والله بااالغتو

(الصفقة) أو التصفيق نوع من أنواع التعبير عن الإنتشاء والفرح وهنالك أنواع متعددة منه حيث يمكن أن نقسمه إلى إلى نوعين رئيسيين ؛ النوع الأول: تصفيق تلقائي وهو تصفيق يحدث دون خطة مسبقة، بل يتدفق بصورة تلقائية لا شعورية والثاني تصفيق معد سلفًا إما من قِبَل (الزول البصفق) أو الزول (العاوزين يصفقوا ليهو) . والتصفيق التلقائي هو أكثر تعبيرا قياساً إلى التصفيق المعد سلفًا (ومبرمجين ليهو) .

 التصفيق غير التلقائى (المبرمجين ليهو) تعود أصوله إلى الأمبراطورية الرومانية حيث تطور وإزدهر حتى أصبح مهنة رائجة يمارسها البعض (بأجر ومخصصات كمان) فى الحفلات والمسرحيات التى كانت تقام على مسرح ديونيسيوس في اليونان القديمة . ويحكى أن اليوناني (فيلمون) غالباً ما كان يقوم بهزيمة منافسَه (ميناندر) في المسابقات المسرحية التي كانت تُعقد في القرن الرابع قبل الميلاد ولم يكن الفضل في انتصاره وتفوقه على منزله يعود إلى جمال مسرحياته وجودة إخراجها ، بل كان يعود لقدرته على التأثير على قرار لجان التحكيم من خلال التصفيق الحار الذي كان يحصل عليه إذ أنه كان يؤجر عددًا من الأشخاص ليُصفقوا له بحماس قبل العرض المسرحي وأثناءه وبعده

 وتذكر كتب التاريخ أن نيرون (37 ـ 68 م) طاغية روما الشهير، قام بتأسيس مدرسة خاصة لتعليم أصول (التصفيق) . وأنه كان يأمر ما يقرب من خمسة آلاف فارس وجندي من أفراد الجيش بحضور الحفلات الموسيقية التي كان يغني فيها وهو يعزف على القيثارة ليصفقوا له بعد أن ينتهي من الغناء والعزف . فى مقطع من مقاطع المسرحية الكوميدية ذائعة الصيت (شاهد ما شافش حاجة) وبينما كان بهجت الأباصيرى (عادل إمام) يجلس أمام قفص (الأرانب) يوزع لهم (الجزر والخس) حانت منه إلتفاته ليفاجأ بأن (الأسد) يجلس على مقربة منه .. فأخذ يشيح بوجهه عنه ناحية الأرانب برهة ثم يعود للنظر إلى الأسد من جديد وهو غير مصدق قائلاً :

– فعلا هو … أسد !!

فى صبيحة الخميس الماضى كنت أقرأ فى الصحف ففوجئت بمانشيت يقول (نواب الشعب يصفقون عند إجازة قرار زيادة الأسعار) .. وضعت (الجريدة) جانباً و(طلعتا النضارة) وأديتا (مسحة) بى طرف الجلابية .. وكمان أديت عينيا مسحة ولبست النضارة تااانى ومسكت الجريدة لأقرأ المانشيت مرة أخرى قائلا بعد قراءته (على طريقة ) عادل إمام

– فعلا هو .. النواب يصفقون .. !!

 كما أن جلوس الأسد بالقرب من (بهجت الأباصيرى) قد كان مفاجأة له أدركها بعد فترة من الوقت فقد كانت قراءتى لذلك المانشيت مفاجاة حتى لحظة كتابة هذه السطور ! لم يصفق (نواب الشعب) لأننا تمكنا من سداد (ديوننا الخارجية) .. لم يصفق (نواب الشعب) لأننا قد تخلصنا من مشكلة العطالة .. لم يصفق (نواب الشعب) لأننا تصدرنا المركز الأول لدى (منظمة الشفافية العالمية) .. لم يصفق (نواب الشعب) لأننا قضينا على الفقر أو التضخم .. نعم لم يصفق (نواب الشعب) لأننا قد حققنا واحدة من هذه (الكوارث) بل صفقوا علامة الفرح والإعجاب والإستحسان لإحدى الإنجازات الهامة وهو قرار زيادة الاسعار فى بادرة لم يسبقهم عليها نواب أى برلمان فى العالم منذ بدء الخليقة وحتى الآن وهل يمكن لإنسان عاقل بالغ رشيد أن يصفق فرحاً عند حدوث الفواجع والكوارث والنوازل والخطوب وأى فاجعة وأى خطب أن تتم زيادة أسعار السلع الأساسية ويصبح المواطن المطحون أصلاً نهباً لغول الغلاء وأنيابه المفترسة وتتحول حياته إلى فقر وجحيم ؟ إن كان الأمر هكذا فلن نستعجب فى مرات قادمة إن قام وزير الصحة بإعلان عجز وزارته عن إجتثاث الملاريا فصاح به النواب : – أحسنت يا أخا العرب أو أن صرح وزير الداخلية أمام المجلس بإرتفاع قتلى أحدى (المسيرات السلمية) إلى خمسمية شخص فقام (نوابنا الأماجد) بحصبه بالزهور والورود والورق المعطر قائلين : – ده الشغل .. ده الشغل ! أو قام وزير الزراعة بالتصريح عن فشل الموسم الزراعى فأخذه النواب بالأحضان قائلين : – لله درك يا سعادتك ! ولأن مثل هذه الإنجازات الهامة التى تلهب مشاعر إخوتنا (النواب) وتجعلهم يصفقون منتشين سوف تتكرر ولن تكون الأخيرة وربما جاءت إنجازات أكبر تستدعى وسيلة تعبير للفرح أكبر من حكاية (الصفقة دى) فالعبدلله لديه إقتراحاً يرجو أن ينال إستحسان (إخوتنا النواب) وهو أن يتم تجهيز (فرقة موسيقية) خلف الكواليس حتى إذا ما تمت الموافقة على مثل هكذا قرار (إنجاز) دلفت الفرقة إلى داخل القاعة وهى تغنى (دخلوها وصقيرا حام) .. لينزل (النواب) بجلاليبهم (الزبدة) وعمائمهم (التوتال الأصلى) وملافحهم المزركشة رافعين عصى الأبنواس فى السماء وهم يضربون بمراكيب (النمر) المنقرطة بلاط القاعة يرقصون فى إنتشاء تعبيراً عن إعجابهم وإستحسانهم بوصول سعر الدولار إلى عشرة جنيهات !

كسرة:

 أليس شيئاً محيراً وغريباً وعجيباً (وما بدخل الراس) أن يصفق (مواطنون) لأن إقتصاد بلادهم ينهار؟ .. المصفقين ليها شنو؟ والله بالغتوا !!

41 تعليق

  1. البروف الحبيب…سلام..
    والله فعلا (دخلوها وصقيرها حام)!! لانها جاطت واتعاست ودخلوا البلد وما مرقوا منها ابدا,وشلعوها وما رحموا اهلها ابدا,,ونهبوها وما خلوا فيها حاجة ابدا…

  2. الصفقة الصفقة الصفقة..الما يصفق ان شاءالله يشيلوهو فى اول تعديل وزارى !!

  3. يا جبرا زعلان مالك لو ما صفقو اسي يصفقو متين
    وكدة بيقولو للناس القالت ح تطلع الشعب الشارع
    اها الشعب ماعندو حيل وقبل يومين كان همو في لقمة العيش
    واسي همو في اللقمة حتي لو كانت ماعيش(برسيم،علف،نيم،حصير)
    لله دركم يا نوابنا وللامام حتي لايبقي من تنوبون عنه
    ولا لدنيا قد اتينا
    وليعد للدين مجدة
    والعزة للسودان
    كسرة:
    تاني يا استاذنا ماتتكلم لينا جادي عشان ماتحرك دمنا

  4. والله يا استاذ انت واجع قلبك سااااي كدي
    الناس دي صفقت عشان دافعين ليهم قروش انت قايل لي شنو
    وباقي الشعب الفضل دا لازم يشد الحزام لأنو لسه اكيد في زيادات تانية
    وبرضو ح يصفقو

  5. الأحباء الأعزاء
    صباح الخيرات .. لكن بالله الجماعة ديل مش بالغو … وعملوها ظاااهرة !!

    1. رسلت ليك في الاميل بتاعك ولا رديت طينت خاطري ساي
      الحروف دي نا تبهلا علينا جاي
      ماعايز منك اكتر من 26 حرف اعجنة كدة و نشوفا بتعمل شنو
      ois2311@hot
      والله بنحبك عدييييييييييييييييييييييييييييل كدة
      بس المره ماتسمعنا باقي النسوان ديل مرة مرة غبيانات حلاس

  6. سلام للكل
    التصفيق غير التلقائى (المبرمجين ليهو) تعود أصوله إلى الأمبراطورية الرومانية.
    أما الإمبراطورية الامازونية فيرجع لها الفضل في ظهور التكبير و التهليل غير التلقائى (المبرمجين ليهو).
    سؤال:
    النواب ديل بصفقوا برضو لما المراجع العام يقدم تقريره السنوي ؟؟

  7. السلام عليكم ، البرف والاخوان / ت الليله نورا ما ظهرت يعنى ، اها ديل المصفقين ليها معروفه ، عسى ال25% استقطاع وعربية البيت ترجع ليهم ، لانهم موعودين اذا مرروا دى ففى مخصصات تانيه فى طريقها ليهم ، الشئ الغريب انو النايب بتاعنا جاء ليشرح السياسات الماليه ، قربنا ندقه ………..عجبى

  8. السلام عليكم ، البرف والاخوان / ت ، د / شمباتى وين اخونا د / ياسر عرس ليهو مره تانيه و لا شنو ؟ و حاج السلاوى مسجل ظهور خجول ………عجبى

  9. و الله بالغو . النواب ديل نسوا انو القرارات دي حتفقر الشعب الاداهم فرصة التزوير الدخلتم المجلس (الوطني). 

  10. ههههه ههههههه
    بالله صفقوا….. ليهم حق يصفقوا
    انت عارف بيكونوا صفقوا لجرأة الحكومة واستخاذها مثل هكذا قرارات في هذا الوقت….
    – قبل كم يوم من الاستفتاء المصيري…. يزيدو سعر الدقيق وبالتالي تزيد سعر الرغيفة وينقص وزنها وبتاع المالية يقول لشعب أكلو كسرة
    – بعد كم يوم منها يعملوا سعر تحفيزي وما عارف واحد تأشيري فيقفز الدولار الى أرقام فلكية..
    – يقوموا يزيدوا سعر البنزين ومعاهو السكر ويقول لينا وزير المالية انو حركات دارفور قاعدة تشتري من السودان البنزين بالرخصة عشان كدا زدناهو كيتا عليهم
    قاموا صفقوا….. لكين
    رئيس المجلس قام قال ليهم (الصفقة مالا تعبانا)….
    بس هو ما صبر وسمع باقي القرار الذي سحب عربات نسوان الوزراء…..

    هنا اشتدت الصفقة لأنو قرار زي دا رجالهم الوزرا ما قادرين عليهو….

    كسرة:
    اذا لقيت وزير جاي الوزارة بالمواصلات أعرف انو مرتو سحبت منو العربية

  11. سلام من بلد الكرام إلى بلد النواب اللئــــــام
    النبي يا ود أمي مندهش مالك؟
    مش زمن الإندهاش ولى مع الجماعة ديل؟
    مش صفقوا لما طلعوا في الضباط في رمضان بالدبابة؟
    مش صفقوا ورقصوا بموت الشباب في الجنوب وقالوا بنحارب الكفره, سبحان الله الكفره ديل بقوا فجأة بقدرة قادر أخوانا وشركاء في الحكومة (الإنتحارية)….
    حسبي الله ونعم الوكيل

  12. سلام تااانى ..
    الجماعة يكون رئيس المجلس قال ليهم (النقدة) !!

    الليلة فردتك وين يا كوكو؟

    1. البروف جبرا- سلام —
      ارجو اعادة نشر بوست – الله يجازى اللى كان السبب – اصلو مفروض يعاد نشره كل 24 ساعة

  13. البروف والأخوان
    بعد السلام والصفيق واللازمنو
    الجماعة الوصلو حد الصفيق ديل أمنو العقوبة فالحصل شنو بعد داك ….قول انت بقا ؟
    احنا المفروض نعمل اي حاجة انشاء الله مانسمع كلام اي مسئول في اي قناه ولا صحيفة (زي ما عملت انا امبارح …محارب الجزيرة من 6 لي 10 للضمان )
    المشكلة ما فيهم المشكلة فينا (حقو نجيب لينا محترفين جزائريين يحلو المسألة دي )
    ولا رأيكم شنو

    1. فعلاً الشعب الظاهر شربوهو محاية كااااربة

  14. البروووف الرائع وسمارة الكرام .
    سلام
    والله موضوع الصفقة دة محير بالجد يكون العجبم شنو ياربى ؟
    إنت فى دة ولا أم بارح سعادة الريس صرح إنو بعد إنفصال الجنوب حاتشوفو ثورة إنقاذ تانية ….
    سجم خشمنا وخشم وليداتنا الجايين ……

    1. الحبيب حنين – سلامات – هو نحنا عرفنا فى الانقاذ( 1 ) شنو عشان تجينا انقاذ (2 ) والكبارى شنو ونحنا مروة تمرقنا من البيت مافى – اسأل افليقا ؟ فعلا نسأل الله السلامة – وفعلا دخلوها وصقيرا حام – بس المشكلة انو الصقير مايلقى حاجة يختفا بعد كدة

  15. البروف والسمار — ياخى رجالة زى دى مايصفقو ليها ليه ؟ وكمان الماعاجبو يجرب يمرق الشارع – والوالى يقول الخروج للشارع لايخدم قضية ولو كان يخدم قضية لكنت اول الخارجين – وببرود يحسد عليه يقول الداير يمرق يفش غبينتو اليمرق بس مايخرب – عليكم الله ولى امرنا يعلم اننا مغبونون ويدعونا ان نفش غبينتنا بادب – دة والى شنو دة ؟ الم يعلم بان من واجبات الوالى فش الغباين ؟ ومال بياخد ماهية على شنو – ويلا صفقو كلكم

  16. البشاوى كيف أخبارك.
    قلت لى الوالى قال مانعمل شنو . نان نمرق نسوى شنو … نتفسح فى الكبارى ونتفرج فى الشاشات الفى الصوانى …

  17. شكرا يا بروف والله يا بروف حكاية الصفقة دي محيراني بس الزول بقول ليهم حق اصفقوا لانهم ايدهم ما في النار والمثل بقول الجمره بتحرق الواطيها ديل لا بتنقلوا بمواصلات لابدفعوا حق بنزين من جيوبهم وحتي سكرهم بالشواويل غير كدي ارتفاع الاسعار في مصلحتهم هم لان كل واحد في هؤلاء النواب لديه مخازن سكر ودقيق و طلبات بنزين

  18. لك الله يا شعب السودان،
    لك الله يا محمد احمد،
    كانت عندنا حربا مستعرة و دفع اهل الشمال فاتورتها،
    ثم جاء السلام و كانت فاتورته اكبر و ايضا دفعه اهل الشمال،
    ثم هاهو الانفصال آت و ستكون فواتيره اكبر و اكبر و عواقبه اخطر و اخطر و سوف يدفعه الشمال ايضا.

    1. ربنا يكون فى العون يا عمرابى ويجيب العواقب سليمة .. مستقبل من غير ملامح

  19. يااخوانا بيضو النية ، برلمان الشعب الفضل دا متابع كل حاجة و الصفقة دي اصلا للشعب الفضل دا لصبرو و تضحيتو من اجل نوابو فهي حقيقة احسب انها صفقة تشجيع للشعب الجاكي اكثر من 20 سنة في ماراثون ليس فيه نقطة نهاية…ياخ لو ما صفقة نوابنا الاماجد كان نفسنا انقطع…

  20. علي بالطلاق دي ما حصلت في تاريخ العالم
    وقالوا هللوا وكبروا ورفعوا العصى والماعندو عصاية رفع الاصبع اليمين فوووووق ومعاها لفيت يمين وشمال وبسمة وقهقهات انتصار بالاغلبية الساحقة
    هههههههههههه (صفقه هوووووووي النقده)
    نواب الجزائر في يوم واحد رفضوا الزيادات ولغوها …….
    ده بيثبت يا جبرا انهم نواب جايين بالتزوير وانو ما عندهم ناس انتخبوهم ….ديل نواب الخج
    دي حقو يسجلوها في جنيس للاشياء الما عاديه
    الجماعه يكونوا مبسوطين لافقار الشعب ومؤمنين علي جوع كلبك اقصد شعبك يتبعك

  21. والله يا أبكرون ياخوى فعلن الإختشوا ماتو ولو كانو عرفو إنو ناس جينيس قاعدين يدو الناس ملايين لمن يسجلو رقم قياسى كانو هسه جرى .. !!

  22. الحبان رجعنا ليكم في اخر يوم علي السودان القديم بعد كملنا نص دينا وادينا النص لي نا المجلس الوطني انتو تعالو الناس ديل مش كانو منعو التصفيق وقالو دا عمل شيطانى والناس مفروض تكبر وتهلل الجديد شنو بعدين يا بروف والله الحكاية تستاهل صفقة لانو دي رجالة عديل كدا والماعجبو يرحل الجنوب
    بعدين الليلة لاقاني بوست في سودانيز اون لاين بقول الجماعة قاعدين يشتروا كروت الجماعة عشان ما يتم النصاب

  23. الجزائريين لليوم الرابع شغالين طقيع بالحجاره ووليع نيران وجماعتنا نايمين تحت البطاطين والله بعد ده الا نستورد جزائريين يحتجوا لينا علي مصيبتينا الغلاء والانفصال وانتفاضة الكرامه نحن احق بها لان كرامتنا قد تمرقت في الوحل

  24. ده السودان ياهو ده السودان والله فعلا لاتحدث مثل هذه الاشياء الا فى هذا البلد الذى اصبح عجيبا فى عهد هذه الانقاذ تخيل يا استاذ جبره انو نواب تشريعى شمال كردفانلا الاشاوس اضربوا لماذا ليس
    لان البلد عطشانه شتا ولا للغلاء الطاحن بل لانهم لم يصرفوا بدلاتهم وهذه من تلك وما حدش احسن من حد

  25. كوكو الحبيب..سلام..
    السلاوى بعافية شوية وبيعمل كشف دورى وكدة ! امكن يرجع الملاعب تانى..اما د.يلسر فدا خبرو الاكيد عند البروف…
    النقدة يا اخوانا….

  26. الغريب في الامر انو حكومتنا قاعد تطلق في الوعود للشعب السوداني الفضل بتحقيق الرخاء و النمو و الازدهار كانو الحكومة دي ليها يا دووووب 3 شهور مش 22 سنة علما بان الفترة دي ليست كفيلة بانقاذ السودان فحسب بل كفيلة بانقاذ العلم باسره علما بان سيدنا الرسول صلى الله عليه و سلم انقذ البشرية من الظلمات الى النور و غير رمجرى التاريخ في 23 سنة فقط لا غير ،،، طيب قولي لي ده نبي و مرسل و مؤيد بمعجزات من السماء ،، نقول ليكم كلام سليم،،، طيب سيدنا عمر بن عبد العزيز رضي الله عنه لما اقام دولة العدل و رد المظالم و نشر السلام و الرخاء و الازدهار في اعظم دولة في زمانها و كل ده في سنتين و 5 شهور.
    برضو تقولو رخاء بعد الانفصال،،،،،،

  27. أين عمر من عمر ……. بتاعنا قال لي ناس الجزيرة بعد الانفصال حنطبق الشريعة جد جد و حنقطع من خلاف وحنجلد حديا وتعزيرا وشنو ما عارفوا….
    يا ريت يثبت على كلاموا وراضين وجاهزين للشريعة… ما عندنا حاجة خايفين عليها… فهل يا ترى ستطبق على (الأحسبون) والا حتستمر (اذا سرق الضعيف أقاموا عليه الحد…..)….

  28. البروف : والله الصفقه دى الا يكون وراها ( صفقه ) !!! تعرف اشهر صفقه هى حقت الاستاذه هاجر كباشى ( الصفه وين ما سامعه ايوااا ) …
    دمعه حرى :
    حين طقطق الكمسارى طالبا فى الحين اكثر
    التفت الى نوابى فوجدت الصفقه اكبر
    وسريعا ما لبثت ان نقدت الزول اكثر
    ونزلت من الركوبه هاتفا الله اكبر ….

  29. أكيد نظام اذا سرق الضعيف.
    يا أخ عزت هم لو عايزين يطبقو شرع الله جد جد فليطبقوه عمليا و علميا و في صمت بدون شعارات و هتافات ح نعمل و ح نسوي و ووووو.

    (أقيموا دولة الاسلام في صدوركم تقم في أرضكم)

  30. البركة فى موضوع الصفقة الجابكم مارقين كلكم والله دايرين ليكم صفقة حااااارة وقبلكم البروف.كنتو وين ياناس….. وبالله الرد بى شفافية
    إنتو متذكرين لعبة القرد الزمااان ….العندو صاجات وبشتغل بى ملاى الشفع يشلعو الصاجات فى يومين ويفضل القرد سليم رافع و مجهز يدينو بس تملاهو يقوم يصفق…ّّّّ!!!!القصة دى بتشبه ليكم اى قصة؟

  31. والله أنتوا البالغتوا يا جماعة، أنتو يا ناس ماعارفين الحاصل ولا شنو؟؟ المفروض الناس دي تزغردت عدييييل كدة، أيواااا زغاريد مش تصفيق وبس، لأن الحاصل يا جماعة هو عبارة عن مساومة ، فقد تقدم النواب بمقترح لزيادة المخصصات والذي منو، فرفضت الحكومة تلك الزيادات في مخصصاتهم، وتذمر النواب، وألتفت ألمعي الحكومة وعقلها المدبر لهذه الفرصة الذهبية التي جاءتهم تمشي علي قدم وساق لحدت عندهم وفكر وقرر مساومة النوام بالموافقة علي رغباتهم شريطة تمرير النوام لمقترحات الزيادات، وطبعا” وافقت الحكومة علي زيادة المخصصات بعد أن نالت مبتغاها بالزيادات بواسطة نوام الشعب، وكانت تلك التصفيقات الحادة فرحا” بما سيأتيهم من الزيادة في المخصصات لأنفسهم، وليأخذ الشعب الفضيل ( صفعة علي خده)، وتأخذ الحكومة صفقة مدفوعة الأجر كما كان يفعل نيرون، ولكم أنتم زغروووووووودة طويلــــــــــــــــــــــــــــــــــــــــــــــــــــة.

  32. مرة صاحبي قال لي سمعت حاجة مضحكة عن حال الشعب السوداني (أشك انو مصدرها حيكون واحد من كتابات أستاذ الفاتح) قال لي لو الحكومة قررت تجلد الشعب السوداني كلو صباح كل يوم حيكون ردة فعل الشعب السوداني انو المواطن في امدرمان ولا الخرطوم حيقوم يقول لي اخوة : حقو نمشي بحري لانو الجلد هناك بكون بارد شوية!!!
    صفقة للحكومة وهي تعرف كيف تمنع الشعب من التفكير في تحرك ضدها وذلك بتجويعة وقهرة وشغلة بالهث وراء لقمة العيش وكلما اقترب منها القت بها في واديٍ اعمق لينحدر الشعب الى هاوية لارجوع منها !!!

  33. وقالوا لسه في زيادات وتقشفات أمر …بس تمر الزيادات دي …..
    والي الخرطوم يقول هناك 4000 وظيفة جاهزة للزراعيين ويتساءل هل سنجد هذا العدد (شفتوا الناس دي بترمي في الصاجات كيييييف ههههههههههه)
    في غير هذا المكان من القمردينة القديمة سبق ان حييت شباب انتفاضة اكتوبر 64 (وهم شيوخ الآن اعمارهم 60 سنة فاعلي)…وحييت شباب انتفاضة ابريل 85 وهم في اعمار 40 فاعلي…….يارب حيجي يوم من يحيي شباب هذا الجيل …؟؟؟؟؟؟؟؟
    مش ليهم حق النواب يصفقوا يا جبرا ……!

  34. السلام عليكم ، البرف اهى نورا ظهرت حبابه عشره ، اخونا السلاوى لا باس عليك ، كفارة اللمم ، عليك بى آيات الشفاء ، د/ ياسر اظنو لى عن حسى ما سمع بالعوده الطوعيه ، و زى ماقالت الاخت نورا سمحه الصفقه المرقتكم كلكم …………عجبى

  35. ابكرون:
    شكرا للتحية الاولي …وعقبال اولاد الثالثة…
    الشعب السوداني الفضل يلا صفقو كلكم ..تحياتي لعركي

  36. عارفين النواب ديل عايشين في دنيا تانية غير دنيتنا دي ،،،، نائبة من اللي بيتعينوا نظام ترضية ،،، قالت ان الطائفة اللي بتنتمي لها غير محتاجة لبطاقات التأمين الصحي المجانية ،،، في الوقت اللي انا باعرف ان فيهم اسر عايشة علي 300 ج تعطي لها معونة ،،،، كل يوم اقعد احسب ياربي دي بتكفيهم كيف ؟؟؟ وديل عايشين كيف ؟؟؟؟؟ ودي جاية حتي المساعدة اللي اتكرمت بها الدولة قالت ما محتاجينها . ربنا يرحمنا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: