجنون وفجاه فتح نافذته وقال لى يا حيوانه عندها زهلت ماذا فعلت واصابتنى عصبيه زائده فدست على البنزين واصبحت مع زجاج نافذته وقلت له انت الحيوان وعندما تقدمت امامه رايته يرمى بزجاجه الماء فى الطريق العام فتاكد لى بانى غبيه لماذا اقول له حيوان وهو من فصيله الحيوانات التى تتبرز فى الطريق فالحيوانات مظلومه لانه لا عقل لها لكن هو يحمل عقل حمار مرخص

  6. الكويسة فينا اننا مطاطييين والا كان الدغوت (الضغوط) دى قدتنا من زمان!!!! كل ما اقول وصلت معاك اخر الحب القى روحى بحبك زيادة ! ماقلت ليك مطاطيين؟

    1. نورا … أهلا بيكى .. تقصدى يعنى نحنا (لساتك) !

  7. البروف والحبان كل سنة طيبين وعودا حميدا للقمردينة
    البلد ملان بي بلاوى زى دى بس لمتين نحن بندفن راسنا في الرمال مثلا في المرور لازم تشتري كتيب التعليمات سنويا عشان يرخصو ليك ولازم تشتري دمغة شهيد لو داير تدخل حمامات السوق الشعبي وبتاع الخدار لازم تشيل جزئ من بضاعتو الفاسدة عشان يبيع ليك وبتاع المطعم لازم تاخد منو فول مسود عشان يديك ………………………………………
    يا بروف اتمني منك ومن بقية الكتاب نشر ثقافة الخوف من المواطن اذا انعدمت ثقافة الخوف من القانون قد تسود الفوضى قليلا لكن الامور ستعود صحيحة في النهاىة
    كيف افتح الموقع مباشرة ؟

    1. الحبيب شمت .. مرحب بيك .. الموقع ح يفتح معاك على طول بعد ده … تحيااااتى

  8. تعرف يا بروف مفروض الحكومة وتسهيلا لنفسها وللمواطن تعمل قيمة موحدة للمواطن ( حسب درجة السكن ) يعني ناس درجة اولى مثلا مليون وناس التانية قووول 700 وناس التالتة يعنيييي زي 550 الف وتكون شاملة الكهرباء و الموية والتليفون والنفايات والعوائد ودمغات الجريح والشهيد والغريق والهنايات , والبدفع يدفع والما بدفع ــــــــــ إعدام !!!!!!!! وقوم يا الشعب موت !!

  9. سلام ياقبيلة،،
    البروف جبرة وزواره الأكارم سلام وكل عام وانتم بخير،،
    عرفت السبب في من أغلاقك لتلفونك، ضربت ليك كم مرة بلقاه (power off) لكن يا صديقي في مثل سوداني صرف بيقول في زي حالتك دي كويت البحر في صرته!!!

    1. سلام شيخ العرب .. ليك وحشة ياباشمهندس .. التلفون ما مقفول لكن الشبكة فى منطقتنا ضعيفة وأشتكينا لمن فترنا .. تحياتى وسلامى ..

  10. سلاام جبرا الهمااااام
    ياخ مستغرش ليه….؟ وريني علاقة انك مسافر راجع لعملك مثلا او لاي سبب …لازم تمش المغتربين تدفع ضرايب علاقة ده بي ده شنو ؟؟؟؟؟؟؟ ليه تربط عمليات النهب دي بحوجة المواطن وحفوفه الاساسية من سفر وعوده وووو…في بلد في العالم به اداره للمغتربين همها الاول جيوبهم ….قال جامعه المغتربين قاااااااااال….
    وعلاقة تجديد جوازك مثلا في سفارتك بنفس المطلب وربطها بالضرائب والزكاة ؟؟؟؟؟؟؟؟ ياخ ده نهب مقنن ومافي دوله في العالم بتعامل مواطنيها بالطريقة دي
    كانوا يعملوها للجنوبيين اي لوري شايل جنوبيين للجنوب لو ما قدم الراكب صوره من شهادة تسجيله (للاستفطاس) بالشمال ما يعدي كوستي هههههههههههههههههههههه

  11. سلام يا بروف —
    يا جماعة انا عندى ضغط كهرباثى عالى جداً و الى الان و حتى يوم القيامة
    القصة كالاتى : عندى ولدى ( 18 سنة ) جاى من مشوار راجع البيت زى الساعة 10 مساءً و كان خاتى سماعات هدفون فى اذنيه و جاى مارى بالشارع حيث توجد نقطة شرطة (……..) بالقرب من المنزل الشرطى ناداه : تعال يا زول هنا !!!
    الولد : ( طبعاً كان خاتى السماعات فى اضنينه) انت معاى انا ؟
    الشرطى : ايوه معاك انت .. ما سامع و لا شنو ؟
    ثم قام بدون اى مقدمات بضرب الولد كفين على وشو ..انا مش بناديك ؟؟
    الولد رجع البيت زعلان جداً لانه ما عمل حاجة تستدعى يضربو كفين
    المهم الولد ممغوس و ما كلمنى الا بعد شهر من الحادثة
    لكن و الله و الله لو كلمنى فى نفس اللحظة لحدث ما لا يحمد عقباه
    كدى ورينى يا بروف لو كنت فى محلى كنت بتصرف كيف ؟
    طبعاً لا يمكن ان تشتكى الشرطة للشرطة !!!!!!! و هسع ضغطى عالى عالى جداً

    1. أخونا ابوالكجمجم … سلام ومرحب بيك عضوا فى الموقع .. تعرف كويس إنو الولد ما كلمك طوااالى لأنو كان حدث ما لا تحمد عقباه .. زمااان قلنا عاوزين لينا (شرطة) تحمى المواطن من (بعض) أفراد الشرطة !

  12. حقيقة انا معجب جدا بكتاباتك استاذ جبرة ونواظب تماما علي قراءة عمودك ساخر سبيل كما القهوة برغم وصول الجرائد لمنطقتنا في وقت متأخر قليلا ما اود الاشارة اليه هو اننا في قلب مشروع الرهد الزراعي (الكان زمان) ليس ماء صالح للشرب منذ قرابة 7 سنوات فنشرب من الترع مباشرة نحن وبهائمنا سيان والواحد فينا لما يجي مدني للمستشفي ولاالخرتوم عشان يتعالج ويشوف ليهو حنفية كابة بتخلع( لدي بن اختي وعند زيارتها لبعض اقربائنا في مدينة بها (دش) وعندما ارادت ان (تحمم) ابنها تحت (الدش) رفض رفضا تاما معللا ذلك بقوله ( والله مابستحم ليك تحت المطرة دي)

    1. عزيزى ِAnna
      مرحب بيك عضو فاعل فى المدونة .. مشروع كنانة والرهد ده المغتربين دفعوا فيهو كميات من الريالات والدولارات ممكن تشرب الناس بيبسي طول الحياة وتخليهم يستحموا بالكولونيا ..يا ربى لى هسه دمغة كنانة والرهد دى قاعدين يدفعوها؟؟ والله دى تكون مصيبة

  13. الرائع جبرا..سلام..
    اريتو الضغط باليطرشق اوردتهم وشرايينهم!! انا متوقع بعد الانفصال يصرفوا لى كل مواطن 10 جلدات صباحا فى المواقف والمحطات,,ادبة وتاديبة على ما مضى من سنوات طيبات لم تكن عجافا !! يعنى ح ياخدوا الباطل والباطل مننا..حسبى الله عليهم..

    تحايا لكل المتداخلين القدامى والجدد,,وتحية خاصة للعزيز شمت العريس..وخليك قريب..

  14. يا خي والله يا استاذ المشكلة في المواطن زااااااااتو … ليه ما يتكلم … ليه لمن يجوا يقول ليهو ادفع يدفع … ليه الناس ما تبدا تغير من (طيبتها شوية) في سبيل حقها … ليه لمن تجي تشترك في شركة اتصالات ا تطالب بعقد رسمي يحفظ حقك … ليه الناس ما يكون عن عندها الثقافة القانونية الي بتحفظ ليها حقها من هؤلاء النصابين بما فيها مسؤلين كباااااااااااار … ليه وليه وليه … ياخي نحن مشكلتنا مشكلة…

  15. بقولو كل زولا وقدرته غايتو انا قبل كده تعمدت انى ادى الكمسارى عشرة قروش ناقصة لانه عمل نايم ببقاى الجنبى ولما طلبها قلت ليهو وانت ماترجع الباقى بتاع دا … غايتو فى النهاية اديتو العشرة قروش لكن اكتر من ستة انفار طالبو بباقى قروشهم الكانو ساكتين عنها …. اها قامت مستشار الريس للشئون القانونية ابت تدفع لناس النفايات عشان مابجو برفعو النفايات من قدام بيتها … ماقلت ليكم كل زول حسب قوته … المهم ناسنا ديل عايزين ليهم زول ينفض منهم الغبار بعد داك يولعو زى بترول ابيى

  16. حبيبنا جبرا والاخوان ……….اخونا (م.س.ب) فتح جرح خطير ليه احنا ماعندنا ثقافه المطالبه والمناقشه بفهههم وحفظ الحقوق والحدود بين الموظف او المسؤل والمواطن العادي …….ليه كل موظف يعامل الواقفين قدامو انهم “بيشحتو” منو وبنسي انو بيدفعو ليهو راتبو من الواقفين قدامو ديل ودا حال كل مسئول وموظف ودكتور وغيرو…..
    و حتي الدكتور في بلاد الغرب لازم ومهنياً وقانونيا يشرح للمريض بتاعو انو عندك كذا وحنعمل ليك كذا مش الفوقيه عندنا (يعني اكان شرحت ليك حتفهم !!)

    لازم كل شخص يعي حقوقه وحقوق الشخص الواقف قدامو بعيدا عن التكشيره وقله الاحترااااام
    افهموها ياموظف ويامسئول ويا …. انا ااااا بدفع ليك راتبك من ضرائبي والجبايات والعوائد ووووو لذا الاحترام ثم التعامل بموضوعيه بعيدا عن الفوقيه وكلو كوم والتكشيره دي كوم تاااني ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: