الآن فهمتا

 

ما أن دخل السيد (رئيس المحلية) إلى مكتبه مترجلاً عن عربته الفارهة حتى دخل إلى مكتبه وأمسك بالتلفون مخاطباً سكرتاريته :

–        أعمل ليا إجتماع سريع مع قسم الجبايات بالمحلية

لم تمض إلا ساعة واحدة حتى أكتظت قاعة الإجتماعات الرئيسة بأشكال وأنواع من مسئولى المحلية لشئون الجبايات .

–        بسم الله الرحمن الرحيم وبه نستعين والصلاة والسلام على أفضل المرسلين سيدنا محمد وعلى آله وصحبه وسلم تسليماً كثيراً .. يا جماعة إنتو عارفين إنو المنصرفات بتاعت المحلية دى كتيره .. شئ بنزين وشئ جزولين للعربات الراكبنها دى وشئ فواتير موبايلات وشئ أثاثات وشئ ما بعرف شنو .. والأيرادات بقت ما بتكفى الحاجات دى عشان كده أنا بجتمع بيكم هسه عشان نشوف لينا طريقه بتاعت إيرادات جديدة !

–        زى شنو سعادتك؟

–        يعنى ح يكون زى شنو؟ الناس دى والله مافى جباية تخطر على بال إلا عملناها ليهم والله يا سعادتك نحنا قمنا  بابتكار كل الجبايات الممكنة …

–        قمتو بي إيه؟ هم ديل يا دوبك 7678 جباية!

–        سعادتك والله أنحْنَ ابتكرنا للناس ديل جنس جبايات ما أنزل الله بها من سلطان. شي دمغة غريق؛ وشي رسوم إقامة صيوان عزاء؛ وشي رسوم عدم إقامة حفل؛ وشي رسوم لافتة محل؛ وشي رسوم قدوم؛ وشي رسوم مغادرة؛  وشي رسوم نفايات؛ وشي رسوم هنايات؛ وشيي …

–        (يلتفت كمن يبحث عن شخص) : إنتو دكتور عبدالمنتقم ما جا الإجتماع ده !

–        (شخص يرفع يده فى الصفوص الخلفية) : والله سعادتك أنا جيت لكن قدر ما نحتا مخى ما قدرتا أيّ جباية أفكّر نعملها، ألاقى إننا عملناها!!

–        (في حدّة) : ده هسه كلام زول عندو دكتوراة فى (الجباية) ؟ أنا أصلو ما ممكن أقتنع إنّو زول عالم زيك كدا مَعِينو يكون نِضِب وبنات أفكارو طَفَشو، وما قادر يبتكر لينا ولا جباية وآحدة جديدة !

–        والله سعادتك أنا الفينى كملت .. عشرين سنة وأنا قاعد أفكر ليكم .. !

–        يا دكتور إنتا عاوز تتخلى عن مسئوليتك فى الظرف الحرج البتمر بيهو المحليه ده ! يا دكتور خزنة المحلية فاضية وما فيها ولا حتى ستمية مليون !

–        خلاص يا سعادتك أدينى بس يوم الليلة ده وبكرة بإذن الله أكون لقيت ليا حاجة !

–        خلاص يا جماعة أنحن نفض الإجتماع ده ونأجلو لحدت بكرة عشان نشوف دكتور عبدالمنتقم ح يبتكر لينا شنو؟

 

 في الاجتماع :

–        (رئيس المحلية) : بسم الله الرحمن الرحيم! “وقل اعملوا فسيرى الله عملكم ورسولُه والمؤمنون” (صدق الله العظيم) . (يلتفت إلى دكتور عبدالمنتقم قائلاً ) : أها يا دكتور إن شاء الله لقيت لينا حل !

–        الحل فى ستات الشاى !

–        (الجميع فى دهشة) : ستات الشااااى؟

–        أيوه ستات الشاى .. شوفو البلد دى فيها كم ست شاى؟ على باليمين الستات الفى سوق ليبيا ديل براهم يفكوا ليكم زنقتكم دى !

–        (ريئيس المحلية) : دى فكرة جهنمية لكن نشيل منهن القروش دى كيف ؟

–        دى عاوزة ليها كيف ؟ مال عبدالمنتقم بيعمل فى شنو؟

–        ممكن تشرح لينا شوية؟

–        نحنا (النسوان) ديل بدل ما يتبهدلن ويجن شايلات عدتهن .. بنابر ومناقد وكوانين وكبابى وكفتيرات نحنا نوفرا ليهن !

–        (بصوت واحد) : نوفرا ليهن ؟ إنتا يا دكتور ما نصيح؟

–        أيوا نوفرا ليهن .. بس نشيل منهن إيجار !!

–        (بصوت واحد) : الله لا كسبك يا عبدالمنتقم .. طيب ما فد مرة نبيع ليهم الفحم والشاى واللبن والنعناع والقرفة !

–        لا لا ما ينفع كده .. هو أنحنا فاضيين عشان نبيع حاجات زى دى ؟ نحنا عندنا مسئوليات وطنية  جسام ! وعشان كده ح نبدأ بتأجير البنابر فى المرحلة دى وبعدين نشوف قصة الكفتيرات والكبابى والملاعق كمرحلة ثانية

–        لكن نجيب ليهم موظفين يتابعوا الموضوع ده كيف؟

–        موظفين شنو؟ نحنا نطرح الموضوع ده فى عطاء .. نمسك قروشنا والزول البيقع ليهو العطاء يقوم بالقصة دى !

بالفعل ما أن إنتهى الإجتماع حتى قامت المحلية بتنفيذ القرار حيث طرحت (عطاء تأجير بنابر وكراسى ستات الشاى) حيث فاز به بعد أقل من ثلاثة دقائق من طرحه (تمساح الدميرة) المليونير الشهير الذى بدأ حياته العملية كبائع للشاى بسوق الملجة .

كان القرار واضحاً بعدم إحضار اى بنابر أو كراسى بواسطة (ستات الشاى) وإلا تعرضت للمصادرة وقد حدث ذلك عدة مرات ، حتى لا يتأثر إيرادهن الضعيف أساساً فقد بدأت بعض النسوة فى تخفيض عدد الكراسى والبنابر المستخدمة ، كمات لم تسمح الحالة المادية لبعضهن بذلك فآثرن عدم التأجير وأصبح زبائنهن يقومون بشرب الشاى (وقافى) ومن هؤلاء النسوة (عوضية أم العيال) والتى بعد أن لاحظت أن زبائنها يقل عددهم شيئاً فشيئا بسبب عدم وجود كراسى أو بنابر قامت بوضع بعض (الحجار الكبيرة) ليجلس عليها الزبائن  لتفاجأ بعربة بوكس تقف أمامها ينزل منها بعض الأشخاص :

–        واحد حجر.. إتنين حجر .. ستة .. عشرة .. طيب عشره فى خمسمية .. معانا الواحد .. سته ألف وأربعمية وعشرين !

 

كسرة :

 موضوع هذا السيناريو حقيقى .. نرفعه للمسئولين .. للتنوير وإتخاذ اللازم لرفع هذا الظلم المبين .. عشان الواحد بعدين لمن تحصل (ثورة بنابر) ويقع الفاس فى الرأس ما يتفاجأ و يجى يقول (الآن فهمتا) !!

 

15 تعليق

  1. معقولة بس يا استاذنا … بالجد بتبالغ

    1. يبالغ في شنو
      ما شفتا الدرداقات في السوق ولا شنو

  2. السلام عليكم ، البرف ، الاخوان / ت ( عسى و لعل يظهروا ) ، كل سنه كانو ا اقصد ناس المحليه بالورقه المكتوب عليها رخصه ، وسعرها عند الحكومه 10 جنيه فقط ، يقوم عامل الجبايه يكتب ليك بى ورا ارقام و لا حتى الخوارزمى ما يقدر يقراهم و يقول ليك الرخصه 2 مليون ، المهم تجابد لما يرجعها لى 500 جنيه و كده ، زى حكاية تخفيض الزكاه ، المهم السنه دى جاب ليه ورقه صفراء فاقع لونها تضر الناظرين ، لما سالناه ده شنو ؟ قال انا قلت ليكم ادفعوا شى ، المهم علقوا لينا دى فى محل ظاهر ، و الظاهر انو حيعملوا خطط عبد الجبار ………. عجبى

  3. بالله ده كلو يحصل يابروف ديلا ماشبعو من بترول وضرائب وجمارك حتي بتاعة الشاي المسكينه والله ظلمممممممممممممم الموتمر وطني بعد مصر الحزب الوطني وقوووو امين

  4. الأحباء الأعزاء .. ســــــــــــــــــــــلام
    هى لو بقت على ستات الشاى وإيجار البنابر ما هينه والله فى حاجات تفقع المرارة زى حكاية تأجير الدرداقات للأولاد فى السوق .. ربنا يمهل ولا يهمل

  5. الأستاذ البروف أبو ناجي
    الجمع الكريم
    كل التحايا وعظيم الأمنيات (بتغيير الحاصل) وتبديل الحاضر!!!
    كما قيل ( من غير الطبيعي أن يعيش الانسان طبيعيا في ظروف غير طبيعية), وها نحن نعيش في مسرح اللا معقول ! ! ! ولكن الى متى ؟؟؟؟
    كلي ثقة وايمان بأن ما من شدة الا سيأتي لها من بعد شدتها رخاء !!!!
    بس مع ناس عبدالمنتقم ديل بنحتاج لوقفة جادة ( والنار من مستصغر الشرر) اقترح القيام بتأسيس جماعة ( كلنا ستات شاي) على غرار (كلنا خالد سعيد)
    المصرية أو (هناية) على وزن( كفاية ) ! وعموما والحمدلله نحن في أمازونيا نحظى بالعديد من الظواهر والصور التي اذا ما أحصيناها سنخرج بالعديد من الافرازات و الاسقاطات التي ستقودنا لمليون مسمى وحركة (سلمية و عالمية) من أجل التغيير وسنحظى بدعم الجميع لا سيما والمنهج والتوجه العالمي بقول change we need
    سادتي الأحباء …..
    اذا ما كانت وسائل التواصل الاجتماعي عبر العنكبوتية منحى للتغييريفوق جحافل الجيوش وسطوة هولاكو والمغول فما أولى بالقمردينة
    ومرتاديها من تأدية الواجب المنشود بوعي وادراك ومسئولية.

    كسرة
    يا بروف انت ما داير تسمح بالموافقة على نشر تعليقاتي السابقة ليه !
    أنا ما من قناة الجزيرة ! أو انت عندك علاقة بوزير اعلام دولة عربية شقيقة!!!!!

    1. عزيزى دكتور X
      معليش على التأخر فى نشر التعليق وذلك لأسباب خارجة عن الإرادة .. مرحب بيك معانا بى جاى .. شكراً على المداخلة الظريفة

  6. البروووف والسمار سلامات .
    يابروووف الايام دى عبد المنتقم بفتش فى جبايات للجنوبيين باليوم… قال يتم حصر الاخوة الجنوبيين فى العاصمة(الخايفين يمشو يحرقوهم ) ويطلع ليهم بطاقات مدتها شهر وكل مايجو يجددوها يدفعوهم قيمة إيجار وطن !!!!

  7. البروف والسمار : تمليك اصول الوطن للدوله مشروع خطير جدا .
    وهو جزء من مشروع الدوله القابضه التى اولى مراحلها :
    تمليك الاقتصاد للدوله
    تمليك اليات الاقتصاد للدوله
    تمليك المواطن للدوله وده مشروع كبير جدا يتمثل فى تسليف المواطنين دوما حتى لا يفضل مواطن ما مديون للدوله شيئ عربات وشيئ شقق وشيئ عفش وشئ ادوات منزليه والمديون عينو مكسوره دوما امام الدائن ولا شنو ؟؟

  8. البروف وجميع الحباب كل سنه وانتو طيبين بمناسبه مولد المصطفى ص
    ياجماعه دى قصه ناسكم بتاعين الدرئب
    عندنا بيت مهجور ليهو قريب ال5سنه بحاله يرثى لهاااا المهم يوم الصبااااح دقش التلفون يضرب الوووو اسمع ليك صوت ولا صوت بت عمكم عجرم
    السلام عليكم معاااك مكتب درائب ؟؟؟ خييير انشاءالله
    لا والله بس دايرنك تجينا فى مكتبنااا عليك ضرائب عقارات 9مليووووووووووووون
    قلتليهاااا يابتنا عقااار شنو افتكرت انو ظهرت لينا ورثه ولا حاجة … المهم مشيت من الصباح سألت عن الموظفه الضربت تلفون قالو لى فى المطابق الرابع المهم مضطر طلعت السلالم ….السلام عليكم عايز فلانة ردت لى مرحب اناااا وحاتكم البسمع الصوت مايشوف الشكل طوالى اعت صياغت طريقه المعامله وطبعاااا جااااى وفى مخيلتى الصوت الجميل والشكل الاجمل بس الله غاااالب
    المهم شيل ودق شيل ودق اقنع فيهم انو العقار خرابه ساااااااى وليهو فتره غير القطط والحمام مافى زول دخلو ااا مادايريين يصدقووا فى النهايه قلت احنك معاهااااا اشوفااا بتخفض لى كم طبعااا دا بعد التشكير فى الرقه والجاذبيه والحلاه الفايته الحد المهمممممم اتخيلو من 9 مليون خفضتا لى 250جنيه ودفعت 50واتوكلت ……بالله فى زمتكم دى امه يرفعو ليهاااا قنااايه ساى خلى كمان علم فيهو اربعه الوان

  9. استاذنا جبرا والزوار الكرام السلام عليكم
    الآن فهمتا دي بقولوها الناس اللطاف الاذكيا البفهموا من اول مرة لكن زي حسنى والبشير وبتاع اليمن ديل دايرين ليهم فهامة زي حقتك الزمان ديك متذكرا؟؟؟؟؟

  10. سلام للكل
    من اطرف ما قرأت في الايام الفائتة:
    [من كان اخر كلامه (الأن فهمتكم) دخل جدة]
    اسأل الله ان ينتقم من دكتور عبد المنتقم و اخوانه.

  11. الأحباب الأعزاء :

    قلتا ليا يا التلب (دخل جده) وللا مزبلة التاريخ !!

  12. فَهِمْتُكم !@# الشاعر امير الغلابة : من منتدى قهوة كتكوت فهمْـــــــــتُكمْ بعدَ أعـــــــوامٍ وأعْــــــوامِ الآنَ أدْركتُ ،تفــــريـطِي وإِجْـــــرامي
    الآنَ أدْركتُ معـــــنى أنَّكــــــــــــم بشرٌ لكمْ حقـــوقٌ ، ولســــتُم محــــضَ أنعامِ
    فهمـــــتكم يا بَني شعـــبي وقـــــــدْ لعِبتْ بكُمْ جنــــــودي وقـــــــــوَّاتي وأَزْلامـي
    نعم ، ملأْتُ سجــــــوني من أكَارِمــــــكمْ وكَانَ تعـــــذيبُــــهم رمْــــزاً لإقْـدامي
    حكمتُ بالسِّجــــــنِ تأبيـــــــداً لطائــــفةٍ أَصْلَيْـــتُها في سجـــــــوني نـــــارَ آلامِ
    ولَمْ تَـــدَعْ سَــــعْيَــــها للدِّيــــنِ طائـــفةٌ أُخـــــرى ، فأصْـــدَرْتُ فيها حُكمَ إعْدامِ
    جَعَـــلْتُ أرضكُم الخضـــراءَ مُعْــتَـــقَلاً حقَّــــقتُ فـــــــــيهِ بسيفِ الظُّلْمِ أحلامي
    أطْــــلَقْتُ فيـــكم على ظُـــــلْمٍ جَلاَوِزَتي ما بــــــــينَ لصٍّ وكـــــــــذَّابٍ ونــــمَّامِ
    نَعَــم ، جعلتُ منَ الطُّغــــــيانِ لافِـــــتةً فـــــيها معَـــالِمُ مِنْ قَــــسْـري وإلْزامي
    لكِنَّني الآنَ يا شعــــبي وقــــــد سَلَـــفَتْ أيَّامــــــــــــكم بمآســــــــيها وأيَّـــــامي
    أقولُـــها ، ونجـــومُ الليــــــلِ تَشْهَدُ لي : فهِــــــمْتُكم ، وإليكم فـــــضْلُ إفْــهامِي
    فهِـمْتُــــكم ، فلــــقدْ صرْتم عَــــــمَالِقـةً وكُنتُ أبـــــصرُ فيكم شــــكلَ أقْـــــزامِ
    فهـــمتها الآنَ ، إنِّي قـــدْ ظَـلَمْتُ ، ولـمْ أرْحـم فــــــــقيراً ، ولمْ أَلْطُفْ بأيْـــــتامِ
    ولمْ أقــــــدِّمْ طـــــعاماً للجـــــياعِ ، ولم أقــــــــدِّمْ المــــــاءَ للمُسْــــتَنجدِ الظَّامي
    ولمْ أقـــــــــدِّمْ ثيــــــاباً للعُــــــراةِ ، ولم أمنح تلاميــــــذكم حِــــــبراً لأقـــــــلامِ
    فهِمْتُكمْ ، فافْهَـموني ، وافْهموا لُغـــــتي وقابـــــلوا لُؤمَ أخــــلاقي بإكــــــــــرامِ
    إنّي سأفتَـــــــحُ أبـــــوابَ العــطاءِ لكـم وســوفَ أُصـــــــدِرُ للإصلاحِ أحكامي
    هــيَّا ، ضعوا في يدَيْ أيـــديْ تعاونُكــم يـــا أخـــوتي وبني عــــــمِّي وأرْحامي
    إنِّي صحوتُ على نورِ الصَّباحِ ، وقــدْ طـــوَيتُ عِقْـــــدَينِ في ظُلْمٍ وإظـــــلامِ
    فهمتكم ، أيُّــها الشعــبُ الذي دعَسَـــتْ أحلامَه في طــريقِ الجَــــوْرِ أقــــدامي
    الآن أدْركـــتُ أنِّي كـــنتُ في نفـــــــقٍ منْ غفْــــلَـــتي وضــلالاتي وآثــــــامي
    *** *** **
    أَنْهى الحـــــديثَ ، ولمْ يفـطن لخطبـــتهِ إلاَّ الصَّــدى و الّلَظى في قَـــلْبِه الدَّامي
    وجَلْجَــــــــلَتْ صرْخةُ المستـهزئينَ بهِ : فــــــاتَ الأوانُ ، فلا تركن لأوهــــــامِ
    نســـــيْتَ أنَّ لنــــا ربًّــــــا نلــــوذُ بـــهِ إذا تَـــــــطَاوَلَ فـينا جَـــــــورُ حُــــكَّامِ

  13. عبدالفتاح بن سعيد | رد

    الله يعطيك العافية أستاذي الكريم ، مقال جباية ستات الشاي مررت عليها وهي جميلة بحق وحقيقة نسأل الله التوفيق للجميع .ودمتم .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: