أبحث معنا

صدر مؤخراً قراراً رئاسياً يقضي بتصفية عدد 22 شركة حكومية، وعندما قامت صحيفة (الأحداث) بسؤال الدكتور بابكر محمد التوم، نائب رئيس اللجنة الإقتصادية بالبرلمان عن عدد الشركات الحكومية المتبقية بعد هذه التصفية إجاب بأن الشركات المتبقية ( لايعرف عددها إلا الله ) !
بينى وبينكم فقد إطمأنيت فعلى الأقل هنالك جهه ما تعرف أعداد هذه الشركات التى تقوم بالإستثمار فى أموال المسلمين وتنميتها من أجل مجتمع مسلم يرفل فى الرفاهية يتمسك قادته بالشريعه حكماً ومنهاجاً .
على الرغم من ذلك الإطمئنان الذى شملنى وأنا أقرأ إجابة السيد الدكتور نائب رئيس اللجنة الإقتصادية بالبرلمان إلا أننى كمواطن ولى (جعل) ونصيب في هذه الأموال التى تدار بها هذه الشركات فقد رايت أن أسدى خدمة (لأمنا الحكومة) وذلك بإقتراح عدد من الأفكار التى ربما تساعدها فى التوصل إلى (شركاتها الرايحة) وإليكم بعض هذه الإقتراحات .

– إنشاء الهيئة العامة للبحث عن شركات الحكومة الرايحة :
وتشكل هذه الهيئة (طبعن) حسب نظرية (الشطرنج) من المسئولين الذى إستقالوا أو تم أعفائهم من مناصبهم مؤخراً على أن تكون مهمتها الأولى هى البحث عن هذه الشركات الحكومية الرايحة متخذه فى ذلك كافة السبل بما فيها النشر والإعلان عبر الصحف اليومية من شاكلة (أبحث معنا) .. شركة حكومية سليمة العقل .. تبلغ من العمر عشرين سنة .. ترتدى ثوب الورع والأيمان .. وتنتعل الطهر والعفاف .. من يعثر عليها يكون (الجن الأحمر) قريبو وكده !

– تكوين قسم مباحث الشركات الحكومية الرايحة :
ميزة هذا القسم أنه يتبع إلى (إدارة المباحث) بوزارة الداخلية حيث يمكن أن تستخدم الأساليب الشرطية المتقدمة فى التوصل إلى أماكن هذه الشركات الرايحة بما فى ذلك الكلاب البوليسية والتى ما أن (تشم الأثر) حتى تتجه إلى مبنى (الهيئة العامة للبحث عن شركات الحكومة الرايحة) !
كما يمكن للإخوة فى (قسم مباحث الشركات الحكومية الرايحة) أن يستخدموا أسلوباً آخر وهو أن يقوم أفراد منهم بالزى المدنى بحمل مايكرفونات والتجول أمام الشركات وهم يهتفون أمام باب كل شركة قائلين (هيا لله) فإن كانت الشركة من الشركات الرايحة (إياها) فسوف يأتيهم الرد فوراً (لا للسلطة ولا للجاه) !

– التعاون مع (فكى تلفزيون) وفكى تلفزيون هذا لمن لا يعرفه هو (فكى) معروف (بغرب الحارات) لقب بهذا اللقب لإستخدامة السحر فى معرفة (الرايحة) إذا يقوم بملئ (طشت) بالماء ويقرأ عليه بعض التعاويذ فما تلبث أن يرى (سيد الرايحة) الرايحة بتاعتو !وبما أنو سيد الرايحة هو (الشعب) ففى هذه الحالة لابد أن يتم إختيار عدد من (نوام) البرلمان الذين يمثلون دائماً بالشعب لمقابلة الفكى تلفزيون وعليهم أن يكونو (واعين) ويختو النية (مبانى الشركات الرايحة) حتى لا يقوم (فكى تلفزيون) بالبحث عن رؤساء مجلس إدارات الشركات الرايحة ويتملى الطشت بصور السادة النواب وتبقى (مصيبة) !

– بما أن هذه الشركات (الرايحة) ليس لديها إسم أو عنوان فى السجل التجاري وليس لديها ملف في الضرائب كما ليس لديها ملف بديوان الزكاة فيمكن التوصل إليها عن طريق (إيصال شركة النفايات) إذ يتم مقارنة إسماء الشركات المسجلة لدى مسجل الشركات بالإيصالات الموجودة لدى شركات النفايات وأى شركة لا يوجد إسمها ح تكون من الشركات الرايحة ، عيب هذه الفكرة هو أن تكون شركة النفايات التى تتعامل مع (الشركات الرايحة) هى ذااااتا (شركة رايحة) !

كسرة :
طلبت من جارتى (التومة الوداعية) أن تساعد الحكومة فى التعرف على مكان شركاتها (الرايحة) فقالت لى :
– إنتا يا أستاذ نسيت وللا شنو .. زمااانك مش ختيت ليا (النية) بتاعت الشركات الرايحة دى عشان أشوفا ليك وين ؟ قام ودعى طلع (بره الشبكة) … وحات سيدى يا استاذ الشركات دى لو قريبة تكون فى (ماليزيا) !!

Advertisements

7 تعليقات

  1. الشركة الحكومية يا بروف تعني ( في المتعارف عليه زمان يعني) انها شركة ملكية عامة ترجع أرباحها للمال العام يعني موش بتاعت ناس محدودين … وهسع كل حاجة بقت بتاعت الجماعة يعني ما في شركة حكومية ذاتا لا رابحة ولا خسرانة وعشان كده الفكي بتاعك ده لو قدر يطلعها أكيد يكون الجن الأحمر ذاتو ولابد من الاستفادة منه في أن يبحث لنا عن مخرج مما نحن فيه…. لأنو أي حاجة قلنا تكون مخرج جربناها … قلنا الديمقراطية قالوا لينا الديمقراطية هي ما نحن فيه وانتو جيبتونا بالتصويت (صوّت هنا قد تمكن بمعنى صاح وعلا صياحه) … قلنا الشريعة يمكن تحلنا قالول لينا الشريعة هي ما تحكم به ( شريعة منو؟) قلنا يمكن يحلنا إنقلاب قالوا ثورة الإنقاذ ما إنقلاب …ما عاجبكم وللا شنو؟

  2. هاشم ……………. أشكرك على المتابعة والتعليق …

  3. السلام عليكم / ن ، البرف دى فعلن شركات حكوميه بلوحات خاصه ، اقصد لو ربحت فهى خاصه خاصه ومن ذوات الخصوصية ، ولو خسرت فهى عامه عامه معمعمه ، زى الخطوط خططوها و بعد الخطط رجعوها الخط ، الشكيه لى اب ايدن قويه ……………عجبى

  4. عليك الله خليهم يبحثوا لينا معاهم عن شركة إيهاب للتنمية

  5. والله يابروف انا كانت عندى فكرة البحث عن الشركات الرايحة دى ولكن اتفاجت لمن مشيت لى فكى وقلت ليه ياخى انا شغال فى شركة خاصة ورفدونى بالله شوف لى السبب فى رفيديتى منو من القرون الكبار الفى الشركة واذا بالفكى يختفى من امام ناظرى اختفاءا ابديا وبعدها قنعت وقلت انشاء الله يجمع بهن كلهن ويغتس حجر الدسدسوهن ديل

  6. البروف الحبيب…سلام وعودا طيبا..
    قلت لى عندك نصيب وجعل ؟؟مع العلم بان الجعل فى اللغة العربية هو الجعران ايضا ! يعنى بكرة يرموا ليك جعران ويقولوا ليك دا نصيبك من البترول! واسود كمان ! ههههههههههههه..

  7. سلام يا جماعه غايتو أنا من ما قريت الخبر ده مشيت طوالى على حكيم حلتنا و عمك ده راجل كبير فى السن بنرجع ليه لمن تكون فى مشكله صعبه الحل……. أها قمت حكيت ليه القصه هنا عمك أتنحنح و حكه رويسه و مسك عصايته و قنب يشخت بيها فى الواطه و بعد مده قال لى أنقول ليك قوله يا ولدى ما عندك حل ألا تبارى المثل البقول( سيد الرايحه بفتش خشم البقره) و يا ولدى أنت عارف حلتنا دى فيها بقره واحده بتاعه ناس (فلان) كدى أمشى عليهم و أفتح خشم بقرتهم يمكن تلقى ليك شركه شركتين بتمضغ فيهم… أها من دربي داك مشيت لناس (فلان) عشان أفتح خشم بقرتهم لقيت ليك الجماعه متمحنين و قاعدين فى ضل الصالون بعد السلام و حق الله و بق الله الولد جاب لى كوز مويه كرطعته ( بالمناسبه نصه اتدفق فى سروالى عشان الكوز مقدود) المهم بعد داك قلت ليهم دحين أنا مغروض فى المبروكه بقرتكم …. يا ريت كان ما قلت…. الجماعه قنبو يبكوا هو عاد جنس بكاء شى تجعر و شى تتنف و نسوان بالحوش الورانى يوصفن يالغاليه الرضعتى جهالنا و ما عارف فارقتينا قبل ما نشوف عجولك يا أم كوارع نضيفه و لبنك بملى الصفيحه….وررروووك ألخ. أها بعد ما الجماعه أستغفرو و سكتو سالتهم يا جماعه الحاصل شنو؟؟ قالوا لى فى الحقيقه البقوه دى أصرت ألا تمشى مع الوفد البقرى الماشى مصر لزوم التهانى لثوره الشباب أها قلنا ليها أمشى يا المبروكه بس جيبى لينا معاك سحلب عشان شايفنو فى المسلسلات و ما عارفنو ده شنو… المهم مشت ضحويه أمبارح و قالوا هم 5000 راس أها عليك أمان الله بالليل كده سمعنا فى نشره عشره قالوا ده الوفد الوحيد البمشى و تانى ما بجى راجع لأنو مسفرنه لزوم يتأكل و كده…. طوالى لملمت نعلاتى و قلت لنفسى يا ولد أحسن الواحد يلزم بيته عشان ما يهبش ساكت لانو يمكن الواحد ممكن يكتشف شركه ضايعه مسجله باسمه و هو ما عارف بعدين نقعد فى والله ما حقتى وما عارف …… عاقل ولا ما عاقل؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: