الترزي

الحياة بقت صعبة .. كان لابد من وضع أولويات .. العلاج أولاً (عشان الزول مل يلحق أمات طه) ، الغذاء ثانياً (عشان الزول يوفر حق العلاج) ، التعليم (عشان الأولاد ما يصيعوا) ثم فى آخر القائمة ( اللبس) وما أدراك ما اللبس فمع قسوة الحياة وكثرة المصروف مع ثبات الدخل تبدلت أحوال المواطن السودانى فبدلاً من ذلك الزول النضيف القيافة أصبح آخر بشتنه وبهدلة .
وكيف لا (يتبشتن) و(يتبهدل) إذا كان الزى الوطنى متوسط الخامة (سروال وعراقى بلدى وجلابية وعمة وطاقية) تمنهم يقارب من التلتمية أربعمية ألف !! ده غير (المركوب) !!
فى زيارتى الأخيرة للأمارات العربية كانت معظم الهدايا التى منحنى أياها أصدقائي هناك (مشكورين) عبارة عن (أقمشة جلاليب) وقد سعدت بها كثيراً لسببين السبب الأول أنها ذات نوعية عالية الجودة بينما الأقمشة الموجوده بأسواقنا (تعبانة) بل رديئة والسبب الثانى أنها مع رداءتها غالية الثمن وأسعارها ليست في متناول اليد (هو شنو البقى فى متناول اليد؟)
لأن معظم المهن أصبحت غير مضمونة (وممكن سواق ركشة يبقى دكتور) فقد تركت أمر تفصيل هذه الجلاليب حتى أطمئن للترزى الذى سوف أسلمهم له (يقوم يطلع نقاش) ويبوظهم، ومن فرط تركى لهم طيله هذه الفترة قد كدت أنساهم لولا أن المدام كلما مرت بالكيس الذى يحتويهم كانت تقول لي (إنتا الجلاليب دى خاتيهم لشنو؟ ما توديهم الترزى)
قبل أسابيع سألت صديقى (لطفى) إن كان يعرف ترزياً شاطراً أجابنى بأنه سوف يستفسر ويجيبنى ، أول أمس كنا معاً فى أحد بيوت العزاء قام (لطفي) بالسلام على أحد الأشخاص الذى كان يرتدى (جلابية وعمة وشال) فى غاية الأناقة ثم همس فى أذنى
– ده أشطر ترزى فى السودان
– أجبته : ما هو واااضح
تركنى (لطفى) وذهب لأمر ما فوجدتها فرصة لأتجاذب أطراف الحديث مع أخونا (الترزى)
– كيف عاملين مع العيد والشغل ؟
– والله زحمة شديدة خلاص
هنا يرن هاتفه .. فييجيب :
– كل شئ تمام يا سعادتك .. لا لا ح أفصلو ليك زى ما عاوز وح يطلع مظبوط مية المية وبالمواصفات الإنتو طلبتوها !
بعد أن إنتهى من محادثته قال لي متأسفاً :
– معليش ده رئيس المجلس التشريعي
– هنا قلت لنفسى لا كده خلاص وكت الزول ده بيفصل لرئيس المجلس التشريعى أكيد ح يكون بيفصل لرئيس المجلس الوطنى ذاتو وإحتمال يكون بيفصل لى ناس مهمين تانين فإنتهزتها فرصة وخاطبته قائلاً :
– المحل بتاعك وين يا أستاذ لو الواحد عاوز يسجل ليك زيارة ؟ (بالمناسبة كلمة أستاذ ممكن تقولا لأى فنان واعد) !
أجابنى وهو يرتشف من فنجان القهوة الذى أمامه وهو يضع رجلاً على رجل :
– والله أنا بكون فى المجلس التشريعى طوااالى لكن عندى شغل خاص فى عمارة المحامين
قلت فى نفسى .. والله معلم (تفتيحة) شغال على المضمون يعنى بس لو فصل لي ناس المجلس ديل والمحامين المعاهو فى العمارة بس كفاية عليهو !
أخرجنى من تفكيرى (لطفى) وهو يعاود الجلوس مرة أخرى ويخاطبني فى همس :
– إن شاء الله إتعرفتا على الأستاذ؟
– أيوه وبكرة ح أودى ليهو الجلاليب
– (متعجباً) : جلاليب شنو إنتا جنيت؟
– (مندهشاً) : ليه؟ هو ما ترزى؟
– هو ترزى فعلاً .. وترزى ختير لكنو ما ترزى قماش !
– ترزى شنو يعنى؟
– ترزى قوانين !
كسرة :
قالت لي زوجتى .. أها إن شاء الله لقيت ليك ترزى شاطر تودى ليهو الجلاليب
فاجبتها :
– مش قربت أديهم لى ترزى (دساتير) !

17 تعليق

  1. برنجيييييييييييييييييييييييييييييية…

  2. شديدة ياسثا د

    د

  3. البروف .والسمار .
    كيف أنكم ؟
    يعنى صاحبك طلع عبدالمنتقم .
    إما يكون دة البتبخ الميزانية عشان تلفق أو الزول البيضحك على الجماعه لمن يلقاهم بيعانو من ويلات ما حبكة لهم من أحكام وجبايات حتى يرضى عنه مولاه

  4. البروف والاحباب..
    الخلاصة..لقيتوا ترزى شاطر ولا لسه!؟؟ امممممممممم

  5. حاج أحمد السلاوى | رد

    الفاتح .. بس لحد حسه ما عرفنا الترزى دا .. ترزى عربى يعنى بتاع حلجلاليب وعراريق وسراويل ..ولا افرنجى بتاع بِدل قمصان وكدا ؟ .. ولا يمكن بتاع كلو ..زى المنشار طالع ياكل .. نازل ياكل .

  6. تحياتي
    يظهر انو العيد السنة دي ح يجينا ( فجاتن ) علي قولك وانت يابختك وماشاالله يعني كل شويتين تلاتة في الامارات انت يازول شغلوك امير ولا شنو ؟؟؟؟
    قلت ليا أقمشة جلاليب ما (قماش جلابية ) .
    أصحابك ديل ماعارفين انو تفصيل الجلابية بقي ب خمسين جنيه يقوموا يورط ك الورطة دي ( أقمشة قال ) .
    علي فكرة أنا عندي صاحبي في الكلاكلة اسمو طيفور خياط ماهر اصلو كان حلاق بس ما شا الله استفاد من المقص وبقي ترزي فنان . أحجز من هسع لانو عيد الضحية قرب قبال مايجي ( فجاتن ) . ولا انت قلت ناس مجلس وكدة مابتاع ناس الكلاكلة …. 

  7. البروف : يعنى الواحد ممكن يجى يخمش منك قماشين تلاته لعيد ههههههه
    تعرف يا بروف فى ناس تخصهم سمكره ونجر وتفصيل قوانين لاى شيئ يعنى الناس لمن تتنزنق بتمشى تشوف واحد من ديل يفصل ليها اى شيئ وماشاء الله فى بلدنا الترزية الزى ديل عندهم اسماء كبيره مثلا المجلس الطبى الممكن يفصل ليك قانون يحمى الطبيب الغلطان لانو المريض مشى ليهو بكرعينو – ومجلس الافتاء الغير اثبات رمضان ممكن يكفر عرمان ويبرئ فلتكان ويجيز مسابقة رمضان – والمجلس الوطنى الممكن يصفق عشان خمستاشر وكمان قالو فى منحة رمضان !!!

  8. السلام عليكم ، البرف ، الاخوان ، اغفر لنا ربنا ما قدمنا و ما اخرنا و ما اسررنا و ما اعلنا و ما اسرفنا و ما انت اعلم به منا ، حاج السلاوى بقولو عليه ترزى بلدى ، اول مره نسمع بى ترزى عربى ، بعدين يا برف ما تخليك حريف ، فى واحد بيخيط الايام دى جلاليب ، ما ياهو البوظ القماش عديل كده ، تقوم تعيد بى اى جلابيه مع الغسيل بى المبيض و بعد العيد كلهم زى بعض ، سؤال خبيث : يا ربى الما هيه قبال العيد ولا بعده ………… عجبى

  9. أيضاً من أهم وظائف الترزيه فى زمن اليحسبون
    * تفصيل و توسيع الذمه
    * حياكة أمور التضييق على الأمه
    و ألأهم
    .
    .
    إنهم قصوا سروال البلد ليصبح أمفكووووو

  10. الترزيه زمان بيترقوا فنانين
    عثمان حسين، أبو داؤود، سيد خليفه ، الشفيع إلخ
    و بعد الأمور جاطت
    بقوا بيترقوا وزرا
    زى زولك

    إذن بحساب المنحنى التاريخى قريب حيحكمنا ترزى

  11. برات هيئة علماء السودان الحكومة السودانية من التورط فى موجة ارتفاع الاسعار والغلاء الشديد الذى يجتاح الاسواق السودانية وقالت ان الحكومة لا تتحملها الحكومة منفردة ويشترك معها الافراد والمجتمع وطالبت الهيئة التجار بالتوبة والاستغفار والعمل وفق مبادئ الشريعة الاسلامية واعتبرت ارتفاع الاسعار غير مبرر.

    وقال الامين العام للهيئة محمد عثمان صالح بعد اجتماع برئيس البرلمان السودانى فى الخرطوم امس ان التجار يضاعفون الاسعار الى عشر امثالها وكشف صالح عن دور مقدر للهيئة في وضع الدستور القادم للبلاد، واكد مطالبة الهيئة بضرورة ان يستمد الدستور الجديد قوانينه وتشريعاته من الشريعة الاسلامية، والنهج الاسلامي بعيدا عن الربا والمضاربات التى اعتبرها مضرة بالاقتصاد، داعياً الي ان يكون العرف مصدر للتشريع بجانب جمع كلمة اهل القبلة على مبادئ العدل التى افرزتها الشرائع السماوية، وسلمت الهيئة الطاهر كتيبا يحوي رؤيتها حول المبادىء الموجهة للدستور، وقال الطاهر إن اللجنة القومية لإعداد الدستور ستضم جميع الفعاليات العملية والسياسية والاقتصادية بجانب التخصصات المتعلقة بقضايا المجتمع.

  12. يا اخوان ، انا اقر و اعترف بكامل قواى العقليه انى انا السبب فى ارتفاع الاسعار …………عجبى

  13. السلام عليكم البروف والسمار الكرام
    الظاهر ناس مروقين وتتباكو معانا مجاملة …. وإلا فهل هناك من يفصل جلاليب ؟ لقد ولى ذلك الزمان وقنعنا بالجاهز الصيني إن استطعنا إليه سبيلا وإلا فـ (المرحوم قدرك) موجود إذا اقتضت الضرورة تغيير الجلابية التي زاد عمرها عن عمر الإنقاذ ( لوكان الناس ديل حكموا قبل إختراع الألياف الصناعية – أي أيام الدمورية والدبلان – كان خلونا نلبس ورق الشجر إذا لقيناهو – أو نعود للطبيعة) بس أكيد ستات الشاي كان ح يكتفوا بالرهط؟
    كيف تبريء الحكومة من الغلاء وما من مستورد إلا هو وزير أو إبن وزير أو أخيه أو …. المهم كل التجارة محتكرة بالحكومة وبعد ده كلو ما عايزين يتحملوا مسئولية الأسعار ؟ خلاص نحملها لي كوكو
    الذي يزيد غضبي هو أنني كنت في القاهرة من يناير إلى يونيو وكانت الثورة والإضطرابات و… و… ولكن 20عيشة بجنيه مصري يعني الجنيه السوداني = 40 عيشة …. وبرضو يحاكموا مبارك

  14. هل يضم هذا الدستور نصا يمنع الوزراء والمسئولين والنواب وغيرهم ممن يلون المناصب العامة من ممارسة العمل الخاص وخاصة التجارة؟ هل ينص هذا الدستور على تجريم استغلال النفوذ والسلطة في الجمارك والمواني والمطارات؟هل يتضمن هذا الدستور نصا صريحا يجرم التربح بالوظيفة؟ أعملوا نص زي ده وما ح تلاقو مؤنمر وطني وأحد يترشح لأي منصب

  15. ((هل يضم هذا الدستور نصا يمنع الوزراء والمسئولين والنواب وغيرهم ممن يلون المناصب العامة من ممارسة العمل الخاص وخاصة التجارة؟ هل ينص هذا الدستور على تجريم استغلال النفوذ والسلطة في الجمارك والمواني والمطارات؟هل يتضمن هذا الدستور نصا صريحا يجرم التربح بالوظيفة؟ أعملوا نص زي ده وما ح تلاقو مؤنمر وطني وأحد يترشح لأي منصب))

    هاسم أحوي
    إنت عايش وين
    القانون في أمازونيا
    أمشى غلط يحتار عدوك فيك

  16. كوكو الحبيب…سلام..
    هل انت جاد !؟؟؟؟

  17. اخى اب احمد الحمد لله على ام فكو يعنى البلد لسه لابسه هدوم انا خوفي يخلوها ميييييييطى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: