جينيس والرغيف

كلنا يعلم أن الأسعار تزيد من وقت لآخر.. ولكن ما هى نسبة الزيادة فى السلع الأساسية التى حدثت منذ مقولة أخونا (يوسف عبدالفتاح) تلك عن تصاعد سعر الدولار وحتى هذه اللحظة؟ .. كلنا بالطبع يجد صعوبة فى ذلك ما بعدها صعوبة بعد أن مر جنيهنا (الغلبان ) بتغييرات ما  أنزل الله بها من سلطان ولكن هنالك من أهل العلم من يستطيع (تضريب) المسألة وفك طلاسمها والوصول إلى نسبة النتيجة فها هو بلدياتنا الخبير الإقتصادى الدكتور أحمد شريف عثمان يورد لنا نسبة تلك الزيادات فى مقال له نشر بعدد الإثنين فى الزميلة الصحافة حيث جاء فى مقاله الآتى :

 ٭ حتى «3» نوفمبر 1989م وبعد أربعة شهور من ظهور الانقاذ كان سعر جالون البنزين العادي «4.5» بالقديم واليوم أصبح ثمانية آلاف وخمسمائة جنيه بنسبة زيادة حوالي «20.000%» عشرين ألف جنيه في المائة.! وهذا معناه إن جالون البنزين خلال هذه الفترة زاد مائتي مرة ضعف سعره.! ٭ جالون الجازولين حتى «3» نوفمبر 1989م كان سعره «2» اثنين جنيه بالقديم واليوم اصبح «6.500» ستة آلاف وخمسمائة جنيه بنسبة زيادة «37.500%» سبعة وثلاثون ألف وخمسمائة في المائة.! وهذه معناه إن جالون البنزين زاد ثلثمائة وخمسة وسبعون مرة ضعف سعره.! ٭ أما رطل السكر فقد كان سعره حتى «3» نوفمبر 1989م «125» مائة وخمسة وعشرون قرشاً «جنيه وربع بالقديم» واليوم احسب أن سعره بالتكلفة الرسمية في حدود «1650» ألف وستمائة وخمسون جنيه بنسبة زيادة حوالي «% 150.000 » مائة وخمسون ألف في المائة وهذا معناه إن رطل السكر سعره زاد خلال هذه الفترة «1500» ألف وخمسمائة مرة ضعف سعره.! ٭ أما الخبز فَأمره عجيب جداً حيث كان حتى «3» نوفمبر 1989م سعر الرغيفة زنة «140» جرام «14» قرشاً بالقديم وبالتالي فإن سعر جرام الخبز كان واحد مليم.! واليوم السعر الرسمي للخبز أربعة قطع زنة «70» جرام بألف جنيه بالقديم وهذا معناه إن جرام الخبز أصبح سعره اذا ما صدق الوزن حوالي «40» جنيهاً بالقديم وهذا معناه إن جرام الخبز قفز سعره من واحد مليم الى «40.000 اربعين ألف مليم بنسبة زيادة «4.000.000%» اربعة مليون في المائة وهذا معناه ان جرام الخبز خلال هذه الفترة زاد «40.000» أربعين ألف مرة ضعف سعره.!

 ما أن إنتهت من قراءة هذه الفقرة التى وردت فى مقال الدكتور أحمد شريف حتى صرت أصيح بصوت عال جينيس .. جينيس .. مما جعل حرمنا المصون تتجه نحوى قائلة فى لهجة ممزوجة بالخوف والإشفاق :

– وحات الله أنا عارفة الملاريا دى ما خلتك براك !

– جينيس .. جينيس – أجيب ليك كباية ليمون

– ليمون شنو يا ولية .. إنتى عارفة الليمون أقصد (الرغيف) مما جات الإنقاذ زاد كم مرة؟

– يعنى شنو ما بيكون زى ألف مرة كده ! (المدام شايفاها كتيرة يعنى) !

– ألف شنو يا وليه ؟ الرغيف زاد أربعين ألف مرة !! زاد يعنى فورتى ثاوساند تايمز !

 – جابت ليها إنجليزى ؟ والله أكيد الملاريا دى ما خلتك براك !

– ملاريت شنو يا ولية .. ده حساب .. الأرقام دى الشئ الوحيد الما فيهو (دغمسة)

– إنتا أكيد غلطان فى سلعة بتزيد ليها فى عشرين سنة أربعين ألف مرة ؟

– ما هو عشان كده لازم نودى الرقم ده عشان نسجلو فى موسوعة جينيس للأرقام القياسية ونودى معاهو الصورة !

– صورة الرغيفة؟ –

رغيفة شنو يا غبيانة .. صورة النواب وهم قاعدين يصفقو

كسرة :

إذا رأيت نيوب الليث بارزة فلا تظنن أن الليث يبتسم .. ممكن برااحة يكون بيكلم فى روحو .. الأيام دى مش الاسد .. (الجن الأحمر زاتو) يكون قاعد يكلم فى روحو !!

44 تعليق

  1. السلام عليكم يا استاذ،
    انا اعتقد انو الاشياء العندنا و مفترض تدخل موسوعة جينيس هي كمان في عددها محتاجة تدخل موسوعة جينيس.

    1. حلوة يا عمرابى .. والله هى كتيرة جنس كترة !!

  2. السلام عليكم ، البرف و الاخوان / ت ، ان شاء الله الدبرسه تكون راحت ، وكله بامر الله ، لكن الحساب على الكان السبب فى ده كله ……..عجبى

    1. والله يا كوكو الدبرسة دى ما بتروح بى أخوى وأخوك غايتو بس ربنا يكون فى العون ويجيب العواقب سليمة

  3. السلام عليكم ، البرف ، د/ احمد ما كلمنا عن الجنيه ام الحساب ، بقى قدر كيف ، والايام دى طالعين فى النانو-تكنولوجى ، على بال……… نانو دى من نونو دوا السقط ………….عجبى

  4. غايتو يا بروف انتو الانقاذ دي مكجننها ساكت…
    لقد ساهمت مساهمة فعالة في الحفاظ على الثروة الحيوانية….
    شوف أنا ماهيتي زمان كانت بتجيب ليها ستة سبعة خرفان… ما عندنا شغلة كان الولد نجح ساكت نضبح….. شوف التطور الخروف الليلة بجيب ليهو كم ماهية…!!

    1. يا دكتور الظاهر إنتا دقستا ياخى الناس ديل غير الضبيحة وشية الجمر ما عندهم حاجة ههههههههههههه

  5. تصدقي يا استاذنا انك خوفتني زيادة وانا اصلا لي يومين دايرة اموت من الرعب … معقولة يجي يوم يغلبنا ناكل فيه عيش حاف
    😉

    1. إذ الأمور إستمرت على هذا المنوال يا رشا ح يجى يوم الواحد يستلف على ماهيتو عشان يشترى ليهو رغيفة

  6. الاخوان الدانقوست صباحكم زين…غايتو انا ما عارف لكن التوانسة اختصروا المسالة …بالله صفقو ليهم في سركم اوع يسمعوكم النواب يصفقوا معاكم…

    1. الشعب ده يا نيام ياخوى (مكتوب) ! عاملين ليهو عمل !!

  7. البرروف العزير وجميع الاحباب

    هى الزياده قلنا خلاص قبلنا بيهاااا كسر رقبه بس المشكله الرقيفه زاتا بقت زى حبت الفنسدار
    الواحد كان بياكل ليهو فى اليوم زى 4عشات دى كمان مع الونسه هس البيت كلو بكون بشارك فى الاربعه عيشات دى ؟؟؟؟؟ بس برافواااا ياناس الحيكومه طبقوا الحديث الشريف ماملاء ابن ادم وعاااءً شراً من بطنه بحسب ابن ادم لقيمااااااااااااات يقمن صلبه..

    1. ما تنسى يا أبوفيصل وإنتا ماشى الفرن تشيل معاك المايكروسكوب !

  8. زار الرئيس المؤتمن
    بعض ولايات الوطن
    وحين زارنا
    قال لنا :
    هاتوا شكاواكم بصدق في العلن
    ولا تخافوا أحداً …. فقد مضى ذاك الزمن
    فقال صاحبي حسن:
    يا سيدي:أين الرغيف واللبن ؟وأين تأمين السكن ؟
    وأين توفير المهن ؟
    وأبن من يوفر الدواء للفقير دونما ثمن ؟
    يا سيدي
    لم نر من ذلك شيئاً أبداً .
    قال الرئيس في حزن :
    أحرق ربي جسدي.أكل هذا حاصلٌ في بلدي ؟!!
    شكراً على صدقك في تنبيهنا يا ولدي
    سوف ترى الخير غداً
    وبعد عام زارنا .
    ومرة ثانية قال لنا :
    هاتوا شكاواكم بصدقٍ في العلن .
    ولا تخافوا أحداً
    فقد مضى ذاك الزمن .
    لم يشتك الناس !
    فقمت معلناً : أين الرغيف واللبن ؟وأين تأمين السكن ؟
    وأين توفير المهن ؟
    وأين من:يوفر الدواء للفقير دونما ثمن ؟
    معذرةً يا سيدي
    وأين صاحبي حسن ؟ !

    من اشعار الاستاذ / أحمد مطر

  9. إزيكم ياناس..
    إنتو بتتكلمو عن الرغيفة ياتا البتكمل قبل الزول مايبداها دى والله حلاوة قطن بس !!!!!لكن وإنت بتاكل كان قلبك حدثك وأتذكرت جبت عيش بى كم والله حلاوة القطن دى بس تبقى ليك سد حنك!!!!! وقال شنو 3 اوزان وهن كلهن 3 قرمات!!!!
    هسى الزول كان جا يصالح زول مشاكلو يقول ليهو ياخى نحن بيناتنا عيش وملح ولا يحدد كم عيشة؟؟؟؟

  10. سلام البروف والاصدقاء
    ات يا بروف زولك دا ما نط للرغيف وخلي الجنيه المسكين ذاتو
    انا ما زول رياضيات لكن الدولار كان بيساوي 12 جنيه هس الدولار بيساوي 3600 جنيه هل دا معناهو 4230000 % ولا انا صاقط حساب
    انتو المواهي سنة السواد ديك كانت كم ؟

  11. تحياتى
    اوعك تدقسى كان مشاكلا ليك زول يااختى يانورا ودايره تصالحى تقولى ليهو عازمااك عشان يكون بينا عيش وملح ياااااادوب الطار منك طيرت الاخوه الجنوبييين من السوداااااان ؟؟؟ انا بقترح تقولى ليهو بملى ليك تنك البنزين او الشهر دا بدفع ليك فاتوره الكهرباء يعنى حااااجه تكون ملموسه ومحسووووووسه

  12. سلام ياقبيلة،،
    صديقي البروف جبرا، بلدياتك الدكتور الأقتصادي كان قال بسم الله وخت الرحمن في قلبو حساباتو دي كووولها بتطير وبتتغير وتبقي غير هاتيك الحسابات الحاسبة لينا بمزاجه وحسب هواه….
    الجنيه الهسع ده بيساوي الجنيه القديم الحجل بالرجل وسيبك من حكاية الآلاف الشايتين فيها شمال دي، الأصفار دي الناس ما أسقطوها ليكم، والمواهي الهسي دي بتساوي الزمان لو ما هسي أكتر كمان،،،،
    دورار 89 كان بيساوي حوالي 3-4 جنيه، ودولار هسع بيساوي نفس النسبة وكمان حا ينقص شوية لحدت نهاية الفترة الأنتقالية باذن الله كما بقي جنيه بي دولارين ومعاه واحد يورو هوادة، بس طولوا بالكم شوية وركزوا معاي شوية في النص الملان وساقط ده، وأنسوا نص الكوب الفاضي ده!!!!!

  13. الله يديك الصحة والعافية ايها الصامد
    وربنا ماشقا حنكا ضيعو
    والشغلة قربت
    ياسر ابوسبيب

  14. ود الخلا … إنتا غواااااااااااااااااااااااصة .. ده كلام شنوووووووووو؟

  15. يا جماعه و الله القصه المحزنه أنو كميه طلب الفول تبقى بسيطه خلاص عشان لزوم وزنه اللقمات وهذه تعرف بنظريه ( العضه الأضطراريه) و دى معناها لازم توزن عدد لقماتك على حجم الرغيفه مع كميه الفول . غايتو بينى و بينكم لو الحكايه دى ماشه بالطريقه دى تانى حنسمع لينا واحده بتكورك لولدها : يا ولد هوى تعال شيل الفنجان ده جيب لينا طلب فول( أكيد الرغيفه ممكن تشيلها فى جيب الساعه)

  16. تحياتي للبروف والأخوان يا بروف عندي سؤال محيرني ما لاقي ليه حل قلت إمكن ألقي حله عندك.0.(حجم العيشه الصغير ده والوضع الإقتصادي المدهور ده بمرورالزمن ممكن يغيروا في عادات و تقاليد ولبس السودانيين) يعني الواحد مع إنشغاله مع المعيشه ينسي… يشتري عمه جديده بدل عمته الإتهردت(يبقي الزي الرسمي عراقي وسفنجه و تبقي العمه والمركوب من الكماليات …تاني مافي زول يقول لعابر سبيل(إتفضل وحرم )…

  17. احييك ود الخلا على نظرتك البعيدة وتحليلك – وخلى باقى الناس المتشائمة دى تعيد النظر مرة اخرى فى حساباتا.

  18. يا بروف :
    ود الخلا ده ما يتور نفسك ، الظاهر (هايسات وبكاسي الجماعة) ما بعد 2 صباحا بتمر عليه وتنزل ليه كرتونة النيدو وشوال السكر وكرتونة الاغراض المشكلة وشوال الدقيق …والظرف المسوكر
    طيب لو افترضنا جدلا ان جنيه 89 ياهو جنيه 2011 …جنيه 89 كان بجيب 7 رغيفات الواحده زي مخدة المسند….وكان بفطر 3 انفار وبوديك المطار تاكسي طلب من امدرمان كيف يكون زي جنيه اليوم ؟؟؟؟؟؟؟؟؟؟؟؟؟

  19. صباح الخير
    ود الخلا دا داير يتفقدوهو إمكن عندو حمى ولا حاجة …..مادايرين تجى لحظه نقول الخلا على ود الخلا قبل مانعرفو.

  20. يا أبكرون والله ما عارف الباشمهندس لو كان بتاع آداب كان قال شنو؟ قال شنو : جنيه 89 ياهو جنية الليلة زاااتو .. طيب الناس دى مالا متضايقى يا قبيلة ؟

  21. جبرا:
    ماتشوف فكي ابكرون و تعملو لينا انتي عمل لعمل الناس ديل وتكشحوه في النيل القصة دي طولت..
    نورا:
    الموضوع بسيط تقولي ليهو ياخي ما بتتذكر كان بينا عيش و ملح ايام العيش و الملح
    استرايكر:
    بختك و الله .. ياخ ممكن تديني فهامتك افتهم بيها و ارجعها ليك ثقة يعني

  22. بعدين يا هندسة الفلم كلو في الثلاث اصفار الشالوها دي ممكن تشيلا حسابيا عشان الألف = واحد لكن عمليا ثلاث اصفار تعني الكثير المثير الخطر في علم التضخم والنسب والتناسب والهندسة أعلم وكذلك حمدي أعلم ….
    بعدين هو بالله الكاس فيه نص مليااااان وكمان ساااااقط (باااارد)…….(خجيناه ) وقلبناه ما فيه ايتها مويه البتة. بس كاس دوري…….!

  23. اسي يابروف لو الانقاذ دي ماجات كان الرغيف زاد مليون مرة عديل وزي ماقال ود الخلا قال ليك الجنية الجديد بيساوي القديم (القديم في يوم ما كان بيساوي 2 دولار) بس انتو ختو الرحمن في قلبكم جنيهنا دة طواااااااالي حيبقى 2 دولار ولو ما الانقاذ كان قرنق جانا جوة الخرطوم عديييييييل اسي الحمدلله تراهو فصلنا ليهو (نص) البلد بس ومرتب هسي اكتر من زمان لانو زمان كان زول واحد شغال في البيت بيشتري قطعة ارض وبيبنيها (وبقري) اولادو ويعالجهم من مرتب الحكومة اسي انتو ختو الرحمن في قلبكم علي بالطلاق تبنو قصور عدييييييييييييل كدة ولا شنو يا ود الخلا؟

  24. يادغمسة كدي في الأول قول لينا أنت دغمسة بالدال، ولا جغمسة بالجيم ، لأنو دي لي دي تفرق، وأنت عارف أنو ناسنا ديل مابيجغمو بس ديل بيقرطعوا عديييل وكدة!!
    فأنت ياتو فيهم بتجغم ولا بتقرطع ولا بتدغمس؟؟؟؟

  25. البروف جبرا..سلام..
    امانة الخبير الاقتصادى دا ما اتلوم ! كان يخلينا على عمانا وما يورينا الورم والتضخم دا حدو وين..
    الله يجازى الكان السبب..

  26. بعدين ود الخلا دا غواصة اللية لا ولا غواصة امبارح !؟؟
    بس كدى انتو اول عاينو معاه وفى النص المليان دا..
    غايتو انا ما بعاين ولا شئ,,مضرب..

  27. ود الخلا نان نقعد نعاين في نصك الملان دا لا متين؟ تاني واحد وعشرين سنه؟
    أصلو الأمازوني دا عمرو كولو كم ، لامن يقضيها معاينا في كوزك دا واحد وعشرين سنه؟

    يا عمي غني غير دا الأمازوني مش حمار.
    قال الغلط مش في القانون و لا من الشرطه ولا من القاضي ، الغلط من البت قالو ليها أقعدي في الواطه أبت تقعد ! !

  28. بالله يا سنكل القصة إنو البت قالو ليها أقعدى ما قعدت كويس .. والله ختيناها فى قدو قدو المسكين ساااااكت

  29. بالله شفت يا جبرا إنت كنت خاتيها في المسكين دا كيف ؟ والغريبه أنا برضي صدقتك ! ! حسي نودي وشنا منو وين ما عارف؟ كولو منك يا جبرا . . أنا غايتو عندي نية عمره ، حأدعي ليك كان الله يسامحك.

  30. في مرة من المرات واحد من ناس المنظمات الأروبية جا السودان و قعد يسأل في الموظفين
    رواتبكم كم,زايد البدلات و الحوافز….الخ . وبعد ما لقا الأرقام غريبة بالنسبة لأسعار المواد الأساسية سألهم:
    و بتموا باقي الشهر كيف؟
    الكل رد وقال الله كريم
    قام كتب في التقرير :
    يوجد نقص عام في قيم البرتبات لغير المسؤولين,و لكن العجز يعالج ببند (الله كريم)

  31. بشار أحمد بشار(إبن برد) | رد

    ياجماعة استميحكم عذرا أنا ما (قع) أعلق لأني خايف ع العملية وبالطريقة دي وأكان الموضوع فيهو في البحر (غواسات) وفي الجو (طيارات) وفي البر (دبابات) بنفارق القمردينة دي فراق الطريفي لجمله وأعذرونا يا بروف عشان (الكركاره) وكده.

  32. بشار : ههههههههه لا ما بنعفيك غواصة ود الخلا دي من الليله ولا امس زي ما قال (شنباتي) دي غواصة في حالة (تكهف) وانت تعلم يا( بن بحر) اقصد بن برد ان سرعة تكهف الغواصة تتغير مع (العمق)- cavitation changing with depth – والعمق هنا الحالة ….عشان كده صديقنا ود الخلا لمن يقترب من السطح بطلع (الاسنوركل) بتاعوللسطح ، منها شوف ومنها جس (بنط)…ومنها سحب اوكسجين عشان غواصتو تقليديه بتعمل بالديزل …..!
    بشار تاني : انت الطريفي فارق جملو ولا بعيرو …؟

  33. صباحات النورررررررر

    والله عجبنا للاخوه التونسيييييييييييين وبعدم الجزائرييييييين وبعدم ………….
    وانشاءالله الباقين يتعظواااااااااا
    قالوا اخووووك كان حلقوااااااااااا ليهو بل راااااسك

  34. يحكي أحد المعلمين أن مرتبه الأول كان 16 جنيها وعدة قروش وأنه في أحد المرات اشترى بكل مرتبه ذهبا وأنه باع ذلك الذهب أيام الآنقاذ بمليونين ونصف!!! لذلك لا تقيسوا بالدولار واليورو ولا حتى الذهب بل يجب أن نقيس بما كان يفعله المرتب… فهذا الأستاذ كان يصرف على أمه وأبوه وأخوانه ويساهم في كل الأعراس والمآتم والرحلات وغير ذلك …. ولم يكن في همه الأكل والشرب أبدا…. والآن الشاطر يكفي خيرو شرو …. أما الصرف على الوالدين والأخوة وغيرهم فشيء غير موجود في القواميس منذ أن جاءت الانقاذ … ونحن نهرب من الأعراس بإدعاء المرض ونصبح كل صباح ونحن ندعو الله ألا يكون هناك من مات من الحلة والمعارف حتى لا يفضح حالنا بموته…. وبالنسبة للوجبات فأنا اعتقد أن الحالة السودانية في حاجة إلى دراسة إذ يبدو أن الشمس الملتهبة مع حرارة الانقاذ طورت الخلايا الملونة لجلد السودانيين إلى نوع خاص من الكلوروفيل يقومون بواسطته بالبناء الضوئي … وإلا فكيف نفسر أن بعض الناس يعيش شهورا فقط على ريحة الطعام؟
    … للذين يحلمون بما حصل في تونس …. نحنا ممكن نعمل زي بن علي … نخلي البلد للبشير ونهرب لو وجدنا من يقبلنا…. ولكن هل البشير وزمرته يخلونا ام يطالبون بعودتنا لنحاكم على الجوع والفقر والمرض؟
    نحن السودانيون كنا مفجري الانتفاضات وملهمو الشعوب … ولكن هل الموجودون في السودان الآن هم نحن؟ ,,,, أنظر حولك وقل…. الله يجازي الت…

    1. للذين يحلمون بما حصل في تونس …. نحنا ممكن نعمل زي بن علي … نخلي البلد للبشير ونهرب لو وجدنا من يقبلنا…. ولكن هل البشير وزمرته يخلونا ام يطالبون بعودتنا لنحاكم على الجوع والفقر والمرض؟
      و الهرب انت ما شايف النبز في النت

      1. والله يا سيد أحمد الشعب لازم يتحاكم !

  35. الله يجاااااااااااااااااااااااااااازيك يال ترا…………….

  36. ياود الخلاء
    الجغمي و القرطعة والدغمسة مافرقت حاجة كلها في (جغمسة)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: