إيصال مائي

فى مبنى (رئاسة المحليات) بالعاصمة القومية إنتهى الإجتماع الذى دعا له (المسئول الكبير) بخصوص الإستعدادات لفصل الخريف وبعد أن تناول المجتمعون من زجاجات المياه المعدنية التى تراصت على طاولة الإجتماعات جنباً إلى جنب مع (ترامس) الشاى المنعنع وصحانة (الفول المدمس) والبلح (الما خمج) وفور إنتهاء الإجتماع توجه الصحفيون وكاميرات التلفزيون نحو (المسئول) الذى كانت بعض إفاداته :
– إن شاء الله وبحول الله وقوته الخريف السنة دى ح يكون تحت السيطرة
– أحسب أن هذه السنة سوف تكون هى السنة الوحيده التى لن ياتى فيها الخريف (فجأتن)
– لقد سخرنا بفضل الله كل الآليات والإمكانات الموجوده لعملية الإستعداد لمواجهه فصل الخريف
إنتهى ذلك الإجتماع الذى تلته عدة إجتماعات تكونت فيها (غرفة طوارئ) رئيسية إنبثقت عنها عده غرف طوارئ فرعية قامت هى الأخرى بعقد عدد من الإجتماعات (الحوافز وكدة) من أجل تجنيب المواطن الغلبان ويلات السيول وكوارث الأمطار .
بينما كان حاج صديق (يرقد فى السهلة) عصر ذات اليوم واضعاً أمامه على التربيزة الحديدية (الراديو الترانسستور) يستمع إلى نشرة الساعة الخامسة مساء التى جاء فيها خبر ذلك الإجتماع حتى تلبدت السماء بالغيوم (فجأتن) وبدأ البرق العبادى فى (الوميض) ، وساد الجو شئ من الرطوبة التى تنبئ بقرب هطول المطر هنا خرجت حاجة الرضية من المطبخ وهى تحمل (كبايت الشاى) للحاج وقد تفاجأت بالجو :
– سجم أمى ..سجم أمى شوف يا حاج المطرة دى شايله كيفن النقوم ألملم (المراتب والمخدات دى) !
– (برق وصوت رعد يدوى بشده) : وووب علينا الليله من المطرة !
– يا حاجه الجرسه شنو؟ إنتى ما سمعتى هسه المسئولين فى النشرة قالو شنو؟
– قالو شنو؟ هم بلا القول عندهم شغلة!
– قالو ليكى الخريف ده إستعدو ليهو مية المية وعملو ليهو (غرف عمليات) !
– وحات أبوى يا حاج الكلام ده قاعدين نسمع فيهو لينا كم وعشرين سنة ! كدى هم اليعملو (للعيانين) غرف عمليات بعدين اليعملوها (للخريف)
– (المطر يبدأ فى الإنهمار) : كدى أدخلاكى لى جوة .. المويه تكضب الغطاس !
ما أن دخل حاج صديق إلى الغرفة تتبعه حاجه الرضية حتى إظلمت الغرفة إثر إنقطع التيار الكهربائى
– أعملى حسابك يا حاجه ما تنزلقى فى العتبه بتاعت الباب دى !
– (وهى تمسك بحلق الباب لتدخل) : يزلقم اللا نام لا أكل طعام .. أكان كهربتم دى بس قاعده على الهبشة .. شويت مطرة تقطع … شويت هبوب تقطع .. شويت شنو ما بعرفو داك تقطع !! حيرونا الله يحيرهم دنيا وآخره !
– كدى يا حاجه أمشى ولعى لينا الفانوس داك كان الواحد يقدر يشوف .. المطرة دى شدت !
وضع حاج صديق وزوجته الرضية الفانوس بينهما وجلسا داخل الغرفة قبالة الباب ليتمكنا من رؤية الحوش الذى بدأ يمتلئ بالمياه بينما كان صوت الرعد يجلجل فى السماء تصحبه ومضات البرق الذى يضئ المكان لثوان .
– إنتا يا حاج ما فتحتا المجرى وإلا شنو؟ الحوش ده مالو إتملا مويه !
– كيفن ما فتحتو .. ؟ أول أمبارح دى شلت (الطورية) وفتحتا المجارى وطلعتا نضفتا (راس البيت) وفتحتا (السباليق) كوولها !
– طيب الحوش ده مالو إتملا لمن دفق ! يكونو المسئولين ديل ما فتحو المجرى الكبير ؟
– لا فتحوهو قبل كم يوم أنا جاى من السوق شايف ليا عمال شغالين بينضفو فيهو !
– نضافت التابا يا يمة .. ياهو يشيلو فى الوسخ والأكياس ويردموهم بره وتجى الهبوب ترجعهم تانى ! فلاحت قالو رصدو 400 مليون لى كل محليه هسه ده (شغل) 400 مليون كان ما (أكل) ساكت !
إستمر هطول المطر وإستمر علو وإرتفاع المياه فى حوش حاج صديق مما جعل المياه تتدفق داخل (الأوضة) التى يحتميان داخلها حيث أخذا معظم ساعات الليل يقومان بشطف المياه من داخل الأوضة وإخراجها إلى الحوش لتعود مرة أخرى إلى (الأوضة) حتى إنكهما العمل فناما ليستيقظا على صوت شخص يخاطبهما :
– يا حاج أقيف على جنب !
– إنتو يا جماعة فرقة الإنقاذ ؟
– إنقاذ شنو يا حاج عاوز تستهبل؟
– كيفن يعنى؟
– شنو الكيفن يعنى ؟ إنتا (الدولاب) الراكبين فوقو ده (مرخص)؟
– (مشدوها فى إستغراب) : يا إبنى ده هسه وكت هظار !
– يا حاج إتكلم عدل البهظر معاك منو؟ إنتا ما عارف (مركبات السيول والأمطار) دى عملو ليها ترخيص؟
– بالله ؟ أتارى هى دى كانت (الإستعدادات) ؟
– بتقول شنو؟
– لا بقول ليكا حقو تقول ليا يا حاج سلامات السيل ده الما كتلك !
– كتلك ما كتلك يا حاج أدفع وإتخارج خلينا ننظم الحركة دى، إنتا ما شايف الناس الشايلا السيل ده !
– (فى زهج) : يعنى أديك من وين فى وكت ذى ده ؟ أجيب ليكا قروش من وين؟
– خلاس وقف (الدولاب ) بتاعك ده وأمشى قابل (الضابط) الفى (اللنش) داك ممكن يعفيك !
كسرة :
أيها المواطن .. قم بترخيص الوسيلة التى سوف تعتليها عند حدوث السيول والأمطار وذلك حتى لا (يقطعوك إيصال ) !!

19 تعليق

  1. سلامات
    ياخي إنتو القال ليكم انقذونا منو ؟؟؟؟

  2. السلام عليكم ، البرف الاخوان ، احسن من حسه نجلد العربيه بى تحت عشان تبقى برمائيه ، سؤال خبيث : ياربى الترخيص و التأمين بتاع الزلط ينفع فوق المويه …………… عجبى

  3. البروف سلامات .
    المشكله لو نزلت من الدولاب عشان ماعندك قروش ماحاينقزوك من الغرق . بيصادرو الدولاب …

  4. سلامات…
    انا غايتو بخت مدفع بازوكة فى الدلواب,,اى جيك جاك من اى عسكرى لمرقو وطااااااااااااااخ!

  5. الإخوة الأحباب
    سلام وتحيات .. يا جماعة ما شايفين إنو القمردينة دى بقت تعباااااانه .. !! وما زى زمااااان ؟ والناس بقت ما بتخش؟ السبب يكون شنو يا جماعة ؟ عاوزين الصراحة حتى لو العبدلله مقصر وده السبب قولو ليهو .. يلا أنا منتظركم !!

  6. السلام عليكم ، يا برف اوكارك كترت ، اشئ راى عام واشئ فيس بوك و تويتر و اشئ نادوسنا و اشئ قروب وهلمجرا … ركز يا برف ، وناس ختفت الاسلوب و شغاله على ودنو ، سؤال خبيث : ياربى اكان كل واحد اديناه شوال سكر ابو عشره بجو راجعين …….. عجبى

  7. مش لما الحمام بطير بسوو ليه موية السكر ، ولا ده كان زمان ؟؟؟؟؟؟؟؟؟؟

  8. لا اسكت الله فيك
    القال منو الناس ما بتخش … ناس كتار زي كدا بيجو يكشفوا بس

  9. عزيزى جبرا
    انت والله ما مقصر (يقصر الملح) بس محتاجين لمداخلاتك بعد المقال عشان تسخن البتاع وكدا:::::::

    كسرة:
    ياربى لو رخصنا وسيلة المواصلات بتاعت السيول وكدة
    ياربى ح يجو ناس الجمارك يقلعوها بحجة انها دخلت بدون جمارك

  10. اخي جبراوالاخوه الاعزاء
    انت بالمناسبه حاجه الرضيه وينه مع حاج صديق فى الدولاب ولا اتلحست ..ولاياربي بتعمل في النشه بالقمردينه التعبانه
    فى الفلوكه عشان نامن يصل حاج صديق والدولاب تكون النشاء حااااااااره ويفطر طوالى

  11. اخى ياسين انت اضرب طاااااخ وانا بزقرد ليك وزي مابقول المثل ياغرك ياجيت حازمه
    ياكوكو انت عربتك دى اوعك تمشى بيها في نص السيل خليك بالطرف عشان نحن منتظرينك توصلنا معاك والله يستر ميقولوا ليك كماااااان شايل معاك ركاب

  12. الاحبة القمردينيست القدامي و الجدد ..تحية رمضانية مباركة ..الخريف كالعادة جاء فجأتن الا خريفنا لسا ما جاء يا شمباتي…
    الكبري الجنبنا دا بنوهو قالو 5 مليون و نص و سموهو كبري الهواء لانو مافي خور تحتو يودي الموية يعني حبال بلا بقر…
    كسرة :
    بروف جبرا عظيم تحياتي …هو في حاجة زي زمان…الواحد بقا يصلي الصبح يلقا الشمش غابت…الجماعة ديل عملوا لينا وزوزان في النقرزان و انتا كمان ما مقصر يجوك بهنا يلقوك بهناك يجوك بهناك يلقوك بهنووووك زي وزة لمان يكسح باللاين..الله يرحم ايام طه حمدتو..ياخ ما تشوف لينا قصة السكر دي شنو…ما السكر حقك!!!

  13. الأحباء الأعزاء .. والله ما قصرتو لكن بس الواحد زى بيتمنى إنو يشوف كل الناس هنا مع بعض ! زى ما كان بيحصل زمااااااااااااااااااان

  14. تحياتنا بت وراق تزغردى لى د/ شمباتى ما دوبك رحتى شمار فى شمار ، و بعدين فى الركوب يا عم ؟؟؟ ماسمعتوا بى تحننوا فى الواطه تجننوا راكبين …………. عجبى

  15. الاخ جبره :
    لك التحيه والتقدير ولكل الشباب رغم انو فى عجايز بس الشباب شباب الروح
    رغم المشغوليات لكن حريصين جدا اننا نقراء المقال اليومى وزى ما قال ابراهيم فى ناس كتار بتخش تتاوق
    من غير ما تعلق ,,, وبعدين لو معاك 10 بس ومقتنعين بى فكرك احسن من يكون معاك الف من غير اقتناع وهدف
    والمهم فى الموضوع ما بس الكتابه والتعاليق المهم كيف يكون التغير ونفكر كيف ينصلح الحال ….
    نبدا من نفسنا وكل واحد يصحى ضميرو وينصح الحولينو صاح ممكن النتيجه تكون متاخره بس اكيد فى النهايه فى نتيجه …
    كسره : لن يغير الله ما بقوم حتى يغيروا ما بانفسهم

  16. العزيز جبرا سلامات :
    الضابط الفى اللنش دى قويه شديد .. يعنى الناس ديل راجين ليهم مناسبه يطقطقونا فيها وخلاس ..
    اها لو سبناها ليهم ومشينا بيعملو لينا غرامة اخلاء وطن ؟؟ظ

  17. الحبيب كوكو..سلام..
    وحم حم يا حمام شتتتا ليك سكر! الرسول فوقك تلحقنى بى شوال خالى ضارئب ودمغات وزكاة !

    بت وراق..سلام..
    هو ضرب نصاح,احيييي انا كان لميت لى فى بازوكة,امانى ما برقدهم سلطة واجيك حازمها تب..ابشرى..

  18. الحبيب نيام…سلام..
    والله دى بالغتو فوكها ! كوبرى هواء وين!؟؟ فى عووضة ولا شنو؟؟ بسووها كان حيين,,قلت لى السكر حق البروف ولا شريك معاهو افلى؟بفتى بفتى يااا عمك..آيييي…

    افلى..سلام…
    منك ولا من العليك؟؟كع..

  19. لك التحية والاحترام
    أولاً ناسف لعدم التواصل معكم والأخوة القرا وذلك نسبة لوفاة عمنا الاستاذ النور علي الحاج رحمه الله رحمة واسعة واسكنه جناته مع الصديقين والشهدا .
    لكم ولك التحية والاحترام وادام الله التواصل ورمضان كريم عليكم جميعاً

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: