نص بخة وكده

لاشك عزيزى القارئ أن هنالك علاقة وثيقة بين الموازين والمكائيل وبين إستطاعة المواطن على الشراء .. فمثلاً لو قلنا أن الوحدة المستخدمة لبيع وشراء (الذهب) فى الأسواق للمواطنين هى (الطن) ونصف الطن وربع الطن إذن لما إشتري أو باع مواطناً ذهباً .. إذن لابد أن تكون وحدات الموازين والمكائيل المستخدمة لسلعة ما فى متناول المواطن العادى حتى يستطيع أن يمتلكها !
مناسبة هذه المقدمة عزيزى القارئ هو الإرتفاع المتعاظم والمضطرد لأسعار السلع الاستهلاكية الضرورية والمواد التموينية التى تشهده الأسواق الآن وبصورة (تخلى الزول يحتار) مما يجعل (المواطن) غير قادر على الشراء بالوحدات المستخدمة حالياً (فمثلاً) قد وصل سعر كيلو اللحم الضأني إلى ثمانية وعشرين جنيها والبقرى إلى عشرين جنيهاً فهل يصلح الكيلو لأن يكون وحدة (لوزن اللحم) يستطيع الشعب الفضل أن يتعامل معها أذا القصة مشت على نفس المنوال؟ بالطبع لا لذلك لابد من إيجاد وحدات موازين ومكاييل جديده تتناسب مع دخل المواطن حتى يستطيع التعامل معها فبدلا من أن ترى (اللحمة) معلقة قدامك ولا تستطيع شراء (تسع كيلو) منها فالعبد لله يقترح وحدة موازين (صغيرة) تعادل (عشرة جرامات فقط) تسمى مثلاً (الحوسة جرام) مقسمة على ألف وحدة تسمى كل منها ( الجرامحوس) !
وعااادى بعد ذلك يمكنك أن تقف أمام الجزار وتمد ليهو إتنين جنية وتقول ليهو بالله أدينى خمسة (جرامحوسات ) وكمان تأشر ليهو على (الفخدة الجوانية) !!
أما سلع (الأحجام) فحكاية اللتر ونص اللتر دى بقت بعيده عن منال المواطن لذلك يجب الإستعاضة عنها بالـ( حوسة لتر) والذى يساوى (عشره ملي لتر فقط) بحيث يكون هذا الـ( الحوسة) مقسم على ألف وحده تسمى كل منها (ملى حوسة) !!
وعااادى بعد ذلك يمكنك أن تقف أمام بتاع البقالة وتمد ليهو (ميتين قرش حديد) وتقول ليهو بالله أدينى عشرين ( ملى حوسة) ! زيت سمسم !!
أما المكائيل التى يتم بها حساب كمية البصل والويكة والشطة وخلافه فيمكن الإستعاضة عن الربع ونص الربع والملوة ونص الملوة بمكائيل صغيرة تتناسب وجيب المواطن بحيث يصبح ( عشر الملوة) هو الوحدة الكبيرة التى يحسب عليها باقى الوحدات ويمكن أن تسمى (الكستبان) بحيث يمكن لحاجة (نعيمة) مخاطبة (عوض التشاشى) :
– يا عوض عليك الله ختا ليا (كستبانين) ويكة فى فنجان القهوة ده !
أما عن جرعات الأدوية والتى ما عاد المواطن البسيط يستطيع التعامل معها فى ظل أرتفاع سعر الأدوية المتفاقم فمشكلة تجعل الواحد يسأل نفسو (لو أساسا عندو نفس) .. أيه هو الشئ الأثمن من صحة المواطن؟ !! وليه الحكومة من أساسو تضع (جمارك) ورسوم وما عارف شنو على الدواااااء ؟يعنى الناس تموت وللا شنو؟ هو الدواء ده عندو وظيفة تانى غير العلاج؟ !! يعنى ممكن المواطن يشيلو ويعمل بيهو (حاجة تانية) مثلاً غير ما يتعالج بيهو ؟
المهم إزاء هذا الإرتفاع الفاحش فى أسعار الدواء وحتى يستطيع المواطن الغلبان من أن يتعالج (إن شاء الله ربع علاج) فالعبد لله يقترح على الأطباء مراعاة لظروف المرضى (الغلابه) إعتماد (الحوسة مصة) والتى تعادل وضع المريض (للحبة) داخل فمه ومصها لمدة (دقيقة واحدة) ثم إخراجها كوحدة علاجية (لمداواة الشعب الفضل) فى عموم البلاد (زى المليجرام وكده).
وبدلاً من أن يقوم الطبيب بكتابة الروشته موضحاً عليها الجرعة وهى (3 حبات فى اليوم) لمدة أسبوع يعنى (21 حبه) بالشئ الفلانى عليه تغييرها إلى (3 حوسة مصة فى اليوم) لمدة أسبوع وفى هذه الحالة يمكن للمريض أن يقوم بشراء حبة واحده يقعد (يحوس) ويمص فيها (الأسبوع كلو) !
أما أصحاب الدخل المهدود فيمكن تغيير صيغة الروشتة إلى (3 حوسة لحسه ) والتى تعادل وضع المريض (للحبة) داخل فمه ومصها لمدة (نص دقيقة فقط) ثم إخراجها وأهو (3 حوسة لحسات) أخير من الزول ذااااتو (يتلحس) !
هذا عند إستخدام (الحبوب) أما (الدواء السائل) والذى تتعذر شراء قارورته (كاملة) فيمكن بيعه فى الصيدليات عن طريق وضع القارورة على الكاونتر وتحويل محتوياتها إلى بخاخ مع وضع إعلان على الكاونتر يوضح (سعر البخة) ! هذا إذا لم يدخل إلى الصيدلية مواطن أشعث أغبر يصيح متسائلاً :
– يا جماعة ما عندكم نظام بتاع (نص بخة) وكده !
كسرة :
غايتو مع اللحم السعرو بيزيد كل يوم ده ح يجيكم يوم الواحد يستلف على (مرتبو) عشان يشترى ليهو أربعة (جرامحوسات) لحم !!

Advertisements

24 تعليق

  1. صبا الخير

    يعني انا هسي عاوز اشتري لي مرتبه … اعمل شنو يا عمك ؟ اشتري مخده و كده ؟؟ ولا اجلي الفكره

  2. يا بروف … أها لو داير تعرس ؟؟؟؟؟!!!!!

  3. لكن مااااااا بالغتا يا أب احمد – قصتك بقت زي قصة الأباريق بيغادي

  4. دعوة لكل المواطنين للصيام حتى يفرجها ربنا
    اهو منها عباده ومنها توفير ومنها تستفيد امنا الحكومه لانو الناس حا يكون حيلها مهدود من
    كترة الصيام ومافى زول حا يقدر يناقش امنا الحكومه ,, هو فيهو حيل منو يناقش ؟

  5. إحتسنا معاك فى سوح الوحسه دى

    البنزين كيف قالوا باكر الجالون حيطلع لى عشره جنيه
    واحد عندو 10حوسه فهم قال نحنا غلينا السكر عشان الناس البيشربوا البيبسى و بياكلو الكستر

  6. أب أحمد التايوانى
    لو داير تعرس أقع الكويت

  7. سهيل
    أب أحمد التايوانى ما جانا بى غادى
    اب أحمد
    معزوم جبنه بى غادى زى ما قال سهيل
    http://sudanona.wordpress.com

  8. سهيل
    أب أحمد التايوانى ما جانا بى غادى
    اب أحمد
    معزوم جبنه بى غادى زى ما قال سهيل
    http://sudanona.wordpress.com

  9. و الله يا استاذ مقالك ده عملينا بالجد حوسة.

  10. البرووف والسمار .
    سلام .
    زمان كان لمن اللحمه تغلى الطماطم والدكوة بترخص.
    لكن الليلة اللحمه والطماطم والسكر كلو غالى ماحقو تقترح لينا حاجه ياكلوها تكون فيها سعرات حرارية وبروتينات وفتمينات .
    الاخوان طارق أب أحمد وأب أحمد عاملين لينا زغللة .
    لكم التحية …

  11. البروف أبوناجي وضيوفه الكرام سلام
    أولا ايها البروف العزيز يبدو أنك طبقت نظريتك في الكتابة فكتبت المكائيل بدلا من المكاييل حتى تعمل ياء واحدة بدل اتنين … وأنا خايفك تطبق النظرية دي على نطاق واسع فيبقى عندك ميكرو مقال… أو تدينا العنوان بس وعلينا نحن نعرف انت كاتب شنو
    ثانيا الجماعة طبقوا فينا النظرية دي قبلك – ودي أول مرة يعملوها لنك كنت تديهم الأفكار – … واكتشفوا ليها فوائد … ما شايفهم يجيبو العصير ولبن البدرة في عبوات كبيرة وبعدين يعبوها في عبوات صغيرة … والفايدة تكون كتابة تاريخ صلاحية جديد بعد انتهاء بتاع العبوة الكبيرة وهو يبدأ من تاريخ التعبئة الجديدة…. وطبعا دي ما فكرت فيها المواصفات والمكائيل ويمكن ولا ميكائيل ذاتو
    بالمناسبة شفتهم جابو في السوق زيت معبأ في أكياس زي أكياس الصعوط… انا كنت قايلو زيت كبد الحوت اللي كان يجي في كبسولات… وعرفت أنو زيت الأحوال الاقتصادية الجديدة
    وكمان لقيتهم يبيعو الكريمات بالمعلقة (ده في سعد قشرة) وكل حاجة طلعوا منها مقاس اسمو (قدّر ظروفك) أما العيش فقد تحول إلى ميكرو منذ أزمان …وأيم الله أننا أناس على درجة عالية من الصبر والتحمل أو على درجة عالية من العجز وقلة الحيلة وحب الذل والمهانة.
    بالنسبة للعرس لا تقع الكويت ولا حاجة … أخوانكم من الجن … فقط عليك ايجاد (أو رؤية) العروس المناسبة وايجاد المأذون المناسب والشهود (واحد من الأنس وواحد من الجن) ومن لم يستطع فعليه بالصوم… ما نحنا صايمين إجباري وبرضو تقولوا لينا نخاف من دعوة المظلوم

  12. البروف أبوناجي وضيوفه الكرام سلام
    أولا ايها البروف العزيز يبدو أنك طبقت نظريتك في الكتابة فكتبت المكائيل بدلا من المكاييل حتى تعمل ياء واحدة بدل اتنين … وأنا خايفك تطبق النظرية دي على نطاق واسع فيبقى عندك ميكرو مقال… أو تدينا العنوان بس وعلينا نحن نعرف انت كاتب شنو
    ثانيا الجماعة طبقوا فينا النظرية دي قبلك – ودي أول مرة يعملوها لنك كنت تديهم الأفكار – … واكتشفوا ليها فوائد … ما شايفهم يجيبو العصير ولبن البدرة في عبوات كبيرة وبعدين يعبوها في عبوات صغيرة … والفايدة تكون كتابة تاريخ صلاحية جديد بعد انتهاء بتاع العبوة الكبيرة وهو يبدأ من تاريخ التعبئة الجديدة…. وطبعا دي ما فكرت فيها المواصفات والمكائيل ويمكن ولا ميكائيل ذاتو
    بالمناسبة شفتهم جابو في السوق زيت معبأ في أكياس زي أكياس الصعوط… انا كنت قايلو زيت كبد الحوت اللي كان يجي في كبسولات… وعرفت أنو زيت الأحوال الاقتصادية الجديدة
    وكمان لقيتهم يبيعو الكريمات بالمعلقة (ده في سعد قشرة) وكل حاجة طلعوا منها مقاس اسمو (قدّر ظروفك) أما العيش فقد تحول إلى ميكرو منذ أزمان …وأيم الله أننا أناس على درجة عالية من الصبر والتحمل أو على درجة عالية من العجز وقلة الحيلة وحب الذل والمهانة.
    بالنسبة للعرس لا تقع الكويت ولا حاجة … أخوانكم من الجن … فقط عليك ايجاد (أو رؤية) العروس المناسبة وايجاد المأذون المناسب والشهود (واحد من الأنس وواحد من الجن) ومن لم يستطع فعليه بالصوم… ما نحنا صايمين إجباري وبرضو تقولوا لينا نخاف من دعوة المظلوم

  13. سهيل و حنين
    أب أحمد التايوانى ما جانا بى غادى
    اب أحمد
    معزوم جبنه بى غادى
    http://sudanona.wordpress.com

  14. السلام عليكم ، البرف و الاخوان ، يا خوانا الاكل ده هو العلاج ما تقول لى فتامين ب مركب و لا ث و ا الاكل الجيد يفتح النفس مش زى الحبوب تطلع الجوه ، عموما نرجع تانى للبخرات و العمل و المعمول والتنزيل الذى منه ، سؤال خبيث ، و ناس ديك البعدوا القروش ساكت من غير ما يفاصلوا تعمل ليهم مقا قيقا ترا ………. عجبى

  15. لك التحية
    قلنا ليا قصة اللمس دي طريقة جميلة نتعلم منها ( اللحس )امكن الجماعة بدونه فرصة نلحس لينا لحسنة دة كان شبعو طبعا ( حلم الجيعان. لحس) …. ذ ذ

  16. صباح الخير بالليل
    والله أنا حايس لي جنس حوسة من الصباح لامن دخت وفاتتني حوسة السمار وعواسة أبونا الفاتح
    ده كلو هين الأكل البقى ترف والعلاج المستحيل ، بس المشكلة بقت في ناس الكيف!!!!! أها الواحد تاني حوسة نفس ما بتظبط الرأس….. وأبشركم البروف تاني بقفل المدونة، لأنو حوسة نفس برنجية ما بجيب حقو.
    بعداك الواحد يشتري ليه حوستين بايت انترنت يقرأ المدونة ولا يعلق؟؟؟
    يا بني آدم .. تفقد مرة مريرة .. ضميرك تكسب ثروة .. 
    وتلقى العالم تحت سريرك تشبع تروى .. 
    ترضع ذاتك .. من لذّاتك .. وحلو الحلوى
    من ما تبلع يوت تتبرع .. وكلك نخوة ..
    صدقة لعمرك وباقي حياتك ونصر الدعوة
    حبّة جوامع .. وقبة صوامع .. وكوتة وكوتة تفوت الفوتة بأسرع صهوة
    عُمرة وحجة وتسأل ربك يقبل توبتك يغفر ذنبكْ
    يمسح سفّك .. خيرات شعبك .. اصلها كانت عترة في دربك
    لما تعبت وفاتك حزبك
    لما ضهبت وخانك قلبك
    كانت هفوة في لحظة سهوة
    عن الإنسان والحال الأسوأ
    ودابك فُقت .. وجاتك صحوة
    وجيتَ تكفّر .. يا رب تغفر .. اغفر .. اغفر
    عبدك خاسر شيء ما بيسوى
    انت القادر … إنت الأقوى

  17. والله الحاله بقت صعبه…بعدين اللحمه بقت غاليه كدا ليه يعني تاني الشيه الا في الحلم ….وبرضو هي لله
    كسره
    السودان بقي طارد.

  18. مساء النور بروف جبرا والمدوناتيه ياجماعة الخير لاحظتوا انو كيس الاسمنت وكيلو اللحمه تساويا فى عهد امنا الحكومه اها رايك شنو يابروف فى الاتجاز ده؟ يلا ابنو الاكل ملحوق

  19. حاج أحمد السلاوى | رد

    الفاتح .. كووولو عرفناهو .. الحقن حيكون نظامها كيف ؟
    أحلى حوسة هى حوسة زيت السمسم وذكرتنى نكتة أخونا من جنوب السودان الما حضر زمن حوسة ملى زيت السمسم دى وكانت فكت ليهو المشكلة .. لامن مشا الدكان وسأل صاحب الدكان : عندك فول . فال ليهو ايوة .. قال ليهو أدينا موية فول .. وتانى سأل صاحب الدكان عندك جبنة ؟ قال ليهو ايوة .. الجنوبى قال ليهو أدينا موية جبنة ..الجنوب بيحي زيت السمسم لاكين ما عندو قروش للزيت قام قال لصاحب الدكان ..حسه موية زيت سمسم دا يجيبوا من وين ؟.
    حنين .. طارق أب احمد دا ما ولد اب احمد زااااتو .. الزغللة فوق كم ؟
    سهيل ..إغبسط يا عم . وما تشيل هم … الأباريق كوووولها طلعت بلاستك ..

  20. التحية ليك يا أستاذنا والتحية للأخوان والشعب الفضل
    جميلة فكرة الحوسة دى… وبعد كده كل صاحب دكان يشترى ليهو ميزان حساس عشان يقدر يوزن بيهو الحوسات وميكروسكوب يشوف بيهو الحاجات الداير يوزنها وبالمرة نوفر حق أكياس البلاستيك لإنو بعد كده ما بنحتاج ليها ح نشيل فيها شنو يعنى؟ ومنها يكون إصحاح للبيئة

  21. WE STILL WEIGHT LITTLE AND LITTLE TO BUY MORE AND MORE
    TILL WE WEIGHT EVERY THING BY NOTHING
    الترجمه الما حرفيه :
    سنظل نزن اقل واقل لشراء اكثر واكثر حتى نزن كل شيئ بلا شيئ
    حكمه سودانيه

  22. البروف : يعنى ممكن برضو تنتقل العدوى دى للمشاعر الانسانيه بتقليل وحدات القياس مثلا :
    واحد شايقى قال لحبيبتو يا روحى عينى الشمال ليك لانو اليمين محتاج ليها ( بدل عيونى ليك ) !!!!
    حمودى : بابا والله شبه مشتاقين كده !!!!!
    افليقا : سمسمه احتمال اكون بحبك وكده !!!!
    الحكومه : حنحاول نجتهد نضرب بيد من خشب على كل من تسول له نفسه المساس بنا .

  23. جبرا ..سلام..
    يعنى خميتنا بى حوستك دى الليلة!؟ اسه المقال دا اقراهو من ياتو جهة؟؟

  24. السلام يا ابوناجي يتلوه بعض الملام
    لم ينشر تعليقي على نص بخة أو على عشان الفلايت….. هل صرت غير مرغوب فيّ؟ اسبحت ضد التيار؟ ما الأمر؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: