أسكت وبس

• إذا كان قائد العربة القدامك (ماشى على أقل من مهلو) وعندما تخطيته وجدت أنه يتحدث بالموبايل وهو يرتدى الزى العسكرى .. يعنى ح تقول ليهو شنو؟ الإلتزام بالقانون ده ليك إنتا … إنتا عاوز تغلط (الحكومة) .. أسكت وبس وما تودى نفسك فى داهية !

• إذا سمعت أن هنالك توجهاً بإنشاء (مفوضية للفساد) على الرغم من أن (الفساد الموثق) الذى تحتوى عليه تقارير (المراجع العام) لا يتم تقديم الوالغين فيه إلى القانون فأوعك تتكلم أو تعلق .. إحتمال دى تكون مفوضية (للفساد غير الموثق) .. إحترم نفسك وأسكت وبس !

• إذا كنت تسير بعربتك فى أحد شوارع العاصمة الرئيسية وأنت تود اللحاق بموعد مهم وسمعت أصوات العربات ويويويويويوي وتوقفت الحركة حتى يمر موكب أحد المسئولين … أسكت وبس ! ح تعمل أيه يعنى ! مش لازم المسئول يوصل مكتبو بى سرعة عشان يطلع ليهو قرار (خطأ) بى سرعة ؟

• إذا كنت صاحب (دكان) صغير فى أحد الأحياء وجاءك موظف الضرائب وعاين للمحل والرفوف الفاضية وصنقر ودنقر وكتب ليك ضرائب عشرة مليون .. أسكت وبس يعنى ح تعمل شنو غير ترفع إيدينك للسماء !

• لما حظك العاثر يخليك تشاهد مباراة (غمة كروية) وتلاقيها كووولها (شلاليت) وكور (مصرجة) فى السماء واللاعبين يشوتو فى أى حته (إلا القون) وما في أى لمسات جمالية ما تستغرب وما تسال (ملايين الدولارات مجهولة المصدر) البتنصرف على الكورة دى ما عملت حاجه ليه ؟؟ هى القروش (معلومة المصدر) ذاااتا بقت مافيها بركة .. ما توجع دماغك .. أسكت وبس !

• رغم الوعود التى وعدتك بها الجهات المسئولة بثبات (سعر السكر) إلا أن سلعة السكر فى إرتفاع وجوال السكر وصل سعره 185 جنيه وسيوالى سعره فى الإرتفاع وسيوالى (السكر والضغط) بتاعك فى الإرتفاع عشان كده ما تتهور وتحتج وتقع كاضم ..أطفالك فى إنتظارك .. أحسن حاجه تسكت وبس !!

• إذا طالبك متحصل النفايات برسوم زائده قائلاً (الرسوم زادوها) فلا تسأله عن (الضمير) فى زادوها عائد لمنو؟ لأنو أساسا ديل ناس ماعندهم ضمير وبيزيدوا على كيفهم ولو ما دفعتا ح يودوك (نيابة التفايات) عشان كده .. أسكت وبس !

• لما تشاهد برنامج حواري فى التلفزيون والمذيع قاعد يتكلم أكتر من الضيف ذاتو ويسأل الضيف ويجاوب على السؤال قبلو اقفل التلفزيون على طول بدل ما يجيك ضغط دم وتمشى الدكتور تلاقى قيمة الكشف مية جنيه وتسكت للأبد

• لما تلاقي الواحد شايل ليهو سبحة وعلامة الصلاة تتوسط جبهتو وكل ما تجى (مرا) ماشة يعاين ويدنقر فى الواطة .. تسكت إنتا خالص وبس .. الراجل مش بحب يعاين لوجوه الحريم .. (كرعين بس) !

• إذا كنت ممن يرون فى حفلات (شريف نيجريا) ودعوتة (الدورية) لبعض الفنانات أى شبهات فأسكت وبس ولا تظنن بالرجل السؤ مش إحتمال السنة الجاية يقوم يعزم (حواء الطقطاقة) !

• إذا كانت لديك قضية تنظرها المحاكم ولاحظت أن القاضى يأتى إلى المحكمة متأخراً (بعد ما يفطر في بيتو) بينما المتخاصمون يأتون من (صباح الرحمن) فأسكت وبس .. فى زول كمان بيسال القاضى؟

• إذا توقفت أمام إشارة المرور وأمامك عربة (بدون لوحات) تجاوزها رجل المرور وجاء ليسألك عن (اوراق عربتك) فلا تتعجب وأسكت بس وما تودى روحك في داهية لأنو أكيد بيكون هو عارف العربية البدون لوحات دى تابعة لمنو!

• إذا عانيت من الأرق وعدم القدرة على النوم والساعة قد تجاوزت الحادية عشر مساء بينما (مايكرفونات شيخ فلان) تبث على الهواء (حلقة الذكر) الاسبوعى التى يقيمها .. لا تغضب ولا تتضجر ولا تشكو (ح تشكو لمنو يعنى ما هم سامعين) .. فقط إتناول ليك (حبه منومة) .. اسكت وبس !

• إذا علمت بقرار الحكومة توفير مليون رغيفه مدعومة فلا تأتى بالآلة الحاسبة وتقعد تضرب فى عدد الأسر فى العاصمة وتضربهم فى متوسط عدد كل أسرة وبعدين تضرب الحاصل فى متوسط عدد (الرغايف) البيأكلها كل فرد مضروباً فى عدد الوجبات لانو كده ح تضيع وكتك ساكت وح تلاقى إنو (المليون مايكروعيشة) ديل ما ح يكفو سكان (أم بدة بالردمية) .. خليك من التضريب وريح بالك وأسكت وبس !

• إذا كنت ممكن يعانون من مرض الفشل الكلوى ممن تضرروا من الإضراب الأخير للعاملين بمراكز (غسيل) الكلي بالخرطوم وبحرى إحتجاجاً على عدم صرفهم لمخصصاتهم المالية فلا تشكو ولا تسأل (علماء الأمة) عن دور الحاكم فى (توفير العلاج) لأنهم سوف يقولون لك أن الحديث يقول (إذا عثرت بغلة بالعراق) وليس إذا مات (مريض بالفشل الكلوى) .. من الأسلم أن تسكت وبس !

كسرة :
إذا جارك الموظف الكحيان (فجأتن) عمل ليهو فيلا فى (كافورى) .. أسكت وبس .. مش إحتمال يكون دخل ليهو (صندوق) وأدوهو (الصرفة الأولى) !!

Advertisements

18 تعليق

  1. رائع يا استاذ

  2. عبدالفتاح بن سعيد | رد

    كتاباتكم ياأستاذ جميلة للغاية نجد فيها متكأ في زحمة الغربة ، ونقوم أحيانا بنقل جزء منها لتعم الفائدة لمنتدانا الجميل ، وموفقين .

    1. أشكرك عزيزى عبدالفتاح وأتمنى أن يوفقنا الله لكتابة المفيد

  3. اححححححححححححح وتااااااااااااااااانى احححححححححح المغص ما قطع مصارينا يا استاذ
    انت عارف يا استاذ (الكلب ينبح والجمل ماااااااشى) بس نسكت نتوحوح عاد نسوى شنو

  4. تسلم يابروف, وان طال ميقاته يوما ما سوف نتحدث ملء شفاهنا ونرد ونقول للاعوار اعور في عينو كدا, بس كتير المسكوت عنو, انت يابروف ماحصل جددت ترخيص عربيتك, ولا يوم كدا بالغلط ما مشيت لي بنك عشان ماتاخد ليك تمويل – انشاءالله اصغر – ولا شنو ولا شنو, والله الغصة كتلت الشعب السوداني يابروف وحقيقة القمردينة واحدة من متنفساتنا الاقل من اصابع اليد, ربنا يحفظك ياغالي

  5. بروف و زواره سلام
    لو عندك بنات و عزموك عرس فى صاله و لقيت مصاريف العرس زايد تمن تياب النسوان ممكن تكفى ديون السودان المستحقه !!! ما تفكر فى عرس بناتك أسكت بس
    لو عرفت إنو عدد الوزراء فى أى دوله فى العالم من مصر لحدى أمريكا لا يتجاوز العشرين بيتما عندنا فى كوزستان 77 غير الولاه و الوزراء فى الولايات عليك الله ما تسكت بس
    طيب لو فرضنا يعنى مثلاً مثلأً جا شهر من الشهور وماهيتى كفتنى لحدوت آخر الشهر تقتكر حأقدر أسكت

  6. ملاحظاتك فى محلها ولكنها تصبح بلا جدوى إذا كان الهدف منها مجرد الحسرة أو الأضحاك وتكون فى النهاية أداة لتعويد الناس على ما لايجب أن يتعودوا عليه بل يجب ان يرفضوه ومن الأمثلة المشابهة لها ما
    تبثه تلفزيونات العالم عندما يحدث مثلاً ضرب وسحل وقتل وتدمير للشعب الفلسطينى بينما الناس تجلس أمام أجهزة التلفزيون تقزقز لب أو تشرب ببسى أو تأكل فول وهى توشر إما بحسرة أو بعدم إهتمام ( شوف داك بالله أدوه طلقة فى راسو كيف ؟ ) …أقترح عليك لتفادى هذه الحالة أن تختم مقالاتك بعدد من الأسطر الجادة فيها إقتراح بالحل وذلك تحت عنوان جانبى مثل ( بصراحة ) أو ( وقفة جادة ) يمكن أن تكتب فيها مثلاُ (( هذه أوضاع معكوسة لا تشبه الأمم المتحضرة أو المشروع الحضارى -دى من عندى _ وعلى الحكومة أن تبحث بجدية أكبر هذه الأمور حتى …….))

  7. حاج أحمد السلاوى | رد

    إذا سمعت بكرة إنو البروف جبرا كان فى ضيافة الحكومة لمدة يوم او يومين اسكت بس وما تتكلم أحسن إنت زاتك ياخدوك ضمن الض

  8. السلام عليكم ، البرف و الاخوان واخير نسكت ……………… عجبى

  9. السلام عليكم البروف أبوناجي والأحباب الكرام
    أولا هذه الأشياء التي عددتها يا بروف هي غيض من فيض ( أو فيض من غيض لست أدري!) وكأنما تعدادها الهدف منه إخفاء ما هو أعظم…..
    ثانيا… هذا السكوت وبس هم الذي أتى بنا إلى ما نحن فيه …. فهل سمعتم منذ سنة 1955وحتى الآن عن مسئول – ناهيك عن رئيس – تمت محاكمته أو مسائلته عن أفعاله؟ من يلهف البنوك ومن يبني العمارات التي تقتل المئات يكون عقابهم فقط أن يتركوا المنصب مع غنائمهم هذا إن لم يتم ترقيتهم كما حصل مع البعض ( ولا تحسب محاكمات عمرمحمد الطيب الاستعراضية بينما يصول وسجول أبوالقاسم حتى الآن) والسبب في ذلك هو السكوت وبس …. لعمري لقد بدأت اعتقد أن الجبن الذي عندنا ( وهو جبن رومي) لو تم توزيعه على أهل الأرض جميعا لعاش البشر والحيوانات أيضا في نعيم ولما وجدنا أحدا يذبح الأضحية في يوم عرفة … فكل البشر سيكونون أجبن من أن يمسكوا سكينا
    ثالثا : هذا السكوت وبس – بالاضافة إلى آثاره الأخرى – هو الذي تسبب في زيادة عدد المستشفيات زيادة رهيبة وجعل الناس تتعالج حنى عند من لا يعرف الاكتوديرم من الميسودرم …. واصبح السوداني الذي يعرف الحاصل مصابا بالسكري والضغط وأمراض القلب وحتى الكزاز وشلل الأطفال (دون أن نذكر أنه الدولة العربية المتفوقة في عدد حالات الأيدز)

  10. والله يااستاذ كتاباتك تعالج المغص ولكنها لا تمنع تكراره لهذا أضم صوتي للاخ محمود بلال وبمناسبة محمود بلال دا هاك “البصراحة” دي:
    عاد يالفاتح جبرا مابسألك!! حركتك بتاعة واحد في المليون دي الخواجات بدسوها من شفعهم!! ضمممممة تخجل!! .. هذه الكلمات ليست لي وانما سمعتها من زميلة لي من حيث اسمعها ولا تراني .. وبيني وبينك يالفاتح كلامها في محلو!ا
    لك التحية والتجلة ولزوارك الكرام

    1. عزيزى البو عزيزى
      لك التحية على المرور
      الحركة بتاعت واحد فى المليون دى هنا عندنا ما فيها حاجة ما شفتا الأولاد الصغار لمن يقولو فندى فندى أستاذ أستاذ بيعملوها .. هى عند (الخواجات) فعلاً حاجه تانية عشان كده لمن نعمل الطبعة الإنجليزية ح نغير الصورة إن شاء الله .. شكراً ع المرور مع قبول تحياتى …

  11. عزيزى البروف -( دة بوست سكوتى ) واذا شاهدت عربات الاسعاف بزماميرها المزعجة تجوب شوارع الخرطوم بمعدل اسعاف كل 5 دقايق – اكتر من عدد عربات الاسعاف التى تجوب انجاء وزنفات ليبيا هذه الايام (رغم انو البلد رايقة والشعب مبسوط ومافيش احتجاجات ولا اعتصامات ) اكيد الظاهرة دى راجعة لى نظرية اسكت بس –

  12. ميمونة عبدالله | رد

    بالجد كتاباتك تشفى الغليل ودائما اقوم بتقلها لمنتدانا

    1. الأستاذة / ميمونة كل عام وأنتى بخير .. وحمدا لله على سلامتك
      ا

  13. سكتنا وختينا العشرة فوق الاتنين !

  14. كتاباتك رائعه ولكن هي قليل جدآ من كتير..مثل ارتفاع الأسعار والعطاله وسراب وعد الخريجين وتفشي الجرائم الأخلاقيه وغير الأخلاقيه بسبب غلاء المعيشه وعدم وجود الوقت الكافي للرجوع للأخلاق والمبادئ والفضيله وذلك للأنشغال بالبحث عن لقمه العيش وعدم تلبيه الراعي لمتطلبات الرعيه و…وغيره.لك كل الشكر الفاتح جبرا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: