عباس للمناسبات

عندما كنا صغاراً (ما تقول ليا متين) كانت تقدم للضيف (كباية ليمون) وفى أحيان أخرى (ما كتيرة)  زجاجة (حاجة باردة) حيث نقوم بإحضارها (جرى) من الدكان بعد أن نقوم بوضع (أمنية) مقدارها قرش واحد (بى حالو) مع أن قيمة الزجاجة الفارغة لا تساوى (تعريفة) ولأولادنا الذين لا يعلمون ما هى التعريفة نقول أنها (نصف القرش) والذى مئة منه كانت تساوى جنيه (بالقديم جداً) ! ما أن ينصرف الضيف حتى نهرع نحو (الزجاجة) لنعيدها إلى (سيد الدكان) لإستلام قيمة الأمنية وشراء تمر أو حلوى بثمنها إذ تعتبر هذه الأمنية عرفياً (قيمة المرسال) !

إذن فالأمنية هى مبلغ من المال (بعض الأحايين تكون عينية) تضعه لدى التاجر لضمان أن تعيد له (بضاعة) أستأجرتها أو أخذتها منه ولعل أهم ما فى الأمر هو أن تكون قيمة الأمنية تغطى قيمة تلك البضاعة المستأجرة ويفيض عنها حتى يضمن التاجر إعادة البضاعة إليه !

صديقى (عباس) جرب حظه فى الإغتراب ثم عاد إلى أرض الوطن مجرباً عدة مشروعات إستثمارية صغيرة إلا أنها جميعاً (كانت بالخسارة) ، بدأ بقطاع النقل فإشترى حافلتين (روزا 30 راكب) إلا أنه لم تمض إلا بضعه شهور و(دخاخينهم ما تديك الدرب) إذ ان المكنات (خفت) نتيجة للضغط والشغل ، سأل صاحبنا عن (سعر العمرة) فوجد أنها تكلف (الملايين) و(تحلب) كل الدخل الذى وردته الحافلتين فلم يتردد فى أن يعرضهما للبيع ويخسر ليهو (كم مليون كده) .

–         مالك إنتا يا عباس ومال الحافلات العمرتا بالملايين دى؟

–         وأعمل شنو يعنى؟

–         إشتري ليك ركشات .. الواحده عمرتا ما تكلف ليها 400 جنيه !

وقام صديقى (عباس) بشراء عدة ركشات إلا أن المسألة لم تنجح نسبة لعدم رأفة (السائقين) ورجال المرور فقام ببيعهم جميعا متكبداً بعض الخسائر .

–         شوف يا أستاذ إنتا الحديد ده الظاهر ما بينفع معاك !

–         أها يعنى أعمل شنو؟

–         تعمل ليك محل مناسبات ..

بالفعل وجدها صديقى (عباس) فكرة (يجى منها) فالصيوانات والكراسى والترابيز والزينات (لا بتاكل لا بتشرب) كما إنه سوف يشرف على الموضوع شخصياً ، لم يلبث صديقى (عباس) أن قام بتأجير (دكان ناصية مع مخزنو) وقام بتأثيثه بعد أن قام بشراء كافة مستلزمات (المناسبات) الفاخرة (عشان ينافس وكده) حتى الأطباق والكبابى وحافظات المياة وغسالات الأيدى مع كم مروحة (بالرزاذ) وكم (مكيف صحراوى) لزوم التبريد .

–         السلام عليكم

–         عليكم السلام

–         بس لو ممكن عندنا مناسبة كده وعاوزين لينا صيوان يكون كبير وباقى الحاجات

قالها الشاب المهندم بعد أن ترجل من العربة (الأتوس البيضاء) ودخل إلى المحل حيث كان صديقى (عباس) يطالع فى إحدى الصحف الرياضية .

     صيوان 40 متر فى عشرة متر ، زينة أمامية مثلثة ، 50 تربيزة مدورة ، 500 كرسى ، 8 غسالات أيدى ، 8 حفاظات ماء ، 8 مراوح رذاذ ، 4 مكيفات كبيرة ، أطباق صينى، كبابى موية ) و…

     –    (بعد أن قام بالتضريب) : عاوزنها كم يوم !

     –    يوم واحد بس .. بكرة ..يوم العزومة

     –    طيب دى إيجارا بيكلف 3 مليون وميتين!

     –    ياخى نحنا أول مره نجيكم حقو تعمل لينا تخفيض عشان تانى مناسباتنا كووولها تكون منكم هنا

     –    خلاس ما مشكلة شلنا ليك الميتين الفوق ديل .. بس أدفع لينا نص القيمة هسه وجيب النص التانى بعد المناسبة

أدخل الشاب يده فى جيبة وأخرج بعض الحزم النقدية عد منها 700 ألف قدمها لصديقى (عباس) وهو يقول :

     –   معليش ح أكمل ليك الباقى بكرة عشان عندى كم حاجه ناقصة ماشى السوق أشتريها !

    إستلم صديقى (عباس) المبلغ ووضعه داخل الدرج وقام بكتابة الفاتورة بعد أن قام بأخذ إسم ورقم موبايل (الشاب) وللتأكد قام بالإتصال به

    – ده موبايلى سجلو عندك  ممكن تحتاجوا لى حاجات زيادة ممكن تتصل فينى

تم شحن الدفارات يتقدمها الشاب (الأنيق) بعربته ،ما أن قام العمال بإنزال الأغراض وبدأوا فى (الحفر) حتى إتجه صاحبنا نحو (رئيس العمال) ووضع فى يده ورقة من فئة الخمسين قائلاً :

      –  الواطه لسه بدرى والشفع ديل ح يكسروا الحاجات دى لو ربطوها هسه عشان كده أمشوا وتعالو ربطوها  بعدين العصرية !

يقول لى صديقى (عباس) بان العمال عندما عادوا عصر ذلك اليوم للمكان الذى أنزلوا فيه (الحاجات) شكوا فى أنهم قد ذهبوا للمكان الخطأ لولا أن أحد الأطفال عندما رأى حيرتهم خاطبهم قائلاً :

– إنتو جيتوا للصيوانات والكراسى الكانت هنا؟

– أيوه ..

– قبيلك جات دفارات شالتهم من هنا

– (فى دهشة) : شكلها شنو؟

– زى بتاعتكم دى بس ما مكتوب عليها (عباس للمناسبات)  !

 

 

كسرة :

نكرر .. لازم الأمنية قيمتها لازم تكون أكبر من البضاعة عشان ما يحصل ليك الحصل لصاحبنا عباس (للمناسبات) بعد أن قام بالإتصال على الرقم وإستمع إلى عبارة (هذا المشترك لا يمكن الوصول إليه الآن) وإتضح أن الرقم يخص شريحة من  شرائح السوق الببيعو فيها ساااكت دى !

Advertisements

26 تعليق

  1. صباح الخير للجميع :
    وهو زاتو يستاهل المرجعو شنو ؟؟؟؟؟؟ يعني رجعت لي عباس تاني ؟؟
    ونطالب بأفليقا وصديقه س !!!!

  2. السلام عليكم ، البرف و الاخوان ، كفاره ليك يابرف فى ايميلك ، مره انا قاعد فى امان الله مع صاحبن لى ، وهو شغال فى النت ، قال لى انت رسلت لى ايميل انك فى لندن و تعرضت لسرقه و طالب ليك الف وميتين يورو ؟ وبعد داك بقت الرسائل و التلفونات تترى ، الوداك بريطانيا شنو عشان ينشلوك ، ام بارح ماكنت معانا ، قدر ما حاولت ادخل الميل بتاعى ما قدرت فقمت خشيت الميل المساعد ، لقيت واحد طالب تغيير الباسورد ،انا ذاتى طلبت تغيير الباسورد و دخلت الميل ، اها من ديك انا الميل ده ما سكت، مره كسبت لوترى ومره عندنا 15 مليون دولار عايزين ليها شريك ومره بنيات حلوات قال ليك للمواعده وهم ماعارفين نحن راقدين سلطه …… عجبى

  3. الأعزاء .. ركس وكوكو .. صباح الورد والياســـمين

  4. السلام عليكم ، البرف و ركس ، قاعد فى امان الله جاتنى رساله باللغه الانجليزيه ، استلمت 219.95 جنيه من الرقم0902796430 رصيدك الجديد220 جنيه ( وبالعربى ) لقد تم خصم 220 جنيه من فاتورتك الشهريه zain عالم جميل ، بعد شويه ضرب لى واحد ، -السلام عليكم _ عليكم السلام – ياخى انا حولت ليك مبلغ بالغلط ، وعندى مره والده بالمستشفى والطفل محتاج لادويه ،ووالله اناحسه فى كوستى و ده كل المبلغ المتوفر معاى و من اللخمه حولته بالغلط ، فمن فضلك ياخى ترجعه لى _ طيب ، بدل التحويل مرتين ما تدينى الرقم و انا احوله – مشكور يا اخوى انت بس رجعه لى ، وانا جاتنى فكره تانيه _ طيب ياخى انا تلفونى ده خط وما بيحول قروش ، وانا ما بقدر امشى السوق لكن النشوف ليك الاولاد ديل -شكرا ياخى _ السلام عليكم ، _ على يا على ياعلى ، اى يابوى _ تعال امشى حول القروش دى من السوق ، قروش شنو يابوى _ واحد حول لى قروش علط فى تلفونى ، كدى اشوفها _اهى دى ، ده شنو يابوى الرساله دى ما من زين دى رساله عاديه اى واحد ممكن يعملها ، احسن حاجه تتصل بى 123 وتسال عن الرساله و الرصيد ، على الط…. ان ما الشافع كنت رحت فيها ، وناس زين قالوا دى رساله عاديه و فاتورتك الشهريه ما نقص منها اى خصم ، وضربت للرقم كم مره ، قلت افش فيه غبينتى ، وبقت قصه ، ماشفت ابوى كانو حيضربوه 220 الف ، و ياجدو ما سمعت بى قصة ابوى ، و حبوبتى حسه لو قلت لابوى يدينى جزء من المبلغ ماحيرضى ، نحذركم من الرقم 0902796430 ……….. عجبى

  5. الغالي الفاتح جبرا أولا كل عام وانت بخير بعد الزحمه وكل الشباب اللي فوق ^_^

    وثاني شيء قول لصاحبك هذا يبطل تجاره , ليس لشيء إنما بعض الأشخاص مهما حاول وصال وجال في التجاره تبوء بالفشل ليس لشيء إنما الحظ والقدر

    وقوله إذا استمريت بالتجاره راح تعيش وتاكل غيرها
    واذا بطل يشتغل , رااح يكبر وينسى
    ^_×

    وانا بالقرب منك

    أخوك ( عبدالعزيز الغامدي )

  6. سلام ياقبيلة،،
    أنت يابروف عباس ده جاء البلد دي متين، مش أشتغل أستثمار في الحافلات والركشات وخش علي المناسبات وقبليها قاعد ليهو كم سنة كدة يقرأ ويطالع في حركات السوق والمواسير ولي هسي ماعرف تعامل الناس بقي كيف، يستاهل الحصل ليهو لأنه مفروض من البداية يدفع الزول أمنية تساوي قيمة الحاجة العاوزة زائد 50% قيمة غرامة متوقعة (مقدما”) في حالة يحصل الحصل ده، وبعدين الحاجات دي معمول بيها في كثير من التعاملات الرسمية خصوصا” في البنوك، تمشي تقول ليهم عاوز قرض أشتري لي بيهو بيت أو عربية يقولوا ليك خت لينا أمنية تساوي قيمة الحاجة العاوز تشتريها وحا نديك القروش!!!!
    تصدق عند التعامل مع أي من البنوك في فتح اعتمادات أستيراد آجلة يعني تدفع قروشها بعد كم سنة حسب أتفاقك مع صاحب البضاعة ناس البنك يطالبوك بتوريد قيمة البضاعة كاش وبعدين يكملوا ليك الأجراءات!!!!

  7. والله يا كوكو دي جديدة ! يعني كنت ح تدقس والدقسة فيها اللحسة , انشاء الله ما تكون ملحت الود ساكت ؟ يستاهل ليهو 20 جنيه ( 10% وكدة ) !!

  8. ههههههههههههههههه … عشان كدا لمن مشينا ناجر صيوان الراجل اصر الا نخت ليو جواز سفر او بطاقة شخصة …. فعلاً كانت تدبيسة شديد و الزول خايف ع الصيوان اكتر من الناس الجواهو

    1. مرحب بيك يا محمد … قلتا ليا الزول كان خايف على صيوانو؟ ما طبعن إنتا عاوزو يحصل عباس للمناسبات؟

  9. بصاات ركشاات حافلات دعايات شامبيون كورة دى ثقافتنا وانضم ليها حزب جديد حزب الانفصال
    غايتو عباس على الاقل الشال قروشه زول من عامة الشعب مامن ناس الجبابات ولا الضرايب
    البجيب الغبينه تقوم تتقطع وتشتغل عشان خاطر عيون الفلوس وتجى المكنسة الكهربائية للدولة بلمسة سحرية وزر واحد تمسح قروشك بدون سؤال
    دمتم

  10. حبيبنا الباشمهندس ود الخلا … الناس دى مشت وين؟

  11. سلام ياقبيلة،،
    صديقي البروف جبرا، الناس ديل الظاهر عليهم مشوا الدكان يشيلوا الأمنية، لأنهم خايفين من يوم باكر، ويوم باكر فيهو العساكر، والعساكر لابدين واء الدساكر، منتظرين مع الأخوان سارة يشوفوا آخرتها شنو!!

  12. استاذي الفاتح …
    قول لصاحبنا الجاتك في مالك (ما سامحتك) لانو خسر سنين غرتو وجا لبلد بقى فيها النصب والاحتيال على اعلى اعلى اعلى (مستوى) ….
    والله المستعان …

  13. البروف و السمار اهل الدار ….
    السؤال ما عباس جاء ليه و لا الاستثمار الناجح شنو السؤال يا اخوانا زمان لمان كان في امانة كان في امنية يعني الشغل مؤسس و له قواعد و ضمانات و هذا ما امرت به الشريعة ..ومن ترك امرا من امر الشرع احوجه الله اليه …وذلك لان الله سبحانه و تعالي هو الذي خلق الخلق وهو يعلم النفس البشرية و يعلم ما تخفي الصدور …في هذا الزمان المال سائب و البضاعة سايبة و البنوك عايرة و لذلك نسمع كل يوم البنك الفلاني فلس و شركة المابعرفو شنو قفلت و كل هذا لعدم وجود الامنية و الامانة معا….

  14. يقول نيام نيام (و هذا ما امرت به الشريعة ..ومن ترك امرا من امر الشرع احوجه الله اليه)
    أدهشتني الدهشة يانيام، طيب ما هو انت شغال كويس وليه يقولوا عليك شقي ومجنون؟؟
    هسي كلامك ده كان قالوا زوول تاني كانوا قالوا ليهو طيب الخلي الناس دي تعمل كده منوووووووووووووو؟؟
    يعني الحكاية ياصديقي في ترك الناس للشريعة ونسيانهم لأمور دينهم بلهثهم ولهثهم خلف الدنيا وبحور السراب،،،،
    ما قلنا ليكم من زمااااان الناس فكوا الدرب قلتوا علشان الأمور بقت ما يها قلت لينا ما عارف شنو داك، نجيكم بيجاي تجونا بيغادي، زي صاحبك بتاع الدوحة داك العاجبو (مكحول العيون)، قال بتكتب دُرر، طيب الفرق بين حروفنا ودروبها شنو؟؟ ولا يمكن ديك كحيلة، وحقتنا حجرية صخرية مقرورة الجدران صحراوية قد تجيب ليها عضة مسمومة!!!!!

  15. سلام للجميع وكل عام وانتم ضابحين
    في رمضان وانا صارف مرتبي وطالع من وزارة الصخة (مقصودة ) اشر لي واحد جمب جامعة الخرطوم وقفت شلتو قلت الدنيا رمضان والجو سخن شاب في الثلاثينيات مهندم بعد ونسة جميلة قطعنا الكبري اذا يطلب النزول لانو ماشى الاشلاق لكن هو قطع قروش وماشى لي قريبو ما كان معاي فكة غير مبلغ كبير اديتو ليهو وانا مواصل شايفو في المرايا باشر للعربات الماشية الخرطوم قررت تاني ما اشيل معاي واحد من الطريق خاصة بعد الشكلة الحارة من المدام مرت الايام قبل كم يوم اشر لي شاب في شارع الغابة وبعد خد وهات وحق الله باقي الله حكي قصة طفله المريض ويحتاج لعملية ووووووووووو فما كان منى الا ان تملصت منه باعجوبة وقررت تانى مافي فضل ظهر خالص

  16. ودالخلا:
    شقلاب سروج العر
    فجاج لمتن وكت الدواس و الكر
    حباس شهقتم كباس دموم في الحر
    نهارك سعيد…
    ود اختي صغير ادتو علقة عشان الصلاة قال ليها نحنا اصلو كفار تدقي فينا كل يوم…ياخي نحنا اصلو كفار كلما نكتب حاجة تقول لينا انتو ماقلتو و سويتو انت في ظنك زي ود اختنا و لا شنو!!!!ياخوي نحنا و الحمدلله مسلمين و موحدين و متفقهين و ايماننا كايمان العجائز او نسأل الله ان يكون كذلك…
    ونحن ننتقد الباطل و لا نوارب الحق و من هو علي حق لا نخذله اما من يتاجر بالدين او يساوم في الحق فهذا الذي يرفع ضغطنا و يصيبنا بالغثيان و عندها لا نفرق بين حقه و باطله…وانت رجل صدوق اخو اخوان عشاي ضيفان كريم الاصل و المنبت …ولكني اصارحك القول في بعض كتاباتك استشف انك مؤتمرجي ضليع تعبئ الكلمات في قراطيس ظاهرها فيه الرحمة و باطنها من قبله العذاب و هذا يرفع ضغطي و يجعلني لا اراك الا من المحترفين الذين لا ينزلون لي من زور…او هكذا اراك و اسأل الله ان اكون مخطئا…
    اما قولك “ما قلنا ليكم من زمااااان الناس فكوا الدرب قلتوا علشان الأمور بقت ما يها قلت لينا ما عارف شنو داك، نجيكم بيجاي تجونا بيغادي، زي صاحبك بتاع الدوحة داك العاجبو (مكحول العيون)، قال بتكتب دُرر، طيب الفرق بين حروفنا ودروبها شنو؟؟ ولا يمكن ديك كحيلة، وحقتنا حجرية صخرية مقرورة الجدران صحراوية قد تجيب ليها عضة مسمومة!!!!!”…
    صحيح ان الناس قد تركوا الامانة و النخوة و الكرم و الصدق و لكن ماهي الاسباب ؟؟؟ حقيقي ان الضغط الاقتصادي و الفشل التنموي و المعايش التي اصبحت صعبة هو السبب الاساسي في كل هذا ولعلك لا تنكر ذلك …و الناس ماتركوا الشرع الا بمجئ الاحسبون و الا بماذا تفسر انهم لم يتركوا الشرع قبل مجئ الاحسبون فالدنيا كانت بخيرها و الامانة في المال و العرض متوفرة و حالات الاستهبال و الخداع او بهلوانات العصر كانو يعدون علي الاصابع…
    شمت:-
    امثال هؤلاء هم كثر و هذا ما نتحدث عنه و الصديق و دالخلا ولكن ماهي الاسباب؟؟؟
    تجد الواحد يحكي في المسجد انه مقطوع و انو عابر سبيل و مسافر البلد الفلاني و لكنك تعود بعد شهر او اكثر لتجده في مسجد اخر و مدور نفس الاسطوانة و لكن هذه المرة عن زوجته او ولده الذي ينتظر العملية…امثال هؤلاء قللوا النجدة و فعل الخير فاصبح الناس لا يميزون بين الذي هو فعلا في امس الحاجة للعون و من احترف هذه المهنة للتكسب و الاسترزاق…

  17. السلام عليكم جميعا..
    تعرفوا عشان الواحد يتجنب المحتالين حقو يعمل كورس في الاحتيال …لكن خايف بعد نهاية الكورس القصة تحلو و يباشر مع الجماعة…

  18. صديقي الحبّوب ودقبائل العز، حمّال التقيلة، مسّاح دموع الببكن، لسان حال القبيلة المحجاج نيام،،،
    لو ما قلنا ليكم جنس الكلام ده ما بتجونا مارقين مالازم نكشكشكم كدة وكدة علشان تمرقوا لينا ، وأنا أسأل الله الكريم أن لا تكون مخطئا” أبدا”، وأن لا تكون كذلك فكلنا خطّاء وخير الخطاؤون التوابين، أو هكذا قال رسولنا الكريم،،،
    صديقي العزيز ماذنبي أنا ان كنت قد قلت حديثا” صادف هوي أو طابق أتجاها” ما، فلهم دينهم ولي ديني، ولكنني أصدقك القول في أنني أجد نفسي أوافقهم في بعض ما صنعوا وما صنعوه ليس بكيد ساحر حيث لا يفلح الساحر حيث أتي ولكنهم أختطوا خطوات وكان لها أن تكون أفضل مما هي عليه الآن في كثير من مناحي الحياة فلا ننكر بعض من التحديث والتطور والأفضلية مما كنا عليه في سابق العهد والآوان وأن كان الناس يختلفون ويتفقون في هذه السياسات والأمور، فلكل منا وجهة نظره، وهنا أوافق تلك الكاتبة مُعجبة سديقي أسد الخلا (ريم البوادي الكحيلة ) في أن الأقصاء لن يقودنا الا الي مزيد من التردي وعلينا جميعا” أن نتواضع ونتفق علي حدِ أدني من الثوابت والموجهات تكون هي أساس سياستنا الداخلية والخارجية كما تفعل كل الأمم، يختلفون فيما بينهم كيف شاؤوا ولكنهم في أمور الدولة والوطن يتفقون علي أعدائهم كاليد الواحدة…
    ماذنبنا أن نستخدم مفردات او مقولات أو أحاديث ظهرت مع الأنقاذ، وبكراهية الناس للنظام كرهوا كل ما أتي به النظام، ولولا بقية من حياء في النفوس كاد الناس ان يكفروا بكل ماهو ديني ووطني فقط لن النظام تدخل فيه أو قال فيه مقولته….
    نتمني أن يهدي الله السودانيين ويشرح صدورهم للأتفاق والأنسجام والتآلف والمودة، وأن ينبذوا الفرقة والتشتت والأنقسام، وكفانا الله القتال، آمين أنه ولي ذلك والقادر عليه..

  19. يابروف الجاتك في إيملك سامحتك ، كل سنة وانت والاسرة الكريمة وكل أهل ساخر سبيل طيبين ، ماكنا راكزين علشان كده كنا طاشين ، بس مازي أخونا عباس مناسبات ، والله يكضب الشينة . ناوين علي السودان وخايفين من النسوان والكيزان

  20. ((كسرة :
    نكرر .. لازم الأمنية قيمتها لازم تكون أكبر من البضاعة عشان ما يحصل ليك الحصل لصاحبنا عباس (للمناسبات) ))

    دى العبره يابروف …

    حدس وبُعد نظر … لمن البضاعه تكون اقيم بكثير من الضمانات بيحصل جنس الحاصل الايام دى

    دمت لنا قلما مبدعا

    1. مرحب بيك إيثار … شكراً وخليك دايمن معانا بى جاى

  21. البروف العزيز : تحيه وسلامات ومشتاقيين وما لاقين سفر وقهر وفراق اهل اهو ده الحصل ولمن نصل سلامنا واشواقنا للجميع .
    طيب لو الامنيه بقت قدر قيمة المطلوب ايجاره ما اشترى الحاجات وخلاس ؟!!!
    طبعا لو عملنا بالنظرية دى حيكون اى زول عندو فى بيتو صيوان وعربيه وحفاظات مويه وصحانة مناسبات هههههه
    النساوين طبعا فنانات جدا فى ادب الاستدانه وجاء فى الاثر ان احداهن كانت تستدين ولا ترجع الدين فامر رسول الله باقامة الحد عليها فاقيم . ومنهن من يوسم صوانيه بالكتابه بالمنكير او النقش بالمسامير فتجد الصينيه منقوش عليها او مكتوب علويه الجعليه او فتحية الشايقيه او سعديه الدنقلاويه او بت المنا بت مساعد ……
    فى كثر من الاحيان يفتقد الناس للنخوة بسبب ضياعها حين خان احدهم الثقه واحتال على الاخرين ويا اسفى .
    نيام ود الخلا تحيات وسلام .
    ركس : انت عارف البروف ده لو ماجابك السودان وسوقك ركشه فى خط صابرين اصلو ما بيرتاح ههههههههههههه تحياتى يا معلم ..

    1. والله يا ولدنا مشتاقين جداً .. ماك ظاهر مالك ؟ إن شاء الله خير

  22. البروف الرائع..سلامات..
    امانة ما وقع راجل !! وما وريتنا عباس بعدداك عمل شنو؟؟اتكل على اقرب صينية ام اقرب مقابر ام اقرب مصحة؟؟

    كوكو..سلامات..
    طيب وين كرامة النجاة دى ؟؟

  23. البروف والأخوة المشاركين لكم التحية وان جاءت متأخرة …. فى أعتقادى انو عباس ماحسبها صح … لو عمل دراسة (مع قلة جدواها مع سوقنا دا) لكن اكبر غلط (فى رأئي) انو سمع كلام الناس ومعروفين نحن نظرياتنا فيثاغورية لمن تكون الجيوب مابتاعتنا … لك التحايا مع امنياتى بوافر الصحة والعافية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: