جات سلامة

الجيوب أنواع .. فالجيب فى الرياضيات هو النسبة بين الضلع (المقابل) لزاوية والوتر في مثلث ذو زاوية قائمة، أما جيب التمام فهو النسبة بين الضلع )المجاور) لزاوية والوتر في مثلث ذو زاوية قائمة ، أما الجيوب فى الطب فكثر فهنالك (الجيوب الأنفية) وهي فراغات مليئة بالهواء، تتصل بالتجويف الأنفي عبر فتحات خاصة، تقع ضمن عظام الجمجمةِ والوجهِ وهنالك ( الجيوب الجفنية) وهي كما يقول الأطباء أكياس دهنية تتشكل عند الجفن الأسفل، وهى نوع من الأنتفاخات التى تحدث نتيجة فائض الدهون .
أما أكثر الجيوب إزعاجاً وخطورة فهى (جيوب المقاومة) وهي مجموعات من الأفراد المسلحين المختفين فى أماكن متفرقة ينطلقوا منها لمهاجمة العدو الذى غالبا ما يكون (محتل) المدينة !
أما الجيوب التى علي الملابس فهي أشكال وألوان فهى تستخدم لحفظ المتعلقات الصغيرة وأهمها (الفلوس) ولعل أشهر الجيوب هو(جيب الساعة) وهو جيب يقبع علي الجهة اليمنى أعلى (الجلابية) الرجالية له فتحة صغيرة تسمح فقط بدخول أصبعي (الوسطى والسبابة) وقد كانت يستخدمة أباؤنا وأجدادنا فيما مضى لوضع (ساعة الجيب) وهى ساعة مستديرة قطرها أكبر من البوصة بقليل ذات (دلاية) تربط فى طرف الجيب وعلي الرغم من أن (ساعة الجيب) قد إندثرت إلا أن الجيب لا زال باقياً حتى تاريخه وقد وجد له المواطن وظيفة أخرى هي الإحتفاظ بالفكة الحديد و(الخمسميات) لزوم دفعها للكمساري عند ركوب المواصلات!
وتزدهر الجيوب عادة فى الاسبوع الأول من كل شهر بالنسبة للموظفون فى الارض حيث يبدو إنتفاخها واضحاً للعيان ثم لا تلبث أن (تكش) وتضمر بسرعة البرق بعد القيام بدفع (الجرورة) وحساب البقالة وسيد اللبن والجزار وبتاع الخضار والجمرة الخبيثة موية (الكهرباء جايااااكم) وإيجار البيت والشنو ما بعرف وكووولها كم يوم ويصبح الجيب خالي الوفاض وما فيهو (أبو النوم) !
أما (الجماعة) فقد تركوا إستخدام الجيوب وإستعاضوا عنها (بضهرية) العربية لأنو دى ما (قروش جيوب) هسه الجيب بتاع (الزول داك) بشيل بدل اللبس (بس؟) خليكم من بدل (العيدين) والإجازة ؟
مناسبة الكلام عن (الجيوب) دى شنو؟ أقول ليكم :
أوصاني أحد الأصدقاء أن أحضر له معي (جهاز موبايل) من دولة الأمارات التى زرتها مؤخراً وبسبب المشغوليات و(الزهايمر) فقد نسيت طلبه حتى إذا ما عدت إلى البلاد (تذكرت الطلب) فقلت في نفسى ما مشكلة (أشتريهو ليهو من هنا) وبالفعل إرتديت جلابيتى و(لفيت) عمتى وعلى شارع (الجمهورية) حيث بعض محلات الموبايلات ، كان الوقت ظهراً و(البرندات) تعج بالباعة والجمهور ، وأنا اسير أصطدم بي شخص يسير فى الأتجاه المعاكس حتى كدت اقع على الشخص الذى يسير خلفى والذى أمسك بى قائلاً :
– جات سلامة يا حاج جات سلامة !
واصلت سيري حتى وصلت إلى أحد المحلات قمت بإختيار أحد (الموبايلات) القيمة طلبت من البائع أن يضعه لى فى (علبته) ويغلفه لي (لانو هدية وكده) ، أدخلت يدي فى جيبى اليمين فوجدته خاوياً ، الشمال (خاوى برضو) ، جيوب (العراقى) نفس الشئ ، لم تطل حيرتي فقد خاطبنى البائع قائلاً :
– يا أستاذ إنتا جيبك ده (مشروط)
– (فى دهشة) : لكن الشرطو شنو ؟
– كدى يا أستاذ أحكى ليا مما نزلتا من العربية الحصل شنو؟
وقصصت له (مساري) وما كان من امر (التصادم) حتى إذا ما وصلت إلى حته الشخص الذى كان يسير خلفى وأمسك بى حتى سألنى البائع :
– مش قال ليك جات سلامة !!

كسرة :
قال أيه : جات سلامة …. والدنيا )أربعاء) وعقاب شهر !!

Advertisements

10 تعليقات

  1. السلام عليكم / ن ، البرف و الاخوان / ت ، جيب الساعه كان مافيهو قيطان لا بمسك ليه ساعه و لا شى ، يضحكوا عليك الفيران يابرف ونحن قلنا عليك تفتيحه ، ارجع محلك زاتو تلاقى شيخهم يقسم معاك ، المال تلتو ولا كتلتو ، سؤال خبيث الزول داك لسه شغال ما كفاه لتوزيع الفرص ………… عجبى

  2. البرووف سلامات .
    يازول كفارة والجاتك فى جيب الساعة سامحتك وزى ماقاليك المال تلتو ولاكتلتو أمش فتش ليك بتاع بوليس فى الحتة ديك وقول ليهو ليك نصهن ووصف ليهو الزول القالليك سلامة .

  3. سلامات وكفارات للبرف جبرا ,,,
    وسلامات لاعضاء القمردينة القدامي والجدد ,,,
    الجاتك في مالك سامحتك,

  4. انت لسّع بتتنشل؟
    والله يعني الحالة مظلمة معاك وجيبك مظبّط ومكرّب ومنفوخ، الخوف تكون بقيت تقبض.

  5. اكيد الزول النشلك دا كان متابعك من اول شارع الجمهورية …وكان شايف جيب (التمام )المنفوخ..
    نفسى اعرف متين لحق شرط الجيب دا وشال القروش منك وما فى زول اصلاً لاحظ الموضوع دا ..
    ياخ الناس ديل يدهم خفيفة بشكل ..

  6. حاج أحمد السلاوى | رد

    اكيد الزول النشلك دا كان متابعك من اول شارع الجمهورية …وكان شايف جيب (التمام )المنفوخ..
    نفسى اعرف متين لحق شرط الجيب دا وشال القروش منك وما فى زول اصلاً لاحظ الموضوع دا ..
    ياخ الناس ديل يدهم خفيفة بشكل ..

  7. حاج أحمد السلاوى | رد

    الفاتح …وبعد الحصل دا كووووولو عملت شنو مع صاحبك ؟
    الموبايل أخباره شنو ؟

  8. السلام عليكم ورحمته وبركاته ياالفاتح فتح الله عليك اتمنى ان انضمه اليكم بالمناسبه انا عملته الامييل ده بس عشانك انته وكتاباتك البتخش جوه المخيخ يتقبلونى ولا اعمل صندوق دعم القبول

  9. البروفأبوناجي سلام وتحية
    جات سلامة فعلا إذا كنت شايل في الجيب شوية فلوس ونشلوها …..بس نجنا نشلوا قلبنا ….أيوة قلوبنا …كنا شايلين فيها حاجة إسمها السودان لقيناهم نشلوها وقسموها بينهم ولمان مشينا لي شيخهم عشان يقسم معانا وكدة ويدينا الثلث كما نصح أحد قرائك لقيناهويطالبنا ب (ثلث الباقي) وكأنه في ميراث الجد مع الأخوة …..وهولسه في باقي؟؟
    وكمان ذكرتني فيلم لمحمود ياسين يسرقوفيهوالهرم الأكبر و …نهرالنيل…..

  10. صدقني..في أيامنا هذه أنت إما سارق أو مسروق
    عزاؤك أن تكون مسروقاً كاف
    عزاؤك أن يسرقك نشال مال-فقط- كاف
    وعمار يا بلد..عمار

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: