صندوق دعم الرادار

للمرة الثالثة على التوالى تخترق الطائرات الحربية الإسرائلية أجواء بلادنا وتحرز (هاتريك) كما يقولون فى كرة القدم بعد أن تصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) ! وأين .. فى (بورتسودان) المدينة التى بها قيادة الدفاع الجوى وهو السلاح الوحيد المناط به المحافظة على الأجواء من الإنتهاكات !
لقد إنتابتنى ضحكة أسيفة حزينة (من الغلب طبعن) وأنا أستمع إلى السيد وزير الخارجية بعد واقعة ضرب بورتسودان الأخيرة حيث صرح سيادته بأن السودان يؤكد (شوفو يؤكد دى) على إحتفاظه بحق الرد على هذا العمل الإجرامى !
هذا التصريح ينفع أن يكون نموذجاً (للكلام الساااكت) ! أتوقع إن إستمع إليه وزير الدفاع الإسرائيلى أن يضحك حتى يستلقى على قفاه … أى رد حياك الله وأبقاك يا سعادة الوزير؟ وبأى سلاح؟ إذا كانت طائرات العدو (تدخل وتمرق) زى الما حصلت حاجه ! لا رادار (يشوفا) ولا دفاع جوى (يضربا) ولا طيارات (حربية) تتعقبها !! فى بلد يرضخ أبناؤه لان تكون ميزانية (دفاعة) عشرات أضعاف ميزانية علاجه وتعليمه وذلك حتى ينعم بالأمن والإستقرار !
إن أكثر ما حيرنى فى أمر هذه الضربات (البقت كتيره ومسيخة) هو مسالة التصريحات المتضاربة التى يطلقها المسئولون بعد كل (ضربة) ! والدربكة واللخبطة التى يتعاملون بها مع الحدث وإليكم بعضاً منها :
• قام التلفزيون الرسمى ببث الخبر بعد أن بثته كل القنوات والمحطات العالمية !
• على الرغم من أن كل هذه القنوات العالمية التى بثت الخبر (قبل تلفزيون السودان) قد أوضحت بأن الطائرة التى شنت الهجوم هي طائرة إسرائيلية إلا أن تلفزيوننا (ربنا يهديهو) قد أشار بأن الطائرة مجهولة الهوية (ليه ما تعرف) !! يكونو يا ربي ما عاوزين يتبلوا على إسرائيل ساااكت وخايفين يصيبوها (بجهالة) !
• تم بث تصريحات وزير الخارجية التى إتهم فيها إسرائيل مباشرة بشن هذا الهجوم على كافة القنوات الفضائية العالمية قبل أن يبثة (تلفزيون السودان) !! ربما كان مسئولو التليفزيون ماشين بالمثل (كل تأخيرا فيها خيرها) والذى إن كان من الممكن أن يتناسب مع كل شئ فهو لا يتناسب أبداً والإعلام !!
• فى الوقت الذى أكد فيه وزير الخارجية الهوية الإسرائلية للطائرة، كما ورد فى تصريحاته للقنوات الفضائية الخارجية صرح نائب والى ولاية البحر الأحمر بأن الطائرة قد أتت من الشرق و لكنه لم يحدد هويتها. (مش كويس إنو عرفوها طيارة) !
• أشار وزير الخارجية بأن القتيلين هما مواطنان سودانيان، فى الوقت الذى أشار فيه نائب الوالى الى أن أحدهما مواطن سوداني، و لم يحدد هوية القتيل الآخر!! (عرف واحد وما عرف القاعد جنبو .. أيه الفتاكة دى)!!
• وقال مصطفى مندر نائب الدائرة (10) القومية في تصريح لـ(smc) إن الطائرة ظلت تتابع العربة حتى قصفتها موضحاً أن شهود عيان كانوا يتابعون الطائرة حتى قصفت السيارة. (طيب الدفاع الجوى ما كان بيتابع مع الشهود ديل ليه؟) !

ولعل المدهش من هذا كله أنه وعلى الرغم من مضى وقت على الحدث فالعبدلله لم يقرأ ولم يستمع ولم يشاهد أى من جنرالات (وزارة الدفاع) والذى يعنيها هذا الأمر الجلل أى مقابلة أو مؤتمر صحفى أو تصريح !! من أجل توضيح الحاصل بالظبط (ولو ده حصل بيكون حصل متأخر جداً )
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار) !

كسرة :
.. يا سلام … دخلوها وخفيرا نام ! هييييييييييييييع !!

Advertisements

25 تعليق

  1. انا ماعندي مانع بس على شرط مايكون رادار صيني
    ويكون اتوماتيك وفيهو خاصية المسكول أو المنبه المبكر عشان لمن يلقط ليهو طيارة يصحي النبطشي أو يعمل ليهو مسكول لو هو بعيد

  2. السلام عليكم / ن ، البرف و الاخوان ، تعليقات متباينه ، احداها ، نبعث بتوع الدفاع الشعبى يجضمو لينا اسرائيل والدول المجاوره ليها ، و لا نشوف نصر الله يفك ليهو صاروخ صاروخين على حسابنا ، ولا بالمره من كفتك بالجنب اليمين اديهو الجنب الشمال احسن مما يخبتك فوق بطنك ، القروش بدل ما يتشتروا بيها رادارات قاعدين يبنو بيها عمارات فى القياده ………………عجبى

  3. محن … ومغسة …!!!

  4. يدعموا منو ولا منو لينا عشرين سنة شغالين بس دعم من دمغة لنفايات لكهربا لمويه مابنعرف الا الدعم الله لا كسبهم
    البلد ما سايبه ما عندها وجيع شنو يعنى لو قصفوا عربيه ماعادى وقبل كده قصفوا مصنع الشفا عادى ولو قصفوا الخرطوم برضو عادى لكن الماعادى لو مسئول اتحرك واتنحنح فى الموضوع يبقى بعد كده مااااااااااااااااااعاااااااااااادى

  5. سلام أيها الأعزاء
    بقينا ملطشة يا جدعااااان !

  6. منال حمد النيل | رد

    الأخ البروف والمتداخلين سلام
    يعملوا مؤتمر ويورونا الحاصل شنو ليه..انحنا أصلا عندهم بني آدميين يستحقو النظر؟؟
    يعني بقت على الإستباحة الجوية براها؟؟ ما برعوا قبالهم في الإستباحة الآدمية, والإستباحة الإقتصادية, والإستباحة الأخلاقية ..قلنا “بت المك عذبة” لما مرقت روحنا ولا هماهم.
    هسي تصريحاتهم دي تصريحات ناس بحترموا شعوبهم “ألحسوا كوعكم” و “البشاكل ما بقول فلقوني” و كان على بشيرنا دا قرب يقول لينا “كان رجال أطلعوا معانا الخلا”.
    رادارات شنو وطيارات ودفاع منو.. دا ما تخصصهم..تخصصهم بس في الفارغة,مساسكة الاسكيرتات واعتقال البنطلونات ودعم العادات الضارة “ختان الإناث” ..نقول شنو عير “حكمتو بالغة”

  7. لمن تشتكي حبة القمح اذا كان القاضي دجاجة

  8. الأستاذ أبوناجي وضيوفه الكرام …. التحية والإكرام
    الدفاعات والرادارات لا لوم عليها لأنها موجهة ضد الشعب وليس ضد الخارج … ولكن…
    مصنع الشفا مبنى كبير وثابت … ممكن تحديد موقعه بسهولة…
    قافلة من السيارات تتجه إلى مصر …. في الخلا وكبيرة ويمكن تحديد ها بسهولة وضربها
    سيارة صغيرة في مشوار لا يتعدى عشرين دقيقة … وفي شارع مزدحم بالشاحنات في ذلك الوقت… بها راكب مستهدف… تأخرت طائرته كما قيل ثلاث ساعات ورغم ذلك يتم استغلال هذه الدقائق العشرين لضرب الهدف بكل دقة … ودون أن يتم إصابة شيء آخر ولو بالغلط … ألا يبين هذا وجود عميل على الأرض …أو وجود متواطيء ربما يكون الأمن نفسه؟ كيف نستبعد هذا الاحتمال ونحن نعرف أن مثل هذا التعاون يعني ضرب عصفورين بحجر واحد … فمن ناحية تحديد مكان (الارهابي) وتبليغ من يهمه الأمر به سوف يجعل الدولة في قمة من يحاربون الارهاب ويؤمن الشطب من قائمة الدول الراعية للإرهاب وربما تعليق محكمة الجنايات الدولية …. ومن ناحية أخرى يكسبنا التعاطف الشعبي كدولة (معادية) لإسرائيل ومستهدفة … ولا نسوا أن هؤلاء قد سلموا كارلوس لفرنسا وطردوا أسامة بن لادن قبل أحداث سبتمبر…. أما جيشنا فمتى سمعتم بأنه يدافع عن السودان؟ عفوا .. السوء- دان …. منذ المهدية والقلابات أو توشكي هل سمعتم أن الجيش فعل شيئا غير الانقلاب؟ حالربوا في الجنوب 60سنة للعودة إلى ما قبل نقطة الصفر وكأن جميع من ماتوا ومن قتلوا ومن صلبوا على الأشجار في هذه السنين لم يكونوا؟

  9. ولسه في باقي كلام …. بس أنت بدل ما تديهم أفكار الصناديق الما عندها عدد وتخليهم يعملوا ( صندوق دعم رادار بيت البشير) وبعد شوية ( صندوق دعم رادار بيت الوزير) ثم ( صندوق دعم رادار الشريعة) طبعا لأنو البلد مترامية الأشلاء ( الأطراف) ورادار واحد ما يكفي ….امسك في ( حسبي الله ونعم الوكيل)

  10. في مناسبة قبل ايام صادفت شخص مسئول في ميناء بورتسودان قال لي ان قاعدة بورتسودان العسكرية تتدرب على استخدام الرادر في رادار الميناء المخصص لرصد حركة السفن اثناء ابحارها من والى الميناء والمسئول عن مناورات ادخال واخراج السفن من الميناء وذلك لانة احدث من الرادار العسكري الذي تم تركيبة ( والعهدة على الراوي) عام 1955!!! علما بان رادار الميناء يعتبر رادار مدني ومخصص للاغراض المدنية!! كيف يرصد هذا الرادار العسكري (الخردة والقديم) حتى لو قلنا انة موديل 1980 !!! طائرات من جيل الاف 18 والاف 52 القادرة على الهروب من احدث الرادرات؟؟!! والذي يدعو للعجب القول بان الدفاعات الارضية السودانية المضادة للطائرات اطلقت نيرانها على الطائرات المهاجمه!! احتمال الطائرات المعادية دي جات استفزت ناسنا ولفت فوق قاعدتهم كم لفة كدة نظام بيغظو فيهم وكدة وبعدها فاتو !! سواء ان صح هذا الحديث او لم يصح فالمؤكد اننا نعاني من استعاذ منه نبينا صلى الله عليه وسلم وهو اننا اصبحنا كغثاء السيل وكثر هواننا على الناس.!! نسئل الله السلامة.

  11. بعد السلام
    يا بروف قصة الصناديق دي شنو ؟؟؟
    خشيت ليك صندوق ما ادوك الصرفة الاولى قلت تعمل صندوقك براك

  12. البروووف والجماعه سلامات .
    إنت يابرووف زمان كنت بتكتب عن الزول الفرحان وفاتح خشمو بلا سبب أسى خليتو مالك مع إنو المسألة كلها مرتبطة بالدفاعات .
    ولا أقول ليك .كدى أصبروا ليهو شوية يمكن بعد دة كلو يقدم إستقالتو …
    ولا يكونو حلو وزارة الدفاع لأنو مستشرى فيها ال…..

  13. السلام عليكم : أوافق بشده علي صندوق دعم الرادار لكن علي شرط يوجه علي جهاز أمننا القومي الذي هو سبب كل البحصل ده . .قال الموساد قال__ _

  14. تحيه ليك يا بروف .. و سلامات للشباب الفضل..
    صندوق دعم الرادار دا ذاااااتو عايز ليهو رادار يراقبو من النهب .. و بعدين زي ما قال “حنين” – هو زولنا الباسم دا مش قبل ما يمسك وزاره الدفاع كان ماسك سلاح الطيران ولا انا غلطاااااان ؟ ولا ياربي وزارة الدفاع دي عندها شغله تانيه و احنا ماعارفين..

    كسره : عشه الفلاتيه من الخمسينات شغاله رادار بدليل اغنيه” الله ليا الليمون سقايتو علي يا حاجه لا” .. وحاتكم لي هسه مافي زول فهم الإشاره ..
    كسره تانيه : مش يمكن رادار دي قاصدين بيها ” دار دار ” بتاعت زنقه زنقه ؟؟؟

  15. حاج أحمد السلاوى | رد

    لالالا يا جماعة الخير .. لا يستقيل ولا يحزنون .. مالكم علينا .. المرة دى لو إستقال يمكن يرجع لينا المرة الجاية رئيس وزراء … كدا كفاية علينا خالس.
    نا س وزراة الدفاع مشغولين بإستكمال المبانى العالية الفخمة المجهزة بالأنظمة الذكية .. عشان شنو… انا ما عارف ؟
    عشة الفلاتية عندها أغنية برضو يا سهيل بتقول فيها … يجو عايدين .. إن شاء الله عايدين يالله .
    سؤال للبروف .. الشعب الفضل دا مش من حقو يعرف الحاصل شنو ؟ والحصل شنو ؟ وحصل ليه ؟ والمات منو ؟والدقوهو منو ؟ والما دقوهو منو ؟..
    المؤتمرات الصحفية منعوها فى السودان ولا شنو ؟يا كافى البلا ويا حايد المحن ما يعمينا ما سمعنا ويطرشنا ما شفنا – مقصودة يا جماعة الخير – مسئوول عمل مؤتمر صحفى عشام يملّك الحقايق للشعب ( الفضل ) عن الشى الحصل دا .
    أقترح إدخال مادة أدب الإستقالات فى مناهجنا الدراسية عشان أولادنا السُغار ديل لامن يكبروا ويبقوا وزراء الواحد فيهم لو غلط اقل غلطة طوالى يقدم إستقالته ويتخارج بكرامته…
    غايتو … بس نقول حسبنا الله ونعم الوكيل.

  16. حاج أحمد السلاوى | رد

    لسؤ الحظ الطيارة دى جات بالليل .. يمكن لو كان جات بالنهار كاتن رادار الهنا دا شافا وعمل مس كول للزول المناوب ..
    دا يمكن يكون التبرير الوحيد للحصل دا ..زى ما حصل قبال دا.. فاكرين؟

  17. ياجد سلاوي – أنت القائل “أقترح إدخال مادة أدب الإستقالات فى مناهجنا الدراسية عشان أولادنا السُغار ديل لامن يكبروا ويبقوا وزراء الواحد فيهم لو غلط اقل غلطة طوالى يقدم إستقالته ويتخارج بكرامته…
    غايتو …”

    والله إنت متفائل بالحيل و عندك امل إنو اولادنا اولاد الابالسه ديل يبقو وزراء – طيب ياعمك لمن اولادنا يبقو وزراء اولاد ناس فلان وعلان المابيستقيلو ديك يبقو شنو ؟؟ رؤساء لأمريكا زي اوباما و كده ولا نفهما كيفن دي ؟
    يا اخواننا ختو الكوره في الواطه و خلونا نفكر نحن نستقيل من امازونيا دي قبل ما يقوموا علينا و يخشوا ورانا دار دار و زنقه زنقه – مش كويس الخلونا نعمل اولاد ؟؟؟؟

  18. يا جماعة ما تسعجلوا ساي .. الرادار لقط الطيارة .. لكن الضابط المناوب قال خلينا نشوف دورهم .. والكيشة قدمو وألحقو .. والخيل الأصيلة بتجي في اللفة .. وشنو كدا ما عارف داك … فالطيار ما فهم الإشارة داير يضرب (حمار كلتوم) -حسب الإتفاق- قام ضرب الراجل الضيف .. وهسة الضابط المناوب إلا ماسكينو بالقوة .. قال إلا يمشى تل أبيب ويقبقب الطيار البليد دا .. وإسرائيل دي قد دنا عذابها .. زي روسيا وأمريكا ..
    بالله دي طريقة يحكموا بيها بلد … !!!؟؟؟ لك الله يا وطني الجريح

  19. الأحباء الأعزاء .. سلام
    والله إبداع عدييييييييل .. بالله مش شر البلية ما يضحك ؟؟ أهلنا العرب ديل ما بيقولوا كلام ساااااااااااى … !!

  20. جبرا الحبيب…سلام..
    صناديقك كترن شدييييييد ! دا نسميهو (ص د ر),,ولنا الصدر دون العالمين او القبر! كدة كيف؟؟
    بس نفسى افهم الزول دا مالو!؟ كل ما تحصل ضربة يكون هو فى موق المسئول الاول! وبرضو لا يهش لا بنش لا يكش لا يحس! حسبى الله عليه..

  21. الاخ هاشم..سلام..
    تحليل جميل ويقترب كثيرا من الحقيقة..الله يكضب الشينة..

    سهيل الحبيب..سلام..
    اولاد شنو ديل العملتهم !؟؟

    الاخ دغمسة..سلام..
    من سنة كم!؟؟ عليكم الله دى ما (مزهلة) القال عليها عادل امام؟؟ربنا ينتقم من اللى كان السبب..

  22. الحبيب اب احمد..سلام..
    ياخ كتلتنى من الضحك,تعليقك دا انا ح اعمل ليهو استنساخ لمكان ما !ههههههههههههههههههههههه,,خلاص حقو نعمل لجنة وساطة لجعل الضابط المناوب يعدل عن رايه فى (قبقبة) الطيار المسكين دا..ههههههههههههههههههههههههههههههههه..

    الحبيب السلاوى…سلام..
    انت ركز فى واجباتك اليومين ديل ! آيييييييييييييي…

  23. يا جماعه الطيارات دى كانت منقبه إذن لا يجوز سؤالها والله أعلم

  24. سلامات يابروف
    انا يادوب اقتنعت انو رحم السودان ولادة… اى حاجة تتوالد لحدى ماتعرف البو من الابن…. دى بمناسبة الصناديق القايم فيها اليومين دى….صندوق دعم الرادار حيجيب ليهو صندوق دعم مشغلى الرادار….. ودا حيجيب ليهو اخو صندوق دعم حراسة الرادار…. وصندوق دعم فطور وغداء وعشاء ورديات الراردار وهلم جرا… شفت ياجبرا صناديق الدعم مابتجيب فايدة لانه بتتوالد توالد بكرى بدون أبو….

  25. في فكرة اساسا صندوق دعم الجريح ما دايرين يواقفهو يغريوا اسمو الي صندوق دعم الراداد اساسا القاصد واحد(………………………)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: