النسخة السودانية

أرادت جوزفين أن تفاجئ زوجها (جون) فقامت بترتيب المنزل ورشت هلي جنباته عطراً ذورائحة جميلة .. غيرت من تسريحة شعرها وأردت أجمل ما عندها .. عندما دق حرس الباب فتحت لجون الباب فإستقبلها قائلا :
-ما هذا الجمال يا حبيبتى .. كم إنتى رائعة اليوم

النسخة السودانية :
أرادت سعاد أن تفاجئ عوض .. غيرت من تسريحة شعرها التى لم تغيرها منذ أن تزوجا قبل عشرة سنوات .. إرتدت فستاناً زاهياًً .. غيرت كل الملايات في البيت بأخري جديدة .. وضعت على المبخرة عروق من الصندل .. ما أن دق باب الشارع حتى هرعت تفتح الباب لعوض الذى نظر إليها وكأنه يراها لأول مرة قائلاً :
– إنتى جنيتى وللا شنو؟ شنو العاملاهو في روحك ده ؟
*************
بينما كان جون وجوزفين يسيران على شاطئ البحر إصطدمت رجل جوزفين بإحدى الحجارة فتأوهت من الألم .. خاطبها جون فى رفق وحنية :
– هل هي مؤلمة الضربة .. دعينى أعمل لها مساجاً

النسخة السودانية :
بينما كان عوض وسعاد يسيران بشارع الدكاترة .. أصدمت رجل سعاد بأحدى علب البارد الفارغة وقبل أن تتأوه سعاد من الألم خاطبها عوض قائلاً :
– عميانة؟ ما بتشوفى؟ ما تعاينى قدامك
*************
فى عيد زواجهما قالت جوزفين لجون تعاتبه :
– أنسيت أن اليوم عيد ميلاد زواجنا يا حبيبي
أخرج لها جون من حافظته تذكرتان لتناول العشاء في أحد المطاعم الفاخرة وهو يخاطبها :
– كيف انسى يا حبيبتى يوما جمعنى بك .. سوف نتناول طعام العشاء على ضوء الشموع
النسخة السودانية :
في عيد زواجهما قالت سعاد لعوض وهى تعاتبه :
– نسيت يا عوض إنو الليلة عيد زواجنا ؟
أخرج لها عوض من جيب الجلابية ورقة (الجمرة) وهو يخاطبها قائلاً :
– هو الواحد يشتري ليكم الجمرة وللا يتذكر ليكم الحاجات الهايفة دى؟
*************
وهما عائدان من الطبيب بعد ان أثبتت الفحوصات أن جوزفين مصابه بمرض إرتفاع السكر خاطبها جون مخففاً :
– لقد أخطأ السكر العنوان يا حبيبتى فأنتى أحلى من أن تصابين به فأنتى عسل يا حبيبتى
النسخة السودانية :
وهما عائدان من الطبيب بعد ان أثبتت الفحوصات أن سعاد مصابه بمرض (السكر) خاطبها عوض قائلاً ً :
– الما بجيب لك السكري شنو؟ اليوم كلو تضربى فى الباسطات والحلويات
*************
أرادت جوزفين أن تحضر أحد الأغراض من مخزن المنزل فباغتها فأراً يتجول .. هرعت خائفة نحو جون وهى تصيح مذعورة ، إحتضنها فى رفق قائلاً :
– لا تخافي يا حبيبتى الفئران غير مؤذية .. دعينى أذهب بدلا عنك لأحضر لك أغراضك
النسخة السودانية :
أرادت سعاد أن تحضر أحد الأغراض من مخزن المنزل فباغتها فأراً يتجول .. هرعت خائفة نحو عوض وهى تصيح مذعورة
– الفار يا عوض .. الفار يا عوض
أشاح عوض بالصحيفة التى كان يقرأ فيها جانباً وهو يخاطبها :
– مخلوعه كده مالك؟ هو أصلو فار وللا أسد ؟ وإنتى ذاااتو الوداكى تمشى تكابسى هناك شنو؟
*************
قالت جوزفين تخاطب جون وهى تشير إلى أحدى البلوزات وهما يتجولان في أحد المحلات :
– ما رائك يا حبيبي فى هذه البلوزة المحذقة ؟
خاطبها جون وعينيه تشع فرحاً :
– سوف تمون مذهلة عليك يا حبيبتى
النسخة السودانية :
قالت سعاد تخاطب عوض وهى تشير إلى أحد البلوزات وهما يتجولان في (سعد قشرة) :
– رائك شنو يا عوض فى البلوزة المحذقة دى ؟
رد عليها عوض :
– و (كرشك) دى توديها وين؟
*************
جاءت جوزفين وهى منهارة وإرتمت على أول كرسي إنزعج جون وسألها مستفسراً عما حدث أخبرته بأنها قد نجت بأعجوبه بعد أن كادت تسبب فى حادث مرورى وهى تقود سيارتها الجديدة ، قال لها جون بعد أن أحضر لها كوبا من العصير البارد :
– أحتسى هذا العصير يا حبيبتى .. غداً نذهب إلى مدرسة قيادة السيارات لتتمرنى أكثر على القيادة .. إطمئنى سوف تتحسن قيادتك كثيراً
النسخة السودانية :
جاءت سعاد وهى منهارة تماًما وجلست فى طرف السرير نظر إليها عوض فى إندهاش وهو يقول لها :
– مالك؟ الحاصل شنو؟
أخبرته بأنها طلعت من الموت بأعجوبه بعد أن كادت تدخل فى أحدى الحافلات ، قاطعها عوض قبل أن تكمل حديثها :
– ما قلنا ليك سواقتك التعبانة دى يوم بتجيب خبرك !ّ!
كسرة :
– (وهى تطلب منه شراء فستان لإحدى المناسبات) : أفتحي محفظة النقود وخذى ما شئتى ياحبيبتى ويا حبذا لو إشتريتى له حذاءاَ بنفس اللون حتى تكونى أجمل إمرأة في الحفل
– (عوض) : الشهر الفات ده ما إشتريتى ليكى فستان ؟ إنتى قايلانى كاسر ليا بنك وللا القروش دى قاعد أطبعا ؟

Advertisements

26 تعليق

  1. سلامات يا بروف .. سلام لكل الأحبه

    هي سعاد دي يا عمك لو بقت سمحه و رشيقه و ما شليقه كان عوض في المقابل بقى ظريف و لطيف ..

    لكن نعمل شنو .. ياهو دا الاسلوب الماشي في امازونيا ياعمك ..

  2. يا بروف هسي عوض كان جاء داخل من برة وفجاءة قال لسعاد: بحبك ….
    حا تقول ليهو: سجمي يارجل انت مالك؟ عيان؟؟؟

  3. البروف وسماره اللطفاء
    واحد صاحبنا قال داير يكسر الروتين صحى من الصباح لقى أبوهو بتسوك في الماسورة .. بادره صباح الخير يا حاج .. توقف والده عن التسوك .. ونظر إليه نظرة متعجبة .. وقال له .. يا ولد دي مياعة إتعلمتها جديدة ولا شنو؟ .. تقول لي عوض وسعاد .. نحنا عندنا الحب الأسري عيب إظهاره لمن حولنا حتى لو كنا نحبهم أكثر من أنفسنا .. أمازونيا وأجرك على الله

  4. انا مره قلت اهزر مع الحاج .. قمت قلتا ليهو يا ” بابا” … فما كان منه إلا إن نهرني نهر’ ظننت بعدها انه قاتلي .. و قام قال لي يا ولد ” إنكرب” .

    1. هههههههههههههه

  5. سلام ياقبيلة،،
    أنت عارفين الشعب السوداني الفضل ده عبارة عن أسرة واحدة كبيرة ، أو قل نسخة كربونية متكررة بكل ماتحمله من تطابق وتشابه في الأسماء والمعاني والتصرفات وطبيعة ونوع الأكلات فهي علامة تجارية مسجلة سودانية 100%، فما ذكره صديقي أب أحمد عن صاحبه وهو ينبئ عن نفسه أصلا” بس خجلان ساكت وأهو سهيل جاب ليك بالواضح وبالدرب العديل، وأقول ليكم جبت الكلام ده كده لييه؟؟؟ لأن فلم صاحب أب أحمد وسهيل والعبد لله هو مسلسل واحد بس بأخراج ومواقع تمثيل مختلفة ، فواحد في الصافية وآخر في الديم والتالت في كرش الفيل…
    وهكذا دوااااا ليييييك!!!

  6. الأحباء الأعزاء
    والله قصة الجفاف العاطفي بين الأزواج دى عايزه ليها وقفة .. الظاهر تربيتنا الجادة هى السبب والله أعلم

  7. السلام عليكم ورحمة الله
    ذى ما شفتو يا جماعة ا نو المرة السودانية تحاول جاهدة ان تلطف الاجواء وتشيع الحب برغم كل الظروف ولكن للاسف فالرجل السودانى يرى انه من العيب التعبير عن الحب والعواطف ولو حتى الحنية عشان كدا هى كل ما تحاول احرجا واقول ليها جنيتى وفاكة منك لحدى ما تحس انها عويرة وماعندها موضوع وهكذا حبة حبة لحدى ما الاسرة كلها تبقى فاترة وباردة وروتين ممل وجفاف وكلمات تقطع نياط القلب ….. اعتقد انو الرجل مفروض اعيد النظر فى تصرفاتو ….. بس احتمال تكون من ضغوطات الشغل والعمل والمشاكل ال بلاقيها برا البيت بكون عاوز انفس واتفشا فى ناس بيتو واول حاجة مرتو هههههههههههههه

  8. جبرا والسمار .كيف حالكم .
    أنا مرة جيت البيت لقيت عوضية مستحميه ولابسة نضيف قلت ليها (أها على وين .)
    أوافق الاخوة أب أحمد وسهيل وود الخلاء والنوزج السودانى الرائى لأنو دى تربيتنا وعاداتنا وتقاليدنا والدلع والمليس بنشوفو عيب .
    عندنا واحد قريبنا سمع وردى بيغنى للوطن وبيقول (( أحبك… )) قال دة شنو الفنان الباطل دة ؟؟؟؟؟
    يا سهيل قلت لى ظننت أنه قاتلك ….

  9. حاج أحمد السلاوى | رد

    يبدو إنو أـخواننا السابقين من جنوب السودان أكثر تحرراً منا لأنهم يعبرون عن دواخلهم دون خجل ومواراة حسب البيئة..ويمكن الرجل منهم أن يقول لزوجته أو صديقته أنا أحبك ويهديها زهرة حمرا كمان ..
    ولكنى ضحكت لحد ما وقعت من الكرسى لامن سمعت النكتة دى .. مارى أحدى حسان جنوب السودان لبست توب أحمر أنقايزى وقالت لجون : يلا دلعنى يا جون..قام جون رد عليها : يا فحم .. يا مولع ..
    تخريمة سغيرووووونة .. سهيل إنت قلت لحاج الطاهر يا بابا … طيب أولادك ( بإعتبار ما سيكون .. إن شاء الله ) حيقولوا ليك شنو ؟
    غايتو .. جنس … غايتو .

  10. واحد كان معزب اهله شديد سمع بي بر الوالدين بدخل الجنة ماشي بس يد ابوه وقال ليهو اعفي لي. ابوه قال ليهو انت جنت ولا شنو.

  11. السلام عليكم كل الاحباب
    كل المشاكل الواقعين فيها لاننا بعيدين عن الدين سواء كانت اقتصاديه او اجتماعيه اوسياسيه او ……………
    لو قرينا سيرة المصطفى صلى الله عليه وسلم كان عرفنا كيف كان بيتعامل مع ازواجه , سبحان الله كل ما اتذكر قصه وفاه الرسول صلى الله عليه وسلم وانو السيده عائشه رأت النبى ينظر الى السواك فى يد عبد الرحمن فعلمت انه يريد السواكفاخذته من عبد الرحمن ومضغته بفيها لتلينه لرسول الله وكانت تفتخر بان اخر ريق اختلط بريق رسول الله هو ريقها وهنا درس كيف تفهم الزوجه زوجها وتبادر الى راحته ,, ثم طلب الرسول صلى الله عليه وسلم من الصحابه الخروج فخرجوا فجلست السيده عائشه ووضعت رأس النبى صلى الله عليه وسلم على حجرها حتى فاضت اطهر روح واطيب روح الى ربها عز وجل ,,,, فانظروا للرحمه والموده التى كانت فى بيت النبى صلى الله عليه وسلم ودعونا من جون ومهند ونور فكفانا درسا من سيرته صلى الله عليه وسلم

  12. أثناء ما أنا بقرأ الموضوع خاطبتنى سعاد بشئ من الفرح ،،،،،، لقيت النضاره ،،،،
    جاوبت ببرود ،،، آى سألت لى زول مفتح يفتشا لى

  13. السلام عليكم ، نحنا برضه بنحب الناس ، و اهلنا بالذات لكن المياصه ما بتخارجنا ، على الط … الخواجيه تقول ليك انتهى ، تانى كان بقيت قبله ما تتلفت عليك ، اسالوا حاج السلاوى من SHCLUSS ، سؤال خبيث اها نحن ما عندنا ورد نسوى شنو ؟ ………. عجبى

  14. والله الليله سماحتكم تنحسدو عليها عديل كده
    البروف : طبعا الليله انت قاصد تكشكش الحجاج ديل مش ؟؟
    عواطف : تعرفى يا روحى ؟؟
    قاطعها س بحده :
    س : رووحى ؟؟ رووحى برضو ؟؟ جيبى من الاخر عاوزه شنو مصاريفك واديتك ليها مشى عند ناس امك الاسبوع ده ما ماشين اها تانى روحك فوق كم ؟؟؟

  15. سلامات واشتياقات..
    لكن سعاد ما غلطانة! دى امة يعطفوا عليها او يحاببوها؟؟
    التركى ويييييييييييين؟؟

  16. شمباتى : اى تصريح قد يؤخذ ضدك – من حقك ان تستعين بمحامى او تمتنع عن الادلاء باى اقوال .. ههههههه

  17. والله غلطانين أنتو أصلو المسلسلات خربتكم وقايلين انو الحب ده إلا أشبكها من الصباح بحبك بموت في ميتين أبو أهلك؟
    نحنا بيئتنا بتفرض علينا انو نعبر عن حاجاتنا بي طرق مختلفة وأساليب غير منظورة لكن محسوسة،،،
    لم يكن جدي يعرف لغة العيون ومعسول الكلام، وكان في كنفه أربعة يقدسونه ويقبلون التراب الذي يمشي عليه.
    ولم يكن أبي كذلك، والآن بعد ٢٢ سنة من وفاته ما زالت والدتي ترتجف عند سماع اسمه.
    هذا هو الحب والاحترام، لا معسول الكلام وخواء الفؤاد.

  18. افليقا..سلام..
    انا الاسد الحرس غابتو الضرية,وانا الساعة الكتال بختف حدية!
    تقول لى ضدى!؟؟؟هههههههههههههههههههههههههههههههههه..

    منصور..سلام..
    اسمح لى يعنى,دا ما حب ولكنه احترام وخنوع,والخنوع دا ما مقبول ومرفوض تماما,,لكن الحب ليس عيبا ولا يقلل من مكانة الرجل عند زوجته..تخياتى..

  19. حاج أحمد السلاوى | رد

    أخونا كوكو .. أمانة ما وقع راجل .. قلت لى فالت ليك schluss وتانى ما قبلت عليك ؟ ما خلاس تانى ما فى شى..كل زول يطلع شدرته ..
    بس يا جماعة الخير الكلمة الطيبة ليها اثر كبير خسوساً عندنا نحنا السودانيين ممكن كلمة توديك وممكن برضو كلمة تجيبك .. صاح ولا ما صاح ؟ وصحيح نحنا ناشفين لاكين برضو الحنية موجودة .
    واليكم الطرفة دى على وزن طرفة الفاتح عن سعاد الضربتها علبة البارد فى شارع الدكاترة .. يقال والعهدة على الراوى إنو عريس وعروسه سافروا لقضاء شهر العسل والعريس آخر حنية وكبكبة شديدة للعروس وكسير تلج شديد جدن ..وهم داخلين الفندق العروس تعترت بالتوب فى درج المدخل العريس نط فووووق ومسكها من يدها قبال توقع على الأرض وهو يتمتم .. إن شاء الله ما فى عوجة .. أنتى كويسه ؟ إن شاء الله ما إنجرحتى ..وهات يا حنية فايضة ..المهم انقضت الأيام الجميلة ( وعقبالك يا شمياتى .. وكل الشباب المعاك ) وهم طالعين من الفندق قومى يا العروس تااااانى إتعترى فى السلم .. العريس ما اشتغل بيها شغلة وعاين ليها وحدر ليها بعين حاااارة وقال ليها : عمياتة ما بتشوفى ؟ ما تفتحى عيونك كويس ..المسكينة قامت تتنفض ووقفت على حيلها .
    أها جنس دا يقولوا عليهو شنو ؟
    وغايتو .. جنس .. غايتو .

  20. سلام ياقبيلة،،
    سديقي حاج أحمد السلاوي وطرفة العروس العترت في أصبع رجلها وجرحته، ولمن هي طالعة من الفندق المسطول قال ليها شنو؟؟؟؟

  21. يا اخوانا انا عندي الحل . . . . . . . الناس تكتر من المسلسلات التركية وتترك المصرية الي حين . . . . . . ؟

  22. اخى الفاتح والاخوه الاعزاء
    قبل ايام كان تاريخ زواجنا قمت قلت اعمل تقيرات وحركااااااات تركيه وكده ورسلته رساله مبهمه للراجل لكى يستشف منها الاحاسيس
    (اليوم السعيد المانى بيك ) جاء من الشغل قال لى يوم شنو دى يامراااا نس اليوم ذاتو ذعلت قمت غيرت الرساله وهو واقف (هو ماليوم السعيد دى اليوم التعيس الماني فيك) حتأ يادوب فهم

  23. حاج أحمد السلاوى | رد

    سديقى بن الخلا ..
    طرفة العروس العترت فى أصبع رجلها وجرحتو دى يطرشنى طرش التُرب ما سمعتها ..خسمتك بالنبى كان ما حكيتها لينا ..
    اصلو الجماعة الفاقدين عقولهم بمحض إرادتهم ديل حكاويهم كتييييييييييييرة ..
    بت وراق ..ابو العيال قال ليك أنسى اليوم زااااتو .. أمانة ما إتلوم لاكين ..ناس سعيد ديل اصلهم ناشفين نشاف شديييييد ..

  24. ما هو زى ما قالوا الشعب السودانى ما عندو اى علاقة بالرومانسية – و المراة كااان بالغت بتقول لراجلها (حبيب القسا)

  25. لوووووووووووووول غايتو الرجال السودانيين ديل غير الاحراج مافالحين في شئ الا من رحم ربي ههههههههههههههههههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: