العبث ذات نفسو

قبل حوالي (عشرين سنة) وبتاريخ 4 يناير 1991 صدر قرار السيد رئيس الجمهورية رقم 45 بتخصيص مساحة مليون و488 ألف و144 متراً مربعاً لتشييد ما يعرف بالمدينة الرياضة وعلى الرغم من أن أى (شافع) في أى (روضة) يعلم تمام العلم بأن إنشاء مدينة رياضية مهما كانت مواصفاتها ليس بامر (صعب) على دولة تنتج 74 طن من الذهب سنوياً وحوالي 400 ألف برميل (نفط) يومياً إلا أن (مدينتنا الرياضية) لسه (خرابه) بل أصبحت مرتعاً للمشردين واللصوص ووكراً من أوكار الجريمة !
وده ما الموضوع لأنو إحتمال الحكومة عندها أولويات و(المدينه دى) يمكن تكون ما من أولوياتا … طيب الموضوع شنو .. أقول ليكم : إكتشفت وزارة الشباب والرياضة مؤخراً وجود مبان لا تمت لخارطة المدينة الرياضية التى لا زالت تحت التشييد بصلة .. وعندما تم حصر مساحات هذه المساحات التى تم (بيعها) والتى خصصت لأغراض غير أغراض المدينة وجدوا أنها تبلغ نحو (مليون) متر مربع وتحديداً (941.415) متر مربع (يعنى باعوا تلتين المدينة وخلو تلت) !!
طبعا القصة دى ما ممكن تحصل فى أى (نظام في الدنيا) .. رئيس جمهورية يصدر قرار بإنشاء مدينة رياضيه .. ويقوم المهندسون والمساحون يمشوا يمسحوا (الحتة) ويحددوا الأبعاد (بتاعتا) ويحددوا (المساحة بتاعتا) ويعملوا ليها (كروكى) يوضح جيران المدينة بالجهات الأربعة .. ويسجلوها فى الأراضى والمعماريين يقعدوا يعملوا ليها (خريطة) .. الملاعب بي جاى .. والمسابح بى هنا .. والمتفرجين بي هناك والمضمار بي جاي .. والشنو ما بعرف بي هنا .. ويتعاقدوا مع شركة ويدوها الخريطه للتنفيذ والشركة تبدأ الشغل … وبعدين وزارة الشباب والرياضة التى يتبع لها هذا المشروع تفاجأ بأن (تلتين المدينة) إتباع !!
لعلك عزيزى القارئ قد إندهشت ونفسك تسأل (البيع ده حصل كيف) ؟ مصلحة الأراضى دى بتبيع وبتسجل ساااكت؟ .. لكن العبد لله. بعد ما (خط هيثرو إتباع فى سماهو) ولسه ما عارفين (الباعو منو) بقي ما بيندهش لو أى حاجه (إتباعت) !! شنو يعنى لمن (المسئولين) يبيعوا (واطات مدينة رياضية) ؟ دى حاجة صعبه ؟ الواحد يمشى الأراضى ويقول ليهم أنا عاوز ليا قطعه فى (المدينة الرياضية) يقوم المهندس المسئول يطلع الخريطه بتاعت المدينة ويسألو :
– أها القطعه دى عاوزا فى ياتو موقع ؟
– فى الإستاد بتاع الكورة طبعن !
(وهو ينظر إلي الخريطة) : أها نديك ليها فى (دائرة السنتر) وللا في خط (طمنتاشر)؟
– والله ياخى لو لقيت ليا واحده في (خط سته) يكون كويس
– القطع بتاعت (خط سته) دى كووولها إتباعت عشان الناس كووولها عاوزه تكون قريبه من القون !
– وبعدين؟
– ما مشكلة ممكن نشوف ليك واحده (ناصية) فى خط التماس (مواصلاً) إنتا القطعه دى عاوزا سكنية وللا إستثمارية؟
– عاوزا إستثمارية !
– وعاوز تعمل فيها مشروع شنو؟
– والله عاوز أعمل فيها مطعم سياحى
– طيب (خط التماس) ده ح يكون كويس معاك ؟ أى لاعب الكورة تطلع من خصمو (رمية تماس) يخش (المحل) يضرب ليهو (بيرقر) وكباية عصير ويطلع يرميها يوصلا القون التاني !
لعلك تسأل عزيزى القارئ : أين وزارة التخطيط العمراني الولائية من هذه (الخرمجة) وما هو دورها فى إيقاف هذا العبث؟ وللإجابه علي هذا السؤال (خلي أعصابك قويه) ففي عهد (المسئول اللا مسئول) قامت وزارة التخطيط العمراني الولائية (ذات نفسها) بالمشاركه فى هذه (الخرمجة) وذلك عن طريق الاستيلاء على 999 قطعة بمساحة تقدر بحوالى 513 ألف متر مربع بثلاث مواقع مختلفة من المدينة الرياضية … (شفتو الكلام ده كيف؟) !!
لعله من المضحك (المبكى) أن يصرح بعض المسئولين المتورطين فى هذا العبث بأن (البيع) قد تم بموافقة جهات حكومية (لم تتم تسميتها) وأن الجهات التى أشترت لديها شهادات بحث صحيحة ، كيف (يا جماعة الخير) توافق هذه الجهات الحكومية على بيع جزء من أرض مسجلة فى سجلات الأراضى (بقرار رئاسى) بإسم (المدينة الرياضية) إن لم يكن هذا هو العبث ذات نفسو ؟
العبدلله بصفته مواطن وعندو نصيب و(جعل) في أموال بيت المسلمين (الهامله دى) شأنه شأن بقية مواطني الشعب الفضل يطالب بالتحقيق فى هذا العبث ومحاكمة ومعاقبة كل من تورط وشارك فى هذه (الخرمجة المقصودة) التى تسببت فى إهدار مليارات الجنيهات التى تم صرفها على هذه المدينه (حتى اللحظة) والتى تسببت فى تعطيل (إن لم يكن إلغاء) قيام هذا الصرح الذى إنتظره الرياضيون طويلاً لا سيما أن هذه الخرمجة قد طالت قراراً رئاسيا واجب التنفيذ (كما هو) .
عزيزى القارئ : بعد أن أصبحت المساحه المتبقية من المدينة الرياضية المعتدى عليها لا تصلح لأن تكون (ميدان دافوري) العبد لله يقترح على الجهات التى قامت بالبيع أن تتم (جميلا) وتبيع (الباقى) علي أن تتم تسمية المشروع (مخطط المدينة الكانت رياضية السكنى الإستثماري) حتى يكون هذا المخطط شاهداً (للأجيال القادمة) على الخرمجه والتلاعب الذى يمارسه مسئولو هذا الزمن (الأغبر) بأملاك هذا الشعب (الفضل) .
كسرة :
إقترح بعض نواب البرلمان إنشاء مدينة رياضية بديله فى مكان آخر .. العبدلله يقترح علي السيد رئيس الجمهورية عند إصداره لقراره القادم بإنشاء المدينة الرياضية (البدل فاقد) أن يشتمل (القرار الجمهورى) على مساحة المدينة الجديدة زائداً مساحة الأراضى التى سوف يتم الإعتداء عليها !!

18 تعليق

  1. سلامات ..

    يا عمك هو الريس بتاعنا دا متعود علي تكسير قرارتو … ودا ما اول قرار يكسروهو ليهو على عينك ياتاجر كدا ..

    برضو يا عمك كنت متخيلك تتكلم عن كميه الخسائر و الاسمنت الإتكبا في المدينه الكانت رياضيه ودور يوسف عبد الفتاح فيها و سياسات رامبو الارتجاليه

  2. كميه الاعمال الخرسانيه في المباني الحاليه كان ممكن يكون سد جديد يوفر مليارات

  3. رمسيدي الفاضل دكتور جبرا
    كل عام وأنتم بخير
    هذه أول مرة أتشرف فيها بالكتابة لكم ، متعك الله بالعافية ، مع أني أحد كبار (مريديك) ،،، ما يؤسف له سادتي هو أن ( الدوله) لا تهتم بما ينشر حول الفساد وكأنه يحدث في طاجكستان ، كما ان (الشعب) ينظر للحديث عن الفساد كأمر لا يعنيه…. كم مرة قرأنا لك دكتور عن فساد الشرطة وفساد الماء والهواء ، وفساد كل شئ في هذا البلد….. نشأ جيل محبط من كل شئ وليس ثمة ضوء في آخر النفق….. بوركت يادكتور ، وأفرحي ياحكومة بالسعب اللاهي
    أبو محمد

  4. المدينه الرياضيه التتحرق المهم إنو رامبو يكون مبسوط

    رامبو :- شايف الأربعه عمارات ديل،،،،،، أها أنا سويتم من المدينه الهناييه
    حصوه فى عين إللى ما يصلى على النبى 2 فى الصافيه و 2 فى الرياض

    الشى التانى و المهم إنو الخرابه دى حلت مشاكل الصرف الصحى لى ناس السوق المحلى

  5. عمك والجماعه .
    سلامات .
    بالله إتباعت ونحن ماجايبين ليها خبر .
    بالله عليكم ياجماعه الخير أوصيكم والوصية فى الزمة . لمن يعملو مدينة جديدة كلمونا عشان نشوف نشترى من منو عشان ما كل مرة نمرق بى قد القفة …
    معقولة بس…

  6. البروف والاحباب..سلام..
    ياجماعة انا زمااان سمعت تصريح لرامبو بقول انو باع جزء من الاراضى بتاعت المدينة السكنية لصالح اسر الشهداااااء! اى والله,,يعنى باعوها عشان يدعموا بيها الاسر دى,تانى شنو!؟؟ انتو ما عندكم ولاء للشهداء ولا كيف؟
    كسرة: يقال والعهدة على الراوى انو رامبو كان قدامو بيتو كم كونتينر,,شباب الحلة كتبوا فوقهم ذات ليل (المدينة الرياضية) ّ! حى انا..

  7. سلام للبروف والسمار الكرام
    تحية طيبة وخواتم مباركة وإنشاء الله من عتقاء هذا الشهر
    يا جاعة انا اتنازلت من الأرض التي مات لأجلها الآلاف فكيف أسأل في مدينة رياضية لم يعلم بوجودها أحد؟ وكل هذا من أجل أن أبقى في الحكم قول 100 أو 200 أو 1000 سنة وفي النهاية ( ما هو بمزحزحهه من العذاب أن يعمر) بس مين يتذكر دي؟
    بعدين منو قال ليك نحن عندنا نصيب في بيت مال المسلمين؟ بيت مال المسلمين ده بتاع الجماعة ونحن وما نملك ملك لبيت مال المسلمين- ده إذا كان فضلو لينا فيها “ما نملك” يعني الجلاليب الجايبها من الإمارات دي ح تلاقيها ملك بيت مال “المسلمين” لو حسبت هم دايرين منك كم من عوايد وضرائب وزكاة وانتقامات ح تكون فرحان لو خلو ليك جلابية وحتة من عمتك … ما الذي يمنعهم ما دامو وجدوا بلدا هاملة لا سيد ولا وجيع لها؟ وما دام “المواطنون” يكتفون بالسخرية ويا:لون ويشربون كما تأكل الأنعام (إن وجدوا لذلك سبيلا)؟ والله أي حاجة يعملوها فين نستاهلها ونكتفي بأن نقول لبعضنا البعض ( أرقد فإنك أنت الطاعم الكاسي) بس زولنا يرقد وهو ما طاعم ولا كاسي

  8. سامح الله الكاتب حيث ان مال الدولة هو كالسبيل لا يأثم الشاربمنه وذا كان الحال كذلك فلا نستغرب اذا بيع المواطن السوداني نفسه في ذات يوم و لكم في الفلاشا اسوة حسنة

  9. حاج أحمد السلاوى | رد

    البروف الفاتح .. ما هو الجواب باين من عنوانه.. هى وين الرياضة العندنا عشان يسوو ليها مدينة رياضية ؟هل هى الهيصة الحاصلة عندنا دى والدافورى البنشوفو كل يوم فى قناة قون ..ولا حاجة تانية ..الكورة عندنا ( أهم رياضة فى السودان ) محصورة بين فريقين إتنين وكل فريق عندو ملعب ..تانى المدينة الرياضية دايرين بيها شنو ؟ دا السبب الوحيد اللى خلا الجماعة قاموا ديل وباعو الأراضى ..ما هى أصلها جبانة هايصة ..وقالوا فى المثل دار ابوك ( أو مدينة ابوك الرياضية ) أكان خربت شيل ليك منها شلية قبال الجماعة الطيبين يكاوشوا على الباقى..ويالفاتح نصيحة أخوية لو ما إغتنيت فى العهد الزاهر دا ..تانى مش حتغتنى كولو كلو .. حصل نفسك وسوى حاجة لناجى وأخته.. دى الدنيا ما معروفة لقدام زى ما غنت البرنساية عافية حسن..

  10. حاج أحمد السلاوى | رد

    أنا أقترح إنو يستدعوا المهندس الصافى جعفر الصافى عشان يكمل ليهم المدينة الرياضية دى ..يعنى مشروع سندس أحسن من المدينة الرياضية ؟ الصافى ممكن يعمل ليكم كمين حلقة ذكر ( دلوقت هو مدير دار الذكر والذاكرين ) ويجو الجماعة الدراويش ويسووا نقطة ويلموا شوية دراهم يكملوا بيها المشروع بعد عشرين شنة إن شاء الله ..إنتو مستعجلين لاحقين شنو ؟ هى الدنيا طايرة ؟التريث واجب فى الحالات دى ..
    وخلونا النشوف آخرتا شنو..!!

  11. امبارح بعد الفطور ناس الهيلاهوب في الاسكتش بتاع ( دوبلاج بمزاااااج) جابو واحد مسؤول كبير عمل زياره لموقع المدينه الرياضيه و إطمأن على سير العمل و في آخر الزياره قال للجماعه ” كلو تمام .. لو مشيتو بالطريقه دي .. العمل حينتهي سنه 2090 إنشاءالله” .. كو

    يا جدو سلاوي : الدال على الخير كفاعله” مالك عاوز تجهجه البروف و تهديهو على الباطل و الإغتنا الحرام ياعمك؟؟؟

    برضو اول امبارح في قناة الناشيونال جيوغرافيك جابو برنامج إسمو ( إعمار جنوب افريقيا) جابو فيهو التحضيرات للمونديال الفات و كيف إنهم بنو 3 استادات عملاقه في زمن قياسي بأعلى المواصفات .. وكمان ازالو استاد قديم عشان يبنوهو من الأول ( الاستاد القديم بالنسبه لينا مانحلم بيهو مية سنه لقدام) ..

    ياعمك والله مرارتك حتتفقع … خليك في ورقك و اعمل ليك عمره عمرتين ( بالضمه) و تعال راجع إتيقن و ارجا امر الله .. ولاحول ولا قوة إلا بالله العلي العظيم

  12. أنا شايف حل أخونا حاج السلاوى ده منطقى .. يقوموا يجيبو للمدينة دى شيخ الصافي جعفر عشان نحصل بيها الدورة الأولمبية 3015 م

  13. الاخ العزيز
    مالك زعلان أعصابك
    حكاية البيع دي ماحاجة أساسية في اي حاجة عاوزة مصاريف امال يبنو المدينة بشنو ….
    اذا كانت وزارة التربية والتعليم عاوزة تبيع جز من المدارس لحساب الصيانة يعني سنتين تلاتة وتلقي أولادك بيقرو في ضل الدكاكين الاتباعت لصيانة المدرسة ….
    وبعد عشرة سنين تلقي مكتب المدير هو الفضل مع شعب السودان الفضل لإدارة امور الصيانة
    لك التحية والاحترام
     

  14. سكتنى فى البحر الوجع واجعنى فى البحر السكات

    وماناديت اذ اسمعت حياُ ولكن لا حيات لمن تنادى

    انا امكم شغالة بقاعدة دع ….. تنبح والقافلة تسير

    مع احترامى للاستاذ ولجميع القراء والمعلقين

    بقول ليكم موتو بغيظكم

  15. يا أمنا (هو نحنا موش أيتام بالله؟) يا أمنا الحكومة هو قالو ليكي نحنا لاقين الموت وما بينو؟ والله موش قادرين نموت لا بغيظنا ولا بغير غيظ … بس منتظرين لأنو عارفين الموت جاي ولو نعمر ألف سنة …. بس اليذكرك إنتي بيهو شنو؟ وصحي أنتي أم الأيتام دول لأنو باين حياتك (حيّات) موش حياة …. بس مساكين نحنا لا لامين في الحياة ولا في الحيات ولا في الموت

  16. البروف والسمار :
    يعنى المدينه الرياضية دى اولى من انو ناس عندها قروش ومزاجا عالى عاوزه تسكن فى اى حته تعجبا ؟؟؟
    والله لو جا مواطن شايل قروشو وقال عاوز شقة فى القصر الجمهورى بيكون فى مشكلة وحيده اللى هى انو يعملو ليهو باب منفصل ومنافع ما تضايق الرئيس فى منافعو ..

  17. امنا الحكومه الشعب ما حا يموت بغيظو
    حا يموت بالاهمال الفى المستشفيات وبى سرقه الاموال وبى الاختلاسات
    وفى النهايه الشعب حايموت بى قدر ربنا
    كل مريض الحكومه مسئوله منو وكل فقير كمان وكل ام بيموت ولدها وهى ما قادرة تعالجو
    امشى المستشفيات ياامنا وشوفى الناس الدمعتها فى عينها
    ياخى بس ادو الشعب الاولويات من علاج تعليم غذاء كساء
    كسرة : من مات وهو غاش لرعيته حرم عليه الله ريح الجنه

  18. حاج أحمد السلاوى | رد

    الأخ الفاتح ..كل التحايا العطرات ..
    اليوم وفى منتدى نخبة السودان جانا الخبر والتعميم االتالى من أحد الإخوة..وفيهو نوعية تانية من العبث ما عارف هل سمعت بيهو ..ولا لسه ؟.. وفى رأيى المتواضع يصلح إعادة صياغته كبوست يحمل العبث ذات نفسه (2) ..
    فحوى الموضوع هو قرارين صادرين من وزارة التجارة ..
    القرار الأول بتاريخ 25/7/2011
    والقرار التانى بتاريخ 10/8/2011
    يعنى الفرق بين القرارين اسبوعين بس أو 16 يوم بالتحديد ..
    وأخليك تطلع على القرارين على الرابط أدناه..وبرجع ليك تانى ..

    http://www.sswa.sd/ar/PDF/grar%20algmerk.pdf

    http://www.sswa.sd/ar/index.php?option=com_content&view=article&id=635:-25-2011-20-2011&catid=113:2010-12-30-11-12-54&Itemid=273

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: