بل سنوات كنت قد كتبت (سيناريو) بعنوان (عداد الفول المصلح) وكانت فكرة المقال تدور حول تبنى الدولة لمشروع إدخال خدمة الفول المصلح إلى داخل المنازل عبر (مواسير) و(عداد جمرة) بعد أن صارت غالبية الشعب الفضل تعيش على الفول و(مشتقاته) !
يبدو أن الدولة حينها لم تنشغل بالموضوع كثيراً ربما لعدم وجود (سيولة لديها) أو مصدراً للتمويل وحيث أن هم المواطن اليومى قد أضحى هو (قفة الملاح) وعددا من (المايكروعيش) فالعبدلله ينصح القائمين على الأمر بتحويل ميزانية مشروع بناء القصر الرئاسى المزمع إقامته إلى المشروع الذى سبق ذكرة مع إضافة عدد آخر من المواسير الأخرى إضافة إلى ماسورة الفول حتى تصبح الخدمة (متكاملة) مثل (ماسورة عدس) و(ماسورة ويكة) و(ماسورة سكر) وماسورة (رز) وماسورة (زيت) إضافة إلى ماسورة موية وماسورة غاز ليصبح إسم المشروع – حزمة مواسير الدعم المتكاملة (حمدم) ! – وبذلك تكون الحكومة قد وفرت للمواطن الحد الأدنى من الحياة وهو (الأكل) !
على أن يتم إنشاء (كرت) لكل (ماسورة) إضافة إلى (باسوورد) و(كود ماسورة) حتى تتأكد الحكومة تماما بأن هذا الدعم قد وصل إلى المواطن (وما مشى ماسورة تانية) فإذا أراد المواطن فتح ماسورة الزيت مثلاً قام بإدخال كلمة السر وإدخال (الكمية) التى يريدها ليتم سكبها بواسطة الماسورة فى الحال مع تنبيه بالرصيد المتبقى فى حساب الدعم الشهري المقرر للمواطن !
علاوة على أن هذا المشروع يوفر للمواطن قوته و(من لا يملك قوته لا يملك قراره) فللمشروع مميزات كثيرة أخرى حيث تستطيع الدولة معرفة إستهلاك المواطنين الفعلى ومن ثم تستطيع توفيره بدلا عن الفجوات الغذائية التى تحدث (فجأتن) كما أن من إيجابيات هذا المشروع إسكات الأصوات التى تنادى برفع الحد الأدنى للإجور والذى لا يغنى ولا يشبع من جوع مما يجعل لسان الحكومة يقول لكل محتج على تدنى الأجور (أها أكل وأكلناكم) !
بالنسبة للمواطنين الذين ينفذ رصيدهم من الدعم لأى من هذه السلع قبل نهاية الشهر (ضيوف ، مناسبات وخلافه) فيمكن للحكومة إنشاء شركات (مواسيرإتصالات تموينية) تابعة للمشروع حتى تمد هؤلاء بالخدمة على أن يقوموا بشرائها نقداً عن طريق كرت شحن فلو أن أحد المواطنين نفذ رصيده من (الويكة) يمكنه شراء كرت شحن (ويكة) بخمسة ستة جنيه (يمشى بيها) حتى نهاية الشهر ووصول الدعم الجديد !
إن البلاد لا تحتاج الآن إلى (قصر رئاسى جديد) فالقصر الموجود قائم بالمهمة خير قيام ولكن البلاد تحتاج إلى مثل هذا المشروع الذى يدعم المواطنين الذين تحولت وجباتهم إلى (الطعمية) و(فوال الحاجات) ، إن حزمة الدعم المتكامل عبر (المواسير) من شانها أن تعيد إلى المجتمع السودانى بعض من تماسكه الذى إندثر بفضل صينية (الغداء) التى سوف تجتمع عليها الأسرة (من جديد) بعد أن أصبح (كل زول ياكل بى طريقتو) كما أن هذا المشروع سوف يسهم بشكل فاعل فى إعادة الصحة لجسد المواطن الذى أصابه الهزال مما يزيد (نوعا ما) من مناعته ضد الأمراض وبالتالى توفر الدولة ما تصرفه من أموال باهظة لعلاج المواطنين .
ثقتى كبيرة بأن ولاة الأمر سوف يقرأون مقالى هذا وسوف يحولون ميزانية بناء (القصر الجديد) من أجل تنفيذ مشروع (حمدم) – حزم مواسير الدعم المتكاملة- هذا المشروع الإسترتيجى الهام الذى سوف يكسبهم حب المواطن وتقديره كما يكسبهم ثواب الله يوم لا ينفع مال ولا بنون !
كسرة :
عند التنفيذ بلاش حكايت إنشاء وزارة (حزمة مواسير الدعم المتكاملة) ووزير دولة (حزمة مواسير الدعم المتكاملة) ووزير (ما دولة) وزارة حزمة مواسير الدعم المتكاملة ومستشار أول (حزمة مواسير الدعم المتكاملة) لمواسير الفول ومستشار أول وزارة (حزمة مواسير الدعم المتكاملة) لمواسير العدس و ….. لأنو كده القصر القديم ما ح يشيل الجماعة ديل وح تضطر الدولة لبناء قصر جديد !!
الفاتح جبرا 
سلام ياقبيلة،،
البروف جبرا، كلامك معقول لكن لو قام كل المواطنون بشراء كروتهم ووضع ماعندهم من متبقي الماهية في تلك الكروت المزعومة أقصد الملغومة او المدعومة، وأصبحت هذه المواسير كما هو الحال في سوق المواسير الشهير، كيف لهؤلاء المواطنين أستعادة مستحقاتهم التي دفعوها وخسوسا” نحن نعرف ماتعنيه المواسير….
كسرة بي ملاح أم تكشو/
أنت ياجبرا خلاص تم تعيينك مستشار وبقيت تدلي بالأستشارات من هذه العينة، يعني الرتبة صحيحة!!
حبيبنا الباشمهندس ودالخلا … سلااام
طبعن الرتبة صحيحة والدليل … القهوة !!
فكره رائعة جدا لكن إن كانت المواسير هذه إلى المنزل فهذا خطأ أولا لأنها ستكون ملفة جدا جدا ناهيك عن بعض مشال الصيانة والإنكسار ووو إلخ
ولكن لو طثبقت فكرت يا شيخ جبرا بحيث تكون في كل منطقة أو مكان معين مكان مخصص لهذه المواسير بمعنى آخر ( لكل 100 منزل مواسير مجتمعه وسط هذه المنازل ))
رائع يا جبرا أنا متابع لك
تحياتي عبدالعزيز الغامدي
الحبيب الغامدى
تصدق أنا ذاااتى متابع متابعتك ليا ؟ القلوب شواهد يا حبيب ومرحب بيك معانا هنا ألف مرحب ولو ما شالك الراس تشيلك العين
السلام عليكم ، البرف والاخوان ، انا من حسه حاجز و لا مقدم فى عطاء عمل الويكه الخدره بى الشرموط و الفول و موية الفول ( دى لازم ليها من ماسوره 6 بوصه مع طلمبات دفع مركزى ) لانو الطلب عليها شديد ، ثم موية الجبنه و الزيت الراجع بتاع الطعميه و الدكوه واخيرن ليس اخرن الشطه الحاره لزوم فتح الشهيه ، يمكن تركيب سخان شمسى ( اوبشنال ) ……. عجبى
خلاااس يا كوكو ح أوقع ليك العطاء بتاع ملاح الشرموط ده بس ما تكلم زول !
البروف — فكرة محترمة جدا — اضف للفوائد المذكورة اعلاه انو السباكين المساكين المالاقين شغل ليهم زمن ( هى وينا الموية البتكسر المواسير ) حيلقو شغل خصوصا انو مواسير الدعم المقترحة حتكون صناعة صينية ودى اكيد لما تجى ماشى بالشارع حتلقى ليك ماسورة ضاربة والويكة مالية الدرب فى الاحياء المسكينة — اما فى الاحياء الراقية ممكن تتكسر ماسورة وتلقى الشارع مليان سجك وفراخ ولحوم فلتو — ويابخت القطط والكلاب —-
البشاوى سلام .. فراخ وسجك بتاع شنو؟ الناس ديل معقول ياكلو من حمدم ديل ناس أموااااج سااااكت
والله فكرة تجنن بس ما يكون في ايصالات غرامة وربط حزام وسحب رخصة وكدا
السلام عيكم,,,,أولن شي ,,,,,, سجل برآأآت افكارك دي لاني حاسي انو الجماعة الطيبن هايعملو قصر رئاسي جديد وحيدخلوا ليهو خدمة (حمدم)لكن من فئة القبول الخاص زي حج سياحي و… الخ
تانين شي…. المواسير دي برضو حيحفروا لينا الحلة كلها ويقلعو الشجر ويبشتنو لينا الدنيا للمرة الخورطومية
شوف لينا ويرلس كدي ولا يو اس بي ولا اي حاجة
الحبيب بشاوي تحيات و سلام
المشروع ده شكلو (ماسورة) من اسمه … !!!
سلام أستاذ جبرا
أنا واحد من أولاد الجيل الجديد من الشعب الفضل، الجيل الما شاف لاكين سمع ب حال البلد قبل ما يجو ينقذوها بس الحمد لله إتولدنا قبل ما يحصل الإنقاذ ده، ع العموم انا من المتابعين ل مقالاتك بشكل مستمر، بالإشارة ل سناريو (عداد الفول المصلح) عين العقل بس المرة دي (حزمة مواسير الدعم المتكاملة ) لازم أعلق لأنو خلال الخمسة سنين الفاتت وقتى كان مقسم ل جزءين أساسيين: 1. وقتي الشخصي. 2. وقت ناس الكهرباء و المويه. وبكل فخر انا واحد من الناس الحافظين الهيكل الإداري بتاع ناس الكهرباء صم. لأنو القطوعات مبرمجة و غير مبرمجة وغيرها من قطوعات الأمطار و اللواري البتجي بالليل وما شابه كانت همي الأول و الأخير( بمعدل 3 زيارات ع الاقل في الإسبوع لمكاتب الكهرباء)،
الفكرة منطقية تماماً بس بعد تخيل عدد المواسير الناتجة من هذا المشروع القصود منو راحة المواطن زي ما بقولو في الراديو بعد كل قرار ( وذلك من أجل راحة المواطن ومجابهة التحديات التى تواجه السودان (حكاية التحديات دي شنو؟)) مع مراعاة القطوعات التابعة لها و ضربها في عدد الزيارات الموضوع ببقه بخوف، فأرجو منكم مراعات الموضوع ده بس ل الضمان ساي، إذا الدولة قررت تتبني المشروع و كده.
وربنا يخليك لينا ( تصحي النايم وتوري الما عارف) لأنو الشعب الفضل نصو نايم ونصو ما عارف الحاصل شنو أصلاً.
إبنك السياب
ينصر دينك ياأستاذ
یابروف دایر اتولی كروت الشحن دی واعمل خدمات ممیزة مٽلا مویة الجبنة بعد12لیلامجان..اشحن فول ب10تاخد كیسین دكوة مجانا
الحبيب جبرا..سلام…
والله صعبتها عليهم,,انا متخيل مسئول قرا كلامك دا وقال فى نفسو ( اسه الزول دا مالو ومالنا؟ القال ليهو انحنا عايزين نريح المواطن دا او نخليهو ياكل منو !؟؟ غايتو جنس غايتو )….
وحسبى الله عليهم..
السلام عليكم ، سائلين عنك يا د/ شمباتى انت و السلاوى ومعاكم ياسر ، تفتكر يابرف لو الدكاتره عملو لينا حبه واحده ولا كبسوله ، ناخده الصباح تغنينا عن الاكل والشاى والقهوه و الح…….. عجبى
لا حولاه يا استاذ المواسير دى تم انسدادها من زمان مفتوحة بس للجماعة اياهم و المواطن عارف سلفآ المواسير دى تم انسداده بفعل فاعل لذا لا يعشم فى فتحها او سباكتها العشم فقط على مواسير الله جل جلاله التى تسكب من غير توقف – الهواء النقى الصحة الاولاد و نعمة الحواس الخمسة
انت عارف يا استاذ انا زول سباك ماهر جدا و عارف مواسيرك دى مقفولة وين و سباكتها مكلفة جدا
1/ الفلل الرئاسية قفل مواسير عدة
2/ القمة الافريقية ( الغمة النزفية )
3/ اليخت السياحى الما لقينا ليه حتة تمشى فيها
4/ الميزانيات المفتوحة بلا حسيب ولا رغيب
5/ الاتفاقيات الوهمية مع بعض المعارضين و تخصيص ميزانيات لها
مواسيرك مقفلة هنا عاوزة سباكة
الحبيب كوكو..سلام…
تسال عنك العافية,,والله فى البال ومباريك فى البوستات لكن انت ما بترجع لى قفاك تانى!!!
حاج السلاوى كان فى السودان واليومين ديل فى قطر,,آخر صياعة,,ود.ياسر شايفو حايم بى جاى..
اما عن الكبسولات فالخواجات عملوا ليهم حاجات زى كدة لى رواد الفضاء,,اها انت اطلع الفضاء وابقى عليها تب!!! هههههههههههههههههههه
الاستاذ جبرا والله مشتاقين وطبعا الموقع كان طاشى مننا فتره والليله الواحد جد سعيد اتو لقى ليهو طريقة دخله بالمتاسبه يااستاذ انت مواسيرك القاصدها دى مواسيرهم ذاتها ؟؟؟؟؟
الاستاذ جبرا
انا نسيبة يعنى طفشانة يا ها زاتا بس لانى جادة قلت اتكلم باسمى الرسمى لانو انا فعلا عجبتنى الفكرة شديد بس ما عايزة كل المواسير فى بيتنا لانو عندنا شفع كتااااار ديل بخربو الواطة خراب اها قلت عايزة لى ماسورة ويكة وماسورة لحمة وبعدين خايفة من الجيران جنهم شحدة هسة من اعرفو انا ركبت ماسورة الويكة ارسلو الشفع عايزين حبة ويكة وبعدين لو فى ماسورة اتكسرت اعمل شنو ؟؟؟؟؟؟
البروف — هم الناس المسؤولين معقولة يمشو امواج ولا سيدى بيه بيجيهم اكل طازة بالطيارة وبياكلوهو ماخسارة فى هؤلاء النبلاء —
الحاج نيام – لك التحية — قدر مانقول نزح يجى البروف يجيب سيرة المواسير دى والموضوع يحرقك وتجى راجع تانى تفضفض —
————
الحبايب الحلوين الواحد بعد ما جرب الباس بتاعو خش طوالى ولى زمن بكتب والباس ما شغال ..
عموما والله الواحد جد سعيد ( ما جدو ابو ابوهو ) على انو موجود بيناتكم فى الحته الصفيرا دى ..
البروف : حمد الله على سلامه عودة القمردينه لى وطن القمارى .
بالنسبه لمواسير عليكم الله فى ماسوره اكبر من انو البلد ما عارفه روحا اسلامية بالعلمون ولا علمانيه بالاسلوم ولا سملانيه بالعلوم ولا علاميه بالسلمون ولا منفصله بالوحده ولا متحده بالفصله ولا متصلة بالوحده ونص ولا منفصلة بالوحده الجاذبه .
غايتو الله يهون …
اسى يا بروف العطاء بتاع توصيل المواسير للبيوت لو الحكومه وافقت حيكون على ياتو شركة لانهو التخصص فى المواسير بيتضارب ؟؟
السلام عليكم ، د/ شمباتى عليك الله فى فضاء اكتر من اللى نحن فيه ده ، نحن لو ما شوية البترول البطلع لينا بالقطاعى ده كان صعنا ، اتقول البترول زاتو عارفنا كان طلع كتير كان انخلعنا موتنا ولا قمنا اتبطرنا ، وانت عارف بطر الجاهل ، كده كده حيودر يا قروشه يا عقله و اعوذ بالله منهم اللتنين……..عجبى
الحبايب الحلوين :
شغلتنا عنكم مشاغل الدنيا الكتيره والسفر وفراق الاهل والتعب والنوم الكعب اعفو لينا وتانى ما حنطول .
نيام :
يا سيدى نيام صحوت عند الصبح لم اجد وطنا تركته فى واد ذى زرع وسالت الله ان يحرسه وان يجعل افئدة اهله تهوى اليه صحون فوجدت الله ناصرا من ينصره فقط ووجدت قلوب اهله عليه كالحجر فعملت نايم تانى !!!!
البشاوى :
لله درك كلما اطفات للحرب نار اشعلوها حين يشعلون نار المساء لعن الله نار المساء وتوابعها .
ركس :
واقف هناك والهم عصف وسايبنا برانا دايسين على الابر المسممه بالكلام والتصريحات وكان الوطن اصبح بشهادة بحث ملكا لاحدهم لعن الله الخطه الاسكانيه ونزع الله كل عشوائى قول امين .
شمباتى :
لمن قالو فى ولد فى ود ربيعه معجزه — قلت ليهم تاااانى ؟؟؟ انت ود ربيعه دى غير تطلع المعجزات ما عندها شيء ؟؟؟
ود الخلا :
ما بال اخوتك دفنو مشروعهم حتى جاء غراب الانفصال يعلمهم كيف يوارون سوءة مشروعهم فقالو يا ويلتنا اغراب الانفصال افضل من وحدة مشروعنا ؟؟ والله لو تقدمو لاخترقو ولو تقدم غيرهم لا حترق .
البروف :
الموقع عديله وزين والكتاب التالت فى الانتظار واعفو لينا الغيبه ..
الحلوين الباقين تحيات وسلام ومشتاقين وما لاقين . لحدة ما نجيكم برواقه
الحبيب افليقا..سلام..
وبركة بالطلة وعودا حميدا وحاجات كتيرة وعجيبة,,شنو يعنى!!؟؟
ود ربيعة الحاصل فيها شنو!!؟؟ باقى ما عندنا خبر هنا..
كوكو..سلام…
اسه انحنا قروش ما عندنا وعقل مافى,,يكون من شنو يا حبيب!!؟؟؟
اشتقت ليكم كلكم خاصة كبيرنا الذى علمنا السحر…..أأأسسفة اقصد السخرية ,كنت مشغولة والحمد لله حاجاتى طلعت كلها ماسورة!!!تصدقو انو ممكن قصة المواسير دى تنجح وبكره تقولو الفاتح جبرا قال!
والله ياجبرا مشروع زى ده الحكومه حتديهو كل الدعم اللازم خصوصا لو شافوهو ناس كبر
سلام ياقبيلة،،،
صديقي أفليقا وبقية العقد الفريد،،،
تم رفع تمام التاسعة بنهاية مغيب الشمس علي أن يبدأ الهجوم مع أول خيط من ضوء الفجر لليوم المحدد بساعة الصفر!!
سديقي المحبوب أفلبقا أنت تدري بأن المشروع لم يدفن ولن يدفن ولا ينبغي لأحد ود مقنعة أن يستطيع فعل ذلك ، وسيقيض الله له من ينشره ولو كره الكارهون، فللبيت رب يحميه!!
أما غراب الأنفصال فسيعلم الناس دفن أحقادهم وأحزانهم ، وسيتعلم الناس كيف يبنون وطنا” خاليا” من النعرات الحزبية الضيقة ودعاوي الجاهلية النتنة وطبقية العنصرية البغيضة، وسيري الناس وطنا” يملأ الدنيا ويسعد قلوبا” حزينة ويغيظ كيد العدي!!
سيري الناس عجبا” صبيحة الموعد المحدد، وستكون هنالك المفاجآت الداوية التي ستُحيّر العالم أجمع.
وان غدا” لناظره قريب!!!!!!!!!
تحياتي لك بسلامة العودة وعودا” حميدا مستطاب، وأترك لك المساجلة والمنافحة عن مشروعية الوحدة وأمكانيات تطبيقها وهل هي الأقرب أم الذي يتمناه الأعداء، وأعني بهم أعداء الوطن لا أعداء الأنقاذ فهؤلاء كوم براه!!
استاذنا العزيز جبرا عساك بصحة وعافية -فكرتك مبالغة- لكن تانى مواسير يا بروف نحنا لسه ما توبنا من المواسير اللى نحنا فيها دى.
كسره :
اسى المشروع ده يلاقى نجاح يقوموا الجماعة يمدوا خطوط المواسير للخارج.
السلام عليكم ، البرف الاخوان ود الخلا البشاوى افليقا عزوز دقاش ابكرون ميويه نيام منوتانى ؟ دايما مستمتعين بتعلقاتكم وكلام البرف البطلع الزبده من الروب ولا السمن البلدى ، د/ شمباتى اللتنين ديل مافى من خفه الايادى الفوق الشفاطات وكترة الجامعات ، اللوترى بتاع البترول الضربناه العشره سنين الفاتت دى لو كان اتوجه توجه صحيح كان اللى يلزنا يقع هو !!!! لكن برضه اسال كافوري والصفا المعموره النيل الفيحاء القادسيه والخ الخ و اسال المنظمات البتصرف بى المليارات و يديروها حروم ، وديل ياكلو مال …….. و يحلو بى …….. واسال الولاه و المعتمدين و الوزراء و هيئة الزكر و الزاكرين ومسجد الشهيد و دار الرياضه جنب السوق المركزى و مجمع النور البنوه بالمليارات السبعين و……….عجبى
سلام مسائي ياقبيلة متني،،
الصديق كوكو شكلك كده طالع من جوه الكار أو قريب منو شديد، وده المهم في الموضوع، فكل الذي ذكرته أو بعضه صحيح، والفساد معشعش ومفرّخ محل ما تقبل، وده كلو مامشكلة ، المشكلة ياسديقي العزيز في كيفية التصدي لهذا السرطان وكيفية أستئصاله وأعني بذلك الفساد والمفسدين الذين يحمونه،،،،،
الشاهد في الأمر أن الكثيرين من الناس حكومة كانوا أو معارضة يعلمون ويتحدثون عن أكوام الفساد والمفسدين وعن .. وعن… ولكن لا يجرؤ أحدهم علي الأشارة لذلك الأمر عيانا” بيانا” لأن القصة لوثت الفضاء بأجمعه ولم ينجو منه أحد!!!!
كما تلك القصة التي تُحكي عن الفرعون وقلة عقله، وكيف ضحك عليه النّساج وألبسه ثوب المذلة والصغار وأوهمه بأن ثوبه هذا لا يراه المفسدون ولكن يراه فقط الناس الصالحون، وبالطبع لن يجرؤ أحدهم ويدعي بأنه من الفاسدين وأنه لا يري ثوبا” أو غيره وليس هنالك ثوب يلبسه الفرعون فيُدمغ بالفساد وعدم الصلاح، وهذه ما يفعله الناس الآن ، فقد صار الفساد رجلا” محترما” يلبس أزهي الثياب ويمتطي أفخر الدواب مما جميعه ولا يستطيع أحدهم بفتح فيه ليقول أنظروا لهذا الرجل الُعريان كما صاح الطفل في الفرعون!!!!!
القصة يا سديقي تحتاج لهمة رجال أقوياء أشداء لا يخشون في الحق وقوله لومة لائم!!!
العزيز كوكو . .
أهو دا ود الخلا و لأول مره يورينا الحل وهو ” القصة يا سديقي تحتاج لهمة رجال أقوياء أشداء لا يخشون في الحق وقوله لومة لائم!!! “.
و هذا يعني أن يتحد أصحاب الوجعة من أهل الأمازون ” وهم من عناهم الأخ ود الخلا باللذين لا يخشون في الحق و قوله لومة لائم ، أن يتحدوا في سبيل إزالة هذا النظام الفاسد الذي جثم على صدورهم لعقدين ونيف. من حقهم التمتع بحياتهم في ظل نظام شفاف يقولون فيه للفاسد أنت فاسد من أين أتيت بهذه الأموال التي عمرت بها منزلك في كافوري؟
و بي كدا يا جبرا نوصل لكل بيت جنس مواسير واحده ( بس حقيقيه ) بتاعت كهرباء ومويه و شيه و كبده نيه ، ودواء ملاريا ، ورغيف و مدفوعه من ديوان البترووووووول.
كسره بي مويه و ملح:
سألت اليوم نيام
كيف عامل تمام؟
قال لي إنت مجنون؟
و اللا بقيت ذيهم
بتاع فنون؟
الأصدقاء الأفاضل كوكو ثرو سنكل،،،،
فعلا” القصة ليست مستحيلة ولا عصية المنال أو التحقيق، وأمامنا تجارب عديدة في العالم يمكننا الأقتداء بها والسير علي طريقها بحسب أوضاعنا العقائدية والسياسية والأجتماعية والبيئية.
فلقد تعودنا يا أصدقائي علي رمي جميع أعذارنا وتقصيرنا على الحكومة، فالنظام التعليمي الفاشل بسبب الحكومة، والعاطلون بسبب الحكومة، والاقتصاد المنهار أو الراكد فهو من تحت رأس الحكومة، والعملة الضعيفة، والشوارع القذرة ، وأرتفاع الأسعار …إلخ كل ذلك أو جزء كبير منه قد يكون بسبب الحكومة ، أو يمكننا القول بأن للحكومة دور في معظمه، ولكن اكتفاءنا برمي الأعذار عليها وإنعدام أي محاولة للإصلاح من جانب المواطن لن يغير في هذا الوضع إطلاقاً. فاليوم قد تغير العالم، وأصبح للدور الفردي أثر كبير في التغيير وقيادته ، فمع انتشار العولمة وتطور تقنية التواصل عبر الإنترنت والوسائل الأخري، أصبح الكل قادر على الوصول إلى مبتغاه بسهولة ويسر ، ويمكن للطبقة المستنيرة رائدة التغيير من التواصل والتخطيط والبرمجة لأحداث التغيير أو النقلة المرتجاة بكل سهولة ويسر، ولم يعد دور الأحزاب التقليدية أو التجمعات النقابية ذو أهمية، فقد أصبح زمام الأمور في أيادينا فإما أن نبدأ التغيير والإصلاح والتطوير منذ الآن ، أو أن نستمر برمي الأعذار على غيرنا لتتراكم أعذارنا النتنة ونبقى كما كنا !
ولننظر للعالم من حولنا ولندقق بعين الفحص والتدبر في تجاربه الحديثة والقريبة مننا موقعا” وتاريخا” زمانيا” وأعني بها دولة الصين والتي كانت حتي قبل أقل من ثلاثين عاما” ترزح في فقر وتخلف وأنهيار مريع حتي تسلم زمام الأمور باعث نهضة الصين الحديثة وهو للعلم جاء من صفوف الحزب الحاكم الأشتراكي العقائدي ذو القبضة الحديدية علي مجتمع الدولة ونظام الحكم، جاء هذا الرجل بنظريات وفهم وتطبيق جديد للنُظم واللوائح والقوانين في محاربة الفساد والمفسدين، وتحت قيادة (دانغ شياوبينغ)، خطى الشعب الصيني بكل حزم وعزم الخطوة الأولى في مسيرة الإصلاح والانفتاح التي جاءت بمثابة ثورة جديدة وعظيمة تخوضها الصين في ظل الظروف التاريخية الجديدة، فعلى مدى الـ30 عاما الماضية، كان الشعب الصيني يعمل على دفع الإصلاح والانفتاح وعملية التحديث بكل الشجاعة والجرأة وبروح الابتكار والإبداع مما حقق هذه القفزة الكبيرة من حيث القدرة الاقتصادية وقوة الدولة الشاملة ومستوى معيشة الشعب، فشهدت معالم الدولة تغيرات جذرية. نجحت بها في تحقيق تحول تاريخي من اقتصاد مخطط مركزي إلى اقتصاد سوق مفعم بالحيوية ومن مجتمع منغلق وشبه منغلق إلى مجتمع منفتح على جميع الأصعدة. بفضل النمو الاقتصادي السريع، وارتفع بذلك مستوى معيشة الشعب من النقص في الغذاء والكساء إلى الحياة الرغيدة بصورة عامة، وانخفض عدد السكان الذين يعيشون تحت خط الفقر من 250 مليون إلى أقل من 10 ملايين، كما أحرزت الدولة منجزات مرموقة في البناء السياسي والثقافي والاجتماعي .
فمن خلال عمليات الإصلاح والانفتاح يا أصدقاء، ندرك إدراكا كاملا أنه في عالمنا الذي نعيش فيه اليوم تشتد فيه المنافسة ويزيد أوارها يوما بعد يوم، وتعتبر مسايرة العصر والإصلاح والانفتاح والتركيز على التنمية وتكريس مبدأ الإنسان أولا وتعزيز الانسجام الاجتماعي الطريق الوحيد لتحقيق النهضة وذلك بالقول والتطبيق العملي معا”.
نعلم أنه لا يوجد في العالم طريق أو نموذج تنموي قابل للاستنساخ في كل مكان، كما أنه لا يوجد طريق تنموي أو ونموذج تنموي جامد لا يتغير. فمن الضروري استكشاف واستكمال طرق التنمية وانمذجتها التنموية بتأقلمها مع المتغيرات الداخلية والخارجية وتلبية طموحات الشعب ومناسبة الظروف الواقعية بما يزيد من حيوية المجتمع ومواكبة تقدم العصر ومشاركة الشعب كل الشعب في تحديد وجهته وتقرير مصيره.
كل شيء ولا المواسير!
ولكن أفكارك إيجابية جدا لو طبقوها على ماسورة الماء فقط فنحن نعاني – في بورتسودان – من أن بعض الناس لا يجد حرجا في بيع الماء فيستعمل الطرمبات لسحب الماء القليل الذي بالكاد يسير في الماسورة ويحرم منه الجيران الذين يدفعون مثل فاتورته رغم عدم توفر الماء لهم، هذه الاشكالية لا يمكن حلها إلا بالكروت والجمرات
أما القصر الجديد فلست أدري جدواه ومدى الحاجة إليه ….. اللهم إلا إذا كان سيزود بسراديب ومنافذ سرية للهروب
الحبيب ودالخلا الاسد اللزوم شيال التقيلة عشا البايتات – مساك زين وسودانى ون كمان —-
ياصديقى كيف لانرمى اللوم على الحكومة وهى ولية امرنا عنوة واقتدارا وهى مالكة مفاتيح السلاح والبترول والدهب والقروش والحراسات ونحن شعب لايملك قوت يومه ولانملك قروش التعليم ولاقروش العلاج ومروتنا كملت نضمى ساكت لانو ماعندنا غير النضمى كيف نستطيع تغيير الواقع ؟ غير بالكلام والسادة زعماء واعيان البلد قادة الاحزاب وقادة القوات النظامية كلهم استأنستهم الحكومة إما رهبة أو دفع كاش -(وديل اللى ممكن يغيروا الواقع ) فصرنا شعبا متفرق الاهواء والرغبات شح فينا الانتماء للوطن اللذى كان – كيف لاالوم الحكومة وهى تقرأ مثل كتابات الفاتح جبرا ولا تحرك فيها ساكنا — وكيف لاالومها وحكامنا الاماجد كل يوم يرمون بخيبة اقتصادهم على اكتافنا زيادة فى الاسعار والخدمات وكيف لاالومها وهى ترفض مقترح نواب البرلمان تخفيض ميزانية الدفاع ومعها تخفيض مخصصات الدستوريون وكيف لاالومها ووزير دفاعها يعلن ببهجة غبية الزيادة الكمية والنوعية من انتاج مصانعنا من الذخيرة المصوبة على صدور السودانيين متمردين كانوا أم مسالمين — كيف لاالومها وانت تلعن الفساد والمفسدين !!!!! والقصر الجديد – والابراج العالية التى تنبت كل يوم -وفارهات العربات تحوم وسط الغلابة فى خيلاء – والباقى والذى ذكرته انت تعرفه كله – ارجوك ورينا نلعن ونلوم منو؟ ولا نقول الله يجازى اللى كان السبب – اللى فى ارشيف الفاتح جبرا -ولو اتمردنا كمان نبقى فى منبر الدوحة وآخرتا نبقى مسؤولين فى الحكومة ونغلى باقى الخلق اللى ما إتمردت – غايتو حكاية دايرة ليها فهامة – حيرونا وحيروا جيرانا معانا — بلد ليها سيادة وحكومة وتشحد لاعمار الشرق قالوا من آثار الحرب ! هو الشرق قبل وبعد الحرب حالتو واحدة – ياربى الشحدة الجاية حتكون لإعمار الخرطوم ذاتا ولا شايتين الشوط التانى على وين ؟
الأحباب سلام…. هي حتكون يا بيشاوي لاعمار الخرطوم فعلا بعد الانفصال حيث سيكون منطلقهم انو الجنوبين لمن خرجوا من الخرطوم أفقروها وشالوا القروش والكوادر وبقينا معلمين الله علة تحت تحت ربما تتوجه لاعمار (حوش بانقا) بكافوري….!!
no no for your mawaseer.i need my share in cash or i shall go to UN.
الأخ الكريم ودالخلا . . . سلام
المسأاه يا عزيزي ليست جمعيه تعاونيه في الحي و إنما هي دوله يا عزيزي دولة تحتاج لتخطيط إقتصادي سليم و محاربة فساد وتنمية موارد بشرية وطبيعية. وهذا ما لا يمكن لمجموعة من المثقفين مهما حسنت النوايا القيام به.
و بالمناسبه حكومتنا دي من شدة خوفها من الآخرين مفتح عيونا فناجين عشان تشوف ود مقنعه يحاول يغير حاجه من حاجاتا البقت حقتا ملك حر وتمتلك شهادات بحث تثبت ذلك.
بعدين إنت براك يا ود الخلا رجعت ناقضت نفسك عبر مثال الصين الذي أوردته فالمدعو ( .دانغ شياو بينغ ) لم يكون فاتح جبرت الصين ولكنه كان عمر بشيرها.
تغيير النظام الحاكم الفاسد الفاشل هو الحل ، وما ندفن الرؤوس في الرمال عشان الناس ما تشوفنا.
سلام صديقي سنكل،،
أوافقك الرأي بأن الموضوع ليس جمعية أوبقالة أو فريق كورة ، نعم هي دولة وعندما ذكرت المثال الصيني كنت أقصده وأعنيه بكل ماتحمله المعاني والمقاصد فالرجل صاحب التجديد بالصين هو كما قلت أنت بعضمة لسانك هوعمر بشيرها وهذا ما كنت أقصده أنا بأنه يمكن للحزب الفاسد أن ينجب من يعيد الأمور لنصابها ولو كنت متتبعا” ياسنكل ياصديقي لقصة هذا الرجل ولقصة النهضة الصينية لعرفت أن هذا الرجل جاء من الصفوف الخلفية للحزب وكان من المهمشين ومن المبعدين حزبيا”، ولكنه قاد حملة التغيير عبر الحزب وتركيباته من الولايات عبر المقاطعات حتي وصل للجنة المركزية بالحزب وفاز ليكون رئيس الدولة ومن ثم بدأفي تطبيق قناعاته والتي لم تخرج من محاربة الفساد والمفسدين بأقسي ما يمكن أن تتصوره ، أعدم من أعدم وسجن من سجن ونفي من نفي ولكن عبر محاكمات تم عقدها وتطبيقها بالقانون، وأنا عندما أشرت للتجربة الصينية أكدت علي أنها تمت عبر الحزب الحاكم العقائدي القابض علي السلطة بقبضة حديدية يعني ما في ديمقراطية أو أحزاب أخري ولا يحزنون، نفس الحزب الذي خرج من بين طياته المفسدون ، خرج من بين طياته الصالحون والمصلحون الذين تجردوا من كل غرض وهوي ووضعوا الوطن نصب أعينهم وأعملوا العدالة وأسترداد الحقوق ومعاقبة الفاسدين وبذلك وصلوا للدولة الصينية لما هي عليه الآن في زمن لم يتجاوز السنوات التي تقل عن العشرين،،،،،،
عندما ذكرت المثال الصيني وما يمكننا عمله عبر نفس السيناريو بوجود حزب قابض علي السلطة، ووجود فساد يزكم الأنوف وفاسدين ومفسدين احرار طلقاء يعيثون في الأرض فسادا”، مع ظروف أستثنائية خاصة بنا تتعلق بالعقيدة ونكران الذات والتجرد والخوف من العقاب الآخروي قبل الدنيوي يمكن لنا أن نجد من بين الركام من يقوم بالقيادة الرشيدة ودفع الأمور في الأتجاه الصحيح ووضعها في نصابها اذا ماأتفقنا وأتحدنا ويممنا قلوبنا شطر هدف واحد بأيمان وصدق نية وأخلاص سرائر بأن ما نقوم به لوجه الله الكريم سنصل للهدف والله ناصرنا، أما أذا ما تقاعسنا وركنا للأستسلام وأستصعبنا الأمور وأنها ليست بجمعية تعاونية او صندوق خيري فسنظل ندور في هذه الحلقة المفرغة نندب حظنا ونبكي وطنا” أضعناه من بين ايدينا ونحن ننظر ونأمل في رجل الأصلاح الذي سيأتينا من وراء الشمس…..
هذا الرجل الذي أتي من بين الركام يا ود الخلا سرعان مادعمه الحزب وآمن بقضيته وساروا معه بعضهم مكرهين وآخرين حادبين وقادوا حربا ضد الفساد داخل الصين فنضفت وان كان ما يدور خارج الصين لا يعنيهم كثيرا اذ نعلم الكثير من الهنات تحدث من الصينيين عند تنفيذ استثماراتهم خارج بلدهم….
فاذا حاولنا اسقاط ذلك النظام عندنا لابد من ذهاب الصف الأول للانقاذ والذي سوف يقف بشراسة ضد هذه الحرب ضد الفساد لأنها ببساطة قد تذهب بمصالحهم… وسنحتاج لسنين عددا لكي نصلح ما أفسد الانقاذيون…. حسب خط قويم يتساقط من خلاله كل مفسد و مرتشي ومعوق للمسيرة وأن لاتأخذ بذلك الرجل الذي قد جاء من بين الركام رحمة بالمفسدين ويقع فيهم بترا ومصادرة وبالقانون أيضا مستصحبا معه رجالا يخافون الله ويؤمنون بمنهجه………………. عندها كوووولنا حنبقى مع الحزب الحاكم…!!
قليذهب الصف الأول والثاني والثالث، ولتبقي الحقيقة وتسطع شمسها دافئة ومضيئة وتعم الكون وينتشر الضياء ، فلاب لسطوع الشمس من بعض التضحيات ومهما عظمت لا بد منها لأن الحق يعلو ولا يُعلي عليه….
أهلك العرب يادوك عزت لهم مثل سائر بيقول (النار ما بتوقفها الا النار)، وأنت رجل بيئة وزراعة ولك خبرة وباع طويل فيما كان يسمي بزراعة التحاريق وخطوط النار وهي بالطبع ليست خطوط الحرب يا أبكرون ياصديقي!!!
يعني يا هندسه و باختصار شديد إذا فهمتك صاح ، عايز تقول لشعب الأمازون إنتظر ليك تاااني عشرين ، خمسه و عشرين سنه ، عسى أن يخرج الله من صلب المؤتمر الوطني ( غير مفسد) ليصلح لك حالك. كما صبر ود عمك آفو في الصين ! !
ما شويه كتيره يا سديقي ود الخلا؟
والله يا كوكو أردد معك. عجبي
ليه ياسنكل ياصديقي تتشاءم هكذا؟؟!! لماذا الأنتظار كل هذه السنوات، أليس الله بقادر علي أن يخرج من بين الصف الأول هذا من يقيضه لنشر الفضيلة ومحاربة الفساد، ألا تعتقد بأنه لا زالت هنالك بقية من حياء وصدق أيمان بين الناس يمكنهم من رد الأمور لنصابها….
اذا كان الوضع كما تعتقد ياصديقي بأن ننتظر ثلاثين أخري فتأكد بأنه علي الدنيا السلام!!!!
فنبينا الكريم كان يحب التفاءل ويُسر به، وثبت عنه صلى الله عليه وسلم أنه كان يعجبه الفأل، والفأل هو الكلمة الطيبة التي يسمعها المسلم، فيرتاح لها وتسره، وهذا يقال له الفأل الحسن.
(فتفاءلوا خيرا” تجدوه ياسديقي)
” لا يغير الله ما بقوم حتى يغيروا ما بأنفسهم ” .
عليك نوووور، لقد جبتها من الآخر كما يقولون!!!!!!
الأحباء الأعزاء ..
تعرضت لوعكة صغيرة منعتنى من الدخول والمتابعة ..
كسرة :
ود الخلا : يوم بتكتل ليكا زول !!
سلام ياقبيلة،،
صديقي البروف جبرا ألف لا بأس عليك، وأن شاء الله كفارة ليك يااخ،،،
ما لقيناك مافي وقلنا ما يصير نخلي الدار خلا وخسوسا” نحن أولاده فقلنا نقوم بالواجب، وأهو الأخوان ما قصروا، وصاحبك ياصديقي لا بد ليهم فوق رأي، جرجرتهم ليك بيجاي وبيجاي لمن بردلب رميتهم ليك في الحفرة وجبتهم ليك في الكارة وفي نفس المكان الأشتهر ، زي ما قال ليهم ذلك الرجل صاحب النكتة المرحة طيّب الله ثراه، نحن زمان جيناكم من الخور، واهسي جاكم صاحب الخور ظاتو،،،، هههههههههه
ودالخلا :
اريل شمشروق شراكي ما نشابك
شم نفسك عقيق مسك العشاري الشابك
الاسد الهضيم البهضم المتهابك
حراس مضجعن من الحقود و معاكك
في اسيا استغلت الصين و الهند وباكستان و ايران في تاريخ مشابه و ظروف مشابهة وهي الان دول نووية.
في افريقيا استغلت نيجيريا و الجزائر و ليبيا وهي دول ذات اقتصاد قوي و عملة ثابتة
استغلت بعدنا دول مثل جنوب افريقيا و تنزانيا و كينيا وهي دول لها نظم ديموقراطية قوية و اقتصادات محترمة .
وهنالك دول جاءت بعدنا بعشرات السنين و هي اضعف منا اقتصاديا بل تعتبر فقيرة (اثيوبيا و ارتريا ) و حافظت علي وحدتها السياسية و الوطنية…
و السبب الحماني هو الفساد و النظرة الاقصائية و العجرفة السياسية التي ما قتلت ذبابة…تدار البلاد كما يدار كنتين يماني صغير في حي قصي في قاع المدينة و عندما تعم الخطوب و تدلهم الامور نراهم يتداعون لاشراك الاخر في الجريمة و كانهم يظنون ان الاخر غبي متهالك ببساطة يمكن خداعه…
اتفاقية نيفاشا لم يشرك فيها حزب شمالي واحد و لم يستشار مواطن شمالي واحد و اخذت الاحزاب الجنوبية فرصبتها كاملة لا بل سمح للمواطن الجنوبي بكل الحقوق و الاستفتاء شاهد علي ذلك..ثم خيار المواطنة يطرح علي المواطن الجنوبي اي البلدان يختار و يحرم منه الشمالي …
سوف نري في زمن وجيز تنهض دولة الجنوب من عثرتها و تصبح وطنا له شان لان المواطن الجنوبي يحترم و تحترم حقوقه كاملة و نحن مانزال في تخبطنا و نظرتنا الاقصائية و الدعاية السياسية الفارغة لحزب عجز عن ادارة البلاد اكثر من عشرين عاما و اتصف بانه من احط اربعة دول للفساد في العالم و مازال يتهم الاخرين باتهامات اقل ما توصف به انها طفولية…
هذا الحزب عجز عن ادارة شئون البلاد و افسد خدمتها المدنية و همشت مواطنها واتبعت معه سياسة من ليس معنا فهو بالضرورة ضدنا حتي انه اصبح لا يعنيه من الامر شئ و كانه من بلاد الواقواق….وهذا لعمري اسوأ ما يمكن ان يصل اليه مواطن وهو لفظ و انا مالي بيه…
والان و بعد عشرين عاما او يزيد مايزال هنالك من ياتي و يطلب من هذا المواطن ان ينتبه و ان يفدي الوطن و ان يهم بهمومه ..و كان شيئا لم يكن…بل اكثر من ذلك هنالك من يعتبره مسئول عما يحيق بهذا الوطن واضعا في حسابه ان المواطن في هذا الوطن سيك سيك معلق فيك و انه لا يمكنه ان يضحي بوطنه او يخذله…ولعمري هذه هي المواسير التي تخرخر فوق رأس مواطن هذه البلاد….
اما الاحلام الخلابة ذات الابعاد الثلاثية او ذات الايام الثلاثينية فاللهم اجعلو خير…
نيام :
نيام أخوي كان طوعتا الحروف جيب الكلام موزون
وانت ياكا استاذنا في الشعر ودايرنك تجيب القون
كل خلق الله مجننا وقولك ديمة رصين موزون
وكم عاشق مكتول هواك واسير بحبك المفتون
***********
أسد الفلا ألفي الدنيا مافي مثالك
من عدم الأنيس الوحشة قلبي رثالك
حياك الفؤاد لكنه مابنسالك
عجبا بشوف في كل الأنام تمثالك
سديقي الحبيب نيام دع الأحلام تنمو فهي في عقول الناس وقلوبهم فهي روح تغذيهم بالأمل، وتبعث فيهم الحياة وروح البعث الجديد!!!
اللهم أجعل أحلامنا وآمالنا كلها خير ، وأمسح علي آلامنا وأمراضنا بيمينك الشافية وألبسنا وأوطاننا ثوب العافية وجنبنا الأحن والفتن ما ظهر منها ومابطن أنك وليُّ ذلك والقادر عليه….
والله لكن يا ودالخلا تورتا نفس الناس جنس توير !ده شغل الغواصات التمام !! ههههههه
يابرفو الفكرة رائعة بس بقيت طيب اكتر من اللازم هسع عليك الله (وسوف يحولون ميزانية بناء القصر الجديد من أجل تنفيذ مشروع حمدم حزم مواسير الدعم المتكاملة هذا المشروع الإسترتيجى الهام ) الكلام دا انا لو حلمت بيهو بقوم مفزوع معقولة بس الشعب الفضل دا موجود وعايز (الحيكومة) تحول ميزانية مشروع (نقاطة) زى دا لمشروع تانى …. البيت الجديد دا عجبنى شديد خلاص … لكم التحايا
و الله يا استاذ احنا عندنا عقده من المواسير عشان كدا اعفينا من المواسير شوف ليك حاجه تانيا , احنا الماسورة بتاعت الموية نجي نفتحا نلقاها نايمة و كان صحت تكب طين ناس المريخ دفعوا مليارات في لاعب طلع في النهايه ماسووووووووووووورة و في سوق المواسير الما بودي للتعمير بعد دا داير تدخل (حمدم) اي حاجه تانيا احنا معاك
كسره:
كان ينتظرها بشقف ذلك اليوم و بعد ساعات من الانتظار وصل هاتفه رسالة(صدقني دي ح تبقى اخر ماسورة).
الاستاذ جبر: بعد التحية …. أردت التواصل معك.. لتتخيل بخيالك (الواسع) المشهد انذاك:
تخيل يا استاذ أن أكثر ما يدهشني هو أنني أري مستقبل السودان الان .. قول لي كيييييف ؟؟
اتخيلت انو ثورات الشعوب العربية انتقلت الي السودان… والوضع كالاتي:
– بداية المظاهرات بشارع الاربعين(بدون النظر الي الرمزيات) ..
– طلاب وجماهير يحملون لافتات تطالب بالاصلاحات
– الشرطة وقوات الأمن (تتحفز)
– الجماهير بدأت تتحرش بالشرطة.. الشرطة شمرت .. وفكت البمبان.. الجماهير بدأت الزوقة داخل الفرقان والزقاقات… طاردتها الشرطة.. والعكليبة قامت(هذا هو لب موضوعي).. تخيلت نفسي مصورا أنقل هذه التظاهرة .. لن تمضي الا ثواني معدودة ولن يري أحدا الاخر بفضل رقة أرضنا الحبيبة التي تنفعل مع أي حركة (راكبا كان أم راجلا).. فـ ذرات الغبار التي تثار في تلك اللحظات تكون هي الفارق الوحيد والفرق بيننا وبين المدن والدول التي سبق وأن ثارت.. أنا لم أري في مصر أو تونس أو اليمن أو حتي ليبيا أي بؤس علي ملامح الشوارع أو البنايات .. بل تكاد الشوارع (تلمع) من فرط النظافة والاهتمام .. ورغم ذلك أتشوق الي رؤية شوارعنا (المواسير) وهي تنقل عبر وسائل الاعلام… وأكاد أتخيل أن العرب سيقولون( والله يا سودانيين معكم حق تثوروا علي هذه الاوضاع)
والله استاذ انا بحبك