إذا إستمر ..

• إذا إستمر تقليص حجم العيش بهذه المتوالية الهندسية فسوف يأتى يوم لا تستطيع فيه فرز (الرغيفة) من (البنادول) !

 • إذا إستمر تحويل الشوارع الرئيسية إلى إتجاه واحد فسوف يصبح بعد الذهاب إلى العمل الرجوع إلى البيت مشكلة !

 • إذا أستمر الغناء فى الهبوط بهذه الطريقه فسوف يأتى يوم نتحسر فيه على أيام سيدة الغناء السودانى (عوضية بلاغات)

 • إذا إستمرت ظاهرة البناطلين الناصلة التى يرتديها بعض الشاب هذه الأيام فى (النصول) فسوف لا يحتاج (الشباب ديل) مستقبلاً إلى أرتداء شرابات لأنو البنطلون ح يكون بنطلون وشراب فى نفس الوكت !

• إذا إستمرت حكاية صناديق الدعم فى الإزدياد بهذه الصورة سيأتى يوم يكون فيه صندوق لدعم كل صندوق دعم

• إذا إستمرت حكايت ربط فاتورة الكهرباء بفواتير خدمات أخرى فسيأتى يوم لن يستطيع فيه المواطن شراء الكهرباء لأنو ما (مرخص عربيتو) • إذا إستمر إزدياد أعداد الخريجين دون تعيين فسوف يأتى يوم تجد على بطاقة أحدهم (الوظيفة : سائق ركشة وزميل كلية الجراحين) !

• إذا إستمرت حكاية الإنفصالات دى فسوف يأتى زمن نكون فيه أول شعب يسكن فى (أوضة وبرنده) !

• إذا إستمر تصاعد سعر الدولار فسيأتى يوم يحتاج فيه المواطن (إنو يزيد على الماهية شوية) عشان يشترى ليهو (فرشة أسنان) !

• إذا إستمرت ظاهرة التفكك الأسرى سيأتى يوم يقول فيه والد الفتاة للعريس الذى تقدم لها (يا إبنى نحنا أسرة محافظة البت عندنا ما بتبيت بره البيت أكتر من يومين فى الاسبوع) !

• إذا إستمرت ظاهرة تزايد أعداد من يمنحون الدرجات العلمية العليا بهذا الشكل الغريب فسيأتى يوم نسمع فيه عن (دكتور مصطفى الحلاق) ودكتورة (عوضية الحنانة) !

• إذا إستمر تزايد سعر اللحوم بهذا المنوال سيأتى يوم يكون فيه الدعاء الرسمى للشعب الفضل هو (لحمتك يا رب)

• إذا إستمرت ظاهرة إرتداء الفتيات للملابس الشفافة فسوف تحتاج شرطة النظام العام لإنشاء إدارة بإسم (إدارة التظليل) !

• إذا إستمرت معدلات نهب المال العام فى الإزدياد بهذه الصورة التى نطالعها سنويا عبر تقارير المراجع العام ح يجى يوم ما ح يكون فى مال ولا يحزنون !

 • إذا إستمر (قدو قدو) فى ممارسة الجلد بتلك الطريقة التى شاهدناها (يوم بيكتل ليهو زول) !

• إذا إستمر الحال بالمدينة الرياضية بنفس المنوال حتى أصبحت (خرابه) ده يكون (لعب ساااكت) !

 • إذا إستمرت زحمة الشوارع دى في الإزدياد (تانى عربات المسئولين تمشى بى وين؟) • إذا إستمر تزايد أعداد (الكبارى) و(نقصان) أعداد الشوارع من جراء الحفر والمطبات فلن تجد تلك الكبارى (عربات) تمر عبرها !

• إذا إستمر تزايد أعداد عربات (الليموزين) ذات اللوحات (إستثمار) نقترح على المسئولين تغيير اسم الوزارة إلى وزارة (التاكسى والإستثمار) !

• إذا إستمرت إدارات الأندية لدينا فى الإعتماد على (الفقراء) من أجل الفوز بنتائج المباريات بدلاً عن الإعتماد على التدريب واللياقة والمهارات فلا شك أننا سنحرز يوماً كأس العالم …. فى الدجل والشعوذة • إذا إستمرت حكايت (مفاوضات الدوحة) الما عاوزه تخلص دى بقترح على الحكومة تشترى ليها بيت هناك وبعدين التبيعو لمن تنتهى المفاوضات وتوفر (حق الفنادق) دى !

• إذا إستمرت كليات الطب (الخاصة) فى قبول الطلاب الحاصلين على نسب متدنية فنحن موعودون بأطباء (الدمار الشامل) فى القريب !

كسرة : إذا إستمرت الملاريا دى معاى ح أضطر أمشى الدكتور واليحصل يحصل !

17 تعليق

  1. الشباب….يكون فى معلومكم كان جبرا دا استمر فى طريقتو دى!!!!!!!!!! انا ما حاستمر فى الدنيا دى كتير .

  2. واذا استمر الفاتح جبرا في كتاباته فحتما مازال الزمن بخير

  3. والله يا بروف ح تستمر ح تستمر والخسران الوحيد هو الشعب السوداني الفضل
    هو المسعولين ديل بيهمهم شي
    بس انت اعمل حسابك ما تغلط تمشي ليك لي دكتور

  4. ا ذا استمرت الحيكومة فى جمع الجبايات بعد داك الا تمشى الدول المجاوره
    لانو كل الشعب حايبطل شغل؟؟؟؟؟
    التحيه لجميع الاحباب و1000حمدلله على سلامة الموقع الجديد
    عدنا والعود احمدددددددُ

  5. السلام عليكم ، البرف ما قلنا ليك العرديب و القضيم و الكركدى ثم القرض والزيت المر عموما ده كله كان ما نفع ، نعمل ليك بخرات كاربات و شوف اكان تانى مقطوعه الطارى دى تجيك ………عجبى

  6. حاج أحمد السلاوى | رد

    غايتو إذا استمر الحال والأمور بالصورة الشايفة البروف دى.. واحد فى المليون زااااتها .. ما حيلقاها .

  7. هههههههههههههههههههههههههههههههههه,,,والله اتلومت يا بروف,,الرغيفة والبندول دى فزييييييييييييييعة..
    غايتو لو استمرو االجماعة ديل فى الحكم لى 5سنة تانى مااااا اظن تفضل مرارة حايمة فى البلد !!

  8. يابروف احسن حاجه تاخد يومين في القصر الجمهوري والله من الطيبات حتروح الملاريات شوف الجماعه كيف بقو كرش كبيره ورقبه مأشااللله وسلامات ياستاد

  9. البروف والاحباب سلام —
    واذا استمرالقطع الجاثر للغانات خاصة اشجار الطلح والشاف( سجم افليقا )- حقو د\ عزت يتدخل ويشوف شغلو فى الحفاظ على البيئة والاخوان —–
    شمباتى – هو اصلا المرارة اتفقعت زماااااااااااااااااااااااااااان بفينا نشوفا بس فى خروف الضحية–
    واذا استمر اغتراب السلاوى اكتر من كدة دة معناتو انو ناوى ليهو على نية !!!!!!!!!!
    واذا السيد الوالى مصر على انشاء وزارة شئون المستهلك التى وعد من خلال ظهوره اول امس على قناة النيل الازرق لاجل تثبيت الاسعار قطع شك الراجل دة محتاج ياخد ليهو نومة شوية عشان يرتاح–

  10. البروف الفاتح حمداً لله ع السلامه . . .
    بقينا ما نحمل إنقطاع او تهديد بذلك عن القمردينه ، ذي ” هففان القهوه على صاحب الكيف “.
    أدام الله القمردينة لعشاق القمردينة.
    وربنا يواليك بالصحة و العافية..

  11. الحبيب دكتور سنكل والحبيب أبكرونا
    شكراً على الإتصال والسؤال .. الشركة التى تستضيف الموقع غلطت .. معليش .. الخواجات ديل مرات قاعدين يجلطوا لكن الكويسه فيهم إنهم بعد داك بيعتذروا .. مش زى الجمااااااعة !!

  12. السلا عليكم وصباحات الخير
    والله يااستاذ اذا استمرت القمردينة فى الجهجهه دى شكلنا حانكون حركة تمرد زى خليل ومناوى
    انت الخواجات ديل ماعارفننا نهوى التمرد والحكايه دى بتجرى فى دمنااااااااااااااااااا

  13. ابوفيصل…سلام..
    اولا احييك على التمرد دا,,لكن فلاحتكم فى القمردينة الغلباااانة دى!!؟؟ ههههههههههههههه

  14. هيييييي لكين ياشمباتى الخواجااات ديل لازم نديهم العين الحمره
    هو عليك الله غير التمرد نحن نافعييين فى شنوووو ؟؟؟ اكتر دوله فى العالم فيها حركات تمرد 10 فى الجنوب وعشرين فى الشرق وستين فى دارفور مافضل الا ناس الشمااااال
    دى ناس الموسوعة ماانتبهو ليهاااااااا

  15. الحبايب الحلوين والبروف الاحلى : يحيات وسلامات – يمنعنا منكم السفر نجى يمنعنا منكم المرض اها تانى الا الموت ..
    لو استمرت ابداعاتك تشفى الشعب الفضل فسوف تستمر سليما معافى فسلامتك من سلامة شعبك شفاك الله وعافاك .

  16. ابوفيصل…
    صدقت والله!! لكن ياربى دا يكون من شنو!؟ يكون الشعب عينو طايرة وما بحمد الله على النعمة الهو فيها دى,,آيييييييييييييييييييي.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: