بتاعت منو؟

الفساد خشم بيوت .. منه ما يرى بالعين المجرده ومنه ما لا يري حتى بأعتى وأضخم (التلسكوبات) .. منه ما يكون فردياً ومنه ما تقوم به مجموعة (فساد جماعي) ، منه ما لا يأخذ إرتكابه زمناً ولا تظهر نتائجه (كومشن ودخل البنك أها تانى شنو؟) ومنه ما تظهر نتائجه ولو علي المدى البعيد .. وقصة التقاوي الفاسدة التى تتصدر الصحف والمجالس مؤخراً هى من النوع الأخير التقاوي تزرع ثم تنبت ثم تحصد فإذا لم يحدث ذلك فالموضوع بلا أدنى شك (فيهو إن) !.
لقد دهشت (إن كان في هذا الزمن الردئ ما يدهش) لوزير الزراعة الذى يحاول في إستماتة أن يقول أن كل شئ عادى وإنو المسألة تمام (مية المية) وإنو الحديث عن فساد في هذا الأمر وراهو قصد سياسي !
طيب خلونا نقول (زى ما السيد الوزير بيقول) إنو كل شئ عادى والحاجات (كوووولها) مشت بالطرق السليمة وإنو ناس البنك الزراعي، وإدارة التقاوي والوقاية والحجر الزراعي في وزارة الزراعة وناس المواصفات وناس الجمارك كل الناس دى إشتغلت صاح وحسب اللوائح والقوانين والتقاوى سليمة وليست مصابة بنوع من الفطريات يضعف الإنتاجية ويتسبب في سرطان الكبد للإنسان .. وخلونا نقول إنو نسبة الإنبات فيها 100% .. وخلونا برضو نقول إنها لم تتسبب في فشل الموسم الزراعي والمزارعين زرعوها و(ما كتبوهم إقرارات ولا حاجة) وإنو التقاوي قامت زى الفل وحققت أعلى إنتاجية .. فلنفترض إنو الكلام ده (كووولو صاح) طيب السؤال الذى يفرض نفسه وكل الشعب السودني الفضل عاوز يعرف إجابتو هو :
كيف يمكن لشركة (هارفست) التي قامت بإستيراد هذه التقاوي بدون عطاء أو يحزنون أن يتم تسجيلها بعد عام من الصفقة التي تبلغ حوالي 6 مليون يورو !! (كما جاء في تقربر اللجنة)
الشعب السوداني الفضل عاوز يعرف الشركة دي بتاعت منو؟ والطريقة الخلت المسئولين (عن القصة البايخة دى) يدوهو الصفقة دى بدون عطاء ولا منافسة شنو؟ وكيفن يسمحوا ليهو وهو (وقتها) ما عندو شركة مسجلة بإنو يستورد التقاوي دى؟
كثير من كبار المسئولين (شابكننا) العندو إثبات على الفساد يجيبو .. العندو إثبات على الفساد يجيبو .. طيب أهو الإثبات (جانا لحدت عندنا) يلا ورونا سيد الشركة (البتستورد قبلما تتسجل) ده منو؟ !! جيبو لينا صورتو فى الجرايد عشان نعرف الناس (البتنهش في البلد دي منو) .. الناس العاوزه تغني بأى طريقه حتي لو يموت تلت المواطنين ويفضلو التلاته أرباع (أو كما قال أحدهم) !
قد تكون التقاوى صالحة وقد لا تكون هذه أشياء علمية لا يفقه العبد لله فيها شيئاً وقد يختلف العلماء في نسبة فسادها وما تسببه من الضرر … لكن حكاية إنو الزول يستورد وبعدين يعمل الشركة دى ما أدونا ليها !! وهي توضح تمااااما بأن هنالك (فساداً جماعياً) وبالله إذا كانت بداية (الصفقة) من أولها تجاوزات للقوانين و(إستيراد بدون تسجيل) يعني (بالعقل كده) بس كيفن (التقاوى) تكون سليمة والقصة من بدايتها (لولوة) !

قال لي صديقى الذى يجلس امامي وأنا أقوم بكتابة هذا العمود (لو قالوا ليك إتخيل سيد الشركة دى يكون شكلو كيف)
أجبته :
طويل القامة عريض المنكبين .. وضئ الوجه .. تشع منه الأنوار وتتوسط جبهته علامة صلاة قطرها لا يقل عن بوصة ونص .. ذو كرش ممدود (من اللغف طبعن) .. إذا تحدث تحدث همساً (عشان الصفقات السرية وكده) .. لا يجيد المضغ (بيبلع طوااالي) يصوم الإثنين والخميس من كل أسبوع (عشان يمسح ذنوب الأسبوع القبلو) !! وبيكون أكيد قاعد يلبس الساعة باليمين عشان الشيطان (مع إنو الشيطان ذاااتو ما ممكن يستورد وبعدين يسجل الشركة) !

كسرة :
خلونا من (نسبة الإنبات) والشنو ما عارف ! الشعب يريد أن يعرف (الشركة دي بتاعت منو)؟

Advertisements

19 تعليق

  1. السلام عليكم / ن ، البرف الاخوان ، زمان قلنا عكازى وعكازك و نستنه الناس البياكلو فينا ديل فى الصقيعه ، و نطلع حقنا بى ايدنا ، واحد يقول نوديهو وين ؟ كان رجع ياهو الدخل بيت الجاك تانى ، عشان كده احسن حاجه يتوزع حوافز ، زى حوافز مجالس الاداره ، حوافزهم اكتر من ارباح الاسهم مجتمعه …………. عجبى

  2. i strongly believe that you gave clear descrription to the owner of the company thank you Ustaz Alfatih , your writings are really good friends to us in the abroad

  3. كان الله في عون الشعب المغلوب على أمره..بالطريقة دي إلا ننتظر المهدي المنتظر والفرج من رب العالمين..غايتو الراجي الحكام دا راكب ماسورة لن يفيق منها أبدا..والرجي الله دا بختو وربنا قريب يمهل ولا يهمل ترا هسي بدو يقعو واحد واحد عافانا الله وإياكم من مال الشعب وحرمته.

  4. تعبانين سااااااااااااااااااااااااااااااااااااااااااي – مافي أي حاجة بتحصل

  5. الغالي البروف ابو ناجي والسمار الاعزاء, يابروف انتو هسة زعلانيين كدة لية, وروني بس الجا منو واشتكي قال عندو سرطان, مادام مافي زول اشتكي معناها كلو تمام, والله الشعب السوداني دا سرطانو معروووووووووووف ووجب بترو خلاص والله ملينا عديل كدا دا, هم هسه مازهجو وفتروا مننا, ولا الاء يتموها اربعين علي قول زول كدا مابتسمي (والله نحن دايرين الشعب يصبر علينا عشرين سنة تاني) والله كل ما اتذكر الكلام دا بحس بي مررارتي خلااااااااااااااااااااااااااااص داير تنفجر

  6. تقاوي إيه وكلام إيه؟إن الكتابة عن موضوع فساد لمسئول في نظامنا الحالي ما هو إلا صك براءة له من تقسيم السودان وجعل ما بقى منه سلة نفايات أفريقيا جنوب الصحراء، نتكلم عن فساد عندما تكون هناك حاجة صالحة ودخل إليها الفساد ولكن لو كان كل شيء مبنيا على الفساد والنفاق فكيف يتحدث الفساد عن الفساد؟ هذه القصة يراد بها صرف النظر عن ما هو أكبر…. فهذه التقاوي تنتهي سنتها وينتهي المر…. ولكن كيف تنتهي تقاوي النفاق وعدم الوطنية وعدم المسئولية التي زرعوها في جيل كامل؟ هل تتخيل سودانيا قارئا كاتبا عمره 25سنة لم يسمع عن علي عبداللطيف؟ الشعب الآن نصفه (وربما ثلاثة ارباعه) مستورد …. والربع الباقي الذي ولد بعد 1989 لا يعتقد أنه كانت هناك دولة قبل الإنقاذ ( أنقذنا الله منها) ، وإذا حكيت له أنه كانت هناك دولة تكرم المواطن وتعالجه مجانا وتعلمه مجانا وتعتبر نفسها خادمته فسيعتبرك حلمانا…. لأن ناس الإنقاذ قالوا له أن تاريخ السودان بدأ يوم 30 يونيو 1989وبالنسبة لعدم تسجيل الشركة فهذا ليس بمستغرب ….. ألم تقم الإنقاذ بتسجيل نفسها بعد 30 سنة من الحكم؟ السنة دي قالوا لينا (إنتو جيبتونا بالانتخابات وتشيلونا بالانتخابات) يعني الانتخابات التي كانت العام الماضي هي انتخابات 1989 التي جاءت بالبشير….وبرضو عايزهم يسجلوا الشركة؟

  7. يسلم لي سانك ياهاشم

  8. إنت ما تعبت يا بروف؟
    بتمغص فينا نحنا الأساساً ممغوسيـــــــــــــــــــــــــن؟
    خليك من الفساد والرشاوي والإختلاسات والكلام الفارغ ده، الحا يتغير شنو؟ ناس الحكومة؟ مااااااا أظن
    يلا إبقى نغير الشعب ده وخلاص،،، ولا أقول ليك يلا نهج ونسيب ليهم البلد … وزي ما قلت زمان خليهم يصحوا الصباح ما يلقوا شعب.
    خلاص قرفنااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااا.

  9. البروووف الرائع وسمار القمردينة سلامات
    وزير الزراعة دة لسة بيتكلم مبتسم وكانو مافى مشكلة والامور تمام ومافى تقاوى فاسدة ولافى بيوت بتتخرب ولافى ناس بتتداس فى الارجل.
    طبعا قصة يرسى العطاء على شركة مامسجلة دى جديدة لكن يمكن يكون مافى أى شركة قدمت للعطاء وأخيرا جابو تاجر شنطة وقالوليهو عايزين حاجة أسمها بزور عباد شمس . ياربى ؟

  10. يعني معقووووووووووووووووووووولة كدة يا استاذ ما عارفها يتاعت منو!!!!!!!!!!!!!!!!!!!!!!!!!!!!!!!!!!!!!!!!!

  11. اصلو لا !؟؟؟
    لا دى ما قرونا ليها فى سنة اولى فساد وافساد!
    عفيت منو اب زرد نطاط الحيط! هييييع

  12. استاذي والسمار معليش ماتزعل عشان زعلك بهمنا ويجيك ضغط ولسه ناس ناجي راجنك وبعدين علاح الضغط تطر تجيبو من بره عشان نحنا ما بنضمن اي حاجة اجيبوها من بره عشان شركة (هارفست) بقت حقت الدويات النباتية وايضا الحيوانية معليش يا سوان معليش حكموا ناس ———–

  13. والله يابروف بتحرث في البحر ديل عاملين زي الاطرش كان دقشتو ما بزح وأخير الأطرش ممكن يشوف لكن ديل عمو خلاص ويا دنيا ما فيك إلا أنا والغريبة عندهم رعاع كدة ينط ليك في حلقك وهو ما عارف إنو بدمر في البلد عشان حبة قريشات بيشيلوها منو في المدارس في المستشفيات إلخ ويقول ليك ديل أحسن ناس أها خم وصر جاتك من كبارا في كبدتك

  14. الجماعه ديل ضيعوا الدين ياستاذ حتي اصبح شكل الحرامي كما واصفت ولكن الدين الاسلامي يرفع الامم ويساعد المسكين هذا توضيح فقط

  15. البروف ابو الكل و السمار الكرام سلام

    يا اخوننا ما تزعلوش اوي كده .. مش كويس الجابو تقاوي فاسده بس ؟ بكره واحد يستورد ليكم زيت هيدروليك على اساس انو زيت سمسم و نلحس يدينا ونحمد الله

  16. الغالي علي القلب, البروف جبرا, انت عارف ناس الانقاذ قالوا حيقطعوا عليك الاجازة, لانو عندهم معلومات مؤكدة بتشير لي تحركات وتجمعات للمواطنين – بوادر ثورة – وعند التقصي اتضح انه مطالبهم – دايرين عودة جبرا – عشان كده قالوا يلحقوهم سريع قبل ما يتحولوا لي – الشعب يريد الكلام بالمجان عفوا رحيل الكيزان – يا اهلنا انا قلت حاااااااااجة, جد يابروف اشتقنا ليك ولي قلمك والبلد من يومها………….. وما متصبرين عليها الا بي كتاباتك, نتمني تلحقنا

  17. ماتتعبو انفسكم الحكومة دي عاملة زي ود الموية مابتتمسك
    وعايزة اقول ليكم حاجة تضحكم كتييير بعرف ناس بيمتلكو ارض زراعية وقامو وزرعو ارضم رغم انو الارض بكر والمهم الزراعه فشلت قامو قالو انوالارض عملين ليهم عمل فيها لانو الاشترو منهم الارض قالو ارجعو ليهم الارض وهم ارجعو ليهم القروش طيب العمل العمل منو .؟
    دي خلوها للاذكياء

  18. الشعب يريد البروف أبوناجي, يابروف والله اشتقنا لي قلمك ورسمو, الاسبةعين تمن وزيادة كمان امانة عليك تلحقنا

  19. البروف : حقت منو ما مهم المهم انو تانى بعد الكلام ده ممكن تتسجل باسم منو وتعمل نفس الهركات الاجيبه دى ؟؟ زمان اهلنا ناس الجزيره لمن يقبضوهم فى كشة العمره الواحد برجع تانى بعد يغير الجواز لمن السعوديين عملو بصمه فى المطار يا ربى نعمل بصمه فى مسجل الشركات ؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: