عشان الإختلاط

عندما كنا طلاباً بالمرحلة الوسطي (إتلاشت وكده) كنا نحب حصة التربية الإسلامية ونحرص أشد الحرص علي حضورها وذلك لأننا كنا (فلاسفة صغار) أو هكذا يخيل لنا فى ذلك العمر الغض النضير .. وقد كان أساتذتنا فى هذه المادة فطاحلة نشهد لهم بالعلم والإستقامة وهمو والحمدلله لا زالوا يعيشون بيننا كالأستاذ (محمد أحمد مصطفي) والبروفيسور (محمد أحمد الشامى) !
– من حكمة مشروعية الصوم يا أبنائي أن يحس الغني بمدى معاناة الفقير الذى يجوع ولا يجد ما يأكلة !
– طيب يا أستاذ والفقير يصوم عشان شنو؟
وهكذا كنا نحاول أن نصل إلى الحقيقة والتى بلا شك كان أساتذتنا الأجلاء يعرفونها تماماً ويقدموها لنا فى شرح بسيط مقنع وميسر ، طيب ايه مناسبة الكلام ده ؟ مناسبته (فتوى) أطلقها على الهواء مباشرة (الرئيس علي عبد الله صالح) رئيس اليمن (لحدت كتابة هذه السطور) أفتى فيها بحرمة خروج (المرأة) فى تظاهرات بدعوى الإختلاط !
في رأئي أن الأخ (علي عبدالله) قد جانبه الصواب (وما عرف يلعبا كيف) لأننى لو كنت فى مكانه لأوكلت (ترزية الفتوى) بعمل اللازم لتخرج الفتوى فى أبهى حلة وآخر (تطريز) ومن جهة (متخصصة) ولكن يبدو أن الوقت يداهم (صالح) فأراد لهذه الفتوى أن تبث على الهواء دون تأجيل أو إبطاء .
– خروج المواطنون فى مظاهرات مختلطة حراااام !
– ده كلام صاح يا أستاذ (صالح) !
– كيف يا سوداني
– أقول ليك .. مش خروج الرعية علي الحاكم حرام
– أيوه
– طيب يبقي خروج المواطنين فى مظاهرات حرام
– ومش المظاهرات (مختلطة)
– أيوه
– ومش الإختلاط حرام
– مافي شك
– يبقي خروج المرأة في المظاهرات (حرام تربيع) !
– طيب يا سودانى ما تجى تشتغل (مفتى) معانا
– ده عليا يا (أبويمن) ؟ من زمان كنتا وين ؟ تكلمنى بعد ما الحفلة لموا كراسيها ! (مواصلا) أقول ليك كمان حاجه تانية
– قول يا سوداني
– مش المراة المسلمة لا يجوز لها معارضة زوجها ؟
-أكيد
– طيب مش من باب أولى إنها ما تعارض (سيد زوجها) اللى هو إنتا ! يبقى الموضوع كوووولو حرام في حرام
– والله إنتا يا سوداني ختيييييييير ياخى ما تجى تشتغل معانا
– كدى حكاية الشغل دى خليها هسه أنا مريض وعندى قلب وما بقدر على (سخانة اليمن) دى لكن لو عاوز أرسل ليك (علماء من عندنا) والله يظبطوا ليك الشغل جنس (ظبيط) لمن تآآآأمن
– وأيش عندك تانى يا يا سوداني
– المرأة عندكم مش لا يجوز ليها (قيادة السيارة) في الشارع ؟
– أيوه !
– طيب كيفن تقود الشارع ذاااااتو يا (فخامة الرئيس) … يعنى يا سعادتك بس بالقياس سااااكت الكلام ده ما بجي
– يعني يا سودانى الفتوى بتاعتى دى صاح؟
– هو إنتو يا زعماء بتقولوا حاجه غلط؟ ده حتى صوت المرأة عورة يثير الرجال .. فكيف يجوز ليها تكورك وتصيح (الشعب يريد إسقاط النظام) والمظاهرة مليانه رجال ..
– عشان كده أنا يا سودانى قلتا ليهم (المرا تطلع الشارع) !
– والله أخير إنتو نحنا ناسنا هنا قالوا لينا (الراجل اليطلع الشارع) !

كسرة :
قال أيه؟ عشان الإختلاط !

Advertisements

8 تعليقات

  1. عمك علي دا ما تريحوا شوية

  2. أها ، وطلعتوا؟ا

  3. السلام عليكم / ن ، البرف الاخوان ، عم على يا بتاع الزيت ، و لما يكلموه بى الفساد العنده يعمل لينا زعلان ، و لما يرجع اخر انبساط ………….. عجبى

  4. لكن يا بروف عمك صالح مصلح ما طلع تقتيحه
    لو شفت البنوت السمحات ديل فى الجزيره حتعرف،،،،،،،،،،،،،، الأولاد بموتوا ليه

  5. على الطلاق من القديمه لو الواحد يخلى مال وجاه زى حق مبارك المسيكين ده !!!! ال يبقى ماسوره ساكت والعجب ناس المسعوديه ………….. عجبى

  6. خلي بالك الشارع طلع مؤنث و احنا ما جايبين خبر ..

  7. الله يحلو منك صالح ده ………..!!!!

    شيل شيلتك لوالمظاهرات ما نفعت معاهو وقعد قبلو..

    بيجيك بالدرب عديييييييل

  8. ههههههههههههههههههههههههه,,,الراجل دا سكرة والله..
    دا اسمو افلس وفقد المنطق ,,بس..
    لكن زى ما قلت ليكم قبل كدة,,العندو ايادى آمنة ونظيفة يسلفها للزول دا عشان يتخارج وكدة..آيييييي..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: