القصة ما قصة جنوب

أول أمس إنفصل (الجنوب) .. هلل البعض لإنفصاله .. قال البعض (يغور في ستين داهية الجنوبيين ديل هم الأخرونا ) !! هكذا قام البعض بتحميل الجنوب مشكلة فشلنا (وحالنا المايل) الذى لا تخطئه العين !
كما إستمعت إلى إمام أحد المساجد يقول فى خطبته : بعد انفصال الجنوب لم يعد هنالك عذر لعدم تطبيق الشريعة ! وكأن (الجنوب) هو من كان يعطل أحكام الشرع !
العبد لله يقول بإنو القصة ما قصة جنوب .. القصة قصة (جيوب) .. قصة ضمائر .. قصة تطبيق لمبادئ العدل والنزاهة والمساواة تلك القيم التى أرساها ديننا الحنيف .. وعشان ما نكون بنتكلم (سااااكت) أقرأوا معى خبراً نشرته الزميلة (الصحافة) قبل أقل من شهر يقول :
هدد مواطن تسلق صهريج المياه بمستشفى أم درمان بأن يلقي بنفسه من أعلى، اذا لم يحضر والي الخرطوم ويحل مشكلته.
وعلمت «الصحافة» أن المواطن الذي يقيم بمنطقة الثورة الحارة «75» حضر أمس الى مستشفى أم درمان بغرض اجراء عملية في الفخذ لابنه البالغ من العمر خمس سنوات، وبعد الفحص رفض الطبيب المسؤول أن يمضي في التقرير بحجة أن والد المريض عجز عن دفع مبلغ رسوم العملية «مائة جنيه» ،ما أثار الغضب بداخله وتسلق صهريج المياه، وهدد بأن يلقي بنفسه من أعلى اذا لم يحضر والي الخرطوم ويحل مشكلته .
وأكدت المصادر، أن الشرطة هرعت الى مكان الحادث بعد تلقيها بلاغا، وأقنعت المواطن بالنزول، وأحضرت له التقرير وعليه امضاء الطبيب وبعده اقتيد الى قسم الشرطة ودون بلاغ في مواجهته بتهمة الشروع في الانتحار.
وتعالوا معى لنقرأ ما صرح به (مؤخراً) السيد وزير الماليه لرؤساء تحرير بعض الصحف الساسية اليومية بعد أن تمت إماطة اللثام عن دفع الدولة لمبلغ (32.391.70) دولار أمريكي .. (إثنين وثلاثين ألفاً وثلاثمائة واحد وتسعين دولاراً وسبعين سنتاً) وذلك لعلاج (طبلة أذن) إبنه (عمر) بإحدى المستشفيات الأمريكية لنقرأ (إفادات السيد الوزير) يعقبه تعليق (العبد لله) .
الوزير : لم أطلب من جهة دفع فاتورة علاج ابني !
العبدلله : مصدقنك يا سعادتك .. الحكومة في الحاجات بتاعت المسئولين الزى دى بتشتغل (فل أتوماتيك) يعنى يمرض ليك زول تلاقى الفاتورة (منها وليها) إتدفعت على طول
الوزير : قطعت تذكرة السفر لابني ووالدته بالدين
العبدلله : يا حرررام … بالله إنتو زينا كده برضو بتتزنقوا وكمان بتتدينوا
الوزير : من يملك دليلا على تورطي في شبهة فساد فعليه التوجه إلى رئاسة الجمهورية وتقديم شكوى ضدي
العبدلله : العفو يا سعادتك .. مش ولدك ده مشى (القمسيون) الطبي وقالو ليهو لازم تسافر عشان مرضك ده هنا مافي ليهو علاج وكلو شئ ولا (طبل أضنين أولاد المسئولين) !
الوزير : إن الوزارة هي التي طالبت بدورها بدفع قيمة فاتورة العلاج باعتبارها حقا كفله القانون ، لاسيما أنه كان في مهمة خارجية.
العبدلله : دى الوزارات وللا بلاش .. الباشكاتب يمرض الوزارة تطالب بتسديد فاتورة علاجو .. المحاسب (عمل ليهو عملية ) تطالب بدفع قيمة علاجو .. والتصديق يطلع علي طول بدون أى مساسقة أو لوائح أو قوانين ! وبعدين يا سعاتك (لا سيما أنه كان فى مهمة خارجية ) دى دخلها شنو فى الموضوع ؟ عشان نفهم لأنو مرات فهمنا بيكون تقيل شوية !
الوزير : لم أطالب الوزارة بدفع الفاتورة على الرغم من أنه حق كفله لي القانون !
العبدلله : أهو دى أنا ما فهمتها .. إنتا وزير على العين والراس .. لكن معليش (ما ظنيت) يكون فى (قانون سائب) بالشكل ده ! يعنى عشان إنتا دستوري يقوم المواطن الغلبان بدفع ليهو ما يعادل (مية وعشرين مليون جنيه) عشان (ثقب في أضان ولدك) ؟ إنتا ما شفتا (الزول الطلع الصهريج؟) طلعوا عشان كم جنيه؟
عزيزى القارئ : كما أن السيد وزير المالية عندما واجهه ذلك الصحفي بالزميلة السودانى بذلك العقد الملياري الذى يخص السيد مدير سوق الأوراق المالية لم يناقش موضوع العقد بل طلب من الصحفى أن يدله عن مصدره تاركاً أصل الموضوع متحدثاً عن (هامشه) .. (على طريقة ده ما مهندس ده فني ساااكت) .. ها هو الآن السيد الوزير يصرح بأن أحد المستشارين يقف وراء الموضوع من أجل إبتزازه (ياخى يقيف ولا ما يقيف ده ما موضوعنا) موضوعنا هو هل يكفل لكم القانون علاج من هم فى كفالتكم بهكذا مبلغ وأنتم شخصياً تدعوننا لربط وشد الحزام تقشفاً وأكل (الكسرة)؟ وهل إلتزم سيادتكم بأخذ التصديقات اللازمة من الجهات المعنية لهكذا علاج؟ وهل إستوفى إبنكم كافة الإجراءات المتبعة التى يسمح فيها العلاج بالخارج ومن ضمنها تقرير (القمسيون الطبي) وهل لو أن إبنى (ناجى) حدث له ما حدث لإبنك (عمر) سوف يتعالج بنفس الطريقة لا سيما وأن العبدلله ربما يكون حينها في مهمة رسمية ! (أو كما قال) !

كسرة :
المواطن الطلع فوق الصهريج قبضت عليه السلطات وتم فتح بلاغ له بتهمة الشروع في
الإنتحار .. المصيبة إنو يقوموا يغرموهو

Advertisements

20 تعليق

  1. تحيه وسلام …

    ياعمك .. ال 120 مليون دي مش كان ممكن يشترو بيها معدات طبيه لقسم الانف و الأذن و الحنجره عشان يعالجو بيها كم مليون زول؟؟؟

  2. والله يا بروف نحن المحتاجين علاج طبل إضنين
    لأننا كل يوم بنسمع في جنس القصص دي وما بنحرك ساكن
    كان الله في عون البلد
    اللهم ولي أمورنا خيارنا

  3. بسن فى المؤتمر الصحفى للوزير قال انو ديل ناس السفارة فى امريكا تبرعوا بالمبلغ / ياريت يا بروف تتأكد لينا من الحكاية / لان الكلام اختلف

  4. جبرا الحبيب : يغرموهو مية جنيه عشان تانى ما يطلع صهريج !!!! تعرف انا اشك انو فى اتفاق بين المستشفى والشرطه قامو ختو الصهريج ده جنب الحسابات عشان لو ما دفعت للحسابات تدفع فى البلاغات فى القسم وفى النهاية مية جنيهم بيشيلوها بيشيلوها عشان كده مافى داعى لطلوع الصهاريج والتعب – تتخيل يا عمك بعد فتره بيكون فى واحد قاعد جنب الصهريج عشان يطلعك الصهريج وتدفع ليهو خمسه جنيه رسوم تطليع ؟؟؟؟؟
    غايتو جنس غايتو ..
    انت يا عمك الكان فى مهمه رسميه ولد الوزير ولا الوزير ذاتو ؟؟ عشان نقدر نقيم كويس ؟؟؟

  5. اقول لك يا اخ جبرة أنت تعبان وغلبان وتكتب عن الوزير وعن …… وعن وما عارف الحاصل شنو خليها علي الله ساكت – الوزارة شغالة علشان مجموعات معينة تعطيهم تصديقات وتخفيضات وأسأل ناس الجمارك وناس الميناء يوروك العجب مليارات الجنيهات ضاعت من البلد (( تصور السكر المعفي من الجمارك ورسوم الميناء حوالي 2 مليون طن والسعر ماشي في العالي لمصلحة من لا ندري )) الغلبان يدفع من دم قلبو وانشاء الله يتفلق وما حادي سـائل فيه – يقوم واحد في المسجد يتحدث عن دولة الشريعة – و الله العظيم ما عارفين الشريعة دي مطبقة وين الا تكون في بلاد غير هذه البلاد.
    المهم يا أخ جبرة الموضوع كلوا علي بعضوا نرفعوا الي رب العاملين الذي يسمع ويري كل هذه الفساد- لو كان سيدنا عمر موجود في هذا الزمان لأدخل الجميع الي غرفة الجلاد لهذا النفاق والكذب – الم يقل لأمين الأمة ابا عبيدة عامر أن كنت اعطيت من مالك فقد اسرفت وأن كنت اعطيت من مال المسلمين فقد خنت – تصور كم خان السادة المسئولين وهم يوزعون اموال الشعب المسكين علي المقربين والذين معهم في الحزب – لذلك لا ترجو منهم خيرا ابدا.

  6. القصه ما قصة جنوب
    القصه قصة شعب ببلع فى الحبوب
    مرات حبوب خدرا ومغلفه بصكوك غفران ذنوب
    مرات حبوب حمرا ومنمقه بى رسم مليان قلوب
    مرات حبوب كاكية جلابيه توب
    القصه قصة شعب ببلع اى شيئ
    وبعد البلع بيكون مروق منتشى
    يا شعب مسطول من زمان يا شعب صار ما بختشى

  7. شباب : ولان الحزن كبير :
    القصه ما قصة جنوب
    القصه قصة ثروه ما بتملى الجيوب

    القصه علام الغيوب عارف الحصل
    عارف البلد الانقسم عارف الفضل لى وين وصل

    القصه قصة شعب بى اطول نهر يوماتى حمام حيا ووب
    القصه قصة ناس غلف وقساة قلوب
    القصه قصة شعب طشا من الدروب

    والقصه ما قصة بلد بس انفصل
    القصه انو الانفصال اول فصل
    فى مسرحية مسيخه اقرب للهزل

    القصه قصة طفله ما لاقيه الدوا
    القصه قصة كم اسر بايته القوا
    القصه اكبر من تلوث فى الهوا
    القصه قصة شعب اتلوث ضميرو واتحرق فيهو الجوا

  8. إنفصال الجنوب ما يفرح ليهو الا زول ما زول اصلا
    ضبح التور يوم الانفصال زي الزغروتة في بيت البكاء
    يا حليل احلام الباباية والنخلة ……
    الشريعة حبابا وكان للاربعين جلدة بنقدر عليهن الله يقدرن علي القطع من خلاف
    قبل فترة والي الخرطوم بكل فخر بقول حنوقف العلاج المجاني في المستشفيات ..
    طيّب الماعندو حق التأمين الطبي يتعالج وين ؟

  9. البروف جبرا وسمارة .
    سلامات .
    الوزير دة ياهو زاتو القال داير يحلل القروض الربوية ولا ماياهو ؟.
    لانو لو بقى ياهو معناتا الوزير دة لوحسبناليهو جلطاتو فى الوزارة كترا خلاس .
    1/ الناس ترجع للكسرة (وهو ماعارف مصاريف الكسرة أكتر من الرغيف )
    2/ الميزانية فارقة بالانفصال وعلية يجب زيادة المواد البترولية.
    3/ مخصصات مدير الاوراق المالية الجديد المليارية.
    4/ علاج ولدو عمر فى أمريكا على حساب الدولة (لأنو وزير )
    5/ تحليل القروض الربوية .
    6/ زيادة أسعار المواد البترولية تانى (بعد باكر ) لأنو لسة الميزانية فيها فرق.
    7/ زيادة أسعار السكر والسلع الضرورية لمجابهة الوضع الاقتصادى .
    السيد الوزير قال لو إخفاقاتو دى وصلت أربعين بقدم إستقالتو .
    دى المسؤلية ولا بلاش …

  10. أنا الموجعنى قصة خلط الدين والسياسة دى والأصرار عليها …يعنى نحنا متدينين ومسلمين أكتر من بقية الدول العربية
    كلها ؟؟ أين هو تطبيق الشريعة او الحديث عنه فى دول كمصر والأردن والعراق وسوريا واليمن والمغرب والجزائر وتونس و كافة دول الخليج عدا السعودية ..كما أتعجب من التمسح الذى يبديه بعض منسوبى الحكومة بالعروبة ..نحنا
    عايشين فى دول عربية منذ سنوات والله ما شغالين بيكم شغلة ولا حتى محترفين بأنكم عرب … وفى هذه الدول العاوز
    يصلى ويصوم هو حر ..والماعاوز بطريقته ما فى حد جابرو يا جبرا ..وهى دول فيها أقليات إثنية وغير مسلمة أٌقل
    من السودان ولكننا مصرين بأننا أغلبية والبقية فى ستين داهية وهذا سبب رئيسى من أسباب إنفصال الجنوب …

  11. أنا الموجعنى قصة خلط الدين والسياسة دى والأصرار عليها …يعنى نحنا متدينين ومسلمين أكتر من بقية الدول العربية
    كلها ؟؟ أين هو تطبيق الشريعة او الحديث عنه فى دول كمصر والأردن والعراق وسوريا واليمن والمغرب والجزائر وتونس و كافة دول الخليج عدا السعودية ..كما أتعجب من التمسح الذى يبديه بعض منسوبى الحكومة بالعروبة ..نحنا
    عايشين فى دول عربية منذ سنوات والله ما شغالين بيكم شغلة ولا حتى محترفين بأنكم عرب … وفى هذه الدول العاوز
    يصلى ويصوم هو حر ..والماعاوز بطريقته ما فى حد جابرو يا جبرا ..وهى دول فيها أقليات إثنية وغير مسلمة أٌقل
    مما فى السودان ولكننا مصرين بأننا أغلبية والبقية فى ستين داهية وهذا سبب رئيسى من أسباب إنفصال الجنوب …

  12. السلام عليكم ، البرف و الاخوان ، الجنوب انفصل بعد ماصوت اهله للانفصال بنسبة 98% ، و بعدين مش احسن ليهم الانفصال من دوله محاربه من كل الجهات ، عسى و لعل امريكا و اسرائيل و اوروبا يطوروا الجنوب و نستفيد نحن من التطوير ده ، زمان قلنا عكاكيزنا ما نفع ، قلنا اللغف بالدور لم يستمع احد ، قلنا المال السايب ده تقوم شركات توزع اموال الشعب دى علينا ، بعدين هو براه بتاع الاوراق الماليه البياخد مليار ، اتحدى مدير اى شركه بتروليه لو ما بياخد مليارين وتلاته الف دستورى بيصرفوا كم مليار ، ويوم ذهبت الى مزرعة الانتاج الحيوانى بحلة كوكو لشراء طبق بيض ، قال لا يوجد ، ليه يا اخى ما اهو عندكم مزرعه كبيره مليانه جداد ، قال فى اجتماع مجلس وزراء ، وما علاقة هذا بذاك ؟ قال حتى الخفير و الجناينى فى يوم الاجتماع بياكل تلاته وجبات بيض ، وحتى ست الشاى جنبهم ينوبه من القسمه ، سؤال خبيث : جنوبى ده جنوبى ولا عامل جنوبى ، انا زول ان رضى و لا ابى ، وكمان فرحان اربعه وعشرين لا نو مافى فى الشارع زول سكران و مفترى …………….. عجبى

  13. البروف وضيوفه الكرام …. تحية وسلام وإكرام
    فعلا يا بروف كلنا عارفين انو القصة ما قصة جنوب ….. ولكننا نستمر في تحميل المسئولية لغيرنا…..
    من أين خرج البشير ومن أين خرج أمثال هذا الوزير؟ أليس من هذا المجتمع الذي أصبح يقدس السلطة والثروة مهما كان مصدرها وشرعيتها؟ ألسنا نخفي بشعارات الشريعة نفاقا لا مثيل له في الدول العربية ويدل عليه طردنا لابن لادن بعد مص دمه (قبل احداث سبتمبر) والقائنا القبض على كارلوس بعد أن أجرناه ( وكانت كل دول أمريكا اللاتينية “الكافرة” قد رفضت القبض عليه من أجل فرنسا) واعطائنا كل بيانات المنظمات الاسلامية التي وثقت بنا لل CIA ثم نهلل ونكبر وندعي العروبة والشريعة!!! أبشروا بطول سلامة يا معارضو الشريعة فالشريعة الإسلامية لن تطبق في هذه البلاد إلا بعد أن يتم تطبيقها في إسرائيل وأبشروا بموت الوطنية في هذا الشعب المستورد فإن أحدا لن يذرف دمعة على أي جزء ينتزع من هذا البلد واصبح وطن كل منا هو بيته فقط …. وربما يكون البعض مستعدا للتخلي حتى عن هذا ولا عزاء لمن مات أبنائهم دفاعا عن وحدة السودان …. ولمن يتكلمون عن العروبة أنظروا كيف فعل العرب الأقحاح بأحد طغاتهم وهو كان قد حقق لهم حلم الأجيال بتوحيد شطري بلدهم واكتشف لهم البترول وجعلهم يشعرون بالأمن لأول مرة منذ نصف قرن.. ولكن كل ذلك لم يشقع له عندما طغا … أما نحن فمن قسم بلدنا وأذاقنا لباس الجوع والخوف بعد طول شبع وأمن يتطاول علينا ويكاد يزعم أنه أوجدنا من العدم …. فما يزيدنا ذلك إلا حبا له وتهليلا وتكبيرا لأجله ….فهل عرفتم الفرق بين العرب وغير العرب؟ أما أنا فقد عرفت ولن أزعم العروبة بعد الآن…

  14. اخى جبرا والاخوان الاعزاء
    ياجماعة الخير كدى ورونى نحن المستفيدنو شنو من الجنوب انفصل ولا ما انفصل السودان فيهو مليون ميل ولاسنتمتر واحد
    نحن طالما الجماعه ديل الحكمننا بقو بالطريقه دى السودان كبير ولا صغير كله ضيق معاهم / فعشان كده انسو الموضوع
    وكل زول يبقى على اضانو عشره

  15. انت ياجبرا كل الطبل طبل (طبلة با ب شارع -طبلة باب الاوضه- طبلة باب الحمام- طبلة بابالمخزن -طبلة الخزنه المركزيه-
    طبلة خزنة مدير الاسواق الماليه-طبلة خزنة جبرا-) والثقب انواع (مثلا ثقب فى توب من كرسي الحافله الفى النص-ثقب قميصك من التربيزه بتاعت المكتب المتهالكه-ثقب الاوزون-)عشان الطبل انواع والثقوب انواع اذا الدفع انواع
    كسره
    انت ياجبرا عندك خزنه

  16. مغصة مغصة مغصة
    وتاني مغصة
    وبرضو مغصة
    هوي يا ود جبرا، عليك النبي أختانا، كفانا من دي ناساً فقر وحكماً شتر
    لكن نحنا شعب يستاهل، أنا ما عارف إنتو زعلانين ليه من تجبر وطغيان الحكومة، أصلوا ربنا بسلط علي كل ناس الأعفن منهم
    ونحنا ريحتنا فاحت، وبقينا شعب جبان
    (إنّ الآيادي التي في كتفها صقرٌ، قتلننا ثم لم يحيين قتلانا)
    نصيحة:
    أمشوا السوق قبال الشنط تغلى ولموا هديماتك وشتتوا
    لا الجبال قالت غروب
    لا المزامير راح تغني، لا الفجايع راح تذوب
    الحزن غطى المسالك والدروب
    مافي غير تلكع تسافر
    شيل حقايبك وأمشي بينات الشعوب

  17. كوكو سؤالك مشروع لظروف المرحلة
    من اقاصي الشمال سميت بهذا الاسم لسواد بشرتي فتصالحت معه اعرّف نفسي ويعرفني الناس به .
    الشريعة ان خلت من قانون من اين لك هذا ومن التكافل ومن الشوري في الحكم ومن تعفف الحكام وزهدهم في الدنيا لن يخدمها تنفيذ الحدود .
    تطبيق الشريعة يكون ارضاء لله وليس عندا للامريكان او اخفاء فشل ما .
    100 سكران يخيطوا الشارع اخف ضررا من مسئول حرامي .
    مليارات الدولارات ستصرف لتغيير العملة ومثلها للجنسية و…و… خلاف ما سيذهب لجيوبهم باسمها .
    غائبون من مدة سيعودون دون الحوجة لندائهم في برنامج ( الو مرحبا ) صفوف البنزين والغاز والرغيف
    ولك الود

  18. الرائع جبرا والاحباب..سلام…
    يا جماعة دا ما وزير,دا طريطير ساااااكت!
    انا والله بستغرب من الصحفى البسمع الكلام دا وما يصمخو كف!

  19. الاخ جنوبى..سلام..
    قلت وكفيت,,وحسبى الله على المؤتمرجية فى كل مكان..

  20. يا بلاد النور
    يا خلاصة الخير لابد يوم باكر يبقى اخير
    الدمعة تفارق للوجدان
    ودموع الغبش الصابرة تسيل
    صبرك لو طال ما باقى كتير يابلادى
    وجعتنا البيك نبقالنا نصير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: