واسعة شوية يا ريس

بينما كنا أقوم بمطالعة صحف الأمس لفت إنتباهى مانشيت لخبر يقول (قطع الرئيس عمر البشير بأن أغلبية حزبه المؤتمر الوطني بلغت 90% من شعب الشمال، مبينا ان مسؤولية الحزب الحاكم قضت بكبح قواعده حتى لا تخرج للتصدي للمتظاهرين الذين يمثلون 10% فقط من السودانيين ) .

 وبما أن العبد لله لم يكن حضوراً لذلك اللقاء حتى يتسنى له معرفة إن كان (الريس) قد كان مرتجلاً لذلك الخطاب أم أنه كان يقرأ من ورقة معدة سلفاً إلا أننى أرجح فكرة الورقة فهى الوحيدة التى يمكن أن يلتبس على المرء قراءتها فيقوم (بعكس النسب) !

 ما أن قرأت تصريح السيد الرئيس حتى هتفت فى داخلى : – معقوله هسه كل عشرة تنفار فيهم تسعة تنفار حزب مؤتمر وطنى؟ بدأت بنفسى .. وما أن حاولت أن أسالها إن كانت (مؤتمر وطنى) حتى جاءتنى الإجابة : إنت جنيت يا زول ؟ هو إنتا متين كنتا عضو فى حزب؟ ومتين (ود مقنعة) قدر يقنعك ويجندك تدخل ليكا حزب مما كنتا طالب ولحدت ما بقيت مرشح … (للقبر طبعاً) !

 ثم عرجت على أسرتى الصغيرة .. ثم الكبيرة .. توقعت أن أجد نسبة الـتسعة تنفار من كل عشرة تنفار.. (والزول العاشر ما مؤتمر وطنى) ! ولكنى للأسف الاسيف لم أجد زول وااااحد (من العائلة كوووولها) !!

 قلت فى نفسى ربما (عائلتنا دى) عائلة (دورا ميت) ساااكت ولا تفهم فى السياسة وليس لها حس (وطنى) كدى يا زول شوف أصحابك وأصدقائك، أمسكت بهاتفى الجوال وبدأت فى إستعراض أسماء معارفى وأصدقائى واحد .. واحد .. إنتهيت من الألف .. الباء .. السين .. الجيم .. العين .. وعندما وصلت إلى (يحيى المكانيكى) هبش صباعى بالغلط على زر الإتصال فرن الهاتف على الجهه الأخرى ليأتينى صوت (يحيى) :

 – أهلاً يا استاذ .. العربية عصلجت ليك وللا شنو؟

 – لا يا يحيى العربية ماشة كويس .. لكن بس عاوز أسالك !

 – إن شاء الله خير يا استاذ

 – لا خير .. إنتا يا يحيى (مؤتمر وطنى) !

 – تقصد شنو يا استاذ !

 – قلتا ليكا إنتا عضو فى حزب المؤتمر الوطنى!

 ضحك (يحيى) وأنا أتخيله وهو يعافر تحت إحدى العربات بملابسه المتسخة وهو يقول لى :

 – يا أستاذ إنتا بتهظر .. هو أنحنا قادرين (ناكل) عشان نكون بتاعين (سياسة) كمان ؟ ..

 الحقيقة التى لا تحتاج لأى (درس عصر) تقول أن 90% من الشعب السودانى الفضل لا ينضمون (لأى حزب) وأن السياسة بالنسبة لهم (ترف) لا يتلائم مع (صعوبة الحياة) والجرى وراء (قفة الملاح) ومدارس الأولاد .. والعلاج .. والسكن والمواصلات .. كما أن الحقيقة (الغائبة) تقول أن كل الأحزاب التى على الساحة لا تزيد عضويتها (الحقيقية الملتزمة) فى أحسن الأحوال عن ألوف لا تتجاوز أصابع اليد الواحدة .. هذا إن لم تكن مئات بما فى ذلك .. (ولا خلاص مافى داعى) !

 كسرة : 90% دى واسعة شوية يا ريس !!

28 تعليق

  1. البروف العزيز : تحياتي الواضح جدا من حديث البشير أنه يرسل رساله واضحه للشعب أن أي محاوله للتظاهر تقابل بمظاهره مضاده مستفيدا من التجربه المصريه ولكن عليه أن يعلم فشل هذه المحاوله البائسه فشلا أقر به رموز النظام المصري_أنا شخصيا و كذلك عائلتي و حتي معارفي ليس بينهم عضو في المؤتمر الغير وطني __ هنا أريد أن أتقدم بإقتراح و هو : إستطلاع لأراء المواطنين لمعرفه نسبه اللذين لا ينتمون للمؤتمر الوطني . مع خالص شكري

    1. أكثر ما يهدد الحاكم ويضعضع بنيان حكومته هم الحاشية المنافقة التى تحيط به وتحجب عنه الحقيقة وتقول
      له أنت الرئيس بنسبة 99% من أصوات الناخبين لأنهم يحبونك ويستمرأ الحاكم ذلك ويصدقه حتى تنتفخ أوداجه مثل الديك بينما ترتب هذه الحاشية المستفيدة كل ما يلزم لتهديد الناخبين وتزوير نتائج الأنتخابات
      ليستمر إستنزافها وإستئثارها بكل ماهو مستحق للشعب..

      على الرئيس عمر البشير الأتعاظ من التاريخ وتذكر ما حدث للنميرى وشاوشيسكو وشاه إيران والمغشوش
      مبارك ومن سيأتى على الدرب…

    2. يا أخى استطلاع شنو انتا ما متأكد لانو 99%من الشعب السودانى مؤطمر وطنى وما تتعب ساى لا نو دا الحاص ه

  2. إزيكم ياناس
    هو فى ناس تانيين من ورانا واحنا منعرفش ولا ايه ياجدعان؟

  3. التحايا والتقدير !!!
    90% !!!!! (خطبت فكنت خطبا لا خطيبا) ……
    وانتو منتظرين يعني تاني شنو !!!!!!!!!!!
    يا بروف ( واسعة شوية) بس !!!!!!!؟؟؟؟؟؟

    1. كانت مشكلة فنية بسيطة يا دكتور وإتحلت .. مرحب بيك معانا

  4. إحتمال يكون قاصد أن 90% من المؤتمر الوطني مؤتمر وطني… وحتى هذه فيها شك فأنا متأكد أن الأغلبية في المؤتمر الوطني مؤتمر مانحين…وأن 90% من الشعب السوداني لا يفرق بين المؤتمر الوطني والمؤتمر الهندي بتاع غاندي…. بس الشعب الذي استورده ناس الانقاذ من الخارج ( من تشاد وغيره) 90% منه مؤتمر…. موش وطني ولا شعبي

  5. نسيت أسأل كم نسبه البلطجيه في الجماعه ؟ عشان الواحد يعمل حسابه

  6. 90% حسب عدد السكان ولا التعداد السكاني الأخراني؟

  7. اولا تحياتنا الحرة جدا للبروف العزيز جبرا ولكل اعضاء القمردينة القدام والجداد ,,,,,,
    والله البشير دا بي كلامه الكتير والكله خارم بارم دا حير بنات افكارنا ,,,,,
    طبعا انا دايما بحاول اتفادي كلام البشير دا من بدري والحمد لله في التلفزيون خاصة قدرت اتجنب خطاباته منذ اكثر من 10 سنوات ونحمد الله كثيرا علي ذلك لانه بالجد ورغم انه ما عندي اي مرض ممكن يودي الاخرة عن طريق الصدمات المباشرة وماشابهها لمرضي القلب والسكري والضغط وغيرها ,,,,
    لكن حب المطالعة بيجبر الزول انه يقرأ ويعرف اخر نكات الريس وهترشاته وكلامه المدغمس والواحد بحاول يشيل المختصر غير المفيد من كلامه عشان ما يضيع زمنه ونفسه للخطر من غير طائل ,,,,
    المهم انا في الفترة دي كلها وهي فترة الوعي السياسي او فترة الوعي بالحاجات الحاصلة في البلد وهي غير سارة بكلياتها بحاول اغوص في شخصية البشير ووصلته لي بعض النقاط المهمة والريس لا يستطيع الخروج من دائرتها لو طار السماء وجا الارض تاني ,,,,,
    1,,, انه انسان غير متطلع علي الوضع الحاصل في البلد حتي داخل حكومته ونستبعد هذا الخيار ,,,وهو فعلا غير متطلع ولكن في حاجات كتيرة ممكن يعرفها بالشمارات بس,
    2,,,الناس القريبين منه شديد غاشنه غشة جامدة جدا ونستبعد هذا لخيار ايضا,,,,
    3,,, الزول دا بيشرب انصاص او بيركب افيال ,,,, غير مستبعد ,,,
    4 ,,, انسان جاهل وهو حاصل فعلا ,,,
    5,,,عنده مرض في المخ والذاكرة او ثغب في الذاكرة ممكن برضه وهو حاصل فعلا ,,,
    6,,,مصاب بداء الهضربة طبعاا,,,,
    قال 90% من السودانيين تابعين لحزب الجراد قال ,,
    فيه الخير ما كان يقول 99% .

  8. حزب الجراد دا طبعا لقب اطلقه د.حيدر ابراهيم علي. عل حزب ال 90 % من سكان شمال السودان . في مقال من مقالاته الرائعة علي موقع الراكوبة وهو لقب في محله تماما ,,,

  9. السلام عليكم / ن ، بمناسبة شفاء الاخت نوره ، ازال الله عنها كل اذى ، يا برف ايه رايك انا مؤتمر ، نكايه فى دييييييك ، اكان ود السيد …. و لا اكان ود اللمام ….. و المعاهم كمان كان نقد ولا ابو موسى و لا حتى الطيانى ، زى ما قال واحد قاعد جنبى ( حقو اى زول عمره اكتر من40 سنه يدوهو طلقه ، لما اتلفت لقانى ، قلت ليهو زى خيل الحكومه ، و خيل الحكومه لما تعجز بيدوها طلقه ) بالله مش اقتراح فى محله ، انا غايتو عندى شهادة تسنين ، يمكن تنفع اليوم داك ، وما زلت مصر على مؤتمر وطنى ………… عجبى

  10. الأحباء الاعزا ء … سلام

    بالله عليكم الريس مش بالغ عديييييييييييييل

  11. أنا معاك بالغ لكن ما عديل حوالي 90%

  12. يا بروف
    الراجل المسكين ما قاصد،،، أصلن هو ما متعود ((دايمن)) إنو أيى مشروع لو تمنو 100 جنيه يقولو 1000 جنيه ،،،،،، 900 جنيه مؤتمر وطنى و 100جنيه للمشروع يعنى90 قى الميه دى مـجـغـمـيــة المؤتمرين على الوطن

    شفت كيف

  13. الزوار سلام
    90% مؤتمر والباقي نمل (دا كلامو) حتي انو خايف علينا من الدهسة وقال ادخلوا مساكنكم ,, و90% دى النسبة المفضلة للحكومة قاعدين نسمعا كم وعشرين سنة مستغربين ليييييييييه ،،، لكن انا مع طارق كلامك مية مية و ذكرني مشروع سندس الاكلانا منو وصدرنا منو اعلاميا ووووووووو والقائمة طويييييييييييلة

    1. شكراً على المداخلة يا أواصر يا نملة !

  14. الأستاذ جبرا
    تحية طيبة
    هو لو ما ببالغ ما يكون عمر..
    بالمناسبة أنا من المعجبين بكوميدياك السوداء البتشبه واقعنا المر
    ومن زمان بقرا ليك وأول مرة أشوف صورتك
    من كتاباتك افتكرتك “أغبش” من كدة
    ولا منتحل ليك صورة كوز “لاهط”

    1. مرحب بيك منال .. دا فوتوشوب ساااكت

  15. حاج احمد السلاوى | رد

    البروف الفاتح ..
    ياخ هو كان عاوز يقول 99% بس خجل وشافها شينة قام غيرها ل 90 % ..
    أنا غايتو وطنى لاكين ما مؤتمر .
    إيه رأيك نعمل جزب جديد نسميهو حزب ال 10 % ومش مؤتمر وطنى!

  16. تن بيرسنت دا كان لقب واحد نافذ أيام ناس نميري الله يرحموا… كان بياخد عشرة في المية بس كوميشن من أي قروش تمر عليه سواء جاية على البلد والا طالعة…. الله يرحمهم ما كانوا طماعين شوف بالله التسعين زي ما قال طارق تكون هي النسبة بتاعة جغمة الحزب من كل شئ…!!

  17. ههههههههههههههههههههههه
    الريس عايز يقول 10% موتمر وطني بس غلط
    سلامات يا استاذ يا رائع

  18. ياجماعة ال90% دى مدرجة ضمن الخطة النصف قرنية – ودة حق مشروع انو الريس يحلم بهذه العضوية الساحقة خلال ال50 سنة الجاية ماهو قاعد وانتو اللى حتمشو – خلو الحسادة –

  19. الغريبة يابروف الريس فى عطبرة قال لو حس بأن الشعب مش عاوزو حيطلع ليهم الشارع عشان يرجموهو بالحجارة — هو حيدى الشعب فرصة عشان يقولو ليهو مش عاوزين سعادتك — غايتو الا يعرف من عوضية الوداعية —

  20. انت الريس ده السألو منو ؟
    بعدين ناس المؤتمر الوطني ديل لا بنلقاهم في الحلة ولا في الشارع بس مايكونو ؟؟؟؟؟؟؟؟؟؟ استغفر الله
    اويكون الريس قاصد 9% من ناس الشمال في الحالتين باااااااااااااااااااالغ ونص

  21. جميع الاحباب سلام من غير فرز
    ياجماعه الريس داا شكلو ماقاصد التسعين دى بس مرقت كداا وشافا شنا يرجع يقول النسبه الحقيقيه 99.9%
    البيشاوى نحن ماحنتعب الريس عشان يمرق نرجمو بالحجاره ؟؟؟ نحنا برانا بنمرق ونشيل حجارتنا معانا نخليهو يرجمناااا هووو
    هو فى ريس بترجم ولا كمان فى ريس بمووووووت قولو ليــــــكم كلام بخــــــــــــــش العقل

  22. تعظيم سلام يا سعادتك
    سعادة ديجانغو ده لسه بقول بلد المليون ميل٠ خليهو انوم يا جبرا النومة بتريحو شوية

  23. السلام عليكم جميعآ قرفنين من المؤتمر الوطنى والبلد دة بالله ريس شنو كمان يقول %99 موتمر وطنى السودان ماشى ب يالطيف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: