السبب مازن

رن الموبايل .. نظرت إلى الرقم كان رقما غريبا غير مسجل لدى ، رددت على المتصل فوجدت صوت فتاة تتحدث من مكان به ضوضاء شديدة وكأنها تتحدث من (سوق سعد قشرة(

 الفتاة : آلو

 أنا : أيوه نعم

 الفتاة : معايا منو؟

 أنا : أنا الأسألك إنتى منو؟ مش إنتى المتصله؟

 الفتاة : أنا رشا

 فى هذه الأثناء كنت إستمع إلى صوت فتاة أخرى تتحدث مع (محدثتى) وتقول ليها :

 – قال ليكى شنو؟

 ومحدثتى ترد عليها قائلة :

 – كدى إستني شوية ..

 ثم عادت لتسألنى ذات السؤال مرة أخرى :

 – معاى منو؟

هنا إتضح لى أنها مصرة وملحة (إصراراً) على أن تعرف المتحدث معها هو منو؟ وهذا يعنى بأن (بتنا) ما بتعرفنى وما (قاصدانى) لذلك فقد قمت بقفل الخط حتى لا تستغرق المسالة وقتا أطول فتتصل (المدام) فتجد أن الخط مشغوول لأنو بينى وبينكم مسالة (الخط مشغول طوالى دى) بتعمل ليها (حسكنة) وأنحنا ما ناقصين !!

 بعد ثوان بعد إغلاقى للموبايل وجدته يرن مرة وهذه المرة أعنقد بأن المتحدثة هى صديقة الفتاة التى كانت تقف بقربها :

 صديقتها : آلو

 أنا : يا (بتى) إنتو عايزين منو ؟؟

 صديقتها : نحنا بس عاوزين نعرف مش دى ياها نمرتك وبدأت فى نطقها .. صفر .. واحد .. إتنين .. إتنين واحد … سته.. صفر تاانى .. إتنين .. ….. .وذكرت نمرتي بالفعل

 أنا : أيوا ده رقمى ذااتو. وهي نفس النمرة الصاحبتك الواقفة جنبك دى اتصلت بي فيها من قبل دقيقة واحدة.

 صديقتها : طيب إنت مش هيثم ؟؟

 أنا : لا والله ما هيثم .. نحنا لمن ولدونا إسم هيثم ده كان ما (نزل) لسه

 صديقتها : يعنى شنو؟

 أنا (فى ضيق) : يعنى النمرة صاح لكن الزول العاوزاهو غلط .

 صاحبتها : هو يعنى إنت ما هيثم القابلت (رشا) فى عرس ناس شيرين الفى (نادى الضباط)

 أنا : يا بتى لا .. أنا لا قاعد أمشى نادى ضباط ولا حاجتين الظاهر إنو هيثم ده إداكم نمرتي بدل نمرتو

صديقنها : طيب نحنا آسفين جداً ..

 مع السلامة في نفس اليوم مساء إتصل بى رقم (غريب) وأتانى صوت لشاب يتلعثم فى أضطراب

 الشاب : فى الحقيقة .. أصلو .. يعنى .. آآآآآآآآآ .. أنا آسف للإزعاج.. بس .. أصلو

 أنا : عاوز منو إنتا ؟؟

 الشاب : أنا مازن

 أنا : طيب يا إبنى يا مازن .. إنت عاوز منو ؟؟

الشاب (بتلعثم) : أنا الزول النمرتو ظاهرة على شاشة موبايلك هسى !!

 أنا (باندهاش) : بالله ؟!!!

 الشاب : قلتا ليكا النمرة الظاهرة فى شاشة الموبايل بتاعك هسى دي .. هى النمرة البكلمك منها يعني

 أنا : طيب وهو المفروض يعنى تظهر نمرت منو ؟ نمرت جاركم مثلاً ؟؟ مش نمرتك الانت بتتصل منها ولا شنو بالضبط يعنى؟؟

 الشاب : ما هو يا استاذ لو دققت في النمرة بتاعتي حتلاقيها نفس نمرتك بالضبط بس الفرق إنو نمرتك (سودانى) ونمرتى (موباتيل)

 أنا : وأفرض يعنى ؟ المفروض يعني نبقى أصحاب عشان أرقامنا بتشبه بعض وإلا شنو؟؟؟

 (الشاب فى توسل) : عليك الله بس يا أستاذ أدينى من وكتك شويه عشان أشرح ليك الموضوع والله أنا فى ورطه ما ممكن زول غيرك يحلها ليا ويطلعنى منها عليك الله يا أستاذ ما تقفل الخط وإسمعنى للنهاية

 أنا : إتفضل .. إتكلم بس بى سرعه عشان أنا مشغول شويه

 الشاب : أصلو بى صراحة كده أنا كنت فى السعودية مشيت مع (الحاج) عشان يعمل ليهو عملية بتاعت قلب هناك وبعدين لقيت البت دى راقده فى المستشفى مع والدتها هناك برضو عاوزين يعملو ليها عمليه (قلب) قمت أديتا (جهاز موبايل) تديهو لى حمادة أخوى الصغير لأنو عمليت أرشا إنتهت جات رجعت قبلنا وأديتا رقم الموبايل بتاعى هنا عشان لمن ترجع لو تاهت من البيت تتصل على الشاب : الحصل إني غلطت وكتبت ليها الرقم بدون (التسعه) بتاعت (موباتيل) وعلى كده الرقم بقى (سودانى) اللى هو رقمك يا عمو ودلوقتي هي أكيد حتتصل عليك عشان عاوزة تسلمنى الموبايل الأنا إشتريتو لى حمادة… فياريت يعنى يا عمو لو تتكرم وتديها نمرتي أنا. توالت إتصالات (مازن) يسأل عن (رشا) يوميا) وبصورة مزعجة .. من الواضح أن مازن قد (نجر) القصة بتاعت أبوهو والعملية والسعودية .. وأن (رشا) وصاحبتها قد (نجرن) قصة عرس شيرين ونادى الضباط .. الحاصل شنو ما معروف لكن الشئ المؤكد إن أولادنا ديل( حيرونا عديل كده )!

كسرة :

إذا قمت بالإتصال على شخصى ووجدت أن هاتفى مغلق فالسبب (مازن)

Advertisements

16 تعليق

  1. يا استاذ مش الحمد لله انو اداها الرقم لما كانو في السعودية

  2. السلام عليكم ، البرف جاتك فى محلك ، ده لو واحد من الشفوت كان حنكه ، ما تخليك شفت يا برف وبالمناسبه ( المابخاف من مرتو ما راجل ) ………….عجبى

  3. صباحكم (زين) ونهاركم (سودانى).
    تلفونك يرن وتفتح……اها عملت لى شنو فى الموضوع؟؟؟؟؟؟
    تلفونك يرن وتفتح……بالله ادينى الدسوقى دا سريع
    تلفونك يرن وتفتح……قلت لى القضية الساعة كم؟
    تلفونك يرن وتفتح…..ياعمتى مالكم اتأخرتو؟
    والله انا ما عرفت تلفونى دا بالضبط حق منو!!!!!!
    ويظل الحال على ماهو عليه لحدى موبايلى بطاريتو ما تنزل واقرررب اجيب ناس يلزوه .
    اللهم اجعلو خير. (اصلو زول ساى يغلط يقول ليك فزت بى عربية مافى؟؟؟؟

  4. البروف وجميع الاحباااب تحيه طيبه

    انت يااستاذنا ماتحمد الله المااتشبكت فيك وقالت ليك رسلى لى رصييييييد
    والله ما كان يحلك منها الا ماااازن عشان كدااااا صلح علاقتك معاااهو

  5. يا بروف ضربت ليك اقيت تلفونك مقفول، ما تخاف المدام بتعذرك لوكلمتها أول بي أول (ومافي داعي للتفاصيل) … أنا بس عاوز أسأل.. انت ليه ما قلت للبنية والوليد ديل :(معليش النمرة غلط) و (كليك) قفلت التلفون؟؟
    …(أوع يكون نفسك كان تتونّس!!!!!!!!!!)…

  6. بالمناسبه الموبايل عمل لخدمه الأخرين عشان كده بقي من أسباب دخول الجنه _ الله في عون العبد ما دام العبد في عون أخيه

  7. البروف سلام..
    انا كمان شبكتنى واحدة باتصال وسخف فى رمضان ما,قلت ليها ما انا العايزاهو,قالت اكيييد اتصل من رقمك دا _مصرة_ قلت ليها عشان اتخارج منها: امكن,,بس ما عارفو منو,,قالت لى : كيييف دى تلفونك لى زول يتصل منو ! الموبايل دا شخصى وادتنى محاضرة عن علم الاجتماع وعلاقته بالموبايل !! وانا ساكت اسمع,اخر شئ قفلت الخط فى وشها !!

  8. الأحباء الأعزاء
    عفواً دخلتا متأخر شوية .. الأيام دى والله الواحد ما عارف الحاصل ليهو شنو؟ بالمناسبة الناس دى مشت وين؟

  9. البروف والسمار … اخير انت يا استاذ جاتك جكساية … لكن انا ريقي نشف وانا بحاول اقنع واحد كده قال من السوق الشعبي … هو مصر انو حول لي رصيد بي ميتين الف -حتة واحدة – مع انو تلفوني خط … قربت لقول ليهو زي ما بقول عادل امام : انما انا ما عنديش تلفون … بس خفت يشيلو العده.

  10. اهلى الطيبين
    كل سنه وانتو بالف خير .ويارب تتحقق كل امانيكم
    البروف السنه دى يارب تكون احلى بكثير من اى تصور حلو اتمنيته..

    كلو من مازن!

    هههه

    قصه التلفونات دى شكلها منتشره فى العالم العربى. وعلى الاقل مازن عنده سبب فالفرق بين الشركتين 9

    عندنا موضه هنا
    يتصل عليك زول انصاص الليالى بمسكول وتتخلع ..دايما نخاف من تلفونات الليل وقبل تضرب تفكر فى كل شى كعب من مصايب الدهر
    تستجمع شجاعتك وترن وتحاول تكون صوتك جادى جدا فى حالتى عشان انثى وكده
    ويجى يقول ليك انه انتى الاتصلتى
    وطبعا ادخل فى اضافرى واقطع الخط والوم روحى الف مره واقول الخبر الشين ما بيدسه حتعرفيه مالك ومال التلفون
    وبعد ثوانى وانت فى نص تعذيب الذات يتصل ويبدا فى “كلام صوتك جميل” و و ..وتقطع الخط بسرعه ويفضل يرن ..تقفل الموبايل واول تفتحه فى الصباح تلاقى مليووون رساله اخطار ولو ما قفلت موبايلك يوم كااامل ما بيريحك… ولا تديه كلام حار نظام انت ما عندك اخوات وبنات وامهات و و و
    اسفه … كترت الكلام
    سلام

  11. الحبيب أبو ناجي

    الحبان في كل مكان

    السلام عليكم وكل عام وأنتم وما تبقى من وطن وشعب بألف خير

    يا أستاذ الإيميل بتاع جبرا ميديا ده فيهو غلط وما بيستقبل وإنت سبق وقلت لينا أبوناجي2 خلوهو وما لاقين درب إلكتروني يودي ليك، بالله حلها لينا المشكلة دي قبل ما نقيف مع ناس مازن في الخط هههههه.

    أبو الخلد مشتاقين عساك والعائلة الكريمة بشقيها الصغير والكبير بألف خير، رجعت الجك طلع تلتو أوع تمرق عشان لمن ترجع تاني ما نلقى النص هههههههههه

    شمباتي نفسي أصدقك لكن شكلها كانت لايوقة شديد ولا الصيام مجهجهك وإلا كان الحوار مدخل للحل وتقول ربنا إستجاب لدعواتك الرمضانية الحارة هههههه

  12. البروف والكرام——-
    اكيد واحد حاقد ادى رقمك لى رشرش دة طابور خامس — (هو انت قادر ترد على ام ناجى لحدى ما يجيبو ليك ام زعانف كمان )
    شمباتى خليك واضح دى منووووووووووووووووووو ؟؟
    مخير لك التحية —

  13. الحبيب مخير .. abunagi2 شغال وgabra-media برضو شغال !!

  14. الحبيب مخير..سلامات..
    ما تعصر على شديد يا حبيب !! دى القصة الصالحة للنشر,,اما الاخرى فالا بالدرب الورا..وخليك قريب..

    الحبيب البشاوى..سلامات..
    والله مشتاقين,,وبس..

    1. والله ياشمباتى جنس حسادة عليك – مشتاق وبس – ماتتم الباقى –

  15. الغريب جداً في موضوع التلفونات
    أنه الموبايل فيهو شاشة وممكن تحفظ الأرقام العايزها
    وبعد دة كله الواحد يمسكل ليك ولا يضرب ليك يسألك نمرتك كم ولا إنت منو؟

    طيب هو منو ضارب لمنو !!!!!!!!!!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: