الشعب يريد زيادة المصروف

يبدو أن ظاهرة الإعتصامات ..والاضرابات .. والمطالبات التى تشهدها الساحة العربية قد ألقت بظلالها على الجميع فقد إستيقظت صباح اليوم على أصوات مظاهرات صاخبة ، خرجت من غرفتى لإستجلاء الامر لأفاجأ بان أبنائى ناجى ونشوى يطوفان بأرجاء المنزل وهم يحملان (قطعة كرتون) مكتوب عليها بالقلم الأسود الشينى (الشعب يريد زيادة المصروف) وقد حولا المنزل إلى ساحة (تحرير) حيث إمتلأت الجدران بالملصقات التى كتبت عليها بعض الشعارات والمطالب المختلفة من شاكلة :
• أوقفوا الصرف على السجائر
• لا تدخين بعد اليوم
• اللحمة أساس الحكم
• لاب توب لكل مواطن

ما أن شاهداني حتى إزدادت حدة هتافاتهما وتعالت ، إقتربت منهما طالبا منهما أن يتوقفا عن الهتاف وينفضا (ويفرتقوها) قبل أن أقوم بتفريقها مستخدماً القوة ..
– نفرتقا ليه؟
– مظاهرتكم دى غير قانونية
– لكن دى مظاهرة سلمية والدستور بيقول …
– (مقاطعاً) : القانون بيقول تطلعوا ليها تصريح ! إنتو هسه عندكم ليها تصريح !
– كل ما نكلم ماما نقول ليها عاوزين تصريح تقول لينا ما بديكم عشان خايفة ناس يتدسوا وسطكم وتحصل مشاكل ! والبلطجية يجو ينضموا ليكم !
– وهسه إنتو عاوزين شنو؟
– عاوزنك تحقق لينا الحاجات دى قبل سقف المطالب بتاعنا يعلا !!
– يعلا دى شنو كمان يا أولاد اللذين ؟ أوع كمان يكون فيها (أرحل) دى تبقى مصيبة سوداء !
– إنتا كمان يا بابا بتخاف من (أرحل) دى زى الجماعة !!
– كيفن ما بخاف مكنكش فى أمكم دى ليا عشرين سنة .. أرحل أمشى وين يعنى ؟
– طيب لجنة (التغيير) عاوزه تقعد معاك !
– هلا .. هلا .. هو كمان عملتو ليكم لجنة تغيير ومفاوضات وكده !
– أيوه أنا الرئيس و(نشوى) المقرر !
وجلسنا سوياً .. وقد تفاجأت بأن أول بند تريد أن تناقشه (لجنة التغيير) هو (الفساد) … نعم الفساد
– يا أولاد إنتو ما عندكم راس؟ فساد شنو كمان ؟ البيت ده لا بيعمل (عطاءآت) ولا (ببنى عمارات) ولا عندو جمعيات خيرية وهمية ولا بشيد طرق وأنفاق ولا عندو شركات وميزانيتو معروووفه وبتتراجع من (أمكم) على داير المليم .. أها الفساد ده يجى من وين؟
– الصرف البذخى ده ما فساد ؟.. لما ميزانية (السجائر) بتاعت حضرتك تكون أكبر من ميزانية (التعليم) ده مش إسمو فساد !
– (ضاحكاً) : فساد شنو يا أولاد إنتو جنيتو ؟ ما الدولة الإسمها دولة ميزانية (الأمن) فيها أكبر من ميزانية (التعليم) والصحة ذاااتا !
– الدولة عاوزة (تأمن روحا) لكن إنتا عاوز (تهلك روحك) ونحنا ما ح نسمح بالعملية دى
– لكن …
– مافيش لكن .. موافق على إيقاف التدخين وتحويل ميزانيتو (للتعليم) وللا ما موافق؟
بينى وبينكم تحسباً لإرتفاع حدة الإعتصامات والإضرابات داخل المنزل وتخوفاً من رفع سقف المطالب والمسألة تبقى فيها (أرحل) وشنو ما عارف ولأن (التدخين ضار بالصحة) وجدت لزاماً علي ان ارضخ فوراً لهذا الطلب .
– أها المطلب التانى شنو؟
– زيادة المصروف عشان يتماشى مع زيادة الأسعار الكلو يوم دى ! إنتا هسه يا بابا عارف سندوتش الفول المصلح بى كم؟
– ما عارف !
– ما دى هى ذاااتا المشكلة .. لازم تكون ما عارف لأنك ما بتتفقد (شعبك) وما بتعرفوا بياكل شنو وبيشرب شنو والمصروف البتديهو ليهو ده كفاية وللا ما كفاية وبيقعدو كم يوم !!

بدون أى مناقشة تمت الموافقة على زيادة المصروف ليتلائم مع (سياسة التحرير) ! على الرغم من عجز الموازنة المنزلية وقلة الدخل وكثرة الإلتزامات وكمان بصراحة كده خوفا من (إرحل) !
وبعد أن تم إستعراض كافة المطالب وقبولها (طبعاً) طلبت من أعضاء (لجنة المفاوضات) إنزال كافة اللافتات وإزالة كافة الملصقات وإيقاف (المسيرات) غير أن الإجابة كانت حاسمة :
– عاوزين المطالب دى تتحقق فوراً !
– يا جماعة أدونى فرصة يومين تلاته أجتمع مع حكومتى أقصد (أمكم) عشان نتدارس الموضوع
– ما فيش حاجة إسمها تدارسوا الموضوع .. ليكم عشرين سنة ما إتدارستو ليه؟ منتظرين شنو ؟ لازم المطالب دى تتنفذ فوراً وإلا …
– كمان جابت ليها تهديد … وإلا شنو؟
وهنا قامت نشوى من مكانها متجهة ناحية (الكاميرا) التى كانت تخفيها فى مواجهتى بعناية وأحضرتها قائلة :
– ما تهديد ولا حاجة بس ح نقوم نرسل الشريط ده (للجزيرة) !!

كسرة :
عشان كل حاجة ولا (تغطية الجزيرة) .. قمت بتنفيذ المطالب على الفور !

Advertisements

22 تعليق

  1. (لما ميزانية (السجائر) بتاعت حضرتك تكون أكبر من ميزانية (التعليم) ده مش إسمو فساد !) هذه اصدق عبارة اقراها خاصة اننا كاولياء امور مدخنين نعيشها واقعا. بارك الله لك في عيالك يا استاذ.

  2. وانت يا الفاتح التدخين العليك شنو وانت زول قلبك خربان
    غايتو انا الشعب

  3. سلام يا أبو ناجي .. وان شاء الله علي ايدك وايد ناجي واختو نشوة تجي نجاتنا كلنا .. طبعا يا أبو ناجي وزي ما انت عارف المتنبي قال:( السيف أصدق أنباءا من الكتب في حده الحدُّ بين الجد واللعب ِ)..ولكن
    ولكن والله كلمات أولادك دي أصدق وأمضى من سيف المتنبي وكلماتو القالها قبل مئات السنين وما زال الناس بيرددوها .. لأنو ناجي ونشوة قلبو المفهوم .. وجابو المفهوم البمشي مع عصر العولمة ..وجابو الإسلوب النافع في بعض المواقع حيث لا ينفع إلا هذا الأسلوب .. ويا ريت الجارة ما تعمل أضان الحامل طرشة .
    بس عندي طلب صغيييييييييير ..من ناجي ونشوة .. قول ليهم :عندكم خالة مغتربة ليها 31 سنة .. ما قادرة ترجع .. وابو العيال إتوفى ( له الرحمة ) وخلال 30 سنة كان بلبي طلبات الحكومة وبدفع جباياتها كلها .. وحسى هو مشى وخلى عيالو في نص الطريق . .في الجامعات المصرية ,, ذي ديل ما من حقهم يرجعوا السودان معززين مكرمين و تقبلهم الحكومة في الجامعات السودانية بدون جبايات .. عشان أبوهم قضى عمرو بيدفع .. وهم الحين بيعانو عشان يسددوا مصاريف الدراسة ..قول لنجاجي ونشوة بالله أعملوا مظاهرة باسم الأيتام خارج السودان .. ويلحفظهما الله ..

    فتحية الفكي
    جامعة الأمير محمد بن فهد
    الخبر / السعودية

    1. العزيزة فتحية
      مرحب بيك معانا بى جاى .. وربنا يرد غربتك وغربة العيال وربنا يوفقهم ويحرزوا أعلى الشهادات ..

  4. حاج أحمد السلاوى | رد

    يعنى الشعب بتاعك دا .. ناجى ونشوى ما قادرين يصبروا سنة واااااحدة بس لحد ما تبقا مدة كنكشتك بامهم 22 سنة وتكون بقيت مواكب للمسيرة إياها وتكونوا متلازمين ويديكم طولة العمر تسووها 42 سنة .
    لاكين انا معاهم ( الشعب الصغير) فى حكاية ترك التدخين ..ولوقدروا عملوها وخليت الدخان.. تاكد تماماً إنو ناجى دا حيكون رئيس جمهورية بيت المال فى يوم من الأيام.. أما الانسة نشوى حتكون نائبة رئيس الحزب .

  5. مساء جميل خالي من التدخين
    أبونا الفاتح والله إنت ما مفتح !! قول لي كيف؟
    كان مفروض أول ما (إتزنقت) في عقر (دارك) طوالي تشبكهم (زنقة زنقة) , (دار دار) , وتأجر ليك مرتزقة، يعني تجيب ليك كم شافع كده من المايقوما وتهددم بيهم إنك ح تتبناهم وترميهم في الشارع.
    أول مرة غايتو نشوف لينا مطالب بتتحقق بالسرعة دي!!!
    بعدين وين سلاح الجو الشبشبي واللواء الخامس العصوي بتاعك؟ حرم تصرصر ليهم وتسمع جاك وتسمع جيك ووب وحي علي لمن يجو الدول المجاورة (الجيران)، وتقول ليهم حلفت يمين البجيني قريب هدي السكين.
    آل إيه آل؟ مظاهرة علي آل.
    كســــــــرة: بمناسبة التدخين ده مسعول من الخير، أبو الجعافر جعفر عباس وين؟
    (هسي المناسبة شنو؟)

  6. عليك الله يا أستاذ موضوعك دة البد بيهو
    يقوموا يعرفوهو ناس بيتي ونبقى أنتم السابقون ونحن اللاحقون ويقولوا لي الشعب يريد تغيير النظام
    يا بن علي ….. عفوا ….. يا الفاتح

  7. السلام عليكم / ن ، البرف زمان قلنا التدخين ضار بالكل ، لكن البرف عارف وعامل اضان الحامل ، طلع القديم والجديد ، اخدت ميه زياده يعنى بترولك سعره ارتفع ، لازم تستجيب ، لكن حكاية ارحل دى عايزه ليها اتوس ……………عجبى

  8. ازيكم ياناس
    غايتو يابروف ذى ماقالو فى المثل ..بنىآدم ما بتضمن..(هسى دا مثل؟)لكن عليك الله ماصحى ؟ الطامة الكبرى تجيك من جوه البيت ومن منو حبة مفاعيص ..لا راحو ولا جو.
    غايتو انا عندى ضحى الصغيرة دى ولا بتشاوربتزيد بدون اى مقدمات ولا مظاهرات والله يقدرنى انا افتح خشمى طوالى تتهمنى انى ما بحبها وانا ضعييييييييييفة قداماطوالى بستتسلم وبصراحة بخاف من الإنفصال واقوم اروح فى الرجلين(هو نحن الفات مافقنا منو)!!!!!

  9. السلام عليكم ابوناجي وجماهيره
    والله يا بروف حاجة روعة وتخلي الزول يفكر وهذا أسمى ما يدمح إليه الكاتب: أن يدفع القاريء إلى التفكير وليست قصة ساخرة وتنتهي فقط…. نعم الله يخلي ليك ناجي ونشوى اللي ورونا أن التغيير يبدأ من الداخل … وحتى الماعندو غير رقبتو مفروض يحاسب كل عضو: مثلا العيون دي ليه يغنوا ليها ويكحلوها ويعملوا ليها نظارات؟ ليه ما يركبوا النظارة في الركبة مثلا؟ وليه الأكل يودوه الفم فقط مثلا؟
    بالمناسبة الفكرة بتاعت ثورة وديمقراطية في البيت كان سبق بيها احسان عبدالقدوس في واحدة من قصصوا الأولاد طالبوا بأن يكون رئيس البيت واللي يمسك المصروف بالانتخابات… وأترشح الوالد وواحد من العيال ضدو وقعد يعمل حملات انتخابية ويعد أخوانو بزيادة المصروف وغيره ويعلق الملصقات … وبعد الاقتراع أدى صوتو لوالدو…. بس التجربة خلت الوالد ديمقراطي أكثر لأنو يمكن كان خايف من أرحل زي حضرتك…
    بس أنت خايف من أرحل ليه …. هو البيت باسم منو؟ أعمل حسابك يازول

  10. خطأ مطبعي طبعا ما يطمح وليس ما يدمح … ياربي هو يدمح دي عندها معنى؟ هم بيقولوا للرئيس ارحل ليه؟ كانوا جابين الرؤساء من تشاد وللا إيه؟ والله انا متعاطف مع على عبدالله صالح… يرحل يمشي وين؟ اليمنيين ما عندهم قبائل العرب الرحل وما بيقولوا الرحيل عز العرب

  11. اليوم 28مارس 2011 هناك كاريكاتير في جريدة الاخبار المصرية ( التي اشتريتها قبل نصف ساعة) وهو يصور ولد وبنت شايلين لافتة مكتوب فيها ( الشعب يريد زيادة المصروف) وعلى فكرة هم بيشبهوا ناجي ونشوى ويمكن هم ذاتهم !! أنا قلت يمكن ناس الأخبار عندهم كاميرا مخفية في بيتك لو كان معاي سكانر كان رسلت الصورة للبروف في الأيميل

  12. هتافات ناس بيتنا
    الشعب يريد تغيير القناة
    فتروا من الجزيره..
    ومره مره لمن ابوهم يتعنت بتسمع الشعب يريد .. وضحك
    ابوهم بقى عااامل حسابه
    ثقافة التحرير
    الى اين..؟

  13. سلام يابروف وربنا يعينك وصدقني انت عاقل
    انا عريس جديد وبدخن شيشة لهذا ولغيره من اسباب قررت مااجيب اي “شعب” والحكومة وافقت بالاغلبية الصامتة طبعا.. خوفا من “التغيير” ، بلا مظاهرات بلا وجع دماغ ، واحكم بي رواااااقة ٤٢ سنة ، هو الغذافي دا احسن مني؟
    ثورة.. ثورة ..ثورة.. تحيا الحكومة بتاعتي (قلتها وانا اغادر المنصة ضاربا إياها بيدي المقبوضة)

  14. أول مرة أزور مدونتك القيمة .. تهنئتي لك على المجود المبذول والرائع..

    1. شكراً ليك كتير يا منى ومزيد من التواصل … ألف مرحب

  15. ياسين شمباتى | رد

    هههههههههههههههههههه,,وانا ايضا اريد زيادة المصروف وايقاف التدخين دا ! عفيت منهم المناضلين الجسورين حبايبى الحلوين..
    عليك الله يا بروف تحياتى ليهم شدييييد وللمدام..

  16. ياسين شمباتى | رد

    منصور..سلام ومرحب بيك كتير..
    لقيتك ديكتاتور اصيييل,,لكن والله دى زنقة زنقة ذااااااتها..

    الحبيب كوكو..سلام وشوق ومحبة..
    وين الحى بيك؟؟

  17. دي حاجة كويس انك رضخت ليهم بالسرعة دي لو ما عملت كدة إحتمال زي ماقالوا يجيوك ناس الامم المتحدة اعمام الاولاد والخيلان وتبقي مشكلة كبيرة ويخشو لحماية المواطنين في المنزل وتبقي خراب ديار ليك وحماية مصالح بالنسبة ليهم وتبقي في مباحثات سلام مرة عند الجيران مرة في الحلة ومرة ناس اللجان الشعبية لحين حضور مبعوث خارجي وين وجيجك مبعوث خاصة لمعرفة الاوضاع الداخلية والظلم الحاصل واعمل حساب من خيارات تحديد المصير. والله يكون في عونك.

    ملحوظة:-
    انا طبعاً مع شباب الثورة

  18. بعد التحيه والاحترم يا بروف طبعاً كل ما تكتب بتزيل مننا كميه من الهموم والحزن وربنا مايحرمنا منك
    كسره
    انا من اشد المعجبين بي كتاباتك والا الامام مقال مقال .

  19. ممكن يا استاذ تسير مظاهرات مظادة يقوم بها مناصروك والا بقوا كلهم معارضة
    اعمل زي علي عبدالله صالح يخرج الجيش في مظاهرات بلباس مدني

    واقول للاخ هاشم حسين الشعب يزعل على علي عبدالله صالح الشعب اليمني كريم والا المفروض يشنقوه مش يرحلوه

    أنس محمد من اليمن

  20. ممكن يا استاذ تسير مظاهرات مظادة يقوم بها مناصروك والا بقوا كلهم معارضة
    اعمل زي علي عبدالله صالح يخرج الجيش في مظاهرات بلباس مدني

    واقول للاخ هاشم حسين لا يزعل على علي عبدالله صالح الشعب اليمني كريم والا المفروض يشنقوه مش يرحلوه

    أنس محمد من اليمن

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: