كاتبنى وين؟

بالله ده إسمو كلام؟ أيه (الرزالة دى) قلتها فى نفسى بعد أن حركت مؤشر راديو العربة لأستمع إلى أحد المطربين الجدد وهو يغنى مخاطباً حبيبه قائلاً :
عشان تآمن وتقتنع أنا عمري ما نزلتا فيك نقطة دمع .. !! بداية الأمر توقعت أن تكون الأغنية (مصرية) يخاطب فيها الشاعر رئيسه المخلوع (مبارك) موضحاً عدم أسفه لذهابه وأعوانه من (أعوان النظام) ولكن بعد أن إستمر المطرب فى إكمال الأغنية تأكد لي أن الشاعر يخاطب محبوبه مؤكداً له بأن غدده الدمعية لم تفرز طيلة علاقته معه ولا (سى سى) دمع واحد !
هل إنتهى عهد العاشق الولهان؟ (البكاى) وإنتقلنا إلى عصر العاشق أبو (من غير دموع) ؟ لابد للإجابة أن تكون بنعم فى ظل التغيرات الدراماتيكية التى شهدها مجتمعنا مؤخراً فى كافة سلوكياته ألا يكفى بأن (الحرامى) فى الزمن الماضى (كان بيعاين في الواطة) وهسه بيعاين ليك جوة عينيك عدييييل !
أنظر عزيزى القارئ هذه التشوهات التى أصابت حتى أسمى العلاقات الإنسانية وهى (الحب) فبينما كان شعراؤنا فى وقت مضى تمتلئ أغانيهم بالدموع والآهات والأشواق باتت أغاني اليوم تمتلئ بالمسدسات والطبنجات والرشاشات والكلاشنكوفات حتى يظن المستمع أنه فى (مصراته) أو تعز أو الجبل الأخضر !
ماذا حدث لأولادنا ولماذا باتت مشاعرهم قاسية ومعدومة (الحنية)؟ ولماذا يلجأون لإستخدام القوة المفرطة فى تعاملهم مع المحبوب؟ أنظر عزيزى القارئ لأخدهم يخاطب محبويته مشككاً فى قواها الغقلية طالباً منها التوجه فوراُ لمستشفى (الأمراض العقلية والنفسية) لعمل الفحوصات اللازمة :
لو قايلة ريدتنا زي مهند ونور
تبقي عيانة وشوفي ليك دكتور ؟
ولم يكتف بذلك بل (الشغلانه جابت ليها حقارة) إذ خاطبها مجرداً أياها من أى مزايا جمالية قائلاً :
رغم انو هواك ليا فيهو دهور
انتي عادية لا ملاك لا حور
لا ومش كده بس ده حالف يمسح بيها الواطة إذ قال مواصلاً تشنيعه لها مصراً على هدم معنوياتها ووضعها في أعلي درجات الإحباط :
يعني هسه انتي عايشه الدور؟
هسة في الذمة انتي تشبهي نور ؟
ولن نفاجأ عزيزى القارئ إذا ما قامت المحبوبة (بعد ذهابها للتجاني الماخى وعمل الفحوصات اللازمة) أن ترد الصاع صاعين لحبيبها قائلة :
رغم إنو هواك تميت فيهو الحول
عاوزة أقول ليك إنتا زول دلدول
كل يوم بتورى إنك أكبر تور
يلا من وشى .. يلا أمشى الخور !
قلت في نفسى وأنا أحرك مؤشر الراديو لمحطة ثانية .. (خلاص مفيش حب وهيام وإخلاص وإحترام وللا ايه) ؟ حتى جأءنى صوت أحد المغنين يؤكد لي بأن (الدنيا لسه بخيرها) وإنو الحب الطاهر الجميل موجود لكن عاوز ليهو (سفلي) إذ يقول المغنى :
كاتبني وين وعند ياتو شيخ
خلاني اجري وراك كدا
انا ضقت طعم الريد كتير
مالقيت غرام بالشكل دا
وبعد أن يؤكد الحبيب بأن القصة تمت بدون خاطرو ا وإنو الجري و(التكسر) ده ما منو لكن من كتابة (الفكى) الشديدة يضيف بان المسالة فيها (محايات) وكمان (كشحات) مما يدل على أن المحبوب (نجض الشغلانية) تماماً مستخدماً جميع الاسلحة (السفلية) :
سقيتني موية الريد وين
وكشحتا لي كشح الهوا
مرضتا بيك وانت الدواء
بتعب كتير لمن تغيب
برتاح لمن نكون سوا
ويمضى المغنى مؤكداً خطورة (الشيخ) الخلاهو يباري فى محبوبه من مكان إلى آخر قائلاً :
شيخك خطير السوا ليك
عرق المحبة واكدا
لي مدة انا ماشديد
يامعاك يا عايز اجيك
من اي زول انا مصطفيك
ونأتى للحظة الحاسمة حينما يقوم (صاحبنا) بفك العمل ليكتشف (شناة محبوبه) وإنو (زول عااادى) وما بحتاج الجرى والتكسر ده كلو فبستطرد قائلاً :
مافيك شئ يخليك هواي
وريني ايه عاجبني فيك
شيخك صعب بالجد صعب
خلاني امشي وليك اسيل
واشوفك انت براك جميل
كاتبني وين وعند ياتو شيخ
عزيزى القارئ .. بعد إستعراضنا لهذه النماذج من الأغنيات يبدو لي أننا فى حوجة لإنشاء (مفوضية) لإعادة (الحب) إلى سيرته الأولى بكل (مخصصاته) من وجد وشوق وهيام وغرام
وقبل ذلك أن نقوم بعقد (مفاوضات) بين محبي (الزمن ده) والوصول إلى إتفاق بوقف أى أعمال عدائية والأهم من ده كلو … وقف إطلاق النار !

كسرة :
هو يعنى الما (باظ) شنو؟ هى فضلت على (الحب) ؟

35 تعليق

  1. المشكلة يا استاذ في ناس الاذاعات البذيعو الكلام الفارغ دا

  2. وبعدين نقوم نعمل مفوضية للحب الجماعة يجو يلهطوها عليك الله خلينا في الحجار البنسمع فيها دي

  3. والله ما ليهم حق مع أنو في واحدة قربت تروح فيها في درب العسل دا….. دحين شوف قالت شنو: عيانه عيانه.. انا مرضانه تعبانه شالونى… بالنقاله ختونى وسط الصاله الدكاتره جات تتجارى… والحمه زايده حراره …الاطبا يشرحونى ياناس انا شرحونى…. نادو لى الاهالى يبكو يعزو فينى… نادولى صحباتى ديل يبكو يوصفونى…. ومويتى ديك جابوها عشان ما يكفنونى…. ياناس انا بردونى وكفنى داك قصوهو قالو يكفنونى…. ياناس ان كفنونى اللورى عجاجتو رابطه وف اللورى انا شالونى…..
    وقبرى داك حفروهو وشبرى داك حفروهو… وقالو ينزولونى ياناس انا صلو فينى ياناس انا نزلونى وفجاء ظهر حبيبى العسل ده من النوم صحونى العسل ده الليله ماجانا شبه البرتكانه العسل ده…… ياخ مش كان تتأخر شوية…!!

  4. سلام ياقبيلة،،
    صديقي جبرا أنت تتحسر علي حال هؤلاء الشباب (الواعي) و(صاحي) وقد أكتشفوا الحقيقة المريرة والتي كانت غائبة عن أولئك الشعراء والمغنيين في ذلك الزمان ، فبينما يصدح المغني اليوم بفضح الحقائق ويكشف حقيقة من يحبه نجد أن شاعر الزمان القديم كان غارقا” في النشوة والهيام لغياب عقله بسبب تلك التي كانت هي الداء فأنظر لشاعر الماضي وهو يناجي من يحبه بقوله:
    هات كأس هات خمري ثم هات العودِ علني يا زهر عمري أنسي آلام حياةِ
    ويمضي في تلك الناجاة حتي يقول لها
    وتعالي ذوبي بالحسن ذاتي قبل ذوب الليل في فجر الحياةِ
    أين هؤلاء من أولئك وأيهما الصادق فيما يقول يا صديقي؟؟؟
    المشكلة ياصديقي تكون أن الغيبوبة هي التي يعيشها شباب اليوم!!!

  5. عزيزنا جبرا
    اذا لم يتم وقف العدائيات وضرب النار من جانب المحبوب فلن نعترف (بتلك الدوله) اقصد مفوضية الحب

  6. Salam
    Dear Al fatih
    Since i know the way to your website i use to read what you write as a joke or a funny way of reflecting the way of life in Sudan ,until i had a visit to my lovely Sudan , and i realized that you are absolutely not joking ,after I’ve seen to what extend how people have changed even in a very close circle (I’ve been away for only 10 tears .

  7. بارك الله فيك يا استاذ نحن بالجد كون محتاجين تغير عشان ما يصبني احباط وربنا يدم بين المحبة

  8. الاخ/ الفاتح
    انا اقترح اولاً عمل لجنة عليا(قبل المفوضية) وطبعا لازم تكون هتالك لجان منبثقة تحت اشراف وزارة الرعاية الاجتماعية وووووووووووووووووووووووووووووووووووووووو وعييييييييييييييييييييييك وكلو ح يروح شمار فى مرقة وسيواصل الحب عندنا فى الهبوط

  9. إزيكم ياناس
    التقول على هو بقى مافى حب ذاتو !!!! او قولو حب سفرى ذى ما اى شى بقى سفرى !!!!وفى واحد كده ذى حشرات الخريف عمرو ساعات وكان بالغ يومين!
    شباب الأيام دى ما أختبرو الحب الحقيقى ولا بعرفو حب يعنى شنو وبينى وبينكم هم هشين وما بقدرو على عذاباتو ,بس طبنجاتو وكلاشاتو بقدرو عليها!!!!
    يمكن نحن برضو ملامين ,لازم نحبهم كفاية عشان يعرفو يعطو !!بس البدينا فرصة نروق حبة ونقعد ليهم منو ؟

  10. البروف : الليله بتمرق البكايين كووولهم وموعودين نشوف اسماء غابت لفتره .
    تعرف يا بروف نحنا فى زمن التجريد الشديد يعنى اتوقع بكره واحد يغنى :
    شناتك ديكا مره وصعيبه بالمره
    قايلا شناة عابره اتاريها جوه وبره
    صديقى س جنو يجر الشارع بى عربيتو بالليل فى شارعا لعرضه وفى احد الايام شال ليهو وحده من الشارع وهو من النوع الرومانسى بتاع زمان وبدا يتغزل فيها :
    س : يا سلام على شعرك شعرك دفة اللي
    وقبل ان يكمل فاجاته بقولها :
    هى : سجمى ده شنو ده بتاع شعرك ده هوى انت شايلنى من شارع العرضه ما من الشانزليزيه !!!! شعرك بتاع شنو اختصر خلينا ننزل ههههههههههههههه
    اها شفت حتى الحاجات ديك فقدت معناها …

  11. البروف ولانى متلوم معاك كتبت البيتين ديل على اعيد بهاايامنا العشنا فيها احترامنا :
    الجابر يوسف فتحة ضو
    الفاتح يوسف جبر الكسر النازف شو
    يا جبرا الضو فى زمن اللولوه يمكن لو
    يا جبرا الناس الما بتسو
    واقفين فى الصف راجين الباب القافل رو
    لا فتح الباب لا زول قال كو
    الناس خايفين فى زمن الديب الكورك عو
    فى دنيا ضعيفا بياكلو القو
    فى دنيا كلابا تكورك هو
    اكتب ورينا الناس يا جبرا شن بتسو

  12. سلامات البرف جبر وكل الاعضاء …
    اجمل ما في المقال حكاية الحرامي الكان زمان بعاين في الواطة واسي بعاين ليك في عينك عديل ….فعلا حتي الحرامية بقو ما بيختشوا وبيعملوا في حاجات هم شايفنها عادية جدا …خصوصا الحرامية اياهم الذين نهبوا البلد بالمخصصات غير العادلة وباستقلال السلطة …
    الكسرة برضوا حلوة شديد …
    اي حاجة في البلد خربانة بقت علي الغناء والحب يعني …
    الحاجة البتفقع المرارة بالجد انه اقل واحد من حثالة الفنانين هؤلاء سعته تتخطي ال 3 مليون جني سوداني …
    الجنيه بتاعنا دا مفروض نسميه الجني بدل الجنيه ….
    ود الخلا اي شباب هو الواعي وصاحي …

  13. إزيكم ياناس
    أفليقا ماتطبظ

  14. سلام تاني للقبيلة،،،
    علشان في شك في الحكاية دي يكون فيها انّ فتحنا ليها الأقواس يا محمد دوم، وربنا يجيب العواقب سليمة، حالتهم لا بتسر حبيب ولا بتغيظ عدو، وهمن مستقبل الوطن فماذا نفعل حيالهم لننشلهم من وهدتهم هذه ياصديقي؟؟؟
    كسرة/
    قال ليك واحد من جماعة هاتي كأسي ملآنة شنو كده ما عارف بعد تطبيق قوانين الشريعة في 83 الله يطراها بالخير في أيام نميري الله يرحمه قام ضرب ليك البلدي الكارب داك وهو طبعا” كان معتاد علي المستورد من بلاد برة، فجاء ماري بالسوق بنفس المكان الأشتهر (ما خور عمرطبعا”) والذي كان يتعاطي منه ذلك الشيئ وقادته قدماه حسب اللفي رأسه للمحل فوجده وقد أصبح مغلق فنظر في المحل طويلا” ثم أستدرك ما هو عليه حاله فنادي صاحب المغلق وقال ليهو: يا خونا أدينا قزازتين ثينر وعلبة بوهية صااااااااااااااقطة!!!!!!!!!

  15. البروووف والسمار .
    كيف عاملين .
    إنت ماسمعت بى أغنية :
    (إنت من درب وأنا من درب .
    كفاية وجع القلب .
    دى بقت طرد عديل ولا أغنية
    أقول ليك بأمانة
    عمليتك ماظريفة
    وحركتك جبانة .
    كمان جابت ليها إسائة
    الريدة الزمن دة بقت عمرها لحظات بس وياخد منك المحبوب الدايرو ويمشى لى حال سبيلو .
    أنجز ….

  16. ود الخلاء
    إنت ماسامع الطيب مصطفى دة بقول فى شنو .
    قاعد لى بى جاى ؟؟؟
    لك التحية يا سديقى.

  17. البروف الغالي .. وسماره الكرام
    على ذكر المطربين الجدد .. واحد منهم بسأل فيهو المذيع .. بعد أغنيتك الرائعة (معاي تضحك ..وبي وراي تقطع .. إنت ما زولي .. إنت ما بتنفع) واعد معجبينك بي شنو؟
    سرح المطرب شوية .. (على طريقة كبار الفنانين) .. وقال والله اليومين ديل شغال بروفات لأغنية جديدة .. إسمها (حبك علمني طعم الهزيمة 3 صفر) ..
    وبرضو تقول لي الحب إنتهى في البلد .. !!!!!

  18. لا يفوتني أن أحتفي بالذائقة الشعرية العالية للأخ أفليقا .. والتي تذكرني بنفس ودبادي في شعر الإيقاع الصاخب .. فلك التحية شاعرنا أفليقا ولا أسكت الله لك حساً

  19. اب احمد : مع انو ما عرفت ود بادى ده منو لكن ما دام منك معناتا زول سمح ههههههههه
    البروف يستحق ما لا نقدر ان نعطيه اياه ( البشاوى ما تمشى بعيد ) وانا متلوم معاهو شديد فلم يكن يمراسبوع الا ونتمم فى بيت المال نطمئن على الصحه والاحوال لكن الدنيا نسوى شنو ؟؟ عزاؤنا انه يعلم اننا نعلم اننا نحبه فى الانسانيه ( وفى الله عشان ود الخلا ما يزعل ) وفى الوطن فهو يعطينا للوطن طعما اخر كلما حاول البعض تمسيخه علينا .. حفظك الله بروف جبرا …

  20. نورا : الجاب الطبظى شنو اسى كدى ورينى انا طبظت وين عشان اعتذر ليك مافى اى طبظ انتى حساسه ساااى ..

  21. بدون تعليق ، شماعه

  22. الأحبة جميعاَ
    يأبى الفاتح ألا يصيب من اسمه نصيبا ولكن مايثلج القلب أن ما يفتحه من مواجع ربما يعيد لنا شيئاً من السلام..كيف؟؟
    والله يا أصدقائي ما يحصل في كل البلاد العربية سسيعيد حتى للحب ألقه..
    والله سترضى آلاف الفتيات بشباب لايملكون إلا كفيهما التي فتحت الطريق إلى الشمس..
    نعم..هؤلاء الذين علموا الحروف كيف تسيل على شفاه يبست وتشققت من هجير السكوت..
    الحب كما الحرية حين يلبسه أحدهم ثوباً تافهاً لن يقتل جوهره..
    الحب..ينتعش اليوم وينفض عنه ركاماً أسوداً..إني أراه يلكز وطنا بأكمله ليغني له:
    بالي معاك بالي بالي يالي يالي..يابو الجبين العالي عالي عالي عالي
    وحياة عينيك عينيك يـــــاحبيبي..غيرك مــــــــا يحـــــــــــــــــــــــلا لي ( أغنية محلية شامية تومي لرفعة جبين من تحبه..لتحبه)
    وعمار يا بلد..عمار

  23. حاج أحمد السلاوى | رد

    البروف الفاتح .. الغنا عموماً فى كل الدول العربية ,,وخسوساً فى أمازونيا العظمى بقا ونسه ساااااااااااااكت …
    ومن ضمن الأغانى اللى شدت إنتباهى خلال الإجازة الفاتت سمعت واحد بيهنق .. الفى ريدو فرط ودقس ..بيجى غيرو يعمل مقص .
    انا قلت يمكن الزول دا شغال حلاق زى صاحبك إدريس ..
    أما الغنية الأكثر طرافة وتخليك تموت من الضحك ..واحد بيغنى لحبيبته بس ما قدرت أعرف من وصفه ليها هل هى جميلة ولا شينة شناة مُرة لأنو قال ليها : ( لما شفتك يا حبيى قربت روحى تطلع…).. واتمنيت ساعتها لو روحه طلعت عشان نحنا زاااتنا نرتاح من جنس دا ..وما تنسى إننا لسه فى عام 2011 وما نا عارفين إن اراد الله ومدّ فى الآجال حنسمع أغانى من أى نوع وشكل..
    غايتو خلونا النشوف آخرتا شنو .. مع البرنسات الجدد .

  24. يا بروف في ناس عملو المحبوب دا حرامي كدي شوف الاغنية دي
    وانا في نومي بتقلب حرامي القلوب تلب

    سالت روميو ورندا قفلت البرندا

    واناداير اتعشي واحلي بي المريندا

    واخد لي سندااااااااااااااااااااااااااااااا

    ورقدتا ونعستا وسرحتا

    عاينت في الحيطة في حرامي لي تلب

    خشي علي براحه بقي مافي بينا مسااحه

    حرامي شنو دا الراقئ الزاد للروح افراحا

    دا حرامي سمح سماحه

    ما عادي طبعوا هادئ

    بدل يسرق قروشنا سرق قلبي المعذب

    وصحيت والله بعلم وكنتا صاحي وبحلم

    حلمت بي ذول بريدو ومعاهو ما اتألم

    حرامي القلوب يسلم دا بحبو وبحب قربو وبخش في قلبو

    والبشيل قلبي ويجري يتهني ما يتغلب

    هسي كان قبضوهو بشنو حايحاكموهو

    مافي قانون بحاكم الذول البريديهو يسكوهو وبمسكيهو وما بخلوهو

    تجي السرقه ما فاهم في حب الناس مدرب

    وانا في نومي بنقلب الحرامي لي تلب

    وانا في نومي بتقلب حرامي القلوب تلب ..

    فتحة و ضمة كمان:
    هسي يا بروف الحرامي دا يشكو لي اوكامبو ولا يبقو وزير …………………. استيم تفاح……

  25. وكما قال الشاعر واصفا محبوبته:

    أبوك أملاكه تملاء الكون
    وعنده كم قميص وبنطلون
    عربيتك السمحة ام عيون
    موبايلك الفيهو كم لون
    ودهب امك الجرامه بمليون
    واكيد ضيافتكم فيمتو ما عصير ليمون
    خليتيني افكر نجيب المأذون

    وكما قال لها موصياً:

    حافظي على ريدتنا يا بت الأصول
    اضربي لي عديل وخلي المسكول
    وصي لي ابوك يشوف لي شغل عند أي زول
    ياريت لو كان وزير أو حتى مسؤول

  26. السلام عليكم البروف وضيوفه الكرام
    أنت يا بروف مبتكر سجمستان التي استوردت شعبها من جفافستان وأرسلت خيار مواطنيها إلى تشردستان لسع عايز تقارن أغاني سودانستان بأغاني سجمستان؟ الأغاني مختلفة لأنو الشعب مختلف …. شعبك داك البنحلم بيهو يوماتي والناس قايلينو ما كان موجود انتهى وهو يتلوى في الخارج ويغني الطير المهاجر ولم يجد حتى طائرا وجهنه سجمستان….. يا زول والله حرام عليك عديل تذكرنا وتقارن الناس ديل بديلاك

  27. الاحبه :
    ولانو النجره بتاعة الجابر يوسف كانت سريعه ارتجاليه قعدت عدلتها لتكون :
    الجابر يوسف فتحة ضو ( واوعى زول يقول لى يوسف ده منو لانو كلنا يوسف مجبورين بفتحة ضو فى اخر النفق )
    الجابر يوسف فتحة ضو
    الفاتح يوسف جبر الكسر الجرح النازف شو
    يا جبرا الضو يا جبرا ات ضو فى زمن اللولوه و يمكن ولو
    يا جبرا الناس الما بتسو ( وديل نحنا طبعا )
    يا جبرا الناس الما بتسو
    واقفين فى الصف راجين الباب القافل رو
    لا فتح الباب لا زول كو كو
    الناس خايفين فى زمن الديب الكورك عو
    فى دنيا ضعيفا بياكلو القو
    فى دنيا كلابا تكورك هو
    اكتب ورينا الناس يا جبرا شن بتسو
    الناس يا جبرا شن بتسو

    1. مثال لأشعار ود بادي:

      أنا أخو البت اللكعت قرن الخمرة النازة
      على وردان الصبوة الراكزة
      الجنيات الهازة .. صدورن لازة ورقّ النص زي خيت الشلة
      بالحيل آ جني إيه والله
      الجنيات الحزمو الجبة
      وعرق الشتوي عليهم نايا و صب
      قول ما دل .. رجالا حصدوا الحبة
      عيشهن هادو انكال واتعبّ
      ومنو كتير في الواطا انكبّ
      وباقي مصوبر واقف قبة
      الحمد آلاف .. الشكر آلاف
      العيش الرقد أصناف أصناف
      الولد الكان.. عزام .. حلاف…ضياف
      الرزق الجانا مدله.. الحلق الجاف اتبلا
      بالحيل آ جني إيه والله

  28. طيب ماياهو ودبادى العكودابى زاتو

  29. الأحباء الأعزاء
    التحيات الطيبات وكل الإعتذار لعدم تداخلي بالصورة المطلوبة مؤخراً أصلو الحقيقة بس بعمل في صيانة للبيت والخريف جاى ويدنا في قلبنا .. شايفين نحنا ذااااتو الخريف قاعد يجينا فجأتن !!

    كسرة :
    شكراً يا ولدنا أفلايقا على القصيدة .. مشتاقين يا راجل إنتا وين؟

  30. حاج أحمد السلاوى | رد

    ,ولدنا أبو الأفاليق.. الدكتور ود بادى دا أحسن من يجيد الوصف ..وأدعوك لسماع قصائده المنتنوعة من حلمنتيش إلى قصائد الوصف ..وتلقاها فى اليو تيوب ..ومن أجمل القصائد قصيدة ودالشايقى وحريمه الأربعة…حتموت من الضحك ..

  31. سلامات..
    عرفنا جفوة وقسوة وخصام,كمان نشحد فيك السلام,,لا دا ما كلام؟؟
    تمد ايديك تسالم الكل,,دا فى يدو ودا مسا الفل,,لا ما دا كلام,تدينى هجير وتدى ناس الضل,كمان جابت عدم احترام!؟؟ لا ما دا كلام..
    اها رايكم شنو دام عزكم؟؟

  32. هي اغاني هايفة بس الجيل دة عاجباو … انا ما عارفة لي مطلعين المشكلة في الجيل يا ربي الجيل دة قام براو و خلق مجتمعو براو و اختار براو . ما قام لقي تعاسة حاصلة فعاش تعيييييس و اغانيو تعيسة زيو
    بالمناسبة شباب الزمن دة عندهم اغاني جميلة

  33. اخى الفاتح والاخوه الاعزاء
    والله على راى حاج احمد السلاوى سمعت نفس الاغنيه بتاعت (لما شفتك ياحبيبى قريت روحى تطلع )وكان لول مره اسمعه فى المواصلات
    فقلت دى اصلو شاف حبيبو ولا عزرائيل
    كسره
    قايتو جنس بشتنه

  34. hamza alshanfaraa
    شوف يا بروف الكلام القالو دان كلو صاح مية في المية…؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: