السف أنواع

  عزيزى القارئ السف (بأنواعو) معروف عند العرب من زمان بعيد وقد جاء فى لسان العرب :
سَفِفْتُ السَّويقَ والدَّواءَ ونحوهما، بالكسر، أَسَفُّه سَفّاً واسْتَفَفْتُه: قَمِحْتُه إذا أَخذته غير ملتوت، وكل دَواء يؤخذ غير معجون فهو سَفُوفٌ، بفتح السين، مثل سَفُوفِ حبّ الرُّمان ونحوه، والاسم السُّفّةُ والسَّفُوفُ ، واقْتماحُ كل شيء يابس سَفٌّ؛ والسَّفوفُ: اسم لما يُسْتَفُّ.
وقال أَبو زيد (أبوزيد ده مين؟): سَفِفْتُ الماءَ أَسَفُّه سَفّاً وسَفِتُّه أَسْفَتُه سَفْتاً إذا أَكثرت منه وأَنت في ذلك لا تَرْوَى.والسُّفَّةُ: القُمْحةُ يقال سُفّة من السويق، بالضم، أَي حَبّة منه وقُبْضةٌ والسفوف ما يُسْتَفُّ.
إنتهى ما جاء فى لسان العرب والذى رجعت إليه بعد أن قرأت حزمة القرارات التي اتخذها الدكتور عبد الملك البرير، معتمد محلية الخرطوم، بشأن منع (السف) بإعتبار أن (السف) له أضرار صحية وإجتماعية وبيئية خطيرة وعلى الرغم من خطورة (سف التمباك) التى أشارت إليها القرارات  إلا أن (سف المال العام) لأخطر وأشد فتكا بصحة الوطن والمواطن :

تعال معى عزيزى القارئ نطالع بعضاً مما جاء فى كتاب (خلاصة الكلام فى سف المال العام) لمؤلفه لاهط إبن لغفان الذى يبدأ كتابه موضحاً حكم (السف) إذ يقول :

السف أحد أركان (الفساد) إذا قام به البعض لم يسقط عن الآخرين (كان لقو ليهم فرصة) وذلك لقولهم (لو دار أبوك خربت شيل ليك منها البتقدر عليهو) ومن أنكر وجود (السف) فهو (زول على نياتو) إلا أن يكون جاهلا بذلك كحديث عهد (بالخدمة المدنية) ، فهذا يعـذر بجـهله ويدوهو فرصة عشان يشوف بى عينو .

مشروعية السف :

إتفق جمهور العلماء على أن السف يعد مشروعاً إذا كان المال العام (سايب ساااكت) من منطلق أن المال السايب بيعلم السرقة كما إتفقوا على أن غياب العقاب الرادع يجعل السف مشروعاً من منطلق من أمن العقوبة (سف) أقصد ساء الأدب !

أركان السف :

أركان السف ثلاث متى ما تواجدن فأعلم عزيزى القارئ أن السف قائم لا محالة وأن المال العام بات فى خطر وهن:

– مال سائب ليس عليه رقابة

– أحكام غير رادعة (لو القصة مشت المحاكم من أساسو)

– مسئول لا يخشى الله

مفسدات السف :

– تناول الصحف له

– تداوله عبر الجلسات وبيوت البكيات

– سؤال الناس المتكرر : الزول ده جاب القروش دى من وين؟

شروط وجوب السف :
1 ـ البلوغ :أي أن يكون الشخص بالغاً مرحلة التكليف الشرعي (عشان ربنا بعدين يحاسبو حساب نكير) .
2 ـ العقل : وهوالشرط الثاني من شروط الوجوب  وهذا الشرط يعد نعمة من نعم الله علينا فإذا سنحت لك الظروف بقراءة تقرير المراجع العام ح تقول إذا ده سف العاقلين سف المجانين ح يكون كيف؟ !

3 ـ الحرّيّة: وليس المراد أن يكون الشخص حراً لا عبداً بل معناها أن يكون الشخص حر يودى القروش دى ياتو بنك

 4 ـ الزواج : أن يكون الشخص متزوج وبى أولادو (عشان يسجل الحاجات بإسمهم)

5 ـالتكتم : يجب على الشخص أن يكون كتوما حتى لا تعلم يمينه ما (سفت) شماله !

أنواع السف :

السف الجماعي : وهو ضرب من ضروب (السف) واللهط واللغف يتم جماعيا .. تلاقى المدير قاعد يسف والموظف قاعد يسف والخفير قاعد يسف َومن أعراض هذا النوع الخطير من السف أن (المؤسسة المسفوفة) سرعان ما تلحق أمات طه ويتم بيعها أو خصخصتها بحجة إنها (خسرانة)

السف من وراء حجاب :

وهو اخطر انواع السف حيث لا يكون (للسافى) علاقة عضوية مباشرة بالجهه المسفوفة بل لديه أياد تقوم بالسف إنابه عنه مما يجعله بعيداً عن الشبهات وأحاديث (بيوت العزاء) !

السف التصاعدى :

وهو نوع من السف يتناسب طردياً مع وظيفة المسئول .. كلما يترقى (السفة تكبر) !

السف عن طريق التجنيب :

وهو نوع من السف على (المفتشر) حيث يجنب  جزء من  إيرادات (جهة ما) دون توريدها لخزينة الدولة وخضوعها للتدقيق والإجراءآت المحاسبية وهذا النوع من (السف) لم نشأ حديثاً ولم تعرفه كافة العصور والازمان

السف على التوالى :

وهو نوع من السف الذى لا يشبع صاحبه حيث يسف المسئول ثم ينقل إلى مؤسسة أخرى (عشان يسفها) ثم إلى تالية حتى إذا ما أكمل الدورة وطاف على الجميع .. بدأ من الأول  تاااااانى !

السف على التوازى:

يناسب هذا النوع من السف الجماعة الذين يشغلون عدداً من الوظائف ، تجد أحدهم ريئس مجلس إدارة و(يسف) وفى ذات الوقت مستشاراً للجهة الفلانية و(يسف) وعضو منتدب لأيه مش عارف و(يسف) ومن مزايا هذا النوع من السف إختصار الزمن إذ يمكنك الإنتقال من زقلونا (مستأجراً) إلى الرياض (مالكاً) فى أشهر معدودات !

كسرة :

إذا طلب من أصحاب محلات التمباك وضع لافتة تحذيرية تقول بأن (السف) يسبب (سرطان الفم)  فنحن  نطالب  بوضع لافتة تحذيريه فى مكاتب المسئولين تقول بأن (السف) يسبب ( سرطان الوطن) !!

34 تعليق

  1. وجيع الزمان السوداني | رد

    سبحان الله يا استاذ زمان الواحد كان داير يرشي ليهو موظف تسئل منو شهر لانو لو ما قبل رشوتك حتروح في حديد!!! اسي قول للموظف ما بننساك من صالح الدعوات ( يعني الرشوة) وامورك تنقضي في ايام – مع انها مفروض تاخد دقائق – ( اصلا لو مادفعت حتنقضي في شهور او ماحتنقضي اصلا) نسئل الله السلامة وان يصلح انفسن وانفس المسئولين..

  2. كان الزول شغال فى مكان ما فيهو طريقة سف وهو من النوع( السفاف) ……. اها ذى دا بقضى متين؟

    1. يفطر يومين في رمضان و يدك الستوت

  3. صباح الخير استاذنا جبرا وجمع الاخوه
    اختناا نورا والله سؤالك صعب شدييييييييييييد زمان كانو ممكن يخت ليهو سفت شاي
    سفوفة سكر بس هس مع الزياادات دى والله الا يسفو التراب ؟؟ كدا تكون اتتحققت مقولت الترابه فى خشمك……….

  4. نورا … أبوفيصل

    صباح الجمال والإشراق …

  5. في هذه الحالة يا نورا اليسف زي ما ناس (محمد أحمد) بيسفو…. يطلع الحقة ويضربا ضربة خفيفة في الأعلى حتى ينزل الصعوط الى أسفل، يفتح العلبة وياخد ليهو “شمه” وبعدين بي طرف الغتاية ياخد ليهو شوية ويكشحا في الفم وأتوماتكلي اللسان حيوديها محل فاضي…

    في الأيام دي يا بروف ظهر كمان “السف التشغيلي” والذي برز مؤخرا وذلك عندما يكون المسئول السغير مكلفا بمتابعة حساب المسئول الكبير في بنوك برة…

  6. سلام يابروف — وتحية لنورا وابو فيصل –
    هو اصلا القسم الخفى الذى يؤديه السادة المسؤولين عند توليهم لمناصبهم وهم ينظرون للواقفين امامهم وخاصة مصورى الاجهزة الاعلامية وللعلم هذا القسم اوالشعار يقال بالنظرات وليس باللسان ( السفاف يملا شبكتو ) وبعد اقتراح البروف بأن يكتب على مكاتب السادة المسؤولين أن السف ضار ويسبب سرطان الوطن اقترح بعد إذنه أن يكتب على على ابواب قصورهم وفللهم كلمة ( سفوفةعامة )
    والمسؤول يقول لزوجته سفى وادى ولدك اليسف والحقونى على ماليزيا

    1. الحبيب البشاوى .. وبالمرة نعمل هيئة توحيد السف العام !! للتنسيق وكده !!

  7. السلام عليكم ، البرف و الاخوان يعنى نحن مقتمحين ، ملتوتين وكمان مسفوفين ، على ….. بعد الشريعه الشهر الجاى الا عكازى وعكازك نشوف نهاية اللت و القمح ده وين ……….. عجبى

    1. كوكو .. بعد الشريعة؟؟ طيب أنحنا 21 كنا محكومين بى شنو؟

  8. هسى انا الحاجه الوحيدة الكنت بسفها السكر وخليتو باسباب الرجيم وكدة …ولازم الزول يسف ليهو حاجة …بالله ساعدونا فى القصة دى وما بالضروره السفة تكون مباشرة!!!! دى كيف بالله …يعنى تسف زول سفاف !!!1هل يجوز؟

  9. البروف الحبيب..سلامات..
    والله الليلة فشيتنى فشة كاااربة,,وما خليت جنبة للسفافين يرقدوا عليها ..
    عليكم الله الوالى دا ما بخجل؟؟يقول حنمنع تراخيص التمباك؟؟اسه هى بقت على التمباك؟انا اؤيده فى حالة انو قام بى واجبو المهنى تجاه محتمعو,,لكن يقول : طيب ما انحنا مدينا الحفلات ساعة كااااملة,,دى ما ناحية ايجابية..تجيك الطاوية حبالها يا يابا…

    1. يا دكتور شمباتي .. عندهم أزمة فى الأولويات ومعرفة الإحتياجات الحقيقية للمواطن !

  10. عزت..
    لكن لقيتك عالم ببواطن السف وتفاصيله!! لييه كدة ياخى؟؟

    نورا..
    شاااااايفك مصرة على السف,,ودا دلالة على انك تعرضتى للسف وتم سف جميع املاكك وربما السف امتدت آثاره الى بقيةالجيران والاهل والوطن كمان!!
    سفى وما تهتمى..

  11. قالوا البعيش الدنيا ياما تسفسفو
    تشقيهو بي فرقة عزيز بالحسره ريقو تنشفوا
    نشاف الريق من تداعيات السفسفة
    ———-
    لقم الفرامل في الخليج بقولوا ليها سفايف
    يبدو انها بتسف ام سرعة السيارة
    —————————-
    فلان بحب السفسفة اي أشعبي… اكول يعني
    ————————-
    بعدين يا جبرا السف مالو ؟ ، يااااخ هى البغله بتسف ….!

    1. أبكرون سلام
      سفونى الحبايب .. وقالو ليا أنسى !

  12. يا دكتور بالله شفتا زمااانك الناس دى كانت حريفة كيف؟ وبعدين ما تنسى إنو الحقة فيها مراية فى وشها لزوم إزالة الجغمسة البتحصل من جدع السفه للفم ع الطائر …

  13. غايتو يا الفاتح .. سف زى دا أصلو ما شفنا ..
    لاكين كفيت وأوفيت ..

  14. … الذى حدث فى ألمانيا أقل غرابة، وإن اعتبر فى بلادنا من العجائب فى عالم السياسة. ذلك أن الرئيس الألمانى كريستيان فولف الذى انتخب لمنصبه فى 30 يونيو الماضى واجه مشكلة فى تعليم ابنه، حين اضطر إلى الانتقال من هانوفر حيث مقره وموطنه الأصلى إلى العاصمة برلين لتولى مهام منصبه. إذ حاول إلحاق ابنه الصغير «لينوس» بإحدى الحضانات الحكومية ذات الأسعار الرمزية، لكنه لم يجد مكانا له، فاضطر إلى تسجيل ابنه على قائمة الانتظار لحين خلو أحد الأماكن، حيث تشير الإحصاءات إلى أن فى برلين نحو 117 ألف مكان فى رياض الأطفال، مقابل نحو 152 ألف طفل لمن هم تحت 6 سنوات أما الذين تحت 3 سنوات فإن الأماكن المتوافرة لا تستوعب منهم سوى 43٪ من أطفال المدينة، وبسبب من ذلك يوضع عشرات الأطفال كل عام على قوائم الانتظار حتى تتوافر لهم الأماكن فى الحضانات أو فى المدارس الابتدائية، ولأن الرئيس الألمانى خارج مكتبه مواطن عادى شأنه شأن غيره من خلق الله، فإنه عجز عن إلحاق طفله بحضانة الحى الذى يقيم فيه، وحين تحدث عن هذا الموضوع إلى وسائل الإعلام فإنه ذكر أن منصبه يحظى باحترام كبير حقا، لكن ذلك لا يعنى أن يغير من نمط حياته هو وعائلته، أو أن يعاملوا معاملة خاصة تميزهم عن غيرهم من المواطنين.

    الطريف أن وسائل الإعلام الألمانية حين اهتمت بالخبر وأبرزته، فإنها لم تركز على عجز الرئيس عن إلحاق ابنه بالحضانة واعتبرت ذلك أمر عاديا لا يثير الانتباه، ولكنها اعتنت بالأمر بحسبانه دليلا على وجود أزمة نقص فى الحضانات بالعاصمة.

    الرئيس الألمانى )الكافر( لم ينس أنه مواطن، كل الذى حدث له أنه حين انتخب انتقل من هانوفر إلى برلين،
    فى حين أن الرؤساء الذين نعرفهم (…..) ما إن يقبض الواحد منهم على منصبه حتى ينتقل من مصاف البشر إلى مصاف الآلهة .!!!!

    1. الظاهر انو المسئولين بتاعننا اصلا ما بدخلوا اولادهم المدرسة . ديل اول حاجة بيعملوها مع شهادة الميلاد شهادة الجامعة وبعد ما يكبر ويشيييل اسم ابوه الضحى بعمره كلو عشان يلم القرشين ديل يكبر الحكاية دى بعرقو برضو ويعمل ليه دكتوره فى جامعة خارجية وكه

  15. كوكو..سلام..
    والله مغستنى !! احييييييييييييييييييي انا..

  16. السلام عليكم ، د/ شمباتى كيف حالك ؟ ولم يظهر الى الآن >/ ياسر ، اما فى بلد الشعب الفضل بيبنوا لاولاد السمحه مدارس ، اصلو اكان قره ولا ما قره بجيب الكتاب ……… عجبى

  17. بروف جبرا و سادة الانس الجميل…تحياتي لكم و كل سنة و انتو سفوفة…
    البشاوي :
    انتو من زمن ماليزيا القصة بقت فيها جنيفا…والبنوك السويسرية مشهورة بانها تكتم السفائف و موطن اللغائف من اعين الظرائف…اما قسم الحشاش بقو يعملوهو نصف سنوي عشان الحزب عايز حقو لمقابلة الصرف الاستثنائي اصلو راجل مرتين صراف…
    كوكو:
    ياخ الالمان ديل مساكين خلاص في مقرراتم ما في حسبن الولد النمر…زرع و ما وجد …والما زرع حصد…هو الولد مقرنو لشنو ما يورثو و يرتاح ماشاف الشرك الاوسط دا…

  18. الحبيب كوكو..سلام..
    انحنا قاعدييييين,,لكن ياسر دا لبد لبدت حمد!! التقول قايم ليهو بى 9 مليار !!هههههههه

  19. تحياتي يا بروف و تسلم الأنامل يا رائع
    على حس السف و الجغمات انا من قمتا و شفتا أيصالات البلد دي بسأل نفسي سؤال واحد الدمغات و لصقات الجروح دي حتقيف متين؟

  20. طبعا مجمعين كلكم وبتتسفسفوا مامشكلة سفسوا على قدر ماتقدروا (ماياها السفسفةالوحيدة البنقدر عليها) واصلو سفسفة الحبيب ذى الزبيب …وجمعه مسفوفة…. سورى سورى!!! مياركة.

  21. العزيز أبوناجي
    الحلوين في كل مكان
    سلام ومودة وإحترام
    في هذه الجمعة المباركة ونحن نتفيأ ظلال شهر محرم الحرام في مطلع هذا العام الهجري الجديد وعلى بُعد أيام من ولادة عام ميلادي جديد أدعو الرحمن الرحيم أن يلطف بشعبنا الغشيم وأن يجنبه العذاب والثبور وعظائم الأمور وأن يبعث بالفرج بعد طول كرب هو ولي كل شيء وقادر عليه. آمين

  22. الله الله يا أبوناجي…………. لا أريد أن أتحدث عن السف لأن إعجابي ب (لاهط بن لغفان) جعلني أنسى المشكلة وأفكر في شخصه هو ……….. فيا له من عالم جليل أكثر في كتابه من التقاسيم والتفريعات وأتى بالأدلة والأسانيد ويبدو أنه كان يتهيأ ليكون ذا شأن في دولة سفسستان الإسلامية ولكن ربما عاقه أن لحيته لم تنبت بمقدار يسمح له بذلك ………. اكبر مصيبة في ما يحصل لنا أنه يحصل باسم الإسلام ويحكم فيه بالجواز لمثل هذه الأشياء مرة باسم التمكين وأخرى باسم تأليف القلوب وثالثة باسم التسكين وغيرذلك …………. 21عاما ولا زلنا في طور التمكبن والتسكين ويحكم على كل من نطق بأنه حديث عهد بال………… إسلام؟

  23. بروف جبرا:
    في المثل السوداني يقول ليك “عينو في الفيل يطعن في ضلو” …يعني الجماعة عينن في سفسفة البنوك و سفسفة الشركات و سفسفة المؤسسات و سفسفة المابعرفو شنو في جنيفا النجيفة …ويجو علي السفيفة الخفيفة حقت التمباك الظريفة و التي ما قتلت ذبابة كما يقول نزار قباني يقيموا الدنيا و لا يقعدونها ياخ ما تشيف محلياتك و جباياتك الما معروف بتمشي وين و ما تشيف ديوان زكاواتك البتسلف القنوات القيافة و تعفيها في لطافة من السفافة …ياخ عملتو لينا فراقما في البطين الابهر…

  24. البروف والناس الحلوه :
    يعنى نحنا بى تمباكنا ده محترمين واولاد ناس مش ؟؟؟
    تسف زول سافى دى خطيره جدا جدا يعنى واحد سافى سفة مدنكله تلم فيهو قرمبوزه تشفط السفاهو وتسجلو باسما تخليهو يرجع تانى يبدا من اول .
    زعيم افريقى دخل على مدير بنك سويسرى وهدده بالطبنجه انو لو ما وراهو حساب الرئيس القبالو حيكتلو قام مدير البنك قال ليهو انا ما بوريك لسببين الاول انى ما عارف لانو دى سياسة البنك فى السرية والتانى ما بوريك لانى ملتزم بعهد وما بخلفو … الزعيم الافريقى طوالى لم طبنجتو وطلع الشنطه الكبيره وقال ليهو :
    كده الواحد يخت قروشو وهو مطمئن !!!!!!!!!!!!!!!!!!!!!!!!!!!!!!
    – شافع مدرسة سالوه اغنى بلد فى العالم شنو ؟؟ قال السودان !! الاستاذ قال ليهو ليه السودان ؟؟ الولد قال لانو مافى بلد بيسفو فيهو من استقل ولى اسى قاعد الا السودان اها غنى ولا ما غنى ؟؟؟؟
    تحياتى للجميع ..

  25. افليقا:
    والله غني يافلقة!!!لكن تقول شنو؟؟

  26. المصيبه بعد ما سفوا الشعب الفضل بطالبوا بوحده السف الوطني__ أكيد ردهم حيكون : نحن ما بننظر لسفاسف الأمور __ بعدين يا أستاذ جبرا وين ناس موسوعه جيسس _المفروض يدوهم جائذه أسف ناس في العالم

  27. شكرا لك أستاذ جبرا علي نشر التعليق ولك التحايا و موصوله لجميع الأخوان و أقترح عليك تكوين إتحاد للشعب الفضل _

  28. الأخت نورا : أنصحك بإستشاره مستشار السف الوطني _ بالمناسبه ده حاصل علي الدكتوراه في السف من جامعه سفسونيا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: