العقيد مرتجلاً !

أتاحت الظروف التى يمر بها الأخ العقيد القذافى رؤيته مرتجلاً لبعض الخطابات التى يتم بثها عبر الوسائط الإعلامية .. إليكم أعزائى القراء بعض الفقرات التى كانت حصيلة لبعض حالات الإرتجال تلك .. مع التعليق عليها :

  • ·        للمرأة حق الترشح سواء كانت ذكر أو أنثى !

– (لا تنسوا أن الأخ العقيد مفكر لذا فإنه يضع كل الإحتمالات أمامه حتى إحتمال عمليات التحول الجنسي trans-sexual))

  • ·        ايها الشعب .. لولا الكهرباء لجلسنا نشاهد التلفاز في الظلام !!

– (يبدو أن تلفزيونات ليبيا تعمل على البطاريات وكده .. يعنى بالتيار  المباشر direct current   )

  • ·        أنا لست ديكتاتورا لأغلق الفيس بوك .. لكني سأعتقل من يدخل عليه !!

– (ربما يكون الأخ العقيد ذكياً لدرجة أنه يود أن يشير إلى حاجتين الأولى إنو ما دكتاتور والثانية أن جهاز أمنه قوى لدرجة أن بإستطاعته تتبع كل كمبيوترات وهواتف الشعب .. كمبيوتر كمبيوتر وهاتف هاتف والقبض على كل من يدخل الفيسبوك .. بس ) !

  • مراسل للعقيد : هل تخاف ممافعله المصريين والتونسين من التظاهر وقلب لنظام الحكم؟ العقيد يرد  : انت مراسل غبي ايه اللي يخلي المصريين والتوانسه يتظاهروا في ليبيا

–  (والله برضو سؤال وجيه !!)

  • ·        تظاهروا كما تشاؤون ولكن لا تخرجوا إلى الشوارع والميادين !!

– (أغلى نصيحة يمكن أن يقدمها حاكم لشعبه .. الراجل قلبو عليهم وما عاوزهم يتعبوا .. أيه لزوم يطلعوا إلى الشوارع والميادين؟ كل زول يقعد فى بيتو ويقود ليهو مظاهرة !)

  • ·        ساظل فى ليبيا الى ان اموت او يوافينى الاجل !!

– (دى بالذات شربتا ليها علبة بنسون كاملة وما قدرتا عليها !!)

  • ·        بر الوالدين اهم من طاعة امك و ابوك .

– (دى بعد ما شربتا ليها علبة بنسون تاني فهمتها .. فطاعة الأم والأب يا سادتي جزء صغير من بر الوالدين الذى هو أعم وأشمل والله أعلم .. !)

  • البترول لكم ومن بكرة أيّ واحد يمشي ياخد حصتو وانا متنازل عن حصتي.

– (مستنين أيه؟ كل مواطن ليبي يشيل جالونو ويمشي يشيل حصتو وينسي موضوع المظاهرات ده !)

  • الشعب بياخد حبوب (مخدرات) !

– (أكيد بيتناولها بدليل أنو الشعب ساكت وكاضم ليهو 41 سنة و 5 شهور و24 يوم يعنى 2164 أسبوع أو ما يعادل 363,648 من الساعات أى ما يعادل 21,818,880 دقيقة اى ما يعادل 1,309,132,800 ثانية !!)

  • (مخاطباً شعبه) : يا وسـخـانين يا مقملين .

– (إذا علمنا أن مشتقات البترول جميعها إبتداءاً من الكيروسين مروراً بالبنزين إنتهاءاً بالقطران تستخدم فى قتل القمل والتخلص منه فأين يذهب البترول !!)

  • أنا أرفع من المناصب التى يتقلدها الرؤساء , أنا مقاتل مجاهد مناظل من الخيمة .

–  (الخيمة .. رأس الخيمة .. بقت ما فارقه )

  • ابدأوا بالخروج الليلة .. ابتداءا من الغد .

– (يكون قاصد ابدأوا بالخروج من الغد إبتداءاً من الليلة !!!)

  • الباخره الراسية في المطار .

– (إذا المطار لصق الميناء مفيش مشكلة !!)

  • لست رئيسا و لا رجلا عاديا حتي اقتل بالسم .

– (يمكن إذا كان السم ذو قوة ثلاثية .. الرؤساء والرجال العاديون هم الذين يموتو بالسم العادى)

  • الديموقراطية تعني ديمو كراسي .

– والديموخيامية … تعنى ديمو خيام !

  • السجن خمسه سنوات لمن يقتل نفسه حرقا .

– (وبعد إنتهاء العقوبة يعالج نفسو من القتل ويلم رمادو ويطلع من السجن عااادى) !

  • السبب الرئيسي للطلاق .. هو الزواج .

– (كده أنا ح أغير من البنسون !)

  • أرجو من المواطنين أن يقبضوا على أولادهم البياخدو حبوب مخدرة هادول علشان نعالجهم و نعيد تأهيلهم … ده ثبت إنو هذه الحبوب تسبب أمراض القلب !

–  (ياخى روح ده إنتا العملتا لينا أمراض قلب !)

كسرة :

تنبية : يرجى بعد الإنتهاء من قراءة المقال تناول 2 حبة بنادول (إكسترا) .

Advertisements

16 تعليق

  1. سلام ياقبيلة،،
    بروف جبرا وزواره الأكارم، زمان كنا بنسمع الرئيس المصري الراحل أنور السادات بيقول عليهو الواد مجنون ليبيا، وماكنت مصدق كلامه داك لحدت ما حضرت يهو محاضرة في أحدي الجامعات كان يبشر فيها بكتابه الأخضر وكان عنوان المحاضرة عن المرأة (سواء كانت ذكر أم أنثي)، وحكي فيها من الكلام الخارم بارم ما جعلني أصدق وأآمن تماما” بأن السادات كان محقا” في تلك التسمية غير أنني كنت أردد في نفسي المثل الذي سمعته من والدتي عليها الرحمة والمغفرة من رب العباد (الجن بيتداوي ألا كعبة الأندراوة)، وكنت حتي تلك اللحظة لا أعرف ولا أفهم معني الأندراوة حتي حضرت تلك المحاضرة القيمة والتي أبانت لي الكثير عن ذلك الشخص الأندراوي، ويبدو لي أنه ليس هنالك أثنين من هذا الحيوان المنقرض عليه اللعنة حيثما حل وأينما ذهب، فقد فعل الأفاعيل في أهالي ومواطني ليبيا الشرفاء!!!!!
    اللهم أنصر أخواننا في ليبيا وتقبل شهداءهم وأشفي جريحهم أنك وليُّ ذلك والقادر عليه

  2. اكان ما قريت انو المقال بيتكلم عن العقيد القزافي كنت افتكرتة مسطول بونس في صحبو

  3. البروف – والسمار –
    غايتو حكاية السبب الرئيسى للطلاق هو الزواج دى بالذات صدق فيها – لانو الطلاق له اثار جانبية على المجتمع من ضياع الاولاد والبنات وبالتالى تفكك الدولة وانقسامها لدولتين وكدة وربما اكتر – ودة كلو ممكن مايحصل لو اصلا الناس ماإتزوجت -ولا رايك شنو يابروف ؟
    كسرة –
    يابروف لما غيرت من البنسون ( كنت مع العقيد ولا كنت فى السودان ؟)

  4. البروف والاحباب..سلامات واشتياقات..
    والله الراجل دا تحفة وبالجد لما اكون زهجان وقرفان بفتح القناة الليبية بتاعت الجماهيرية وهاك يا ضحك,مسخرة جد..
    فى خطابو امس: انا لو ما كنت متاكد ان العرب يحبونى والافارقة يحبونى ما كنت بقيت زعيم ولا كنت استحق الحياة,,دقايق ما عدت قال: العرب الانذال الجبناء ! اجى !؟

  5. البروف أبو ناجي والأخوة الأكارم
    السلام عليكم ورحمة الله
    أصلو الزول ده شجاع ويقول ما يخطر بباله وما يفكر في العواقب … وهو الوحيد من حكامكم العرب الذي حاول ينظّر نظريات وأفكار وده حاجة التانين ما عندهم …. ولو ما عندو حاجة غير إنو خلا الملك عبدالله يكورك في مؤتمر القمة زي رواد المقاهي لكان فخرا له …. ثم إنتو مالكم مخلين الارتجال بتاعكم المدعوم بعصا وكرش وإهتزاز و90% من الشعب السوء داني وتمشو لي إرتجالات الناس المزنوقة في روحها؟

    1. فتحى عبد العزيز | رد

      هاشم كلامك صح مية المية وانا بابصم عليهو بالعشرة

  6. الكويس انو ارتجالنا يا هاشم بالدارجي ناس برة ما بيفهموها….
    “الحس كوعك” و”كديسة ما بنسلما” وحاجات زي دي….

    كسرة:
    زمان واحد اجنبي حب يفهم فترجمو ليهو أمريكا وروسيا دنا عذابها”
    فقال:
    Both of them

  7. البرووف والسمار .
    سلامات .
    الاخ هاشم حسين .
    إت ياتك والحاصل شنو وإنت شايت وين… مالك ياخ . دى المرة التانية تقطع لينا حبال أفكارنا وتعمل لينا أرتجاج فى الموضوع . مالك ياخ….

  8. السلام عليكم ، البرف و الاخوان ، كلهم عملو قروش و عايزين تزحلقوهم ، وحتجيبوا لينا مفلسين و تبدأ المأكله من جديد ، ما ثرنا مرتين قولو لى الحصل شنو ؟ العله فينا ، ولا الراى كيف ؟ على الحرام ، طلق كان جابو لينا الشيخ منو و منو داك الا الماكله تكون على عينك يا تاجر ؟ و اسالو من العدل لى عند الصحه مع وزراء الدوله و شركات الحكومه ……….. عجبى

  9. هذا القذافى أغرب شخص أقابله فى حياتى ولا شك لدىّ بتاتاً أنه هو من يتناول حبوب الهلوسة والسطل
    ولا شك أنه أكبر محشش وسطلنجى..

  10. الأحباء الأعزاء .. من المحاربين القدامى والمحاربين الجدد … تحية وسلام شديد .. مشكلة الإنقلابات دى إنو الزول البجى يحكم ممكن يكون ما بيصلح يكون حكم دافورى !!

    كسرة :
    ود الخلا … ياخ وحشتنا !! مرحب بالعودة

  11. الأخ عزت والأخ حنين

    سلامات وآسف لو قطعت أفكاركم والحاجات دي….
    أول مرة زول غير البروف يلاحظ تعليقي فشكرا لكما
    ناس بره لو ما يفهمو الدارجي بتاعنا بس بيفهمو لغة الاشارة والعصاية والاهتزازات….
    الأخ محمو بلال قابلت القذافي وين …. أوع تكون روحت تدرب ليهو ناس وللا يمكن أنت تكتب وأنت “مرتجل”

  12. دغمسة… سماحة الزول في الحبوب والكتاب الاخضر
    جغمسة… سماحة الزول في الكرش والعصا ترلم تررررلللم

  13. سلام ياقبيلة،،
    صديقي البروف جبرا لا أوحشك الله في عزيز، ومرحبا” بك ياصديقي، لكن ما وريتنا (العودة) دي، ما تكون زي حقت النميري!!
    وبي شوق تملكني لسديقي أسد الخلا الورور ومناكفاته، وبقية العقد الفريد والنضيد من المحاربين القدامي، ناس ودالزبير ودالمهدي ودالبركة ودالفتيحاب، وهاتيكم الحرائر أين هُن غبن عني؟؟!!

  14. بندول شنو يابروف انا كنت محتاجة لصدمات بالكهرباء علشان اقدر اخد نفسي من الضحك
    هم يبكي وهم يضحك !!!!!

  15. الاجمل في القذافي انو ماشغال بزول شايت في دنيا والشعب الليبي في حته والعالم كلو في دنيا تانية ويادوب الشعب صحي من الغيبوبة والسبات الدايم وان عايزة اعرف هل الكتاي الاخضر دا كتبو براهو ولا معاهو شلة من المساطيل ؟؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: