ح تحصل تاااني

عزيزى القارئ .. فى كثير من مقالاتي أصرح بأن هنالك إنعداماً في الرقابة في كل شئ .. المطاعم والكافتيريات وما تقدمه من مأكولات ومشروبات .. المخابز وما تقدمه من (رغيف)، المدارس الخاصة و العيادات الخاصة والمعامل والمختبرات ومدى مطابقتها للمواصفات والكثير من الأماكن الخدمية .. وقصة إنعدام الرقابة هذه سببها (طبعن) أن (أمنا الحكومة) ما بتحب (تطلع القروش) والرقابة عاوزة قروش .. موظفين وعربات وبنزين وخلافه مع إنو بتستخدم نفس (الحاجات دى) لمن القصة يكون فيها جبايات ورخص وضرائب !
إنعدام الرقابة على الحاجات الإتكلمنا عليها فوق دى (حاجة بسيطة) بالنسبة لإنعدام نوع آخر من الرقابة التى يؤدى إنعدامها إلى (الموت السريع) إذ حملت الأخبار مؤخراً بأن المواطن (م.ي.ف) ظل يمارس مهنة الطب داخل مستشفي عطبرة لمدة (6) سنوات قضاها في الكشف على المرضى وتشخيص حالاتهم ومن ثم كتابة الدواء لهم و(الروشتات) وكمان (إجراء العمليات) ! وإحتمال يكون قام بتدريب بعض طلاب الطب الذين يفدون إلى مستشفى عطبرة (ما تعليمي وكده) .. نعم عزيزى القارئ ظل هذا الشخص ينتحل شخصية الطبيب لست سنوات من غير أن يَكْتَشِفَ أحد حقيقة أمره.
تري كم حالة قام بها هذا الطبيب المزيف بتشخيصها وكتابة العلاج لها مسهماً فى إرسالها إلى الدار الآخرة ؟ (هو تشخيص الأطباء الصحى صحى بقى مرات غلط) ؟ وترى من المسئول عن هكذا إهمال ؟ للإجابة عزيزى القارئ عن قصة (المسئول منو دى) دعنى أقوم بنقل مقتطفات من (تصريح المسئول ذاااتو) وهو المدير العام لوزارة الصحة بنهر النيل إذ قال :
أن اعتقال الشرطة لمنتحل صفة الطبيب بمستشفى عطبرة وإدانته تحت مواد جنائية جاء على خلفية بلاغ لمدير طبي حوادث عطبرة بعد كشف أمره !
ونقول :
مدير طبى حوادث المستشفى ده كان وين الزمن ده كلو؟
يقول فى تصريحه : إن المتهم قد طرد من قبل من داخل مستشفى عطبرة لكنه عاد وتقمص شخصية الطبيب إبان إضراب الأطباء الثاني.
ونقول :
إذا كان المتهم طرد من المستشفى من قبل فإن عودته لمزاولة (العمل) مرة تانية معناها إنو (دوركم ميت) يا دكتور وإنو القصة (وكالة من غير بواب) كما يقولون !
يواصل المدير العام لوزارة الصحة بنهر النيل فى تصريحه قائلاً : مستشفى عطبرة أصدرت وقتها منشورا تحذيريا لكافة الأقسام بأن وسط الأطباء فيه من ينتحل صفة طبيب.
ونقول له : هى مستشفي عطبرة دى كووولها قدر شنو؟ عشان تصدر منشور تحذر فيهو من وجود طبيب مزيف داخلها ؟ وبعدين ياخى هو الدكتور المزيف ده (دبوس) أصلو؟ ما زول طول بعرض وممكن أى زول يعرفو ويقبضو .. بصراحة قصة منشور وتحذير دى (ما جايه) !
لم ينته عزيزى القارئ تصريح السيد المدير العام لوزارة الصحة بنهر النيل ففي نهاية هذا التصريح (الفطير) يقول السيد المدير واصفاً حادثة ضبط طبيب مزيف بمستشفى عطبرة بأنها لم تكن (الأولى) ولن تكون (الأخيرة) !!
عليكم الله شوفوا جنس الكلام ده ؟ بدلاً من أن يؤكد السيد المدير وهو المؤتمن على صحة مواطنيه فى الولاية بأن هذه حادثة لن تتكرر فها هو يعلن على رؤوس الأشهاد بأنها حصلت قبل كده وكمان ح تحصل تاني !! (الله يطمئنك ياخى) !!
كسرة :
تحذير لمواطني ولاية نهر النيل : بما إنو السيد المدير العام لوزارة الصحة بولايتكم قال ليكم (القصة ممكن تحصل تانى) فقبل أن تسمحوا للطبيب بالكشف عليكم عند مراجعتكم للمستشفي تأكدوا من أنه (غير مزور) وذلك بأن تطلبوا منه أن يريكم (بطاقته الشخصية) و (بطاقة المستشفى) … بس أوع يكونوا هم ذاااتم مزورات !

Advertisements

16 تعليق

  1. سلامات يا رائعين ..

    شكلنا كده راجعين تاااااني للقرض و الحرجل و الحلبه .. الواحد يمشي الآخره متيقن .. مش يمشي طاشي شبكه ماعارف الوداهو هناك شنو ..

  2. السلام عليكم ، البرف و الاخوان ، اذا كان حلاق او عجلاتى شغال سته سنين علاج و قطع شك شفى ناس كتار على يديه اقترح الاتى : اولن استقالة المدير الطبى بتاع المستشفى ، ثانين استقالة وزير الصحه الولائى ، ثالثن استقالة الوزير الاتحادى لانو لحد حسه ما رفد الجماعه ديل ، رابعن تكريم الدكتور المزعوم و منحه درجة الدكتوراه اسوه بى العالم الاخدت دكتوراه جربنديه و لم نر لهم بحوث ولا حتى مقالات علميه ، سؤال خبيث : ما زمان قلنا بخراتنا و محايتنا تطير عين الشيطان ، لكن زول واحد الله فتح عليهو ما فى …………… عجبى

  3. الحبيب جبرا…سلامات..
    والله عادى فعلا,,حكى لى احد الاصدقاء انه يعرف شخص كان ينتحل صفة جراح عظام بمستشفى الخرطوم لعدة سنوات ! والزول القال لى الكلام دا ذااتو طبيب وصدوق!
    وانحنا ايام الدراسة كان معانا واحد متحل صفة طالب لكن اتعرفنا عليهو بعد سمستر واحد وبعد ما سرق قروشنا ! حسبى الله عليه..
    فكلام السيد المدير عادى جدا جدا,,واديك فايدة,,انا بعرف لى واحد ما مكمل الامتياز وما ممتحن امتحان مزاولة المهنة وما عندو رخصة وماسك مدير شئون صحية بمحلية كبيرة جدا ! شنو ليكم؟
    قولوا كه…

  4. حاج أحمد السلاوى | رد

    البروف الفاتح ..
    انا عندى سؤال سغيرووووونى كدا ..الزول دا كان بيصرف راتبه من وين ؟ وكيف تم تعيينو فى وزارة الصحة ؟ مستشفى عطبرة دا ما فيهو مدير طبى أو باشتمرجى حتى ؟ولا كان متبرع وشغال مجانن من اجل ابناء مدينة الحديد والنار ..؟ منهى الفوضى ..
    غايتو لاكين جنس غايتو ؟

  5. العزيز جبرا :
    فى البدء خالص الشكر لتشريفك لى يوم زواجى شاهدا ووكيلا وابا وصديقا .
    تعرف عندى ود عمتى اسمو دكتور حوته وهو طبعا ما دكتور كان فاتح عياده فى مدنى القريبه دى خلى عطبره البعيده ديك وكان من اشهر اطباء مدنى حتى اعتزل العمل الطبى براهو كده من نفسو قبل ما زول يعزلو واظنو الان بيحضر فى الدكتوراه فى بلد بره السودان واعتقد انو ناس مستشفى مدنى مستنينو جيتو بالشهاااده الكبييييره !!!هههه
    يعنى يا بروف بقت على بتاع عطبره اسى لو عملنا حمله حنلقى الدكتور ما دكتور والمهندس ما مهندس والمحامى ما محامى وعيييك ..
    انا اقترح انو اى زول يشتغل شغله لفتره من الزمن وما يكون فى خساير يعتبروهو مختص بالانتساب ويستفيدو من تجاربو ..
    صديقى ص لمن سمع بالخبر قال لى تعرف يا افليقا الزول ده دكتور واى شيئ لكن نحنا الما ناس وبقينا ما بيفرق معانا اى شيئ او نكون ما عيانين ذاتو والحاصل بى سببو انتى حنى حنى على انا يا ستى …

  6. حاج السلاوى ، د/ ياسين هى بقت على مستشفى اتبره ، ما اهو ناس نادوس البديرهم منو ؟ الماسك قروشهم منو ؟ عساكرهم بتاتمر بامر منو ؟ و و و و و و هلمجرا ، سؤال خبيث : هل ديل عندهم خبره ولا زى بتاع اتبره ………… عجبى

  7. الأحباء الأعزاء … سلام ورمضان كريم
    بالله عليكم الله شوفوا كلام السيد المدير العام لوزارة الصحة ده ؟ .. بالله مش مسئولين آخر زمن ؟؟؟

  8. رمضان كريم،،،
    لو إتفاجأتوا بالموضوع ده معناها إنتو سودانيين تمام
    يلا نتجهز مع الحكومة عشان يفاجأنا الخريف

  9. رمضان كريم يا أحباب….. أنتو عارفين المشكله شنو؟… أحتمال الراجل ده متابع حالات معينه أها فى النص قبضوه اصحاب الحالات ديل ذكرونى قصه الحلاق التحت الشجره و ناس الكشه ساكينه و واحد زبون راسه محلوق النص صلعه شايل المرايه و جارى وراء ناس الكشه والحلاق… أها يا جماعه نبقى فى ذى ده؟؟…. هو كونو يعمل نفسه دكتور ما مشكله لكن المشكله يقعد سته سنه و زول يجيب خبره مافى عليكم الله ده يقولوا عليه شنو؟؟؟ أحتمال يكون اخصائى توليد والجماعه يشيلوا و يسمو أولادهم عليه … هو غايتو لو حريف يكون عامل نفسه بتاع أمراض نفسيه زول بجيب خبرو مافى لأنو العيانين بتاعنه ما جايبين خبر….أظرف حاجه لو كان عامل فيها قائد أضراب الأطباء الأخير…تلقاهو ماسك الميز بتاع الدكاتره و كل يوم جمعه يجيب ليهم أم فتفت…….. غايتو أنا عافى منه الكلس هى قوه قلب ساكت ياخى ده لو قعد تانى سنتين كان بقى وزير الصحه وكان يمثل السودان فى المؤتمرات العالميه ذاتو… بعدين هو بس ما يحقر الا بناس عطبره المساكين ديل ما كان يمشى الخرطوم عشان يشتغل فى المستوصفات الخاصه و يلم ليه قريشات من الناس المفلهمين ديل يعنى يعمل نفسه بتاع شد وش ولا نفاخ كضوم و حاجات تانيه تستحق النفخ……..تحياتى

  10. كوكو..سلام..
    خبرة فى حاجات معيييينة! زى هناية الما بجيب شغلها ! آيييي

  11. انا لله وانا اليه راجعون ,, اللهم اجرنا فى مصائبنا واخلف لنا خيرا منها,,,
    تخلف واستهتار ولعب بارواح الغلابه ,, لو عثرت بغله فى العراق لسئل عمر عنها ,,,
    نحن عندنا الانسان اصبح لابيساوى شئ يابن الخطاب ,, وللاسف الكفار بيعاملو الحيوانات احسن من معاملتنا للبشر …
    حقيقه نحن نواجه ازمه اخلاق وضمير ومسئوليه ومحاسبه
    سؤال : منو فى المسئولين بيمرض بيمشى مستشفى حكومى عشان يحس بالمعاناه
    شلخه : رمضان كريم وربنا يفكنا من المصايب النحنا فيها دى

  12. انت يالفاتح جبرا بقيت الفاتح كسره ولا شنو المفروض تبدا مقالك بالكسره حقتك كده بيكون تمام التمام وياهو دى السودان ياهو دى السودان
    قلت لي شنو؟؟؟؟؟؟؟؟ رقم البطاقه والله ان بقي الرقم الوطني البارننا بيهو ناس وزارة الداخليه الايكون مزور

  13. عزيزى جبرا
    الاخوة الاعزاء
    انا والله ما عارف المزعلكم شنو……..ده زول متطوع واظنوا اشطر من بقية الدكاترة المعاهو ويعنى شنو لو ما عندو شهادة
    يعنى عمل نفسو دكتور وح يحصل منو شنو اكتر من البيحصل من الدكاترة القارين وبشهاداتهم

  14. كسرة:-
    فى مريض واحد شكى من هذا الطبيب المزور؟؟؟؟؟؟؟؟؟؟

  15. ياجماعه الخير .
    أولا كيف حالكم ورمضان كريم.
    تانين أنا مع راى أخونا أبومازن . الراجل دة ماقصر معاهم شاف الدكاترة مضربين ولقى المرضى بيعانو إنتو مامزكرين نقل طارئ بتاعه رامبو (يوسف عبدالفتاح) بس دى زيها فحقو يشكروة ويعينوهو محل وزير الصحة الولائى لأنو حل للبلد مشكلة كبيرة والجاية من الله مافى زول بوقفا والكاتل الله والحايى الله

  16. ابداع في الابتكار

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: