حذاء الدفع المقدم

فى المقعد الخلفى لعربته البرادو (كاملة التظليل) كان السيد عبدالمنتقم رئيس المجلس الأعلى لشئون الجبايات يمسك بإحدى الصحف .. يقرأ فيها قليلاً ويرفع رأسة لينظر عبر النافذة المظللة بينمال كانت حركة السير شبه متوقفة جراء الزحمة في ذلك الشارع المفضى إلى السوق الكبير ، قال السائق وهو يلتفت إلى الكرسي الخلفى مخاطباً عبدالمنتقم :
– والله سعادتك العاصمة بقت زحمة بصورة ما عادية !
– الناس دى بتتحاوم كتير كده مالا ؟ ما عاملين مفلسين وما عندهم قروش
– والله يا سعادتك لو شفتا لينا حاجة قللت لينا الزحمة دى تكون ما قصرتا
– لا لا .. لازم نبتكر لينا حاجه تخلى الناس دى تبطل اللف والحوامة وكمان نلقى لينا منها قرشين حلوين
فى اليوم التالي كان عبدالمنتقم قد وضع التصور العام لمشروع (حذاء الدفع المقدم) وقام بعقد إجتماع موسع مع أركان حربه ورؤساء المحليات المختلفة لشرح المشروع :
أظنكم يا جماعة لاحظتو للزحمة الفي الشوارع دى .. الأعمى شايل المكسر .. أنا شخصياً كنتا بفتكر إنو المواطنين ديل الجبايات العملناها ليهم نضفت جيوبهم وقعدوا على الحديدة لكن الظاهر لسه فيهة (رقشة) تخليهم يتحاوموا ويعملو لينا فى الزحمة دى ، عشان كده أنحنا قررنا ننفذ مشروع حذاء الدفع المقدم وهو حذاء (ذكى) وفيهو عداد بيحسب كل المسافات البيقطعا الزول .. ده المشروع بإختصار وممكن معالمو تتضح بعد ما تطرحوا أسئلتكم :
س: والأحذية دى نجيبا يا سعادتك للمواطنين من وين؟
ج : من (ماليزيا) طبعاً وح نوفر كل المقاسات وكمان ح نجيب واحدات مخصصة لى ناس السكرى ذاااتم
س : ح تدوها ليهم مجانن ؟
ج : ده سؤال تسألو؟ هو نحنا أديناهم شنو مجانا قبل كده ؟ ح نبيعا ليهم (طبعن) وبعد داك (كالعادة) نقوم نأجرا ليهم إيجار شهري !
س: لكن يا سعادتك المشروع ده ح يستهدف الفئات الضعيفة البتمشى كدارى .. طيب وين ناس العربات ؟
ج : ناس العربات ديل ح نزيد ليهم التسعيرة .. يعنى لو المتر بتاع الزول البمشى كدارى بى عشرة قروش أى زول عندو عربية مسجلة بي إسمو فى المرور ح نبيع ليهو المتر بى خمسين قرش ! (عشان نجيب منو الفرق) وكمان ح نفرض ضريبة على وسائل النقل عشان ما أى بتاع باص وللا حافلة يقوم تانى يشيل المواطنين من الباب للباب ويضيع علينا (قروشنا) ساااكت !
س: طيب يا سعادتك الزول الما بيشترى الحذاء ده أو قبضتوهو ما لابسو .. يعنى ماشى سااااكت
ج : بعد إجازة (نوام الشعب) لمشروع قانون (حذاء الدفع المقدم) ح نقوم بتفعيل مواد القانون وح ننشئ (نيابة حذاء الدفع المقدم) وكمان (مباحث حذاء الدفعه المقدم) وأى زول يقبضوهو ما لابس (الحذاء) يا الغرامة يا السجن ! وعشان الناس ما تعمل فيها (تفتيحة) وتقوم بالليل ما تلبسو نحنا عاملين للحذاء ده (لمبات) عندها ضوء معين .. يعنى أى زول ماشى بالليل وكرعينو ما بطلعو (ضوء) ح ينقبض على طول !
س: طيب كان زول مشى بالحذاء ده وما عندو رصيد .. ح تعرفوهو كيف؟
ج : ده سؤال جميل .. إنتو قايلين نحنا فى حاجه بتفوت علينا .. أول ما الزول رصيدو يكمل (الحذاء) ده ختتو في الواطة يعمل صفافير تخلي أى بتاع (مباحث أحذية دفع مقدم) يقبضو طواااالى !
لم تمض ايام حتى تمت إجازة المشروع وبدأ العمل به وبدأت نقاط البيع فى طرح (الأحذية للمواطنين) على أن يتم التطبيق الفعلي بعد مهلة مقدارها إسبوعين يقع بعدها كل مخالف تحت طائلة القانون ، بعد إكتمال المهلة خلت الشوارع بالفعل من إلا من بعض المارة إذ لزم معظم المواطنين منازلهم بعد أن إنتظمت الأسواق وأماكن التجمعات (كشات جمرة الحذاء) ، كما أضحى من العادى أن يستوقفك شرطي المرور طالبا منك فحص(الحذاء) والـتاكد من (رصيده) قبل أن يطالبك برخصة قيادتك !
نشط أفراد (مباحث حذاء الدفع المقدم) بعد إعطائهم نسبة مئوية من المخالفات وصاروا يعملون فى جد ومثابرة ومتابعة تجعل من المستحيل على أى مواطن الإفلات منهم .
بينما كان السيد عبدالمنتقم رئيس المجلس الأعلى لشئون الجبايات يجلس فى المقعد الخلفي يمسك بإحدى الصحف .. يقرأ فيها قليلاً ويرفع رأسة لينظر عبر النافذة المظللة لحركة السير شبه المتوقفة جراء الزحمة في ذلك الشارع المفضى إلى السوق الكبير ، قال السائق وهو يلتفت إلى الكرسي الخلفى مخاطباً عبدالمنتقم :
– يا سعادتك .. معقولة ؟ الزحمة ياها ذااااتا مع إنو طبقتو مشروع (حذاء الدفع المقدم) !
وضع عبدالمنتقم الصحيفة جانبا ونظر عبر النافذة المظللة .. وصاح في عصبية .. أهو دى الما عملنا ليها حساب .. أهو دي الما عملنا ليها حساب .. كان بعض المواطنين يحملون بعضهم بعضا بينما البعض الآخر تكوم داخل (الدرداقات).. بينما كان آخرون .. ينطون (بكراع واحدة) !!

كسرة :
ايها المواطن أيتها المواطنة قبل الخروج من المنزل تأكد بأن رصيد (حذائك) يكفى للمشوار جيئة وذهابا حتى لا تقع تحت طائلة القانون الذى أجيز بعد تصفيق حاد من (نوام الشعب) !

22 تعليق

  1. سلام ياقبيلة،،،
    دي ياأستاذ جبرا قووووية شدييييد، وأظن حسن كابوس موجود برضو في رمضان!!!
    اقوي منها كلامك عن النسبة المئوية التي تدفع لمن يقوم بتحصيل المطلوب، دي ماسبقك عليه زول، ماسبقك عليها زووووووول ..

  2. بالنسبة لنوام الشعب اكيد ح يملكوهم احذية بالتقسيط المريــــــــــــــــــــــــــح اضافة الي ذلك ح يطلعو ليهم بي بدل مشي بعادل ميزانية بحالها ( علي اساس انهم بحومو كتير وهم يتفقدون الشعب الفضل ) ..
    كسرة :
    نوام الشعب ديل ياربي بقرو الكلام دا ؟؟؟؟؟

  3. الحبيب ودالخلا
    ياخى والله مشتاقين .. الظاهر ح نتلاقى في إفطار القمردينة !!

  4. البروف والسمار سلامات .
    الحزاء دة مافيهو طريقة نوقف بيها الكاونتر البيحسب الخطوات يعنى نعمل ليهو جبادة .
    بس نعمل حسابنا لمن البلد تكون فيها كركبة نعبى الحزاء بالرصيد لأنو الجرى نص الجدعنة .
    وتانى جودية مامعانا .

  5. حاج أحمد السلاوى | رد

    الأخ جبرا .. قررنا نعينك مدير إدارة الأفكار الجهنمية فى تحصيل الجبايات المنسية..
    ياخ لاكين ما معقول .. تقعد تفتح ليهم أضنينهم بالحاجات دى ..والشعب الفضل قال الروب ..
    روق المنقة شوية يا بروف .. الدنيا قبايل عيد .. يعنى حسه الناس يمشوا يشتروا جزم العيد ولا جزم الدفع المقدم ؟

    هبشة سغيرووووونة .. إفطار القمردينة متين ؟

  6. سلامات ..

    إنتو يا اخواننا الربيع العربي البقولو عليهو دا .. حالف طلاق ما يجينا هنا و الا كيف ..
    اللهم إني صائم

  7. السلام عليكم ، البرف و الاخوان ، الربيع العربى ياتو يا سهيل ؟ مصر و تونس و لا ليبيا و اليمن و سوريا ؟ كلهم بقو زى العراق ، اخير لينا نقعد فى الواطه و نسترد القروش المنكوبه و نفتح عينا على الحاضر ، و المستقبل فى الزراعه كان المتعافى رضى و لا ابى ، سؤال خبيث : باقى ليكم حنقدر نسترد جزء من الاموال دى ؟ …………. عجبى

  8. يا كوكو معقوله بس البروف بقول ليك عبد المنتقم شغال تقوم تقول نرجع القروش منهوبه
    وللاي جلد كديس ما بتلقا
    يعني يا تحتسبها يا كمان تقوم
    تلحس كوعك

  9. الله يهديك يابروف

    طالما الافكار دى معاك ما تنفس لينا الحاصل / يعنى هم يكربوها بى عادى و انت تزيدا موية / رمضان كريم
    ما جاية بطاقة المواصلات و عداد المقدم فى الطين / و نحنا عاد يزورنا الخضر/

  10. السلام للبروف والسمار الكرام …. إنشاء الله من عتقاء شهر الصيام
    والله يا بروف عبدالمنتقم لسه فيهو روح … بس أنا كنت متوقع “قناع الدفع المقدم” الذي يحميك من الجراثيم وملوثات الهواء ويأتيك بالنسيم العليل الذي تنتجه حكومة السودان الظليل… وبالطبع يحسب أنفاسك واستهلاكك من هذا الهواء ، لأنو بعد (لمستقرن لها) و ( قدرناه منازل) ما فضلت إلا دي… بالمناسبة ناس الكارو وناس الحمير وعربنا بتوع الخلا والإبل حيدوهم ( حافر وخف الدفع المقدم وللا شنو؟)والله لو عملوا الحذاء ده من بدري ولبسوه للناس اليجو السوءدان من غرب أفريقيا من يوم يطلعوا من بلادهم كانوا لموا كترت قروش….
    وبالنسبة للربيع العربي …. هو نحنا عندنا ربيع طبيعي أو حتى شتا في السنة كلها عشان يجينا ربيع عربي أو غربي؟

  11. سلام يا احباب…
    سهيل..والربيع اهو فات وانتى ما جيتى! سودانى ممكوووون بخاطب الثورات العربية !

  12. شنو التشاؤم دا يا اخواننا – عفيت منك يا الخليتنا نلحس كوعنا و مابس .. هو نحن الما لحسناهو شنو ؟؟؟ اللهم إني صائم

  13. اخي جبرا والاخوه الاعزاء
    والله دى الليله خميرته فورييييه الله يجازى محنك يالفاتح جبرا خليتنىاضحك نامن ريقى نشف هس اكمل يومى دى كيف
    انت عارف نوام الشعب ديل (ما بقوموا من نومون دهشانين يوافقه ويصوته وهم ماعارفين الموضوع شنو ويرجعوا ينوموا تاني وعلى راي المثل (قام من نوموا ولقى كومه ) اه بالله عليك كل ماناموا وصحوا لقوا خمستاشرايه يقمتوها ليهم البخليهم ما يصوتوا لحزاء الدفع المقدم شنو انا خايفه يوم يقومه يصوتوا على قانون اعدام الشعب الفضل شنقا لانو خلاص كملو اى شئ ممكن يخلينا على قيد الحياه ومازلنا موجودين

  14. كان كده الناس كلها تقلب سواقة عجلات

  15. سخيل
    إت قع تلحس شنوآآآلمسنوح

  16. هههههههههههههههههههه,طارق ضارب من الهناية!

  17. حرام عليك يا استاذ امنا الحكومه مستحيل تفكر بالشكل دا

  18. والله مقال ظرييييييييييييف ومضحك ومخيف
    الناس بقت تخاف من اي افكار جديد
    احسن يطبقوها علينا

  19. الحاجه ام الاختراع
    المشى على الايادى ,,, لا حذاء لاغيرو على الاقل تشوف الصور المقلوبه دى معدووووووووله
    كسرة :انت يا ياسين طارق دا ما صايم
    يلا نمش السوق يلا نمش السوق (من مقال قديم )

  20. ابو آية…
    لع,,طارق من الذين لا يطيقونه ابدا !

  21. الجماعة ديل اتوقع منهم اي حاجة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: