بالغتا يا صالح

منذ أن بدأت الثورة التونسية وتبعتها المصرية فاليمنية وأنا أتنقل بين القنوات لأتابع هذه الثورات لحظة بلحظة من شاشه لشاشه ومن موقع اخباري لموقع اخباري ، وكلما شاهدت جثث الشهداء الذين تصرعهم رشاشات الحكام ومناظر الجرحى وهم ينذفون مقطعي الأشلاء تتملكني الدهشة وأسأل نفسي : ليه الحكام ديل بيعملوا كده؟ هم الحكام ديل ما بتعلموا من التأريخ؟ خليك من التأريخ مش يتعلموا من بعض؟ والغريب في الموضوع كل واحد من الحكام ديل بيتعامل مع شعبو بطريقة ( شعبي و انا حر فيه) ! يعمل فيهو العاوزو .. يغسلو … يكويهو .. يكتلو .. يجدعو .. يرميهو !! واحد بالغازات السامة والرصاص الحي .. والتاني بالمدافع التقيلة والطيران وتالت بالقناصة من فوق أسطح العمارات والبيوت … (ما شعبو وهو حر فيهو) وكده !
مثل هؤلاء الحكام بالطبع وصلوا إلى مرحلة متأخرة من مراحل الديكتاتورية والتسلط والإستبداد وأصبحوا يرون الشعوب (كالجرذان) كما وصفهم (العقيد) وكيف لا يرونهم جرذاناً وقد (حكموا على كيفهم) دون أن يسائلهم الشعب (الغلبان) عما يقترفون من (أخطاء) وفساد .. وللتأكيد على هذه المقولة دعونا كمثال وليس للحصر نقوم بحصر أقرباء الرئيس اليمنى علي عبدالله صالح الذين (يحكمون) معه اليمن السعيد ! .. أو ما يعرف بالعائلة الحاكمة في اليمن !
• علي عبدالله صالح (الأب) – رئيس الجمهورية اليمنية
• أحمد علي عبدالله صالح (الأبن قائد الحرس الجمهوري والقوات الخاصة)
• يحيى محمد عبدالله صالح (أبن الأخ) – رئيس أركان الأمن المركزي
• طارق محمد عبدالله صالح (أبن الأخ) – قائد الحرس الخاص
• عمار محمد عبدالله صالح (أب الأخ) – وكيل جهاز الأمن القومي
• علي محسن صالح الأحمر (الأخ غير الشقيق) – قائد الفرقة الأولى
• علي صالح الأحمر – (الأخ غير الشقيق) قائد القوات الجوية وقائد اللواء السادس طيران
• توفيق صالح عبدالله صالح (ابن الأخ ) – شركة التبغ والكبريت الوطنية
• أحمد الكحلاني ( أبو زوجة الرئيس الرابعة ) – متنقل من أمين عاصمة الى محافظ الى وزير ..الخ
• عبدالرحمن الأكوع (شقيق الزوجة الثالثه) – متنقل من وزير إلى محافظ إلى أمين العاصمة ..الخ
• عمر الأرحبي (شقيق زوج الأبنة) – مدير شركة النفط اليمنية
• عبدالكريم اسماعيل الأرحبي (عم زوج الأبنة) – نائب رئيس الوزراء وزير التخطيط ، مدير الصندوق الاجتماعي للتنمية
• خالد الأرحبي (زوج الابنة) – مدير القصور الرئاسية
• عبدالوهاب عبدالله الحجري (شقيق الزوج الثانية) – سفير اليمن في واشنطن
• خالد عبدالرحمن الأكوع (شقيق الزوجة الثالثة) – وكيل وزارة الخارجية
• عبدالخالق القاضي (ابن خال الرئيس) – رئيس الخطوط الجوية اليمنية
• عبد الله القاضي (نسب) – قائد لواء المجد بتعز
• مهدي مقولة (من قرية الرئيس) – قائد المنطقة الجنوبية
• محمد علي محسن (من قرية الرئيس) – قائد المنطقة الشرقية
• صالح الضنين (من قرية الرئيس) – قائد قوات معسكر خالد سابقا
• علي احمد دويد (زوج الابنة) – مسئول شؤون القبايل
• نعمان دويد (اخو زوج الابنة) – محافظ محافظة صنعاء وقبلها عمران مدير مصنع اسمنت عمران لعشر سنوات
• كهلان مجاهد أبو شوارب (أخ زوج بنت الرئيس) – محافظ عمران
• محمد عبدالله حيدر(من قرية الرئيس) – قائد اللواء35 مدرع بالضالع

كسرة :
أمانة ما بالغتا يا صالح !!

Advertisements

16 تعليق

  1. سبحاااااان الله حتى اليمن فيها شوايقة

  2. سلامات ..
    عيني بارده .. يا اخواننا خلو الحسد .. إنتو متأكدين إنو دي جمهوريه اليمن .. طيب السعوديه كيف ؟؟؟

    يا عرفات يا ما شايقي .. البلد راااااايقه

  3. نان آ عرفات الشوايقه لقو معاهم شنو؟
    يا هو السديد الفد ويحيد دا ؟

  4. ايوا يا سنكلوني .. اديلو

  5. اليمانية الزماااااان الكانو فاتحين دكاكين هنا زمان وخلوها لي اخونا الفور ورجعو بلدهم اظنو علي عبدالله صالح دة قريبهم بكون اسي هنا فاتحين مولات ورؤساء غرف تجارية

  6. الأحباء الأعزاء
    سلااااااااااااام
    بيعملوها ظاااهرة !!

  7. أواهٍ على حظي دائماً أأتي متأخراً عن قصد، بعد أن تكون المدونة قد أُجْتُرتْ من مداد الضحك فيها وسلبتهم دموع السخرية، وربطوا على بطونهمو أذرعٍ كالحاتٍ خوف قهقهات أضحت جريمة، لشعبٍ الله سخر لهم من فرط شقوتهم هموماً كالجبال، فما حبٍ يُزاور عن يومهم ذات اليمين، ولا ليلٍ بسط ذراعيه المترعاتِ حباً بالشمال!
    يجب على أحد اليمنين أن يقرأ على ابن عبد الله الما صالح مساءلة الشاعر أحمد مطر لحاكمه الخيالي التي من مطلعها (بعد الإذن طبعاً):
    قلت للحاكم: هل أنت الذي أنجبتنا ؟ قال: لا… لست أنا.
    قلت: هل صيّرك الله إلهاً فوقنا ؟ قال: حاشا ربنا.
    قلت: هل نحن طلبنا منك أن تحكمنا ؟ قال: كلا.
    قلت: هل كان لنا عشرة أوطان و فيها وطنٌ مستعمل زاد عن حاجتنا
    فوهبنا لك هذا الوطنا ؟ قال: لم يحدث… و لا أظن هذا ممكنا.
    قلت: هل أقرضتنا شيئاً على أن تخسف الأرض بنا
    إن لم نسدد ديْننا ؟ قال: كلا
    قلت: مادمت، إذن، لست إلهاً
    أو أباً
    أو حاكماً منتخباً
    أو مالكاً
    أو دائنا
    فلماذا لم تزل، يا ابن الكذا، تركبنا ؟

  8. السلام عليكم / ن ، البرف و الاخوان ، طيب دى وعرفناها ، الهنا دى البيحصرها منو ؟ قال ليك القاضى الاعلى بيطالب بى ورق الفساد و المفسدين والشركات بتاعتهم ، طيب خليكم شاهدين عاوز يزوغها، وين ورق سوق المواسير ، وين ورق المراجع العام ، وين وو وين ووو وين ……………. ععجبى

  9. حاج احمد السلاوى | رد

    غايتو لاكين عليكم جنس حسادة..
    كونك تكون من الحاشية أو من أقرباء الحاكم دى ما حاجة ساهلة..
    ولو الحاكم أو الرئيس بيعين زول من أهله أومن قبيلتو او من حلتو أو … أو….. ما فيها مشكلة لو كان الزول دا مؤهل للمنصب اللى أدوهو ليها..وأهم حاجة يده ما تكون خفيفة..أو منشار طالع ياكل … نازل ياكل..وفى النهاية يقول هذا من فضل الله..
    مشكلتنا فى الدول النايمة ..اقصد النامية والدول تحت التنمية هى عدم وجود قانون يطبق على الجميع دون إستثناء ويطبق على الكبير قبل الصغير وعلى المدير قبل الخفير..وكوووولنا عارفين من أمِن العقوبة .. اساء الأدب..من يخطىء يجب أن يعاقب ومن يتقن عمله يُشكر ويٌثاب..أما غير كدا أنسو الموضوع من اساسو وما تتعبوا روحكم ساكت وتنفخوا فى قربة مقدودة.
    ويا الفاتح انا ماشايف انو أخونا الشاويش على عمل حاجة غير عادية..دا شى طبيعى ولو ما عمل كدا يبقا عوير ساكت وريالتو سايلة..
    البروف الفاتح .. عندى ليك شمار حاااااااااااااااااار يصلح يكون مشروع بوست كارب من بيت الكلاوى.. برسلو ليك فى الخاص.. فى الضفة الشرقية.. إنتفقنا ؟؟؟؟؟؟؟؟

  10. لكن يا جماعه الراجل ده دقس دقسه كبيره خلاص…. وزاره شئون تخزين القات أداها لزول ما من عائلته …. بالمناسبه أخوانا من اليمن الشقيق لهم القدح المعلى فى تطوير و تحسين أستمخاختنا و دقساتنا النهاريه و ذلك بفضل قدر فولهم المتوهطه أمام دكاكينهم زمان وقت كانت الدنيا خيرها كتير………… ربنا يحفظ اليمن و شعب اليمن لقد أغتربوا فى بلادنا و بعد داك رجعوا يلا نحن كمان باريناهم لحدى خشم بابهم ( باب المندب) والله نحن شعب ولوف بشكل ما طبيعى.

  11. حبايبنا التحيات لكم
    أخونا علي عبد الله زي الرئيس الصيني .. الذي قال إن أكبر إنجاز لحكومته يومياً هو إنها تشرف على ثلث سكان الأرض من الصباح حتى خلودهم إلى النوم سالمين، وجه الشبه إنو في فترة حكمه كان أخونا علي يتأكد إن آخر واحد فيهم خزّن حصته من القات، بعدها يتناول هو حصته .. ويخلد إلى النوم قرير العين .. ويا دار ما دخلك شر .. فطبيعي أن يحس بمسئولية تجاه شعبه ويعتقد جازماً إنو مافي زول بقدر عليها غيرو .. حتى نائبه الجنوبي الأصل ..

  12. اها قول صالح مشى !!! الجايي بعدو منو ؟؟ المشكله مافي صالح المشكله في التوجهات السياسيه و الاجندات المفروضه لصالح جهات اخرى .. صالح عمل العليهو و كرتو حرق .. الجايي بعدو كان عمل حركات بلحقوهو امات طه .. خلوها مستوره ..

  13. تعاينو لى الفيل و تكتبوا فى ضلوا
    هسى يا جماعه ما تشوفوا الرئيس الليلنا و أخوانوا و نسابتو و أهلو الجعلتيه بعد داك أمشوا لى شايقست اليمن التعيس

  14. انا رايي ياأستاذ الفاتح تعرس بتك نشوي دي لي واحد يمني.. مامعروف يمكن يجي يوم يبقي رئيس ولاقريب رئيس (علي وزن قريب غطا) وتلقي ليك كدة مع اليمانية ديل أصلك هنا زيي كدا قنعان من خيرا فيها ونجي نكتب:
    الفاتح جبرة (أبو الزوجة) – قائد الفرقة الفلانية مشاة – ولا أي مصيبة زمان المهم تاكل عيش وتأكلنا معاك. بس بعدين اوعك تنسانا

  15. يا بروف ماشي لليمن البعيده ليه كدي اعمل لينا احصائيه في بلدنا دي احتمال نطلع ماسكين وزارة وما عارفين ولا مسعول في ادازة الجبايات والتحصيل .

  16. القصور الرئاسية! اصلها كمها ؟؟
    الله لا كسبو عافية…

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: