صندوق دعم المسئولين

(فجأتن) وبدون أن يسألهم أحد بدأ كبار المسئولين فى الإفصاح عن (رواتبهم) ! ولأول مرة يعرف (العبدلله) ومعاهو الشعب السودانى الفضل كم يبلغ مرتب السيد نائب رئيس الجمهورية وكم يبلغ مرتب والي الخرطوم .. وكم كان سوف يكون جميلا لو بالمرة كشف لنا المسئولون عن مرتبات (الجيش الجرار) من المستشارين الذين لا يستشارون !
بعض أن إطلعت على مرتبات أولئك المسئولين من خلال تصريحاتهم الأخيرة حتى هتفت فى حزن وأسى ( حرام والله حرام معقولة بس؟ هسه القريشات دى بتعمل ليهم شنو؟).. كان قلنا الكهرباء البيت كلو مولع من صباح الرحمن والكم تلاجه الفريزر ما بيقيفوا أصلو لزوم اللحمة والبيرقر والسجق ما تجيهم حاجة .. وشاشات البلازما والكمبيوترات حقات الأولاد وكمان الغسالة الفل أوتوماتيك والخلاطة والسحانة والشنو ما بعر داك .. أها الكهرباء دى بى كم؟
خليكم من الكهرباء .. البنزين ده ما مشكلة ؟ العربية البتودى الأولاد المدرسة وتجيبهم عاوزه ليها فى اليوم بنزين بي كم؟ .. العربية البتودى المدام للشوبنج وللمناسبات عاوزه ليها بنزين بي كم؟ .. العربية البتجيب اللحمة والخضار وباقى الأغراض .. (بإعتبار المسئول عندو ترحيل جماعي) البنزين بتاعا فى اليوم بي كم ؟ أها العربات دى بتمشى بالموية ؟ شوفوا البنزين البتستهلكو ده قدر شنو؟ وبي كم ؟
نجى للمدارس .. لو بس المسئول عندو تلاته فى مدارس خاصة وواحد فى جامعة خاصة ديل براهم ما (نص المرتب) !
خليكم من مصروف الجيب اليوماتى وحق الفطور (المسئول) والإسكراتشات والبارد والساخن واللازم منو !
ده غير العلاج .. (بالخارج طبعن) فما أن تلتهب إحدى أذنى المسئول نسبة لعدم إستخدامهما بالسنين حتى يهرع بالحصول على تذاكر الدرجة الأولي له وللعائلة الكريمة ويدفع (دم قلبو) فى نفقات الكشف والعلاج والأدوية والإقامة الخمسة نجوم .. ثم العودة محملا بالهدايا للأقارب والأصحاب والجيران (معقول مسئول يرجع من السفر وإيدينو فاضية)
أها (مرتب الجن) ده بيستحمل حاجات زى دى؟
الناس دى غلبانه والله .. الناس دى عايشة كيف؟ حالتو لسه ما إتكلمنا على (الملبس) المفروض يكون (ما خمج) والمأكل المفروض يكون (من طيبات ما رزقناكم) وضيافة الزوار من (بارد وساخن) وشاى وسكر وبن ولين والمواجبة فى بيوت الأفراح والأتراح (يعنى معقول والي يخت ليهو فى الكشف عشرين جنيه) !
المسئولون أعزائى المواطنين لايجأرون مثلكم بالشكوى .. وما قاعدين (يتجرسو) زيكم كده .. هم راضون بما قسمه لهم الله من مرتبات تكاد بالكاد تفي بضروريات الحياة ولأن المسئولية تفرض عليهم تحمل الصعاب فهم يعملون فى صمت من أجل أن تكفيهم هذه المرتبات الهزيلة ولا تستغربوا أبداً أعزائى المواطنين إذا جاء اليوم الذى تقومون فيه بمشاهده أحد هذه المواقف :
– (مسئول يخاطب تيم الحراسة الذى يتقدمة) : بالله ما تلفو شمال عشان آدم سيد الدكان ده ما أديتو حسابو وكمان ما تمشوا بالظلط داك عشان عباس الجزار ده أنا زائغ منو
– (بتاع اللبن الصباح يخاطب الخفير) : والله أنا لا بعرف والي لا بعرف جن أحمر لو ما أديتونى حق الشهر ده والفات رطل واااحد ما بديكم ليهو
– (الزوجة تخاطبه) : هسه الأولاد ديل ح تعمل ليهم شنو؟ قالو ليهم لو ما جبتو القسط بتاع الرسوم ما تجوا المدرسة
– (الأبن الصغير يخاطبه) : معقوله بس يا بابا كل يوم جنيه بس مصروف ده هسه بيجيب شنو؟
– (يخاطب زوجته) : معقوله .. كل يوم عدس .. كل يوم عدس .. بكره أعملي لينا رشوشه !
– (يخاطب أولاده) : يا أولاد وقفوا التلاجه دى وأطفوا النور .. الجمرة دى عاوزه تقطع
كسرة :
المسئولين ديل غلبانين خلاس عشان كده حقو نعمل ليهم .. صدم .. (صندوق دعم المسئولين) !!

Advertisements

11 تعليق

  1. ما مشكلة نزيد الدقيق و المحروقات عشان نوفر ليهم الحاجات دي -انت عارف الناس ديل لو نزلوا الشارع أخطر من الشعب.

    1. عرفات …. هههههههههه دى قوية !

  2. وسعادتك يابروف بتفتكر انو ال(حمدم) الحقنا دا بخارج معاهم ولا تنجر ليهم واحد جديد؟

  3. السلام عليكم / ن ، البرف ، الاخت نوره ، انا موقع مع البرف عقد ، تحت تحت ، لتصنيع مواد ال(حمدم) لكن البرف ضرب المبلغ و ما شفنا حاجه ……………..عجبى

  4. أنا ما قريت أو سمعت مرتبات الوزراء والمسئولين دي … وبصراحة ما كنت عارف إنو يدوهم مرتبات … لأنو كل حاجة حقتهم ويلقوها مجانا ياخدوا مرتبات ليه؟ بس الكنت أعرفو قبل سنتين أو تلاتة إنو ميزانية تسيير مكتب وزير إقليمي كانت 3ملايين شهريا ودي كانوا يتكلموا عنها لأنو ما تتصرف وياخدها مدير مكتب الوزير لي نفسو …. يعني الوزير ما سائل فيها

  5. برافو ياستاذ خلاص ماخلييت حاجه انا مشارك في الذعم

  6. البروف وجميع السمار ربنا يمسيكم دايما بالخير, الجماعة ديل دايرين ياكلو عقلنا كدا سااااااااااااااكت, امانة فيكم ياتو مسؤول كدا دا ماهية الحكومة مكفياهو, يمين متمومة تسهيلات عمل بس, غايتو زمن الزمن الجميل كان عندنا جارنا بالحيطة محافظ وانا بشهد ليهو بالنضافة لدرجة انو يوم الحرامي جاهم في البيت مالقي اليسرقو غير راديو وجلابية قديمة كمان, لله درك يا الفي بالي, طبعن الجماعة في النهاية ما عجبهم جتري لانو بيسال دي ليشنو وديك مودنها وين اخرها طفشوهو ولحدي الليلة, بس امانة عليك يابروف وضح لينا بس موقف الجماعة الداقين جرس عشان يشاركو في الحكومة وبلا خجلة, الناس منتظراكم تنتفضو وانتو دايرين ترجعو لي السف تااااني, حليلك يا ابريل ولا نحن مافيهو ياربي؟؟؟؟؟؟؟؟

  7. البروف الحبيب…سلام..
    غايتو انا مشارك وبشدة فى حنة ال(صدم) دى! زحوا لى منهم تب.

  8. السلام عليكم
    ياسين شمباتى عفيت منك تب انت تبدا صدم ونحن وراك الشعب يريد ………………

  9. تحياتي للبروف والاخوة الاعزاء
    قريت قبل ايام انو وزير التعليم صرف 160 مليون (مائة وستين مليون) بالقديم.. كحافز امتحانات!!! والخبر دة موجود في الجرائد و(ماداسنو) والله انا الحيرة ذاتها احتارت معاي في المبلغ دة.. لكن يابروف المسئولين ديل غلابة فعلا يعني كان ادوهم بسيط الحياة مابتريحهم وكان ادوهم كتير نحن مابنريحهم .. عشان كدة يلغفوا القروش دي ساااااااااااكت احسن ليهم

  10. يا جماعة حرام عليكم، خلوا النقة في (مرتبات) خلق الله. الواحد لو سرق تآكلوا لحموا وقلنا معليش، يضرب ليه قروش شارع شالوا ليه قروش سكر التموين ويهرب (والحكومة تخليه لي الله) إنتو ما تريحوهو، وقلنا معليش، يخاوي ليه جن كل واحد فيكم يبقى فكي، وقلنا معليش.. يسرق أسمنت وسيخ العمارات لما تقع في رأس الناس (الحكومة ترقيهو) إنتو تجننوهو، ويعجبك أبو ناجي يقعد يقص في القصص الأسد ووزيرو النمر وما عارف شافو الصقر وعايز إكتب عنو الثعلب وراح فيها القرد، وبرضوا بنقول معليش…
    بس الواحد يصرف مرتب بالحلاااااااااااااااااااااااااااااال ما تريحوهو؟ آي نعم إنو مرتبوا يشغل مصنعين ويجيب السماد لي مشروع الجزيرة ويحل مشكلة البطالة, بس بي تعبوا ومجهودو, الجماعة ديل تعبوا وعملوا ليكم الثورة (شوفوا العالم المتخلفين يا دوب بعملوا في ثورات)، وريحوكم من المشاوير الطويلة وهنده بقسموا ليكم في البلد عشان تاني الواحد لو مات ليه قريبوا في كبوشية، يلقى عذر ويقول ليهم ما أدوني تأشيرة.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: