إستحمار

إذا فكر أى مواطن فى فى تأسيس أى عمل يدر عليه مالاً فإن أول سؤال يخطر على باله هو هل سوف يجد لهذا العمل (زبائن) ؟ !! كثير من المشاريع الذى يقوم بها المواطنون لتحسين أوضاعهم المعيشية وزياده دخولهم تبوء بالفشل نسبة لعدم وجود (زبائن) بالقدر الذى يجعل المشروع ناجحاً !
لضمان وجود زبائن (مضموووونة) فقد لجأ البعض لأمنا الحكومة والدخول معها فى (إستثمار إحتكاري) بحيث تصبح الخدمة (الفلانية) التى لا ملاذ للمواطن من طلبها محتكرة بواسطة (الشركة العلانية) .. والحكومة تشيل نصيبا .. و(أخونا المستثمر) والناس المعاهو يشيلوا نصيبهم .. والمواطن يشيل نصيبو من (الدفع) والعذاااب !!
أكيد تكونوا عاوزين ليكم مثال .. الأمثلة كتيره لكن أوضح مثال هو إحدى الشركات التى تقوم بإعطاء محاضرات فى (التوعية المرورية) للراغبين فى الحصول على (رخصة قيادة) وهى شركة تساهم فيها وزارة الداخلية بنسبة 51 % بينما الـ (49%) الباقية بتاعت (شريك أجنبي) !

الزبائن هم كل من تسول لهم أنفسهم محاولة الحصول على رخصة لقيادة أى مركبة إذ لا تتم إجراءآت إستخراج الرخصة إلا بعد إبراز شهادة من هذه (الشركة) تثبت بأنك جلست لتلقي محاضرات (نظرية ) على القيادة والمرور بعد أن دفعت رسوماً مقدارها 258 ألف جنيه (بس) !! يذهب نصفها إلى جيب (المستثمر الإحتكاري) والنص التانى (مش معروف بيمشى وين) إذ أن الإيصال الذى يتم إعطاءه لك للأسف الأسيف ليس (أورنيك 15) ولا تعلم وزارة مالية حكومة السودان (الفضل) عنه شيئاً !!

هكذا تصبح (التوعية المرورية) سلعة تباع كغيرها من السلع .. وتحتكر .. وكمان جابت ليها (مستثمر اجنبى) لم يجد فى كل أرض السودان (الفضل) أرضاً يزرعها ليرفد المواطن بمنتجات تقلل من أسعار الخضروات التى تجاوزت أسعارها أسعار (الفواكة) !!

وهكذا يرهق المواطن الذي يحاول أن يستخرج (رخصة قيادة) ويطالب بدفع ألوف من الجنيهات من أجل أن يقود ركشة أو أمجاد لإعالة أسرته وحفظها من التشتت والضياع !

نحن لا نلوم (المستثمر) بالطبع فهو قد (لعبا صاح) لكننا نلوم الجهات التى تساعد فى قيام مثل هذه (الشركات) التى ترتبط الخدمة التى تقوم بها إن (وجدت) إرتباطاً وثيقاً بحياة المواطنين ونتساءل (هل الدولة غير قادرة على إنشاء مثل هذه الأشياء وبرسوم غير إستثمارية) إن سلمنا بأهميتها؟ ولماذا تجعل الدولة (جيب المواطن) البسيط نهباً لمثل هذه الشركات !!

عزيزى القارئ : لمزيد من (حلب المواطن) وإستحماره فالعبدلله لن يندهش لقيام الشركات التاليه قريباً :

• شركة ليموزين المطار : (51%) الطيران المدني (49%) مستثمر اجنبى ، مهمة الشركة توصيل القادمين من المطار إلى أماكن (سكنهم) ، لا يتم ختم جوازك فى صالة المطار ما لم تبرز إيصال الشركة الذى يوضح دفعك لقيمة المشوار وعليه رقم العربة التى سوف تقلك !
• شركة المعامل الطبية : (51%) وزارة الصحة (49%) مستثمر أجنبى ، مهمة الشركة عمل الفحوصات الطبية المختبرية اللازمة التى تثبت خلوك من الأمراض عند السفر أو التقديم لأى جهات حكومية ولا يقبل أى تقرير مختبرى ما لم يكن مختوما بختم هذه الشركة
• شركة أورنيك 8 للطب الشرعى : (51%) وزارة الداخلية (49%) مسنثمر أجنبي ، مهمة الشركة هى تشريح الجثث بواسطة طاقمها الطبي ومشرحتها (الحديثة) وتحديد أسباب الوفاة ولا يتم تسليم أى جثه لذويها وإستخراج شهادة وفاة إلا بعد إستلام التقرير الذى عليه خاتم الشركة
• شركة لافتات العالمية : (51%) المحليات (49%) مسنثمر أجنبي ، تقوم الشركة بعقد محاضرات حول فنون الإعلان وأنواع وألوان الخطوط المستخدمة فى عمل اللافتات والأماكن الإستراتيجية لوضعها وإعطاء (الدارس) شهادة تفيد بذلك حيث لا يسمح لأى شخص أو جهه بوضع أى لافتة تخصها مل لم تتحصل على شهادة شركة لافتات العالمية .
• شركة مناسك العالمية : (51%) وزارة الحج (49%) مستثمر أجنبي ، مهمة الشركة إعطاء محاضرات فى كيفية أداء مناسك الحج وعلى كل حاج بعد إجتيازه الإمتحان النهائي إرفاق شهادة الشركة مع الجواز حتى يتمكن من أخذ التأشيرة والحج إلى (بيت الله) !!

كسرة :
الشارع كلو مليان عربات آخر موديل وكووووولها .. إستتثمار .. إستثمار .. إستثمار .. هو أتاريها (إستحمار) !!

34 تعليق

  1. بروف تحياتي
    طيب مسئول منك الخير !
    مافي طريقة لتسجيل شركة تقدم محاضرات في فن ترهل السلطة التنفيذية وأخرى في فن المخارجة من الطلاقات العنترية والنكوص عنها بأقل الخسائر (أعني ب26 الف جندي اجنبي فقط في البلد ) لان لو ما في شركة تقدم التوعية في هذا المجال ربما يعطيك يوم يا البروف العزيز تكتب مقال خاص برؤيتك لجندي سوداني بين هذه الجيوش الاجنبية المحلوف عليها طلاقات بالكوم.
    وربك يستر

  2. تحياتي لك استاذنا جبرا. الاستثمار دا أو الاستحمار اكيد بودي النار ( فإنما هي قطعة من النار فمن شاء فليأخذها أو يتركها)

  3. شركة جلادون العالمية: (51%) وزراة الداخلية (49%) مستثمر اجنبي مهمة الشركة جلد كل مواطن الصباح 10 جلدات قبل الذهاب للعمل ولا يمسح لك الكمساري بركوب البص ولابتاع الهدف بدخول المؤسسة ولابتاع المرور ان كنت تقود عربة خاصة مالم تبرز ايصال الجلد وكمان دفعت رسوم الجلد !!!! الطلبة يخصم منهم 5 جلدات لانهم طلاب ولو ما اجلدت الليلة بكرة غرامة و10 جلدات زيادة
    كسرة:
    حاجة حليمة مع جارتها: والله حاج التوم بقى يمش يتجلد في بحري جنب محل شغلو قالو هناك بارد شوية!!!!

  4. صباح الخير يا حلوين ..

    يا بروف .. إنت بطريقتك دي بتفتح عيون الناس دي و بتديها افكار جاهزه للتنفيذ.. ..

    كسره : انا لسه مصر على البيع

  5. اخي جبرا والاعزاء سلاماااااااااات
    البعيد شنو مصنع فى الصين عشان الفلايت وكده ماحظ مافى في سوق الشاشه والقصه ماقصة جنوب دى استحمار نلقاها منين دي متعوده دايما

  6. السلام عليكم ، البرف و الاخوان ، الهدف اواب دى شركات شنو ؟ عندى حقوق فى التامين الاجتماعى القى ليك الهدف شغال تش ، تديه اوراقك يقول ليك اقعد ، ياخى انا ما عاوز اقعد معاكم ، ممكن تشوف لى الورق ده ؟ شويه ياخى ، وهو يتحدث بالجوال ، اصبر ياخى نفتش ليك ، يفتش لى واحد تانى ، اوراقى كان عينى فيها لكن زاغت وين تحت الورق الكتير ، ياخى ماتشوف لى ورقى ، اسمك منو ؟ كوكو ، ياخى الاسم ده مافى ، ياخى ورقى اديتك ليه حسه ، طيب كدى اقعد لما نشوف ليك ورقك ، مده من الرمن ثم تاتى موظفه للهدفى ورق كوكو ده الجابو عندى شنو ؟ كوكو كوكو يا زول شيل ورقك ده تمشى شارع اربعه و اربعين الصباح بدرى ، الله يطولك ياروح ، اها وبعد داك ، سؤال خبيث : ناس الهدفى ده حارص و لا موظف …………عجبى

  7. سهيل ، وانا مصر على الشراء ، حدد سعرك و جيب لينا قسمة افراز ، على الشيوع ما بتجيب ليك شئ .

  8. عزيزى سهيل
    عزيزى كوكو
    انا عندى عرض بالشراء
    ممكن نخش فى حسبة بسيطة
    1882 الف كيلو متر مقسومة على 33 مليون تساوى 60متر تقريبا
    لو وقعت ال60 متر دى ناصية وفى حتة كويسة نضرب فى المتوسط كدة فى 500 جنيه بالجديد
    بتطلع 30 الف جنيه بالجديد
    يلا نجى نخصم الضرائب والذكاه وصندوق دعم الطلاب وووووووووووووووووووووووووووووووو
    اظن المتبقى يادوب يشترى ليك تذكرة سفر عشان تقطع وشك مننا
    مع تحيات اللجنة العليا للتقسيم

  9. الأستاذ جبرا بيقول: عزيزى القارئ : لمزيد من (حلب المواطن) وإستحماره فالعبدلله لن يندهش لقيام الشركات التاليه قريباً،،
    عزيزي جبرا أنت لسه حا تندهش!!!
    يا حليلك يا النايم علي حيلك، فالشركات التي ذكرتها تم أنشاؤها بنفس الطريقة التي ذكرت وهي الآن أما تعمل أو في طريقها للتصفية بعد أن أستنفدت غرضها او بعد أكتشاف أمرها بواسطة بعض المستحمرين الجحوش الذين وعوا الدرس بعد ما فات الآوان وبيقوا يقعوا في الموية لتخفيف الحمل علي وزن قصة ذلك الحمار الذكي الذي درسناه في مرحلة ما في زمن ما في وطن كان موجودا” هنا في يوم ما….
    ليموزين المطار ربما كان هو ليموزين (قوافل أو الطواف)،والتي تمت تصفيتهم من سكات او ربما تحولت لمسميات اخري عجز رادار الرصد من معرفتها لكن بجيب ليك خبرهم، والمعامل الطبية هي مستشفي …. العالمية التي تم أفتتاحها مؤخرا” بالخرطوم أو مستوصف …. بأمدرمان وده بيقولوا عليهو يمكن يكون بتاع المدام كمان يا سعادتك، والتي تم لأجلهم أيقاف العلاج بالخارج لبقية المواطنين الموسرين الذين اعتادوا علي التسوق والعلاج خارج البلاد، وشركة كوشت للبطاقة الأليكترونية بين الداخلية وبين…. القلت سعادتو عندما ترك عادتو، ولافتات دي كمان زي شركة صقر شنو كدا ماعارف الكان شعار لدولة حدادي مدادي وهي الآن موجودة وتعمل في نفس المجال، وشركات الدواء وشركات شنو وشركات شنو ….. وعيييييييك القائمة تطول،،،،
    مش قلت ليك أنت نايم علي حيلك…
    كفااااك ولا أزييييييييييييييييييييدك!

  10. موسسة الحمامات لقضاء الحاجة..51% الشؤؤن الاسلامية والاوقاف و49% (مستحمر اجنبى) مهمة الشركة بناء الحمامات العامة وتنظيفها وتوفير الماء ولا تمنح اى موافقة بدخول المساجد والجوامع فى الاوقات الخمسة ما لم تبرز ورقة مختومة بدخولك حمامات الشركة المذكورة الانفة الذكر

  11. البروف والاحباب..
    انتو قايلين حكاية المعامل دى ما حاصلة؟؟حااااااااااااصلة والله عالم بيها!
    لكن بالجد حكاية الرخصة البقت بى مليون وعليها ومدارس وكم شهر دى محيرة! والقروش دى كووولها لا فى لوحة ارشادية لا توعية مرورية لا بتاع! حسبى الله عليهم..

  12. الاخوان سهيل و ابو مازن ، الارض ناصيه تانى ناصيه انا مشترى ، اشوف شهادة بحث للبيع وتكون ارض ، ما هى مويه نيليه و لا بحريه ، اصلو ابو مازن حسبها كوار و كده ، سؤال خبيث : ياربى شهادة بحث للسودان بتطلع باسم منو ………………….عجبى

  13. الأعزاء الأحباء والبروف النايم
    سلامات
    الأخ سهيل تبيع شنو؟ هو مش لما يكون عندك حاجة تبيعها أصلاً؟
    أبوي الفاتح متذكر قصة الراجل اللقا بترول في بيتو وجو قلعوهو منو؟
    أنا غايتو عايزك تتوسط لي عند بتاعين الإعلانات يعفوني من الرسوم أصلي ناوي أصمم لي علم وأطالب بفصل حلتنا ونتقاسم السلطة، أصلو مافي ثروة نتقاس

  14. كنت عامل كشف نظر في اليوم السابق فأحضرته معي فقالوا أنه غير معتمد لأنه ليس من بتاع العيون حقهم!!!
    بالمناسبة أنت كنت فين يا أبزناجي كل السنين الفاتت؟ الشركات دي بقالها زمن وأشمعني إنت إكتشفتها النهار ده؟

  15. الأحباء الأعزاء :
    سلــــــــــــــــــــــــــــــــــــــــــــــــلام

  16. سلام ياقبيلة،،
    بالله عليكم في أستهبال وأستغفال اكثر من كدا، فقد ورد في أخبار الصباح أستقالة او أقالة (لا فرق) مدير المياه، ماهذا الذي يحدث وهل هذه الأستقالة أو الأقالة تحل هذه المشكلة التي بسببها تم هذا الأجراء، المشكلة في هذه البلاد مشكلة ترتيب الأولويات، فمشكلة المياه هي في أول سُلم الأولويات التي تحتاج للحل بتضافر كل الجهود، ولكن تأبي السياسة الا أن تأتي بأولوياتها وتترك هموم الشعب وآلامه وجراحه ليعالجها الزمن، فماذا تقولون في طريق النيل المحاذي لشارع النيل والذي يجري أنشاؤه الآن بتكلفة تقدر ب350مليون دولار، في حين أن صيانة وأنشاء المحطات النيلية التي يحتاجها المواطن في حياته اليومية والتي بتنفيذها يتم حل كل مشاكل المياه في الخرطوم نهائيا” لا تصل لنصف هذا المبلغ، ولكن ماذا تقول في هذا الذي يجري ويحدث في بلادي!!!
    أليس في هؤلاء البشر رجل رشيد؟؟؟؟

  17. فى رجل رشيد…

  18. يا اخواننا … البروف لا نايم لا حاجه .. عمكم دا مفتح و عارف الحاصل .. بس حبا يذكركم .. اصلو الذكرى تنفع المؤمنين .. و بعدين الناس المستحمرننا ديل برضك عاوزين ليهم قرصه في اضانهم مره مره عشان ما يسرحوا بالحيل

  19. د/ ياسين فى رجل شريد ، فى رجل دريش ، فى رجل درويش ، فى رجل ريش ، فى رجل ابو ريش ، فى رجل بتاع ورنيش ، سؤال خبيث : يا د/ ياسين الزول البتفتش ليه يا ود الخلا مافى ، تفتكر الدكتور مهندس العينوه ده حيحل مشكلة المويه ، المشكله كوادر وسيطه ، عمال مهره ، عمال عاديين يدوهم حقهم ، سوداتل لما حفرت الشوارع ، العمال اشتغلو زى جنود سيدنا سليمان ، لانو ادوهم حقهم ، سمعت بى البولمر الاشتروهو بى 16 مليار و ما عارفين انو صلح ولا لا………………….. عجبى

  20. الحبيب كوكو..سلام..

    طبعا انا همزت الرجل الوحيد الحاكمنا بانو رشيد! عشان اصواتهم ادوها للقوى الامين الحليم الرشيد! ويجوا يقولوا ليك اليس منكم رجل رشيد! اجى يااا الرشد!؟

  21. أوافق جاموس الخلا في ما ذهب أليه، بأن هذه الدولة باتت دولة السفهاء وأهتف معه بملء الفم اليس فيهم رجل رشيد؟؟؟ انفاق بغير حساب، وأهدار للموارد بغير رُشد، ومحاصصة ومحسوبية ودعاوي جاهلية وعنصرية نتنة!!!
    أعوذ بالله

  22. ياجماعه الخير كيف أخباركم .
    أسى الزول الاقالوة دة زنبو شنو يقطعو عيشو .
    البتجى من الله عندكم فيها راى . بحرنا دة من يوم خمسطاشر يوليو من أى سنة فى الدنيا بيبقى طين .يعنى الزول دة يعمل ليكم ليهو شنو . ربنا سبحانة وتعالى اللطيف بعبادة عملو ليكم كدى لى حكمة يعلمها هو . وبعدين إنتو ماعارفين فى الخريف فى رطوبة وسخانة وأمراض ليس لها دواء غير موية الكركجية بتاعه البحر دى ؟

  23. سلام يا شلة
    طيب طالما هي استحمار يعني ما خدين الاسم مننا طيب ما يدونا حق الاسم !!
    معظم الشركات الجديدة هي طفيلية تعيش علي عرق الاخرين يعني هسع زي الشركة الما عندها شغلة غير تحصيل فواتير الموية مننا دي ما قاسمت هيئة المياه في رزقا هسع المدير المسكين الشالوا 49% من ايراداتو ده فضل ليهو شئ يصفي لينا الموية بيهو ؟
    مرات الحضارة الزايدة ما كويسة هسع لو عندنا زير كان شربنا موية النقاع .
    إقالة ام استقالة برضو ثقافة جديدة دخلت .

  24. حاج أحمد السلاوى | رد

    الحنين . نعم ..الزول دا ما عندو ذنب فى الطين البيجى كل سنة مع الفيضانات .. لاكين عمل شنو عشان يتلافا المشكلة ويحاول يخفف معاناة الشعب الفضل ..دا جزء من واجبه المهنى كمهندس إنو يشوف حلول للمشكلة الأزلية دى .. أنا من رأيى كان يجب إقالة عدد من المهندسين العاملين معاهو لأنهم برضهم قاعدين أفندية ساكت وما شايفين شغلهم ..
    ودا يرجعنا لراينا القديم الجديد ألا وهو مسألة تطبيق وتفعيل القانون على الجميع دون إستثناء ..الكبير قبل الصغير .. نقول لمن أجاد أجسنت ويكافأ ومن تقاعس عن إداء واجبه يحاسب على ذلك …وهل يستوى الذين يعملون والذين لا يعملون ؟ الإجابة نعم … فى دولة أمازونيا العظمى .. دولة جبر الخواطر ..وعلى أعلى المستويات ..
    وخلونا النشوف آخرتا شنو .. مع موية الطين دى ..
    أخونا سبع الفلاة .. إنت يادوووووبك إقتنعت إنو الشغلة ما ماشة لقدام ؟ وهل الإستهبال والإستغفال أمر جديد وما كان موجود من أول ؟ وكل عام وأنت بخير ..

  25. سلام ياقبيلة،،
    سديقي عمدة القبيلة حاج أحمد، الحكاية مادير ليها أقتناع فالجواب يكفيك عنوانه، لكن ياصديقي كنا نظن وبعض الظن أثم أن الأمور يمكنها أن تنصلح حالها، وأن الناس ربما افاقوا لرشدهم بعد طول الغياب ولرباما أفاقوا من بعد طول ثُبات، ولكن وللأسف الأسيف يبدو أن صلاح الحال من المحال وأن هذا الأمر ربما كان رابع المستحيلات ان لم يكن أولها…
    عموما” ياصحبي علينا أن لا نقنط من رحمة ربنا، وعلينا الرجوع الي الحق والرجوع للحق فضيلة، وزي ما أنت شايف أن القيادة في وادِ والناس في وادي زي ما قال الفنان حمد الريح!!!

  26. حاج أحمد السلاوى | رد

    أخونا سبع الفلاة .. بس والله ( وما طالنى حِلفان) العنوان كان واضح بالنسبة لينا من البداية وما كان محتاج كل الوقت الطويل دا ..
    وعلى أى حال لا قنوط من رحمة الله التى وسعت كل شىء ..ولك وللفنان ودالريح كل التحايا العطرات..
    وما تقطع الجوابات …وخليك أون لاين ..

  27. جمعة مباركة
    سمعت لي خبر غريييييب
    قالوا في عجز في الميزانية زي مليار كده، ما عارفة غايتو دولار ولا ريال ولا جن أحمر
    المهم يجيبوها كيف؟
    قالوا ح ياخدوها من المغتربين
    الليلة ووووب
    كملوا ناس البلد وقبلوا برا
    خموا وصروا

  28. سُب عليهم,,خبرالسواد الجبتو يا منصور ياولدى…

  29. حاج أحمد السلاوى | رد

    البروف الفاتح ..الحاصل شنو ؟ كل يوم ندخل نتاوق ..ونرجع بخفى حنين ..
    حسن كابوس صفدوهو بدرى بدرى ..ولا شنو ؟
    على أى حال نقول ليك ولكل الأحبة صفوة الأخيار .. كبار وصغار..كل عام والجميع بألف خير ..وأعاننا الله على قيامه وصيامه وجعلنا من عتقائه إن شاء الله ..وما تنسونا من دعائكم ..

  30. وانت بالف خير يا حبيبنا السلاوى,,,
    وانا ذااااتى لما قلت امكن المشكلة فى جهازى !
    كل عام والجميع بخير وصحة ورفاهية…

  31. يامنصور انا كنت ناوى اعيد فى السودان لكن شكلك حاتطفشنا بى خبرك دا
    احسن حق الضرائب نرسلو لى اهلنا يستفيدو منو ولا شنو يا الشمباتى
    ياجماعه الخير طمنونا ممكن الجنيه يرجع زى ما سمعنا انو زمان كان اغلى من الدولار
    ولا دا حلم
    الله يصلح الحال ,,,,,,,,,,, اللهم ولى علينا خيارنا ولاتولى علينا شرارنا
    شلخه : تحياتنا للوزير الاستقال ,, برضو فهم جديد

  32. و اللـــــــــــــــــه ما عارف البداية الصحيحة تكون كيييف, و كل ما اقول أقول أحكى الجماعة يلاوزو لى فى الخيال و الدخلت فينا ماااا أظن تـنـســل. و أظن زى ما قال الجنرال البقرة و البدل معروف فى علوم اللغة الأمنية, والتجارية كما هى مؤشرات دون مكى قبل الإعتدال و فقه الضرورة خاصة فى الإنتخابات.
    أخير نختصر و نخبئ الأتر.

  33. ابو آية..سلام..
    ترسلو يشتروا بيهو موية صحة! بعدين فهم شنو فى استقالة المطرطش دا؟؟دا كان يروقوا بيهو المريسة! حسبى الله عليهم..

  34. والله الحكايه كووولها ما داخلا راسي لسبب بسيط جداً … إنت واحد ومستشار للحكومه .. ياخي تشيل وتدي في الحكومه الأفكار الزي دي ودايرها تقيف مكتوفة الإيدي ؟؟؟؟؟ يعني الواحد تاني ما يقدر يشرح جثمان وليهو ولا يسعف مصاب في حادث حركه ولا يحج أو يعمر إلا بإيصالات ماليه من شركات المساهمه الهجين دي (وطنأجنبيه) حرام عليك والله يابا حرام ..
    كسره : بالمناسبه إسمي ده قديم قبال الحكومه دي عشان ما تقول لي إنو من أسماء (ال …يـــــــزان) ..

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: