إقتراح وكده

إذا أردت أن تعالج مشكلة ما فلابد عليك أن تقوم أولاً بمعرفة حجمها .. والتعرف على حجم أى مشكلة ما لابد أن يتم عبر الدراسة والإحصاءآت .. فهل يا تري تعلم الجهات المسئولة أعداد (العاطلين) عن العمل من الخريجين في هذا البلد وهل تمتلك إحصائيات بأعدادهم؟
في تقديري الشخصى أنه لا توجد جهة تمتلك هذه المعلومة للأسف الشديد ! لا أحد يهتم بهذه المأساة التى تلقى بظلالها على نواح كثيرة في المجتمع أوضحها تزايد نسبة العنوسة (وما أدراك ما العنوسة) نسبة لعدم المقدرة المادية علي مسألة الزواج وتكوين الأسرة .
في تقديري أن عدم إهتمام المجتمع و(المسئولين) بتضخم هذه المسألة وتزايد نسبتها يعود إلى عدم رؤيتها مجتمعة .. فأنت تسير فى الشارع فلا تعرف الخريج (العاطل) من الخريج الشغال .. وكذلك وأنت تقف في موقف المواصلات أو داخل إحدى البصات أو الحافلات أو بيوت العزاء والأفراح !
العبدلله لديه إقتراح يعمل علي رؤية هذه الظاهرة ومن ثم التعامل معها بجدية من أجل وضع حلول لها .. والإقتراح بسيط للغاية .. يتخرج الطالب من الجامعة وفى يوم التخريج يتم تسليمه (الشهادة) وفى ذات اللحظة تثبت على كتفيه خرقة بيضاء عليها نجمة حمراء ، ويكون على كده في أول رتبة في (جيش العطالة) وهى (م .ث. ع) ملازم ثان عاطل !
ثم يقوم الخريج العاطل بترقية نفسه وتغيير (الرتبة) كل سنتين (طيران) .. ملازم أول .. نقيب .. رائد وهكذا ! على أن يقوم بإرتداء وتثبيت هذه الرتبة كلما خرج من منزله ! ويا حبذا لو قام بتصميم ديباجة يضعها على جيبه كما في القوات النظامية فيها إسمه ورتبته مثلاً : حسن حسنين حسن : نقيب ع . ط (نقيب عاطل طبيب) ، على حسن علي : عقيد ت . م (تقنية معلومات) ! وذلك من أجل تسهيل مهمة فرز (الخريجين العواطلية) ومعرفة تخصصاتهم وكده.
الأمر قد يبدو مضحكا أو ساخراً لكنه بالقطع له فوائد عدة إذ يجعلنا نري ونشاهد بأعيننا
تضخم وتزايد هذه المأساة إذ يمكنك عزيزى القارئ بكل سهولة وأنت في (موقف المواصلات) أن تتعرف على أعداد الخريجين (العطالي) الذين يقفون وكمان (رتبهم) التى تشير إلى عدد السنوان التى قضوها في (الطيران) ! وكذلك فى جميع الأمكنة التى ترتادها .. بيوت البكاء .. صالات الأفراح .. (هلال – مريخ) وحتى (اللقاءآت الجماهيرية) التى يصرح فيها المسئولون بأن نسبة (العطالة) لا تذكر !
هذا الإقتراح قد يبدو خيالياً وغير قابل للتنفيذ لكن العبدلله يرى غير ذلك ففي ظل تجاهل الدولة والمجتمع لهذه الشريحة التى تزداد أعدادها يوماً بعد يوم لابد لهذه الشريحة من أن تعرف عن نفسها حتى تجد التعاطف من الجميع والعمل على حل مشكلاتها .
من تداعيات هذا الإقتراح :
• البت لأمها : خالد شنو الكمان بعرسوا .. ده قبل كم شهرين بس كان (عقيد .ع) يعنى ح يكون كون نفسو متين وبقى زول عرس ؟
• (عميد .ع) وهو يمر بأحد الضلله التى يجلس فيها بعض الخريجين الجدد: إنضباط مافي؟ عشرين سنه خدمة .. مش مفروض تقيفوا تدوا التحية !
• ملازم ثان لزميله : هسه (الفريق .ع) قائد الأركان ده يكون (طاير) من سنة كم؟
• الإبن لوالده : يابوى شنو شابكنى عرس بت عمك … عرس بت عمك .. يا بوى دى قبل ستة سنين كانت (رائد .ع) يعنى عمرها هسه يكون كم ؟
• توفي إلى رحمة مولاه اللواء. ع. م .م (عوض محمد عوض)، والد كل من النقيب ع. ص (معتز)، والملازم أول ع.ت. ع. ن (وائل) ، والملازم ثان ع. ت.م.ت (مأمون) وينتهى العزاء بإنتهاء مراسم الدفن !

(المفتاح ):
لواء ع. م.م = لواء عاطل مهندس (الميم الأخيره شوفا فى الكسرة) !
نقيب ع. ص = نقيب عاطل صيدلي
ملازم أول ع.ت.ع.ن = ملازم أول عاطل تربية وعلم نفس
ملازم ثان ع.ت.م.ت = ملازم أول عاطل تجارة محاسبة تكاليف
كسرة :
الميم الزائده بتاعت المرحوم اللواء ع.م (م) دى .. بتاعت معاش .. أصلو المرحوم فات (الستين) وما إشتغل !!

Advertisements

17 تعليق

  1. h aha hahaa aha..
    Ya Gabra, I admire your endless imagination….
    You ALWAYS come up with these hillarious ideas.. Super funny..
    Thank you wa “Jazak Allah Khair”..

  2. البروووف والاستااااذ1 القديير الفاتح جبرا:
    التحية والاحترااااام
    .
    .
    .
    ….
    .
    ﺑﻌﺪ ﺃﻥ ﺧﻄﻒ ﺍﻟﺸﺮﻳﺮ ﺍﻷﻣﻴﺮﺓ ﻭ ﺃﺧﺬﻫﺎ
    ﺇﻟﻰ ﻗﺼﺮﻩ ﻓﻲ ﺃﻋﻠﻰ ﺍﻟﺠﺒﻞ
    ﺫﻫﺐ ﺍﻟﺒﻄﻞ ﻹﻧﻘﺎﺫﻫﺎ ﻭﻭﺻﻞ ﺇﻟﻰ ﺍﻟﺸﺮﻳﺮ
    ﻭ ﺑﺪﺃ ﺑﻘﺘﺎﻟﻪ
    ﻭ ﻓﺠﺄﺓ ﻗﺎﻟﺖ ﺍﻷﻣﻴﺮﺓ : ﻟﺤﻈﺔ ﻟﺤﻈﺔَ !!
    ﻭ ﺳﺄﻟﺖ ﺍﻟﺒﻄﻞ: ﺃﺑﻮ ﺍﻟﺸﺒﺎﺏ، ﻋﻨﺪﻙ
    ﻓﻴﻼ ؟؟؟
    ﻗﺎﻝ ﺍﻟﺒﻄﻞ: ﻻ.
    ﻗﺎﻟﺖ: ﻋﻨﺪﻙ ﺳﻴﺎﺭﺓ ﻣﻮﺩﻳﻞ ﺳﻨﺘﻬﺎ؟
    ﻗﺎﻝ: ﻻ.
    ﻗﺎﻟﺖ : ﺷو جايبك ؟؟؟
    ﻗﺎﻝ: ﻷﻧﻘﺬﻙ ﻭﺃﺻﺒﺢ ﺃﻣﻴﺮ ﺍً.
    قالت:وريني بطاقتك؟؟
    لقتها:نقيب عاطل طبيب
    ﻗﺎﻟﺖ: ﻳﻌﻨﻲ ﺩﺍﺧﻞ ﻋﻠﻰ ﻃﻤﻊ .
    ﺛﻢ ﻫﺠﻤﺖ ﺍﻷﻣﻴﺮﺓ ﻋﻠﻰ ﺍﻟﺒﻄﻞ ﻭ ﺃﻧﻘﺬﺕ
    ﺍﻟﺸﺮﻳﺮ ﻣﻦ ﺑﻴﻦ ﻳﺪﻳﻪ
    ﻭﻋﺎﺷﺖ ﻫﻲ ﻭ ﺍﻟﺸﺮﻳﺮ ﻓﻲ ﺳﻌﺎﺩﺓ
    ﻭﻫﻨﺎﺀ

  3. ان مشكلة العطالة هي مشكلة قومية و كل الدول المتحضرة والمتطورة تعطيها اهتمام كبير و دراسات مستفيضة و لكن من يبكي على الاطلال فان السودان اصبح كله اطلال و كيف السبيل الى توظيف ذوي الكفاءات حيث ان المقياس للوظيفة هو بالولاء و تذهب الى معاينة حاسوب مثلا واول سؤال اقراء ما تيسر من قران ياخوانا انا مبرمج ولا فكي او انت من الذين ذهبو وجاهدو و استشهدو في الجنوب او في اي مكان اخر, ان الخريج العاطل هو قوة دافعة و نار متقدة ولكنها تخبو في هذا البلد الفضل وكما تقول حبوباتنا الترابة في خشمنا.

  4. حاج أحمد السلاوى | رد

    الفاتح .. مش كفاية أمنا الحكومة عملت الجامعات الفكة للشباب ديل وعلمتهم ..تانى دايرين منها شنو .. كمان عاوزنها تشغلهم ؟.. دى كتيرة ياجماعة .. المسائل بياخدوها واحدة واحدة ..
    بس فى حاجة ناقصة فى إقتراحك بتاع الديباجات والرتب العسكرية .. الحاجات مش لازم تكون بفلوس ؟ لازم الخريج يدفع عشان ياخد الرتبة بتاعته ..أصلو أمنا الحكومة حتجيب القروش دى من وين ؟ نحن لازم نساعدها عشان تساعدنا..ولا شنو يا جماعة الخير ..
    الميم الزائدة دى عجبتنى شدييييييييد.. الخريج بقا لواء .ولسه عاطل ؟ دى قوية بالحيل .

  5. البروف جبرا والسمار .
    سلامات وكل سنة وأنتو طيبين .
    والله فى وجهه نظرى المتواضعه أنا ماشايف الحكومة غلتانة فى حكاية العطالة دى لانو الحكومة وبمجرد مازادت الجامعات فى البلد بقى بدل ماتلقى العطالة معاهم شهادة سودانية بقيت تلقى العطاله معاهم شهادلت جامعية وأحيانا من حملة الماجستيرات .
    الحكومة دى تجيب ليهم وظايف من وين يعنى ماكفاية تشغل ليها من كل أسرة نفر والباقيين الشهادتو فى إيدو وعينو فى راسو بيعرف خلاصو . يخترع ليهو مشروع براهو على حسب موهبتو وحنكو بس مايزوغ من الضرايب ؟

  6. اممممممممممممممممممممممممممممممممممممممممممممم

  7. السلام عليكم ، البرف الاخوان ، اللهم اجعلنا من عتقاء هذا الشهر الكريم وقلنا فى الشهر ده نسكت ، سؤال خبيث : العلم الاتعلموه ده بقعد كم سنه ؟

  8. الاخ جبرا والاخوه الاعزاء
    والله ضحكتني هى الحكومه عارفه عدد الكانوا شغالين وبقتوم عطاله باسم الصالح العام والخصخصه والمابعرفه شنو داك…… نامن تعرف ليك عدد العاطلين
    بالمناسبه دى اليومين الفاتو ديل ماشاركت معاكم كانت بتى عيانه شويه وتقول ناس عبد المنتقم عرفونى ماجزه اول حاجه من الصباح الغاز قطع الراجل شايل الانبوبه ومارق الكهرباء خلصت قلت ليهو جيب معاك الكهربا فتح الباب لقى ناس المويه مدنقرين يحفرو فى الواطه عايزين يقطعوها ياجماعة الخير كدى اقيفه شويه نتفكه من الغاز والكهربا ولا حياة لمن تنادى المشكله بيتنا ناصيه دق الباب العلى الشرع التانى الرجل خلى ناس المويه ومشى يفتح الباب لقى ليهو وحده ماسكه دفتر قالت العوائد ولسه مااتكلم معاها جات عربية الوسخ وقدامه واحده شايله دفتر قال شنو نفايات وراجلى لسه واقف شاف بته الكبيره راجعه من المدرسه ماليك يابت ابوى قالوا ليك مواعيد القصد التانى جاء ….وانا بى جوه ماعارفه الرجه الحاصله شلت بتى العيانه وطلعته اسمع ياراجل البت دى تعبت شديد خلى الغاز دى وارحكه المستشفى واول ما سمعنى مابخلى الغاز مابخلى الغاز مابخلى الغاز انا انتحر بى شنو
    كسره
    اصلو شايلنو صالح عام (عواطليه مقننه )

  9. ياجبره بالمناسبه سر الاسماء حقتك دى شنو زى قلم الرصاص المبرى بى الجنبتين

  10. البروف جبرا : تدعو الجمعية السودانيه لمتقاعدى العطله وقدامى العاطلين جميع منسوبيها لحضور الافطار السنوى المقام على شرف تخريج 3 دفعات ( فرقا – الوية – عمدا ) بعد نيلهم درجة القواعد من العطاله الذين لا يرجون عملا بعد بلوغهم الستين وتقول لهم فى ستين !!!!
    كما يتم الاحتفاء بالدفعه الجديده من الملازمين التى سيتم تلاوة امر تعيينها فى الجمعيه وتلبيس الدبوره فى حفل خاص ..
    والله انت يوم بتجنن ليك زول بالروعه دى ..
    تحياتى ونتلاقى فى النجيله الدقاقه بعدين

  11. الاخ الفاتح
    تحياتي
    انت ما صائم ولا شنو …؟
    اخر سجارة ضربتها متين ……؟

  12. دى والله أجمل تعليقات قريتا .. إنتو الما صايمين وللا شنو يا الباشا ؟

  13. حاج أحمد السلاوى | رد

    الأخت بت وراق ..أدعو الله أن يسهل أمرك وأمر ابو العيال..وعشت معاكم الفيلم وتخيلت المنظر والواقع الأليم..لك الله يا شعب السودان الفضل ..
    برضو فى واحد قالوا كان ماشى فى الشارع وأظنه كان مشغول بهموم الحياة اليومية وبيحسب فيها وبيتكلم بينه وبين نفسه…فجأة صرخ قال لاكين كدا ما معقول ..ومن ديك وعيييييييك … مشى ركب أول صينية وسجلها بإسمه..
    بس إن شاء الله ما توصلوا المرحلة دى..وعليكم بالدعاء ..فإن دعوة المظلوم ليس بينها وبين الله حجاب
    ولسه منتظرين نشوف آخرتا شنو … !!!

  14. اخى حاج احمد انت لسه داير تشوف اخرته …..نحن اخرته وصلنه وقعر الكبايه لحسنه لقينهو حترب محنضل
    هسع المشكله المروريه الفي حلقنا دى البفكها شنوووووووووو والصوانى من الشوارع شالوها ومن البيوت جهجهوها
    (تقول لى شنو وتقول لى منو)

  15. يا جماعة منو فيكم كان جده موظفا في حكومة السودان؟ أنا شخصيا أول جيل من أهلي ياخد مرتب من الحكومة (رغم أنو جدي حارب في المهدية أظنها وظيفة بدون مرتب) ولا أجد فرصة لأكون خريج عاطل إلا وانتهزتها …الوظيفة دي حاجة جديدة … خلو الحكومة للجماعة ديل واعملو صناديق تشترو بيها ركشات

  16. قال نشغل العطالة قال؟ احنا نعلمكم ونشيل قروش نعالجكم ونشيل قروش واى حاجة فارضين عليها قروش
    اه كان شغلنا العطالة بدفعو لينا قروش ولا بندفع ليهم نحنا بعدين مادام احنا مرتاحين وفى العربات المظللة
    راكبين وللكندشة ضاربين واولادنا فى اوربا وماليزيا متعلمين مالنا ومال العاطين بعدين مع التظلليل
    نشوف العاطلين كيف باقترح عليك يااستاذ تلبس نظارة مظللة لانو الشغلة دى بينى وبينك فيها خيار وفقوس
    نشجع اقتراحك بتاع رتب العطالة
    كسرة:
    وبنفكر نفرض عليهم رسوم ضرايب وعوايد للضللة الهم شاغلينها دى
    مش فكرة

  17. بغد قرات عبد المنتقم الي هذا المقال قرر السيد ………………………. لجنه لتكوين صندوق منح الرتب الي العاطلين عن العمل والباقي معروف وشكرا
    كسرة :- لاينظر الي الطلبات الي بعد دفع الرسوم المقرره من اللجنه العليا المنبثقة من……….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: