هترشـــات

– مما الناس قعدت تهبش فى السلم التعليمى وتغير فيهو التعليم ماضاق عافية وما قامت ليهو قائمة تانى .. يا جماعة الخير التعليم ده زى فريق الكورة لمن يكون ماشى كويس ما بعملو فيهو تغيير.. لكن نقول لمنو !

– قرأت تقريراً علمياً عن أضرار تناول الدكوة وتسببها فى مرض السرطان لذلك ومن هذا المنبر أنادى بفصل الدكوة عن السلطة .

 – من علامات العبقرية التى أصبح يتمتع بها الشعب السودانى أن الطالب الجامعى بيدخل المحاضرة ما شايل ليهو لا ورقه لا قلم .. فى عبقرية أكتر من كده !

– عندما ذهبت إلى الطبيب اشكو له إرتفاع ضغط الدم كتب لى فى الروشته .. إبتعد عن سماع تصريحات المسئولين (المجغمسة) وأغانى إذاعات الإف أم وتعال قابلنى بعد عشرة يوم (عشان المراجعة المجانية بتنتهى بعد أسبوع) !

– نحن شعب لا يعرف الرشوة .. لم تسجل مضابط الشرطة منذ الإستقلال حالة واحدة لا لموظف أو لمسئول تمت رشوته .. نحن شعب مصنع بمواصفات عالية الجودة !

 – لو كنت مسئولاً (كبيراً) لأصدرت أمراً بعدم ظهور المسئولين فى حفلات إفتتاح أى مشروعات … معقول وزير يسيب شغلو ومهامو ويمشى يفتتح ليهو (شفخانة) فى (أم جلافيط) مع أنو (أم جلافيط) الكهرباء ذاااتا لسه ما وصلتا ؟

– أيه المشكلة لمن ديوان الزكاة يتبرع بخمسين ألف دولار لقناة الضحى مش يمكن يكون فى مصرف إسمو (وفى القنوات) !

 – التحدث بالموبايل مخالفة .. ما قلنا حاجة .. لكن الإنهماك فى مشاهدة ما تبثه (الشاشات التلفزيونية العملاقة) الختوها لينا قدام كل صينية وتقاطع دى أكبر مخالفة (يكون ناس المرور بياخدو برضو نسبة) !!

 – لو قمت بتضريبه بسيطه لمنصرفات الزول (كان قعد فى سريرو وما قام) لمده شهر لوجدتها حوالى 100 جنيه بالجديد .. نفايات … خط تلفون .. إيجار عداد كهرباء.. إستهلاك مياه .. عوائد .. بالله ده إسمو كلام ؟

 – من قام بإتخاذ قرار (السبت إجازه) إضافة ليوم الجمعة أكيد غلطان .. يومين إجازه ؟ وخمسة يوم شغل؟ مفروض يكون العكس خمسة يوم إجازة ويومين شغل !

– تمتلئ الوسائط الإعلامية هذه الأيام بإعلانات عن المستوصفات الإستثمارية من شاكلة .. لقد تم بحمد الله وتوفيقه افتتاح (مستوصف تمساح الدميرة التخصصى) لجميع الأمراض وبأطباء عالميين ، المستوصف تتوفر به جميع أقسام الرعاية الطبية…. قسم خاص للغسيل…غسيل كلى…غسيل مخ ..غسيل عدة.. غسيل سجّاد وموكيت …غسيل بخار مستعجل وغسيل جيوب (طبعن) !

– بعد وضع الإشارات الضوئية مكانها تأكد لى بأن لدى الحكومة إصرار عجيب فى (حذف) الصينية من حياتنا.

– يقولون أن عهد الأنبياء قد ولى ولكن لدينا خمسة ملايين (مسئول) معصومون عن الخطأ !

– بعد أن إستمعت إلي بعض أغانيه مؤخراً بالصدفة عرفت لماذا سمى هذا (الفتاك) بالإنبراتور – أجمل ما فى جامعاتنا أن الطالب يتخرج منها وهو يعرف القراءة والكتابة .

– لا يوجد لدينا عاطل واحد عن العمل فنصفهم قد هاجر بينما النصف الثانى قد قضى نحبه منتظراً .

– أعجب للأثرياء الذين لهم أكثر من نشاط (أدب – رياضة – صحف – شعر – تلحين) شخصياً لو كنت أمتلك مليوناً واحداً من الدولارات لما كتبت سطراً واحداً .. أكتب وللا أقعد أعد فى المال ده ؟

-إن كنت لا تعلم ما هو (الإسلام السياسي) فاستمع إلى خطبة (عبدالحى يوسف) بخصوص جلد الفتاة . 

– هل تعلم عزيزى القارئ ان الفرق الوحيد بين عربة الإسعاف (عندنا) والعربة العادية أن الأولى يفسح لها الطريق .. لا كادر طبى لا أدوية منقذة للحياة لا أجهزة ولا يحزنون !

– سفاراتنا فى الخارج تحتاج إلى مراجعة (زى أى حاجة تانية عندنا) .. مات أحد أبناء الوطن مؤخراً  فى (اليونان) إثر حادث مرورى وعند الإتصال بالسفاره (للمساعدة فى نفقات الدفن) قالت أنها تستطيع فقط أن توفر (شهادة وفاة) مجانية ! – أيه المشقة والتعب ده كلو؟

كسرة : نما إلى علمى أن (الأخطبوط بول) الذى إستخدم للتكهن بنتائج كأس العالم الأخير قد مات .. يبدو أن أحدهم سأله التكهن عن مستقبل السودان !

12 تعليق

  1. السلام عليكم وعساكم طيبين
    انت يابروف فى اعلانات المستشفيات الملت الجرائد ولا فى الحجاج المساكين
    الدفعو دم قلبم معارف كم مليووووووون كدا وضربتم الجهجهه فى المملكه …
    الناس كلها قالوا هيئه الحج اخفقت فى موسم الحج حتى كمان حصلت شكله من النوع
    ابو كديس فى البرلماااان عجاجا فى السماااا ؟؟ يطلع ماعارف منو فى الجرايد يقول نحن بعثه
    الحج فى ولايه من ولايات الامازون والله حجينا ميه ميه واتفسحنا واتبسطنا ورجعنا كمااان من غير
    اى مشاااكل عشان كد نحنا بنشكر المسئولين فى الهيعه بتاعت الهج دى…
    طيب هس فى زمتكم نصدق منوووو الحجااااج المجدعين هناااك وماقادرين يجواااا ولا ناس البرلمان الداقيييين جرس ؟؟ لا ناس الشكر ديييييييييل
    اصلو الدنيا فيها عجاب*** تخلى الزول يقوم محتااااار
    يكون مصدوم من الواقع **ومن زول عاااش حيانو دمااار

  2. البروف جبرا …جبر الله خاطرك ..والله كان ما شوية الضحيكات المع الصباح ديل كان الواحد جاهو انجراف في الحيزبون الاوزاعي بتاعو…كن جميلا تري الوجود جميلا ..اولادنا ديل اساسا عارفين اي حاجة عشان كده بخشو من غير كراس و من غير راس كمان لانو الواحد فيهم بلدوهو عارف اي حاجة حتي واسطتو منو عارف منذ ميلاده…

    1. الحبيب نيام
      كيف الأحوال والصحة .. عليك الله هو شنو الما ضرب الواطة ! غايتو بس الدولار الطالع السما ! ومعاهو الأسعار البقت نار ..

  3. -تعمل شنو عزيزي القرئ لو جاطت عليك الحاجات وبقيت مامميز لباسا من معاشا؟ولاحاجة بس تعرف انك بقيت ذو بعد واحد.

  4. لكن نحن كان عندنا محلات (سيراميك راس الخيمة للإتصالات) !!!!!/عالم لافارزه السراميك من الخيمة ولا عندها راس بس فالحين فلاحة فى الإتصالات!

  5. الأحباء أبوفيصل – نيام – نورا
    سلااااام ..

  6. السلام عليكم ، البرف فصل الدكوه من السلطه غير جايز ، اذ ان السلطه حتبقى شويه و ما كفايه ، طلبة الجامعات و لا بخشوا المحاضرات و مع كده بينجحوا بالشيتات ، و الديك طور ما يكلف نفسه يطبع الشيتات عشان يجيب لينا الصمرقع لحد ما نقراها للعيال ، حسه انا ذاتى اكان لقيت لى مليون ما كنت بقيت اسامه داوود ولا الوالى ولا سيد الاسم صلاح ادريس ، اذا كان الموبايل مخالفه فالتدخين مع السواقه مخالفتين ، والكلام مع الراكب جنبك مع رفع اليدين و النظر ناحيته ثلاثه مخالفات ، كفى ولا ازيد ………… عجبى

  7. هترشاتك فى الصميم يابروف وبالمناسبه هترشات دى صعبه على خريجبن جامعاتنا ديل شات معقوله شويه براحه على الولاد وبرضو يابرف شكل ليتا السلطه المعنيه لانها ماواضحه رغم انها مقرونه بالدكوه ربنا يديك العافيه

    1. والله يا على ياخوى قصة الجامعات دى قصة طويلة … حكاية الطالب/ه يدخل ليك المحاضرة ما شايل أى حاجة دى عااادى … هو مش كويس إنو حضر !!

  8. البروف العزيز..سلامات..
    والله بتكره الدكوة سااااااااكت!! كيفن يفصلوها يا ناس!؟؟ اصلها وقعت فى نيفاشا؟كع..
    اما عن ناس الحج دى فخلونى منهم,,امس مدير هيئة الحج والعمرة كل ما يعصروهو فى نقطة يقول دى عندنا اخوانا فى الشئون القانونية,,دى لسه ما جانى عنها تقرير,دى عند ناس الوكالات,دى بتعمل لى انشطار نووى فى الميدلا !! حسبى الله عليك يا ما عندك حياء…

  9. سلام للكل
    تصويب
    يا بروف تصريحات المسئولين (المدغمسة) و ليست (المجغمسة).
    ياخي أنا من أمس في امرا ضيق. شابك ليك الجماعة المعاي نحنا مطبقين الشريعة لينا 21 سنة و إذا بي اكتشف انو إن شاء الله ح نبدأ التطبيق العام القادم !!!
    بالله السنين دي كلها طلعنا عايشين (دغمسة) شديدة !!

    1. هو جنس جغمسة ودغمسة يا التلب يا خوى .. خليها ع الله !

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: