من الحكومة للمواطن

عزيزي المواطن، السلام عليك ورحمة الله تعالى وبركاته.
وصلنى خطابك المنشور قبل أيام على هذه الزاوية .. طبعا ح تندهش جداً من (سرعة الرد) بتاعي ده لأنك (يا وحش) بتفتكر إني ما جايبة خبرك وما شغالة بيك شغلة، مع إني شغالة ليك شغل (نضيف)، وعاوزاك تجيب شهادة (الأوزو) في (المواطنة).. هو أنا عندي غيرك منو عشان أشتغل بيهو؟ هو أنا بدونك يعني ح (أتحكم) في منو؟؟.
أنا قررت أكتب ليك الجواب ده لأني (مغتاظة) وزعلانة منك شديد وشايفاك (بتنقنق) كتير، ولا عاجبك العجب ولا الصيام في رجب.. ومهما أتعب عشان رضاك ألقاك بادي من (الألف)!! غايتو تبدأ من (الألف) من (الكاف) من (الياء) لازم تعرف إني أنا الحكومة وياني أنا (المسؤولة) منك، وأوعك تسألنى تقول ليا (الخلاك تبقي مسؤولة مني منو؟) عشان زى (جنس السعالات) دي أنا ما بحبها بس إنت أفهم إني مسؤولة منك.. يعني إنتا بس استمتع بالرحلة ودع (القيادة) لنا!!.
أوعك تقول (الرحلة طولت) إنتا ما سمعتا إنو (كل تأخيرة فيها خيرة؟) ، أنا عندى هدف معين أعملو وبعدين أقول ليك مع (السلامة يا مواطن).. بس إنت ما تستعجل ساكت، أنا هدفى أنقذك إنقاذ (نوهائي) يعني الإنقاذ (اللي هو) بس إنتا أصبر علي وما تستعجل عشان العجلة من الشيطان !!.
هسع مرات شايفاك قاعد (تنقنق) تحت تحت وتقول (هسع الحكومة دي عملت ليا شنو؟) طيب وكت المسألة جابت ليها (نقة وكلامات) أحسن أوريك عملتا ليك شنو.. وكت إنت طلعت (أكال ونكار). أولاً بالتبادي أنا وقفت ليك (الحرب) الكانت مشتعلة ليها سنين والكانت بتقضي على الأخضر واليابس وبيموتو فيها خيرة الشباب.. معليش (مصاريف السلام) طلعت أكتر من مصاريف الحرب (زى ما ذكرت فى رسالتك) لكن أستحمل ، مش أي حاجة عندها تمن؟
والحاجة التانية أنا الحكومة القاعد (تنقنق) فيها دي طلعتا ليك البترول من (طقاطيق الأرض)، وكمان صدرتو ليك وبقيت اسمك (مواطن بترولي) .. صحى زدت ليك أسعار الوقود (زى ما ذكرت فى رسالتك) لكن ده شيء طبيعى لأنو (الوقود) أسعارو بره زادت وكده، ولمن تزيد أسعارو (بره) لازم تزيد أسعارو (جوه)، وما تسألنى تقول ليا طيب (بترولنا) ده أسعارو ما مفروض تزيد في الحالة دي؟ لأنو السؤال ده بالذات لو عاوزنى أجاوب ليك عليهو واطاتك أصبحت !
وبعدين أنا وفرت ليك أي حاجة، وبقى أي شيء موجود وما فيهو (صفوف) زي زمان قبل ما أجي.. عاوز تشتري (رغيف) أمشي أي (مخبز)، رايح تلاقي مش نوع خبز واحد ح تلاقي (أنواعاً من الرغيف) صحى هو (مايكروعيش) لكن المهم هو موجود .. عاوز (لحوم) ح تلاقيها أشكال وأنواع.. لحوم (بيضاء) ولحوم (حمرا) وشي سجك وشي بيرقر وشي مارتدلا وشي شنو ما بعرفو داك..
والعجب لو عاوز تاكل (فواكه).. الفواكه مالية السوق والطرقات وبقو (يكوركو) بيها وسط الأحياء زي (النبق واللالوب) زمان.. شي تفاح وشي رمان وشى عنب أحمر وشي عنب أبيض وأي فاكهة عاوزا (الحكومة) وفرتها ليك.. بس إلا تكون (مصدوم) ساكت وما (عندك نفس تاكل)!! أها في الحالة دي نسوى ليك شنو ؟ نجيب ليك فاتح شهية ؟
بعدين تعال هنا… شنو بي مناسبة وبدون مناسبة تقول عني إني حكومة (جبايات) و(رسوم) و(دمغات)؟؟ هو أنا القروش دي قاعدة أعمل بيها شنو؟ ما قاعدة أشيد ليك بيها (المدارس) و(الشوارع) والمستشفيات و(الكباري) وأشتري بيها لي أولادك (الكتب والكراسات)!! هسع في ولد في مدرسة قالوا ليهو جيب (كتب) أو جيب (كراسات).. أو جيب حق (الكهرباء) أو حق الطباشير؟ وللا شفتا ليكا (باص سفري) إنقلب والناس ماتت عشان السواق زاغ ليهو من (حفرة) وللا الخريف لمن يجى (فجأتن) قاعد يجهجه الناس من عدم (المصارف)؟
وما تنسى إنى عملتا ليك العلاج (مجانن) وبدون قروش .. هسه لمن تمشى عشان تتعالج فى المستشفى فى زول بيقول ليك جيب قروش؟ آآي ممكن يقولوا ليك جيب (قطن).. جيب (حقن).. جيب (شاش) أصرف الروشتة دي ، جيب (الدواء الفلانى).. لكن لا يمكن يقولوا ليك جيب قروش وإنتا زول مواطن عيان والمواطن في ذمة الحكومة (اللي هيا أنا) !
أنا ما عاوزة أتكلم ليك عن (إستراتيجيتى الشاملة) وعن الحاجات التانية الأنا (أنجزتها)، أو الأنا (عايزة) أنجزها لأنها كتيرة وح تاخد زمن وإنت عارف إنى مشغولة وما عندى وكت واليوم كلو أدخل فى إجتماع وأطلع من إجتماع وده كلو عشانك وعشان أوفر ليك مزيد من الرفاهية ،،
فى الختام تقبل تحياتى وأشكرك على الرسالة لأنو زى ما قالو (الما دارك ما لامك) !

مخلصتك: الحكومة

ملحوظة:
أنا بعترف ليك إنو فى حاجات كتيرة عاوزة إصلاحات (زى ما جاء فى رسالتك) إنتا بس أدينى عشرين سنة تانى والأمور ح تكون (آخر حلاوة) !.

14 تعليق

  1. حكومة كوزستان الموقره
    تحيه طيبه و بعد
    خلاس يا حكومه مش قلتى نحنا أولادك و بدوننا أنتى ما بتسوى نكله خلاس تعالى شيلي الأولاد و أديهم الحاجات المكتوبه بالهيروغليفى فى رسالتك قريهم و عالجيهم و أكليهم و شربيهم أنا ما داير منك أيو حاجه
    التوقيع مواطن غلبان
    البروف
    ملحوظه
    تحياتى وتعظيم سلام لأم العيال بمناسبة عيدها

    1. تحياتك وصلت يا أب أحمد برضو كمان وصل لينا تحياتنا للحكومة هههههههه

  2. البروف أبو ناجي
    أكرم التحية والسلام
    يبدو أن الرد الذي جاءك من ديوان الزكاة جعلك تعتقد بأن (أم الرزايا ) قد تكتب إليك ردا … هي فاضية من التنكر لأولاد بطنها واستبدالهم بأولاد متبنين يسبحون ويقدسون بحمدها؟ والله العظيم ما كانت اتخيل أن السودان فيه مثل هذا القدر من الشر والنانية… الناس ديل خليهم لي الله عليك الله وشوف حاجة تنسينا بيها … والله كل مقال من مقالاتك يخلينا نتذكر حاجة سيئة هما عملوها وما قادرين نصدقها … لو كان في طريقة الواحد ينكر أمو اللي جا من بطنها كان نكرنا أمنا السودان ( وليس أمنا حكومة الانقاذ) لأنها سمحت لمثل هؤلاء أن يمرمطوا أبنائها

    1. يا هاشم ياخوى الشكية لى أب إيدن قوية

  3. السلام عليكم ، البرف الاخوان ، هو نحن حنعرف عن حالنا اكتر من اللى خلف سنسفيل ابو جدنا ، بالمناسبه امنا ما تقطع احتياجاتا من المنبع و يبقى ما عندنا ماهيه و لا الماهيه ما بتكفيها ……….. عجبى

    1. كوكو … خليك من الحكومة مسعول من الخير (فردتك) وين ما ظاهرة ؟

  4. تحياتى يا بروفلك وللاخوان
    والله يابروف انا شايف امك ماقصرت معاك لكن الظاهر عليك انت عايز اكتر من كدة وهى اكيد ماقصرت فى شئو حتى الحاجات اللى انت محتج فيها بتكون قدمت ليك وانت ماجايب خبربس هى ما اتذكرت فى اللحظة دى لانو هى مشغوله شوية وانشاء الله اى حاجه ناقصاك انحنا نترجاها توفرا ليك من صنوف العذاب المختلفه على اختيارك كمان اصلو حاجه انت مادايرا هى مابتغصبك عليها بس يا ريت تكون انت مبسوط منها
    وبعد ده كلو لو ماعاجبك كمان نحنا بنخليها تحاول ترضيك ونترجاها تحاول تصلح علاقاتها معاك حتى لواستغرق الوقت اكتر من 40 سنة تانى مامشكلة المهم انت ماتزعل وتمشى تفتش ليك ام تانية وتقول امكن تكون احن من الاولى بس انا داير اديك نصيحة لو ماسمعت كلامها وكبرت فى دماغك انك تفتش ام تانية ركز على الامهات الشابات وحذراك من الكبار لانهن زى رفيقتن المشيت خليتها دى وانشاء الله ربنا يديك ام حنينة منهن فى القريب العاجل

  5. والله يابروف الحقيقة الجديرة بالاهتمام فى رسالة امنا دى انها عاوزة تنقذنا انقاذ نوهائى – (اكيد من الدنيا البطالة دى عاوزة تودينا الاخرة حيث النعيم المقيم وعالى الجنان ) لنا الله سبحانه !

    1. إنقاذ نوهااااائى .. يعنى نوهااااائى !! بعدو مفيش أى حاجة يا بشاوى هههههههه

  6. إزيكم ياناس
    والله أنا إتأكدت إنو دى مؤامرة كونية/ لى كم يوم ماعارفة أدخل المدونة بس الليلة عيد الأم فشكلها كده فرجت بس الحكومة مصرة تكرهنا الأمومة كمان جابت ليها كضب!!!
    يابروف مرسى على تفقدنا وكوكو من يوم قال السلام عليكم بس وإحساسنا إنو أبى نون النسوة ونون نورا .

  7. الحبيب أبو ناجي
    سلام ومحبة وإحترام
    التحية لأم ناجي وكل الأمهات في يومهن، وتحية خاصة لأمنا الحكومة مع طلب ورجاء وإلتماس بأن تخاف الله فينا وتحل عن سماءنا بأخوي وأخوك، لأنو بلدنا بعد 22 سنة إنقاذ بقت ما مستحملة أية معافرات ومافي داعي للملاواة، نناشدها في يوم الأم أن تكتفي هي وزوجها المؤتمر الوطني المجيد بما أنجزاه من إنجازات ضخمة غير مسبوقة لا داعي لتعديدها، وأن تعتبرنا عيال حرام مافينا خير ولا رجاء وتنسى قصتنا نوهائي وربنا يحاسبنا ويحاسبها على كل ما عملته وعملناه من خير أو شر. بس نناشدها عبر دانقتكم ونستحلفها بمن أوجدها وأوجدنا من عدم أن تتدلى من رقبتنا وتخلينا لربنا الخلقنا هو كفيل بتدبير أمورنا وهو نعم المولى ونعم النصير. والسلام

  8. سلامات يا زول يا طيب,
    أولاً أعتذر لنفسي عن غيابها بوعكة زهجية,,,
    ثانياً: إنتو زعلانين من الحكومة دي ليه؟ مو الحيكومة كانت بت حلال؟ بي حالها بي حرب الجنوب, بي قلة المال في الجيوب؟
    الحكومة تتقطع ليكم ولا تتقطع ليكم؟ البركة فيها الخلت لينا في واحد زي أبونا الفاتح جبرا, هسا في ذمتكم لو كانت الحكومة ما (بت كلب) كان طلع واحد زي جبرا ولا حميد؟ ولو كانت مريحانا كنا طلعنا وهجينا وسيبنا البلد وإتغربنا؟
    يا جماعة شيـــــــــــــنة منكم والله الجماعة ديل تشوفوهم راكبين المكندش والمظلل وساكنين الصروح العالية ونايمين في الأسرة المخملية, تفتكروهم مرتاحين وما عندهم هم!!!! إنتوا ما جايبين خبر ساي بالهم الشايلنوا الجماعة المساكين ديل,, عليكم الله الواحد فيكم لو عندو مليارين في سويسرا و7 شركات في الخرطوم ومزرعة في سوبا ويخت على النيل وولدين في أمريكا, ما بشيل هم؟؟ نحنا الواحد لو عندو طبلية في السوق العربي بشيل هم خليك من 7 شركات…!!!!

  9. الوالدة العزيزة الحيكومة
    السلام عليكم ورحمة الله .. كيف حالك واحوالك في هذه المدة الطوييييلة (عشرين سنة) التي لم اراك فيها..انتي وين؟ انتي حية؟!! العالم كوووولو من حولنا ماشي لي قدام الا نحن، والحكومات الامهات البقولن انا انا أتغيرن ومهتمات بي أولادن وانتي أضان الحامل طرشا..الحاصل شنو؟ قلتي الحرب والحرب وقفت ونحن وقفنا..البترول طلع وبقينا نصدر ونحن واقفييييين..لا لبسنا عقال ولا حاجة والعمة زاتا بقت مترين من خمسة امتار..خزان الحامداب قام وكهربتنا ياها ، نففففس القطع ..المشكلة شنو؟ فينا ولافيك؟ لازم واحد فينا يتغير ، يانحن نغيرك ياتغيرينا وتشوفي ليك اولاد تانين وبيني بيني اللخيرة دي مابتغلبك..مادام مليتي لينا البلد كووولها عمالة اجنبية من دول الجوار واللاجوار..والواحد بقي يتلفت في شوارع الخرطوم كايس ليه سوداني..ساي يتونس معاهو.. وفي الختام اهنيك بي عيد الام أعاده علينا وعلي حكومة غيرك بالخير واليمن والبركات بركة المصطفي عليه الصلاة والسلام
    قولوا آمين

  10. السلام عليكم / نننننن ، البرف ابشر بالخير اهو الفرده ظهرت ، شتات يا فرده ، ارجعى لا ورا اكان ماتلقى النون استمرت ، و فى غيابكن مستمره و مستمره ، نحن امنا تعيشى انت ، لكن نحى كل امهات السودان ، الزايدات على جميع نساء العالم بعد عقد النكاح ، بالعقد الاجتماعى من تربية اطفال و رجال و غسيل و نظافه و خلافه ،و العقد الانتاجى حيث اغلب الامهات عاملات ………….. عجبى

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: