العقيد في الركشة

والعالم كله يتابع ما يفعله ملك ملوك أفريقيا و(القائد الأممى) بشعبه كان لابد أن نواصل الحديث عن الأخ العقيد ولعل أكثر ما لفت نظري وجعلنى أبحث عن معالج (إنتل) من فصيلة (بانتيوم 5) كيما أقوم بتركيبه فى (مخى) لمساعدتى فى الفهم هو ذلك المنظر الذى بثه التلفزيون الرسمى الليبى فى بداية هذه
الأحداث والذى لا يمكن ان يكون له أى نظير على إمتداد تاريخ البشرية والذى يصلح أن يكون فصلا من مسرحية للمسرح التجريبي أو مسرح اللا معقول ، والمنظر (الكرتوني) المضحك يا سادتى والذى لابد أنكم قد قمتم بمشاهدته مثلى هو ذلك الذى يظهر فيه الأخ العقيد داخل (ركشة) ممسكاً (بشمسية) وهو يتحدث لأحدهم بينما السماء تمطر (مع إنو ما شايفين لينا مطر) بينما مواطنيه فى كل أنحاء ليبيا يمطرون قوات أمنه بوابل من الحجارة !
لقد إجتمعت فى هذا الخطاب الذى ظل التلفزيون الليبي ينوه عنه زهاء العشرين ساعة كل عناصر الكوميديا والمفارقة وأول تلك المفارقات هو أن يتم إذاعة الخطاب من داخل ركشة دوناً عن سائر المركبات .. حافلة … باص … دبابه .. مروحية .. إلخ ، ثم إنه إذا إفترضنا جدلاً بأن الجو لحظة إذاعة الخطاب كان ممطراً فلماذا (من أساسو) خرج الأخ العقيد إلى الشارع ليقوم بإلقاء الخطاب ؟ (الأوض والصوالين والخيام إنعدمت يعني) ؟ !
ولعل أكثر ما في هذا المشهد من كوميديا هو أن الأخ العقيد كان يمسك بالشمسية بيده خارج الركشة بينما هو بداخلها وكأن الأخ العقيد يقوم بمنع حبات المطر من النزول على سقف الركشة (ليه مش عارف؟) !
وجاء وقت إلقاء الأخ العقيد خطابه التأريخى الذى كان شعبه ينتظره على احر من الجمر وكذلك كل العالم ، حيث وقف أحدهم ممسكاً بـ(المايك) مقرباً أياه من الأخ العقيد (الممسك بالشمسية) والذى قال موجهاً خطابه للشعب المنتظر :
– أنا مش في فنزويلا ما تصدق كلام الكلاب.. يلا .. سلام !
ثم فوجئ أبناء شعبه الذين كانوا ينتظرون خطابه والبلاد تشهد كل هذه الفوضى بأن الخطاب قد (خلص وإنتهى) إذ قام (القائد الأممى) بتوجيه حديثه للشخص الممسك بالمايك قائلا :
– ” يا إبنى ارتاح ” ثم قام بقفل الشمسية أمراً سائق الركشة بالتحرك !
إنتهى بث (المينى خطاب) الذى لم تستغرق تلاوته سوى ثوان قليلة مخلفاً وراءه (كالعادة) الكثير من الدهشة والتساؤلات ! إذ لا زال العالم يسأل عن السر وراء إختيار الركشة كمنصة للخطابة ! وكذلك عن السر وراء إمساك الأخ العقيد بالشمسية مع إنو كان يجلس داخل (الركشة) !
من هنا أدعو جميع فنانى الرسوم المتحركة إنتهاز الفرصة بتحويل هذا الخطاب (غريب العناصر) إلى فلم (كرتون) وأؤكد لهم أن هذا الفلم سيجد رواجا وقبولا وسوف يحصد كل الجوائز المحلية والعالمية وسوف يعرض على كل قنوات الأطفال إبتداء من (سبيس تون) وحتى (الأم بي سى 3) مثلما إنتشرت مؤخراً (أغنية العقيد) بيت بيت .. حاره حارة .. زنقة زنقة على القنوات الفضائية والإنترنت بعد أن تمت دبلجتها من أحد خطاباته الأخيرة .

كسرة :
الدخول فى (الزنقات) هين .. لكن (المشكلة) فى الخروج … !! (مش كده)؟

14 تعليق

  1. يمكن عشان سواقين الركشات هم الوحيدين الما طلعو ضدو .. فسيادتو عايز يعمل ليهم دعاية مجانية ..

    1. يااستاذي واروع كاتب في البلد دي..كل مافي الموضوع انو بتاع الركشه مامرخص..وهو غريب العقيد عشان كده قال يوصلو عشان يخارجو من ناس مرور طرابلس ديل..خاص وانو العقيد بقي ماشغال اي حاجه والعربات الحكوميه استلموها منو..

  2. وينك يا أب أحمد؟ الدار بي جاى بقت خلا !!

  3. إزيكم ياناس
    فى قناة سبيس تون للأطفال فى فقرة كدة بنمو بيها مقدرة العيال على الربط بين الأشياء اسمها الرابط العجيب(أسالو منها العيال حيقولو ليكم فعلاً عجيبة)بس والله الشفع بعرفو ليها عرفة عجيبة ,انا بقول نرسل المقطع دا للقناة امكن الشفع يفيدونا ولا رايكم شنو ؟؟؟(حتى لو ما حولوهو لكرتون…مامحتاج!!!1

  4. والله قاعدين يا بروف .. لكن الركض المقدس ما مخلي لينا فرصة نتلفت .. البركة فيك بتدينا إستراحات الواحد ياخد فيها نفسو .. ويقوم تاني على المحرات .. زي ما بعمل تور الساقية ..

  5. سلام ياقبيلة،،،
    الأصدقاء بروف جبرا وأب أحمد ونورا سلام،،،
    مش كويس الجاكم بي ركشة وشايل ليهو شمسية من (النطرة البتشتي) علي قول المصريين، ده يا سادتي كان ممكن يجيكم راكب ليهو بغلة عديل كدة وعليها (خرجين) ملانات موية بتشُر علشان يقول ليهم أنتو كنتو فين وبقيتو فين؟؟ وأنا عملت ليكم النهر الشنو ما عارف داك..
    كسرة/
    البغل :- معروف طبعا” ومنها بغال عبد السيد التي تكسب الرهان حتي قربها الوصول للميس ومن ثم تتوقف لتفعل فعلتها تلك،
    الخُرج :- فهو مصنوع من الجلود وكان أهلونا يحملون فيهو الماء من المورد القريب للبيوت كسقيا وما أجمل السقيا يا ناس مالكم نسيتونا….

  6. الحقيقة الليلة فرحتني جنس فرح لانو كل المتحذلقين الحولي ماكان هاميهم موضوع الشمسية والركشة دي وكانوا مهتمين يسمعوه يقولوا في شنو …و قالوا عني انصرافية لما ركزت علي النقطتين ديل

    ويحي علي امة عربية يحكمها العقيد وصحبه ( وش حزنان ومكتف)

  7. سلام الله عليكم يا جماعه
    حكايه الركشه دى ما دايره ليها اجتهاد كتير أصلو الراجل داير يطارد بيها الجماعه و بما أن الركشه عندها قدره ما طبيعيه علي الزوغانات و الدخول للمحلات الضيقه يمكن داير يطاردهم زنقه زنقه .. يعنى لو جاء راكب دبابه معناها داير يطاردهم فى الصحراء و كان جاء راكب ليهم فيل معناها بالع ليه حبوب هلوسه و لو جاء راكب ليهم طياره معناها دي التونسيه ……… يا جماعه داير اسأل أنتو النهر الصناعي ده فيه سمك؟؟…. لو بقي فيه سمك معناها ترعتي الرهد و كنانه فيهم مويه.

  8. يا بروف حمدالله سلامه
    يا بروف القذافى عايز يفول لى الناس (((((معاك نعلم )))))
    السر فى الركشه إنها بتمشى من دار لى دار و تدخل فى أى زنقه

    عندنا نوع من سائقى الكشات هنا يجيدون فن الترويج ،،،،،،إحتمال القذافى يكون ماشى يجيب الزياده

    أب احمد الفوق سلامات

  9. معاك معلم

    بالنسبه للشمسيه ،،،،ياخى الراس متكلف تقوم تجى مطره تبقى ليهو قكاكه وفجأتن (( لا حولتن من وين طلعوا هادول البنى آدمين و وين الجرذان))

  10. ألف سلامة ليك يابروف

    1. الله يسلمكم كوووولكم يا رب … شكرا مجاهد

  11. استاذي جبرا … أولا السماء تمطر والقذافي داخل عربته أو ركشته مافي داعي للشمسية…ثانيا أيقنت تماما أن قادتنا كلهم من ورق .. والسماء اذا واصلت مطرها سيبلي القذافي وكل الأوراق المنتظرة

  12. ياسين شمباتى | رد

    ههههههههههههههههههههه,,والله الراجل دا تحفة بجد,,وح نفتقدو كتير هو وولدو المخبول الاسمو سيف الاسلام دا..
    انا الضحكنى لما لقيتو طالع فو ق القلعة ديك ومشنقل فووووووووووق وعمال يقول (شوفوا القذافى وسط شعبو وجماهيرو)!! وسط كيف يعنى وانت معلق فى سابع دور؟يعنى ابرعها قناص ما يقدر يجيبو ! عفيت منو الكلس..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: