ومعاهو حاوي

 بعد تخرجه من الجامعة عمل (عوض) فى وظيفة (محاسب) بإحدى المؤسسات  الحكومية ، تدرج عوض فى السلم الوظيفى حتى صار (رئيس الحسابات)  مع تقدم العمر وظهور بوادر (الصلعة) بدأت النقة :

–         يا عوض ما تعرس

–         يا عوض إنتا ناقصك شنو؟

–         يا عوض البنات راقدات

–         يا عوض حصل روحك

–         يا عوض شفتا ليكا رئيس حسابات لسه ما عرس؟

–         يا عوض جيب ليكا جنا ينفعك

وتزوج  عوض نزولاً لرغبة (المجتمع) والآن لديه أربعة من الأبناء فى المراحل التعليمية المختلفة ما أن قابلته فى احدى المناسبات مؤخراً حتى بدأ يشكو لى عن صعوبة المعيشة وغلاء الأسعار وعدم كفاية (المعاش) :

–         تعرف يا استاذ (الميه وعشرين جنيه) بتاعت المعاش دى ما بتعمل أى حاجه .. نحنا بناكل (عيش وشوربة) أول أسبوع في الشهر .. و تاني أسبوع فى الشهر (عيش وطعميه) … وتالت أسبوع فى الشهر (عيش حاف) ساااكت  … والأسبوع الأخير من الشهر (بنعديهو صيام ) … ده غير مصاريف الأولاد .. والموية والجمرة والنفايات وحبوب الضغط وحبوب السكرى والشنو ما عارف  !

–         وين المشكلة يا عوض ؟ الناس دى هسه كووولها ما كده !

–         المشكلة يا أستاذ فى الإحساس مافيش زول عندو دم عاوز يحس بالحالة البطالة دى .. المدام ما عندها حاجة غير جيب وهات وعاوزين وعاوزين … والأولاد كل يوم طلباتهم زائده !

–         طيب ياخى ما تشوف ليك أى شغل ؟

–         قالو ليك ما حاولتا .. كل ما أشوف ليكا جريده إعلانية بس أفتح ليك صفحة (وظائف) وأقوم أدور ليك على أى زول عاوز ليهو (محاسب) أو إن شاء الله (سواق) أتصل ليك بى رقم الشركة مما يسمعوا ليكا صوتى يجيهم ليكا إحباط .. طبعن بيكونو عاوزين يسمعوا ليهم (صوت ناعم) وكده … والعجب لو ما إتصلتا ومشيت ليهم بالدرب يقعدوا يعاينو ليك من فوق لى تحت فى (قرف) ومن الإستقبال يقولو ليك أكتب لينا رقم التليفون وح نتصل فيك وعمرو يوم  واحد منهم كلمني مافى ولا حتي بالغلط …

–         وخلاس يعنى إستسلمتا للواقع ؟

–         إستسلم شنو دى حالة الواحد يستسلم ليها … قلت أخاطب المسئولين والعلماء … أكيد عندهم الحل المناسب بعثت لى (ديوان المظالم) ردوا قالو ليا (زى حالتك دى ما إختصاصنا) ، بعتا لوزير الإقتصاد  رد عليا وقالي … الله معاك … فهمت من كلامو إنو زول (متدين) شديد وإيمانو (قوى) .. بعت إيميل لرئاسة الجمهورية ما ردوا عليا قلت إحتمال يكونو مشغولين بحكاية الإستفتاء دى ، قلتا أبعت لديوان الزكاة واحد صاحبى قال ليا لو عاوزهم يدوك أعمل ليك (قناة فضائية) !

–         طيب كان تخاطب جهات عالمية

–         القال ليك ما خاطبتا منو بعتا إيميل للأمم المتحدة علي أساس إني إنسان وعندى حق فى الحياة الكريمة … ردوا وقالوا بإنو جهودهم في السودان كلها موجهه حاليا لأماكن الشده وأنا ما أماكن شده !

–         طيب ما فكرتا تغترب ليه؟

–         القال ليك منو .. فكرتا لكن لقيت ليا عقد بتاع (راعى) قلتا برضو (ما بطال) الواحد ممكن يقعد (يرعى) بالبهائم وكمان يحسبا ليهم .. لكن

–         لكن شنو؟

–         الفيزاء بى قالوا بى ستة ألف ريال وطبعن أنا ما عندى خمسة ألف قرش

–         أها وهسه ناوى تعمل شنو؟

–         والله قررتا أقوم أشيل الأولاد ديل ومعاهم أمهم وأسلمهم (للدولة) ومعاهم (المية وعشرين جنيه) بتاعت المعاش !!

 

كسرة :

     حقو المسئولين عن المعاشات يصرفو للزول المعاش بتاعو ومعاهو (حاوى) !!

 

 

36 تعليق

  1. السلام عليكم ، البرف الاخوان اريت حالكم زين ( عالم جميل ) و كده ، اول شئ زمن الحواه وولى ، تانى عمنا خضر الحاوى ( الله يرحمه ) كان بتاع طرادات وجنيهات بالكتير ، يعنى بالمختصر كده حاوى ما بنفع مع الشفع ، ديل عاوزين تنزيل ، ايوه تنزيل ، مليار مليارين ترم عضمك وعضام اولادك و الباقى تفرح بيه المدام …….. عجبى

  2. دعهم يقررون عنا جدوي العيش في ممالك ظلم شيدوها علي اعناقنا

  3. حتي الحاوي البصرفوه مع المعاش يا جبرا ….حيقول ليك انا في عرضك وطولك وشنو ما عارف …وعايز ياكل ويشرب ويبقي في (تولاتك)… غايتو الا تلد معاهم رزق الله المتعافي

  4. نهاركم قشطة ، محمداحمد كان باشمفتش في الجزيرة بورد لمان كانت جزيرة و كان بورد…محمداحمد كان باشمفتش زمن الموريس ماينر 1000 الانجليزية الصنع ، العيد الفات لاقيتو طبعا بقا معاشي ليهو قرجة كبيرة ، سلمت عليهو و باركت ليهو العيد قال لي ياخي ما بتعرف ليك محل خرفان في حدود ميتين تلتمية قلت ليهو امشي لجبرا يوريك محل ميكروسكاننق لخروف او شركة تسجيل كاست وديهو للاولاد و اتكل علي الله…
    هذه الفئة من المعاشيين ينفطر لها القلب عندما تراهم يرتعشون في مشيتهم بعد ان مصت الحيكومة العود الاخضر منهم و تركتهم يتكففون الناس اعطوهم او منعوهم…معقول تشغلني حتي سن الستين ثم تعطيني مية جنيه معاش لماذا لا يكون هنالك نظام social security مثلنا مثل باقي البشر في بلاد الله…

    1. وقت تبقي حكومتنا زي باقي الحكومات

  5. حاج أحمد السلاوى | رد

    الله يجازيك ويجازى محنك يا الفاتح ..
    قريت الموضوع وقعدت اضحك براى زى المجنون ..زميل جا داخل على فى المكتب لقانى بضحك .. قال الزول دا جنّ ولا شنو .. مسكين ما عارف السبب البضحكنى ..
    وانتو بقيتو السبب فى تعاسة عمنا عوض ..واصريتو عليهو يعرس ودبستوهو لحد ما انفقعت مرارته وبقا ما عارف يعيش كيف بالمية وعشرين جنيه..
    سؤال سغيروووونى كدا .. عمنا عوض دا ما بيعرف يسوق ركشة ؟؟
    مجرد سوعال بس !!!

  6. السلام عليكم ، يا اللخو العمعاشيين خليهم ديل فى زمنهم ما كان فى واحد بيقدر يكلمهم خصوصا ناس الجزيره بورد ، كانو مابياكلوا الا الكستليته و ما بشربو الا امستل ، وهو كان ما كانو كده كان قعدوا لى حسه كان زمان فلسعو على قولت اخوانا المصريين ، القصه وما فيها عاوزه ليها فكى كارب ، كلما تدى بتاع الدكان ولا بتاع اللبن ولا اى بتاع تلقى القروش رجعت فى جيبك ، وبى كده لا محتاجين لى معاش و لا تامين اجتماعى……..عجبى

  7. يا ناس انا ماعلقت تعليقى دا معلق وين؟.

  8. ههههههه ضحكتنى يا جبرا اضحك الله سنك
    بالغت عديل
    والله قررتا أقوم أشيل الأولاد ديل ومعاهم أمهم وأسلمهم (للدولة) ومعاهم (المية وعشرين جنيه) بتاعت المعاش !!
    دى اظرف حاجه العيال وامهم
    يمكن يبدلوا بيهم العده مامعروف يدوك بدلهم قطعه واطه

  9. والله فكره واحتمال يدوني بدلن وزارة ويقولو لي
    شوف الاصعب ياتا
    اسي المسؤلين ديل يشلو هم وزارة كاملة موش
    اربعه اولاد بس وكمان معاهم 120
    اسي المسؤل المسكييييييييييييين دا
    ماخلو بس علي هم اولادو وبعد ده ما مدينو
    حاجة تعينو يادوبك احتمال عربيتين لي ناس البيت
    عشن هو مافاضي ليهم مشغول بالوزارة
    وعربية تلقي الولد الكبير يتنطط بيها في
    شارع النيل عشان مايحس بالحرمان وانو
    ابو ماشغال بيو وعشان كدة اوعا عسكري ولا ضابط
    يتكلم معاو لانو ابو ح يطلعو طوالي لانو مافطي للاجراءات
    مشغول بالوزارة
    انت احمد الله انو اولادك شايفنك الوقت كولو
    وكمان معاك 120
    كسرة
    الغريبة لو قلتا عايز تقابلو يقولو ليك لسة ماجاء
    يكون معرس مرة تانية؟ بس حقو ما تسكت تشوف عربات اولادا……
    ان الله ينصر الدولة العادلة وان كانت كافرة ويهزم الظالمة وان كانت مسلمة

    (ماعارف مدي صحة الكلام دا لكن العارف يصحح)

  10. بس اهم حاجة الحاوي يكون من الجماعة
    عشان يخلو يشوف شغلو مايشبكوها
    ليو تصريح وتصديق وحاجات زي دي
    يخلو هو زاتو يفتش في حاوي

  11. يحكي عزيزي الفاضل بخواجه عاش في البلد دي ليهو كم سنه
    و بعد ما رجع الي بلدو, مشه عشان يقدم التقرير النهائي الي مديريهو في الشغل
    المدير: اه عملته شنو يا زول مع الناس ديل
    الخواجه: و الله ياااااااا عمك انك اشك في منظمه ارهابيه وراء الناس ديل
    المدير: دا كلام شنو
    (زحه و شو بالجنبه كدا نظام ما مصدق الكلام الاهبل )
    المدير: قول ليك كلام تاني
    الخواجه: وحااااااااااات امي زي ما بقول ليك كدا
    ياخ الناس دي مطحونه و عينه طالعه و ماااااا ملحقه تغطي منصرفات الحياه اليوميه,
    اقول ليك حاجه شوف عين مااااااااا سمعتو 4 عيشات بالف
    المدير: بي كم ؟؟؟؟؟؟؟؟؟؟؟؟!!!!!@@#$%^&^&*
    و العيشه زي حلاوه قطن بس تخيها في خشمك تلقاها مافي
    المدير: و الناس عايشيه كيف طيب
    الخواجه: غايتو في منظمه شكله مدعومه من جهات خارجيه, و الغريب الناس دي شغاله للمنظمه دي
    المدير: بلغ الامم المتحده و الناتو و حلف شمال الفول المدمس و حرك الاسطول السبعتاشر من المحيط البعيد داااااااااااك يضربو الناس ديل. بس انتا مااااااا قلتا لي اسمه شنو المنظمه دي
    الخواجه: الله كريم

  12. والله يا أستاذ هذه المرة جاءت في جرح جديد فقبل أسبوع فقط اتصل بي أحد اساتذتي في المرحلة الابتدائية – والذين كانوا أساتذة ومربين بحق ولم يكونوا يحسبونها بالدروسالخصوصية وغير ذلك – وقال لي أنه ينتظرني في المكتب وعندما وصلت إلى المكتب أظهرت له سروري بزيارته وبعد المجاملات ولوازم الضيافة دخل في الموضوع وقال أنه منذ ست سنوات لم يصرف المعاش وأنه عايش على تلاميذه وغيرهم ،وقدذهب إلى الخرطوم مطالبا بالمعاش فقيل له أن ولايتكم – ولاية البحر الأحمر – لم تدفع ما عليها- ولذلك فليس لكعندنا

  13. خجلت وتمنيت لو أنني لا انتمي لهذا الوطن عندما جاءني استاذي وشرح لي أنه لم يصرف المعاش منذ ست سنوات أي أن الحكومة التي خدمها لما يقرب من نصف قرن وجدت أنه مادام لم يعد قادرا على أداء أي عمل فليس له الحق في أن يأكل ويشرب ويلبس وغير ذلك………. هل يوجد نكران للجميل أكثر من أن نأكل المواطن لحما ونرميه عظما؟ أليس من العار علينا أن نجعل من أساتذتنا ومؤدبينا متسولين؟ والله لو عرفتم الرجل الذي جاء يقصدني وعرفتم كم عانى ليضع نفسه في هذا الموقف لأدركتم كيف وصل الحال بأشراف الناس وخيارهم……..ثم أين النقابات والاتحادات ومن يدافعون عن المعاشيين وغيرهم؟هل ذابوا في الجبهة ودانوا بدينها أم أن لهم شعبا آخر يهتمون بأمره وقد استوردته الحكومة التي عينتهم؟ طبعا عينتهم فكل شيء في زمن الانقاذ تعيين …. وتعيين من خارج البلاد ….كم من القرون ستلزمنا لنحظى ببعض التقدير في وطننا؟ أم أنه لم يعد لنا وطنا بل هو وطن الشعب المستورد …المعروف

  14. والله حكيت ليكم قصتى مع ناس المعاشات والنصيحة لى الله مابقدراحكيها تانى لانى اساسا تعبانة من قصة المعاشات دى ..اقوم احكيها مرتين فى يوم واحد؟ صعبة شوية بحكيها ليكم فى الرحلة .. المهم مبدأالمعاش دا اصلا تعذيبى احبابنا بعد تتخارج منهم مابتهون عليهم راحتك يقومو كدى يدوك معاش عينك ماتشوف الا النور ..ممكن نفط المعاش دا اقصد الصفحة دى؟

  15. يا نورا وهاشم نسوى شنو
    ابتلينا واصبحنا من المغضوب عليهم والضالين فى ان واحد
    نهج هذا البلد نفسى نفسى يا قروش فى كرشى اندفسى

  16. سلام ياقبيلة،،،
    نظام التأمين الأجتماعي معمول به في كل الدنيا، وزي ما قال ليكم (تحفظ الأجراءات) لمن تكون عندنا حكومة زي حكوماتهم، ومافي ظلم أقسي علي الأنسان أكثر من هذا أن لا يجد من يرحم شيبته، ولنا في أمير المؤمنين الخليفة عمر بن الخطاب أسوة حسنة وفي قصته مع الذّمي عظة وعبرة في كيفية التعامل مع المعاشيين وذلك عندما وجد أحد الذميين من كبار السن يسأل الناس أن يعطوه فناده عمر وسأله لماذا يسأل الناس فأجابه الذمي بأنه يريد أن يدفع الجزية، فأسقط عنه عمر الجزية وأمر بيت مال المسلمين بأن يجعل له راتب يعينه علي معيشته حتي لا يسأل الناس وقال قولته المشهورة ( أكلنا شبابه أفلا نرحم شيبته!!!!!) لله درك ياعمر ، ما أعدلك وأحكمك….
    أليس من باب أولي أن يجد المسلمين المعاشيين ما يسدون به رمقهم، علما” بأنهم دفعوا أقساطهم المعاشية كاملة في وقتها وأستثمرتها الحكومة عبر صناديق التأمينات الأجتماعية وتدر عليه الأرباح الطائلة ، وهذه الصناديق أغني من الحكومة لما فيها من أموال سائلة وعقارات وأستثمارات بالمليارات، ولو تم توزيعها بعدالة لنال كل معاشي ما يكفيه ، ولكنه الظلم وأكل أموال الناس بالباطل….

  17. سلام عليكم
    تفتكر يا استاذ في الحالة دي حاوي واحد حيكفي ؟؟؟؟؟؟

  18. يا نورا إنتي قصتك مع ناس المعاشات دي حكيتيها لينا وين؟ ومتين ؟ زغللتي عيونا بالتفتيش !

  19. والله ياعلى حكيتا وطشت من وغلبنى اكتبا تانى فى يوم واحد مرتين. االمهم انا بقيت ارملة فى التلاتينات قبل سنتين ونص وعندى بنتين وكان ماهم كان قلت الموت مع عادل كان اخير لى …كان صاحبى واخوى وراجلى وحبيبى لكن ناس المعاش زادو طرطشتى (نورا السجمانة فى رائعتها الجديدة).ماقلت ليكم الموضوع دا خلوه للرحلة؟

  20. سلام ياقبيلة،،
    الأستاذة نورا مصطفي، كان الله في عونك ، فهل يمكننا المساعدة في تسهيل أجراءتك المعاشية ان كانت مرتبطة بالمركز، وتحديدا” الصندوق القومي للمعاشات، لأن التأمينات الأجتماعية ديك كوم تاني براه وأمبراطورية عصية علي الأقتحام…

  21. نورا ربنا يتغمد عادل بواسع رحمته ويخلي ليكي البنيتين و يقدرك على تربيتهن وتعليمهن ، إن شاء الله أحسن تربية وأحسن تعليم ، في هذا الزمن الصعب العجيب.
    جميع أخوانك هنا في القمردينه حيكونو عوناً لك ، لكن ما تخلي حق بناتك لناس المعاشات و أهو ود الخلا متبرع يكابس معاك.

  22. عجبتني ياود الخلا
    والشكر لكل من يحاول ان يسلعد غيره
    ولابد ان يكون من بجوار جبرا
    ومن يقرا لجبرا كذلك
    والتحية لك استاذنا جبرا
    وحقيقة اني التحقت بكم ومؤخرا
    الا اني اكون في اشد سعادتي وانا اقراء لكم
    ولك وللاخت نورا وللجميع ودي وتقديري

  23. الحبيب أبوناجي
    الحبان في كل مكان
    الأخت نورا الله يقويك ويعينك ويصلح الحال،
    القبيلة ود الخلا جزيت خيراً وأجرت إن شاء الله “كان الله في عون العبد ما كان العبد في عون أخيه”،
    لكن يا أهلنا دي حالة شنو دي ، يعني لو ما بتعرف زول بيعرف زول لاحق في مصلحة ما …. طوالي تحاول أنسى !! أو تبكي بس وتشكي لله.

  24. كفانا اذلالا لمواطن هذه الديار بعد ان تفني عناقيده نرمي عظمته التي اهترأت و علاها الصدا و كأننا نعلن للناس جحودنا و نكراننا لجمائلهم وكأننا نحذر الاخرين بان يهربوا بجلدهم…
    ودالخلا:
    إن مدحوك يصغروا من مديحك ناس
    وإن وصفوك وصفك ما بشيلو الراس
    وإن قاسوك وين ليك يتلقي المقيـاس
    وحيد وصفك وغيرك تلت وأخمـاس
    ياها المحرية فيك و ياكا
    عبدالله المشولح للكرم و الجود
    اجود و دقبايل من وريث و جدود
    نورا مصطفي:
    عَـزَّة شُـوفى الحــوش نوَّر
    بــى نجــوم الليـــل غَـوَّر
    يـــا صبــاح النــــور علـــى العيـــون الحـــورْ والخـــديـــد الحــــار
    عَــزَّة قـومى كفـاك نـومك
    وكفــانــا دلال يـــــومكْ
    بـــت رجـــــال ولــــدوكْ
    للقبيــــلة هـــــــدوكْ
    إنـــت عِـــزْ وبَطَــار
    يشرفنا و يسعدنا حضور امثالك لهذه القمردينة و نفخر بهذه الشجاعة الادبية التي اصبحت عملة نادرة و نفخر ايضا بثقتك في هؤلاء الاخوة الصفوة المختارة في ديوان هذا الرجل المضياف وقمردينته الرائعة…

  25. اصحاب…. والله رغم انو الموضوع بايخ وحزين لكن الليلة اسعدتونى كتيييييييييير بكلامكم واحساسكم الوصلنى . وصدقونى واحدة من اهم الحاجات القادره تخلينى اواصل هى كتابات عزيزنا الساخر الكبير جبرا وتدويناتكم …انا شغالة بنفس النظرية وإلا كان انفقعت زمان. مرسى مرسى مرسى.

  26. معليش يا نورا نقول شنو يا هو حال البلد المايل قدر مانحاول نعدل برضو مايل وداير يقع
    لكن الله كريم ويفرجها عليك من اوسع ابوابه
    كسرة :
    يا جبرا الحاوى زاته داير حاوى يحاوى الجيوب وترزى يخيط الجيب المقدود

  27. الرائع جبرا..سلامات..
    طبعا انحنا ابونا كان عسكرى وكان سادى فى البيت ووسط اهلو,,اسه انحنا كلنا ما قادرين نسد سدة واحد بس!!!
    المهم المعاش اللى اظنو 150 الف كل 6شهور بياكلو اشهر,,يقولوا سقط !! وما عارف سقط سهوا ولا عمدا !!!! لكن هم فاضين من جلد النسوان؟؟؟؟؟؟؟

  28. الاخوة المتداخلين الجدد..سلامات..
    انابة عن الجمع ارحب بكم وبمداخلاتكم,,وخليكم قراب ..تحياتى واحتراماتى..

  29. مضحك مبكى يا بروف
    عوض ده كان تجروا من شعراتوا وتقول ليه” الوداك تعرس شنو؟”

    الغاليه نورا قلبى وربى معاك وربنا بيفرجها باذنه تعالى عشانك وعشان بناتك وكل زول رزقه مقسوم ..
    تألمت جدا وسامحينى لو خاننى التعبير

  30. سلام يا اخوان :
    شمباتي والله العظيم انا اعصابي بايظة من يوم شفت مقطع اليوتيوب – مفروض بعد الانفصال يسموها (تتارستان ) !!!!
    سلاوي : وينك يا حاج ؟؟؟ ردا على سعالك الصغيروني داك نقول ليك 😦 الركشة ياتا ؟؟ المرخصة ولا الما مرخصة ؟؟؟ )

  31. الحبيب ركس.سلامات..
    التتار السمحين الطيبين ديل !!؟؟ والله المجوس احسن منهم.بعدين انت شغلتك شنو فى تراخيص الركشات ؟؟

  32. الأخوة الأعزاء سلام الله عليكم
    كدى خلونا نشوف الوش التانى للعملة الأمازونية دى …. زميل مهنة ورفيق اخي باحدى النقابات (ياحليلها) انضم الى الحزب الحاكم قبل نيله التقاعد ماشاء الله فى حفل وداعه جنس ظروف وكمان معاها هدية عربية آخر موديل وقدرما نصح اخوى بالانضمام الود عمل فيها أنصارى قاطع ولو انطبقت السما على الأرض ما ح يهود ناحية المؤتمر ولو كان شعبى … تعال شوف لما نزل التقاعد لا حفل وداع ولا ظروف ولا جوابات حتى حقوقه أخدها بعد ستة شهور (بمساعدة ود اخوى الفى المعاشات) يعنى برضو وساطات …. تفتكرو الناس العمرها حصل سبعين وتمانين سنة ولسه شغالة ولا جارة الظلط دى حبا فى الهواء الملوث ؟؟؟؟ الله يجازى الكان السبب

  33. البروف والاخوه الاعزاء
    اختنا نور,, نورالله طريقك و ربنا يقويك والله بناتك يتربوا احسن تربيه …واحسن من الابهاتم عايشين كمااان..توتكونى اديتى رسالتك باكمل وجه انشاءالله؟؟
    هس عليكم الله فى حاوى اكتر من المواطن السودان ؟؟ عندنا واحد معرفة مغترب وكدااا بسأل اخوه
    بالله انت يا فلان يتاخد مرتب كم فى الشهر ؟؟؟ رد ليه بكل ثقه والله حوالى 650ج ..
    طيب ياخى مأجر بكم؟؟
    والله بى 500 جنيه …طيب اولادك بقرو فى سنه كم ؟؟ البت الكبيره فى الجامعة وبتاخد يومى 5ج يعنى 5*20 يوم=100ج فى الشهر لانو مابتمشى الجامعة يومى …واتنين فى الاساس كل واحد بياخد 3ج يومى يعنى 3*2*قول 20يوم=120
    طيب يعنى الاولاد بس220 ؟؟؟ طيب ناس الكهربا ..والمويه,,والنفايات.. والمواصلات دى انت ماحسبيهااا كمااان؟؟؟ ياسبحان الله
    ياخ طيب انت بتاكل شنووووووووو؟؟؟؟ رد بكل ثقه اكتر من الاول والله باكل منو يعنى ماباكل بتاااع الاجااااار والله كرررررررررررررررريم

  34. انا بصرف معاش جدي بي توكيل وهو بالضبط (89 جنية) لانو كان (90 جنية) وناس النقابة بكونو منتظرنك جنب الخزنة اول ماتصرف عشان يشيلو منك (جنية) ولمن الناس بقت تماطلهم بقو يخصمو من الخزنة مباشرة علي عينك ياتاجر … الشاهد في الامر اسي (89 جنية) دي لو ادوك معاها (89 حاوي) حتكفيك الشهر علي رقبتك؟ خلي يكون عندك اولاد وايجار وعلاج… غايتو الكلام غلبنا ذاتو

  35. الحاوي لو بحل المشكلة ما كوي المشكلو الحاوي زاتو يشرد منك

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: