خرامة لكل مواطن

• جاء في أخبار الأسبوع المنصرم أن الحكومة قد قامت بالتصديق على (منحة) للسادة نوام الشعب الفضل مقدارها 15 مليون لكل (نائم) .. تساءلت عن متى تقوم الحكومة بحل (محنة) المواطنين الذين باتوا صرعي موجة الغلاء فى أسعار السلع الضرورية ، هذه الزيادات التى باتت شبه يومية ، العبدلله يعتقد إعتقاداً جازماً بأن (نوام الشعب) يستحقون هذه المنحة المليونية بل أكثر من ذلك ، لو لم يكن لشئ فهو لذلك الفعل (الما سبقهم عليهو زول) وهو تصفيقهم الحاد ذاك وتهليلهم وتكبيرهم عند إجازتهم لزيادة أسعار السلع الضرورية ! (بختكم يلا عيدوا) !!
• شهدت أيام ما قبل رمضان مباشرة إرهاصات عن إيقاف أحد برامج المنوعات التلفزيونية تبنتها جهات لم تعلن عن نفسها )ليست بينها وزارة الثقافة والإعلام( .. ثم فوجئ المشاهدون بالإبقاء على البرنامج مع بتغيير زمن بثه الذى إعتاد عليه المشاهدين .. يعجبنى فى هذه الجهات (التأصيلية الخفية) أنها لا تشتغل بالفارغه وتوجه جل إهتمامها على المقدودة !

• قبل أشهر معدودات صرح مسئول رفيع بما معناتو (الناس ما تتكلم عن الفساد ساااكت العاوز يتكلم يجيب إثباتاتو) كما صرح مسئول رفيع آخر بما معناتو (لو ثبت فساد شخص فسوف نعدمه رمياً بالرصاص في ميدان أبوجنزير) تذكرت هذين التصريحين وأنا أطالع تقرير الزميلة التيار الموثق بالصوت والصورة والشهود العدول عن تورط (الحج والعمرة) فى محاولة رشوة الصحيفة لحجب تقرير عن فسادها !! (أها نجى أب جنزير متين؟)

• في ظل تدني لغة الخطاب الرسمي وإستخدام المسئولين لبعض العبارات من شاكلة (يلحس كوعو) و(يموصو ويشرب مويتو) و(المكشن بلا بصل) وغيرها فالعبدلله لن يستغرب ولن يتعجب ولن يندهش إذا إستمع لأحد المسئولين وهو يقول (كل زول يقعد في علبو لمن يجى طلبو .. يعنى شن جد على المخدة كيس الدبلان وللا روسية السيتان … هيييييييى يكا !)
• لا أدري ما هى البنود الموجودة فى إقرارات الذمة والتى على المسئول الإقرار بها ولكن أقترح أن تتضمن وزن المسئول عند إعتلائه للمنصب ودرجة (عكورة) بشرته وعدد ما طاب له من النساء اللائى فى عصمته ساعتئذ، كما أقترح أن يكون هنالك إقرار ذمة (أكاديمي) منعاً لحصول المسئول علي الدكتوراة وتفرغه لها خصماً علي أداء مسئوليات موقعه الجسام (كما فعل الكثيرون) !

• سألنى طفلي الصغير : يا بابا نحنا دولة صناعية وللا زراعية وللا بتروليه ؟ رجاءأ يا جماعة الخير لو في حد منكم يقدر يجابو فليسعفنى بإرسال رسالة نصية بالإجابة ويطلعني من الورطة دى !

• ما أن تهطل الأمطار وتمتلئ الانفاق والمواقف والكباري بالمياه حتى أرفع يدي نحو السماء داعياً على شركات (الآيسكريم) التى قامت بتشييدها !

• قال لي صديقي : أيهما أخطر على المجتمع أن ترتدى فتاة بنطالاً محذقاً أم أن ينهب مسئول مليارات الجنيهات؟ أجبته الأخطر إرتداء الفتاة للبنطال المحذق (ثم قلت مردفاً) .. أتود يا هذا أن تشيع الفاحشة ؟

• بعد أن أصبح المواطنون من أصحاب الدخل المهدود في (لخمة) بعد الإرتفاع المفاجئ فى أسعار (اللحمة) توقعت أن يظهر (ذلك الوزير)على أحد الوسائط الإعلامية منبهاً أياهم لخطورة أكل اللحوم وإحتوائها على الكلسترول وتسبيبها لأمراض القلب والشرايين والجلطات بأنواعها !

• فى مسرحية (مدرسة المشاغبين) يقول (بهجت الأباصيرى) مستنكراً سؤال معلمته له : (بعد سبعطاشر سنة ثانوية عامة بتسألنى تقولي ما هو المنطق؟) .. تذكرت هذا المقطع من المسرحية وأنا استمع إلى أحد الشيوخ الأجلاء وهو يتسائل فى خطبة له : (هل بقى لهذه الحكومة عذر لعدم تطبيق الشريعة؟) !! بااالغتا يا شيخنا ده كلام تقولو بعد 23 سنة ثانوية عامة !!

• الأحزمة التى يربط بها الشعب الفضل على بطنه قد أصبحت واسعه بعد أن وصلت إلى (الخرم الأخير) نرجو من أمنا الحكومة إستيراد (خرامات) وصرف خرامة لكل مواطن للتمكن من تضييق الحزام كل شويتين !

كسرة :
الشعب يريد تغيير الحزام !!

Advertisements

21 تعليق

  1. السلام عليكم ، بالجد يا برف ديل لا شغالين بالفارغه و لا المقدوده ، ديل شغالين بى الفايق ……. امو و الفاضى يعمل قاضى ولا حتى دكتور زى معاويه ( عفيت منو ) البرنامج ما فيهو اى مشكله بل بيتكلم عن اغانى الحقيبه و ما بعدها ، عموما اذا كان البرنامج منع الناس من التراويح ، فهى سنه اداها الرسول صلى الله عليه وسلم منفردا ، لكن نقل البرنامج الى نص الليل عشان الناس ما تقوم صلاة الفجر فده هوالحرام ولو افتانا من افتانا ، سوال خبيث : المسعولين كلهم بيصلوا الفجر فى جماعه و لا الشيخ براه ؟؟؟؟؟؟؟؟؟؟؟؟؟؟ عجبى

  2. حقا” يا أستاذ جبرا انها لدولة السفهاء الذين يفسدون في الأرض وهم يقولون بأنهم المصلحون ، بالله عليكم أجمعين تأملوا معي هذه الايات الكريمة بتؤدة وتمعن وطول بصيرة وأستنجوا منها حالنا الآن مع هؤلاء السفهاء: (وَمِنَ النَّاسِ مَن يَقُولُ آمَنَّا بِاللَّهِ وَبِالْيَوْمِ الآخِرِ وَمَا هُم بِمُؤْمِنِينَ (8) يُخَادِعُونَ اللَّهَ وَالَّذِينَ آمَنُوا وَمَا يَخْدَعُونَ إِلاَّ أَنفُسَهُم وَمَا يَشْعُرُونَ (9) فِي قُلُوبِهِم مَّرَضٌ فَزَادَهُمُ اللَّهُ مَرَضاً وَلَهُم عَذَابٌ أَلِيمٌ بِمَا كَانُوا يَكْذِبُونَ (10) وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ (11) أَلا إِنَّهُمْ هُمُ الْمُفْسِدُونَ وَلَكِن لاَّ يَشْعُرُونَ (12) وَإِذَا قِيلَ لَهُمْ آمِنُواْ كَمَا آمَنَ النَّاسُ قَالُواْ أَنُؤْمِنُ كَمَا آمَنَ السُّفَهَاء أَلا إِنَّهُمْ هُمُ السُّفَهَاء وَلَكِن لاَّ يَعْلَمُونَ (13)) الآيات 8- 13 من سورة البقرة، ألا تنطبق عليهم تماما” ايها الشعب الفضل؟؟

  3. العزيز : جبرا
    بخصوص (نوام الشعب) اتذكر مقال سابق لك بعنوان باااااااالغتو
    والله ما بالغو ولا حاجة وال15 مليون دى نتيجة المبالغة (تقولى بااالغتوا)

  4. سلامات ..

    يا بروف الحزام كلو اتخرم لمن وصلنا الإبره … اها تاني كيف ؟؟؟ وااله بعد كدا إلا نخرم الاوزون

    كسره : كان اتحرفنتوا ممكن تعملو بين كل خرم و خرم … خرم جديد .. لمن تعملو هناي ذاتو

  5. سلام للجميع
    دى كلها صور مقلوبه او ممكن تكون الصور صحيحه ونحن المقلوبين
    العادة عند قرات مقالاتك يا بروف اشعر بالغثيان للحال الذى نحن فيه ,,, الغريبه اليوم وانا بقراء واضحك
    شر البليه ما يضحك
    يا جماعه الخير كتروا الدعوات رمضان موسم استجابه لعل الله يفرج امورنا
    ويكشف همومنا وييسر امورنا

  6. الأحباء الأعزاء … متابع .. بصراحة والله الواحد بقى ما عارف يقول شنو؟ لكن غليكم الله النوام ديل ما بالغو؟ 15 مليون والناس حالا يغنى عن سؤالا ؟

  7. حاج أحمد السلاوى | رد

    البروف الفاتح ..
    والله ياجماعة الخير انتو ناس حاسدين جنس حسادة .. دا رزق ساقه الله إليهم من حيث لا يعلمون ..النوام ديل بيمشوا يصلوا التراويح كل يوم ويدعو ربنا الرزق الوفير ..والله استجاب ليهم وانطبقت عليهم كلمات الأغنية الشهيرة ( الأغنية قديمة بيعرفوها الكواشف بس.. ناس ابكرونا وعزت ونيام والبشاوى ..وما جاورهم من العظم ) وكلماتها بتقول بعد التعديل : النّوام شحد الله ..والله أده ..
    غايتو لاكين .. جنس حسادة ..

  8. اخي جبرا والاخوه الاعزاء
    عندما كنت حديثت التعين فى احدى الموسسات الحكوميه كنت اسمع بعض الزملاء يردد مقوله (تشتغل كتير تغلط كتير ماااااتترقى—ما تشتغل كتير ماتغلط كتير تترقا )وبعد اربعتاشر سنه عرفت الحقيقه متاخره وكمان معاها مثل جديد(تنوم تشخر وتصى تصفق يقمتولك الملايين تصحى تفندر يرشوك بالطين)
    كسره
    سوال خبيث بعد اذن اخونا كوكو اها الملايين دى ياربى بالعمله الجديده ولا القديمه

  9. ياابو ناجي دولتنا دى برمائيه

  10. هل تعلم انو نحن 100 الرئيس كما يقال لحدي هسع ماادونا ليها قال شنو الميزانيه مابتسمح دى كلام شنو دى يابنات امى الميزانيه دى واحده فى دولة السجم والرماد دي ولا ميزانيتين ميزانيه تتحمل الملايين ولاتتحمل المئات
    كسره
    انت ياجبره الكبير منو ال 100 جنيه ولا 15000 جنيه كدى ازعفنى اصلو الحساب اتلخبط على

  11. نستاهل …. نستاهل …. نستاهل
    كان هناك شعب عربي يعبد رئيسه عبادة ويعتبره قد حقق له حلم الأجيال وهو الوحدة كما حقق التنمية …. ولكن عندما زاد رئيسهم عن حده …. سودوا وجهه كما رأينا في التلفزيون
    ونحن تحقق لدينا ما خافت منه الأجيال من تفتت واصبحنا ذيل العالم في التعليم والصحة والثقافة والأخلاق …. وعندما نرى من فعل بنا ذلك نهلل ونكبر ونهتز…
    بالمناسبة أحد أصدقائي دكتور من أساتذة اللغة العربية القدامى أطال الله عمره قال لي أن أول من لحن من السياسيين السودانيين هو الصادق المهدي وكان حينها معذورا لصغر سنه …. أي أن بقية السياسيين لم يلحنوا ناهيك عن أن يتلفظوا بألفاظ من قبيل الكوع والكديس والكشنة والبصل ….. كم تردينا

  12. العزيز جبرا :
    وانا من هذا المنبر اقترح ان يتم استبدال الحزام بقفيص حديد بتاع ربط الطاسات فى اللساتك ويصرفو لى كل مواطن مفك نجمة عشان يقرض بى طريقتو ….
    المشكله انو ال15 ارنب دى لكل ارنب بتدى اشارات سالبه للدوره البرلمانيه الجديده انو كلما تصفق وتهلل الحسبه بتكبر يعنى صفقه واحده بى خمستاشر طيب لو سكسكو بيدوهم كم ؟؟؟

  13. رمي المهدي ظبيا فصاده ورمي (فلان) كلبا فصاده فهنيئا لهما كل إمرئ يأكل زاده

  14. انا (لسانى) بمسكو على!
    الشغلة جابت ليها قطيع روسين وبالسيف كمان ! يا شيوعيين يا معارضين…

  15. والله يا أفلي طلعت خطير, قفيص عديييييييييييل كدة ومفك نجمة

  16. يعنى يا أفلايقا القصة ح تجيب ليها إستيراد مفكات نجمة وقفايس .. !!

  17. يل بت وراق لخبطة (الحساب) هينه … كعب لخبطة (الدين) !

  18. عليك الله ياجبرة أنت ما صائم – اللغو كتير وكمان تقطعوا في المؤمنين ديل – كلما تقطعوا فيهم ربنا يديهم بس انتوا حاسدين قوي علشان ما لاقين اللاقينوا – بالله عليك كدي راجع كل القوانين التي اصدرها واجازها المجلس الوطني والشغل القاموا بيه دا ما بستحقوا – يا ناس خليكم في حالكم وخولهم في حالهم الله موجود وعرف اعمالهم- ناس ما شغاله عايزه كمان تقول دا بيستحق ودا ما بيستحق .يا أخوانا البلد زي ما قال الطيب مصطفي حقتهم الدايرين يعملوا فيها سوف يعملوا والما عاجبوا ميرق علي السهله ديك علشان نوريهو العجب

  19. سلام ياقبيلة،،
    هسي يامنور أنت داير تقول لينا شنو علشان نعرف نرسي لينا علي بر؟؟
    أنت معاهم ولا مع التانين؟؟؟

  20. يا الشيخ منور ولدك على !

  21. لك التحية
    والاخترام ( علي وزن خرم ) اهو انت ماشا الله استلمت خرمك حار حار وشوف ليك حزام ختو فيهو. .
    بعدين ماشاالله عجبتني في رسالتك الجميلة (ساعتئذ ) جبتها من وين انت فرغووووك و حضرت ولا شنو ؟ ( ده انجليزي يامرسي ولا شنو )؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: