متعوده دايمن

بتاريخ 11 يونيو 2011 (أى قبل ما يقارب الأسبوعين) كتبنا في هذه الزاوية تحت عنوان (مش طلعت مهربة) مأساة المواطنة (إبتسام) والتى قامت بشراء عربة كل أوراقها الحكومية صحيحة (مية المية) لتفاجأ بإدارة الجمارك تخبرها بأن العربة (ما إتجمركت) وأن عليها دفع مبلغ 32 مليون جنيه إذا أرادت أن (تسوق عربيتا) التى تم حجزها !
طرحنا فى المقال المذكور عدة أسئلة (موضوعية) وطلبنا من الإخوة المسئولين في إدارة الجمارك أن يجيبوا عليها ولكن طال إنتظارنا على الرغم من أن المسألة (ما بتستحمل) وأن (الموضوع خطير) لأنو وببساطة لو أصلو أى أوراق حكومية صحيحة ح تكتشف الحكومة بعد كم شهر أو سنة إنها ما جات بالطريق الصحيح فدى تبقى مصيبة من شأنها أن تفقد المواطن الثقة فى أى تعامل حكومى !!
حتى الأمس كنت أعتقد بأن مسألة (تزوير أوراق الجمارك) التى تحدثنا عنها فى المقال المذكور والتى حدثت فى العام 2011 هى مسألة خطيرة إستغل فيها المزورون ثغرات ما ليقوموا بتنفيذ مخططهم ولكن يبدو ان الجمارك على قول (سرحان عبدالبصير) متعوييييده داااايمن !
فقبل حوالى 8 سنوات أى فى العام 2003 تمت نفس (عملية النصب) وبنفس الأسلوب فقد قام المواطن (مختار عبدالصمد محمود) بشراء عربة تايوتا كريسيدا صالون موديل 1992 (مرخصة) وكل أوراقها سليمة و(مية المية) بما فى ذلك شهادة البحث وذلك بمبلغ 32 مليون جنيه حيث قام بعمل المبايعة (من البائع) وهو يعمل مديراً لأحد البنوك وتم نقل الملكية وإستلم شهادة بحث يإسمه !!
بعد حوالى 8 أشهر إتصلت به المباحث وطلبت منه تسليم العربة :
– يا جماعة دى عربيتى ومسجلة بي إسمى !
– إنتا جيب العربية ونحنا ح نوريك القصة شنو؟
فى المباحث قام الضابط بإخطار المواطن مختار بأن العربة أساساً دخلت (إفراج مؤقت) وإنو جماركا ما مدفوعة ولذلك سوف يقومون بتسليمها إلى إدارة الجمارك .
حفيت أقدام المواطن مختار فى (المساسقة) بين إدارة الجمارك والنائب العام ونيابة الجرائم الموجهه ضد الدولة حيث تم فتح بلاغ بالرقم 838/2003 بنيابة الجرائم الموجهه ضد الدولة .
وأخيراً وبعد 4 أشهر من حجز العربة جاء الفرج فقد تسلم المواطن مختار من النائب العام قراراً بأن تؤول ملكية العربة لمالكها الأخير (اللى هو مختار) ، طار مختار من الفرح لكنه (هبط إضطرارياً) عندما قام مسئول الجمارك بإخطاره عند إستلام القرار:
– العربية يا مختار خلاس بقت بتاعتك لكن .. بس
– بس شنو يا جماعة ؟
– بس تدفع الجمارك وفرق الموديل !
– وأنا ذنبى شنو؟
– ذنبك إنو غشوك
– لكن هسه غشونى أنا وللا غشوكم إنتو ؟
– لو عاوز تستلم عربيتك؟ أدفع الجمارك وفرق الموديل
– وديل كم يعنى؟
– 18 مليون !
قام مختار ومعه أخرون تعرضوا لنفس عملية النصب بدفع الجمارك صاغرين ومن لم يكن معه (حق الجمارك) قامت الجمارك ببيع عربته فى (الدلاله) وخصم الجمارك وإعطائه (الفيها النصيب)
لأن الحكومة سادتى القراء لا تخاف من (المظاهرات) لكنها تخاف (دعوة المظلوم) فإن العبد لله ينصحها (لوجه الله تعالى) بأن ترجع للمواطنين ديل عرباتهم لأنهم مظلومين !
أما إذا سألتنى عزيزى القارئ عما حدث في بلاغ المواطن مختار عبدالصمد محمود والذى يحمل الرقم 838/2003 والمتهمون فيه (ع . ح) وآخرين فإنه لا زال يقبع لدى نيابة الجرائم الموجهه ضد الدولة منذ حوالى (8 سنوات) ولم يتم البت فيه حتى اللحظة مما يؤكد أن النظام العدلي فى البلد (ماشى) مش بطال !

ما يستفاد من القصة :
– الجمارك (متعوده دايمن) ينصبوا عليها وبنفس الطريقة !
– الجمارك لم تعمل على سد الثغرات التى حدثت عام 2003 وتركتها كما هى ليحدث نفس (النصب) فى العام 2011
– الكمبيوترات فى الجمارك وفى المرور قاعدة (زينة ساااكت)
– لو حرامى جاك وكسر شباك الصالون وسرقك .. وتااانى جاك وكسر نفس شباك الصالون وسرقك
إنتا ما زول (كيشة) لأنو الكلام ده ممكن عادى يحصل حتى فى إسكوتلانديارد (بتاعتنا طبعن) !!
– يمكن (لورثة الشاكى) أن تواصل إجراءآت التقاضى بعد أن ينتقل إلى الرفيق الأعلى

ملحوظة :
بعد كتابة هذا المقال تسلمنا رد الإخوة فى قسم الإعلام والعلاقات العامة بالجمارك والذى سوف نقوم بنشره فى عدد السبت القادم وأظن بأن الإخوة فى قسم الإعلام والعلاقات العامة بالجمارك
مطالبون بالرد على هذا المقال أيضاً عشان نعرف القصة دى آخرتا وين !!

كسرة :
يعنى الزول تانى لو عاوز يشترى ليهو عربية يشتريها من (مكافحة التهريب) وللا شنو؟

Advertisements

15 تعليق

  1. بركة الرد جا – انشاء الله يكون الرد بقدر المستوى الذى يعيد للمواطن ثقته فى الاجهزة الشرطية التى هى اخر ما تبقى للمواطن ليثق فيه .
    عليك الله يا بروف لو الرد ما على قدركده وفيه كلمات من شاكلة نحسب ان ونؤكد وحقيقة عليك الله ما تنشرو لانو بيمغش ذياده ..

  2. السلام عليكم ، البرف و الاخوان ، المصيبه انو الشرطه فورن تطبق القانون ولاهناك حكم قضائى مفروض يصدر حتى بعدين يصادروا العربيه و لا يدفعوه الجمارك و فرق الموديل ، اصلو النظام البوليسى و العسكرى ما بيدير اى سياسه ، فكرته عن الاوامر راسخه ، طيب ما يطبقوها فى سوق المواسير و لا المساخر التانيه الكلو واحد عارفه، ،سؤال خبيث الحاجات الثانيه قاعدين يقبضوها ياربى و لا دى حقت الافيال الكبار ……………… عجبى

  3. البرووووف والسمار الاكارم .
    سلام.
    يعنى ياأستاذ إنت قاصد تتعب الجماعه ديل ولا شنو يعنى . الليلة يجو يسلموك الرد وقبل مايطلقو ضهرم شوية إنت تلحقم بى واحد تانى أتاريك دفان وبطنك غريقة يعنى الضابط التعب فى الرد دة وجهزو بالوثائق والادلة والبراهين لمن يقرا دة حايسب ليك .

  4. البروف والاحباب..سلام..
    هم ياربى بخافوا من دعوة المظلوم!؟؟ والله ديل ما بخافوا من رب ولا دين ولا ظلم,ديل مارقين للربا والتلاف,,بس..
    اللهم ابدهم وشنع بهم وارنا فيهم عجائب قدرتك يا حنان يا منان..

  5. علينا كمحكومين ان ننصح وعلى الحاكم ان يسمع لرعيته
    صحيح النصيحه للحاكم مفروض تكون فى السر يعنى بينك وبين الحاكم بس ياربى لو جينا للسيد الريس بنقدر نصلو
    الظلم ظلمات يوم القيامه يا ناس الجمارك وناس الضرائب وناس الجبايات والمظلوم ليس بين وبين دعوته حجاب عند الله
    اتقوا الله اتقوا الله اتقوا الله

  6. بصراحة هذا الموضوع خطير جداً ويهز ثقتنا فى الشرطة التى تمثل الجمارك جزءاً مهماً منها ….لو كنت مدير الجمارك لتحملت برجولة
    هذه الأخطاء وسلمت العربة لهذه المرأة ..لا توجد دولة أو جهة رسمية تحترم نفسها وتحترم القوانين أن تأخذ القانون هكذا بيدها إلا جهة لا
    تحترم القانون إذا أخطأت …لماذا هذا الظلم يا مدير الجمارك ؟؟ لو كانت هذه العربة قد إشترتها بنتك أو إبنك هل سيكون الوضع هو هو ؟؟ لآ أظن ذلك …

  7. من منهم سيقبل منك نصيحة في السرأو العلن؟ ومن الذي زعم أن النصيحة للحاكم يجب أن تكون في السر؟ من منهم يخاف من دعوة المظلوم؟ لا يخافون من دعوة أحد لأنهم يعتقدون أن المظلومون هم وأن الله قد ظلمهم بأن جعلهم حكاما لهذا الشعب الظالم الذي لا يعرف كيف يتحصل على حقوقه ….هذا الشعب الذي أباح (علماؤه) الرشوة رافة به لأنهم يعلمون أنه ( متعودا دايمن) وسيحتاج إليها في كل حين … وربما يحاولها حتى مع منكر ونكير…… هذا الشعب الذي أباح مفتيه للحاكم أن يتصرف في المال العام وكأنه ميراث أمه …. لا يخافون من دعوة هذا الشعب لأن هذا الشعب شيطان أخرس ساكت على الظلم ترى ماذا كان سيجري لو أن كل من تعرض لهذا الموقف رفض التنازل عن سيارته ما دامت أوراقها سليمة 100% وقاضى الحكومة ؟ هل كان سنتصر العدل؟ لا أظن ذلك فنحن قد تعودنا على الظلم واللف والدوران حتى اصبح مجرد التفكير في أن في هذه البلد قانونا نوعا من الخيال والأوهام …. لندعو الله عليهم فحتى إن لم يجاب دعائنا فسنكون قد قمنا بعبادة هي الدعاء : اللهم من وُلي من أمرنا شيئا فلم يدل فالعن اللهم من عينه ومن دعمه ومن زكاه – اللهم لا تقبل منهم صرفا ولا عدلا وأذقهم خزي الدنيا وعذاب الآخرة. ليس هذا الدعاء من أجل سيارة أو جمارك وإنما من أجل كل ما اقترفوه من تضييع لأرض المسلمين وتدليس في الدين وتغيير لأفكارنا ومثلنا وأخلاقيتنا …. اللهم بحق ما ظلموا من ضعيف كن أنت قوتنا وأجب دعوتنا ولا تغادر منهم أحدا

  8. اخى الفاتح والاخوه الاعزاء
    وعلى قول سرحان عبدالبصير (انت افتكرتودم وانا افتكرتو دم دا انت طلعت اى كلام ياراجل )مخاطبأ الشرطى يعنى ابتسام افتكرته سليمه
    وناس الجمارك افتكروها سليمه يعنى الجمارك اى كلام ياراجل

  9. طبعأ الياء الزايده فى بيت وراق بدل بنت وراق عشان ناس الجمارك اذا غالطونى فى اسمى يشيلو الياء طوااااالى
    وارجع بت وراق

  10. ااخى الفاتح والاخوه الاعزاء
    وعلى راى سرحان عبدالبصير(انت افتكرتو دم وانا افتكرتو دم دى انت طلعت اى كلام ياراجل ) مخاطبأ الشرطى عمر الحريرى يعنى ابتسام
    افتكرته سليمه وناس الجمارك افتكروها سليمه يعنى الجمارك طلعت اى كلام ياراجل

  11. الاستاذ/ جبرا
    عليك الله با بروف اسأل لى ناس الجمارك
    انا حاليا داير اشترى عربية وقالوا (السعيد البشوف فى اخوه) وانا شفت فى اختى ابتسام ، فما عارف بعد ما اعمل عقد البيع عند المحامى واتاكد من شهادة البحث عن ناس المرور وامشى لى ناس الجمارك وامشى لناس مكافحة سرقة العربات ولناس وزارة العدل والجرائم الموجهة ضد الدولة وووووووووووووو ياربى تانى امشى وين عشان ما اغلط غلطة ابتسام
    ولا اقول ليك حريقة فى العربات . المواصلات مالا وبصات الوالى ما مية المية ولا رايك شنو ،،،،،،،،،،،،

  12. ثورة ,,,ثورة ,,,,ثورة ,,,,,
    الثورة هي الحل يا جماعة والله بقينا اسوأ من الخرفان والبهائم في الاستسلام للظلم والانقياد الاعمي وراء عصابة الانقاذ المتاجرة بكل شيء ,,,
    الثورة تبدأ من نفس كل واحد فينا علينا ان نؤمن بها ايمان تام وان لا نفكر ابدا في من سيكون البديل لاننا نحن من نصنع البديل ,,,
    العصابة الحاكمة حاليا لو تركت مقاعدها شاغرة بدون ان يحتلها اي شخص مهما كان سيء فالوضع سيكون افضل من الانهيار الحاصل في كل شيء ,,,,,
    اطلق الثورة من نفسك اولا وليكن بثك لها في كل مكان في اهلك في جيرانك في في معارفك .لا حل للسودان الحبيب غير الثورة الشاملة ثورة تشمل كل شيء ,,,,
    ثورة حتي النصر ’’’
    ثورة حتي النصر ,,,,,
    ثورة حتي النصر ’’’’

  13. الأحباء الأعزاء … معليش ح نحرمكم من الكتابة الساخرة كم مقال تانى كده لكن بالله في سخرية أكتر من الشئ البحصل ده ؟
    المقال الجاي بتاع السبت إن شاء الله ح ننزل فيهو رد الجمارك على قصة السيده إبتسام (2011) بس أنا ما عارفهم ح يردو يقولو شنو فى قصة المواطن مختار (2003) … تابعونا مع الجمارك مش ح تقدر تغمض عينيك !

  14. ياجماعه الناس مامفروض تشتري اساسا عربيه المفروض الزول يجمع القروش بدم الحجامه وبعد ذلك يقوم بتقديمها الي الحكومه اقصد الجماعه في طبقه من ذهب .عشان الدواليب والبدلات ومعاش الزول باربعه مليار ما لازم يدفعوا مختار وابتسام وانا وطبعا انتم .يعني يجبوا قروش من وين وبترول نافص وزراعه مافي .ولا رايكم شنو.

  15. السلام عليكم الى الاخ hashimo2
    وكل الاخوه بعد الاحترام الحق كلمه تقال النصيحه للحاكم تكون فى السر لا فى العلن هذا الاصل فى النصيحه اما المجاهرة بنصيحه الحاكم تحتاج لفتوى من اهل الدين متى تجوز ومتى لا تجوز ولا اقول الا الله اعلم
    ثم ان الله لا يولى علينا الا بمثل اعمالنا فمتى صلحنا اصلح الله الراعى ومتى فسدنا فسد الراعى
    لا يغير الله ما بقوم حتى يغيرو ما بانفسهم
    بصراحه الفساد صار سمه عامه انظر للطرقات تصرفات الشباب والمخدرات التى تفشت وانظر الى لبس البنات او بالاصح الى اجسادهن لانهن يلبسن ولا يلبسن واخرج الى الحفلات التى تقام سواء كانت خاصه او عامه ضاعت الغيرة من النفوس على الاعراض واذهب الى اى مؤسسه خاصه او حكوميه لن تستطيع ان تجرى معامله الا بعد ان تدفع الا من رحم ربى من الموظفين وانظر الى العطاءات سواء فى الشركات الخاصه او الحكوميه وانظر ……………
    تطول اللسته ونحن معشر المواطنين نساهم فى المنكرات اى نساهم فى فرض هذا الوضع على انفسنا
    اللهم ولى علينا خيارنا ولا تولى علينا شرارنا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: