شهادة عدم تزوير

القراء الكرام لقد قمنا فى زاويتنا السابقة بنشر رد الإخوة في الجمارك على مقالنا الذى كان بعنوان (مش طلعت مهربة) وللقراء غير المتابعين نقول بأن ذلك المقال قد كان موضوعه شراء المواطنة / السيدة (إبتسام) فى العام (2011) لعربه بأوراق صحيحة 100% وقد إتضح لاحقاً أن العربة قد تم تزوير شهادة الوارد لها ضمن عدد آخر من العربات بواسطة إحدى العصابات ! وقد تم بناء على ذلك حجز عربة السيدة إبتسام ومطالبتها بدفع الجمارك .
وفى مقال تال لذلك (لم يقم الإخوة فى الجمارك بالرد عليه) بعنوان (متعودة دايمن) قمنا بإستعراض قصة المواطن (مختار) الذى قام بشراء عربة فى العام 2003م بأوراق صحيحة 100% وقد إتضح لاحقاً أن العربة قد تم تزوير شهادة الوارد لها ضمن عدد آخر من العربات بواسطة إحدى العصابات ! وقد تم بناء على ذلك حجز عربة المواطن مختار ومطالبته بدفع الجمارك وقد قام بدفعها .

طيب خلونا نعقب على رد الإخوة فى الجمارك والذى لم يجب على كثير من الأسئلة التى سألناها فى المقال المعني والتى أهمها على الإطلاق هو السؤال (طيب المواطن يعمل شنو لمن يجى يشتري ليهو عربية عشان ما يقع فى الوقعت فيهو السيده إبتسام) !! لم يرد الإخوة فى الجمارك على هذا السؤال لأنهم يعلمون تماماً بأن المواطن (لا عندو يد ولا كراع) فى الموضوع !! لكنى أقترح على الإخوة فى الجمارك (للخروج من هذه الحوسة) إنشاء مكتب لإستخراج (شهادة عدم تزوير) يذهب له كل من يود شراء عربه للتأكد من أن كل أوراقها سليمة وبموجب شهاده عدم التزوير يمشى (وقلبو قوى) يكمل باقى الإجراءآت .. طبعاً الإقتراح جميل وكمان بجيب للجمارك شوية (قروش ما بطاله) لكن المشكلة إنو تجى عصابة تزور (شهادة عدم التزوير) !!

عزيزى القارئ تعال معى لنري كيف يلوى الإخوة فى الجمارك عنق الحقيقة بل (يكسروا رقبتا ذاااتا) .. ها هم يقولون فى ردهم : (إيماناً منا بوقوع بعض المواطنين ضحية لهذا التزوير وضعت الجمارك حلول بالحفاظ على الحق العام بدفع الرسوم الجمركية وتوفيق الأوضاع وفق مستندات سليمة مع حق المتضرر من مقاضاة المزورين .وإرجاع حقوقهم) .. ونحن نسألهم (ياتو مواطنين وقعوا ضحية تزوير) ؟؟ لا يمكن لأى شخص عاقل بالغ رشيد أن يقول بأن المواطنين قد إنخدعوا وكانوا ضحية ؟ فالمواطنون قاموا بشراء العربات بأوراق صحيحة !! وإن كانت هنالك جهه وقعت ضحية تزوير فهى (الجمارك) وهذه حقيقة ما عاوزه ليها أى أى كلام !
أما حكاية (الحفاظ على المال العام) فيكون بملاحقة من قاموا بالتزوير وإستعادة الأموال العامة منهم لا من المواطنين الضعفاء الذين لا ذنب لهم والذين تطالبهم الجمارك بمقاضاة (المزورين) وهذا حديث لعمري من الناحية القانونية مضحك حد إستبانة النواجذ إذ كيف لشخص أن يقاضى آخر بحجة أنه خدعه أو إحتال عليه وهو لم يقابله فى الأساس ولا يعرفه ولم يتم معه أى معامله كانت؟
كان من الممكن أن يكون هذا كلاماً معقولاً من الناحية القانونيةً لو أن شهادة البحث (مثلاً) التى قدمها البائع (للمشترى) هى المزورة !! لكن أن يتم تزوير أوراق (حكومية) لتستخرج بها أوراق صحيحة يفحصها المشتري ثم يشترى الجهة المتضررة والتى (مشى فيها التزوير) هى بلا أدنى شك (الجمارك) وليس المواطن وعليها هى أن تقوم بمقاضاة المزورين وأخذ حقها منهم !! (وإلا مش كده ياجماعة ؟)

أما قول الجمارك فى ردها : (وردت في المقال عبارة إختراق وما نريد أن نوضحه هنا أن عملية التزوير تمت بواسطة شبكة وليس للجمارك ولا منسوبيها أى صلة بهذه العصابة حتى يكون هنالك إختراق)
فالعبد لله تمنى لو أن كان هنالك إختراق وأن أحدهم قد ساعد في تسهيل هذه العملية التى يتطلب إنجازها مقابلة العديد من الإدارات وفحص الكثير من الأوراق والمستندات والإيصالات فلو حدث ذلك كنا سوف نقول بأن لدى الجمارك نظام حديدى لا يمكن إختراقه إلا بمساعدة أحد ما أن تتمكن عصابة من (عمل الحاجات دى كووووولها براها) ودون الإستعانة بأحد فهذا لا يكشف عن (عبقرية العصابه) بقدر ما يكشف بأن نظام الجمارك نظام هش و( تعبان) !
وليس أدل على (تعب النظام) ولا مبالاة (القائمين عليه) إلا ما حدث من تزوير (بنفس الطريقة) فى العام 2003 وهنا نقول للإخوة فى الجمارك الذين قالوا لنا فى ردهم المذكور (إفتراض أن لا تحدث جريمة هو إفتراض يخالف المنطق والواقع) نقول لهم بأن الذى يخالف المنطق والواقع هو أن يتم الإحتيال على (الشرطة) فى عام (2003) ثم يتم الإحتيال عليها (وبنفس الطريقة) عام 2011م ! وفى الحالتين تطلب الشرطة (الضحية) من المواطنين أن يقوموا بدفع قيمة الجمارك التى نتجت من هذا الإحتيال والتزوير وتطالبهم (بعين قوية) بأن يقوموا بملاحقة من إحتالوا (عليها) قضائياً (بالله مش حاجة عجيبة) !!
أخيراً يبدوا (من رد) الإخوة المسئولين فى (الجمارك) أنهم لا يرون الحق حقاً فيتبعونه ولا يكترثون بما يقع من ظلم على هؤلاء المواطنين الذين لم يكونوا أبداً ضحية لإحتيال (بل تعاملوا مع مستندات حكومية صحيحة) لذلك فإن العبد الفقير إلى الله يرفع الأمر برمته إلى السيد رئيس الجمهورية والذى صرح قبل أيام بأنه لا يخاف إلا من دعوة المظلوم .. هؤلاء المواطنين سيدى الرئيس مظلومون .. مظلومون .. مظلومون .. فهلا قضيت فى ظلامتهم بالحق قبل أن يرفعوا أكفهم نحو السماء ؟

كسرة :
كسرة مين وبتاع مين … والله الواحد نفسو بقت مقفولة من الظلم البحصل ده !!

Advertisements

38 تعليق

  1. طيب يا استاذ لو قلنل لى نحنا كووووووووووللللللنااااااا مظلموين بس ما حانرفع يدينا لى ربنا وندعو عليك عندنا طلب بسيييييييييييط ممكن تاخد جماعتك وتدينا عرض اكتافك !!!! ولا دى صعبة شوية يا بروف

  2. الاستاذ جبرة

    حديثك صاح مية في المية ولكن البلد دي كل مجموعة عملت قانون يحميها من المواطن علشان ما يمشي يشتكي في المحاكم – لأنو المحكمة تقولك القانون دا قراروا نهائي تصور – الجمارك عندوا قانون لا يمكن للمواطن الغلبان ان يتضرر منه – الشرطة عندها قانون يحميها – الحركة وزي ما شايف عندها قانون يتم تطبيقة في الشارع العام وتحاكم بيه وتدفعك في نفس اللحظة هذا لا يحدث الا في بلد مثل السودان – الكل ياخذ القانون بيده – لقد حدثت قبل لحظات حادثة في غاية الغرابة

  3. الريس حته واحده ياعمك ؟؟؟ دا هوا باااااارد وممكن يكتمها في ناس كتار .. الله يستر

    مادام الشغله شغاله من سنة 2003 يبقى في احتمال إنو عربية الريس السودا ديك الفيها البيرك ممكن برضو تطلع هناي .. و يقوموا ناس المراسم يمشو المحكمه و الكترابه تقوم و نبقى في معليش و ما كنتا قاصد .. و يقوموا يدفعونا نحن جمارك عربات المراسم كوووووولها ولا على كيفنا و هلمجراااااا

    كسره : هلمجراااا دي بتاعتي انا .. ما بتاعت عمك داك

  4. كدي واحد مفتح كده يوقع لي معنى كلمة جمارك – نفسي اعرف الإخترعها منو و القصد منها شنو و العائد منها علينا نحن كشعب شنو ؟؟؟ و نهاية تاريخ صلاحية الإختراع دا متين؟؟
    و دينيآ كدي افتونا – هل هي من الشرع ؟؟ كالزكاه مثلآ و لا من الراس كالضرائب .
    لماذا تم ربط الجمارك بالشرطه .. بعد ان كانت مصلحة الجمارك فقط و كلها من المدنيين ؟؟

    1. أبشرك الجمارك ليس لها أي أصل في الإسلام و كلامي هذا بعد سوأل شيخ جليل ، و قد سمعت أن شيخ محمد سيد حاج سئل و قال لا توز أو حرام ، لا أذكر بالتحديد
      يعني كان لقيت طريقة تكبرا منهم كبرها ساكت و ما عليك حاجة

  5. والله الغريبه انو الناس دى ما متذكرة يوم القيامه والعرض امام رب العزه جل جلاله
    الظلم ظلمااااااااااات يوم القيامه

  6. الاخ جبرا والاخوه الاعزاء
    انت عارف الليله الجريده دى ح يلموها ناس الجمارك كلها ولا نسخه بتفضل مافى عشان ما تصل الرئاسه

  7. سيد جبوووورة تحياتي
    انت عايز رد صريح والجماعة ديل بيقولو ليك عديييييييييييييييييل كدة انه الشغلة دي فيها قطط سمان واخرى عجفاوات , يعني بفقه السترة كدة فيها جماعة واصلين لا بد من سترتهم والسترة دي تقتضي ان ان يروح فيها اختنا ابتسام واخوها مختار على سواد عيون شيييييييييخ علان.
    وبكدة يكون الجماعة حققوا الشريعة بصورته المؤتمرية .
    والله يعجل لنا بجمعة بركانية قد ………. نصبح على ….
    فقط نسأله على الا تكون شبيهة باختها الليبية ولا اليمنية اللهم اجعلها مصرية

  8. اخي جبرا
    خلاص شفته اخرته ياجبرا ورفعتها لرئيس الجمهوريه يعنى ريحتهم من الرد للعربيه بتاعت 2003

  9. والله يا جماعة اول مرة اعلق ليكم في الموقع ده رغم اعجابي الشديد بيهو بس لما شفت الوضع سخن كده شلت هم عربيتي الاشتريتها من السودان وهي هسع مرفوعة في القراش لحدي ما ارجع من الغربة,بقيت خايف اول يوم اسوقها تطلع مزورة واركب لي ماسورة كبيييرة وما حاقدر اجيب عربيتي البسوقها في ماليزيا لانها ما موديل السنة ده غير انو المقود هنا يمين.بالنسبة للجمارك وردهم ما كنت متوقع اكتر من القالو وما اظن في زول بيقدر يقول انو اخطاء الا من رحم ربي وقيل ان الشجاعة في القلوب كثيرة ولكن شجعان العقول قليلا حقيقة كلما اشتاق الي وطني وافكر ان ارجع اقراء مواضيعك وتعليقات الاخوة القراء افكر مليون مرة في العودة واتمني ان ينصلح الحال وبالذات في المؤسسات التي لها تعامل مع الجمهور فنتمني ان يراعو الشعب المسكين الذي يقاسي الامرين بداء من المناخ الحار وانتهاء بلقمة العيش

  10. أستاذنا العزيز
    لك التحية والاحترام
    بتقول قبل مالناس ترفع يدينا …
    انا قايلك راجل تفتيحة كدة يادوب الناس حترفع يدينا مالحيكومة زمااااااان رفعت يدها من الدعم والتعليم والصحة والمرية ديك ام شنو قلت ليا….
    اشمعنا نحن مانرفع يدينا فيها شنو يعني ؟؟؟
    لك تحياتي

  11. حاج أحمد السلاوى | رد

    البروف الفاتح .. إنت متاكد إنو الجماعة ديل ما جاوبوا على الأسئلة كووولها ؟ لأنو اسئلتك كانت تعسفية وخارج المقرر .. عشان كدا رسبوا فى الإمتحان ..وحاولوا يبقوا فهلونجية وجاوبوا على أسئلة تانية ..من عندهم .
    انا عندى سؤال سغيروووونى كدا .. أنا لامن أشترى حاجة من برة البلد ( من خارج امازونيا العظمى ) واجيبها معاى ليه بيدفعونى عليها جمارك وضرائب مع إنى إشتريتها بقروشى ومن تعبى انا .. ممكن السادة علماؤنا الأفاضل الكرام يفتونا فى النقطة دى ؟ وهل هى حلال أم حرام ؟ وهل يوجد هذا النظام فى الإسلام . موش نحنا بنطبق الشريعة ..ولا مرة كدا ..ومرة كدا ؟
    عاوزين تعرفوا أخرتا شنو ؟ كوووولنا لازم ندفع جمارك ..والما عاجبو يشرب من البحر ..

  12. رابطة ابناء السودان من اجل استرداد اموال السودان المنهوبة | رد

    كل الذي يهم الاشخاص الذين يعملون في جهات تحصيلية (كالجمارك والضرائب) هو الربط السنوي وما سيتبع ذلك من امتيازات وعلاوات ومكاتب فاخرة وسيارات اخر موديل….الخ فلا مواطن يهمهم ولا رجوع الي الحق يهمهم… وهكذا كانت ومازالت الحكومة مستمرة في تعليم المواطن دروس جديدة في الفهلوة والمراوغة واكل اموال الناس بالباطل حتي اصبحنا في بلد لا يثق فيه الاخ باخيه الشقيق….لكن الحق قديم وثابت وراسخ ….وعلي الرغم من ذلك مازالت هنالك الاغلبية العظمي من ابناء شعبنا العزيز صابرة ومتمسكة باصولها وراسخ فيها الايمان بان ليل الظلم مهما طال ليله فهو قصير … ونقول للذين نهبوا ومازالوا ينهبون في اموالنا نحن لكم بالمرصاد فكل مدون ومعلوم وموثق فالذي بني مصنعا معلوم لدينا والذي اشتري ضيعة من اموالنا في عواصم الضباب معلوم لدينا والذي ادعي بجذبه استثمارات اجنبية هي في الاصل اموالنا هربت الي الخارج واعيدت مرة اخري تحت غطاء استثمار اجنبي معلوم لدينا … لا تحسبن الله غافلا عما يعمل الظالمون …. المسيرة ماضية … والحساب قريب

  13. والله حكاية غريبة وعجيبة والواحد بالجد ما عارف يبكي ولا يضحك ولا يعمل شنو يعني ,,,,
    الجمارك دي رئيسها دا مابيفهم ولا شنو ولا مفتكر انه الناس الحا تقرأ الكلام بتاعهم الما بخش راس طفل دا هم المابيفهموا ,,,,,
    المصيبة انه هم ما عادين المواطن اصلا ,,,,
    قضية واضحة وضوح الشمس المواطنة الغلبانة دي ما عندها اي ذنب ومفروض لغباءهم المستفحل انهم هم يتحملوا تكلفة الجمارك التي ياخذوها من غير وجه حق اصلا ,,,,
    يا برف جبرا الرئيس دا هو اصلا سبب البلاوي دي كلها وسبب الفوضي الحاصله في البلد ,,,
    ربنا يخلصنا منهم كلهم بقيادة رئيس الغفلة الذي لا يفقه كوعه من بوعه ,,,,

  14. يااااااا استاذ انت مشيت بعيييييييييييييييد
    شغال في الجماعة ديل شغل صاح و يشهد الله لو باريت المظالم دي بتفقع مرارتك ساي ( و احنا دايرينك بصحة و عافية عشان نقرا مقالاتك بدل ما نغني تحرمني منك )
    و حتعمل لسيادة الرئيس وجع وش كلو يوم و التاني موجه نداء لفخامته
    و ستصاب بالحصبة و الحمى الشوكية لشعورك بأن سيادتو جسم هلامي أصم لا يسمع لا يرى لا يتكلم إلا في التلفزيون
    يعني من الآخر….خفف السرعة قراءك بانتظارك

  15. الحبيب جبرا..سلامات..
    اسه يردقوا عل ىياتو جنبة!؟ الجنبة دى فيها شى,والجنبة دى فيها كى,,والجنبة دى الفاتح نتشها لى..عفيت منك آبزرد..
    ودعوة المظلوم دى بيعفرها كويييييييس..ربنا ينتقم منهم فردا فردا ويرينا فيهم اياما سوداء كايام عاد وفرعون وثمود..

  16. الحبيب سهيل..سلام..
    ايوة,,اديلهم..وجيب من جووووووووة الجوة..

  17. يا اخوننا البني آدم مننا ربنا بكفر عنو سيئآتو ولو بشكة دبوس – نحن بالطريقه دي حنمشي نضاف تب

  18. والله حاجه غريبه ياخي وبس بنقول حسبنا الله ونعم الوكيل وربنا يحمينا من العاملين فيهأ حامننا

  19. السلام عليكم ، البرف الاخوان ، كله تمام ، حتى الكفار بيدادو فينا عشان يصرفوا بضاعتهم ، لكن دوس و عفص كده طوالى ، حرام والله ، و جنينا ورجعنا ، سؤال خبيث الزول الاول منو القال ما حياخدو منو جمارك ، ده حتى الفى النص حيدفع و بى الطريقه دى يكونوا عملوا جمارك كم مره ، ودى عاملنها مخصوص لزيادة الجمارك ، ما هم اصلهم بجيبوا الربط من اول سته شهور والباقى حوافز ، سهيل هلمجرا دى بتاعت السندكالى ……… عجبى

  20. بروفنا الغالي ووزاره الكرام ..
    الجمارك ديل رئيسهم مش كان اللواء صلاح الشيخ (صلاح الشنو كدا ما عارف)؟ دا أنا شفتو بهزيء ليهو في تاجر تفاح أمريكي على الهواء مباشرة في برنامج لبابكر حنين .. قدام كل العالم وما خايف لومة لائم .. المعنى يا حبيب الناس ديل ما عندهم كبير .. فأحمد ربك الردو عليك .. وأرفع يدينك للسماء سااااااي .. يمهل ولا يهمل .. يارب القوة تفش مغصتنا في الفي الناس ديل .. فديل حرقو قلبنا عدييييييل

  21. الأخ جبرا
    السيد رئيس الجمهورية حفظه الله ورعاه ما فاضى لكلامات تافهة زى دى الفيهو مكفيهو هو يشيل هم شنو ولا شنو يعنى شنو جمارك تتدفع مية مرة ما يدفعوا المواطنين وبعدين عدل شنو الماشى تكوسو عنده هو لو عارف بالظلم دا كله وساكت تبقى مصيبة ولو قاعد فى قمة الهرم وما عارف تبقى مصيبتين. عموما حقنا بنلقاه قدام يوم لا ينفع مال ولا بنون

  22. الجمارك دى ما بتعرف تتخارج من الحرج ده كيف ؟؟؟ كل ما عليها ان تحول الأمر لمستشارها القانونى او للنائب العام
    لمعرفة راى القانون ومن ثمّ تطبقه على ذمة الجهة المختصة قانوناً …لماذا لا تقوم بذلك يا مدير عام الجمارك ؟؟؟؟؟

  23. الجمارك دى ما بتعرف تتخارج من الحرج ده كيف ؟؟؟ كل ما عليها ان تحول الأمر لمستشارها القانونى او للنائب العام
    لمعرفة راى القانون ومن ثمّ تطبقه على ذمة الجهة المختصة قانوناً …لماذا لا تقوم بذلك يا مدير عام الجمارك ؟؟؟؟؟

  24. يا الله…فاجئتني بأنه بقي لك نفس تقرف…
    والله وبحق سواد عيون المظلومين في الإنسانية جمعاء…
    لم تبق للكثير منا نفس تقرف…
    حتى نفس لم يبقو لنا يا برف…
    والبلد صارت….آآآآآآآآآآه يا بلد..آه

  25. حاج أحمد السلاوى | رد

    الأخت بت السودان .. عفواً .. إستفزتنى كلماتك .. لكن فى كل الأحوال يظل هو المسئول ما دام رضى أن يكون رئيس وحاكم وما فيش حد ضربه على يده إنو يجى ويبقا رئيس ..والأدهى من كدا إنو حزبه يدعى أنه يحكم بالشريعة .. هل هناك بند فى الشريعة يأمر بأكل أموال الناس بالباطل ؟ ما ذنب السيدة إبتسام والأخ مختار فيما حدث لهم من ظلم واضح وعليهم تحمل تبعات غيرهم..؟ تخيلى نفسك مكان السيدة إبتسام .. ما ذا أنتى فاعلة ؟ وكيف تكون ردة فعلك إن وقع عليك مثل ما وقع عليها من ظلم ؟..

    1. الأخ حاج أحمد السلاوى
      تحية طيبة وعذرا على الإستفزاز نحن وابتسام ضحايا وللأسف الشديد لا نملك سبلا لدفع الظلم غير التوجه لله بالدعاءوالبلد دى ماشة بقانون إذا سرق الشريف تركوه وإذا سرق الضعيف اقاموا عليه الحد

  26. السلام عليكم ورحمة الله
    مشكورالبروف الفاضل الفاتح بتطرقه لهذا الموضوع وانا واحد من هؤلا الناس الذين وقعوا ضحية احتيال بعض الافراد لجمارك السودان ومرور الاوراق المزورة علي ادارة المرور مع العلم بأنني المواطن الذي لايعرف شيئا عن الاوراق المزورة وشرائي لعربه باوراق رسمية وقمت بتغيير الملكية وبعد مرور سنة كاملة ياتي افراد مباحث الجمارك ويقوموا بحجز العربه هل يعقل هذا واقسم بالله تضررت نفسيا ومهنيا واكيد ماديا بصورة كبيرة جدا مع ملاحظة التعتيم الاعلامي الشديد لهذه القضية
    لاول مرة اعلم بمحاسبة المجني عليه ب جريمة الجاني
    لله درك يابلد والله المستعان وفقكم الله

  27. البروف واللاخوة الاعزاء
    كفانا الله واياكم شرور الظلم —
    لكن يابروف اظنك تانى كان سافرت وجيت راجع السودان يصادرو منك موبايلك بحجة انك مادافع الجمارك براك سويتا فى روحك – شلت حسهم

  28. البروف والسمار .
    سلامات .
    الليله أفليقا وينو.
    بالله يابروف دى فكرت ليها كيف((( فالمواطنون قاموا بشراء العربات بأوراق صحيحة !! وإن كانت هنالك جهه وقعت ضحية تزوير فهى (الجمارك) وهذه حقيقة ما عاوزه ليها أى أى كلام !))).
    والله فعلا الجمارك هى الجهه الوحيدة المغشوشة وجات تقش خيبتا فى المسكينه صاحبة العربية وتمسك المواطن من إيدو البتوجعو( بحجز العربة) مع إنها عارفا الدخل العربية البلد منو والزور الشهادة منو وزورا كيف والوراهو تفاصيل التزوير منو .
    الله فى…..

  29. الأمثلة بتاعت 2003 و2011 التي وصلت إليك ليست سوى عينات …. فكم سمعنا وسمعنا …. وكنا نظنها احتيالات من سماسرة العربات ولكننا بعد زاد الأمر عن حده وقرأنا رد الجمارك العجيب كدنا أن نكون متأكدين 100% إن هذا باب جديد من أبواب زيادة الميزانية فتحتهو الدولة …. بدلا من يكتفوا بجمركة العربات الجديدة يقوموا يجرمكوا القديمة المجمركة كمان …. كيف؟ يقولوا لصاحبها أن أروراقها القديمة طلعت مزورة!!! وكدة نفقد الثقة – إن كان قد تبقى منها شيء- نفقد الثقة في كل أوراق الدولة وأجهزتها وتنتهي الدولة – إن لم يكن السودان قد انتهى فعلا- بالله عليكم هل فيكم من يثق في وزارة صحة هذه الدولة ويتوقع منها العلاج؟ هل فيكم من يثق في أن وزارة تربية هذه الدولة ستساعده في تربية أبنائه ؟ هل سيدافع عنا جيش هذه الدولة أم أن كل ملازم سيدافع فقط عن اللواء الذي زكاه؟ يا ناس هوي لقد انتهت جميع أجهزت هذه الدولة ونحن من سوء التغذية والضعف والهوان بحال لا تسمح لنا بأن نعيدها كما كانت قبل هجوم الإنكشارية … وليس لنا سوى الدعاء فأكثروا منه ولا تصدقوا خوفهم منه فلوكان فيهم من يخاف من دعوة مظلوم لخاف من الظلم نفسه قبل دعوة المظلوم ولما وضع نفسه – ظلما وعدوانا واستلابا – في مكان يجعله هدفا لدعوة المظلوم ولذلك فكل هذا الكلام لا يعدو كونه كلاما…. سوداننا راح والأدهى والأمر أنهم يقولون أنهم يستحقون الثناء والإشادة ويكبرون ويهللون اللهم مد لهم في طغيانهم و لا ترفع غشاوة الفرعنة عنهم جميعا حتى يلاقوك على ما هم عليه
    كسرة ( هي كسرة وللا كسرة (بكسر الكاف) ولا ملاح ولا شنو؟أصلو الحاجات دي….) موش كانوا يكتبوا في جريدة الراية أيام الأحزاب أن الجمارك دي حرام ومكوس؟ وللا هم الآن يقولوا ( ليس علينا في الأميين سبيل)

  30. البروف والزوار الكرام التحية والسلام
    آسف لأنو خشيت المرة الأولى من غير سلام …. الحقيقة أنا كنت اعتقد أن الجمارك شافو المقال في الموقع (الانترنت) وردو عليهو وكنت أكبرت فيهم أن يهتموا بنقد في الانترنت …. ولكن عرفت أنهم يردون على كلام في جريدة… يعني كلام جرايد….وطبعا شايفين أن تنازلهم وردهم سابقة لم تحدث حتى في عصر الخلفاء الراشدين
    المشكلة ليست في هذه العربة أو تلك ولكن المشكلة هل لدينا دولة أم لا؟ في أي جهاز من أجهزتها نثق؟ أينما تول وجهك تطالعك قصص الفساد والرشوة والاختراق وغيرها….. اتخيلوا أن ختم اللحمة عملوهو في عطاء وأدوهو متعهد يختم اللحمة …وكأنه فقط للتحصيل وليس خدمة لصحة المواطن … بعد ده ممكن تعتبر كل حاجة تحصيل …. يعني الصحة والتعليم والمواصفات والمقاييس والجمارك والشرطة و…. كلها يجب أن (تتحصّل) وليست لها مهمة أخرى …والله أني أشك في الأدوية والأغذية والأثاثات وكل شيء واعتقد أننا صرنا سلة نفايات العالم … وأشك حتى في الهواء الذي أتنفسهفي وجودهؤلاء…ولكن ماذا أفعل؟ وهل يأبق الإنسان من ملك ربّه *** فيخرج من أرض له وسماء؟
    كسرة : مرات اسمي يتكتب تلقائيا… ومرات يتكتب Hashimoto برضو تلقائيا… ده من الوردبرس وللا شنو؟

  31. الأحباء الأعزاء … سلام
    معيش الواحد بطنو طامة وكده .. !!

  32. رايكم شنو نرسل لناس الجمارك عنوان المدزنه عشان يخشوا هنا و يقرأو و يردو على تساؤلات الناس

  33. عبدالله ودحاج | رد

    الاخوة اكرام

    الخط مااسرق ولا حاجه اصلو الفاتح جبره ده بتاع لخبطه ونحن حانرفع فيه قضية والموضوع بكل بساطه نحن عرضنا الخط للايجارنسبة للظروف التى يعرفها الكل عندنا طيارة واحده وهي ذاتها ما لامين فيها للصيانة يوم في ليفربول ويوم في بكبول المهم اتصلت بنا شركة انجليزية وطلبت الخط علي سبيل التجربة قالت يمكن ما يطلع مقاسها المهم اديناهم الخط يجربوه سنة

    بعد السنة الجماعة رجعو لينا الخط فجاءتنا شركة ثانية رغم علمنا انها نفس الشركة الاولي بس باللفة قلنا مامشكلة نديها فرصة ثانية يمكن تريحنا من المشكلة وعشان نوريهم حسن نيتنا المرة ده قلنا ليهم جربوه سنتين بالله في رجالة اكثر من كده شفتو الفترة كلها ثلاث سنين صاحبكم الفاتح جبره عملها اربع سنوات استنا ليه حيروح منا فين وبعدين ده اول خط ولا اخر خط بروح منا وكمان نحن عوضناه بخطوط داخليه وبحمد الله نحن الان نغطي كل المدن السودانية التي بها مطارات ده غير المدن التي تقع بالقرب من التي بها مطارات

    بس في الحقيقة في خطاء صغير وقعنا فيه ففقدنا الخط حيث اصبح ليس من حقنا المطالبة به بعد مضي ثلاثة سنوات لكن سوف نمنع الشركة من الهبوط في مطار الخرطوم او المرور بالسودان للضغط عليها حتي تقبل بايجار الخط

    وبعدين مسألة فقدانا الخطوط ده مسالة عادية جدا هسع اتحد الفاتح جبرة ده يقيف عشرة ايام في السور الشرقي لمطار الخرطوم يوريني كم شركة تهبط مطار الخرطوم اها الشركات ده كلها خط الخرطوم ودته فين عشان تعرفو الراجل ده ما عنده اي فكرة عن الطيران والخطوط وباقي لي لو مالجريدة البيكتب فيها ده مرة مرة تحن عليه وتسفروا في المؤتمرات كان ماشاف مطار الدبة بعينو خليك من مطار الخرطوم لكن استنا ليه خليه يشوف ليه خط تاني يسافر بيه ونحن من الان حنرصدو قل ليه مايعتمد علي قصره عشان يزوغ علي بالطلاق لو حبا حبو بين الناس حنشوف ونمنعوا من السفر مش (بالخطوط السكسكانية فقط) بل بكل الخطوط الصديقة والتي لا نشك في تعاونها معنا

    مدير الخطوط الجوية السكسكانية

    عبدالله ودحاج

    Abdallawadhaj@gmail.

  34. مهند نـــــــــــــــــــــــــــــورى | رد

    الواحد ما فضل ليه الا يعضَى سفنجته ويخش ينوم فى البوتجااااااااااااز
    انا ما غايظنى موضوع الهنبتا دا , لانه الفيلم دا حضرناه كتييييييييييييييييييييييييييييييير
    مرة مكندش ومرة شاشه فلات ومرة بى نضارة ثلاثية الابعاد
    انحنا كباااااااااااااااااااااار وعارفين اى حاجة
    بس يا جماعة احترموا عقولنا شوية كدا بس
    يعنى بس حنكونا قبل ما تنهبونا
    اى قصة خرافية اسفرية امزيقية عدلوا فيها
    وانحنا بعد داك بنصدق و ما بنفتح خشمنا
    نأسف لازعاجكم سادتى قراصنة سفينة الانقاذ الوطنى
    مخرج:
    ياربى مافى طريقة يرجعونا للحته الانقذونا منها
    undo
    مافى؟
    ناسف لهذه اللغة العامية الباهتة يا بروف الفاتح

  35. ناس الجمارك ديل أحسن حاجه تكتب ليهم لانو لو وقفت وقلت كلامك ده ح يقولو ليك ( يا شيخنا ما تكتر كلامك نحن ما فاضين ليك)

  36. التحية لك أخي الفاتح … أنا حصلت معاي مشكلة قريبة من دي لكن مع ناس المرور .. بإختصار إشتريت عربية وشهادة البحث سليمة مية المية وبإسم البائع مباشرة.. المهم لمن مشيت أرخص وأحول الملكية وكملت كل الإجراءات ودفعت كللل الرسوم البالغة ٥٠٠ جنيه وجيت لي الكمبيوتر عشان يسلموني شهادة البحث الجديدة قالوا لي يا أخي العربية دي ما نازلة في الكمبيوتر باسم الزول الفي شهادة بحثك دي.. دقيت جرس وقلت ليهم قصدكم شهادة البحث دي مزورة ؟؟ قالوا لي لا صحيحة لكن بكون غلط من (الكمبيوتر) ولازم تمشي رئاسة المرور تجيب شهادة عدم تزوير !!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: