المدافن النموذجية

حملت أخبار الخرطوم الأسبوع الماضى إعلان الولاية عن عزمها عن إنشاء خمسين مقبرة جديدة وقد سعدت جداً كمواطن لهكذا تصريح فبعد فشل الحكومة فى توفير أبسط مقومات الحياة للمواطن (كالموية) ها هي تتجه لتوفير أبسط مقومات (ما بعد الحياة) له ! ولكن وبالطبع و(قطع شك) لن يكون ذلك (لله فـ لله) فالولاية مولعة كثيرا بحكاية (الإستثمار وكده) .
من المؤكد أن المقابر الجديدة سوف تشيد طبقاً (للمواصفات العالمية) بواسطة (شركة المدافن النموذجية) إحدى الشركات التابعة للولاية والتى سوف تنشأ خصيصاً لبناء وإدارة المشروع والذى سوف يراعى فيه كل الجوانب التى من شأنها راحة الأموات من إنارة ونظافة وتشجير كما سوف يتم تزويده بأماكن تقوم بتوفير الحنوط والأكفان والشواهد علاوة على وجود (شبكة) معلومات تضم (قاعدة بيانات) مهمتها حفظ وإسترجاع بيانات المتوفين .. (وكلو بي تمنو)
يجئ ذلك من خلال إعلان ينشر فى كافة الصحف اليومية يجئ فيه :
بعد أن تم بحمد الله سبحانه وتعالى إفتتاح المدافن النموذجية فى أنحاء متفرقة من العاصمة نود أن ننبه المواطنين الكرام بأنه قد تم إيقاف عمليات الدفن فى جميع المقابر القديمة والبدء فى إستقبال الموتى بالمقابر النموذجية .. (إحتكار وكده) !
ويحتوى الإعلان على وصف تفصيلى لأماكن المقابر النموذجية الخمسين التى تغطى أرجاء وأنحاء كل الولاية كما يحتوى الإعلان أيضاً على ملحوظة تقول : بالمقابر أماكن لتجهيز الموتى غسيل – حنوط – تكفين – دعاء ، وفى آخر الإعلان ملحوظة صغيرة أخرى تقول : للحجز أو الإستفسار الإتصال بالهواتف المبينه أدناه …..
أما إعلانات الراديو والفضائيات فمن شاكلة :
عزيزى المواطن .. عزيزتى المواطنة .. سارع بحجز قبرك من الآن وتسلم شهادة البحث ..
توجد قبور سنجل .. قبور ناصية .. قبور عادية .. قبور سياحية وقبور فاخرة (تشطيب ديلوكس)
ما أن يتوفى لك شخص ما عليك إلا أن تتصل بالرقم الموجود بالإعلان فيأتيك صوت (مسجل) أنثوى ناعم يقول :
– المدافن النموذجية ترحب بكم وأحسن الله عزاءكم …
للتحدث باللغة العربية أضغط على الرقم 1
للتحدث باللغة الإنجليزية أضغط على الرقم 2
وعندما تضغط على الرقم 1 يواصل الصوت الناعم :
– لحجز مقبره أضغط على الرقم 3
– لتجهيز الميت أضغط على الرقم 4
– للإثنين معاً أضغط على الرقم 5
– للإستفسار والتحدث لموظف الإستقبال أضغط على الرقم 6

لا يمضى وقت طويل على إفتتاح المشروع حتى يسافر وفد من شركة المدافن النموذجية حاملاً معه (كروكى للمدافن) فى جولة خليجية تستهدف حث المغتربين على حجز وشراء المواقع المتميزة (بالعملة الصعبة طبعن) !

لا يلبث أن ينتعش سوق (سماسرة القبور) وتنتشر ظاهرة (شهادات البحث المزورة) وتعم حكاية (بيع) قبر لأكتر من (ميت) !
نسبة لبطء عمليات التقاضى وروح المحاكم (الطويلة) يقترح المواطنون على المسئولين إنشاء (نيابة القبور) والتى مهمتها الفصل فى نزاعات القبور قبل ما الشاكى (يروح فيها) وقبرو يضيع وأهلوا ما يعرفوا يدفنوهو وين؟

كسرة :
بعد أقل من عام يتم إكتشاف فساد مالي فى شركة (المدافن النموذجية) حيث يتم فصل المدير العام ونقله (مترقيا) رئيساً لمجلس إدارة شركة (مستشفيات الولادة النموذجية) !

Advertisements

23 تعليق

  1. لزوم البرنجية .. وكدا

  2. بعد قليل يتم إكتشاف خطأ في التصديقات للقبور تم العام الماضي – كما حدث لإبتسام- فيتم نبش القبر والتحفظ على المرحوم لمدة 6 أشهر لزوم الإجراءات وحتى يدفع أهل المرحوم رسوم الدفن للمرة الثانية .. وإلا سيظل الجثمان معروضات لحين الفصل في القضية.

  3. جبرا : عليك الله خليهم يجربو ينسترو مع الميتين مادام اتلومو مع الحيين – احىىىىىىىىىىىىيا من الحيين الزة الميتين ديل !!!!
    يعنى ممكن نسمع فى بيت البكا :
    سعديه : والله قالو ليك المرحوم من زمااان كان ماخد مربوع كامل للاسره بتاعتو عشان ما يقومو يدفنو جنبهم ناس دون المستوى كمان ياختى ديل ناس رقين حيين وميتين انتى قايله شنو ؟؟
    فاطمه : وكمان قالو ليك ياختى الرئيس ذاتو جا حضر الدافنه واشاد بالخدمات المقدمه للميتسن وقرر نقل التجربه للحيين كمان ووجه بالاتسفاده من التجربه السودانيه المميزه فى كل شيئ ..
    علويه : هووى يختى قالو ليك الخدمات القدما رئيس مجلس ادارة المقابر بتاعة الصافية يومداك كانت ما عادية لانو فى منافسه بينو وبين رئيس مجلس ادارة مقابر المنشيه الجاب الترابى يومداك فى الافتتاح اها داك اصر يجيب الرئيس وبقت مقبره رئاسية ياختى .
    ست الجيل : اسى يختى ما بنلقى لينا مقبره نموذجية بالاقساط كده قالو سميره بت علويه جابو ليهم فى الوزاره عرض بتاع اقساط من بنك الخرطوم لكن شروطو صعبه شويه لو اخليتى بالاقساط ممكن ينقلو القبر لمقابر عاديه ههههههههههههههههه ويحجزو عليه بامر المستشار القانونى للبنك ..

  4. حاج أحمد السلاوى | رد

    غايتو يا الفاتح انت طلعت طابور خامس ..
    بس اقعد أديهم فى الأفكار والإقتراحات بتاعتك دى وهم يقوموا يطبقوها على الشعب المسكين الفضل دا .
    يعنى الشعب دا لا يرتاح حى ..ولا يرتاح ميت ؟
    غايتو لاكين جنس مدافن ..

  5. ياجماعه الخير كدا بتخربو علينا الناس ديل ما جايبين خبر للحته دى كدا نبهتوهم
    وبكرة يعملو بى الفكرة دى وانا ياجبرة لو ما لقيت لى قبر اللوم عليك تتصرف فى جنازتى
    بالعدم نشوف فتوى هل ممكن نتبرع بى اعضاءنا بس على شرط ما تشيلو الحاجات المهمه وتجدعو باقينا فى الشارع
    والله دى تكون عوجه ياجبرا تلقى نفسك فى الظلمه ماشى وفجأه تطقش حاجه ترفعا تلقاها كراع جارك ولا ايدو
    الله يستر علينا

  6. الاستاذ الفاتح
    انت عارف انك طابور واكيد كل الافكار السابقة للانقاذ واللاحقة من بنات افكارك
    حسي فى داعى توريهم الكلام ده وبهذه التفاصيل
    بكرة سيتم تنفيذ كل كلامك وسوف يتم استقطاع من المرتبات لصالح المدافن النموذجية (على غرار كنانة والرهد وهلم جرا………)
    كسرة
    عليك الله فى داعى

  7. السلام عليكم ، البرف و الاخوان ، وحتبدأ استقطاعات المقابر من الموظفين فورا ، و اهو جبتها براك لى نفسك ، مش كل واحد ميت ابن ميت ، سؤال خبيث ، ما دام فى درجات يبقى فى شبر واقف وتانى قاعد و واحد راقد ، و كمان ادوار الارضى الميزانين الاول التانى و هلممن …….. عجبى

  8. يا جبرا الجماعة بختهم أهديتهم “دراسة جدوى ” .. بالمجان !!

  9. جبرا والسمار .
    سلامات .
    ناس عمك درمة ديل أول ناس بيستوعبوهم أصلهم بيحبو يظهرو فى الصورة دايما لكن ماقلت لينا الاستيعاب بيكون عبر لجنة الاختيار المركزية ولا بالمحسوبية والضهر طبعا حايركزو على خريجين أمدرمان الاسلامية والقرآن الكريم

  10. حنين : ناس درمه ديل من بدرى استلمو وظائفم ( رئيس وحدة المتوفين والمفقودين ببعثة الحج السودانيه ) عليك الله الناس ديل بيغلبم مسمى وظيفه فى الدنيا دى ؟؟؟

  11. أيوووووووي يووووووووي يوووووووووي
    يعني الواحد يحلم انو يمتلك ليه حتة ( واطة) في البلد الما عارفنها بلد منو دي

  12. الحبيب جبرا..سلام..
    والله فكرة بردو! بعدين هم قالوا الخبر دا من باب المن والاذى,والا دا شغلهم وواجبهم,ولا كانوا عايزين يرمونا فى السهلة كمان؟؟

  13. اب احمد..
    والله شلت قصة ابتسام دى من كيبوردى! لكن دا المتوقع برضك..

    افليقا..
    انا بس نفسى اعرف اللما المفقودين مع الميتين شنو!؟؟ وعن المفقودين دى عندى قصص وحكاوى مع البعثة دى يشيب لها الولدان..حسبى الله عليهم دنيا وآخرة..

  14. منصور..
    امانة ما اتلومت! كيفن ما عارف دى بلد منو!؟؟ دى بلد الكيزان والتماسيح والحرامية,,معروووفة القصة دى..آيييييي

  15. شمباتى : يعنى يا شمباتى مستشارى الرئيس الكتاااااار ديل فى زول عارف اللماهم مع بعض شنو ؟؟؟ ماهو مهام وبس عشان ينفخو الراتب ..
    وزى ما قال عادل امام ( طبيعى مادام فى سلخ يبقى لازم يكون فى نفخ ) يعنى ما دام فى مفقودين طبيعى يكون فى متوفين واهو كلو العداد رامى ..
    كدى خلينا من ده كلو انت وين ما ظاهر لا بى جاى بى غادى تعرف لو طولت الغيبه كده حنسال منك درمه رئيس وحدة المفقودين فى السعوديه ههههه

  16. سلام …اصلا موضوع المقابر دا حارق لى دمى من زمان..و على قول اختى تعرفى الشعب متحضر من مقبرتو …يعنى دى مفروض حته يكرم فيها الانسان من احباءه ..و يزار و تقرأ عليه الفاتحه …اتمنى المقابر الجديدة تكون محترمه ….اتمنى انو تتنظم المقابر و تتطور …لكن شكلها ماشه على استهبال زى القلتو دا …و امكن يعملوا مول جوا المقبرة على غرار مول جوا المسجد 🙂 …و يكتبوا فيه الحى ابقى من الميت

  17. السلام عليكم يا كرام
    والله انا مع حاج احمد السلاوي وأبوايه اشرف وغيرهم ممن بات يعتقد أن في هذا تنبيها للجماعة وأن ما يكتبه البروف ليس إلا جسا للنبض وأنه هو بذاته عبد المنتقم الذي ابتعثوه ليعمل الدكتوراة في الجبايات …. وإلا فكيف نفسر أن 90% من افكار البروف قد تم تطبيقها أو تحت الدراسة …. ألا تذكرون موضوع رخصة افطار رمضان وكيف تم تطبيق بعض تفاصيله فورا؟
    لكن المشكلة هنا ليست في شركة المدافن وإنما في شركة ما بعد الدفن التي ستقوم بحراسة الجثث وصيانة القبور … ومن لايجد طريقة للدفن في هذه المقابر فستكون هناك شركة لتصدير ما ينفع من أعضائه ( ألا تذكرون مقال “فاكي فلتر”؟) والباقي لتسميد مشروع سندس وبهذا نضمن أن لا شيء من السوداني يضيع هدرا
    والعجيبة لو عملوا شركة موصلات الصراط …. تجتاز بك الصراط بسرعة وفي سيارات مكيفة … بس دي لازم يكون الدفع عند الاستلام

  18. السلام للجميع
    طبعا في بدنا دي بقا اي شي متوقع من الناس ديل لكن انا المحيرني الوظائف دي بملوها براهم ولا شنو ما ظهر ليها اعلااااااااااااااااان

  19. افلى..سلام..
    انحنا برضو المختفين!؟؟ انحنا بنغيب يومين تلاتة ونرجع اقوى,,كعب العدم ! اممممممممممم..
    اما عن النفخ فالجماعة ديل نفاخين نفخ جد ! اقبض

  20. بالنسبة للحجز يابروف لازم احدد المواعيد قبل كم يوم من الوفاة عشان اضمن الحجز ما يتلغي؟
    وبخصوص التوزيع: جغرافي ولا واسطات؟
    واهم حاجة موقف القيمة المضافة شنو من الموضوع دة؟

  21. كويس انه تم فصل و نقل المدير العام (مترقيا) رئيساً لمجلس إدارة شركة (مستشفيات الولادة النموذجية مش وزارة الدفاع

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: