فني ساااكت

عندما يود الكاتب (أى كاتب) أن يكتب مقالاً أو عموداً فإنه يبحث عن الفكرة فإذا ما وجدها يقوم بوضع عناصر ومحاور يناقش من خلالها فكرته حتى يكتمل المقال .. بالنسبة للعبد لله لا أجد خلال مسيرتى فى الكتابة مشكلة إذا ما وجدت الفكرة .. مشكلتى دوماً هى (الفكرة) إذا وجدتها عندها تأتى الكتابة دونما (عصلجة) .. لم تصادفنى فكرة إستعصت علي فى أن أحولها إلى (ساخر سبيل) ما عدا فكرة اليوم (غلبتنى عدييييل كده).. وهى تصريح طالعته عيناى على الصفحة الأولى بإصدارة أمس من صحيفة الرأى العام .
التصريح يا سادتى الأفاضل للسيد البروفيسور عبدالله الصادق مدير هيئة المساحة أدلى به أول أمس فى (إحتفال) بقاعة الصداقة من أجل تدشين (خريطة السودان الجديدة) يقول (البروف) فى تصريحه بأن خريطة السودان بعد الإنفصال (جميلة) وأن شكلها الهندسى (جذاب) !
العبدلله إحتار حيرة ما بعدها حيرة من تعليق (البروف) فلأول مرة بعد أن (هرمنا) ونحن فى هذا السن المتأخر نعرف بأن من (خرائط الأقطار) ما هو جميل وما هو (شين) يقطع الخميرة ..(ومش كده وبس) كمان ما هو جذاب يجذبك بأناقته وشكله الهندسى (الفاتن) وما هو (عااادى) تمر عليه مرور الكرام دون أن يلفت الإنتباه .
فجأة وجدت نفسى أنادى على طفلى (ناجى) ذى العشرة اعوام طالبا منه أن يأتى ومعه (الأطلس) وما أن حضر امامى حتى خاطبته قائلاً :
– كدى أفتح الأطلس ده وورينى أجمل خريطة بتاعت دولة
– ودى يا بابا أعرفا كيف؟
– يكون شكلها الهندسى جذاب !
– أنا غايتو يا بابا ما بعرف هندسى وما هندسى وجذاب وما جذاب .. أنا بحب خريطة السودان وممكن هسه أرسمها ليك من راسى !!
أصابتنى غصة فى الحلق وطفرت من عينى دمعة حزينة إذ لن يكن بمقدور ناجى أن يرسمها بعد الآن .. تذكرت حينما كنا أطفالاً فى عمر ناجى نرسم على كراسات (الهندسة البيضاء) خريطة السودان التى تقبع داخل نفوسنا عن ظهر قلب ونتفنن فى رسم وتلوين أنهارها وغاباتها ووديانها !
الآن .. أصبحت تلك الخريطة التى حفرت فى مخيلة وذهن كل سودانى (وحشة) وشينة وغير جميلة ولا جذابة !! يا الله .. كيف لمن تبتر ساقه أو يده أن يقول له الطبيب أن شكلك الآن أجمل .. وأنك تبدو أكثر جاذبية من قبل ؟؟
أن يفارقك عضو ولدت به وعشت معه ويبتر إلى الأبد فالحزن واحد سوى أن البتر كان بسبب (السرطان) أو (حادث حركة) !!
لقد أجهدت ذهنى كثيراً لأفهم تصريح السيد البروف مدير المساحة ولما أعيانى التفكير حاولت أن أشرك الآخرين :
– (لينا عمر 19 سنة طالبة جامعية) : أنا أفتكر البروف عاوز يقول ليكم … ياااااى الخريطة كده بقت تجنن !!
– (حسن عمرين – 45 سنة – سواق ركشة) : شوف يا استاذ الزول ده الظاهر متخصص وبيعرف الخريطة الجميلة الجذابه من الما جذابه عشان كده أنا بفتكر ما تدخلو معاهو فى نقاش و(عنكبة) !
– (حنان مسكول – 37 سنة – حنانة) : أنا بفتكر والله كلامو صاح .. أصلو الخرائط دى زى نقشة الحنة فيهن واحدات جذابات وواحدات عاديات ساااكت !
– (حسن أبنص- 28 ميكانيكى) : المعلم ده عاوز (يحنكنا) يا استاذ ساااكت .. معقوله الخريطة بعد (الزعمطة) الحصلت ليها دى تكون جذابه ؟
– (عوض أنفاس – 29 سنة – عاطل) : بالله لو لقيت ليا الزول ده أسألو ليا قول ليهو خريطة (كوستاريكا) كيف؟

كسرة :
التحدث عن أمر هامشى و(غير مهم) وترك ما هو (عميق) يذكرنى بتلك الطرفة التى تقول بان جيران مدير أحد مصانع الأدوات الكهربائية قد أخبروه بأن أحد المهندسين الذين يعملون تحت إدارته دأئم التواجد فى منزله اثناء غيابة وحتى يقنعوه بذلك طلبو منه أن يجلس معهم فى مكان بعيد ليرى بأم عينية (وقد كان) .. وما أن خرج الرجل من منزل المدير حتى صاح الأخير :
– لكن يا جماعة ده ما مهندس .. ده (فنى) ساااكت !!

21 تعليق

  1. سلامات ..
    يابروف إنتا قايل زولنا بتاع المساحه دا براهو البفكر كده ؟؟؟ ياعمك الطاقم كله زي دا .. بس ديلاك لسه ما لموا في مكرفون عشان يتحفونا بالنفيس من الدرر .. طول بالك ..

  2. هسي بطلع ليك واحد من الجماعه يقول ليك الخريطه الجديده هي الخريطه الأصليه و كانت رايحه ليها 400 سنه و الحمدلله اللقيناها .. و يمكن يشطح و يقول ليك الخرطوم دي آنذاك كانت جنب حلفا ..

  3. سلامات ياعمك،،،
    يا بروف الزول ده قاصد يقول ليكم الخريطة الجديدة علشان شكلها زي (الشمارة) فهي جميلة!!!
    هؤلاء الناس لا يستحون وهم يتخبطون ويهرفون بما لا يعرفون، فهل صاحب هذا التصريح واعي ويفهم ما يقول؟؟؟؟
    حاجة عجيبة ياخي….
    والليالي من الزمان حُبالي مُثقلات يلدن كل عجيب

  4. كل فعلا كلام غريب , كأنه يطيب فى خواطر الناس ، والله الواحد فعلا ما قادر يحتمل تصريحات الجماعة ديل , الناس فى شنو والحسانية فى شنو؟

  5. بصراحه امس قريت الكلام القالو الراجل ده في الجريده وبصراحه اكتر حسيت بقمه الاستهتار من هذا التعليق والتصرف.
    يا اما نحنا عقولنا صغيره ونستاهل يحنكونا زي الشفع الصغار ( لم اتنين يتشاكلو في لعبه ويجي الكبير ويقول للمظلوم خلاص اها شوف اللعبه التانيه دي احلللللللي من الاولي وجذاااااااااااابه كمان وتداخل الالوان فيها عجيييييييب)
    يا اما الزول ده (وحسب ظني ده الارجح) انو مستهتر ودي ماحاجه بترضي الشعب السوداني
    بصراحه انا احبطت جدا!!!!!

  6. التحية لك استاذنا الفاضل جبرا
    أنا ما فاهمة انت لغاية هسي بتندهش وتستغرب ليه البلد دى بقى ما فيها اى شئ غريب كل حاجة ممكن تتعمل وكل كلام ممكن يتقال – الجماعة ديل أصلهم من زمااااان لغوا عقولنا تماما كأنهم ما بتخاطبوا مع بشر عشان كده ما مجتهدين شديد بقولوا أى كلام وخلاص ونحن علينا السمع والطاعة وبس

  7. حاج أحمد السلاوى | رد

    والله يا الفاتح نحنا زااااتنا بقينا متبلدين وبقينا ما عارفين الصاح من الغلط لأنو الجماعة ديل عباقرة بالجد وكلامين جنس كلام .. يجى واحد من الأحسبون يتكلم ويقنع الناس كوووولهم إنو كلامو صاح والناس تقتنع بأنو ما فى حاجة صاح اكتر من كدا ..بعد يوم يومين يجيك واحد تانى من نفس فصيلة الأحسبون وينفى الكلام بتاع الأحسبون الأول جملة وتفصيلاً ..المصيبة إنو برضو الناس تقتنع تمام الإقتناع بكلام الحسبون نمرة 2 ..عشان كمبيوتر دماغنا إتلخبط وعاوز ليهو فرمته من جديد بعد الجماعة يتخارجو ..بس الخازوق يجينا واحد تانى يخرب علينا الهارد ديسك والبروسيسر زاتو ..
    وبعدين يالفاتح الكلام والتصريحات بدون قروش ..

  8. هم بقنعوا فينا ولا في روحهم، أها الخريطة بتبقى كيف بعد دارفور تنفصل وتنضم لي كوكب المريخ؟ ح يقولوا ليكم وفرنا ليكم في حق المواصلات والسفريات الطويلة؟ والخريطة بقت جذابة؟
    هم شاوروا منو في الأول لما عايزين يدونا خلاصة زفت وعشرين سنة من الحكم إنهم جايبوا التايهة وبقوا الخريطة حلوة؟ هم ذاتهم مالم ومالنا الخلاهم يحكمنا منو ذاتو؟ ياخ أمشوا ياخ خلاص ختيتوا بصمتكم في التأريخ وإتسجل ليكم بي إسمكم إنكم قسمتوا البلد بعد ما نهبتوها …
    زماناً مو البلد دي كانت بت حلال؟
    بي حالها بي حرب الجنوب
    بي قلة المال في الجيوب
    كسرة في شكل نصيحة :
    أختاها جنة مع الفقر
    وأدخل جحيم المتعبين
    وإن ما قدرت علي دي يا وليدي
    ربيلك دقين …
    حمدنا الله الحنون
    جيلاً خلقنا بلا دقون

  9. سلامات البرف جبرا وبقية العقد الفريد القدامي شديد من ايام القمردينة ديييييييك الي الناس الجداد,,,,
    يابرف انا عاوز اعمل فريق لعمل دراسة لاكتشاف مرض جديد واتمني انك تكون قائد للفريق لانك انسب زول في السودان للقيام بذلك ,,,,
    المرض هو متلازمة الكيزان والاسم العلمي له اعتقد الانسب هو كوز سيندروم وهو مرض معدي ولا يصيب او يعدي الا الاشخاص المنتمين لحزب الكيزان بشقيه البشيري والترابيي او المقربين منهم بشدة فكريا وثقافيا ,,,
    ومن اعراض المرض هو اختلال فكري حاد في التفكير وفي الاجابة وفي تشخيص وحل المشاكل المختلفة ,,,,
    وبالجد انا لاحظت المرض وذلك بعد تدقيق وتمحيص شديد لاكثر من 500 حالة وذلك بعد الاتطلاع علي تصريحاتهم الكثيرة وجزء مقدر من افكارهم الكلها خمج ومرض ,,,
    ومن العينات تلك اجابة مدير هيئة المياه في الخرطوم حول الاستقالة اذ كان رده انا اعتبر ان استقالتي في هذا الوقت تعتبر تولي يوم الزحف ,,,
    واجابة سبدرات والطاهر بتاع البرلمان عن محاربة الفساد ولقد كتب فيها البرف كذا مقال حيث كانت اجابتهما اننا نحارب الفساد بواسطة الوازع الديني ,,,,
    وايضا تصريع الضار نافع حول انهم يتطلعون لقيادة العالم ,,,
    وايضا تصريح للوزيرة الشابة سناء عن الثورات العربية وانها لن تقوم في السودان,,,,
    الحقيقة بالجد ياجماعة المرض بتاع الكيزان دا اعراضه كثيرة جدا جدا جدا ودي بس امثلة منها ,,,,
    ولو انا لقيت مساندة بالجد حا اعمل دراسة لمتلازمة الكيزان دي والنتائج حاتكون مدهشة جدا جدا وحانوصلها موسوعة قينيس لاغرب واحدث الامراض ,,,,
    حا نواصل يا جماعة الموضوع دا جدي جدا بالمناسبة وعاوزين سند منك يابرف ومن بقية العقد الرائع,,,

  10. حاج أحمد السلاوى | رد

    الأخ محمد دوم .. ياخ تاعب روحك مالك ؟ حتجيب لنفسك ضغط دم ..وسكر ..وقرحة معية وغير معدية ..وإالتهاب رئوى وإالتهاب فى العصب الأورناؤطى .. وإختلال فى العصب الشوكى وزهايمر ..( دا لو ماعندك واحدة او غتنين من المراض دى ) ..هم يعنى حيحكموا تانى كم سنة ؟ عشرين .. ؟ مش مشكلة ..القذافى حكم كام سنة ؟..وقس على ذلك..
    وشافاك الله ..

  11. سلام ياقبيلة،،
    سلولو وبقية العقد الفريد الدكاترة والباحثين عن الحقيقة الضائعة أنتو ما سمعتو بوداعية جبرا لمن سألوها عن كم تبقي لهذه الحكومة من زمن فماذا كانت الأجابة؟؟؟؟
    كسرة/
    يروي عن المرحوم زين العابدين محمد أحمد عبدالقادر عليه الرحمة نكات كثيرة عن هذه الحكومة منها اننا جيناكم من خور عمر وحكمناكم 16 سنة، وهسي جاكم سيد الخور ذاتو!!!!!!!!!

  12. حاج احمد السلاوي سلامات ,,,,
    الحقيقة الامراض والحاجات القلتها دي كلها هينة قصاد الخايفين منه في عهد هؤلاء الما معروف من اين اتوا كما قال الرائع الطيب صالح طيب الله ثراه او كما قال وكما نقول دوما من هم هؤلاء ,,,
    والله الواحد خايف كما في مسلسل الخيال الامريكي الابطال او هيروز انه ينفجر عديل كدا كما حاول الشرير انه يفجر مدينة نيويورك ,,,
    في الفترة الجاية دي لو الجماعة ديل الله ما حلانا منهم ومن شرورهم فاما الواحد يطش من غير رجعة من السودان او يركب ليهو صينية ناصية ,,,,واما الانفجار,,,,

  13. تعرف عشان تشوف جمالها لازم تركب عيون مساح لأنه العالم ده كووووووووووووولو أى زول عنده عيون بتشوف
    من زاوية مختلفة ولكل ممتهن مهنةعيون مختلفة مستمدة من المهنة ( حلوة ممتهن مهنة دى مش كده ) مثل عين المساح والطبيب والمحامى والزراعى والميكانيكى والتاجر والسياسى فعشان تعيش لازم تمتهن المهنة و تخلى الناس تعرف زاوية شوفك ، ومدير هيئة المساحة ممتهن مهنة المساحة وبشوف بعيونها فلا تلوم عيونه..إنتا مساح ؟؟؟؟

  14. جبرا والسمار .
    سلامات .
    والله الواحد اليومين دى حاسى بى عدم الامان فى بلدو وفى أرضو وحتى كمان فى بيتو…
    ونحن الواحد بقت عليهو حكاية جحا لمن قال مافى بيتى .غايتو ربك يكون فى العون .
    وعن الخريطة الجزابة بعد الانفصال وإلغاء مثلث حلايب بقت يادوب ليها نكهه وطعم .
    طظ .

  15. الأحباء الأعزاء :
    ســـــــــــــــــــــــــــــــــــــــلام
    ما عندى والله كلام أقولو غير إنو الجماعة ديل والله حيرونا !!

  16. باكر بطلع ليك واحد يقول (( خلاس السودان قلع لباسو))

  17. السلام عليكم ، البرف و الاخوان ، الاخ طارق اب احمد ما زمان قالها الريس نقابلهم عريانين ، سؤال منبثق : فى عره اكبر من كده …………..عجبى

  18. البروف والاحباب..سلام..
    اسه شكلو رئيس هيئة المساحة دا مهندس,دا فنى سااااااااكت!

  19. طارق…
    وبعد القلع الحيحصل شنو!؟؟ كع..

    كوكو..
    تشكيل ما يعطى؟كع..

    http://www.facebook.com/notes/yasseen-shambaty/بينونة-صغرى/

  20. سلام يا بروف والشلة
    متابع لابداعاتك من بعيد لكن 9 يوليو دي مستفذه شديد
    كل التلخيص في الكسرة وناس الحكومة ديل علي الطلاق ما عندهم أي غيرة علي البلد ولو العالم ده كلو دخل ومرق بشوفوهم فنيين سااااكت طالما القسيمة باسمهم .
    الخريطة بقت جكسا في خت ستة ومشرشرة كمان من تحت الله يشرشر ….

  21. يا جماعة أرخوها شوية الزول دا كان عايش بره السودان عشرين سنة و من ما جابوهو عملوه مدير ..خريطة السودان الزمان لقاها وين؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: