من المواطن للحكومة

العزيزة أمنا الحكومة، السلام عليك ورحمة الله تعالى وبركاته وبعد.
ما دعانى لكتابة هذه الرسالة أليك هو خوفى على البلد .. خوفى على الوطن .. والكل قد شاهد ويشاهد ما يحدث فى بلدان عربية قريبة مننا من قتل وتخريب وعدم إستقرار ، بلدان تتشابه معنا فى كل شئ .. كل شئ .. مما يجعل مستقبل بلادنا مشابه لها ولو بعد حين !
أكتب لك هذه الرسالة رغم أنني أعرف أنك لا تستمعين إليّ (والفى راسك بتسويهو) وهذه واحدة من أوجه مأساة العلاقة بيني وبينك، إذ إنك قد دأبت على أن (تطنشى) كل ما أقوله لك بل وتعتقدين بأنه هجوم منى عليك فى ذات الوقت الذى (تدى فيهو أضانك) لمن حولك من المقربين و(المطبلاتية) الذين يصورون لك أننى أعيش فى دعة من العيش وأرفل فى النعيم مع إنو حياتى أضحت حارقة كالجحيم !
لكنني بالرغم من ذلك كله يا (أمنا الحكومة) لم أقطع العشم في أن تستمعى لى مرة واحدة خاصة وأخواتك (الحكومات العربية) قد أصابتها (أنفلونزا التغيير) وقضت عليها !
العزيزة أمنا الحكومة : لو في مواطن واحد في الدنيا وقف مع (أمو الحكومة) أكون أنا.. 22 سنة وأي حاجة إنتي بتطلبيها مني وأنا على طول بعملها.. يللا نحارب مشينا نحارب.. يللا نسالم جينا نسالم.. وشوية شوية اتخليت عن أي حاجة بتقدميها ليا (وفكيتيني عكس الهواء).. عشان أتعالج بقت مشكلة.. وعشان أتعلم بقت مشكلة.. عشان آكل (ذاتو) بقت مشكلة.. لأنو كل يوم والتاني الأسعار بتاعة الحاجات الضرورية ماشة في ارتفاع وطلعت السماء.. ومع أنك يا (أمنا العزيزة) نفضت إيدك من الحاجات المهمة والأساسية دي كلها، لكنك بعد ده ما خليتيني في (حالي) وعينك بقت بس على (جيبي) الفاضى ده.. وكل يوم والتاني جاياني بي (ضريبة) شكل.. و(رسوم) شكل تاني.. وعوائد ودمغات و(جبايات) و(غرامات) وشنو ما بعرف داك!!.
قلت استحمل والحرب تنتهي ونوفر قروش الحرب الكل يوم كم مليون دولار دي وشوية الأمور تنتعش.. الحرب وقفت والسلام جا لكن مصاريف السلام كانت أكتر من مصاريف الحرب.. قلنا خلاص نشوف (حكاية البترول) ويطلع ونصدروا ويجينا قرش قرشين وشوية أشم نفس.. لكن عليك أمان الله يا (أمنا الحكومة) غير ما (الوقود) أسعارو زادت مرتين ما شفنا ليهو تأثير!!. (وما عوز أتكلم ليكى عن حكاية الإنفصال عشان ده ما وكتو) !
والله يا أمنا الحكومة وما طالباني حليفة أنا ما عندي أي طموحات -زي ما عارفة- طموحاتى ومتطلباتي (هينة ولينة) يعني بس عاوزك تشوفي ليا شغلانة وتوظفيني حسب مؤهلاتي عشان يكون عندي دخل أعيش منو و(قفة الملاح) دي تكون في متناول إيدي… وكان مرضت تعالجيني.. وتصرفي ليا على التعليم والشوارع وصحة البيئة وتعيدي النظر في حكاية الضرائب والجبايات البقت كتيرة ومسيخة دي…..وتوقفي ليا الصرف الما في محلو .. وتشوفى ليكى طريقة لمحاربة الفقر الما عاوز يخلينا ده .. وتحاربى كمان الفساد البقى وااااضح وظاااهر ده … هو فى فساد أكتر من إنو (الحتة الفلانية) ترفض للمراجع العام يراجع حساباتا؟ .. وعاوزك كمان الناس الفاسدين وقاعدين (يلهطو) فى قروشنا تحاسبيهم وتوقفيهم فى حدهم وترجعي لينا قروشنا منهم .. وبرضو تعالجى كل الأخطاء (العملتيها) وأول حاجة تعوضى الناس (الشلتيهم) لصالحك العام .. وبعدين قصة (قطع الشطرنج) دى تخليها .. معقولة بس كم وعشرين سنة واولادك ياهم ذاااتم … الزول يشيلوهو من هنا يودوهو هناك وبعد شوية يشيلوهو من هناك ويجيبوهو هنا ! لازم يا أمنا الحكومة أولادك التانين يشاركوا .. غايتو شوفى ليكى حل (للكنكشة دى) والمناصب والوظائف تكون بالكفاءة وبس .. وما تنسى يا امنا الحكومة مسألة (حرية الرأي) لازم تتيحى لأى زول يقول الرأى بتاعو عشان البلد دى ما بتاعت زول دى بتاعتنا كوووولنا ولازم تراعى لسيادة القانون و(حقوق الإنسان) مش عشان إنتى الحكومة تكونى أول زول يكسر القانون ! وآخر حاجه عاوز أقولا ليكى إنو لازم يكون فى (تداول للسلطة) .معليش دى أنا عارفا (حارة) عليكى لكن هو أصلو (حكم) وللا (تأبيده) ما كمان لازم ناس تانين (تحكم) ويكون عندها خطط وبرامج مختلفة للنهوض بالبلد .
العزيزة أمنا الحكومة :
أها لو سمعتى كلامى ده يا أمنا الحكومة صدقينى ح نطلع من الحالة النحنا فيها دى .. وكمان كان راسك قوى وما بتسمعى الكلام دى تكون كارثه .. وأهو أنا العليا عملتو !

كسرة :
ما بتوقع منك رد عشان عارفك مشغولة وكده !!

ابنك: المواطن

Advertisements

17 تعليق

  1. انت بتحلم واللا شنو يا اوستاذ ….
    ديل ملصقين بي غراء من النوع ابو لستك ما ح يفكوها
    وما ح يسمعو كلامك البتقول فيهو دا…
    ديل سادين واحدة بي طينة والتانية بي عجينة

  2. ارد نيابة عن الحكومة !!

    حملت شكوى الشعب في قصيدتي لحارس العقيدة
    وقائد الحكومة الرشيدة
    فقلت شعبك يا سيدنا صار على الحديدة
    شعبك يا سيدنا تهرأت من تحته الحديدة
    شعبك يا سيدنا قد اكل الحديدة
    وقبل أن أفرغ من تلاوة القصيدة
    رأيته يغرق في احزانه ويذرف الدموع
    وبعد يوم واحد صدر القرار في الجريدة
    أن تصرف الحكومة الرشيدة
    لكل رب أسرة
    حديدة جديدة !!
    “احمد مطر”

  3. البروف والدانقاوية الأكارم . . تحية وسلام
    أهم حاجه يا بروف ما قلتها لأمك ليه؟ كيف دا ما وكتو؟
    أهم حاجه إنو أمك قسمت تلت بيت الأسره الورثتوهو من أبواتكم وجدودكم و فرطت فيهو ، تقول البيت دا كان حقها براها.
    قاعده تتفشخر وتتمنظر بالعربات و التياب الجديده وسايبه أولادا على الحديده.
    بالطريقه دي الأولاد أكيد حيشوفو ليهم أم جديده.

  4. لقد أسمعت لو ناديت حياً .. ولكن لا (حياء) لمن تنادي .. وفّر ملاحظاتك أستاذي الجليل لغير هذه الأم العاقة .. أم تعق أبناءها .. بل وتطرد ثلثهم إلى المايقوما .. أو غيرها لا فرق ..
    أم ولدتنا سفاحاً .. ولم تخبرنا من أبانا ..
    أم تأكل قبل أبنائها .. بل وتأخذ اللقمة التي وفروها لسد رمقهم .. هي ليست جديرة بأمومتنا .. أم توظف شرار من ولدت ليتحكموا في خيارهم .. أم ترضع منا بدلاً عن أن ترضعنا ..
    أم تسعد بجهلنا .. وتستثمر في مرضنا ..وتعيش بموتنا ..
    حري بنا أن نقول لها (أفٍ) لا أن نبعث لها بالرسائل
    ولا شنو ؟

  5. يا جماعت الخير ما في طريقة نشتكي للماما تانية يعني على سبيل المثال ماما امريكى يمكن تكون حنينة علينااكتر من الناس القالو ركبو الحمير ديل لانهم من العامة الفهم عليهم صعب لاكن ناس GMC اسرع.

  6. يابروف – دى ام السجم والرماد الما بتسأل عن وليداتا اكلو شنو ؟ عيانين ولا طيبين ؟ كملو القراية المجانية اللت الام واشتغلو ولا لسة ؟ ولو اشتغلو مالقو بت الحلال بالمهر الفاتحة ؟ وسكنو وين ؟ ولا البايت القوى منو فيهم ؟ أم تأكل من لحم أولادا وتشرب من دمهم ؟ والله لو ام بالرضاع ماتعمل كدة ! لاراضين عنها ولا عافين منها وحقنا نلقاه يوم الحساب الجد –
    كسرة —
    إتفشيت اول حاجة – وبعد كدة رسالة رائعة وشاملة لمن يفقه القول ويتبين النصح — دام ابداعك –

  7. السلام عليكم ، البرف و الاخوان ، على الح و الط يا برف بتنفخ فى قربه مقدوده ، قبال تلاته سنين باعوا الخطوط الجويه السودانيه ، هسه رجعوها تانى تفتكر ام ناس المصاريين البيض دى بتسمع ليك ، دى بتعرف عياله بس ، اما ناس قريعتى راحت فراحت عليهم ، واحد فيهم فى توزيعه ما ادوهو منصب ، وقف وقال بالمفتوح فى الصفحات الاولى ، ان ما شافوا لى منصب سريع على و على اعدائى يارب ………… عجبى

  8. طالما انت سميتها اما لنا يا استاذى الفاضل فقد الجمتنا ان نقول كلمات عاقة فى حقها
    ولكن يا امنا الحكومة كفاكى تشبثا وكفاكى حرصا بان تكونى اما عاقة وتبحثين باستمرار عن مايبقيك اما لنا بس ارجوك يا امى ابحثى عن كل شئ يبقيك اما ابدية لنا ولكن لاتقدمى على تلك الخطوة التى تظنين انها تأبد امومتك لنا وهى افتعال المشاكل بين من انكرتنى امومتك لهم فطالما فصلتيهم عن اخوانهم وفرقتى بين ابناء بطنك فدعينا نحن الذين لازلنا ابناءك نرتاح قليلا وننسى الماساءة فدعى اخواننا يعيشو بسلام واريد ان اوجه لك نصيحه اخيرة اذا استمريتى فى تلك الفتن فاننا سنخرج عن الطاعة وانتى لا تتحملينى ذلك فارجوك تحلى بالصبر مثل ما اننا صابرين عليك

  9. سبحان الله … عليك الله هسه السياسة دى صعبة .. شوف الحاجات البسيطة المكتوبة /المطلوبة دى .. الشفع الفى الروضة فاهمين معناها !! ديل عاملين لينا طزمليون مستشار وشمشار فوق ام كم ؟؟ .. القصة عبارة عن توفير شطر يرضعو منو المقربين بس ..وتلقى ليك زول يقول ليك عمر البشير زول كويس لكن ناسو كعبين ! طيب هو رئيس كيفن .. ما يفرز ناسو كويس .. على الطلاق – متزوج وعندى وليد واحد – انا مترشح لرئاسة الجمهورية الدورة البعد الجاية طوالى .. وبرنامجى مقال الفاتح جبرا دا بس .. ما فاهم و ما عندى غيرو التكتح .. وللزمن داك اكون عرفت لى حبة مصطلح مصطلحين لزوم الجدعات .. عليك الله ما بفوز ؟!
    أول حاجة موضوع الفصل الاول دا بنجمو ليكم … الوزير ماهيتو قدر مصاريفو وبس … يسكن بيت الحكومة .. ويركب ليهو بكسى دبل قبين عادى .. والقرش الواحد يطلع بتوقيع عشرة رجال .. اصبرو لى بس والله كان ما خليت شغلة الوزير دى تكوس للزول البدورا ..
    حبى تقديرى وطنى سودانى زمان الكامل .

  10. الأحباء الأعزاء
    الأيام دى بينى وبينكم الصحة ماشة فى النازل عشان كده أعذرونى لو ما بتداخا كتير .. غايتو الحمدلله .. ما شاء الله قدامى المحاربين ما يدوك الدرب .. تحياتى .. أما موضوع أمنا الحكومة فده موضوع طويل
    … مسألة الإنفصال ده ما وكتو يا دكتور سنكل لانو ده موضوع براهووو عدييييل ! وأهو غايتو الواحد الواحد قال وخلص ضميرو وللا شنو؟ والعينو فى راسو بيغرف خلاصو !

  11. أنا بس عندي سؤال واحد وجيه وهو ليه محافظ بنكنا المركزي قبض مكافأة نهاية خدمة أتنين مليار ونص؟ ودي قبضها من ياتو بند؟ وأدوه مكافأة أصلاً من أساسه ليه؟؟؟؟ هو كان سوى شنو يستحق عليه مثل هذه المكافأة؟؟؟ الصراحة أمنا الحكومة دي بتسوي حاجات عجيبة لمن نقول تعليم وصحة ودعم للأساسيات المنقذة للحياة مثل مراكز غسيل الكلى وأشياء أخرى أساسية بتقول ما عندها!!!!؟؟؟؟ حسبنا الله ونعم الوكيل علي الفساد والمفسدين والبشجعوا عليه. وحر ونار في جدتهم أموالنا التعبنا وشقينا فيها وهم بياخدوها بالساهل كده. قولوا أمين لرب العالمين

  12. تعليقى بإنتظار الموافقة للنشر … حاجة تمغص ؟ لمتين آناس

    1. معليش يا أحمد بس لأنو ده أول تعليق بالنسبة ليك لكن تانى ح ينزل على طول … تحياتى

  13. البروف والجماعة
    السلام عليكم ورحمة الله
    وبعد يا أستاذ …. لسع تقول ليهم (يا أمنا؟)
    معاذ الله أن تكون هذه أمنا …. أو أمك أو أم أي مؤمن أو مسلم
    هذه أم البلايا والمصائب والويلات قسمت البيت …. وفي النصف الذي تركته لأولاد البيت ( وليس أولادها ) لم يعجبوها فاستوردت أولادا غيرهم من كل شعوب أفريقيا جنوب الصحراء الذين يعانون من الجفاف والتصحر وجعلتهم يزاحمون أحفاد على دينار في بيوتهم …. ومن هناك يزاحمون كل السودان والجزيرة العربية ….. أعلنت أن حرب الجنوب جهاد ودفعت إليها بخيرة شباب البلاد وأهلكتهك فيها … ثم رضيت بالانفصال مما يعني أن كل تلك الدماء والأرواح ما كان هناك من داع لها … شوهت التعليم وانتهت من الطب واصبح السوداني يفضل الموت على أن يصاب بالمرض لأن الموت راحة أما المرض فذل وهوان في ظل هذه الحكومة …. غيرت الشخصية السودانية فأصبح السوداني كاذب ومنافق وانتهازي ويسمي الأشياء بغير أسمائها ….المهم لا يستطيع أحد أن يوجز ما فعلته هذه الحكومة طيلة فترة حكمها وهي تختلف عن كل حكومات جيراننا في أنها تسمي ما نغعله ( الشريعة) إفتراءا على الله ظنا منهم أنهم يخادعون الله كما يخادعوننا وما يخدعون إلا أنفسهم وما يشعرون… ولكنني .أعيذك أن تسمبها أمي أو أمك أو تشكو إليها …. فقط أشكو إلى الله وأدعوه أن ينتقم منهم ويجزيهم ما هم أهله في الدنيا والآخرة

  14. ياسين شمباتى | رد

    البروف العزيز..
    كدى ما عصرت على امنا دى شدييييييد!؟
    غايبتو انا بضيف ليها مقطع غنائى امكن يحنن قلبها شوية علينا (× ما كفاية الشفتو منك والله اكتر من ببكى)..

  15. احمد من هسه دا صوتي ليك

  16. حاج أحمد السلاوى | رد

    أنا غايتو أقترح عليك أغنية ( أمى الله يسلمك) … أداء الفنان كمال ترباس عشان تهديها انت للحيكومة.. يمكن تحن عليك وعلينا وعلى الشعب الفضل… شوية .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: