بدل دواليب

الكثير من القراء والأصدقاء طلبوا من العبدلله أن يكتب عن (عقد المسئول) الذى أحدث ضجة في كافة الأوساط وبعد إطلاعي على صورة العقد وجدته عقد أقل من عادى فى دولة (بترولية) تشهد نهضة إقتصادية كبري وتحسناً واضحاً فى كافة أوجه الحياة المختلفة من صحة وتعليم وخدمات وإرتفاعاً ملحوظاً في دخل الفرد فأيه يعنى لمن مرتب (الزول ده) يكون 18 مليون فى الشهر
؟ يعني 600 ألف فى اليوم .. يعنى أيراد 6 روزات – 30 راكب (الكلاكلة – السوق الشعبي) أيراد صافي لا فيهو حق (السواق) ولا (الكمسارى ولا (الجاز) ذاااتو ! ولو الروزات دى ما عاجباك ممكن نقول ليك إيراد 30 (ركشة) بس في اليوم يعنى إنتا تكون قاعد كل يوم المغربية خاتي ليك كرسي قدام باب البيت وتجى الركشات (التلاتين) تجي تقيف تترصا قدامك وكل سواق يقوم يغمت ليك 20 ألف !!
أما (البدلات) فما شايف فيها حاجه (فايته الحد) فـ 90 مليون جنية بدل (عيد ضحية) أعتقد إنو مبلغ معقول خاصة مع إرتفاع أسعار (الضباحين) شوفو بس الضباحين ح ياخدوا كم لمن (سعادتو) يضبح ليهو 220 خروف مدوعل في العيد؟ أما 90 مليون (عيد الفطر) فأعتقد إنها (شوية) وأن سعادتو سوف يضطر (يتدين ليهو) شوية قريشات عشان المسألة تظبط معاهو لأنو الـ90 مليون دي يا دوبك تجيب ليها 500 كيلو حلاوة من النوع الفاخر و600 كيلو (خبيز) و800 كيلو (منين) و900 كيلو (بيتى فور) و750 كيلو (مشكل) و2500 صندوق حاجة بااااردة ..أما ما يتبقى فهو يخصص لصواني الفطور الما خمج والغداء (الضلع) والتحلية والعشاء !!
أما بدل الإجازة المقدر بـ 90 مليون فأنا شايفو معقول وبما إنو (صاحبنا) لابس تمام فما محتاج يشترى هدوم للسفر وبما إنو التذاكر مجانية لأبعد حته تمشيها الخطوط السودانية فهو أيضا ما محتاج يصرف من التسعين مليون دى عشان يقطع تذاكر ! طيب يعمل بيها شينوووو !! يتعالج بيها هو وأفراد أسرتو ؟ أكيد لا لأنو العقد بيقول إنو العلاج ليهو ولأفراد أسرتو مجانن !! خلاس نقول إنو ح يشترى بيها هدايا لأقاربه وأصدقائه وكده .. يعنى شوية قمصان على شوية مقاطع جلاليب وعمم على كم فتيل ريحة على كم ساعة يد على كم توب نسائى وكم بلوزة وإسكيرت والبفضل أكيد ح يدفعوا (وزن زائد) عشان الشنط وزنها ح يكون سته طن وشوية !
حكايت (البونص) يكون مرتب 18 شهر (يعنى 324 مليون) في السنة فما شايف إنو فيها مشكلة ما الموظفين الفي البلد ديل كوووولهم قاعدين ياخدو بونص آآآى نعم بيمشوا يشتروا بيهو بنطلونين تلاته أو يسددوا بيهو حساب (سيد البقالة) لكن برضو أهو إسمو (بونص) برضو !!
أما حكاية بدل اللبس دى فالعبدلله ما شايف إنو 76 مليون جنيه في السنة كتيرة فهى يادوووبك ممكن تشتري ليها 60 عمة توتال أصلي وارد اليابان و60 ملفحة (مطرزة) و120طاقية (منسج) و 84 سروال طويل وعراقى و 30 بدلة (ماركة) ما خمج و 160 فانيلة داخلية 160و 160شورت و140 بشكير و30 جوز (سفنجات) و75 بنطلون صوف إنجليزي (مع الخياطة) و75 قميص أفرنجى (كم قصير) و75 قميص أفرنجي (كم طويل ) و 75 كارافتة (إيطالي) و30 ساعة يد (سويسرية) و75 جوز (شرابات) معتبر و65 دستة (مناديل) و75 جوز أحذية إيطالي (جلد طبيعى) و 120 جلابية تترون ياباني (زبدة) جاااهزة (العمود باليد) وعدد30 جوز مركوب نمر (فاشري) وعدد 60 عصاية أبنوس فاخرة مذهبة (يتم رفعها في المناسبات عند ترديد هي لله هي لله )
كسرة :
أكيد (العقد بتاع السنة الجاية) ح يكون فيهو مرتب سته شهور … (بدل دواليب) !

Advertisements

14 تعليق

  1. و الله يا استاذ لو خاطيت صخرة صماء بهذا المقال لتحركت من شدته المبطنية بالسخرية و لكن قومي لا يعلمون. او على الارجح يتغافلون.

  2. السلام عليكم / ن ، البرف ، الاخوان ، افتكر وزارة الاوراق الماليه دى الكلام فيها كتر ولاكُتر ، لذا نقترح التالى ، اولا ما فيش حد احسن من حد فى مسألة صرف الاموال التى تأتى بدون ان تدق فيها طوريه ، عشان كده وزارات زى دى و معاها سوق المواسير و المتموسرين و هيئة الذكر و الذاكرين و اللعب و المتلاعبين و النواب و النائبين و هلمجرا و المتجرجرين و هكذا دواليك ، ان تكون فى لوترى قومى ، بالدور ياساده مافى داعى للزحمه ، بس العجايز المعترفين اول ، عشان يحصلوا رقبتهم ، اظنكم كلكم حتقولوا عجايز ، لازم شهادة التسنين يكون مر عليها سنتين ، سؤال خبيث ، كم مره الواحد يعرس بى ماهيه زى دى ؟ كل شهر ؟ كل بونص ؟ كل عيد ؟ كل اجازه ؟ كل يوم ؟ ……….. عجبى

  3. البروف العزيز جبرا و السمار سلام . . .
    أنا برضو ما شايف بدل خدامين و طباخين و لبيسين و ما شايف بدل كوافير وبيديكير للمدام و بدل حلاق لسعادتو ، و لو حصل لسعادتو بكا و اللا عرس واللا أي مناسبه أخرى ما شايف يدل الصيوانات وصالات الأفراح ، يعني مفروض سعادتو ينصفوهو شويه مش تشيلو حالو يا صحفيين الحساده.
    بس ممكن تكلم لي سعادتو أنا عندي زبون جاهز لجلود الـ 220 خروف ديل.

  4. ياسين شمباتى | رد

    انا تعبت جدا فى حنة اللبس دى!
    وتانى الاسمع او اقرا فى جريدة او جهاز اعلامى انو المواطنين بيشتكوا من اضراب الاطباء الرواتبهم ما بتحصل 600 الف جنيه قديم! شعب جبااااااان بشكل..

  5. الأحباء الأعزاء
    ســـــــــــــــــــــــــــــــــــــــلام

    حبيبنا سنكل :
    ح نكلم سعادتو عشان يبدلهم بي بقر (بدون سنكيت) !

  6. البروف : يعنى انت فى الصوره بتاعة لبس جماعى دى فى زول قال ليك جبت القماش الابيض السمح ده من وين ولا مترو بى كم حتى نشوى لابسه ايه الرفاهيه دى كلها ؟؟ هههههههه
    يا عمنا المسئول ده بيمثل بينا – عفوا بيمثلنا بره وعشان كده لازم نحنا كشعب راقى وطيب وبيحب التمثيل !! نساهم فى انو مسئولينا يظهرو بى صوره كويسه قدام الناس حتى لو ادى ذلك للمجازفه بلقمة عيشنا والستره والفضيحه متباريات ولا شنو ؟؟
    انتو عم سنكل قلب جلود !! ولا شنو ؟؟

  7. يا بروف

    معليش راسي علق والكالكوليتر ابت تشيل، يعني في السنة بيطلع ليهو بكم المسكين دة؟

  8. الزول دا يا بروف ما داير يشتري ليهو 3 عيال؟ عشان المرة (المجرمة) ديك عندها قريبا داير يبيع عيالو كمان (يشيل واحد وياخد إتنين مجاناً).. على الأقل يكون ساهم في حاجة مفيدة للبلد .. مش هي لله ..؟
    بالله شوف تكلفة الزول الضار دا (السنوية) ممكن تعمل شنو في مدارس أم طرقاً عراض، ولا مستشفى الدلنج، ولا في فقراء أم جغمبيس؟ وبرضو يقولوا البلد ما فيها قروش .. الناس دي ساكتة ليه؟ في سبب أكتر من دا للثورة ؟
    … غايتو جنس غايتو … !!

  9. البرووووف المبدع وسمار القمردينة.
    سلامات وماشاء الله عليكم وأنا حاسى برجوع القمردينة لنشاطها .
    أولن بالتبادى الزووول دة جايبنو من وين يعنى لو كان مغترب ومتعود يصرف قروش أكتر من دى ما تحسدوهو ساكت آآآجماعه لأنو هو رضا يرجع البلد دى ويستحمل حرها وكرها وفرها وغبارها وحاجات كتيرة وبقول عشان الوطن تهون السخانة وتهون المشاق .يعنى ديل البفدو الوطن بى عرقم ويبزلو من أجلة الغالى والنفيس .
    تانين الزول دة إنتو دايرين تمسسكوه خمة قرووش أخير تملوليهو عينو ولا تخلوهو جعان عشان عينو تزوغ على القريشات دى وتقوم تفرق عليهو ويقدم إستقالتو وتانى نفتش لى زول يمسكن لينا مانلقاهو .
    مالك ياخ…..

  10. اليوم بما سمعته منك،ذكرتني باحدى الششخصيات الكرتونية التي تستطيع أن تتحول إلى الشئ اللازم في نفس اللحظة..وذكرتني بنا و بالتحول إلى الكثير والكثير من الأشياء..لكن أكثر ما ذكرتني به لهي صورة طفل المجاعة الذي يزحف نحو أحد مخيمات إطعام اللاجئين في السودان شبه ميت ووراء الطفل يرابط نسر منتظراً موت الطفل ليأكله؟؟كان ذاك النسر أرحم من مجاعة السودان الشقيق عام1984 وهو ليس بعيد الذهاب ولا الإياب ولعل الصحفي الذي التقطها يومها استطاع أن يكون أكثر إنسانية من الكثيرين من الكثر..؟وأوصل قضية المجاعة إلى فضاء أرحب..طبعاً انتحر الصحفي بعد3أشهر من قسوة ما رآه؟؟اليوم هناك مجاعة أكبر من مجاعة الأمس..وأفواه أكثر..ونسور أكثر وأكثر..ولكن بين أدغال البلاد والقلوب هناك صحفي ما وقلم وورقة وضوء قادم من بعيد..
    وعمار يا بلد..عمار..

  11. يا جماعة الخير .. بطلوا الحسادة دى ..دا رزق ساقه الله على الراجل من حيث لا يعلم ولا يدرى ويمكن أمه دعت ليهو فى ليلة القدر وربنا استجاب لدعاها ..خلوا الراجل يستمتع شوية بالراتب والبدلات ويعمل ليهو قرشين حلوين لليوم الأسود .. يعنى انتو عاوزين أولاده يتشردوا بعد يخلى المنصب أو يموت ..
    غايتو .. لاكين .. جنس .. حسادة .

  12. يا خوانا الموضوع دا عااااادي إذا كان نحنا جيعيانين و في خمسة ألف راس من البقر مشت مصر – ما عرفناها دي تلجة دي شنو ,,,الله أعلم – عشان كدا ما تتكلمو كتير هي خربانة من كبارا – و يا ريت يا استاذنا تكتب لينا عن موضوع البقر دا من باب الأولوية – من الأحق بها ؟؟؟؟؟؟؟؟؟؟؟؟؟؟؟؟؟؟؟؟؟؟

  13. كلامك دا كلو جميل ومنطقي بس انا عاوز اعرف السنة الجديدة الحاجات القديمة بوديها وين؟؟؟

  14. البروف أبو ناجي وقرائه الكرام سلام
    حقيقة لو كنا نرى من محدثي النعمة من وزراء الإنقاذ ما رأيناه أو سمعنا به من أريحية من سبقهم من الوزراء والعمد والمشايخ لطابت أنفسنا عما يأخذونه ودعونا لهم بالبركة ….. وأحكي لكم قصة عن اليمن قبل حوالي 7 سنوات قال لي أحد اصدقائي اليمنيين المغتربين في أمريكا أن الشيخ الفلاني تخزينته في اليوم بمليون ريال!! أي ما يستهلكه من قات في اليوم بما يعادل 15مليون سودانيفي ذلك الوقت فتعجبت وسألته …من أين له بالفم الذي يستوعب هذه الكمية من القات؟ فقال لي أن هذا الشيخ لا يستعمل قشة واحدة من هذا القات وإنما يقسمه على العمدوالمشايخ والضيوف الذين يحضرون مجلسه وهم يكونون عادة ما بين 200-300 ضيف منهم الغني ومنهم الفقيرالمدقع ….فسألته حينئذ من أين له بهذا المليون اليومي؟ فقال لي أن القات يأتي من أراضيه كما أن كل أبناء القبيلة عندما يحصدون قاتهم يحملون منه إلى هذا الشيخ لأنهم معجبون بما يتكرمبه …..هل سمعتم بوزير إنقاذي تكرم لجاره بشوال سكر من حقه ناهيك عن القات؟ هل سمعتم بوزير إنقاذي شيخ عرب؟ كلما زادت مخصصاتهم إزدادوا بعدا عن الناس لأنهم لا ينتمونإلى هؤلاء الناس
    بالمناسبة الخمسة آلاف راس بقر أنا معاها وشايفها هدية تعبانة لا تليق باسم السودان رغم انها لسه ما مشت مصر ويمكن تبقى حبر على ورق لأنو لو ضربتو سعرها أقل من مخصصات أي واحد من محدثي النعمة بتاعونهم ديل

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: